ប្រទេសចិន ៖ កាលពីថ្ងៃទី១២ ខែឧសភា ឆ្នាំ២០២៥ មានហេតុការណ៍ចលាចលមួយកើតឡើងលើយន្តហោះរបស់ក្រុមហ៊ុនអាកាសចរណ៍ចិន China Eastern Airlines ពេលយន្តហោះនេះកំពុងចុះចតនៅលើ Runway ក្រោយពីបុរសអ្នកដំណើរម្នាក់បើកទ្វារអាសន្នយន្តហោះដោយសារចង់ស្រូបខ្យល់អាកាសបរិសុទ្ធ ។ វាធ្វើឱ្យអ្នកដំណើរផ្សេងទៀតភ័យជ្រួលច្របល់យ៉ាងខ្លាំង ពីព្រោះយន្តហោះពុំទាន់ចុះដល់អាកាសយានដ្ឋាននៅឡើយ ។

យន្តហោះ MU 5828 របស់ក្រុមហ៊ុនអាកាសចរណ៍ China Eastern Airlines បានធ្វើដំណើរចាកចេញពីទីក្រុងឆាងសា មកកាន់អាកាសយានដ្ឋានអន្តរជាតិ Kunming Changshui ។ បន្ទាប់ពីកើតហេតុ បុរសអ្នកដំណើរដែលបើកទ្វារអាសន្នយន្តហោះ ត្រូវបានសមត្ថកិច្ចចាប់ខ្លួនបញ្ជូនទៅកន្លែងសាកសួរចម្លើយ ។

តាមច្បាប់របស់ចិន បើបុគ្គលណាម្នាក់បើកទ្វារអាសន្នយន្តហោះដោយគ្មានការអនុញ្ញាត បុគ្គលនោះត្រូវតែបង់ប្រាក់ពិន័យ ចាប់ពីជាង១ម៉ឺន៤ពាន់ ទៅជាង២ម៉ឺន៨ពាន់ដុល្លារ ហើយចំនួនប្រាក់ពិន័យក៏អាស្រ័យលើការកំណត់របស់ក្រុមហ៊ុនអាកាសចរណ៍ និងតាមពេលវេលា ។

កាលពីខែមេសា ឆ្នាំ២០២៥ ក៏មានហេតុការណ៍ដូចគ្នានេះដែរ គឺយន្តហោះ RS 902 របស់ក្រុមហ៊ុនអាកាសចរណ៍ Air Seoul Airlines កំពុងហោះចេញពីអាកាសយានដ្ឋានអន្តរជាតិ Gimpo ទីក្រុងសេអ៊ូល ទៅកាន់អាកាសយានដ្ឋាន Jeju ប្រទេសកូរ៉េខាងត្បូង ស្រាប់តែនារីអ្នកដំណើរម្នាក់ អាយុ៣០ឆ្នាំ មានអាការៈខ្លាចកន្លែងចង្អៀត ក៏ដោះខ្សែក្រវ៉ាត់សុវត្ថិភាព និងក្រោកចេញពីកៅអីជួរមុខទៅបើកទ្វារអាសន្នយន្តហោះ ។ បើទោះជាបុគ្គលិកអាកាសចរណ៍ព្យាយាមហាមឃាត់នារីរូបនេះយ៉ាងណា ប៉ុន្តែនាងពុំស្តាប់ ហើយស្រែកខ្លាំងៗ រហូតដល់អាកាសយានិកត្រូវលុបចោលជើងហោះហើរ ។

ហេតុការណ៍មួយទៀតបានកើតឡើងកាលពីដើមឆ្នាំ២០២៥ គឺយន្តហោះរបស់ក្រុមហ៊ុនអាកាសចរណ៍កូរ៉េខាងត្បូង Eastar Jet Airlines បានពន្យារពេលហោះជាង១ម៉ោង ដោយសារព្រិលធ្លាក់ខ្លាំងលើ Runway ហើយពេលនោះ ស្រាប់តែបុគ្គលិកអាកាសចរណ៍៣នាក់ បានបើកទ្វារអាសន្នយន្តហោះដើម្បីថតរូបលើស្លាបយន្តហោះ ។ សមត្ថកិច្ចក៏បាននាំខ្លួនបុគ្គលិកអាកាសចរណ៍ទាំងអស់ទៅសួរចម្លើយ នាពេលបន្ទាប់ ៕

សហរដ្ឋអាមេរិក ៖ កាលពីថ្ងៃទី១៣ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា នារីអ្នកសម្តែងសៀកម្នាក់នៅអាមេរិកបានបំបែកកំណត់ត្រាពិភពលោក Guinness World Records ក្រោយពីបានយកសក់ចងជាមួយខ្សែព្យួរខ្លួនរយៈពេលយូរបំផុត រហូតដល់២៥នាទី និង១១វិនាទី ។ ក្រៅពីនេះ នាងក៏បានឈ្នះកំណត់ត្រាពិភពលោកចាស់នៅប្រទេសអូស្ត្រាលីផងដែរ ដែលគ្រប់គ្រងតំណែងអស់រយៈពេលជាង១០ឆ្នាំ ដោយចំណាយពេលត្រឹមតែ២៣នាទី និង១៩វិនាទី ។

នារីរូបនេះឈ្មោះ Leila Noone អាយុ៣៩ឆ្នាំ បានព្យាយាមបំបែកកំណត់ត្រាពិភពលោក គឺការយកសក់របស់នាងចងជាមួយខ្សែព្យួរខ្លួនរយៈពេលយូរបំផុតនៅលើពិភពលោក ដែលការព្យួរសក់នេះរៀបចំឡើងនៅឧទ្យានជាតិ Redwood រដ្ឋកាលីហ្វ័រញ៉ា សហរដ្ឋអាមេរិក ។

អ្នកនាង Leila Noone ម្ចាស់កំណត់ត្រាពិភពលោកថ្មី និយាយថា នាងបានហ្វឹកហាត់យ៉ាងអត់ធ្មត់ និងត្រៀមខ្លួនអស់រយៈពេលជាង២ឆ្នាំ ទើបអាចយកឈ្នះកំណត់ត្រាពិភពលោកចាស់ គឺជារបស់លោក Suthakaran Sivagnanathurai ។ ម្ចាស់កំណត់ត្រាពិភពលោកចាស់បានយកសក់ចងជាមួយខ្សែព្យួរខ្លួន ចំណាយពេលត្រឹម២៣នាទី និង១៩វិនាទីប៉ុណ្ណោះ ដែលរៀបចំឡើងនៅប្រទេសអូស្ត្រាលី កាលពីឆ្នាំ២០១១ ។

ម្ចាស់កំណត់ត្រាពិភពលោកថ្មី បន្តថា ៖ «គោលដៅរបស់ខ្ញុំដែលបានព្យាយាមបំបែកកំណត់ត្រាពិភពលោកថ្មីនេះ ដើម្បីជាភស្តុតាងបញ្ជាក់ថា មនុស្សគ្រប់រូបអាចធ្វើអ្វីមួយដោយជោគជ័យ ដោយគ្រាន់តែប្រើប្រាស់អំណាចផ្លូវចិត្ត» ។ ប៉ុន្តែនាងប្រាប់ថា មានតែអ្នកជំនាញប៉ុណ្ណោះ ទើបអាចយកសក់ចងជាមួយខ្សែព្យួរខ្លួនរយៈពេលយូរបាន រីឯអ្នកពុំបានហ្វឹកហាត់ ពុំអាចធ្វើបែបនេះនៅផ្ទះដាច់ខាត ។

នៅក្នុងរូបភាព គឺនារីអាមេរិកអង្គុយបិទភ្នែកទាំងសងខាងនៅក្រោមដើមឈើ ដែលសក់របស់នាងត្រូវបានចងភ្ជាប់ជាមួយខ្សែ ។ មហាជនបានកោតសរសើរយ៉ាងខ្លាំងពីការព្យាយាមហ្វឹកហាត់របស់នាងក្នុងរយៈពេលជាង២ឆ្នាំមកនេះ រហូតទទួលបានជោគជ័យអាចគ្រប់គ្រងកំណត់ត្រាពិភពលោកថ្មី គឺជាបុគ្គលយកសក់ព្យួរខ្លួនរយៈពេលយូរបំផុត ។ ក្រៅពីនារីអាមេរិក តើនឹងមានបុគ្គលផ្សេងទៀតដែរឬទេ ដែលអាចធ្វើបែបនេះបាន និងចំណាយពេលយូរជាងនេះ?

ប្រទេសថៃ ៖ អាណាព្យាបាល និងអាជ្ញាធរថៃកំពុងយកចិត្តទុកដាក់លើការរីករាលដាលនៃគ្រឿងញៀ..នមួយប្រភេទ ដែលមានទម្រង់ដូចជាស្ករគ្រាប់រូបរាងតុក្កតា កំពុងត្រូវបានចែកចាយយ៉ាងសេរី និងទាក់ទាញកុមារជាច្រើនបានយ៉ាងងាយស្រួល។ នេះបើយោងតាមប្រភពសារព័ត៌មានថៃ The Bangkok Post កាលពីថ្ងៃព្រហស្បត្តិ៍ ទី១៥ ឧសភា។

លោកវេជ្ជបណ្ឌិត Withid Sariddeechaikool អគ្គលេខាធិការរងនៃ FDA បាននិយាយថា ការចែកចាយស្ករគ្រាប់ ដែលមានឈ្មោះថា “Molly” ត្រូវបានគេរឹបអូសនៅខេត្ត Nong Khai កាលពីខែមីនា និងបានរកឃើញថាមានផ្ទុកសារធាតុមេតំហ្វេតាមីន និងអេស្ត្រូស៊ី ដែលជាជាសារធាតុញៀ..នកម្រិតធ្ងន់មួយប្រភេទ។ បើយោងតាមការត្រួតពិនិត្យរបស់រដ្ឋបាលចំណីអាហារ និងឱសថថៃ (FDA) បានឱ្យដឹងថា ឥទ្ធិពលញៀ.នរបស់ស្ករនេះអាចបណ្តាលឱ្យកុមារស្លា..ប់បាន។

លោកវេជ្ជបណ្ឌិត Withid បាននិយាយបន្តថា នៅពេលកុមារស្រូបយកនូវសារធាតុទាំងនេះច្រើន វាអាចប៉ះពាល់យ៉ាងខ្លាំងដល់ប្រព័ន្ធសរសៃប្រសាទ ដែលបណ្តាលឱ្យមានការវង្វេងស្មារតី ចង្វាក់បេះដូងលោតមិនទៀងទាត់ សម្ពាធឈាមឡើងខ្ពស់ និងដាច់សរសៃឈាមខួរក្បាលឈានដល់ការបា.ត់ប.ង់ជី..វិត។

ដោយឡែក សម្រាប់ប្រភេទថ្នាំ Ecstasy ក្នុងទម្រង់ជាតួអង្គតុក្កតា Labubu ដ៏ពេញនិយម ក៏មានការរីករាលដាលយ៉ាងទូលំទូលាយផងដែរ ជាពិសេសក្នុងពិធីបុណ្យ Songkran កាលពីខែមុន។ ហើយកាលពីថ្ងៃពុធ សប្ដាហ៍នេះ ប៉ូលិសបានចាប់ខ្លួនបុរសម្នាក់ក្នុងទីក្រុងបាងកក និងរឹបអូសបានថ្នាំគ្រាប់ល្បឿន 1,840 គ្រាប់ និង 525 គ្រាប់ជាទម្រង់តុក្កតា Doraemon។

បើតាមការស៊ើបសួរបន្ទាប់ពីការចា.ប់ខ្លួនអ្នកចែកចាយថ្នាំប្រភេទកន្លងមកបានឲ្យដឹងថា ៖ ថ្នាំញៀនប្រភេទតុក្កតាដែលគេកំពុងពេញនិយមនេះ ត្រូវបានលក់ក្នុងតម្លៃ 300បាត ឬស្មើជាង 9ដុល្លារក្នុងមួយគ្រាប់ ទៅឲ្យក្មេងៗ និងអ្នកប្រើប្រាស់ទាំងអស់។

ការលេចធ្លា.យព័ត៌មាននេះបានធ្វើឲ្យឪពុកម្ដាយជាច្រើនមានការព្រួយបារម្ភពីសុវត្ថិភាពរបស់កូនៗពួកគេជាខ្លាំង។ រីឯខាងប៉ូលីសថៃកំពុងយកចិត្តទុកដាក់លើការបង្រ្កាបជាបន្តបន្ទាប់ និងព្យាយាមផ្សព្វផ្សាយពីបញ្ហានេះយ៉ាងសកម្មដើម្បីទប់ស្កាត់កុំឲ្យមានកុមាររងគ្រោះជាបន្តទៀត៕