យើងគួរតែចាប់អារម្មណ៍ពីការប្រើប្រាស់សម្ភារៈអគ្គិសនីពេលមេឃភ្លៀង និងត្រូវប្រុងប្រយ័ត្នបំផុត ពីព្រោះគ្រោះថ្នា.ក់ អាចឡើងគ្រប់ពេលវេលា ជាពិសេស ក្មេងតូចៗ ។ ចូរអនុវត្តតាម៥វិធីនេះ ដើម្បីការពារគ្រោះថ្នា.ក់ ដោយសារការប្រើប្រាស់សម្ភារៈអគ្គិសនីពេលមេឃភ្លៀង ដូចជា ៖

១-ឈប់ប្រើប្រាស់សម្ភារៈអគ្គិសនី ពេលមេឃភ្លៀង ៖ នៅពេលមានផ្គរលាន់ រន្ទះបាញ់ មេឃភ្លៀង គួរតែផ្អាកការប្រើប្រាស់សម្ភារៈអគ្គិសនីគ្រប់ប្រភេទ ដើម្បីការពារការខូចខាតដែលអាចកើតឡើងលើសម្ភារៈទាំងនេះ ក៏ដូចជាមានគ្រោះថ្នាក់ដល់ខ្លួនយើង ។

២-កុំចាប់សម្ភារៈអគ្គិសនី ពេលដៃ ឬខ្លួនសើម ៖ គ្រោះថ្នាក់ដែលកើតឡើងដោយសារអគ្គិសនីជាញឹកញាប់ពេលរដូវវស្សា គឺបណ្តាលមកពីសម្ភារៈអគ្គិសនីឆ្លងភ្លើង ហើយយើងយកដៃសើមទៅចាប់វា នឹងអាចត្រូវភ្លើងឆក់ ។ ហេតុនេះ គួរចៀសវាងបើកកុងតាក់ភ្លើង ឬដោតខ្សែភ្លើង ពេលខ្លួនសើម ឬឈរនៅកន្លែងសើម ។

៣-ពិនិត្យមើល និងជួសជុលសម្ភារៈអគ្គិសនី ៖ ពិនិត្យមើលសម្ភារៈអគ្គិសនី និងខ្សែភ្លើងទាំងអស់ថា តើវាអាចប្រើបានឬអត់ ព្រមទាំងសង្កេតភាពខុសប្លែករបស់សម្ភារៈអគ្គិសនីផងដែរ ដូចជា ៖ សំឡេង ពណ៌ និងក្លិន នៅបរិវេណដោតកុងតាក់ភ្លើង ។ បើវាខូចខាត ឬធុំក្លិនឈ្ងៀម ចូរជួសជុលជាបន្ទាន់ ជាពិសេស សម្ភារៈអគ្គិសនីដែលយកទៅប្រើប្រាស់នៅក្រៅផ្ទះ ។

៤-ប្រើប្រាស់ឧបករណ៍ការពារសុវត្ថិភាព ៖ ចូរដំឡើងឧបករណ៍ការពារភ្លើងឆក់ ដូចជា ៖ ឧបករណ៍ផ្តាច់ចរន្តអគ្គិសនីដោយស្វ័យប្រវត្តិ និងឧបករណ៍គ្រប់គ្រងថាមពល ជាពិសេស សម្ភារៈអគ្គិសនីស្រោបលោហៈ រួមមាន ៖ ទូរទឹកកក មីក្រូវ៉េវ និងម៉ាស៊ីនកំដៅទឹក ។ ក្រៅពីនេះ គួរបង្កប់ខ្សែភ្លើងក្រោមដីសម្រាប់ពេលឆ្លងភ្លើង គឺភ្លើងនឹងបញ្ជូនទៅក្រោមដី និងជួយការពារគ្រោះថ្នាក់ដោយសារការឆក់ខ្សែភ្លើង ។

៥-ដកខ្សែសម្ភារៈអគ្គិសនីចេញពីកុងតាក់ភ្លើង ពេលប្រើប្រាស់រួច ៖ ក្រោយឈប់ប្រើប្រាស់សម្ភារៈអគ្គិសនីគ្រប់ប្រភេទ កុំភ្លេចបិទកុងតាក់ភ្លើង និងដកខ្សែភ្លើងសម្ភារៈអគ្គិសនីចេញពីកុងតាក់ភ្លើងគ្រប់ពេលវេលា ៕

យោងតាមប្រភពព័ត៌មាន Newsweek កាលពីពេលថ្មីៗនេះបានឱ្យដឹងថា មហាសេដ្ឋី Elon Musk គ្រោងសាងសង់បណ្តាញផ្លូវរូងក្រោមដីចម្ងាយ ១៧ គីឡូម៉ែត្រនៅទីក្រុងឌូបៃ ដើម្បីកែទម្រង់ការដឹកជញ្ជូនក្នុងទីក្រុង។ គម្រោងនេះត្រូវបានលើកឡើងនៅឯកិច្ចប្រជុំកំពូលរដ្ឋាភិបាលពិភពលោកឆ្នាំ ២០២៥ ដែលធ្វើឡើងនៅប្រទេសអារ៉ាប់រួម (UAE)។

បច្ចុប្បន្នទីក្រុងឌូបៃកំពុងរីកចម្រើនយ៉ាងឆាប់រហ័ស ហើយក៏កំពុងប្រឈមមុខនឹងបញ្ហាជាច្រើនទាក់ទងនឹងលំហអាកាស និងនិរន្តរភាពបរិស្ថានផងដែរ។ ដូច្នេះនៅពេលដែលទីក្រុងពង្រីកតម្រូវការសម្រាប់ដំណោះស្រាយដឹកជញ្ជូនប្រកបដោយប្រសិទ្ធភាពកើនឡើង ផ្លូវរូងក្រោមដីដែលជាគម្រោងរបស់លោក Musk ក៏ជាដំណោះស្រាយដ៏ល្អមួយគួរឱ្យកត់សម្គាល់ផងដែរ ដោយសារគម្រោងនេះគឺអាចកាត់បន្ថយការកកស្ទះពីលើដី ហើយវាក៏កាត់បន្ថយផលប៉ះពាល់បរិស្ថាននៃហេដ្ឋារចនាសម្ព័ន្ធផងដែរ។

ហេតុនេះវាជាគម្រោងមួយដែលប្រទេសអារ៉ាប់រួមគួរពិចារណា។ នៅក្នុងកិច្ចប្រជុំនោះលោក Musk បាននិយាយថា “នៅពេលអ្នកសាកល្បងវា មនុស្សនឹងនិយាយថា អូ! វាពិតជាអស្ចារ្យណាស់។ បន្ទាប់មកនៅថ្ងៃទី ១៧ ខែកុម្ភៈ លោក Elon Musk បានប្រកាសថា ក្រុមហ៊ុន Boring របស់ខ្លួន នឹងសាងសង់ប្រព័ន្ធផ្លូវរូងក្រោមដីប្រវែង ១៧ គីឡូម៉ែត្រនៅទីក្រុងឌូបៃ ដោយអនុញ្ញាតឱ្យរថយន្តគ្មានអ្នកបើកបរអាចរត់ឆ្លងកាត់ដោយសេរី។

បណ្តាញផ្លូវរូងក្រោមដីថ្មីនេះមានឈ្មោះថា Dubai Loop ត្រូវបានគេរំពឹងថានឹងផ្ទុកអ្នកដំណើររហូតដល់ ២០,០០០ នាក់ក្នុងមួយម៉ោង ដោយភ្ជាប់ស្ថានីយជាង ១០០ ទៅកាន់មជ្ឈមណ្ឌលដឹកជញ្ជូន និងកន្លែងសម្គាល់សំខាន់ៗទៀតរបស់ទីក្រុង។ នេះជួយបង្កើនបទពិសោធន៍ដឹកជញ្ជូនសាធារណៈទាំងមូលសម្រាប់អ្នករស់នៅ និងអ្នកទស្សនា។ អត្ថប្រយោជន៍មួយទៀតនៃបណ្តាញដឹកជញ្ជូនក្រោមដីគឺថាវាជៀសវាងសីតុណ្ហភាពខ្លាំងដែលជាលក្ខណៈធម្មតារបស់ទីក្រុងឌូបៃ។

ហេតុនេះសរុបមកវិញ ការសាងសង់បណ្តាញផ្លូវរូងក្រោមដីចម្ងាយ ១៧ គីឡូម៉ែត្រនៅទីក្រុងឌូបៃ គឺមានគោលបំណងជួយពួកគេឱ្យជៀសផុតពីអាកាសធាតុដ៏អាក្រក់។ នេះបើយោងតាមលោក Musk បានចង្អុលបង្ហាញថា បរិយាកាសក្រោមដីនឹងកាន់តែត្រជាក់ សូម្បីតែសីតុណ្ហភាពសកលលោកកើនឡើង ដែលធ្វើឱ្យមានបទពិសោធន៍ធ្វើដំណើរប្រកបដោយផាសុកភាពជាងមុន។

Musk បានកត់សម្គាល់ថាផ្លូវរូងក្រោមដីក៏ផ្តល់នូវគុណសម្បត្តិមួយចំនួននៅក្នុងស្ថានភាពអាកាសធាតុអាក្រក់ ក៏ដូចជាធានាការជម្លៀសដោយសុវត្ថិភាពក្នុងករណីមានអាសន្នផងដែរ។ លោកបានពន្យល់ថា “ប្រសិនបើមានអាកាសធាតុអាក្រក់ ដូចជាព្យុះព្រិល ឬព្យុះខ្សាច់ គ្មាននរណាម្នាក់អាចហោះហើរបានឡើយ ប៉ុន្តែការដឹកជញ្ជូនក្រោមដីគឺមិនមានបញ្ហាទាំងនេះនោះទេ”។ ទោះជាយ៉ាងណា ការកសាងបណ្តាញផ្លូវរូងក្រោមដី គឺស្មុគស្មាញបន្តិចត្រូវបានគេរំពឹងថានឹងចំណាយពេលច្រើនឆ្នាំ៕

ទោះបីបច្ចុប្បន្នបច្ចេកវិទ្យា និងវិទ្យាសាស្រ្តជឿនលឿនប៉ុណ្ណាក៏ដោយ ក៏ប្រទេសឥណ្ឌានៅតែមានជំនឿយ៉ាងខ្លាំងទៅលើរូបសំណាកអាទិទេពរបស់ពួកគេដដែល។ យោងតាមសារព័ត៌មានបរទេស CN Traveler បានឱ្យដឹងថា ប្រាសាទចំនួន ៣ នេះត្រូវបានប្រជាជនឥណ្ឌាជឿថា ពូកែសក្តិសិទ្ធ សុំអ្វីបាននឹង។

១.ប្រាសាទ Chilkur Balaji៖ គឺជាប្រាសាទមួយដែលសាងសង់នៅសតវត្សទី ១៧ មានទីតាំងស្ថិតនៅលើច្រាំងទន្លេ Osman Sagar ក្នុង Telangana ប្រទេសឥណ្ឌា។ ប្រាសាទនេះ ត្រូវបានគេស្គាល់ថាជា “ប្រាសាទ Visa Balaji”។ ខណៈពេលដែលសហរដ្ឋអាមេរិកកំពុងពង្រឹងច្បាប់ និងចាត់វិធានការបណ្តេញជនអន្តោប្រវេស ប្រជាជនឥណ្ឌាបានមកប្រាសាទនេះ ដើម្បីបួងសួងសុំទិដ្ឋាការទៅអាមេរិក មិនយូរប៉ុន្មានការដាក់ពាក្យសុំទិដ្ឋាការនៅសហរដ្ឋអាមេរិករបស់ពួកគេត្រូវបានអនុម័តយ៉ាងឆាប់រហ័ស។
ចាប់តាំងពីពេលនោះមក ប្រាសាទនេះបានក្លាយជាកន្លែងពេញនិយមសម្រាប់អ្នកដាក់ពាក្យសុំទិដ្ឋាការ ដោយសារអត្រាជោគជ័យមិនគួរឱ្យជឿ។ អ្នកកាន់សាសនាប្រហែល ១០០.០០០ នាក់ទៅទស្សនាប្រាសាទនេះជារៀងរាល់ថ្ងៃ ជាពិសេសនៅថ្ងៃចុងសប្តាហ៍គឺមានមនុស្សច្រើនកុះករខ្លាំងណាស់។

២. Chamatkarik Shree Hanumanji Mandir-Visa Hanuman៖ គឺជាប្រាសាទហនុមានតូចមួយនៅ Khadia, Ahmedabad បានស្វាគមន៍មនុស្សរាប់រយនាក់ដែលមកបួងសួងសុំទិដ្ឋាការជារៀងរាល់ថ្ងៃ។ ប្រាសាទ “Visa Hanuman” ត្រូវបានមនុស្សជឿថាអាចធ្វើអព្ភូតហេតុដើម្បីជួយឱ្យការដាក់ពាក្យសុំទិដ្ឋាការទទួលបានជោគជ័យ។ បូជាចារ្យនៅព្រះវិហារធ្វើពិធីពិសេសដើម្បីប្រសិទ្ធពរដល់អ្នកស្វែងរកទិដ្ឋាការ ហើយជាថ្នូរនឹងពួកគេត្រូវអធិស្ឋានយ៉ាងក្លៀវក្លាចំពោះព្រះអង្គម្ចាស់ហនុមាននៅ Khadia ដើម្បីឱ្យសុបិននៃការធ្វើដំណើររបស់ពួកគេក្លាយជាការពិត។

៣.Gurdwara Shaheed Baba Nihal Singh Ji៖ ប្រាសាទដែលមានអាយុកាលជិត ១៥០ ឆ្នាំនេះ គឺជាគោលដៅដ៏ពេញនិយមសម្រាប់និស្សិត កម្មករ និងក្រុមគ្រួសារដែលមានបំណងធ្វើការ និងរស់នៅបរទេស។ នៅលើដំបូលប្រាសាទក៏មានយន្តហោះគំរូដ៏ធំមួយ ដែលបានក្លាយជានិមិត្តរូបនៃជំនឿក្នុងការធ្វើដំណើរទៅក្រៅប្រទេសប្រកបដោយជោគជ័យ។
ខណៈពេលដែលប្រាសាទភាគច្រើនទាមទារការថ្វាយផ្កា ឬអាហារ ប្រាសាទ Gurudwara Shaheed Baba Nihal Singh ពោរពេញទៅដោយយន្តហោះក្មេងលេង ដែលជាតង្វាយ ដើម្បីជាការបួងសួងស្នើសុំ “ទិដ្ឋាការ” ។ ដូច្នេះភ្ញៀវអាចទិញគំរូយន្តហោះក្មេងលេងបានយ៉ាងងាយស្រួល ដើម្បីដាក់ថ្វាយព្រះក្នុងគោលបំណងទៅរស់នៅក្រៅប្រទេស៕

លោក ASHRAF MAHROUS បានបង្កើតកំណត់ត្រាពិភពលោកចំនួនបីដងជាប់ៗគ្នា ដោយការទាញរថភ្លើងទម្ងន់ ២៧៩ តោនជាមួយនឹងធ្មេញរបស់គាត់ នៅឯស្ថានីយ៍មួយក្នុងទីក្រុង Cairo ប្រទេសអេហ្ស៊ីប។
យោងតាមប្រភពព័ត៌មាន AP និង Reuters លោក Ashraf Mahrous គឺជាអ្នកចំបាប់អេហ្ស៊ីបដ៏ល្បីល្បាញម្នាក់ ដែលគាត់ធ្លាប់បានបំបែកឯតទគ្គកម្មពិភពលោកចំនួន ៣ ដងរួចមកហើយ សម្រាប់ការទាញរថភ្លើងដែលមានទម្ងន់ធ្ងន់បំផុតដោយធ្មេញ។

ការទាញរថភ្លើងដោយកម្លាំងនៃធ្មេញគឺមិនមែនជាកិច្ចការងាយស្រួលនោះទេ ហើយក៏មិនមែនជារឿងធម្មតាឡើយ។ ប៉ុន្តែសម្រាប់អ្នកចំបាប់អេហ្ស៊ីប Ashraf Mahrous គឺគាត់បានធ្វើវាដោយជោគជ័យ ដែលបង្ហាញពីភាពខ្លាំងគួរឱ្យភ្ញាក់ផ្អើលរបស់គាត់។ កាលពីថ្ងៃទី ១៣ ខែមីនា ឆ្នាំ ២០២៥ អត្តពលិករូបនេះ បានប្រើធ្មេញរបស់គាត់ដើម្បីទាញរថភ្លើងទម្ងន់ ២៧៩ តោនដោយតភ្ជាប់ខ្សែ ហើយទាញរហូតជិត ១០ ម៉ែត្រធ្វើឱ្យមនុស្សម្នាជាច្រើនកោតសរសើរនឹងកម្លាំងមហិមារបស់លោកខ្លាំងណាស់។

ដោយសារមានការអបអរសាទរដោយហ្វូងមនុស្សយ៉ាងច្រើនសន្ធឹកសន្ធាប់ សមាជិកនៃអង្គការកំណត់ត្រាពិភពលោក Guinness នៅស្ថានីយ៍រថភ្លើង Ramses កណ្តាលទីក្រុងគែរ ក៏បានទទួលស្គាល់លោក Mahrous ថាជាបុរសខ្លាំងបំផុតក្នុងពិភពលោក។ គួរបញ្ជាក់ដែរថា លោក Mahrous បច្ចុប្បន្នមានអាយុ ៤០ ឆ្នាំ គឺជាប្រធានសហព័ន្ធកីឡាចំបាប់អាជីពអេហ្ស៊ីប ធ្លាប់ត្រូវបានទទួលស្គាល់ដោយ Guinness ក្នុងខែកុម្ភៈ ឆ្នាំ ២០២៤ សម្រាប់ការបំបែក និងទទួលទានស៊ុតឆៅចំនួន ១១ គ្រាប់ក្នុងរយៈពេល ៣០ វិនាទី។

ហើយនៅក្នុងខែមិថុនា ឆ្នាំ ២០២១ លោកក៏បានទទួលស្គាល់ម្តងទៀត សម្រាប់ការទាញឡានដឹកទំនិញទម្ងន់ជិត ១៦ តោនដោយធ្មេញរបស់លោក។ យោងតាមលោក Dawlet Elnakeb អ្នករៀបចំព្រឹត្តិការណ៍អូសរថភ្លើង បាននិយាយថា លោក Mahrous គឺបានហ្វឹកហាត់អស់រយៈពេល ២០ ថ្ងៃហើយមុនពេលបង្កើតកំណត់ត្រាទាំងនេះ៕

ប្រទេសចិន ៖ កាលពីថ្ងៃទី១៣ ខែមីនា ឆ្នាំ២០២៥ សារព័ត៌មានជប៉ុនរាយការណ៍ថា ភ្ញៀវទេសចរជប៉ុន២នាក់ មានអាយុប្រមាណ២០ឆ្នាំ ត្រូវបានអាជ្ញាធរចិនឃុំខ្លួនរយៈពេល២សប្តាហ៍ មុនពេលបណ្តេញចេញពីប្រទេសចិន ដោយសារពួកគេថតរូបពុំសមរម្យបង្ហាញគូ.ទ នៅមហាកំផែងរបស់ចិន ។ ប៉ុន្តែភ្ញៀវទេសចរជប៉ុននិយាយថា ពួកគេធ្វើបែបនេះ គ្រាន់តែជាការលេងសើចប៉ុណ្ណោះ ហើយពុំដឹងថា ការថតរូបបង្ហាញរាងកាយនៅទីសាធារណៈ ខុសច្បាប់នៅចិន ។

សារព័ត៌មាន NTV រាយការណ៍ថា ភ្ញៀវទេសចរជប៉ុន២នាក់ គឺប្រុសម្នាក់ និងនារីម្នាក់ បានទៅលេងនៅមហាកំផែងចិន ដែលជាសម្បត្តិបេតិកភណ្ឌពិភពលោក ស្ថិតនៅក្បែរទីក្រុងប៉េកាំង ។ ពេលនោះ ភ្ញៀវទេសចរប្រុសបានស្រាតខោរបស់ខ្លួនបង្ហាញគូទ ហើយឱ្យនារីមកជាមួយគ្នាជួយថតរូប ។

នៅថ្ងៃទី១៤ ខែមីនា ឆ្នាំ២០២៥ ក្រសួងការបរទេសជប៉ុនបានចេញសេចក្តីថ្លែងការណ៍ថា ៖ «បើតាមស្ថានទូតជប៉ុននៅប្រទេសចិន គឺកាលពីថ្ងៃទី៣ ខែមករា កន្លងមក ភ្ញៀវទេសចរជប៉ុន២នាក់ ត្រូវបានអាជ្ញាធរចិនចាប់ខ្លួននៅមហាកំផែង ។ ក្រោយមក អាជ្ញាធរចិនក៏បានដោះលែងពួកគេវិញ ហើយពួកគេបានធ្វើដំណើរត្រឡប់មកជប៉ុននៅខែមករា» ។

ចំណែកមន្ត្រីស្ថានទូតជប៉ុននៅទីក្រុងប៉េកាំង បដិសេធនិយាយបញ្ហានេះជាមួយប្រព័ន្ធផ្សព្វផ្សាយ ។ សារព័ត៌មានចិនរាយការណ៍ថា ភ្ញៀវទេសចរជប៉ុនទាំង២នាក់ ត្រូវបានភ្នាក់ងារសន្តិសុខនៅមហាកំផែងចិនចាប់ខ្លួនមកឃុំឃាំង រយៈពេល២សប្តាហ៍ ។

ទង្វើរបស់ភ្ញៀវទេសចរជប៉ុនធ្វើឱ្យពលរដ្ឋចិនពុំពេញចិត្តយ៉ាងខ្លាំង ពលរដ្ឋចិនភាគច្រើនលើកឡើងពីកងទ័ពជប៉ុនឈ្លានពាន និងគ្រប់គ្រងចិន ចាប់ពីឆ្នាំ១៩៣០ ដល់ឆ្នាំ១៩៤០ ។ ព័ត៌មានចិនចាប់ខ្លួនភ្ញៀវទេសចរជប៉ុន ដោយសារប្រព្រឹត្តទង្វើពុំសមរម្យនៅមហាកំផែង គឺមានចំនួនចូលទស្សនារហូតដល់ជាង៦០លានលើក នៅលើ Weibo កាលពីថ្ងៃទី១៤ ខែមីនា ហើយមនុស្សជាច្រើនបានរិះគន់ភ្ញៀវទេសចរជប៉ុនទាំង២នាក់ ខណៈអ្នកខ្លះទៀតស្ពប់ខ្ពើមអ្នកទាំង២ ។

លោក Chen Yitian ជាតារាសម្តែងចិន ដែលមានមនុស្សតាមដានក្នុង Weibo ជាង៧លាននាក់ បានរិះគន់ភ្ញៀវទេសចរជប៉ុនថា ៖ «ប្រព្រឹត្តទង្វើគួរឱ្យខ្មាស់អៀននៅមហាកំផែងរបស់ខ្ញុំ» ។ ពលរដ្ឋចិនខ្លះទៀតបានអំពាវនាវឱ្យរដ្ឋាភិបាលចិនហាមឃាត់ជនជាតិជប៉ុនទាំងអស់ចូលប្រទេសចិន ៕