ប្រទេសចិន ៖ រដ្ឋាភិបាលចិនបានអនុញ្ញាតឱ្យក្រុមហ៊ុនអាកាសចរណ៍របស់ខ្លួនអាចនាំចូលយន្តហោះអាមេរិក Boeing ឡើងវិញ ក្រោយប្រទេសទាំងពីរឯកភាពផ្អាកសង្គ្រា.មពាណិជ្ជកម្មរយៈពេល៩០ថ្ងៃ និងទម្លាក់ពន្ធទំនិញរៀងៗខ្លួន ។ រដ្ឋាភិបាលចិនបានហាមឃាត់ក្រុមហ៊ុនទេសចរណ៍នានាទិញយន្តហោះអាមេរិក Boeing អស់រយៈពេល១ខែ ដោយសារចិន និងអាមេរិកដំឡើងពន្ធទំនិញខ្ពស់ទៅវិញទៅមក ដែលធ្វើឱ្យយន្តហោះ Boeing ហោះត្រឡប់ទៅអាមេរិកវិញ ។ នេះបើតាមការចុះផ្សាយរបស់សារព័ត៌មាន Bloomberg កាលពីថ្ងៃទី១៤ ខែឧសភា ឆ្នាំ២០២៥ ។

កាលពីថ្ងៃទី១៣ ខែឧសភា រដ្ឋាភិបាលចិនបានជូនដំណឹងទៅក្រុមហ៊ុនអាកាសចរណ៍នានាអាចទិញយន្តហោះដឹកអ្នកដំណើរដែលផលិតដោយក្រុមហ៊ុនអាមេរិក ក្រោយពីរដ្ឋាភិបាលបានលុបចោលបម្រាម ប៉ុន្តែក្រុមហ៊ុនអាកាសចរណ៍ត្រូវអនុវត្តដោយប្រុងប្រយ័ត្នទាក់ទងនឹងរយៈពេល និងលក្ខខណ្ឌការទទួលយកយន្តហោះ ។ ការលុបចោលបម្រាមនេះ គឺ១ថ្ងៃក្រោយប្រទេសសេដ្ឋកិច្ចធំបំផុតលើពិភពលោកទាំងពីរសម្រេចផ្អាកដំឡើងពន្ធទំនិញរយៈពេល៩០ថ្ងៃ និងទម្លាក់ពន្ធមកនៅកម្រិតទាប ។

មុននេះ ចិនបានដំឡើងពន្ធទំនិញអាមេរិក ស្មើ១២៥% ខណៈអាមេរិកដំឡើងពន្ធទំនិញចិន រហូតដល់១៤៥% ហើយការដំឡើងពន្ធទៅវិញទៅមកនេះធ្វើឱ្យប្រទេសទាំងពីរមានសង្គ្រាមពាណិជ្ជកម្ម និងរាលដាលទៅប្រទេសផ្សេងៗ ។ ការលុបចោលបម្រាមនាំចូលយន្តហោះអាមេរិក Boeing ហាក់ដូចជាដំណឹងល្អសម្រាប់ក្រុមហ៊ុនអាមេរិក ប៉ុន្តែវាអាចពុំយូរអង្វែង បើការដោះស្រាយសង្គ្រាមពាណិជ្ជកម្មរយៈពេល៩០ថ្ងៃ របស់ប្រទេសទាំងពីរបរាជ័យ ។

នៅចុងខែមេសា ឆ្នាំ២០២៥ ក្រុមហ៊ុនអាកាសចរណ៍ចិនបានបដិសេធពុំទទួលយកក្រុមហ៊ុន Boeing ដោយសារសង្គ្រាមពាណិជ្ជកម្មរវាងចិន និងអាមេរិក ធ្វើឱ្យរដ្ឋាភិបាលចិនបញ្ជាទៅក្រុមហ៊ុនអាកាសចរណ៍ផ្អាកទទួលយកយន្តហោះផលិតដោយក្រុមហ៊ុនអាមេរិក ដែលធ្វើឱ្យយន្តហោះ Boeing ជាច្រើនគ្រឿងត្រូវហោះត្រឡប់ទៅអាមេរិកវិញ ។ ក្រោយមក ក្រុមហ៊ុន Boeing បានស្វែងរកអតិថិជនថ្មី គឺក្រុមហ៊ុនអាកាសចរណ៍ឥណ្ឌាបានស្នើទិញយន្តហោះ Boeing ១០គ្រឿង ក្រោយក្រុមហ៊ុនអាកាសចរណ៍ចិនពុំទទួល ។

កាលពីថ្ងៃទី២ ខែមេសា ប្រធានាធិបតីអាមេរិក លោក Donald Trump បានដំឡើងពន្ធទំនិញនាំចូលអាមេរិកពីជាង១០០ប្រទេស ក្នុងនោះក៏មានទំនិញចិន ឥណ្ឌា និងជប៉ុន ផងដែរ ។ វាធ្វើឱ្យប្រទេសផ្សេងៗស្វែងរកការចរចាពាណិជ្ជកនហនជាមួយអាមេរិក ប៉ុន្តែចិនពុំចរចាជាមួយអាមេរិកទេ បែរជាដំឡើងពន្ធទំនិញអាមេរិកខ្ពស់វិញ ព្រមទាំងហាមឃាត់ក្រុមហ៊ុនអាកាសចរណ៍របស់ខ្លួនផ្អាកទិញយន្តហោះអាមេរិក Boeing ។

គួរបញ្ជាក់ថា កិច្ចព្រមព្រៀងពាណិជ្ជកម្មរវាងចិន និងអាមេរិក កាលពីថ្ងៃទី១២ ខែឧសភា នៅទីក្រុងហ្សឺណែវ ប្រទេសស្វីស គឺប្រទេសទាំងពីរបានឯកភាពផ្អាកសង្គ្រាមពាណិជ្ជកម្មរយៈពេល៩០ថ្ងៃ និងទម្លាក់ពន្ធទំនិញរៀងៗខ្លួន គឺអាមេរិកទម្លាក់ពន្ធទំនិញចិន ពី១៤៥% មកនៅត្រឹម៣០% ខណៈចិនទម្លាក់ពន្ធទំនិញអាមេរិក ពី១២៥% មកនៅត្រឹម១០% ៕

ប្រទេសចិន ៖ ក្រុមហ៊ុនចិនឈ្មោះ Unitree Robotics បានផលិតឆ្កែយន្តជើង៤ ម៉ាក B2 សម្រាប់ជួយការងារពន្លត់ភ្លើង ហើយវាមានលក្ខណៈពិសេសអាចផ្តាច់ខ្លួនជាផ្នែកៗ ដើម្បីឱ្យអ្នកប្រើប្រាស់អាចបំពាក់ឧបករណ៍បន្ថែមទៀតតាមតម្រូវការ ។ វាបានក្លាយជាឆ្កែយន្តពន្លត់ភ្លើងដោយស្វ័យប្រវត្តិ និងអាចពន្លត់ភ្លើងនៅកន្លែងគ្រោះថ្នា.ក់ជំនួសមនុស្ស ដោយសារអាចឆ្លងកាត់គ្រប់ឧបសគ្គ មិនថាឡើងជណ្តើរ ឬឡើងទីខ្ពស់យ៉ាងឆាប់រហ័ស ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែឧសភា ឆ្នាំ២០២៥ ។

ឆ្កែយន្តនេះត្រូវបានបំពាក់ដោយឧបករណ៍បាញ់ទឹកកម្លាំងខ្លាំងសម្រាប់បាញ់ទឹក ឬបាញ់ពពុះពីចម្ងាយដើម្បីគ្រប់គ្រងស្ថានការណ៍ ។ ក្រៅពីនេះ វាក៏ត្រូវបានបំពាក់ដោយកាមេរ៉ាថតរូបសម្រាប់បញ្ជូនវីដេអូមកកាន់ភ្នាក់ងារពន្លត់ភ្លើងវាយតម្លៃស្ថានការណ៍ មុនពេលភ្នាក់ងារពន្លត់ភ្លើងមកកន្លែងគ្រោះថ្នាក់ជាក់ស្តែង ព្រមទាំងបំពាក់ឧបករណ៍ផ្លុំពន្លត់ភ្លើងឆេះព្រៃផងដែរ ។

ក្រុមហ៊ុនចិនផលិតឆ្កែយន្តនេះឡើងដើម្បីឱ្យវាអាចធ្វើការនៅកន្លែងគ្រោះថ្នាក់ខ្លាំងដែលមនុស្សពិបាកចូលដល់ ដូចជា ៖ កន្លែងក្តៅខ្លាំង និងសម្បូរធូលី ដោយសារខ្លួនរបស់វាមានប្រព័ន្ធបញ្ចេញកំដៅ និងបំពាក់សុទ្ធតែឧបករណ៍រឹងមាំ ។ ក្រុមហ៊ុនបានបំពាក់បច្ចេកវិទ្យាយ៉ាងទំនើបក្នុងឆ្កែយន្តធ្វើឱ្យវាអាចឆ្លងកាត់គ្រប់ឧបសគ្គ មិនថាការឡើងលើទីខ្ពស់ៗ ឬឡើងជណ្តើរយ៉ាងឆាប់រហ័ស ថែមទាំងមានប្រព័ន្ធផ្លាស់ប្តូរថ្មភ្លាមៗដើម្បីអាចបំពេញការងារពន្លត់ភ្លើងបានយូរ ។

ក្រុមហ៊ុនបានសាកល្បងសមត្ថភាពរបស់ឆ្កែយន្តរួចហើយ បច្ចុប្បន្ន ក្រុមហ៊ុនបានបញ្ជូនឆ្កែយន្តចំនួន២ក្បាល ទៅប្រចាំការជាមួយភ្នាក់ងារពន្លត់ភ្លើងប្រទេសចិនជាផ្លូវការ ។ បុគ្គលិកក្រុមហ៊ុនប្រាប់ថា នាថ្ងៃអនាគត ឆ្កែយន្តនេះនឹងអាចជួយពន្លត់ភ្លើងនៅកន្លែងគ្រោះថ្នាក់ជំនួសមនុស្សបាន ហើយពួកគេត្រៀមលក់ឆ្កែយន្តសម្រាប់អ្នកចាប់អារម្មណ៍ ប៉ុន្តែពុំបានប្រាប់ពីតម្លៃច្បាស់លាស់ទេ ។

គួរបញ្ជាក់ថា Unitree Robotics គឺជាក្រុមហ៊ុនផលិតមនុស្សយន្តនៅប្រទេសចិន ហើយក្រុមហ៊ុននេះជាគូប្រជែងដ៏សំខាន់របស់ក្រុមហ៊ុនផលិតមនុស្សយន្តលំដាប់ពិភពលោកនៅអាមេរិក ឈ្មោះ Boston Dynamics ។ បច្ចុប្បន្ន ទាំងក្រុមហ៊ុនចិន និងអាមេរិក បានព្យាយាមអភិវឌ្ឍន៍បច្ចេកវិទ្យាមនុស្សយន្តឱ្យកាន់តែមានសមត្ថភាពខ្ពស់ ឬមានអាកប្បកិរិយាដូចមនុស្សខ្លាំងឡើង ៕

រដ្ឋាភិបាលចក្រភពអង់គ្លេសកំពុងពិចារណាលើការដាក់ពន្ធចំនួន ៦% លើប្រាក់ចំណូលដែលសាកលវិទ្យាល័យទទួលបានពីនិស្សិតអន្តរជាតិ។ ពន្ធនេះគ្រោងនឹងដកពីប្រាក់ថ្លៃសិក្សាដែលនិស្សិតបរទេសបង់ និងនឹងត្រូវវិនិយោគឡើងវិញក្នុងវិស័យឧត្តមសិក្សា និងការអភិវឌ្ឍជំនាញនិស្សិតក្នុងស្រុក។

បើយោងតាមសារព័ត៌មាន The National បានឲ្យដឹងថាសំណើរនេះបង្ហាញក្នុងផែនការរបស់រដ្ឋាភិបាលដែលបង្ហាញថា ប្រាក់ចំណូលពីនិស្សិតអន្តរជាតិចំនួនប្រមាណ ១២ ពាន់លានផោន គឺជាផ្នែកសំខាន់នៃប្រាក់ចំណូលសាកលវិទ្យាល័យ។ យ៉ាងណាមិញ ដោយសាររដ្ឋាភិបាលឃើញថាការធ្វើចំណាកស្រុកកំពុងកើនឡើងខ្លាំង និងចង់កាត់បន្ថយវា។

ក្រៅពីពន្ធថ្មី សំណើនេះក៏រួមមានការកាត់បន្ថយរយៈពេលទិដ្ឋាការបញ្ចប់ការសិក្សាចុះមកតករឹម ១៨ ខែ និងពង្រឹងលក្ខខណ្ឌសម្រាប់សាកលវិទ្យាល័យក្នុងការជ្រើសរើសនិស្សិតបរទេសផងដែរ។ រដ្ឋាភិបាលអះអាងថា មានបញ្ហានៃការប្រើប្រាស់ទិដ្ឋាការមិនត្រឹមត្រូវ និងមាននិស្សិតជាច្រើននៅសល់ក្រោយសិក្សា ដោយមិនបានចូលទៅធ្វើការដែលសមស្របនឹងបរិញ្ញាបត្រ។

ប៉ុន្តែសាកលវិទ្យាល័យនិងអ្នកជំនាញវិស័យអប់រំបានព្រួយបារម្ភ ថាពន្ធនេះនឹងធ្វើឱ្យចំនួននិស្សិតបរទេសថយចុះ ហើយនឹងប៉ះពាល់ដល់ស្ថិរភាពហិរញ្ញវត្ថុរបស់សាកលវិទ្យាល័យ។ ការវិភាគថ្មីបង្ហាញថា ៤៣% នៃសាកលវិទ្យាល័យអង់គ្លេសអាចប្រឈមនឹងការខាតបង់លើការប្រើប្រាស់ថវិកា។

លោក Nick Hillman នាយកវិទ្យាស្ថានគំនិតគោលនយោបាយឧត្តមសិក្សាបានថ្លែងថា ពន្ធនេះអាចត្រូវបានមើលឃើញថាជាពន្ធលើវិស័យនាំចេញសំខាន់មួយដែលអង់គ្លេសទទួលបានភាពជោគជ័យរួចមកហើយ។ លើសពីនេះអ្នកស្រី Vivienne Stern និងអ្នកដឹកនាំអាជីវកម្មក៏បានអំពាវនាវឱ្យរដ្ឋាភិបាលពិចារណាផលប៉ះពាល់យ៉ាងហ្មត់ចត់ ព្រោះវាអាចបណ្តាលឱ្យអង់គ្លេសបាត់បង់ភាពទាក់ទាញសម្រាប់ការសិក្សា និងជះឥទ្ធិពលអាក្រក់ដល់សេដ្ឋកិច្ចក្នុងស្រុកផងដែរ៕

សាកលវិទ្យាល័យ Sookmyung Women’s University បានចាប់ផ្តើមដំណើរការដកហូតសញ្ញាបត្រអនុបណ្ឌិតរបស់លោកស្រី Kim Keon-hee អតីតជំទាវទីមួយនៃកូរ៉េខាងត្បូង ក្រោយរកឃើញថាមានការលួចចម្លងក្នុងនិក្ខេបបទដែលលោកស្រីបានសរសេរនៅឆ្នាំ ១៩៩៩។ នេះបើយើងតាមសារព័ត៌មាន South China Morning ចុះផ្សាយថ្ងៃទី ១៦ ខែឧសភា ឆ្នាំ ២០២៥។

កាលពីខែមករា ឆ្នាំ ២០២៤ សាកលវិទ្យាល័យបានសន្និដ្ឋានថានិក្ខេបបទថ្នាក់អនុបណ្ឌិតរបស់លោកស្រី គីម មានការលួចចម្លងយ៉ាងពិតប្រាកដ។ ប៉ុន្តែ ដោយសារសញ្ញាបត្រនេះចេញមុនឆ្នាំ ២០១៥ សាកលវិទ្យាល័យមិនអាចដកហូតវាផ្ទាល់ខ្លួនបានទេ។ ដូច្នេះ ដើម្បីអនុញ្ញាតឲ្យអនុវត្តច្បាប់ថ្មីនោះសម្រាប់ករណីមុនឆ្នាំ ២០១៥ សាកលវិទ្យាល័យបានចាប់ផ្តើមកែប្រែបទប្បញ្ញត្តិផ្នែកអប់រំនៃច្បាប់បញ្ចប់ការសិក្សារបស់ខ្លួនឡើងវិញ។ កិច្ចសម្រេចនេះបានបើកផ្លូវឲ្យសាកលវិទ្យាល័យអនុវត្តការដកហូតសញ្ញាបត្រលើករណីដែលទទួលបានតាមរបៀបក្លែងបន្លំ ទោះបីជាសញ្ញាបត្រនោះបានចេញមុនឆ្នាំ ២០១៥ ក៏ដោយ។ ការកែប្រែនេះត្រូវបានអះអាងថាស្របតាមច្បាប់ឧត្តមសិក្សាជាតិរបស់កូរ៉េខាងត្បូង។

គណៈកម្មាធិការសុចរិតភាពនៃការស្រាវជ្រាវបានចាប់ផ្តើមស៊ើបអង្កេតករណីនេះតាំងពីខែវិច្ឆិកា ឆ្នាំ ២០២២ មកម្លេះ បន្ទាប់ពីបានទទួលការតវាពីអតីតនិស្សិតម្នាក់។ នៅក្នុងខែមករា ឆ្នាំ ២០២៤ គណៈកម្មាធិការបានបញ្ជាក់ថានិក្ខេបបទនោះពិតជាពាក់ព័ន្ធនឹងការលួចចម្លងមែន។ ទាំងលោកស្រី គីម និងក្រុមអតីតនិស្សិតមិនបានប្តឹងជំទាស់នឹងលទ្ធផលនោះឡើយ ហើយការស៊ើបអង្កេតបានបញ្ចប់នៅថ្ងៃទី ២៥ ខែកុម្ភៈ។

បច្ចុប្បន្ន គណៈកម្មាធិការមិនទាន់សម្រេចថាតើនឹងផ្តល់អនុសាសន៍ឲ្យដកហូតសញ្ញាបត្រឬអត់នោះទេ។ ទន្ទឹមនឹងនេះ សាកលវិទ្យាល័យក៏បានស្នើសុំមតិពីសាស្រ្តាចារ្យ និងបុគ្គលិក រហូតដល់ថ្ងៃទី ២៥ ខែឧសភា មុនពេលបញ្ជូនការកែប្រែច្បាប់ទៅអង្គភាពច្បាប់ និងព្រឹទ្ធសភាសាកលវិទ្យាល័យសម្រាប់អនុម័តចុងក្រោយ។ ប្រសិនបើគណៈកម្មាធិការអនុម័តឲ្យដកហូតសញ្ញាបត្រ នោះប្រធានសាកលវិទ្យាល័យនឹងជាអ្នកសម្រេចចុងក្រោយ។

ក្នុងករណីសញ្ញាបត្រអនុបណ្ឌិតត្រូវបានដកហូត ក៏មានការរំពឹងថាសាកលវិទ្យាល័យ Kookmin ដែលលោកស្រី គីម បានសិក្សាបន្តថ្នាក់បណ្ឌិត ក៏អាចនឹងពិនិត្យសុពលភាពនៃសញ្ញាបត្របណ្ឌិតរបស់លោកស្រីផងដែរ៕

ប្រទេសចិន ៖ កាលពីថ្ងៃទី១២ ខែឧសភា ឆ្នាំ២០២៥ មានហេតុការណ៍ចលាចលមួយកើតឡើងលើយន្តហោះរបស់ក្រុមហ៊ុនអាកាសចរណ៍ចិន China Eastern Airlines ពេលយន្តហោះនេះកំពុងចុះចតនៅលើ Runway ក្រោយពីបុរសអ្នកដំណើរម្នាក់បើកទ្វារអាសន្នយន្តហោះដោយសារចង់ស្រូបខ្យល់អាកាសបរិសុទ្ធ ។ វាធ្វើឱ្យអ្នកដំណើរផ្សេងទៀតភ័យជ្រួលច្របល់យ៉ាងខ្លាំង ពីព្រោះយន្តហោះពុំទាន់ចុះដល់អាកាសយានដ្ឋាននៅឡើយ ។

យន្តហោះ MU 5828 របស់ក្រុមហ៊ុនអាកាសចរណ៍ China Eastern Airlines បានធ្វើដំណើរចាកចេញពីទីក្រុងឆាងសា មកកាន់អាកាសយានដ្ឋានអន្តរជាតិ Kunming Changshui ។ បន្ទាប់ពីកើតហេតុ បុរសអ្នកដំណើរដែលបើកទ្វារអាសន្នយន្តហោះ ត្រូវបានសមត្ថកិច្ចចាប់ខ្លួនបញ្ជូនទៅកន្លែងសាកសួរចម្លើយ ។

តាមច្បាប់របស់ចិន បើបុគ្គលណាម្នាក់បើកទ្វារអាសន្នយន្តហោះដោយគ្មានការអនុញ្ញាត បុគ្គលនោះត្រូវតែបង់ប្រាក់ពិន័យ ចាប់ពីជាង១ម៉ឺន៤ពាន់ ទៅជាង២ម៉ឺន៨ពាន់ដុល្លារ ហើយចំនួនប្រាក់ពិន័យក៏អាស្រ័យលើការកំណត់របស់ក្រុមហ៊ុនអាកាសចរណ៍ និងតាមពេលវេលា ។

កាលពីខែមេសា ឆ្នាំ២០២៥ ក៏មានហេតុការណ៍ដូចគ្នានេះដែរ គឺយន្តហោះ RS 902 របស់ក្រុមហ៊ុនអាកាសចរណ៍ Air Seoul Airlines កំពុងហោះចេញពីអាកាសយានដ្ឋានអន្តរជាតិ Gimpo ទីក្រុងសេអ៊ូល ទៅកាន់អាកាសយានដ្ឋាន Jeju ប្រទេសកូរ៉េខាងត្បូង ស្រាប់តែនារីអ្នកដំណើរម្នាក់ អាយុ៣០ឆ្នាំ មានអាការៈខ្លាចកន្លែងចង្អៀត ក៏ដោះខ្សែក្រវ៉ាត់សុវត្ថិភាព និងក្រោកចេញពីកៅអីជួរមុខទៅបើកទ្វារអាសន្នយន្តហោះ ។ បើទោះជាបុគ្គលិកអាកាសចរណ៍ព្យាយាមហាមឃាត់នារីរូបនេះយ៉ាងណា ប៉ុន្តែនាងពុំស្តាប់ ហើយស្រែកខ្លាំងៗ រហូតដល់អាកាសយានិកត្រូវលុបចោលជើងហោះហើរ ។

ហេតុការណ៍មួយទៀតបានកើតឡើងកាលពីដើមឆ្នាំ២០២៥ គឺយន្តហោះរបស់ក្រុមហ៊ុនអាកាសចរណ៍កូរ៉េខាងត្បូង Eastar Jet Airlines បានពន្យារពេលហោះជាង១ម៉ោង ដោយសារព្រិលធ្លាក់ខ្លាំងលើ Runway ហើយពេលនោះ ស្រាប់តែបុគ្គលិកអាកាសចរណ៍៣នាក់ បានបើកទ្វារអាសន្នយន្តហោះដើម្បីថតរូបលើស្លាបយន្តហោះ ។ សមត្ថកិច្ចក៏បាននាំខ្លួនបុគ្គលិកអាកាសចរណ៍ទាំងអស់ទៅសួរចម្លើយ នាពេលបន្ទាប់ ៕