ប្រទេសថៃ ៖ អ្នកលេងបណ្តាញសង្គមភ្ញាក់ផ្អើលយ៉ាងខ្លាំងក្រោយពីអ្នករស់នៅបន្ទប់ខុនដូមួយកន្លែងក្នុងតំបន់រ៉ាជឆាដា ទីក្រុងបាងកក ប្រទេសថៃ បង្ហោះរូបភាពពស់យក្ស២ក្បាល វារនៅមុខបន្ទប់ និងសរសេរថា តាមធម្មតា ខុនដូនេះមានទាំងក្រុម Call Center និងក្រុមភ្នាល់ ទីបំផុត ក៏មានពស់វារតាមផ្លូវដើរ ប៉ុន្តែពស់មិនមែនរួចពីទ្រុងទេ ។ ទោះជាអ្នកគ្រប់គ្រងខុនដូហាមចិញ្ចឹមឆ្កែ ប៉ុន្តែនៅតែមានអ្នកយកឆ្កែមកចិញ្ចឹមក្នុងបន្ទប់រំខានអ្នកជិតខាង ហើយអ្នកជិតខាងទ្រាំលែងបាន ក៏លែងពស់មុខបន្ទប់បែបនេះ ។

កាលពីថ្ងៃទី១៩ ខែឧសភា ឆ្នាំ២០២៥ សារព័ត៌មានថៃរាយការណ៍ថា អ្នកយកពស់មកលែង ធ្លាប់និយាយថា បើមិនឈប់ចិញ្ចឹមឆ្កែទេ ខ្លួននឹងចាត់វិធានការខ្លាំងវិញ ។ នាព្រឹកថ្ងៃបន្ទាប់ អ្នកនោះក៏យកពស់យក្ស២ក្បាលមកលែងមុខបន្ទប់ ថតវីដេអូបង្ហោះចូលក្នុងកម្មវិធី Line និងនិយាយទៅកាន់បន្ទប់ចិញ្ចឹមឆ្កែថា ប្រយ័ត្នខ្លួនផង ។

តាមអ្នករស់នៅបន្ទប់ខុនដូក្បែរនោះ គឺអ្នកដែលយកពស់មកលែង បានសំណូមពរឱ្យអ្នកគ្រប់គ្រងខុនដូជួយដោះស្រាយរឿងបន្ទប់ជិតខាងយកឆ្កែមកចិញ្ចឹមបង្កសំឡេងខ្លាំងរំខានអ្នករស់នៅក្បែរជាច្រើនឆ្នាំហើយ ប៉ុន្តែគ្មានការដោះស្រាយ ទើបយកពស់មកលែងមុខបន្ទប់ ។ នេះជាការសងសឹងទៅអ្នកចិញ្ចឹមឆ្កែវិញ ដែលពុំខ្លាចចិត្តអ្នកដទៃ ពីព្រោះខុនដូហាមចិញ្ចឹមសត្វ ប៉ុន្តែនៅតែមានអ្នកលួចចិញ្ចឹមឆ្កែ ឆ្មា ពេលខ្លះ ឆ្កែទាំងនេះព្រុសផង ស្រែកផង រំខានការសម្រាកអ្នកជិតខាងយ៉ាងខ្លាំង ។

អ្នករស់នៅបន្ទប់ខុនដូក្បែរបន្តថា ក្រៅពីថ្លង់សំឡេងឆ្កែព្រុស ថែមទាំងធុំក្លិនលាមកឆ្កែពេញបរិវេណទាំងអស់ ព្រមទាំងមានចៃឆ្កែវារចូលបន្ទប់ផ្សេងៗ អ្នកជិតខាងធ្លាប់ប្រាប់ទៅខាងខុនដូជាច្រើនលើកឱ្យដោះស្រាយរឿងនេះតាំងពីឆ្នាំ២០២៣ ប៉ុន្តែគ្មានការដោះស្រាយអ្វីទាំងអស់ ។ ការចិញ្ចឹមឆ្កែក្នុងខុនដូបែបនេះពុំសមរម្យសោះ ខ្លួនមិនកាន់ជើងខាងណាទេ ប៉ុន្តែគួរបឹ្តងសមត្ថកិច្ចឱ្យជួយដោះស្រាយបញ្ហា មិនមែនយកពស់មកលែងធ្វើឱ្យអ្នករស់នៅខុនដូទាំងអស់ភ័យខ្លាចពុំហ៊ានចេញក្រៅ ។

ក្រោយពីព័ត៌មាននេះល្បីល្បាញក្នុងបណ្តាញសង្គម សមត្ថកិច្ច និងភ្នាក់ងារចាប់ពស់ ក៏បានមកដល់ខុនដូ ហើយសមត្ថកិច្ចសម្រេចបញ្ចប់រឿងដោយការពិន័យប្រាក់ទាំងអ្នកលែងពស់ និងអ្នកចិញ្ចឹមឆ្កែក្នុងខុនដូ គឺម្នាក់ចំនួន១ម៉ឺនបាត (ឬស្មើជាង៣០០ដុល្លារ) ៕

ប្រទេសដាណឺម៉ាក ៖ ប្រទេសដាណឺម៉ាក មានសកលវិទ្យាល័យសាធារណៈដែលអាចឲ្យសិស្សចូលរៀនបានដោយមិនបាច់បង់ថ្លៃសិក្សាអ្វីឡើយ លើសពីលើនេះសិស្សនិស្សិតដែលបានចូលរៀននៅទីនោះថែមទាំងទទួលបានជំនួយជាទឹកប្រាក់ប្រចាំខែរហូតដល់1ពាន់ដុល្លាទៀតផង។ ការផ្ដល់ជូននេះគឺដើម្បីលើកកម្ពស់កម្រិតចំណេះដឹងរបស់យុវជន និងជំរុញឲ្យពួកគេអាចបន្តការសិក្សានៅសកលវិទ្យាល័យបាន។

ការផ្ដល់ជូនជាការសិក្សា និងជំនួយផ្នែកហិរញ្ញវត្ថុបែបនេះ គឺធ្វើឡើងតាមរយៈគម្រោង Staten Educational Grant and Loan Scheme ដែលជាកម្មវិធីលើកទឹកចិត្តដល់និស្សិតទាំងឡាយកុំឲ្យបោះបង់ការសិក្សា ព្រមទាំងជំរុញឲ្យការអប់រំមានគុណភាពខ្ពស់។ ប្រាក់ជំនួយដែលផ្ដល់ឲ្យនោះ ជួយគាំទ្រសិស្សនិស្សិតលើការចំណាយប្រចាំថ្ងៃ ដូចជាកន្លែងស្នាក់នៅ អាហារ និងការរស់នៅរបស់ពួកគេ។

ចំពោះលក្ខខណ្ឌក្នុងការទទួលបានអាហាររូបករណ៍ខាងលើនេះរួមមាន ៖ សិស្សនិស្សិតត្រូវតែជាពលរដ្ឋដាណឺម៉ាក ឬជាពលរដ្ឋរបស់ប្រទេសនៅសហភាពអ៊ឺរ៉ុប (EU) ឬពលរដ្ឋប្រទេសស្វ៊ីស (EEA) ឬក៏ជានិស្សិតបរទេសដែលមានប័ណ្ណស្នាក់នៅប្រភេទពិសេស។ ពួកគេអាចស្នើសុំចូលរៀនមុខជំនាញណាមួយក៏បានដែលពួកគេចង់រៀន ហើយពួកគេក៏នឹងទទួលបានប្រាក់ឧបត្ថម្ភប្រចាំខែប្រមាណ 1ពាន់ដុល្លារក្នុងមួយខែ ប្រសិនបើពួកគេរស់នៅក្រៅដោយខ្លួនឯង។ រីឯសម្រាប់និស្សិតដែលរស់នៅជាមួយឪពុកម្ដាយ នឹងទទួលបានប្រាក់តិចជាងនេះអាស្រ័យលើចំណូល និងជីវភាពគ្រួសាររបស់គេ។

ក្រៅពីនេះ និស្សិតក៏អាចស្នើសុំប្រាក់កម្ចីពីរដ្ឋាភិបាលបានផងដែរ ដោយផ្ដល់អទិភាពជាពិសេសសម្រាប់និស្សិតដែលមានកូននៅក្នុងបន្ទុក ហើយប្រាក់កម្ចីនោះនឹងត្រូវសងទៅកាន់ខាងសាលាវិញនៅពេលពួកគេបញ្ចប់ការសិក្សា។

សរុបមក ប្រទេសដាណឺម៉ាកផ្ដល់ការសិក្សាឥតគិតថ្លៃ និងជំនួយសាច់ប្រាក់ ដើម្បីជាការសម្រាលបន្ទុកចំណាយរបស់ពួកគេ និងដើម្បីផ្ដល់ឳកាសសិក្សាទៅកាន់ពលរដ្ឋគ្រប់រូបដែលមានក្ដីស្រមៃចង់បន្តការរៀនសូត្រ ឲ្យអាចចូលរៀនបានដោយមិនចាំបាច់បារម្ភលើថ្លៃចំណាយ៕

អស់បារម្ភរឿងសំបុត្រយន្តហោះមានតម្លៃថ្លៃទៀតហើយ ពេលនេះក្រុមហ៊ុនអាកាសចរណ៍មួយចំនួន កំពុងមានគម្រោងចង់បង្កើតជើងហោះហើរថ្មីមួយប្រភេទ ដែលមានតម្លៃទាបនឹកស្មានមិនដល់ និងមានផ្ដល់សេវាកម្មដល់អ្នកដំណើរចង់អង្គុយលើកៅអីក៏បាន ឬចង់ឈរក៏បានទៅតាមប្រភេទសំបុត្រដែលពួកគេបញ្ជារទិញ។

តាមប្រភពព័ត៌មានបរទេសបានឲ្យដឹងថា កាលពីខែមេសា ឆ្នាំ២០២៥ កន្លងទៅ ក្រុមហ៊ុន Frontier Airlines នៅសហរដ្ឋអាមេរិកបានប្រកាសថា ពួកគេកំពុងដំណើរការលើសេវាកម្ម «Vertical Class» ដែលជាឈុតសេវាកម្មហោះហើរថ្មី ដោយមានតម្លៃសំបុត្រចាប់ពី 9ដុល្លារឡើងទៅប៉ុណ្ណោះ។ ក្នុងនោះអ្នកដំណើរនឹងទទួលបានកន្លែងឈរផ្ទាល់ខ្លួន ខ្សែរចាប់តោងដើម្បីទប់លំនឹង និងកន្លែងសម្រាកជើង (knee rest) ផងដែរ ប្រសិនបើអតិថិជនជ្រើសរើសប្រភេទយន្តហោះដូចជា Airbus A320 ជាដើម។

អ្នកដំណើរអាចជ្រើសរើសបន្ថែម 15ដុល្លារ សម្រាប់កញ្ចប់ «Lean Premium» ដែលមានជញ្ជាំងទន់សម្រាប់ផ្អែកខ្នង ឬចំណាយ 49ដុល្លារ សម្រាប់កញ្ចប់ «UpFront Lean Plus» ដែលមានទីតាំងឈរល្អជាងគេ ព្រមទាំងអាចចាកចេញពីយន្តហោះបានមុនគេផងដែរ។

គួរជម្រាបថា បច្ចុប្បន្នគម្រោងនេះកំពុងស្ថិតនៅក្នុងការរង់ចាំសេចក្ដីអនុម័តពី FAA ដែលជាអាជ្ញារធរអាកាសចរណ៍របស់អាមេរិក។
ក្រៅពីពីក្រុមហ៊ុន Frontier Airlines របស់សហរដ្ឋអាមេរិក ក៏មានក្រុមហ៊ុនអាកាសចរណ៍របស់ប្រទេសផ្សេងទៀតរួមមាន ប្រទេសអ៊ីតាលី និង ចិន ក៏កំពុងតែចាប់អារម្មណ៍ក្នុងការបង្កើតជើងហោះហើរបែប Low Budget បែបនេះផងដែរ ដើម្បីអាចឲ្យមនុស្សគ្រប់គ្នាអាចទទួលយកបទពិសោធជិះយន្តហោះក្នុងតម្លៃសមរម្យ។

សម្រាប់ក្រុមហ៊ុន Aviointeriors មានគំនិតក្នុងការបង្កើតជើងហោះហើរមួយឈ្មោះថា Skyrider ដែលជាប្រភេទជើងហោះហើរកៅអីឈរដើម្បីកាត់បន្ថយចំណាយរបស់អ្នកដំណើរ។ ក្នុងនោះគេនឹងរៀបចំជាកៅអីស្ទូចបែប Saddle-style ដែលអ្នកដំណើរអង្គុយបានក្នុងស្ថានភាពពាក់កណ្ដាលឈរ ព្រមទាំងកាត់បន្ថយចន្លោះកៅអី ដើម្បីអាចអង្គុយបានគ្នាច្រើនផងដែរ។

ដោយឡែកសម្រាប់ក្រុមហ៊ុន Spring Airlines របស់ចិន ក៏មានគំនិតស្រដៀងគ្នានេះក្នុងការកាត់បន្ថយចំណាយលើថ្លៃសំបុត្រយន្តហោះដូចគ្នា។ បច្ចុប្បន្នពួកគេកំពុងស្នើទៅកាន់រដ្ឋាភិបាលចិនសម្រាប់គម្រោងថ្មីនេះ ប៉ុន្តែទោះជាយ៉ាងណា មានអ្នកដំណើរមួយចំនួនមានការព្រួយបារម្ភពីសុវត្ថិភាពអំឡុងពេលហោះហើរជាខ្លាំង៕

ប្រទេសវៀតណាម ៖ ពលរដ្ឋវៀតណាមភ្ញាក់ផ្អើលជាខ្លាំង បន្ទាប់ពីត្រីនាគ ឬត្រី Oarfish មួយក្បាលបានអណ្តែតមកទើរនៅឆ្នេរសមុទ្រមួយក្នុងប្រទេសវៀតណាម ក្នុងសភាពត្រដរខ្យល់ និងដា.ច់កន្ទុយដោយបង្កឱ្យមានការភ័យខ្លាចថា អាចជាប្រផ្នូលមិនល្អ ឬនឹងកើតមានគ្រោះធម្មជាតិកើតឡើង។

បើយោងតាមប្រភពពីសារព័ត៌មានវៀតណាម Bao Tuoi Tre ចេញផ្សាយនៅរសៀលថ្ងៃទី១៩ ខែឧសភា ឆ្នាំ២០២៥ បានឱ្យដឹងថា៖ មានអ្នកនេសាទបានប្រទះឃើញត្រីOarfish ខាងលើនេះ នៅលើឆ្នេរសមុទ្រ Vinh Hy ស្ថិតនៅក្នុងខេត្ត Ninh Thuan ប្រទេសវៀតណាម។ បើតាមសម្ដីរបស់លោកមេភូមិ VinhHy បាននិយាយថា ត្រីដែលគេប្រទះឃើញនេះមានប្រវែង២ម៉ែត្រ បានដា.ច់កន្ទុយ ហើយត្រូវបានរលកបោកបក់មកទើរលើឆ្នេរសមុទ្រក្នុងតំបន់ កាលពីថ្ងៃទី១៨ ខែឧសភា ឆ្នាំ២០២៥។ អ្នកស្រុក និងអ្នកទេសចរបានព្យាយាមជួយយកវាទៅដាក់ក្នុងសមុទ្រវិញ ប៉ុន្តែក្រោយមកវាបានងា..ប់ទៅ។

បន្ទាប់ពីត្រីនេះងា..ប់ ប្រជាជនក្នុងតំបន់បានសម្រេចកប់ត្រីនោះតាមប្រពៃណីទំនៀមទម្លាប់។ អ្នកនេសាទក្នុងស្រុកជាច្រើនជឿថា លេចវត្តមានឡើងនៅជិតច្រាំង គឺជារឿងដ៏កម្របំផុតមួយ។ គេជឿផងដែរថា ត្រីនាគនៅទីណា នៅទីនោះ នឹងកើតមានបាតុភូតធម្មជាតិមិនធម្មតាដូចជា ការរញ្ជួយដី ឬរលកយក្សស៊ូណាមិ។

គួរជម្រាបថា នៅក្នុងជំនឿអរូបបិយរបស់ប្រជាជនក្នុងប្រទេសមួយចំនួន ពិសេសប្រជាជនជប៉ុនត្រូវបានគេជឿជាក់ថា វាជាប្រភេទត្រីនាំសារពីបាតសមុទ្រ ហើយហើយនៅពេលវាឡើងមកដល់លើគោកជាសញ្ញានៃការកើតមានគ្រោះធម្មជាតិក្នុងពេលឆាប់ៗ។ ជាក់ស្ដែងក្នុងឆ្នាំ ២០១១ មុនពេលការរញ្ជួយដី Fukushima និងរលកយក្សស៊ូណាមិក្នុងប្រទេសជប៉ុន ដែលបានសម្លា..ប់មនុស្សជាង ២ម៉ឺននាក់ មនុស្សជាច្រើនបានគេរាយការណ៍ថាពួកគេបានប្រទះឃើញត្រី Oarfish នៅលើច្រាំងជប៉ុន។ ការអះអាងបែបនេះ កាន់ជំរុញឲ្យជំនឿ ថាOarfish ជាត្រីនាំសារ ឬជាត្រីនៃសេចក្ដីវិ.នាសកាន់តែមានខ្លាំងឡើងៗនៅពេលបច្ចុប្បន្ន។

យ៉ាងណាមិញ វាមិនមានភស្តុតាងណាមួយដែលអាចបញ្ជាក់បានថាទាំងនេះគឺជាការពិតឡើយ ដោយអ្នកវិទ្យាសាស្រ្តបានបកស្រាយថា ជាធម្មតាពួកវារស់នៅក្នុងទឹកសមុទ្រដ៏ជ្រៅចាប់ពី ២០០ ម៉ែត្រទៅ ១០០០ម៉ែត្រ ដែលជាទីកន្លែងងងឹត និងមិនអាចឲ្យពន្លឺព្រះអាទិត្យអាចចាំងទៅដល់បានឡើយ ដូច្នេះនៅយូរៗម្ដងដែលមនុស្សបានប្រទះឃើញវានៅលើផ្ទៃទឹកខាងលើ ឬជាប់លើឆ្នេរសមុទ្រ ពួកគេជឿជាក់ថានេះជាការគេចខ្លួន ពីមជ្ឈដ្ឋានដែលមានការប្រែប្រួល ឬបាតុភូតមិនល្អនៅក្រោមផ្ទៃទឹករបស់ត្រី Oarfish ទាំងនេះ៕