ប្រទេសថៃ ៖ បញ្ហាមួយដែលពលរដ្ឋថៃចាប់អារម្មណ៍ និងជជែកគ្នាយ៉ាងច្រើន គឺក្រោយពីអ្នកជំនាញនិយាយថា ផ្ទាំងទឹកកកនៅតំបន់ប៉ូលខាងជើង និងប៉ូលខាងត្បូង ផ្ទាំងទឹកកកលើកំពូលភ្នំ និងផ្ទាំងទឹកកកនៅហ្គ្រីនឡែន (Greenland) គឺជាកោះដ៏ធំរបស់ប្រទេសដាណឺម៉ាក និងមានទំហំធំជាងកោះនានាលើពិភពលោក នឹងរលាយអស់ដោយសារអាកាសធាតុក្តៅយ៉ាងខ្លាំង ហើយធ្វើឱ្យកម្រិតទឹកសមុទ្រលើផែនដីកើនឡើង ចាប់ពី៦០ម៉ែត្រ ទៅ៧០ម៉ែត្រ ។ ពេលនោះ ប្រទេសមួយចំនួន រួមទាំងទីក្រុងបាងកក និងខេត្តជាច្រើនរបស់ថៃ ដូចជា ៖ សាមុតប្រាកាន សាមុតសាខន នុនថាក់បុរី និងប៉ាធុមថានី លិចក្រោមទឹកសមុទ្រ ដោយសារខេត្តទាំងនេះស្ថិតក្នុងតំបន់ទំនាបក្បែរឆ្នេរសមុទ្រ ។

លើសពីនេះ ខេត្តជាច្រើនទៀតនៅភាគកណ្តាលប្រទេសថៃ ដូចជា ៖ អយុធ្យា សុផាន់បុរី និងណាខនប៉ាធុម នឹងរងផលប៉ះពាល់យ៉ាងខ្លាំងដោយសារកម្រិតទឹកសមុទ្រកើនឡើង ។ រីឯខេត្តនៅឆ្នេរសមុទ្រនៅភាគខាងកើត ដូចជា ៖ ឈុនបុរី រ៉ាក់យ៉ង ចាន់ថាក់បុរី និងត្រាត នឹងក្លាយទៅជាសមុទ្រ និងលិចទឹកជារៀងរហូត ។ ខេត្តភាគខាងត្បូងនៅជាប់ឆ្នេរសមុទ្រ ទាំងឈូងសមុទ្រថៃ និងសមុទ្រអាន់ដាម៉ាន់ រួមមាន ៖ សុងក្លា ប៉ាតានី ណារ៉ាធីវ៉ាត ភូកេត ផាំងង៉ា និងក្រាប៊ី នឹងទឹកលិចយ៉ាងខ្លាំង ខណៈកោះនានារបស់ថៃអាចលិចក្រោមទឹកសមុទ្រ និងមានទំហំតូចជាងមុន ។

ការផ្លាស់ប្តូរភូមិសាស្ត្រប្រទេសថៃ គឺបណ្តាខេត្តស្ថិតនៅតំបន់ទំនាបនឹងក្លាយជាបឹង ឬសមុទ្រថ្មី ហើយភ្នំខ្ពស់ៗនឹងក្លាយជាកោះមានទឹកព័ទ្ធជុំវិញ ។ ដោយឡែក តំបន់ខ្ពង់រាបនៅភាគខាងជើង និងខាងលិច នឹងក្លាយជាកោះធំៗហ៊ុព័ទ្ធដោយទឹកសមុទ្រ ខណៈហេដ្ឋារចនាសម្ព័ន្ធ ដូចជា ៖ ផ្លូវ មន្ទីរពេទ្យ និងអាកាសយានដ្ឋាន នឹងខូចខាត ។ ដូចគ្នានេះ ផ្ទៃដីកសិកម្ម និងតំបន់ឧស្សាហកម្មនានានៅតំបន់ទំនាបត្រូវបំផ្លាញទាំងស្រុង ។

ទោះបីជាផ្ទាំងទឹកកកនៅតំបន់នានាលើផែនដី អាចចំណាយពេលរលាយរហូតដល់រាប់រយឆ្នាំ ឬរាប់ពាន់ឆ្នាំ ទើបប្រទេសមួយចំនួន រួមទាំងថៃលិចក្រោមទឹកសមុទ្រ ប៉ុន្តែអ្នកជំនាញបញ្ជាក់ថា កម្រិតទឹកសមុទ្របានកើនឡើងជាបន្តបន្ទាប់ ដោយសារផែនដីឡើងកំដៅ ។ អ្នកជំនាញសន្និដ្ឋានថា នៅឆ្នាំ២០៥០ កម្រិតទឹកសមុទ្រនៅប្រទេសថៃអាចកើនឡើងចាប់ពី៣០សង់ទីម៉ែត្រ ទៅ៥០សង់ទីម៉ែត្រ ដែលធ្វើឱ្យតំបន់ឆ្នេរសមុទ្រ និងតំបន់ទំនាបប្រឈមការលិចទឹកប៉ះពាល់ដល់ការរស់នៅរបស់ពលរដ្ឋថៃ ។

ហេតុនេះ អ្នកជំនាញបានសំណូមពរឱ្យរដ្ឋាភិបាលថៃគួរតែសម្របខ្លួន និងបង្កើតផែនការកែលម្អហេដ្ឋារចនាសម្ព័ន្ធ តំបន់កសិកម្ម រួមទាំងអភិរក្សបរិស្ថាននៅឆ្នេរសមុទ្រ ដើម្បីកាត់បន្ថយផលប៉ះពាល់មកលើប្រទេសថៃ ដោយសារផ្ទាំងទឹកកករលាយនៅតំបន់ប៉ូល និងតំបន់ផ្សេងៗ ៕

ប្រទេសវៀតណាម ៖ វៀតណាមបានកែលម្អអគារអ្នកដំណើរថ្មីរបស់អាកាសយានដ្ឋានអន្តរជាតិ Phu Quoc (កោះត្រល់) ឱ្យមានរូបរាងស្រដៀងនឹងសត្វស្លាបហោះ ព្រមទាំងបំពាក់បច្ចេកវិទ្យាទំនើបក្នុងអាកាសយានដ្ឋានតាមលក្ខណៈស្តង់ដារដូចគ្នានឹងអាកាសយានដ្ឋានសិង្ហបុរី Changi និងអាកាសយានដ្ឋានជប៉ុន Haneda ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៩ ខែឧសភា ឆ្នាំ២០២៥ ។

រដ្ឋាភិបាលវៀតណាមមានគម្រោងឱ្យអាកាសយានដ្ឋាន Phu Quoc (កោះត្រល់) មានតួនាទីសំខាន់ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន និងទេសចរណ៍ ព្រមទាំងសាងសង់អគារអ្នកដំណើរថ្មីសម្រាប់ការប្រជុំកិច្ចសហការសេដ្ឋកិច្ចអាស៊ីប៉ាស៊ីហ្វិក (APEC) ឆ្នាំ២០២៧ ។ អាកាសយានដ្ឋាននេះនឹងកែលម្អថ្មីទាំងស្រុងដើម្បីឱ្យមានលក្ខណៈទំនើប និងអស្ចារ្យបំផុតក្នុងតំបន់អាស៊ីអាគ្នេយ៍ ។

តាមគម្រោង គឺអាកាសយានដ្ឋាននឹងគ្របដណ្តប់លើផ្ទៃដីជាង១,០៥០ហិកតា និងស្របតាមស្តង់ដារ 4E ដែលកំណត់ដោយអង្គការអាកាសចរណ៍ស៊ីវិលអន្តរជាតិ (ICAO) ។ ការកែលម្អនេះដើម្បីឱ្យអាកាសយានដ្ឋានអាចទទួលយន្តហោះធំៗចុះចត ដូចជា ៖ Boeing 747, Boeing 787 និង Airbus A350 ។ អគារអ្នកដំណើរថ្មីនឹងកែលម្អតាមលក្ខណៈស្តង់ដារអន្តរជាតិ រួមមាន ៖ អគារអ្នកដំណើរក្នុងស្រុក និងអន្តរជាតិ, ហាងលក់ទំនិញ និងកន្លែងតាំងពិព័រណ៍ ។

មុនកិច្ចប្រជុំ APEC 2027 វៀតណាមរំពឹងថា អាកាសយានដ្ឋាន Phu Quoc នឹងអាចទទួលអ្នកដំណើររហូតដល់១៨លាននាក់ក្នុង១ឆ្នាំ ដែលច្រើនជាងអ្នកដំណើរបច្ចុប្បន្ន រហូតដល់ជាង៤ដង ដើម្បីបម្រើវិស័យទេសចរណ៍ និងការរីកចម្រើនសេដ្ឋកិច្ច ។ អាកាសយានដ្ឋាននេះនឹងទទួលអ្នកដំណើររហូតដល់៥០លាននាក់ក្នុង១ឆ្នាំ និងទទួលទំនិញ៥ម៉ឺនតោនក្នុង១ឆ្នាំ នៅឆ្នាំ២០៥០ ។

ភាពលេចធ្លោរបស់អាកាសយានដ្ឋាន គឺបំពាក់ដោយបច្ចេកវិទ្យាទំនើបដូចគ្នានឹងបច្ចេកវិទ្យាក្នុងអាកាសយានដ្ឋានលំដាប់ពិភពលោក ដូចជា ៖ អាកាសយានដ្ឋានសិង្ហបុរី Changi, អាកាសយានដ្ឋានជប៉ុន Haneda និងអាកាសយានដ្ឋានចិននៅទីក្រុងប៉េកាំង ។ អ្នកដំណើរនឹងងាយស្រួល Check in ជាមុនពីចម្ងាយ, មានប្រព័ន្ធបែងចែកសម្ភារៈដោយស្វ័យប្រវត្តិ និងបច្ចេកវិទ្យាកាត់បន្ថយរយៈពេល Check in ត្រឹមតែពី១៥នាទី ទៅ៣០នាទី ។ ក្រៅពីនេះ ក្នុងអាកាសយានដ្ឋាននឹងសាងសង់អគារពិសេសសម្រាប់ស្វាគមន៍មេដឹក និងមន្ត្រីជាន់ខ្ពស់មកចូលរួមកិច្ចប្រជុំ APEC ។

លើសពីនេះ Runway ចាស់របស់អាកាសយានដ្ឋាន នឹងពង្រីករហូតដល់៣,៥០០ម៉ែត្រ និងបង្កើត Runway ថ្មីមួយទៀត ប្រវែង៣,៣០០ម៉ែត្រ ។ រីឯចំណតយន្តហោះនឹងពង្រីកឱ្យកាន់តែទូលាយសម្រាប់ការចុះចតរបស់យន្តហោះធំៗ ។ បច្ចុប្បន្ន អាកាសយានដ្ឋាន Phu Quoc មានលក្ខណៈស្តង់ដារ 4E ដែលអគារអ្នកដំណើរអាចទទួលអ្នកដំណើរចំនួន៤លាននាក់ក្នុង១ឆ្នាំ និងមានអគារស្តុកទំនិញ ចំនួន១៤,៥០០តោនក្នុង១ឆ្នាំ ។

កាលពីឆ្នាំ២០២៤ អាកាសយានដ្ឋាន Phu Quoc បានទទួលអ្នកដំណើរជាង៤លាន១សែននាក់ គឺលើសពីការរំពឹងទុក ក្នុងនោះអ្នកដំណើរក្នុងស្រុក ស្មើ២លាន៣សែននាក់ និងអ្នកដំណើរអន្តរជាតិ ស្មើ១លាន៨សែននាក់ ៕

ប្រទេសជប៉ុន ៖ ភោជនីយដ្ឋានមួយឈ្មោះ «Yakitori» នៅទីក្រុងអូសាកា ប្រទេសជប៉ុន បានធ្វើឱ្យមហាជនពុំពេញចិត្តយ៉ាងខ្លាំង ក្រោយពីភោជនីយដ្ឋាននេះដាក់ស្លាកពុំទទួលស្វាគមន៍ភ្ញៀវចិន ហើយអះអាងថា មកពីភ្ញៀវចិនភាគច្រើនពុំសុភាពពេលចូលបរិភោគអាហារ ។ បើទោះជាគ្មានការអះអាងច្បាស់លាស់ថា ហេតុអ្វីភោជនីយដ្ឋានសម្រេចចិត្តបដិសេធភ្ញៀវចិន ប៉ុន្តែវាពុំមែនជាលើកដំបូងទេ ដែលភោជនីយដ្ឋានជប៉ុនត្រូវបានមហាជនចោទប្រកាន់ថា រើ.សអើងភ្ញៀវចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៨ ខែឧសភា ឆ្នាំ២០២៥ ។

កាលពីឆ្នាំ២០២៣ Influencer ជនជាតិចិនបានបង្ហោះរូបភាពភោជនីយដ្ឋានមួយកន្លែងលក់អាហារចិននៅទីក្រុងតូក្យូ ប្រទេសជប៉ុន បានដាក់ស្លាកពុំទទួលភ្ញៀវចិន ដោយសរសេរអក្សរជប៉ុនថា នេះជាវិធានការការពារវីរុសចិន ។ លើសពីនេះ ភោជនីយដ្ឋានមួយទៀតនៅទីក្រុងតូក្យូ ក៏ធ្លាប់សរសេរក្នុងបណ្តាញសង្គមកាលពីខែកក្កដា ឆ្នាំ២០២៤ ថា ហាមភ្ញៀវចិន និងកូរ៉េខាងត្បូងចូលបរិភោគអាហារក្នុងភោជនីយដ្ឋាន ។

ការបដិសេធពុំទទួលស្វាគមន៍ភ្ញៀវចិនចូលភោជនីយដ្ឋានជប៉ុននៅទីក្រុងអូសាកា បានធ្វើឱ្យមានការជជែកវែកញែកយ៉ាងខ្លាំងក្នុងបណ្តាញសង្គមប្រទេសចិន ប៉ុន្តែពលរដ្ឋជប៉ុនមួយចំនួនដែលមានគំនិតជាតិនិយម បែរជាគាំទ្រភោជនីយដ្ឋាននេះ ។

ពលរដ្ឋចិនមួយចំនួនធំបានបង្ហាញការខកចិត្ត និងពុំពេញចិត្តយ៉ាងខ្លាំងចំពោះភោជនីយដ្ឋានជប៉ុនរើសអើងភ្ញៀវចិន ។ ពលរដ្ឋចិនយល់ឃើញថា ទង្វើរបស់ភោជនីយដ្ឋានជប៉ុន គឺជ្រុលហួសហេតុជាងភ្ញៀវចិនដែលមិនសុភាពទៅទៀត ខណៈអ្នកខ្លះថា នេះជាវិធីសាស្ត្រទាក់ទាញភ្ញៀវចូលបរិភោគអាហារ តាមរយៈការបង្ហាញពីទឹកចិត្តស្រឡាញ់ជាតិរបស់ខ្លួន ។ ប៉ុន្តែអ្នកផ្សេងទៀតគាំទ្រភោជនីយដ្ឋានជប៉ុន និងនិយាយថា ពលរដ្ឋចិនគួរតែស្នើឱ្យពលរដ្ឋចិនដូចគ្នាកែប្រែទម្លាប់មិនល្អចេញ ជាពិសេស នៅទីសាធារណៈ ។

តាមច្បាប់របស់ជប៉ុន គឺភោជនីយដ្ឋាននានាអាចបដិសេធភ្ញៀវដែលពុំនិយាយភាសាជប៉ុន ដោយសារបុគ្គលិកភោជនីយដ្ឋាននិយាយភាសាបរទេសមានកម្រិត ប៉ុន្តែបើភោជនីយដ្ឋានណាមួយរើសអើងពូជសាសន៍ ឬសញ្ជាតិ ចាត់ទុកថា ភោជនីយដ្ឋាននោះល្មើសនឹងរដ្ឋធម្មនុញ្ញជប៉ុន ។

គួរបញ្ជាក់ថា កាលពីឆ្នាំ២០២៤ ប្រទេសជប៉ុនទទួលបានភ្ញៀវទេសចរបរទេស ចំនួន៣៦លាន៩សែននាក់ កើនឡើង៤៧.១% បើធៀបនឹងឆ្នាំ២០២៣ ខណៈឆ្នាំ២០១៩ ជប៉ុនទទួលបានភ្ញៀវទេសចរបរទេស ត្រឹមតែ៣១លាន៩សែននាក់ប៉ុណ្ណោះ ។ រីឯភ្ញៀវទេសចរមកកម្សាន្តនៅជប៉ុនច្រើនបំផុត គឺកូរ៉េខាងត្បូង ស្មើ២៣.៨% និងចិន ស្មើ១៨.៩៥ ។ ភ្ញៀវទេសចរចិន និងកូរ៉េខាងត្បូង ដែលបរិភោគអាហារក្នុងភោជនីយដ្ឋានជប៉ុនពេលធ្វើដំណើរមកដល់ជប៉ុន ពួកគេចង់ឱ្យភោជនីយដ្ឋានជប៉ុនផ្លាស់ប្តូរទស្សនៈនេះ ៕

ប្រទេសអង់គ្លេស ៖ កាលពីថ្ងៃទី១៤ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ក្រុមហ៊ុនរចនាផ្នែកលំហអាកាសជាច្រើន រួមទាំងក្រុមហ៊ុនអភិវឌ្ឍន៍បច្ចេកវិទ្យាថ្មីៗ (CPI) របស់អង់គ្លេស និង Technicon Design បានបង្ហាញគំនិតថ្មីមួយ គឺការផលិតយន្តហោះគ្មានបង្អួច ដើម្បីបង្កើតបរិយាកាសកាន់តែរីករាយដល់អ្នកដំណើរ ។ យន្តហោះថ្មីនឹងបំពាក់អេក្រង់ OLED ស្តើងជំនួសបង្អួច និងបំពាក់លើដំបូលផ្នែកខ្លះ ហើយអ្នកដំណើរនឹងមានអារម្មណ៍ថា យន្តហោះធំទូលាយ គ្មានអ្វីបិទបាំង និងមើលឃើញពពកជុំវិញខ្លួន ។

យន្តហោះបំពាក់អេក្រង់ OLED ពិសេសជំនួសបង្អួចនេះ មានគុណសម្បត្តិជាច្រើន រួមមាន ៖ ការដោះបង្អួចចេញបានជួយឱ្យយន្តហោះស្រាលជាងមុន, ជួយបង្កើនប្រសិទ្ធភាពការប្រើប្រាស់ប្រេងឥន្ធនៈ និងកាត់បន្ថយការបំភាយកាបូនលើបរិយាកាស ។ លើសពីនេះ ក្រុមហ៊ុនអង់គ្លេសមានគម្រោងដំឡើងបន្ទះសូឡាស្រូបពន្លឺព្រះអាទិត្យដើម្បីផ្តល់ថាមពលដល់យន្តហោះ ។

បើទោះជាយន្តហោះថ្មីនេះពុំទាន់ចេញជារូបរាងពិតប្រាកដក្តី ប៉ុន្តែបើយន្តហោះនេះបង្ហាញរូបរាងនាថ្ងៃអនាគត គឺវានឹងបង្ហាញពីបទពិសោធន៍ថ្មីក្នុងការធ្វើដំណើរតាមអាកាស ដែលមនុស្សគ្រប់រូបស្រមៃយូរមកហើយ ។ ប៉ុន្តែការផលិតយន្តហោះគ្មានបង្អួចបិទបាំងជួបនឹងបញ្ហាប្រឈមមួយចំនួន ដូចជា ៖ ការធានាផាសុកភាពអ្នកដំណើរ ការដោះស្រាយបញ្ហាអ្នកដំណើរពុលយន្តហោះ និងការអនុវត្តតាមសុវត្ថិភាពអាកាសចរណ៍ដ៏តឹងរ៉ឹង ។

ក្រុមហ៊ុនអភិវឌ្ឍន៍បច្ចេកវិទ្យាថ្មីៗ (CPI) រំពឹងថា នាថ្ងៃអនាគត អ្នកដំណើរទូទាំងពិភពលោក នឹងអាចជិះយន្តហោះគ្មានបង្អួចបិទបាំង ជំនួសដោយការប្រើប្រាស់អេក្រង់ឆ្លាតវៃ OLED ដើម្បីឱ្យអ្នកដំណើរអាចមើលបរិយាកាសខាងក្រៅគ្រប់ពេលវេលា ។ វាថែមទាំងធ្វើឱ្យយន្តហោះមានទម្ងន់ស្រាល សន្សំសំចៃប្រេងឥន្ធនៈ និងកាត់បន្ថយថ្លៃសំបុត្រ ។

គួរបញ្ជាក់ថា ក្រុមហ៊ុនអភិវឌ្ឍន៍បច្ចេកវិទ្យាថ្មីៗ Center for Process Innovation (CPI) មានគំនិតផលិតយន្តហោះបំពាក់អេក្រង់ OLED ជំនួសបង្អួច តាំងពីឆ្នាំ២០១៤ មកម្ល៉េះ ។ អ្នកតំណាងក្រុមហ៊ុន CPI ឈ្មោះ Jon Helliwell និយាយថា បច្ចេកវិទ្យា OLED កើតឡើងដោយសារការរួមបញ្ចូលគ្នារវាងឧបករណ៍អាចបញ្ចេញពន្លឺដោយខ្លួនឯងពេលប្រើប្រាស់ចរន្តអគ្គិសនី ។ យើងនឹងអាចជិះយន្តហោះដែលមើលឃើញផ្ទៃមេឃយ៉ាងស្រស់ស្អាត នាថ្ងៃអនាគត ។

ប្រសិនបើមានការផលិតយន្តហោះនេះពិតមែន នឹងធ្វើឱ្យបទពិសោធន៍ការធ្វើដំណើរផ្លូវឆ្ងាយរបស់យើងកាន់តែរីករាយខ្លាំងឡើង ដូចគ្នានឹងការធ្វើដំណើរលើកម្រាលព្រំវេទមន្ត ។ ចុះលោកអ្នកវិញយល់ឃើញយ៉ាងណាដែរ? តើចង់ជិះយន្តហោះមើលឃើញពពកជុំវិញខ្លួនដែរឬទេ?