ប្រទេសវៀតណាម ៖ កាលពីថ្ងៃទី១៩ ខែមីនា ឆ្នាំ២០២៥ សារព័ត៌មាន AFP រាយការណ៍ថា ភាពតានតឹងរវាងប្រទេសវៀតណាម និងចិន ដោយសារបញ្ហាសមុទ្រចិនខាងត្បូង បានធ្វើឱ្យយុវវ័យវៀតណាមឈប់ទិញតុក្កតាចិន ពីព្រោះនៅលើមុខតុក្កតាមានការសម្គាល់ភាពជាម្ចាស់កម្មសិទ្ធិរបស់ក្រុងប៉េកាំង លើដែនទឹកដែលកំពុងមានជម្លោះជាមួយវៀតណាម ។ តុក្កតាចិនជាច្រើនត្រូវបានយកចេញពីហាងជាបន្តបន្ទាប់ ដែលធ្វើឱ្យម្ចាស់ហាងត្អូញត្អែរពីការខាតបង់ដើមទុន ដោយសារការលក់ធ្លាក់ចុះខ្លាំង ។

តុក្កតា Baby Three ផលិតនៅចិន បានក្លាយជាតុក្កតាដ៏ពេញនិយមរបស់ក្មេងៗ និងយុវវ័យវៀតណាមកាលពីដើមឆ្នាំ២០២៥ ហើយហាងនៅទូទាំងប្រទេសវៀតណាម បានលក់តុក្កតាចិនដាច់អស់គ្មានសល់ ។ ប៉ុន្តែក្រោយមក ក៏មានការរិះគន់ក្នុងបណ្តាញសង្គមអំពីតុក្កតាប្រភេទ Town rabbit V2 ដោយសារលើថ្ពាល់តុក្កតា ស្រដៀងនឹងផែនទីខ្សែបន្ទាត់ចំនួន៩ របស់ចិន ។ រដ្ឋាភិបាលក្រុងប៉េកាំងបានប្រើប្រាស់ខ្សែបន្ទាត់ទាំងនេះដើម្បីអះអាងថា ខ្លួនជាម្ចាស់កម្មសិទ្ធិលើសមុទ្រចិនខាងត្បូងយូរមកហើយ ដែលធ្វើឱ្យពលរដ្ឋវៀតណាមពុំសប្បាយចិត្ត ព្រោះវៀតណាមថា ខ្លួនជាម្ចាស់កម្មសិទ្ធិនៅផ្នែកខ្លះរបស់សមុទ្រចិនខាងត្បូង ។

ក្រោយពីយុវវ័យវៀតណាមឈប់ទិញតុក្កតាចិន ក្រសួងឧស្សាហកម្ម និងពាណិជ្ជកម្មវៀតណាមបានស្នើឱ្យពិនិត្យលើមុខតុក្កតាឱ្យច្បាស់លាស់ថា ពិតជាមានខ្សែបន្ទាត់មែនឬអត់? ពីព្រោះវាប៉ះពាល់ដល់សន្តិសុខ និងអធិបតេយ្យភាពវៀតណាម ។ ដោយឡែក យុវជនម្នាក់និយាយថា តុក្កតានេះគួរឱ្យស្រឡាញ់ ប៉ុន្តែមុខវាមានខ្សែបន្ទាត់៩ ដែលបង្ហាញពីការល្មើសអធិបតេយ្យភាពវៀតណាម ខ្ញុំពុំលេងវាទេ ។

អ្នកលក់តុក្កតានៅទីក្រុងហាណូយ ប្រាប់ថា តុក្កតាដែលមានបញ្ហាភាគច្រើនត្រូវបានយកចេញពីហាងអស់ហើយ ព្រោះគ្មានអ្នកណាទិញវាទេ ។ កាលពីមុន តុក្កតានេះលក់ដាច់ខ្លាំងណាស់ រីឯការលក់តុក្កកាផ្សេងទៀតក៏ធ្លាក់ចុះដែរ ។ អាជីវករម្នាក់ត្អូញថា កាលពីមុន នាងបានលក់តុក្កតា Baby Three បាន១០០ក្បាលក្នុង១ថ្ងៃ ហើយតុក្កតាមួយតម្លៃ២០ដុល្លារ ប៉ុន្តែបច្ចុប្បន្ន ការលក់ធ្លាក់ចុះខ្លាំង បើទោះនាងទម្លាក់ថ្លៃក្តី ។ យុវវ័យគ្រប់រូបឈប់ទិញតុក្កតាចិន និងគិតថា ការទិញតុក្កតា Baby Three គឺពុំស្រឡាញ់ជាតិ ប៉ុន្តែខ្ញុំបានចំណាយដើមទុនច្រើនណាស់លើតុក្កតា ។

កាលពីឆ្នាំ២០២៣ ភាពយន្តរឿង «Barbie» ត្រូវបានហាមចាក់ផ្សាយនៅរោងភាពយន្តវៀតណាម ដោយសារមានឈុតឆាកមួយបង្ហាញពីផែនទីខ្សែបន្ទាត់ចំនួន៩ ។ មុននេះ នៅឆ្នាំ២០១៨ វៀតណាមបានកាត់ឈុតឆាករបស់ភាពយន្តរឿង «Crazy Rich Asians» ដោយសារឈុតនេះបង្ហាញពីផែនទីប្រជុំកោះនៅសមុទ្រចិនខាងត្បូងស្ថិតក្រោមការគ្រប់គ្រងរបស់ចិន ។

គួរបញ្ជាក់ថា សមុទ្រចិនខាងត្បូង គឺជាប្រភពប្រេងឥន្ធនៈ និងឧស្ម័នដ៏មានតម្លៃ ព្រមទាំងជាផ្លូវធ្វើដំណើរយ៉ាងសំខាន់ ។ ប្រទេសជិតខាងជាច្រើនរបស់ចិន រួមទាំងវៀតណាមបារម្ភថា ចិនកំពុងតែព្យាយាមពង្រីកការកាន់កាប់សមុទ្រចិនខាងត្បូង ៕

ប្រទេសហ្វាំងឡង់ ៖ ហ្វាំងឡង់បានជាប់ចំណាត់ថ្នាក់ទី១ គឺជាប្រទេសមានសេចក្តីសុខបំផុតលើពិភពលោក នៅឆ្នាំ២០២៥ រយៈពេល៨ឆ្នាំជាប់គ្នា ដែលចាត់ចំណាត់ថ្នាក់ដោយ World Happiness Report 2025 ។ រីឯប្រទេសដែលជាប់ចំណាត់ថ្នាក់ជាប្រទេសមានសេចក្តីសុខបំផុតលើពិភពលោក លំដាប់ទី២ និងទី៣ គឺដាណឺម៉ាក និងអ៊ីស្លង់ ។ ចំណាត់ថ្នាក់នេះផ្អែកលើការផ្តល់ពិន្ទុវាយតម្លៃលើការអភិវឌ្ឍផ្នែកផ្សេងៗរបស់ប្រទេសនីមួយៗ ហើយហ្វាំងឡង់ទទួលបានពិន្ទុខ្ពស់ជាងគេ ។

ការចាត់ចំណាត់ថ្នាក់នេះផ្សព្វផ្សាយដោយមជ្ឈមណ្ឌលស្រាវជ្រាវការរស់នៅរបស់សាកលវិទ្យាល័យ Oxford ។ វាជាការចាត់ចំណាត់ថ្នាក់ដោយការផ្តល់ពិន្ទុវាយតម្លៃការអភិវឌ្ឍផ្នែកផ្សេងៗ ចំនួន៦ រួមមាន ៖ ១-ផលិតផលក្នុងស្រុកសរុប (GDP), ២-ការជួយសង្គ្រោះក្នុងសង្គម, ៣-អាយុពលរដ្ឋ, ៤-សេរីភាព, ៥-សេចក្តីមេត្តា និង៦-គ្មានអំពើពុករលួយ ។ ហេតុនេះ ហ្វាំងឡង់ទទួលបានពិន្ទុមធ្យមខ្ពស់បំផុត គឺស្មើ៧.៧៥ពិន្ទុ ។

World Happiness Report 2025 បានចាត់ចំណាត់ថ្នាក់ប្រទេសសរុបចំនួន១៤៧ ហើយប្រទេសចំនួន១០ ដែលជាប់ចំណាត់ថ្នាក់ជាប្រទេសមានសេចក្តីសុខលើពិភពលោក រួមមាន ៖ ១-ហ្វាំងឡង់ ២-ដាណឺម៉ាក ៣-អ៊ីស្លង់ ៤-ស៊ុយអែត ៥-ហូឡង់ ៦-កូស្តារីកា ៧-ន័រវេស ៨-អ៊ីស្រាអែល ៩-លុចសំបួរ និង១០-ម៉ិកស៊ិក ។ រីឯប្រទេសទទួលបានពិន្ទុតិចបំផុត ឬមានសេចក្តីសុខតិចបំផុតលើពិភពលោក គឺអាហ្វហ្គានីស្ថាន ស្ថិតក្នុងលំដាប់ទី១៤៧ ។

ក្រៅពីហ្វាំងឡង់ទទួលបានពិន្ទុខ្ពស់លើការអភិវឌ្ឍផ្នែកផ្សេងៗ តើនៅមានកត្តាអ្វីខ្លះទៀតដែលធ្វើឱ្យហ្វាំងឡង់ជាប់ចំណាត់ថ្នាក់ទី១ ជាប្រទេសមានសេចក្តីសុខជាងគេលើពិភពលោក? ហ្វាំងឡង់ជាប្រទេសដ៏ល្បីល្បាញមួយ ដែលពលរដ្ឋប្រទេសនេះសម្លឹងទៅកាន់ពិភពលោកក្នុងផ្លូវវិជ្ជមាន, ផ្តល់ទំនុកចិត្តដល់គ្នា, មានទំនាក់ទំនងល្អ និងមានចិត្តសប្បុរស ។

ក្រៅពីនេះ ពលរដ្ឋហ្វាំងឡង់គួរឱ្យទុកចិត្ត និងជឿជាក់លើភាពស្មោះត្រង់របស់អ្នកដទៃ ដូចជា ៖ បើអ្នកណាម្នាក់ភ្លេច Laptop នៅបណ្ណាល័យ ឬបាត់ទូរស័ព្ទលើរថភ្លើង គឺពួកគេនឹងទទួលបានសម្ភារៈរបស់ខ្លួនវិញយ៉ាងឆាប់រហ័ស ។ រីឯក្មេងៗនៅហ្វាំងឡង់អាចជិះរថយន្តក្រុងសាធារណៈពីសាលារៀនទៅផ្ទះវិញដោយសុវត្ថិភាព ឬក្មេងៗអាចរត់លេងនៅទីធ្លាខាងក្រៅម្នាក់ឯង ដោយពុំបាច់មានឪពុកម្តាយទៅជាមួយ ។

ចំណែកដាណឺម៉ាក បានជាប់ចំណាត់ថ្នាក់ទី២ ជាប្រទេសមានសេចក្តីសុខបំផុតលើពិភពលោក ដោយសារពលរដ្ឋដាណឺម៉ាករស់នៅយ៉ាងមានសុវត្ថិភាព ហើយយុវជនពេញចិត្តនឹងជីវិតរបស់ពួកគេ ។ ទោះជាពលរដ្ឋដាណឺម៉ាកបង់ពន្ធខ្ពស់ជាងគេលើពិភពលោក គឺបង់ពន្ធរហូតដល់ពាក់កណ្តាលនៃប្រាក់ចំណូល ប៉ុន្តែពលរដ្ឋដាណឺម៉ាកទទួលបានការថែទាំសុខភាពពុំគិតថ្លៃ, រដ្ឋាភិបាលផ្តល់ប្រាក់ជួយកុមារ, និស្សិតមហាវិទ្យាល័យពុំចាំបាច់បង់ថ្លៃសិក្សា ថែមទាំងទទួលបានប្រាក់ឧបត្ថម្ភពេលកំពុងរៀន ។ ក្រៅពីនេះ មនុស្សចាស់នៅដាណឺម៉ាកទទួលបានប្រាក់ឧបត្ថម្ភ និងមានភ្នាក់ងារជួយថែទាំ ៕

IQ ត្រូវបានគេចាត់ទុកថាជាសូចនាករដ៏សំខាន់បំផុតមួយនៃភាពវៃឆ្លាតរបស់មនុស្ស។ វាអាចឆ្លុះបញ្ចាំងពីកម្រិតនៃការអប់រំ ប្រព័ន្ធសិក្សា និងកត្តាសង្គមរបស់ប្រទេសនីមួយៗ ក្នុងតំបន់អាស៊ាន រួមទាំងភាពសម្បូរបែបនៃវប្បធម៌ សេដ្ឋកិច្ច និងការអភិវឌ្ឍន៍។ ដូច្នេះក្នុងតំបន់អាស៊ានដែលមានប្រទេសប្រមាណ ១១ តើប្រទេសណាដែលមាន IQ ជាមធ្យមខ្ពស់ជាងគេបំផុត?

១.ប្រទេសសិង្ហបុរី មាន IQ រហូតដល់ ១០៥.១៤
២.ប្រទេសថៃ មាន IQ រហូតដល់ ១០១.៥២
៣.ប្រទេសម៉ាឡេស៊ី ជាមួយ IQ ១០០.៤៨
៤.ប្រទេសវៀតណាម មាន IQ ១០០.១២
៥.ប្រទេសប្រ៊ុយណេ មាន IQ ៩៨.១៤
៦.ប្រទេសមីយ៉ាន់ម៉ា មាន IQ ៩៧.៣៧
៧.ប្រទេសហ្វីលីពីន មាន IQ ៩៦.៦៦
៨.ប្រទេសកម្ពុជា មាន IQ ៩៣.៩៧
៩.ប្រទេសឥណ្ឌូនេស៊ី ជាមួយ IQ ៩៣.១៨
១០.ប្រទេសឡាវ ដែលមាន IQ ៩២.០៥។

គួរបញ្ជាក់ដែរថា ចំណាត់ថ្នាក់នេះត្រូវបានរៀបចំឡើងដោយគេហទំព័រ International IQ test ជាមួយនឹងមនុស្សជាង ១.៤ លាននាក់នៅទូទាំងពិភពលោកដែលធ្វើតេស្ត IQ តាមរយៈគេហទំព័រនេះ។ ក្នុងនោះប្រទេសកម្ពុជាយើងមាន IQ រហូតដល់ ៩៣.៩៧ ឈរនៅចំណាត់ថ្នាក់លេខ ៩៤ ក្នុងចំណោមប្រទេស ១២៦ ជុំវិញពិភពលោក និងលេខ ៨ នៅក្នុងតំបន់អាស៊ាន៕

អបអរសាទរ! ទីបំផុតអវកាសយានិក២រូបនៃទីភ្នាក់ងារអវកាសអាមេរិក NASA គឺលោក Butch Wilmore និងលោកស្រី Suni Wiliams បានវិលត្រឡប់ចុះមកដល់ផ្ទៃផែនដីវិញដោយសុវត្ថិភាពហើយ កាលពីថ្ងៃអង្គារ ទី១៨ ខែមីនា បន្ទាប់ពីអ្នកទាំង២បានជាប់ក្នុងស្ថានីយ ISS អស់រយៈពេល៩ខែកន្លងមកនេះ។

លោក Wilmore និងលោកស្រី Wiliams បានចុះមកដល់ភពផែនដីវិញហើយ កាលពីថ្ងៃទី១៨ ខែមីនានេះ ដោយទម្លាក់យានចុះចតនៅក្នុងសមុទ្រចំណុច Off The Coast នៃរដ្ឋ Florida ដែលបានប្រើប្រាស់រយៈពេលអស់ ១៧ម៉ោង។ ការអាចវិលត្រឡប់មកដល់ផែនដីសារជាថ្មីវិញរបស់អ្នកទាំង២ គឺតាមរយៈការជួយជ្រោមជ្រែងរបស់ក្រុមហ៊ុន space X។

គួររំលឹកថា ដំបូងលោក Wilmore និងលោកស្រី Wiliams បានធ្វើដំណើរឡើងទៅកាន់ទីអវកាសនៃស្ថានីយអវកាសអន្តរជាតិ (ISS) ដែលកំណត់ត្រឹមរយៈពេល៨ថ្ងៃ នឹងវិលចុះមកផែនដីវិញ។ ប៉ុន្តែក្រោយមក យាន Starliner ដែលអ្នកទាំងពីរជិះក៏ស្រាប់តែបានជួបបញ្ហា ជាហេតុធ្វើឱ្យ NASA សម្រេចចិត្តពន្យារពេលត្រឡប់មកវិញរបស់ពួកគេ ដែលបណ្ដាលអោយពួកគេចំណាយពេលស្នាក់នៅលើស្ថានីយ ISS សរុប២៨៦ថ្ងៃ។

គួរឱ្យដឹងថា អវកាសយានិកដែលបានវិលមកកាន់ផែនដីវិញ មានចំនួន ៤នាក់ ដែលក្នុងនោះមានអវកាសដែលជាប់គាំងរបស់NASA ទាំង២នាក់ និង ២នាក់ទៀត គឺជាក្រុមការងារនៃបេសកកម្ម Crew-9 ដែលបានហោះឡើងទៅកាន់លំហរកាលពីខែសីហា ឆ្នាំ២០២៤ កន្លងទៅ ដើម្បីធ្វើបេសកកម្មផ្លាស់ប្ដូរគ្នា និងនាំអ្នកទាំង២ មកវិញ។

ការវិលត្រឡប់មកកាន់ភពផែនដីវិញបានដោយសុវត្ថិភាព ក្រោយជាប់គាំងលើអវកាសច្រើនខែនេះដែរ មិនត្រឹមតែជាបទពិសោធដែលមិនអាចបំភ្លេចបានសម្រាប់អវកាសយានិកទាំង ២ រូបនោះទេ ប៉ុន្តែវាក៏ជាព្រឹត្តិការណ៍មួយដែលបានទាក់ទាញចំណាប់អារម្មណ៍មហាជនលើសកលលោកផងដែរ៕

ពណ៌រថយន្តគឺជាកត្តាដ៏សំខាន់មួយ ដែលអ្នកប្រើប្រាស់ត្រូវតែដឹង នៅពេលសម្រេចចិត្តទិញរថយន្ត។ ក្រៅពីភាពស្រស់ស្អាត និងចំណូលចិត្តផ្ទាល់ខ្លួន ការថែទាំថ្នាំលាបរថយន្ត ក៏ជារឿងចាំបាច់បំផុតដែលអ្នកមិនគួរមើលរំលងនោះទេ ដោយសារតែពណ៌រថយន្តមួយចំនួនអាចពិបាកថែទាំជាងពណ៌ផ្សេងទៀត។ដូច្នេះយោងតាមគេហទំព័របរទេសបច្ចេកវិទ្យាមួយ បានចែករំលែក នឹងណែនាំពណ៌រថយន្តដែលងាយស្រួលបំផុតក្នុងការថែរក្សា រួមទាំងមូលហេតុដែលធ្វើឱ្យពណ៌រថយន្តមួយចំនួនពិបាកថែទាំជាងពណ៌ផ្សេងទៀត។

ខាងក្រោមនេះគឺជាពណ៌រថយន្តដែលពិបាកថែទាំបំផុត៖
១.ពណ៌ខ្មៅ៖ មនុស្សជាច្រើនគិតថាពណ៌ខ្មៅមិនងាយប្រឡាក់ ផ្ទុយទៅវិញពណ៌ខ្មៅគឺជាពណ៌ដែលពិបាកថែរក្សាបំផុត ព្រោះវាងាយមើលឃើញស្នាមឆ្កូត និងកខ្វក់ខ្លាំង ទោះបីវាជាពណ៌ដ៏ស្រស់ស្អាត និងប្រណីតក៏ដោយ។
២.ពណ៌ក្រហម៖ ពណ៌ក្រហមគឺជាពណ៌ភ្លឺ និងទាក់ទាញភ្នែក ប៉ុន្តែវាក៏ជាពណ៌ដែលងាយរសាយ ឬហើពណ៌លឿនបំផុត នៅពេលត្រូវពន្លឺថ្ងៃ។
៣.ពណ៌ខៀវ៖ ពណ៌ខៀវគឺជាពណ៌ទាន់សម័យ ប៉ុន្តែវាក៏ជាពណ៌ដែលបង្ហាញពីការកោស និងភាពកខ្វក់បានយ៉ាងងាយផងដែរ។

ហេតុនេះពណ៌ដែលលោកអ្នកគួរជ្រើសរើស និងងាយស្រួលថែទាំនោះមានដូចជា៖
១.ពណ៌ប្រាក់៖ ពណ៌ប្រាក់គឺជាពណ៌ងាយស្រួលបំផុតក្នុងការថែរក្សា ដោយសារតែវាពិបាកក្នុងការមើលឃើញស្នាមប្រេះ និងស្នាមប្រឡាក់ ហើយពណ៌នេះក៏ប្រើប្រាស់បានយូរប្រឆាំងនឹងពន្លឺព្រះអាទិត្យ រួមទាំងលក្ខខណ្ឌអាកាសធាតុផងដែរ។
២.ពណ៌ប្រផេះ៖ ពណ៌ប្រផេះគឺជាពណ៌ដែលងាយស្រួលថែរក្សា ដូចជាពណ៌ប្រាក់ដែរ ដោយសារតែវាពិបាកក្នុងការមើលឃើញការកោស និងភាពកខ្វក់ លើសពីនេះទៀតពណ៌ប្រផេះក៏ជាពណ៌ដែលមើលទៅលេចធ្លោរផងដែរ។
៣.ពណ៌ស៖ ពណ៌សគឺជាពណ៌ងាយស្រួលថែរក្សាបំផុត ដោយសារតែវាពិបាកក្នុងការមើលឃើញកោស និងស្នាមប្រឡាក់ លើសពីនេះទៀតពណ៌សក៏ជាពណ៌ដែលឆ្លុះបញ្ចាំងពីកំដៅបានយ៉ាងល្អ និងរក្សារថយន្តរបស់អ្នកពីការឡើងកំដៅទៀតផង។

ពិតណាស់ ការជ្រើសរើសពណ៌រថយន្តដែលងាយស្រួលថែទាំ វានឹងជួយសន្សំសំចៃពេលវេលា និងប្រាក់បន្ថែមលើការថែទាំរថយន្ត ទោះជាយ៉ាងណាក៏ដោយ មិនថាអ្នកជ្រើសរើសពណ៌រថយន្តណានោះទេ អ្នកក៏គួរថែទាំរថយន្តរបស់អ្នកជាប្រចាំ ដើម្បីឱ្យរថយន្តរបស់អ្នកមើលទៅល្អ និងប្រើប្រាស់បានយូរ៕

សហរដ្ឋអាមេរិក ៖ អគារតាំងបង្ហាញរថយន្ត Tesla ជាច្រើនកន្លែងនៅសហរដ្ឋអាមេរិក និងប្រទេសនានា បានក្លាយជាគោលដៅវាយប្រ.ហារដោយគ្រាប់កាំភ្លើ.ង គ្រាប់បែកផ្ទុះ និងការដុតបំផ្លា.ញ ។ ទោះជាហេតុការណ៍ទាំងនេះពុំបង្កឱ្យមនុស្សណាម្នាក់រងរបួសក្តី ប៉ុន្តែការវាយប្រហារលើរថយន្ត Tesla បានកើនឡើងជាបន្តបន្ទាប់ តាំងពីលោក Donald Trump ត្រឡប់មកឡើងកាន់តំណែងជាប្រធានាធិបតីអាមេរិក ហើយតែងតែងលោក Elon Musk ជារដ្ឋមន្ត្រីក្រសួងប្រសិទ្ធភាពរដ្ឋាភិបាល (DOGE) ទទួលខុសត្រូវការងារកាត់បន្ថយការចំណាយរបស់រដ្ឋ ។

នៅទីក្រុងជាច្រើនរបស់អាមេរិកដែលប្រឆាំងនឹងលោក Trump និងលោក Elon Musk បានកើតហេតុការណ៍វាយប្រហាររថយន្ត Tesla ជាញឹកញាប់ ដូចជា ៖ ស្ត្រីម្នាក់នៅរដ្ឋខូឡូរ៉ាដូ បានដាក់គ្រាប់បែក និងនិយាយពាក្យថា «Nazi Cars» ទៅកាន់អគារតាំងបង្ហាញរថយន្ត Tesla ។ រីឯនៅរដ្ឋសោនខេរ៉ូឡៃណា សមត្ថកិច្ចបានចាប់ខ្លួនបុរសម្នាក់ ក្រោយពីដុតស្ថានីយសាករថយន្ត Tesla ហើយសមត្ថកិច្ចរកឃើញថា បុរសនេះបានសរសេររិះគន់រដ្ឋាភិបាល និងក្រសួងប្រសិទ្ធភាពរដ្ឋាភិបាល ។

ចំណែកបុរសម្នាក់ទៀតនៅរដ្ឋអូរិហ្គន បានដាក់គ្រាប់បែក និងបាញ់ទៅអគារតាំងបង្ហាញរថយន្ត Tesla នៅទីក្រុងសាឡឺម ខណៈរថយន្ត Cybertruck ចំនួន៤គ្រឿងនៅទីក្រុង Seattle ត្រូវបានជនមិនស្គាល់មុខដុតនៅចំណតរថយន្ត ។ ក្រៅពីនេះ មានការដុតរថយន្ត Tesla ជាច្រើនគ្រឿងនៅទីក្រុងឡាសវ៉េហ្គាស និងសរសេរពាក្យថា «Resist» នៅលើជញ្ជាំង ។

ភ្នាក់ងារ FBI បានស៊ើបអង្កេតរកមូលហេតុនៃការដុតរថយន្ត Tesla ជាច្រើនកន្លែងនៅអាមេរិកនារយៈពេលចុងក្រោយនេះ ដោយទំនាក់ជាមួយអាជ្ញាធរមូលដ្ឋាន និងមន្ត្រីរដ្ឋាភិបាល ដើម្បីចាប់ខ្លួនជនល្មើសមកដាក់ទោសតាមច្បាប់ ។

លោក Elon Musk នាយកក្រុមហ៊ុនរថយន្ត Tesla និងជាអ្នកជិតស្និទ្ធជាមួយលោក Trump បាននិយាយមកកាន់ប្រព័ន្ធផ្សព្វផ្សាយ កាលពីថ្ងៃទី១៨ ខែមីនា ថា លោកភ្ញាក់ផ្អើលនឹងអំពើហិង្សា និងការស្អប់ខ្ពើមលោក ដោយការបំផ្លាញរថយន្ត Tesla នារយៈពេលចុងក្រោយនេះ ។

លោកបានសរសេរក្នុងបណ្តាញសង្គម X ថា ការវាយប្រហារនេះគ្មានមូលហេតុ និងខុសធ្ងន់ណាស់ ក្រុមហ៊ុន Tesla គ្រាន់តែផលិតរថយន្តអគ្គិសនី និងពុំបានធ្វើអ្វីដែលសមនឹងទទួលការវាយប្រហារធ្ងន់ធ្ងរបែបនេះទេ ។ តាមការត្រួតពិនិត្យបានរកឃើញអំពើពុករលួយ ហើយមនុស្សទាំងនេះចង់សម្លាប់លោក ដោយសារលោកបញ្ឈប់អំពើពុករលួយ ។ មូលហេតុដែលលោកធ្វើការងារជារដ្ឋមន្ត្រីក្រសួងប្រសិទ្ធភាពរដ្ឋាភិបាល (DOGE) ដោយសារបារម្ភពីអាមេរិកនឹងរលាយដោយសារអំពើពុករលួយ ។ គ្រប់គ្នាជិះលើទូកអាមេរិក គួរតែធ្វើគ្រប់យ៉ាងដើម្បីឱ្យអាមេរិករឹងមាំទៅថ្ងៃអនាគត ។

គួរបញ្ជាក់ថា លោក Trump និងលោក Elon Musk បានកាត់បន្ថយមន្ត្រីរដ្ឋាភិបាលអាមេរិក រហូតដល់ជាង១សែននាក់ ហើយការកាត់បន្ថយមន្ត្រីរដ្ឋាភិបាលភាគច្រើន គឺផ្តោតលើអ្នកធ្វើការមិនដល់១ឆ្នាំ ៕

សហរដ្ឋអាមេរិក ៖ តាមរបាយការណ៍របស់សេតវិមានបង្ហាញថា ប្រធានាធិបតីអាមេរិក លោក Donald Trump នឹងចុះហត្ថលេខាលើបទបញ្ជាប្រតិបត្តិបិទក្រសួងអប់រំចោល ដែលជាការធ្វើតាមសន្យារបស់ប្រធានាធិបតីអាមេរិកពេលរកសំឡេងឆ្នោត ។ ប៉ុន្តែការបិទក្រសួងអប់រំមានការជំទាស់ពីអ្នកប្រជាធិបតេយ្យមួយក្រុមនៅរដ្ឋជឿជាក់លើគណបក្សប្រជាធិបតេយ្យ (Democrat) ដែលបានដាក់ពាក្យបណ្ដឹងតវ៉ាមិនឱ្យលោក Trump បិទក្រសួងអប់រំ និងបញ្ឈប់ការបណ្តេញមន្ត្រីរដ្ឋាភិបាលជិតពាក់កណ្តាល ។ នេះបើតាមការចុះផ្សាយរបស់សារព័ត៌មាន Reuters កាលពីថ្ងៃទី២០ ខែមីនា ឆ្នាំ២០២៥ ។

NAACP គឺជាក្រុមសិទ្ធិមនុស្សបានរិះគន់ការបិទក្រសួងអប់រំថា វាផ្ទុយនឹងរដ្ឋធម្មនុញ្ញ ។ លោក Derrick Johnson ប្រធានក្រុមសិទ្ធិមនុស្ស NAACP បានសរសេរក្នុងសេចក្តីថ្លែងការណ៍ថា ៖ «នេះជាថ្ងៃដ៏ខ្មៅងងឹតសម្រាប់កុមារអាមេរិករាប់លាននាក់ដែលពឹងផ្អែកលើប្រាក់ឧបត្ថម្ភពីរដ្ឋាភិបាល ដើម្បីទទួលបានការអប់រំមានគុណភាព ព្រមទាំងប៉ះពាល់កុមារមកពីសហគមន៍ក្រីក្រ និងជនបទ ដែលឪពុកម្តាយពួកគេបានបោះឆ្នោតគាំទ្រលោក Trump» ។

លោក Trump និងលោក Elon Musk ជាទីប្រឹក្សា ព្យាយាមបិទក្រសួង និងស្ថាប័នផ្សេងៗ ដូចជា ៖ ការិយាល័យអភិវឌ្ឍន៍បរទេសរបស់អាមេរិក ដោយគ្មានការអនុម័តពីរដ្ឋសភា ។ ការបិទក្រសួងអប់រំ គឺជាការព្យាយាមលើកដំបូងរបស់លោក Trump ក្នុងការបិទស្ថាប័នថ្នាក់ក្រសួង ។ លោក Trump ពុំអាចបិទក្រសួងអប់រំទេ បើគ្មានការអនុម័តពីរដ្ឋសភា បើទោះជាគណបក្សសាធារណរដ្ឋ (Republican) របស់លោក មានសំឡេងគាំទ្រ៥៣ ទល់នឹង៤៧ ក្នុងព្រឹទ្ធសភាក្តី ។

ប៉ុន្តែច្បាប់សំខាន់ជាង ដូចជា ៖ សេចក្តីព្រាងច្បាប់រំលាយស្ថាប័នថ្នាក់ក្រសួង ត្រូវតែមានសំឡេងគាំទ្រ៦០ និងមានការគាំទ្រពីគណបក្សប្រជាធិបតេយ្យ ចំនួន៧សំឡេង ទើបបញ្ជូនទៅឱ្យរដ្ឋសភាអនុម័ត ។ រីឯសមាជិកគណបក្សប្រជាធិបតេយ្យក្នុងព្រឹទ្ធសភា ពុំគាំទ្រការបិទក្រសួងអប់រំទេ ។ ការបិទក្រសួងអប់រំបានកំណត់ឱ្យលោកស្រី Linda McMahon រដ្ឋមន្ត្រីក្រសួងអប់រំ ដំណើរការតាមលក្ខខណ្ឌចាំបាច់ទាំងអស់ដើម្បីបិទក្រសួងនេះ និងប្រគល់អំណាចក្រសួងអប់រំទៅឱ្យរដ្ឋនានា ។

របាយការណ៍របស់សេតវិមានបញ្ជាក់ថា វាធ្វើឱ្យកូនសិស្ស អាណាព្យាបាល និងគ្រូបង្រៀនខកចិត្តយ៉ាងខ្លាំងពីប្រព័ន្ធគ្រប់គ្រងការអប់រំ ហើយក្រសួងអប់រំបានចំណាយប្រាក់អស់ជាង៣លានលានដុល្លារ តាំងពីឆ្នាំ១៩៧៩ ប៉ុន្តែពុំបានធ្វើឱ្យការសិក្សារបស់សិស្សល្អប្រសើរទេ ។ លោក Trump បានស្នើបិទក្រសួងអប់រំតាំងពីឡើងកាន់តំណែងដំបូងម៉្លេះ ប៉ុន្តែរដ្ឋសភាពុំចាត់វិធានការ ។ កាលពីខែកុម្ភៈ ឆ្នាំ២០២៥ លោក Trump និយាយថា លោកចង់បិទក្រសួងនេះចោលភ្លាមៗ ប៉ុន្តែត្រូវរង់ចាំការយល់ព្រមពីរដ្ឋសភា និងសហជីពគ្រូបង្រៀន ។

អ្នកជំទាស់នឹងការបិទក្រសួងអប់រំ និយាយថា វានឹងប៉ះពាល់ដល់ប្រាក់ឧបត្ថម្ភរាប់លានដុល្លារសម្រាប់សាលារៀនមត្តេយ្យ រហូតដល់សាលាមធ្យមសិក្សា និងប៉ះពាល់ថ្លៃសិក្សារបស់សិស្សវិទ្យាល័យ ។ ក្រសួងអប់រំបានគ្រប់គ្រងសាលារៀនរដ្ឋ ចំនួន១សែនកន្លែង និងសាលារៀនឯកជន ៣ម៉ឺន៤ពាន់កន្លែងនៅអាមេរិក ទោះជាប្រាក់ឧបត្ថម្ភរបស់សាលារដ្ឋ ជាង៨៥% បានទទួលពីរដ្ឋាភិបាលក្តី ប៉ុន្តែក្រសួងអប់រំបានផ្តល់ជំនួយដល់សាលាខ្វះខាត ព្រមទាំងផ្តល់ប្រាក់ឱ្យគ្រូដែលបង្រៀនកុមារមានតម្រូវការពិសេស ។ ក្រសួងអប់រំក៏ទទួលខុសត្រូវលើការផ្តល់ប្រាក់កម្ចីឱ្យសិស្សរាប់លានដុល្លារទៀត ដែលពលរដ្ឋអាមេរិករាប់លាននាក់គ្មានលទ្ធភាពបង់ថ្លៃសិក្សាឱ្យកូននៅសាកលវិទ្យាល័យ ៕