លោក សឹក សិលា អ្នកបង្កើតមាតិកានិងជាអ្នកលក់អនឡាញបានប្រកាសនៅលើ បណ្តាញសង្គមរបស់ខ្លួនឈប់គាំទ្រតារាថៃតទៅទៀតទោះបីជាលោកចូលចិត្តប៉ុណ្ណាក៏ដោយ។
បញ្ហាចម្រូងចម្រាសនៅលើប្រព័ន្ធអ៊ីនធឺណិតរវាងអ្នកលេងបណ្តាញសង្គមខ្មែរនិងថៃ នៅតែបន្តកើតមានជាហូរហែព្រោះតែប្រទេសទាំងពីរកំពុងមានជម្លោះបន្ទាត់ព្រំដែនជាមួយគ្នានៅមិនទាន់មានដំណោះស្រាយរួមនៅឡើយ។ ស្របពេលមានបញ្ហាកើតឡើងគេបានឃើញតារាថៃកំប៉ិកកំប៉ុកមួយចំនួនចេញមកប្រើសម្តីប្រមាថមើលងាយខ្មែររួមទាំងប្រមាថថា្នក់ដឹកនាំប្រទេសផង។
ហេតុការណ៍ជាបន្តបន្ទាប់រវាងជាតិសាសន៍ថៃមើលងាយខ្មែរបែបនេះលោក សឹក សិលា បានប្រកាសឈប់គាំទ្រតារាថៃតទៅទៀត។ លោកបានសរសេរនៅលើបណ្តាញសង្គមនៅល្ងាចថ្ងៃទី២៦ មិថុនា ថា « តារាថៃទោះខ្ញុំធ្លាប់ចូលចិត្តប៉ុណ្ណាក៏ដោយ, តែជាតិសាសន៍វាប្រមាថមើលងាយខ្មែរពេក, ខ្ញុំសុំមិនគាំទ្រពីពេលនេះតទៅ, ព្រោះចុងក្រោយ គេនៅតែកាន់ជើងសាសន៍គេដដែល។ ដូចម៉ែឪវាមើលងាយ គ្រួសារយើង, តើយើងគួរស្រលាញ់កូនគេទៀតដែរ?»។ 
ការលើកឡើងខាងលើនេះអ្នកបង្កើតមាតិការូបនេះថានេះគ្រាន់តែជាមតិរបស់ខ្លួនប៉ុណ្ណោះ ហើយលោកថាបើគាំទ្រគេក៏គាំទ្រទៅតែសុំកុំឱ្យមានការឈ្លោះគ្នា។ គូស្នេហ៍ Anna បានបញ្ជាក់ក្នុងខម្មិនថា «នេះគ្រាន់តែជាមតិរបស់ខ្ញុំ បងប្អូនអាចធ្វើតាមបេះដូងបងប្អូនបាន សំខាន់យើងកុំឈ្លោះគ្នាឯង ទោះមានមតិខុសគ្នាក៏ដោយគាំទ្រគេទៀតក៏គាំទ្រទៅ តែសុំកុំឈ្លោះគ្នាអី»។ គួរកត់សម្គាល់ថា Anna ក៏បានចែករំលែកខ្លឹមសាររបស់លោក សឹក សិលា ដូចគ្នាដែលនេះអាចបញ្ជាក់ថានាងនិងគូស្នេហ៍គឺឈប់គាំទ្រតារាថៃតទៅទៀត។
ការប្រកាសឈប់គាំទ្ររបស់លោក សឹក សិលា គេសង្កេតឃើញថាអ្នកលេងបណ្តាញសង្គមមួយចំនួនបានបង្ហាញការយល់ស្របនូវអ្វីដែលលោកបានលើកឡើងសូម្បីតែតារាចម្រៀង វីរៈ និច្ច ក៏បង្ហាញការគាំទ្រសំណេររបស់លោក សឹក សិលា ដែរ៕
