ប្រទេសចិន ៖ កាលពីថ្ងៃទី៩ ខែមេសា ឆ្នាំ២០២៥ សារព័ត៌មាន China Xinhua រាយការណ៍ថា ក្រសួងពាណិជ្ជកម្មចិននឹងប្តឹងអាមេរិកទៅកាន់អង្គការពាណិជ្ជកម្មពិភពលោក (WTO) ករណីអាមេរិកដំឡើងពន្ធទំនិញចិនខ្ពស់ ។ លើសពីនេះ គណៈកម្មការពន្ធចិននឹងដំឡើងពន្ធទំនិញនាំចូលពីអាមេរិក ស្មើ៨៤% អនុវត្តចាប់ពីថ្ងៃទី១០ ខែមេសា ក្រោយពីអាមេរិកដំឡើងពន្ធទំនិញចិនខ្ពស់ជាបន្តបន្ទាប់ ដែលចិនចាត់ទុកថា អាមេរិកបានប្រព្រឹត្តទង្វើខុសឆ្គងយ៉ាងខ្លាំង ព្រមទាំងល្មើសសិទ្ធិ និងផលប្រយោជន៍ស្របច្បាប់របស់ចិនយ៉ាងធ្ងន់ធ្ងរ ។

បើតាមមន្ត្រីនាំពាក្យក្រសួងពាណិជ្ជកម្មចិន គឺការដំឡើងពន្ធទំនិញខ្ពស់របស់អាមេរិក ជាការល្មើសច្បាប់អង្គការពាណិជ្ជកម្មពិភពលោកយ៉ាងខ្លាំង ហើយជាកំហុសឆ្គងដ៏ធំមួយរួមផ្សំទាំងកំហុសពីមុន ។ ហេតុនេះ ទង្វើរបស់អាមេរិកបង្ហាញពីការគំរាមកំហែងមកលើចិនតែម្ខាង ហើយចិនប្តេជ្ញាចិត្តយ៉ាងមុតមាំការពារសិទ្ធិ និងផលប្រយោជន៍ដោយស្របច្បាប់តាមច្បាប់អង្គការពាណិជ្ជកម្មពិភពលោក, គាំទ្រប្រព័ន្ធពាណិជ្ជកម្មពហុភាគី, គាំទ្រសេដ្ឋកិច្ច និងពាណិជ្ជកម្មអន្តរជាតិ ។

កាលពីថ្ងៃទី៩ ខែមេសា កន្លងមក លោក លីន ជៀន មន្ត្រីនាំពាក្យក្រសួងការបរទេសចិន បានអំពាវនាវឱ្យអាមេរិកបញ្ឈប់អាកប្បកិរិយាក្រអឺតក្រទម និងគំរាមកំហែង ដោយលោកបញ្ជាក់ថា បើចង់ដោះស្រាយបញ្ហាតាមរយៈការចរចាគ្នា អាមេរិកគួរតែបង្ហាញអាកប្បកិរិយាគោរពគ្នាទៅវិញទៅមកដោយស្មើភាព ព្រមទាំងមើលពីផលប្រយោជន៍រួមគ្នា ។ ប៉ុន្តែបើអាមេរិកមិនអើពើនឹងផលប្រយោជន៍ជាមួយចិន រួមទាំងផលប្រយោជន៍ពិភពលោក ហើយអាមេរិកនៅតែបន្តធ្វើសង្គ្រាមពាណិជ្ជកម្ម ចិននឹងចាត់វិធានការវិញ ។

មុនពេលចិនដំឡើងពន្ធទំនិញអាមេរិក ស្មើ៨៤% រដ្ឋាភិបាលចិនបញ្ជាក់ថា ពុំចង់ប្រឈមនឹងសង្គ្រាមពាណិជ្ជកម្មទេ ប៉ុន្តែចិនមិនអាចនៅស្ងៀមបណ្តោយឱ្យសិទ្ធិ និងផលប្រយោជន៍ស្របច្បាប់របស់ខ្លួនត្រូវខូចខាតឡើយ ។

ដោយឡែក ប្រធានាធិបតីអាមេរិក លោក Donald Trump ថ្លែងថា អាមេរិកនឹងទទួលបានចំណូលពន្ធ ចំនួន២,០០០លានដុល្លារក្នុង១ថ្ងៃ កន្លងមក មានប្រទេសជាង៧០ប្រទេស បានសុំចរចាពាណិជ្ជកម្មជាមួយអាមេរិក ។ មេដឹកនាំអាមេរិកជឿជាក់ថា គោលនយោបាយដំឡើងពន្ធរបស់ខ្លួននឹងជួយស្តារឧស្សាហកម្មអាមេរិក ហើយលោកបានបង្ខំឱ្យក្រុមហ៊ុននានាផ្លាស់ប្តូរទីតាំងផលិតទំនិញមកអាមេរិក ។

ចិនដំឡើងពន្ធទំនិញអាមេរិកវិញ ស្មើ៨៤% បានធ្វើឱ្យប្រទេសនានាលើពិភពលោក បារម្ភពីការផ្ទុះសង្គ្រាមពាណិជ្ជកម្មរវាងចិន និងអាមេរិកកាន់តែខ្លាំងឡើង ។ ការដំឡើងពន្ធទំនិញអាមេរិក គឺចិនបានធ្វើឡើងមិនប៉ុន្មានម៉ោង ក្រោយពីលោក Trump ដំឡើងពន្ធទំនិញចិនខ្ពស់ ស្មើ១០៤% រីឯការដំឡើងពន្ធទំនិញចិនលើកចុងក្រោយបង្អស់ ស្មើ១២៥% ចិនពុំទាន់មានវិធានការឆ្លើយតបវិញទេ ។

នៅថ្ងៃទី១០ ខែមេសា នេះ សារព័ត៌មានបរទេសរាយការណ៍ថា លោក Trump បានដំឡើងពន្ធទំនិញចិនបន្ថែមទៀត រហូតដល់១២៥% និងអនុវត្តភ្លាមៗ ប៉ុន្តែលោកនឹងផ្អាកការប្រមូលពន្ធខ្ពស់ (Reciprocal Tariff) ពីប្រទេសផ្សេងៗ រយៈពេល៩០ថ្ងៃ ដោយលោកប្រមូលតែពន្ធទំនិញអប្បបរមា ស្មើ១០% ប៉ុណ្ណោះ ។ លោក Trump បានសរសេរក្នុងបណ្តាញសង្គម Truth Social ថា ៖ «ដោយសារចិនមិនគោរពទីផ្សារពិភពលោក ទើបខ្ញុំដំឡើងពន្ធទំនិញចិន ស្មើ១២៥%» ៕

ប្រទេសចិន ៖ រដ្ឋាភិបាលចិននឹងឆ្លើយតប និងចាត់វិធានការជាច្រើនដើម្បីការពារផលប្រយោជន៍ ក្រោយពីប្រធានាធិបតីអាមេរិក លោក Donald Trump ចាប់ផ្តើមដំឡើងពន្ធខ្ពស់លើទំនិញនាំចូលពីចិនជាបន្តបន្ទាប់ ព្រមទាំងអំពាវនាវឱ្យប្រទេសនានាលើពិភពលោក សហការជាមួយចិន រួបរួមគ្នាប្រឆាំងនឹងរបបផ្តា.ច់ការពាណិជ្ជកម្មរបស់​លោក Trump ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៩ ខែមេសា ឆ្នាំ២០២៥ ។

មន្ត្រីនាំពាក្យក្រសួងការបរទេសចិនបាននិយាយកាលពីថ្ងៃទី៩ ខែមេសា កន្លងមកថា អាមេរិកនៅតែដំឡើងពន្ធទំនិញចិនខ្ពស់តាមអំពើចិត្តរបស់ខ្លួន និងដាក់សម្ពាធចិនខ្លាំងបំផុតមិនឈប់ឈរ ។ ហេតុនេះ ចិននឹងប្រឆាំងដាច់ខាត ហើយចិនគ្មានថ្ងៃទទួលយកអំណាច ឬការគំរាមកំហែងណាមួយឡើយ ។ បើអាមេរិកពុំគិតពីផលប្រយោជន៍របស់ប្រទេសទាំង២ និងផលប្រយោជន៍ពិភពលោក ហើយនៅតែប្រកាន់យកសង្គ្រាមពាណិជ្ជកម្ម ចិននឹងតស៊ូជាមួយអាមេរិក រហូតដល់ទីបំផុត ។

ប្រទេសចិនបានបង្ហាញគោលជំហរប្រឆាំងនឹងអាមេរិក ក្រោយពីលោក Trump ដំឡើងពន្ធទំនិញចិនខ្ពស់ជាបន្តបន្ទាប់ ចាប់ពី២០% រហូតដល់១០៤% និងកើនឡើងដល់១២៥% ដោយសារចិនពុំព្រមលុបចោលការដំឡើងពន្ធទំនិញអាមេរិក ។

ដូចគ្នានេះ មន្ត្រីក្រសួងពាណិជ្ជកម្មចិននិយាយថា ចិននឹងចាត់វិធានការជាច្រើនដើម្បីឆ្លើយតបជាមួយអាមេរិក ហើយចិននឹងតស៊ូរហូតដល់ទីបំផុត បើអាមេរិកនៅតែរឹតបន្តឹងពាណិជ្ជកម្ម និងសេដ្ឋកិច្ច ពីព្រោះគ្មានប្រទេសណាមួយឈ្នះក្នុងសង្គ្រាមពាណិជ្ជកម្មទេ ។ ទោះយ៉ាងណា ចិនចង់ចរចាជាមួយអាមេរិកអំពីបញ្ហាសេដ្ឋកិច្ច និងពាណិជ្ជកម្មទ្វេភាគីដោយស្មើភាព ដើម្បីកាត់បន្ថយក្តីបារម្ភរបស់ភាគីនីមួយៗ ។

ក្រៅពីចិន នៅមានប្រទេសជាង៦០ទៀត បានប្រឈមនឹងអត្រាពន្ធទំនិញខ្ពស់របស់លោក Trump ដូចជា ៖ ពន្ធទំនិញកម្ពុជា ស្មើ៤៩%, វៀតណាម ៤៦%, ថៃ ៣៦%, កូរ៉េខាងត្បូង ២៥%, ជប៉ុន ២៤% និងបណ្តាប្រទេសនៅសហភាពអឺរ៉ុប ២០% ។

តាមការចុះផ្សាយរបស់កាសែតចិន China Daily គឺរដ្ឋាភិបាលចិនបានអំពាវនាវឱ្យប្រទេសនានាលើពិភពលោក រួបរួមគ្នាប្រឆាំងនឹងការដំឡើងពន្ធទំនិញរបស់លោក Trump ហើយចិនជឿជាក់ថា ការរួបរួមគ្នារបស់ប្រទេសនានា នឹងអាចយកឈ្នះលើអំណាចពាណិជ្ជកម្ម ។ បច្ចុប្បន្ន ចិនបានសហការជាមួយជប៉ុន កូរ៉េខាងត្បូង និងប្រទេសផ្សេងៗនៅតំបន់អាស៊ី ព្រមទាំងអំពាវនាវឱ្យសហភាពអឺរ៉ុបសហការជាមួយចិន ដើម្បីរក្សាពាណិជ្ជកម្មសេរី និងពហុភាគីនិយម ។

សង្គ្រាមពាណិជ្ជកម្មនឹងអូសបន្លាយយូរ និងផ្លាស់ប្តូរសេដ្ឋកិច្ចពិភពលោក ជារៀងរហូត ។ ទោះជាសង្គ្រាមពាណិជ្ជកម្មបញ្ចប់ដោយការចរចា, ការយល់ព្រមដកថយរបស់ប្រទេសណាមួយ ឬការប្រឈមមុខជាមួយគ្នាបន្តទៀត ប៉ុន្តែវានឹងមានផលប៉ះពាល់ដល់ពលរដ្ឋរបស់ប្រទេសទាំងអស់ ដូចជា ៖ តម្លៃទូរស័ព្ទស្មាតហ្វូនកើនឡើង, ការខ្វះខាតទំនិញមួយចំនួន និងសេដ្ឋកិច្ចពិភពលោក រង្គោះរង្គើ ។ នេះបើតាមការលើកឡើងរបស់អ្នកជំនាញសេដ្ឋកិច្ច ៕

ការធ្វើដំណើរទៅក្រៅប្រទេស មិនថាក្នុងលក្ខខណ្ឌទៅកម្សាន្ត បន្តការសិក្សា ឬធុរកិច្ចផ្សេងៗទេ គឺប្រៀបបានដូចជាការផ្សងព្រេងដ៏អស្ចារ្យអញ្ចឹងដែរ ដែលផ្តល់ឱកាសឲ្យអ្នកស្វែងយល់ពីវប្បធម៌ ជួបមនុស្សថ្មីៗ និងបង្កើតអនុស្សាវរីយ៍ដែលមិនអាចបំភ្លេចបាន។ ទោះជាយ៉ាងណាក៏ដោយ ការឈានជើងចូលក្នុងទឹកដីដែលអ្នកមិនធ្លាប់ស្គាល់ពីមុន ក៏អាចកើតមានជាមួយនឹងបញ្ហាប្រឈមផងដែរ បើទោះបីជាប្រទេសនានាភាគច្រើនផ្តល់សិទ្ធសេរីភាពឲ្យភ្ញៀវទេសចរណ៏ទៅលេងក៏ដោយ។

ដើម្បីធានាបាននូវបទពិសោធន៍ថ្មីៗដោយគ្មានការរំខាន វាជារឿងចាំបាច់ណាស់ដែលអ្នកត្រូវយល់ដឹងអំពីច្បាប់អន្តោប្រវេសន៍ បទដ្ឋានវប្បធម៌ និងហានិភ័យដែលអាចកើតមានជាយថាហេតុ។ ខាងក្រោមនេះ ជាមគ្គុទ្ទេសក៍សំខាន់ៗដែលអ្នកធ្វើដំណើរគ្រប់រូបគួរដឹងមុនពេលឆ្លងដែន៖

១៖ ស្វែងយល់ពីច្បាប់អន្តោប្រវេសន៍ ប្រទេសនីមួយៗមានតម្រូវការអន្តោប្រវេសន៍ជាក់លាក់ណាស់ រួមទាំងទិដ្ឋាការ ភស្តុតាងនៃការធ្វើដំណើរបន្ត និងកំណត់ត្រាចាក់វ៉ាក់សាំងជាដើម។ ស្រាវជ្រាវព័ត៌មានលម្អិតទាំងនេះសិនមុនពេលធ្វើដំណើរ ដើម្បីជៀសវាងការផាកពិន័យ ការនិរទេស ឬការហាមឃាត់ការចូលតែម្ដង។
២ ជៀសវាងការទទួលសំណើរជនចម្លែក ការដឹកជញ្ជូនទំនិញឲ្យអ្នកដទៃអាចពាក់ព័ន្ធនឹងអ្នកដោយអចេតនាប្រសិនបើវាស្ថិតក្នុងសកម្មភាពខុសច្បាប់។ គួរបដិសេធប្រសិនបើនរណាម្នាក់ឲ្យអ្នកកាន់ឬផ្ញើរបស់សបរនៅនឹងអ្នក ហើយក៏ប្រុងប្រយ័ត្នចំពោះឥវ៉ាន់របស់អ្នកផងដែរ។
៣ គោរពច្បាប់មូលដ្ឋាន និងគយ អ្វីដែលអ្នកតែងធ្វើនៅប្រទេសអ្នក អាចត្រូវបានហាមឃាត់យ៉ាងតឹងរ៉ឹងនៅប្រទេសផ្សេង មិនថាសកម្មភាព ការស្លៀកពាក់ ឬឥរិយាបទរបស់អ្នកជាដើម។ ដូចនេះត្រូវយល់ដឹងបទប្បញ្ញត្តិក្នុងប្រទេសដែលអ្នកទៅជាមុនសិនដើម្បីទប់ស្កាត់បញ្ហា។
៤ ការរត់ពន្ធគ្រឿងញៀនមិនមែនជារឿងកំប្លែងទេ ប្រទេសជាច្រើនអនុវត្តការផាកពិន័យយ៉ាងធ្ងន់ធ្ងរចំពោះបទល្មើសទាក់ទងនឹងគ្រឿងញៀន រួមទាំងការជាប់ពន្ធនាគារ ឬសូម្បីតែការប្រហារជីវិត។ ពិនិត្យឥវ៉ាន់របស់អ្នកឱ្យបានហ្មត់ចត់ ដើម្បីឱ្យប្រាកដថាអ្នកមិនបានដឹកជញ្ជូនវាដោយអចេតនា។
៥ ការរឹតត្បិតការឆ្លងដែន ប្រទេសមួយចំនួនអាចដាក់កម្រិតលើការចូល ដោយផ្អែកលើប្រវត្តិធ្វើដំណើរ ឬសញ្ជាតិរបស់អ្នក។ សូមពិនិត្យមើលច្បាប់ទាំងនេះឲ្យបានច្បាស់លាស់ ហើយរៀបចំផែនការទៅតាមនោះ ដើម្បីជៀសវាងការខកចិត្ត។
៦ ប្រកាន់ខ្ជាប់នូវបទប្បញ្ញត្តិរូបិយប័ណ្ណ ត្រូវដឹងពីដែនកំណត់លើរូបិយប័ណ្ណបរទេស និងមិនគួរមានសាច់ប្រាក់ច្រើនពេក ដើម្បីជៀសវាងការរឹបអូស ឬពិន័យ។ ពិនិត្យមើលអត្រាប្តូរប្រាក់ជានិច្ច ដើម្បីប្រើប្រាស់ថវិកាធ្វើដំណើររបស់អ្នកឱ្យបានសមគួរបំផុត។
៧ រក្សាសុវត្ថិភាព និងសុខភាពឲ្យល្អ ត្រូវពិនិត្យសុខភាពជាមុនសិនមុននឹងធ្វើដំនើតទៅក្រៅប្រទេស ជាពិសេសប្រទេសមួយចំនួនតម្រូវឲ្យចាក់វ៉ាក់សាំងការពារជាក់លាក់ ដូចជា ជំងឺគ្រុនលឿង ឬកូវីដ-១៩ ជាដើម លើសពីនេះគួរមានការធានារ៉ាប់រងសុខភាពក្នុងការធ្វើដំណើរ ដែលអាចជាជំនួយសង្គ្រោះជីវិតក្នុងពេលមានអាសន្ន។
៨ ប្រយ័ត្នឥរិយាបថនៅទីសាធារណៈ និងការថតរូបរបស់អ្នក សកម្មភាពដូចជាការថតរូបអគាររដ្ឋាភិបាល ឬចូលរួមក្នុងការរិះគន់ផ្នែកនយោបាយ អាចត្រូវបានចាត់ទុកថាមិនគោរព ឬខុសច្បាប់នៅកន្លែងខ្លះ។
៩ មានទំនាក់ទំនងជាមួយអ្នកសង្គ្រោះបន្ទាន់ រក្សាបញ្ជីទំនាក់ទំនងសំខាន់ៗទុក រួមទាំងស្ថានទូត និងអាជ្ញាធរមូលដ្ឋាន ដើម្បីរកដំនោះស្រាយក្នុងស្ថានភាពដែលមិនរំពឹងទុកប្រកបដោយប្រសិទ្ធភាព។
១០ ចុះឈ្មោះជាមួយស្ថានទូតរបស់អ្នក ការចុះឈ្មោះការធ្វើដំណើរអាចជួយអ្នកក្នុងការធ្វើបច្ចុប្បន្នភាពលើការជូនដំណឹងសុវត្ថិភាព និងអនុញ្ញាតឱ្យស្ថានទូតរបស់អ្នកទាក់ទងអ្នកក្នុងអំឡុងពេលមានអាសន្ន ដូចជាភាពចលាចលនយោបាយ ឬគ្រោះមហន្តរាយធម្មជាតិជាដើម៕

បម្រែបម្រួលអាកាសធាតុកំពុងធ្វើឲ្យកម្ដៅផែនដីកើនឡើងជារៀងរាល់ឆ្នាំ ហើយតំបន់អាក់ទិកកំពុងទទួលឥទ្ធិពលកម្ដៅច្រើនជាងតំបន់ដទៃទៀត។ នៅពេលដែលទឹកកករលាយ អ្នកវិទ្យាសាស្ត្របានព្រមានថា មេរោគដែលកកនៅក្នុងទឹកកក ដែលជារឿយៗហៅថា “មេរោគខ្មោចឆៅ” អាចនឹងត្រូវបានចេញមកក្រៅ។ មេរោគទាំងនេះត្រូវបានកកក្នុងស្រទាប់ផែនដី និងទឹកកកអស់រយៈពេលរាប់ម៉ឺនឆ្នាំ ដោយដេកលក់នៅក្នុងសំណល់សត្វ និងក្នុងដី។

ជាច្រើនឆ្នាំមកនេះ អ្នកវិទ្យាសាស្ត្របានដឹងហើយថា មេរោគដែលកកហើយនៅតែអាចឆ្លងបាន។ ការស្រាវជ្រាវបានធ្វើអោយមេរោគដូចជា Pithovirus sibericum ដែលបង្កកអស់រយៈពេលជាង ៣០,០០០ ឆ្នាំ និង Amoeba ដែលបង្កកអស់រយៈពេល ៤៨,៥០០ ឆ្នាំដឹងខ្លួនឡើងវិញ។ ការសិក្សាទាំងនេះបញ្ជាក់ថា មេរោគដែលកកអាចឆ្លងដល់សារពាង្គកាយមានជីវិត បើទោះបីជាវាត្រូវបានកកអស់រយៈពេលរាប់ម៉ឺនឆ្នាំក៏ដោយ។

ផ្ទាំងទឹកកកដែលផ្ទុកវីរុសកក រលាយលឿនជាងការរំពឹងទុកទៅទៀត ហើយការរកឃើញនាពេលថ្មីៗនេះនៅក្នុងផ្ទាំងទឹកកករបស់ប្រទេសចិនបានបង្ហាញពីមេរោគដែលកកចំនួន ១៧០០ ដែលភាគច្រើនមិនធ្លាប់មានពីមុនមក។ ទោះបីជាមេរោគទាំងនេះមានសុវត្ថិភាព នៅពេលដែលវានៅតែកកក៏ដោយ ប៉ុន្តែការរលាយទឹកកកអាចឱ្យពួកវារួចចេញមកបរិស្ថានខាងក្រៅ ដែលបង្កគ្រោះថ្នាក់ដល់សត្វ ប្រព័ន្ធអេកូឡូស៊ី និងមនុស្ស។

សេណារីយ៉ូដែលគួរឲ្យព្រួយបារម្ភបំផុតគឺនៅពេលដែលមេរោគ ឬបាក់តេរីឆ្លងដល់សត្វមុន ហើយបន្ទាប់មកវានឹងរីករាលដាលដល់មនុស្ស ដែលនេះជាបាតុភូតមួយហៅថា ជំងឺឆ្លងពីសត្វទៅមនុស្ស ឬ zoonotic ។ នៅតំបន់អាក់ទិក ហានិភ័យទាំងនេះនឹងត្រូវបានកើនឡើង ដោយសារតែប្រព័ន្ធអេកូឡូស៊ី និងរបាំងរវាងមនុស្ស និងសត្វ កំពុងផ្លាស់ប្តូរយ៉ាងឆាប់រហ័ស ដោយសារការរលាយទឹកកក។ ដូចជាកាលពីឆ្នាំ ២០១៦ ជំងឺឆ្លង anthrax បានរួចចេញពីគ្រោងឆ្អឹងសាកសពសត្វដែលកក បន្ទាប់ពីទឹកកកបានរលាយក្នុងតំបន់ Siberia ដែលធ្វើឲ្យប៉ះពាល់ដល់ជីវិតមនុស្សរាប់រយនាក់។ សោកនាដកម្មនេះបញ្ជាក់យ៉ាងច្បាស់ថា មេរោគជំងឺដែលកកហើយ អាចនឹងលេចឡើងនៅពេលដែលផ្ទាំងទឹកកកស្រទាប់ផែនដី រលាយ។

តំបន់អាក់ទិកគឺងាយរងគ្រោះខ្លាំង ដោយសារតែហេដ្ឋារចនាសម្ព័ន្ធវេជ្ជសាស្រ្តមានកម្រិត។ ជំងឺឆ្នងនឹងអាចរីករាលដាលយ៉ាងទូលំទូលាយ មុនពេលត្រូវបានគេរកឃើញ និងអាចគ្រប់គ្រងវាបាន ដែលធ្វើឱ្យតំបន់អាក់ទិកនឹងក្លាយជាចំណុចចាប់ផ្តើមដ៏គ្រោះថ្នាក់នៃជំងឺឆ្លងរាតត្បាត។ អ្នកវិទ្យាសាស្ត្របានប៉ាន់ប្រមាណថាវីរុសជាង ៤ពាន់លាន អាចរួចចេញពីផ្ទាំងទឹកកកស្រទាប់ផែនដី ជារៀងរាល់ឆ្នាំ ហើយបើសូម្បីតែប្រភាគតូចៗមួយក៏អាចបង្កគ្រោះថ្នាក់ នោះបរិមាណវីរុសដ៏ច្រើនសណ្ធឹកដែលអាចរួចចេញមកនេះនឹងធ្វើឱ្យមានគ្រោះថ្នាក់ខ្លាំងពិបាកនឹងមិនអើពើជាមិនខាន។

អ្នកជំនាញនិយាយថា យើងត្រូវសិក្សាលើបញ្ហានេះបន្ថែមទៀត ដើម្បីត្រៀមបង្ការ និងទប់ស្កាត់ការរាតត្បាតដែលអាចកើតមានឡើង។ ការប្រែប្រួលអាកាសធាតុមិនមែនគ្រាន់តែជាបញ្ហានៃការកើនឡើងកម្ដៅភពផែនដីប៉ុណ្ណោះទេ វាក៏កំពុងរលាយរបាំងរវាងប្រព័ន្ធអេកូឡូស៊ី សត្វ និងមនុស្ស ហើយនឹងបង្កើនឱកាសឲ្យជំងឺថ្មីៗដែលលេចឡើងផងដែរ។ ខណៈពេលដែលបញ្ហានេះហាក់ដូចជាមិនសូវទទួលបានការចាប់អារម្មណ៍ពីមនុស្សមួយចំនួន អ្នកវិទ្យាសាស្ត្របានព្រមានថាអ្វីដែលកើតឡើងនៅតំបន់អាក់ទិកនឹងមិនស្ថិតតែនៅក្នុងតំបន់អាក់ទិកនោះទេ ឥទ្ធិពលនេះនឹងក្លាយជាទឹករលកដែលអាចទៅដល់គ្រប់ជ្រុងនៃពិភពលោក។

រដ្ឋវ៉ាស៊ីនតោន៖ សេតវិមានបាននិយាយកាលពីថ្ងៃអង្គារថា ពន្ធរបស់ប្រធានាធិបតី Donald Trump លើការនាំចូលទំនិញពីប្រទេសចិន ត្រូវបានកំណត់ថានឹងកើនឡើងដល់ 104% ខណៈដែលទីក្រុងប៉េកាំងបដិសេធមិនព្រមដកពន្ធសងសឹករបស់ខ្លួនលើការនាំចេញរបស់សហរដ្ឋអាមេរិក។

យោងតាមសារព័ត៌មានCNN នៅយប់ថ្ងៃអង្គារ ថ្ងៃទី៨ ខែមេសា បានឲ្យដឹងថា៖ អ្នកនាំពាក្យសេតវិមានលោកស្រី Karoline Leavitt បាននិយាយនៅក្នុងសន្និសីទកាសែតខ្លីមួយជាមួយអ្នកយកព័ត៌មានថា “វាជាកំហុសមួយសម្រាប់ប្រទេសចិនក្នុងការសងសឹកមកកាន់អាមេរិក។ ហើយពន្ធទំនិញ 104% នឹងចូលជាធរមានលើប្រទេសចិននៅយប់នេះនាពាក់កណ្តាលអធ្រាត្រ។”

ការសម្រេចរបស់អាមេរិកក្នុងការដំឡើងពន្ធលើទំនិញចិនដល់ ១០៤% នៅពេលនេះ គឺជាការបន្ថែម៥០%ទៀតទៅលើពន្ធទំនិញដែលបានកំណត់កាលពីចុងខែមីនា ដោយក្នុងនោះមានពន្ធគយចំនួន ២០% និងពន្ធទំនិញ ៣៤% ដែលជាពន្ធបន្ថែមក្រោយពេលចិនបានសងសឹកមកកាន់អាមេរិក និងចុងក្រោយនេះ លោក Donald Trump សម្រេចបន្ថែម ៥០% ពីលើទៀត បានធ្វើអោយពន្ធសម្រាប់ប្រទេសចិនបានកើនឡើងដល់ ១០៤%។

អ្នកស្រី Leavitt បានបន្តថា ៖ លោកTrump ជឿថា ” ប្រទេសចិន និងប្រធានាធិបតីចិនលោកXi Jinping ចង់សុំចរចាធ្វើកិច្ចព្រមព្រៀងជាមួយអាមេរិកដែរ ប៉ុន្តែគ្រាន់តែពួកគេ មិនដឹងថាត្រូវចាប់ផ្តើមវាដោយរបៀបណា” ដោយអ្នកស្រី Leavitt បានបន្ថែមទៀតថា ៖ ប្រសិនបើប្រទេសចិនមកសុំចរចាជាមួយលោក Donald Trump ប្រហែលជាគាត់នឹងមានចិត្តសប្បុរសហើយ ប៉ុន្តែគាត់នឹងធ្វើអ្វីដែលល្អបំផុតសម្រាប់ប្រជាជនអាមេរិក។

ក្រុងប៉េកាំងកាលពីថ្ងៃអង្គារបានចេញសេចក្ដីថ្កោលទោសយ៉ាងម៉ឺងម៉ាត់ក្នុងការឆ្លើយតបទៅនឹងការគំរាមកំហែងរបស់លោក Trump នៃពន្ធបន្ថែម 50% លើការនាំចូលរបស់ចិនដោយហៅទង្វើនេះថា “ការគំរាមកំហែង” ព្រមទាំងប្តេជ្ញាចិត្តថានឹង “តស៊ូដល់ទីបញ្ចប់” ។ ក្រសួងពាណិជ្ជកម្មចិនបាននិយាយកាលពីថ្ងៃអង្គារ ទី៨ ខែមេសា ថាចិននឹង “តស៊ូដល់ទីបញ្ចប់” ដើម្បីប្រឆាំងនឹងពន្ធរបស់លោក Trump ៕