ព្រលានយន្តហោះមួយបានបញ្ចប់ការសាងសង់រួចរាល់ជាស្ថាពរ ប៉ុន្តែបែរជាគ្មានយន្តហោះ និងគ្មានមនុស្សទាល់តែសោះ ព្រោះមិនអាចដាក់អោយដំណើរការបាន។

អាកាសយានដ្ឋានអន្តរជាតិថ្មីដែលមានឈ្មោះថា New Gwadar International Airportគឺជាអាកាសយានដ្ឋានដែលថ្មី និងធំជាងគេបំផុតមួយស្ថិតនៅក្នុងខេត្ត Balochistan ក្រុងGwada ប្រទេសប៉ាគីស្ថាន។ អាកាសយានដ្ឋាននេះបានបញ្ចប់ការសាងសង់កាលពីថ្ងៃទី១៤ ខែតុលា ឆ្នាំ២០២៤ នៅលើទំហំដី ៤ ៣០០ហិកតា ដែលអាចទទួលប្រភេទយន្តហោះខ្នាតយក្សដូចជា Airbus A380 និង Boeing 747-8ជាដើមអោយចុះចត និងអាចទទួលអ្នកដំណើរបានរហូតទៅដល់៤០ម៉ឺននាក់ឯណោះ។

សម្រាប់ដំណើរការសាងសង់អាកាសយានដ្ឋាននេះ ត្រូវបានប្រទេសចិនដែលត្រូវជាសម្ព័ន្ធមិត្តជិតស្និតជាអ្នកផ្ដល់មូលនិធិអោយប្រមាណ ២៤០ លានដុល្លាអាមេរិក ប៉ុន្តែក្រោយបញ្ចប់ការសាងសង់ បែរជាព្រលានយន្តហោះនេះមិនអាចបើកទទួលអ្នកដំណើរ និងយន្តហោះបាន ហើយត្រូវបានគេហៅថា “ព្រលានយន្តហោះខ្មោច” ទៅវិញ ។

យោងតាមសារព័ត៌មាន AP បានអោយដឹងថា ប្រជាជននៅក្នុងតំបន់ Balochistan មិនសប្បាយចិត្ត និងខកចិត្តចំពោះគម្រោងការសាងសង់ព្រលានថ្មីនេះ ដោយសារពួកគេមិនទទួលបានអត្ថប្រយោជន៍ណាមួយពីវា។ អ្នកស្រុកមួយចំនួនបានលើកឡើងថា ពួកគេមិនអាចដើរហើរសេរីនៅក្នុងប្រទេសរបស់គេទៀតទេ ព្រោះជាញឹកញាប់អ្នកធ្វើការនៅព្រលានយន្តហោះនោះ តែងតែសុំពិនិត្យមើលអត្តសញ្ញាណបណ្ណរបស់ពួកគេ។ មួយវិញទៀតគេសន្និដ្ឋានថា ប្រទេសចិនជួយសាងសង់ព្រលានយន្តហោះនេះឡើងដើម្បីចងភ្ជាប់រវាងប៉ាគីស្ថានទៅនឹងខេត្តXinjiang ភាគខាងលិច និងយកវាធ្វើជាច្រករបៀងសេដ្ឋកិច្ចប៉ុណ្ណោះ។

ដោយឡែកសម្រាប់ការផ្គត់ផ្គង់នៅក្នុងព្រលានយន្តហោះក៏មានបញ្ហាដែរ ដោយថាមពលអគ្គិសនីនៅក្នុងតំបន់នេះគឺបានមកពីប្រទេសអ៊ីរ៉ង់ រឺបន្ទះសឡាស្រូបទាញពន្លឺព្រះអាទិត្យ ហើយចំណែកទឹកក៏កខ្វក់ មិនមានទឹកស្អាតប្រើប្រាស់នោះទេ។

រដ្ឋមន្ត្រីការបរទេសប៉ាគីស្ថានបានបង្ហោះសារមួយតាមរយៈបណ្ដាញសង្គម “X“ ថា គម្រោងការកសាងព្រលានយន្តហោះនេះ គឺសម្រាប់បម្រើផលប្រយោជន៍របស់ចិនជាជាងផ្ដល់អោយប្រជាជននៅក្នុងប្រទេស ហើយលោកបន្តព្រមានថា ចិនអាចនឹងដាក់ “យុទ្ធសាស្រ្តអាណានិគម” លើប៉ាគីស្ថាននៅថ្ងៃណាមួយមិនខាន។

សរុបជារួម គេនៅមិនទាន់រកដំណោះស្រាយក្នុងការបើកព្រលានយន្តហោះនេះអោយដំណើរការបាននៅឡើយទេ ដោយសារខ្លាចមានការធ្វើភេរវកម្ម រឺផ្ទុះការតវ៉ាទ្រង់ទ្រាយធំណាមួយពីសំណាក់ប្រជាជននៅក្នុងតំបន់Gwadar នេះ៕

ប្រទេសថៃ ៖ ស្ត្រីភ្ញៀវទេសចរកាណាដាម្នាក់ត្រូវបានប្រទះឃើញស្លា.ប់ នៅលើឆ្នេរសមុទ្រកាតា ខេត្តភូកេត ប្រទេសថៃ កាលពីថ្ងៃទី៦ ខែមីនា ឆ្នាំ២០២៥ ហើយគ្រូពេទ្យសន្និដ្ឋានថា ដោយសារខេត្តភូកេត មានអាកាសធាតុក្តៅខ្លាំងពេក ទើបធ្វើឱ្យភ្ញៀវទេសចរដាច់សរសៃឈាមខួរក្បាលស្លា.ប់ ភ្លាមៗ (Heat Stroke) ។ ហេតុនេះ សូមភ្ញៀវទេសចរ និងពលរដ្ឋថៃថែទាំសុខភាព កុំនៅក្រោមកំដៅថ្ងៃយូរ ជាពិសេស ចាប់ពីម៉ោង១០ព្រឹក ដល់ម៉ោង៤ល្ងាច ។

អ្នកប្រទះឃើញសាកសពភ្ញៀវទេសចរមុនគេប្រាប់ថា កាលពីវេលាម៉ោង១០និង៣០នាទី ខ្លួនបានឃើញភ្ញៀវទេសចរកាណាដាដេកហាលថ្ងៃផ្គាប់មុខនៅលើឆ្នេរខ្សាច់ ប៉ុន្តែពេលដើរមកទីនេះម្តងទៀត នៅវេលាម៉ោង១និង៣០នាទី ស្រាប់តែឃើញភ្ញៀវទេសចរនៅតែដេកផ្គាប់មុខដដែល ។ ហេតុនេះ ខ្លួនក៏ផ្តល់ដំណឹងទៅសមត្ថកិច្ចឱ្យមកត្រួតពិនិត្យរាងកាយភ្ញៀវទេសចរ ។

បើតាមសមត្ថកិច្ច គឺគ្មានស្លាកស្នាមការធ្វើបាបរាងកាយទេ ប៉ុន្តែនៅជាប់ខ្លួនភ្ញៀវទេសចរ គឺមានប័ណ្ណរបស់សណ្ឋាគារ Kata Palm Resort នៅស្រុកកាតា ខេត្តស៊ីសាកេត ដែលជាកន្លែងសម្រាករបស់ភ្ញៀវទេសចរ ។ ភ្ញៀវទេសចរបានមកសម្រាកក្នុងសណ្ឋាគារតែម្នាក់ឯង តាំងពីថ្ងៃទី៣ ខែមីនា មកម៉្លេះ សមត្ថកិច្ចបានទាក់ទងទៅស្ថានទូតកាណាដារួចហើយ ដើម្បីផ្តល់ដំណឹងដល់ក្រុមគ្រួសារសាកសពឱ្យបានជ្រាប ។

ភ្ញៀវទេសចរកាណាដា អាយុ៨០ឆ្នាំ អាចស្លាប់ជាច្រើនម៉ោងមុនពេលប្រទះឃើញ ហើយគ្រូពេទ្យសន្និដ្ឋានថា មូលហេតុនៃការស្លាប់បណ្តាលមកពីភ្ញៀវទេសចរដាច់សរសៃឈាមខួរក្បាលភ្លាមៗ ដោយសារនៅខែមីនានេះ ខេត្តភូកេត មានអាកាសក្តៅខ្លាំង ។ ប៉ុន្តែគ្រូពេទ្យនឹងពិនិត្យរាងកាយសាកសពឱ្យលម្អិតបន្ថែមទៀត ។

ក្រោយហេតុការណ៍នេះ គ្រូពេទ្យបានដាស់តឿនទៅកាន់ពលរដ្ឋឱ្យប្រុងប្រយ័ត្នគ្រោះថ្នាក់សុខភាពដោយសារអាកាសធាតុក្តៅខ្លាំង ព្រោះប្រទេសថៃចូលដល់រដូវក្តៅ ធ្វើឱ្យសីតុណ្ហភាពកើនឡើងខ្ពស់ ទើបរាងកាយបាត់បង់ទឹក ។ បើរាងកាយពុំអាចបញ្ចេញកំដៅទាន់ពេលវេលាទេ គឺអាចបណ្តាលឱ្យដាច់សរសៃឈាមខួរក្បាលភ្លាមៗ និងស្លាប់ ។

ភ្ញៀវទេសចរ និងពលរដ្ឋថៃ គួរកុំនៅក្រោមកំដៅថ្ងៃយូរព ជាពិសេស ចាប់ពីម៉ោង១០ព្រឹក ដល់ម៉ោង៤ល្ងាច ។ ក្រៅពីនេះ ត្រូវផឹកទឹកឱ្យបានគ្រប់គ្រាន់ និងចៀសវាងផឹកស្រា ឬកាហ្វេ, កុំស្លៀកពាក់ក្រាស់ៗ និងពាក់មួក ឬកាន់ឆ័ត្រដើម្បីការពារកំដៅថ្ងៃ ។ បើងងឹតមុខ វិលមុខ បែកញើសច្រើន និងបេះដូងលោតញាប់ សូមប្រញាប់ទៅជ្រកក្រោមម្លប់ ផឹកទឹក ដើម្បីកាត់បន្ថយសីតុណ្ហភាពរាងកាយ ៕

ប្រទេសថៃ ៖ កាលពីថ្ងៃទី៧ ខែមីនា ឆ្នាំ២០២៥ សារព័ត៌មានថៃរាយការណ៍ថា ក្រុមហ៊ុនអាកាសចរណ៍ថៃហាមអ្នកដំណើរប្រើប្រាស់ និងសាកថ្ម Power Bank នៅលើយន្តហោះ ចាប់ពីថ្ងៃទី១៥ ខែមីនា ដើម្បីផ្តល់សុវត្ថិភាពដល់អ្នកដំណើរ ។ ការហាមឃាត់នេះ គឺក្រោយពីកើតហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍បរទេស ហើយសន្និដ្ឋានថា វាបណ្តាលមកពីការប្រើប្រាស់ Power Bank លើយន្តហោះ ។

ហេតុនេះ ទើបក្រុមហ៊ុនអាកាសចរណ៍ Thai Airways បានកំណត់វិធានការផ្តល់សុវត្ថិភាពពេលធ្វើដំណើរតាមយន្តហោះ ដោយពុំអនុញ្ញាតឱ្យអ្នកដំណើរប្រើប្រាស់ និងសាកថ្ម Power Bank លើយន្តហោះ ចាប់ពីថ្ងៃទី១៥ ខែមីនា តទៅ ។ ការកំណត់វិធានការ គឺដើម្បីផ្តល់សុវត្ថិភាពខ្ពស់ដល់អ្នកដំណើរគ្រប់រូប រួមទាំងបុគ្គលិកអាកាសចរណ៍ផងដែរ ហើយក្រុមហ៊ុនសំណូមពរឱ្យអ្នកដំណើរអនុវត្តតាមវិធានការនេះ ។

ក្នុងសេចក្តីប្រកាសរបស់ក្រុមហ៊ុន Thai Airways បញ្ជាក់ថា ដោយសារមានហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍បរទេស ហើយសន្និដ្ឋានថា គឺបណ្តាលមកពីការប្រើប្រាស់ Power Bank ពេលធ្វើដំណើរ ទើបក្រុមហ៊ុនហាមអ្នកដំណើរប្រើប្រាស់វា ។ អ្នកដំណើរអាចយកវាឡើងលើយន្តហោះបាន ប៉ុន្តែពុំអនុញ្ញាតឱ្យប្រើប្រាស់ពេលធ្វើដំណើរទេ ។

កន្លងមក ប្រទេសថៃធ្លាប់កើតហេតុការណ៍ផ្ទុះឆេះ Power Bank នៅលើយន្តហោះ១គ្រឿង ពេលចាកចេញពីអាកាសយានដ្ឋានដនមឿង ទីក្រុងបាងកក ទៅកាន់ខេត្តណាខនស្រ៊ីថាំម៉ារ៉ាជ ដែលបណ្តាលឱ្យចលាចលពេញយន្តហោះ ។ បន្ទាប់មក បុគ្គលិកអាកាសចរណ៍ក៏បានពន្លត់ភ្លើងវិញ ហើយអ្នកដំណើរទាំងអស់មានសុវត្ថិភាព ។

ដោយឡែក ក្រុមហ៊ុនអាកាសចរណ៍ជាច្រើនលើពិភពលោក ក៏បានហាមឃាត់អ្នកដំណើរប្រើប្រាស់ និងសាកថ្ម Power Bank លើយន្តហោះដែរ នាពេលកន្លងមក ដូចជា ៖ ក្រុមហ៊ុន Air Busan របស់កូរ៉េខាងត្បូង ពុំអនុញ្ញាតឱ្យអ្នកដំណើរទុក Power Bank នៅកន្លែងដាក់អីវ៉ាន់ផ្នែកខាងលើ ប៉ុន្តែអ្នកដំណើរអាចដាក់វាតាមខ្លួន ។ ក្រុមហ៊ុនបានហាមអ្នកដំណើរសាក Power Bank លើយន្តហោះ ដើម្បីកុំឱ្យ Power Bank ផ្ទុះឆេះ ។

បច្ចុប្បន្ន មនុស្សភាគច្រើនត្រូវការប្រើប្រាស់បណ្តាញសង្គមផ្សេងៗលើទូរស័ព្ទដៃរយៈពេលយូរ ជាពិសេស ក្នុងពេលធ្វើដំណើរផ្លូវឆ្ងាយ ប៉ុន្តែទូរស័ព្ទដៃរបស់ពួកគេឆាប់អស់ថ្ម ទើប Power Bank ក្លាយជាឧបករណ៍ប្រើប្រាស់ចាំបាច់សម្រាប់ដាក់តាមខ្លួន ៕