តារាសម្តែងថៃ Due Arisara កំពុងតែធ្វើឱ្យប្រព័ន្ធផ្សព្វផ្សាយក្នុងស្រុកនិងក្រៅស្រុកចាប់អារម្មណ៍យ៉ាងខ្លាំងបន្ទាប់ពីបង្ហាញរូបភាពលើបណ្តាញសង្គមយ៉ាងហាយសូរ ពេលនេះកំពុងស្ថិតក្រោមការស៊ើបអង្កេតលើបណ្តឹងក្លែងបន្លំចំនួន៦២លានបាតប្រមាណ១.៨លានដុល្លារអាម៉េរិក។ រូបនាងបានឆ្លើយសារភាពក្នុងកម្មវិធីមួយថាបានចំណាយច្រើនជាងចំណូលទើបធ្វើឱ្យអាជីវកម្មបរាជ័យ។

កាសែត bangkokpost បានចុះផ្សាយនៅថ្ងៃទី២០ មីនា ថាប៉ូលិសកំពុងស៊ើបអង្កេតលើបណ្តឹងក្លែងបន្លំរបស់មហាសេដ្ឋីផលិតផលសុខភាព និងសម្រស់ ប្រឆាំងនឹងតារាសម្ដែងថៃ Due Arisara ។ មេធាវីតំណាងឱ្យអ្នកជំនួញ Wasana បានជួបជាមួយអ្នកស៊ើបអង្កេតពីនាយកដ្ឋានបង្ក្រាបឧក្រិដ្ឋកម្ម ហៅកាត់ CSD នៅថ្ងៃទី២០នេះ ដើម្បីបង្ហាញព័ត៌មានបន្ថែមដើម្បីគាំទ្របណ្តឹងនេះ។

មេបញ្ជាការរង CSD មានប្រសាសន៍ថា ដំណើរការនេះនឹងត្រូវការពេលវេលាបន្ថែមទៀត ព្រោះវារួមបញ្ចូលការប្រមូលព័ស្តុតាង និងការសាកសួរសាក្សី។ លោកបន្តថា ប៉ូលិសមិនទាន់កោះហៅជនជាប់ចោទនៅឡើយទេ ដោយរង់ចាំលទ្ធផលនៃការស៊ើបអង្កេតដំបូង។លោកបាននិយាយថា ការកេងបន្លំអាចជាប់ពន្ធនាគាររហូតដល់ទៅ ៣ ឆ្នាំ ប៉ុន្តែការដោះស្រាយអាចធ្វើទៅបានប្រសិនបើទ្រព្យសម្បត្តិដែលបានយកត្រូវបានប្រគល់មកវិញ ហើយភាគីដែលរងការខូចខាតដកពាក្យបណ្ដឹងរបស់នាងវិញ។

លោកស្រី Wasana មានអាយុ ៤១ឆ្នាំ ជានាយកប្រតិបត្តិក្រុមហ៊ុន Revomed Co ដែលផលិតអាហារបំប៉ន និងក្រែមថែរក្សាសម្រស់ និងផ្តល់ការប្រឹក្សាលើអាជីវកម្មសុខភាព និងសម្រស់។ អ្នកជំនួញរូបនេះត្រូវបានគេរាយការណ៍ថាបានឱ្យមេធាវីរបស់ខ្លួនដាក់ពាក្យបណ្តឹងទៅ CSD កាលពីថ្ងៃទី ១១ ខែមីនាដោយចោទប្រកាន់តារាស្រី Due Arisara វ័យ ៣៤ ឆ្នាំថាបានសុំខ្ចីទំនិញម៉ាកល្បីៗ រួមមាននាឡិកា គ្រឿងអលង្ការ និងកាបូប សរុបចំនួន ៦២ លានបាត ហើយត្រូវបានគេរាយការណ៍ថារួមមានខ្សែកត្បូងមរកត និងត្បូងពេជ្រតម្លៃ ២៦ លានបាតទៀត ប៉ុន្តែមិនបានសងតាមកិច្ចព្រមព្រៀង។

មានសេចក្តីរាយការណ៍មិនបានបញ្ជាក់ថា ខ្សែកនេះឥឡូវស្ថិតក្នុងកម្មសិទ្ធរបស់រដ្ឋមន្ត្រីម្នាក់។ មេបញ្ជាការរង បានមានប្រសាសន៍ថា បើមានភាគីទីបីចូលរួម អ្នកនោះត្រូវតែបញ្ជាក់ពីភាពគ្មានកំហុសរបស់ខ្លួន។ ប្រសិនបើភាគីបានដឹងពីការកេងប្រវ័ញ្ច ហើយនៅតែមិនព្រមប្រគល់ទ្រព្យសម្បត្តិវិញអាចត្រូវបានកាត់ទោសពីបទទទួលទំនិញលួច។

មេធាវីរបស់កញ្ញាអ្នកជំនួញ Wasana បាននិយាយថា លោកបានផ្តល់ព័ត៌មានបន្ថែមដល់ប៉ូលិសដោយបន្ថែមថាករណីនេះពាក់ព័ន្ធនឹងការចោទប្រកាន់ពីបទកេងបន្លំតែប៉ុណ្ណោះ។ លោកបានមានប្រសាសន៍ថា៖ «ប្រសិនបើវត្ថុដែលខ្ចីត្រូវបានគេយកមកវិញនោះករណីនេះអាចត្រូវបានបញ្ចប់»។

ចំណែកឯមេធាវីដែលតំណាងឱ្យតារាស្រី Due Arisara បាននិយាយថា តារាស្រីរូបនេះបានទៅក្រៅប្រទេសមុននឹងចាត់វិធានការផ្លូវច្បាប់ ហើយមិនទាន់បានត្រឡប់ទៅប្រទេសថៃនៅឡើយទេ។ លោកថា កូនក្តីលោកគ្មានចេតនាគេចខ្លួនទេ។ តារាស្រី Due Arisara បានធ្វើឱ្យមានរឿងរសើបកាលពីដើមឆ្នាំ ២០២៣នៅពេលដែលនាងបានចោទប្រកាន់អតីតមិត្តប្រុសរបស់ខ្លួនថាបានបើកបណ្តាញល្បែងស៊ីសងនិងរំលោភបំពាននាងបណ្តាលឱ្យនាងភៀសខ្លួនទៅតៃវ៉ាន់។

កាលពីថ្ងៃទី១៩ មីនា តារាស្រីរូបនេះ បានចេញមុខសូមទោសអ្នកជំនួញ Wasana និងបានបញ្ជាក់ថានាងបានចំណាយច្រើនជាងចំណូលទើបធ្វើឱ្យអាជីវកម្មបរាជ័យគ្មានចេតនាបោកបញ្ជោតឡើងថែមទាំងទទួលស្គាល់ថានាងជាគំរូអាក្រក់ដល់សង្គម៕

មិនងាយនឹងចប់នោះទេទាក់ទងនឹងរឿងតារាសម្តែងកូរ៉េល្បីឈ្មោះ Kim Soo Hyun និង Kim Sae Ron ដែលមានការអូសបន្លាយជាបន្តបន្ទាប់អស់ពីរឿងមួយឈានចូលទៅរឿងមួយទៀតខណៈពេលនេះបានបែកធ្លាយមានការចោទប្រកាន់ទៅកាន់ភាគី Kim Sae Ron វិញម្តងថានាងបានចុះបញ្ជីអាពាហ៍ពិពាហ៍របស់នាងនៅអាម៉េរិកជាមួយបុរសម្នាក់ថែមទាំងមានការពពោះកន្លងមក និងការរំលូតកូនចេញផងដែរ។

នៅក្នុងការប្រកាសដ៏គួរឱ្យភ្ញាក់ផ្អើលមួយដែលមានចំណងជើងថា «ការពិតត្រូវបានលាក់ដោយគ្រួសាររបស់ Kim Sae Ron » រឿងនេះបានបង្ហាញពី YouTuber Lee Jin Ho បានពន្យល់ថា រូបថតដែលមានពាក្យថា «រៀបការ» ដែលតារាសម្តែង Kim Sae Ron វបានបង្ហោះហើយបន្ទាប់មកត្រូវបានលុបចោលយ៉ាងឆាប់រហ័សនៅក្នុងខែមករា ឆ្នាំ២០២៥គឺជារូបថតអាពាហ៍ពិពាហ៍របស់នាង។

នៅក្នុងការថតដែលចេញដោយ Lee Jin Ho តួអង្គដែលគេជឿថាជា Kim Sae Ron បានសារភាពជាមួយបុគ្គលិកក្រុមហ៊ុនថានាងមានផ្ទៃពោះ ហើយបន្ទាប់មកបានរំលូតកូនពីមុនមក។
ដូច្នោះហើយ មិត្តប្រុសរបស់ Kim Sae Ron គឺនៅក្រៅឧស្សាហកម្មកម្សាន្ត ដោយរស់នៅ និងធ្វើការនៅក្នុងសាជីវកម្មធំមួយក្នុងទីក្រុង New York។ អ្នកទាំងពីរបានជួបគ្នាតាមរយៈការណែនាំដោយមិត្តភក្តិ។ ដំបូងឡើយ Kim Sae Ron និងមិត្តប្រុស មិនមានចេតនាចង់រៀបការនោះទេ ប៉ុន្តែក្រោយពីដឹងថានាងមានផ្ទៃពោះ ហើយថែមទាំងសម្រេចចិត្តរំលូតកូនទៀត មិត្តប្រុសរបស់នាងនៅតែបន្តគំរាមតារាស្រីរូបនេះ។

ជាលទ្ធផល Kim Sae Ron យល់ព្រមរៀបការ។ អ្នកដែលគេជឿថាជា Kim Sae Ron បាននិយាយថា៖ «ខ្ញុំមានគម្រោងបែកគ្នាជាមួយមិត្តប្រុសបច្ចុប្បន្ន ហើយមិនមានគម្រោងរៀបការទេ ប៉ុន្តែខ្ញុំមានផ្ទៃពោះ»។ តាមការថតនោះ នារីដែលត្រូវគេជឿថាជា Kim Sae Ron បានសារភាពថាបានរំលូតកូនដោយសារនាងបង្ខំឱ្យរៀបការ។ នៅពេលនិយាយពីមិត្តប្រុសថ្មី Kim Sae Ron បាននិយាយថា៖ គាត់គ្រប់គ្រងគណនីបណ្ដាញសង្គមទាំងអស់របស់ខ្ញុំ ខ្ញុំមិនអាចធ្វើអ្វីបានក្រៅពីទំនាក់ទំនងគ្នាបន្តិចបន្តួចតាម Telegram និងតាមរយៈសារ។ មិត្តប្រុសរបស់ខ្ញុំមិនយល់ពីមូលហេតុដែលខ្ញុំចង់លាក់បាំងអាពាហ៍ពិពាហ៍របស់ខ្ញុំ ហើយបង្ខំខ្ញុំឱ្យផ្សព្វផ្សាយជាសាធារណៈ។ ក្នុងអំឡុងពេលឈ្លោះគ្នា ខ្ញុំបានបង្ហោះរូបថតនោះ។ គាត់មានអាកប្បកិរិយាល្អឥតខ្ចោះជាធម្មតា លើកលែងតែពេលគាត់ផឹក»។

រូបថតអ្នកទាំងពីរក្នុងពេលជាមួយគ្នាមានចំណងជើងថា «រៀបការ» ដែលបានបង្ហោះក្នុងខែមករា ឆ្នាំ២០២៥ ពិតជាមិនបានថតដោយ Kim Sae Ron ទេ។ មិត្តប្រុសរបស់នាងបានប្រើទូរស័ព្ទរបស់នាងដើម្បីបង្ហោះ ព្រោះគាត់មិនសប្បាយចិត្តដែលនាងបានរក្សាទំនាក់ទំនងរបស់ពួកគេជាអាថ៌កំបាំង។

YouTuber Lee Jin Ho បាននិយាយថាគ្រួសាររបស់ Kim Sae Ron ដឹងយ៉ាងច្បាស់ថានាងបានរៀបការជាមួយមិត្តប្រុសថ្មីរបស់នាងដោយផ្អែកលើឯកសារនៅក្នុងទូរស័ព្ទរបស់នាង។ យោងតាម YouTuber នេះ គ្រួសាររបស់តារាស្រីរូបនេះ មានចេតនាចង់បំភាន់មតិសាធារណៈ។ បច្ចុប្បន្ន គ្រួសារ Kim Sae Ron មិនបានធ្វើអត្ថាធិប្បាយជុំវិញព័ត៌មាននេះទេ។
កន្លងមក គ្រួសាររបស់ Kim Sae Ron បានប្តឹងលោក Lee Jin Ho ដោយសារតែពួកគេជឿថា បុរសនេះបានធ្វើរបាយការណ៍ព័ត៌មានជាច្រើន ផ្សព្វផ្សាយព័ត៌មានមិនពិតអំពីជីវិតឯកជនរបស់តារាស្រីរូបនេះ តាំងពីឆ្នាំ ២០២២ មកម្ល៉េះ ដែលធ្វើឱ្យនាងឈឺចាប់ និងរងអំពើហិង្សាលើបណ្តាញសង្គមអស់រយៈពេលជាយូរមុនពេលនាងស្លាប់។

ជាពិសេស ពួកគេថា Lee Jin Ho និយាយខុសរឿង Kim Sae Ron និង Kim Soo Hyun ណាត់គ្នា ធ្វើឱ្យ Kim Sae Ron ខូចចិត្ត ហើយធ្វើឱ្យអ្នកនិយមលេងអ៊ីនធឺណិតខឹងសម្បារ។ Lee Jin Ho ធ្លាប់បានបញ្ជាក់ថា ព័ត៌មានដែលផ្តល់ដោយគ្រួសារ Kim Sae Ron និង Garo Sero ក្នុងប៉ុន្មានថ្ងៃចុងក្រោយនេះ គឺមិនត្រឹមត្រូវទេ។
លើសពីនេះ នៅថ្ងៃទី ១៨ ខែមីនា ក្រុមហ៊ុនរបស់ Kim Soo Hyun ក៏បានចេញផ្សាយឯកសារចំនួន ១២ ទំព័រ ឆ្លើយតបទៅនឹងព័ត៌មានដែលបង្ហាញដោយ ន Garo Sero និងក្រុមគ្រួសាររបស់តារាស្រីរូបនេះផងដែរ។


ក្រុមហ៊ុនរបស់ Kim Soo Hyun បញ្ជាក់ថាមិនមានទំនាក់ទំនងជាមួយ YouTuber Lee Jin Ho ទេ ហើយក៏គ្មានកិច្ចសហប្រតិបត្តិការរវាងក្រុមហ៊ុន និង Lee Jin Ho ដែរ។ ក្រុមហ៊ុនរបស់ Kim Soo Hyun ក៏បាននិយាយផងដែរថា ព័ត៌មានដែលចេញផ្សាយដោយ Garo Sero គឺមិនត្រឹមត្រូវ និងបង្កឱ្យមានការយល់ច្រឡំជាសាធារណៈ។ យោងតាមប្រព័ន្ធផ្សព្វផ្សាយកូរ៉េ ក្រុមហ៊ុនគ្រប់គ្រងរបស់តារាសម្តែង Kim Soo Hyun កំពុងភ្ជាប់ទំនាក់ទំនងយ៉ាងសកម្មជាមួយអតីតបុគ្គលិក ដើម្បីស្វែងរកព័ត៌មានដើម្បីដោះស្រាយទាំងស្រុងនូវឧប្បត្តិហេតុដ៏រំខាននេះ។

តារាសម្តែង Kim Sae Ron បានទទួលមរណភាពនៅឯគេហដ្ឋានរបស់នាងក្នុងទីក្រុងសេអ៊ូល កាលពីថ្ងៃទី ១៦ ខែកុម្ភៈ។ Kim Soo Hyun កំពុងប្រឈមមុខនឹងការរិះគន់យ៉ាងចាស់ដៃពីសាធារណជន ដោយបាត់បង់អ្នកគាំទ្រជិត 1លាននាក់ និងប្រឈមនឹងហានិភ័យនៃការបង់ប្រាក់សំណងកិច្ចសន្យាដ៏ធំដល់ម៉ាកយីហោ និងផលិតករភាពយន្ត៕