សមនឹងរហ័សនាមថាជា «ប្រធានាធិបតីនៃសង្រ្គាម» លោក Donald Trump កាលពីពេលថ្មីៗនេះបាននិយាយដោយបើកចំហរបញ្ជាក់ប្រាប់ប្រព័ន្ធផ្សព្វផ្សាយថា សង្គ្រាមរវាងសហរដ្ឋអាមេរិកនិងអ៊ីរ៉ង់ នឹងអាចបញ្ចប់ទៅបានលុះត្រាតែភាពជាអ្នកដឹកនាំផ្ដាច់ការបានដួលរលំ ហើយកម្លាំងយោធារបស់អ៊ីរ៉ង់ត្រូវបានបំផ្លា.ញទាំងស្រុង។

ថ្លែងទៅកាន់អ្នកយកព័ត៌មាននៅលើយន្តហោះ Air Force One កាលពីថ្ងៃសៅរិ៍ ទី៧ ខែមីនា លោក Trump បាននិយាយថា លោកមិនចាប់អារម្មណ៍ក្នុងការចរចាជាមួយទីក្រុងតេអេរ៉ង់នៅដំណាក់កាលនេះទេ។ ផ្ទុយទៅវិញ លោកបានណែនាំថា ជម្លោះនេះអាចនឹងបន្តរហូតដល់អ៊ីរ៉ង់លែងមានរចនាសម្ព័ន្ធយោធា ឬភាពជាអ្នកដឹកនាំដែលដំណើរការបាន ឬលែងមានសមត្ថភាពប្រយុទ្ធបន្តទៅទៀត។

ក្រៅពីនេះលោក Trump បានបន្ថែមថា ប្រសិនបើអ៊ីរ៉ង់អូសបន្លាយពេល បណ្ដោយឲ្យយុទ្ធនាការផ្លូវអាកាសរវាងសហរដ្ឋអាមេរិក និងអ៊ីស្រាអែលនៅតែបន្តដំណើរការនោះការចរចាសន្តិភាពនឹងមិនធ្វើឡើងបានឡើយ ដ្បិតមេដឹកនាំ និងមេបញ្ជាការអ៊ីរ៉ង់ធំៗត្រូវបានសម្លា.ប់អស់ទៅហើយនៅក្នុងការវាយប្រហារនោះ។ លោកបានកត់សម្គាល់ថា “ប្រហែលជាគ្មាននរណាម្នាក់នៅសល់ដើម្បីនិយាយថាយើងចុះចាញ់ទេមើលទៅ” ដែលនេះបង្ហាញថាសង្គ្រាមអាចនឹងបញ្ចប់ដោយមានប្រសិទ្ធភាពលុះត្រាតែរចនាសម្ព័ន្ធបញ្ជាការរបស់អ៊ីរ៉ង់ដួលរលំ។

គួរជម្រាបថា ការអត្ថាធិប្បាយទាំងនេះធ្វើឡើងនៅពេលដែលជម្លោះរវាងអ៊ីរ៉ង់ និងសម្ព័ន្ធមិត្តសហរដ្ឋអាមេរិក-អ៊ីស្រាអែលបានឈានដល់សប្តាហ៍ទីពីរ ហើយភាគីទាំងពីរបានផ្លាស់ប្តូរការវាយប្រហារនៅទូទាំងតំបន់។ អ្នកវិភាគនិយាយថា ពាក្យសម្ដីរបស់លោក Trump បានបង្ហាញពីយុទ្ធសាស្ត្រមួយដែលសហរដ្ឋអាមេរិកមានគោលបំណងវាយកម្ទេចភាពជាអ្នកដឹកនាំ និងសមត្ថភាពយោធារបស់អ៊ីរ៉ង់ ជាជាងការស្វែងរកបទឈប់បាញ់ដោយសន្តិវិធី។

ជាមួយគ្នានេះដែរ អ្នកជំនា.ញខាងភូមិសាស្រ្តនយោបាយអន្តរជាតិបានព្រមានថា គោលដៅបែបនេះអាចអូសបន្លាយសង្គ្រាម និងធ្វើឱ្យមជ្ឈិមបូព៌ាកាន់តែធ្លាក់ក្នុងអស្ថិរភាព ខណៈដែលអ៊ីរ៉ង់ និងសម្ព័ន្ធមិត្តរបស់ពួកគេបានប្ដេជ្ញាចិត្តយ៉ាងមុះមត់ថា នឹងបន្តទប់ទល់នឹងប្រតិបត្តិការយោធារបស់សហរដ្ឋអាមេរិក និងអ៊ីស្រាអែលឲ្យដល់ទីបញ្ចប់៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែលនៅតែក្តៅគគុកមិនទាន់រលត់ឡើយ ដែលជំរុញឱ្យអង្គការសហប្រជាជាតិព្រួយបារម្ភយ៉ាងខ្លាំងកាលពីថ្ងៃទី៦ ខែមីនា ឆ្នាំ២០២៦ ហើយអំពាវនាវឱ្យគ្រប់ភាគីជម្លោះបញ្ចប់សង្គ្រា.មត្រឹមនេះ ស្វែងរកដំណោះស្រាយដោយការចរចាគ្នា បើមិនដូច្នោះទេ វានឹងរីករាលដាលកាន់តែខ្លាំងឡើងទប់ស្កាត់លែងបាន ។

កាលពីថ្ងៃទី៦ ខែមីនា អគ្គលេខាធិការអង្គការសហប្រជាជាតិ (UN) លោក Antonio Guterres បានដាស់តឿនពីសង្គ្រាមនៅមជ្ឈិមបូព៌ានឹងរាលដាលកាន់តែខ្លាំងរហូតដល់គ្មានប្រទេសណាមួយអាចទប់ស្កាត់បាន ព្រមទាំងអំពាវនាវឱ្យអាមេរិក និងអ៊ីរ៉ង់ ងាកមករកការចរចាគ្នាតាមមធ្យោបាយការទូតដើម្បីបញ្ចប់សង្គ្រាម ។ សង្គ្រាមបណ្តាលឱ្យមនុស្សភៀសខ្លួនកើនឡើងរហូតដល់ ៣សែន ៣ម៉ឺននាក់ ដោយសារអាមេរិករួមដៃគ្នាជាមួយអ៊ីស្រាអែលវាយប្រហារអ៊ីរ៉ង់ រីឯអ៊ីរ៉ង់សងសឹកដោយការបាញ់មីស៊ីល និងដ្រូនទៅកាន់មូលដ្ឋានកងទ័ពអាមេរិកនៅបណ្តាប្រទេសមជ្ឈិមបូព៌ា បង្កឱ្យភ្លើងសង្គ្រាមឆេះពេញតំបន់ ។

លោកបន្តថា ការវាយប្រហារខុសច្បាប់នៅតំបន់មជ្ឈិមបូព៌ា និងតំបន់ផ្សេងៗកំពុងតែធ្វើឱ្យជនស៊ីវិលរងទុក្ខវេទនាយ៉ាងខ្លាំង និងប៉ះពាល់ដល់សេដ្ឋកិច្ចពិភពលោកយ៉ាងធ្ងន់ធ្ងរ ជាពិសេស ក្រុមប្រទេសងាយរងផលប៉ះពាល់ ។

បើតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ពេលនេះ មានមនុស្សយ៉ាងតិច ចំនួន៣សែន ៣ម៉ឺននាក់ បានរត់គេចពីសង្គ្រាមនៅតំបន់មជ្ឈិមបូព៌ា ក្នុងនោះមនុស្សប្រមាណ១សែននាក់បានរត់ចេញពីទីក្រុងតេហេរ៉ង់ ។

ចំណែកឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Amir-Saeid Iravani ថា អាមេរិក និងអ៊ីស្រាអែលមិនគោរពបន្ទាត់ក្រហមណាមួយឡើយ និងប្រព្រឹត្តឧក្រិដ្ឋកម្មមកលើប្រទេសអ៊ីរ៉ង់ ខណៈតំបន់ជនស៊ីវិលរបស់អ៊ីរ៉ង់ដែលមានមនុស្សរស់នៅយ៉ាងច្រើនត្រូវបានអាមេរិក និងអ៊ីស្រាអែល ទម្លាក់គ្រាប់បែក ។ អ៊ីរ៉ង់ថ្កោលទោសអាមេរិក និងអ៊ីស្រាអែល ដែលវាយប្រហារលើកីឡដ្ឋាននៅទីក្រុងតេហេរ៉ង់ ដែលជាការល្មើសច្បាប់អន្តរជាតិ និងប្រឆាំងរដ្ឋធម្មនុញ្ញអូឡាំពិក ។

គួរបញ្ជាក់ថា ប្រធានាធិបតីអាមេរិក លោក Donald Trump កាលពីថ្ងៃទី៦ ខែមីនា បានជំរុញឱ្យអ៊ីរ៉ង់យល់ព្រមចុះចាញ់សង្គ្រាមដោយគ្មានលក្ខខណ្ឌអ្វីទាំងអស់ ដែលការកំណត់នេះត្រូវបានចាត់ទុកជាការដាក់សម្ពាធលើអ៊ីរ៉ង់យ៉ាងខ្លាំង បន្ទាប់ពីអាមេរិក និងអ៊ីស្រាអែលបើកការវាយប្រហារអ៊ីរ៉ង់កាលពីចុងខែកុម្ភៈ ដែលធ្វើឱ្យអ៊ីរ៉ង់បដិសេធការចរចាបញ្ចប់សង្គ្រាមនាពេលឆាប់ៗ ៕

មិនខុសពីល្បិចជូកឺលាង ដែលបោ.កបញ្ឆោ.តយកគ្រាប់ព្រួញពីសត្រូវមកទុកប្រើប្រាស់! ថ្មីៗនេះយោធាអាមេរិកទទួលបានជោគជ័យមួយបន្ថែមទៀតនៅក្នុងការកែច្នៃដ្រូន Shahed-136 kamikaze ដ៏ល្បីល្បាញរបស់អ៊ីរ៉ង់ដែលបញ្ជូនមកវា.យប្រ.ហារខ្លួន ឲ្យប្រែក្លាយទៅជាគិញសម្ងាត់ស៊ើបការណ៍ហោះបកត្រឡប់ទៅរកម្ចាស់ដើមវិញ បន្ទាប់មកក៏បញ្ជូនទិន្នន័យពីទីតាំងសម្រាប់កំណត់គោលដៅវា.យប្រហារមកឲ្យសហរដ្ឋអាមេរិកវិញ។

យោងតាមរបាយការណ៍ដែលចេញផ្សាយកាលពីថ្មីៗនេះបានបង្ហាញថា សហរដ្ឋអាមេរិកឥឡូវនេះកំពុងបង្វិលបច្ចេកវិទ្យាដ៏ទំនើបរបស់អ៊ីរ៉ង់ទៅវាយប្រហាលើរអ៊ីរ៉ង់វិញយ៉ាងមានប្រសិទ្ធភាព តាមរយៈការយកគ្រឿងបង្គំដើមពីដ្រូន Shahed-136 kamikaze របស់អ៊ីរ៉ង់ទៅបង្កើតជាដ្រូន Lucas ដែលមានសមត្ថភាពអាចវាយប្រហារ និងបំផ្លា.ញប្រព័ន្ធបញ្ជារបស់ដ្រូនផ្សេងៗដែលនៅជិតវាឲ្យបាត់បង់លំនឹងហើយធ្លាក់ចុះមកដីផ្ទុះមុនពេលចុះចតនៅគោលដៅ។

តាមការឲ្យដឹងរបស់កងទ័ពអាមេរិក ការកែច្នែដ្រូន Lucas ខាងលើនេះគេចំណាយអស់ត្រឹមតែប្រមាណ 35,000 ដុល្លារតែប៉ុណ្ណោះ ដែលបើធៀបទៅនឹងគំរូដើម Shahed-136 វាមានតម្លៃពី 10-50ម៉ឺនដុល្លារឯណោះក្នុងមួយគ្រឿង។ ការណ៍នេះបានផ្ដល់មកនូវផលចំណេញយ៉ាងច្រើនដល់សហរដ្ឋអាមេរិក ព្រោះដ្រូន Lucas ដែលកែច្នៃឡើងមកនេះក៏មានសមត្ថភាពប្រហាក់ប្រហែលទៅទៅនឹងដ្រូន Shahed របស់អ៊ីរ៉ង់ដែរ។

ជាក់ស្ដែង នៅក្នុងការវាយប្រហារលើទីតាំងយោធាអ៊ីរ៉ង់កាលពីថ្មីៗនេះ កងកម្លាំងរបស់អាមេរិកត្រូវបានគេរាយការណ៍ថាបានដាក់ពង្រាយដ្រូន Lucas ជាលើកដំបូង ដើម្បីបញ្ជូនអាវុធរបស់អ៊ីរ៉ង់ឲ្យហោះទៅវាយប្រហារលើគោលដៅរបស់អ៊ីរ៉ង់វិញ។

ជាមួយនឹងភាពឈ្លាសវៃរបស់កងទ័ពអាមេរិកដូចខាងលើនេះ អ្នកវិភាគយោធានិយាយថា យុទ្ធសាស្ត្រនេះគឺជានិមិត្តរូបតាមរយៈការខិតខំប្រឹងប្រែងក្នុងការរចនារបស់ Shahed ឲ្យក្លាយជាដ្រូនពិឃាតដែលមានតម្លៃថោក សាមញ្ញ និងមានឥទ្ធិពល ។ ជាមួយនឹងការចម្លង ការរចនា និងការកែលម្អទាំងនេះLucas របស់សហរដ្ឋអាមេរិកត្រូវបានគេរំពឹងថា នឹងក្លាយជាឧបករណ៍ចម្បងសម្រាប់បេសកកម្ម “វាយប្រហារលើសត្រូវតាមដែនអាកាស”យ៉ាងមានប្រសិទ្ធភាពបំផុត។

លទ្ធផលនេះ ឆ្លុះបញ្ចាំងពីរបត់មួយចំពោះអាវុធដែលធ្លាប់ត្រូវបានប្រើប្រាស់ដោយអ៊ីរ៉ង់ និងសម្ព័ន្ធមិត្តរបស់ពួកគេ ឥឡូវនេះកំពុងត្រូវបានកែច្នៃ និងបា.ញ់តបតទៅវិញប្រឆាំងនឹងអ៊ីរ៉ង់ខ្លួនឯង តាមបច្ចេកទេសនៅក្នុងយុគសម័យនៃសង្គ្រាមបច្ចេកវិទ្យាដ៏ទំនើប៕

មើលទៅស្ថានការណ៍សង្គ្រា.មនៅមជ្ឈិមបូព៌ាពេលនេះ គ្មានសញ្ញានឹងបញ្ចប់នាពេលឆាប់ៗទេ ដែលធ្វើឱ្យពិភពលោកកាន់តែបារម្ភពីផលប៉ះពាល់សេដ្ឋកិច្ច និងសន្តិសុខក្នុងតំបន់ ។ កាលពីថ្ងៃទី៦ ខែមីនា ឆ្នាំ២០២៦ អ៊ីរ៉ង់មិនត្រឹមតែមិនចរចា ថែមទាំងព្រមានថា ប្រសិនបើប្រទេសអឺរ៉ុបណាមួយហ៊ានចូលរួមជាមួយអាមេរិក និងអ៊ីស្រាអែលក្នុងការវាយប្រ.ហារអ៊ីរ៉ង់ ខ្លួននឹងវាយប្រ.ហារសងសឹកប្រទេសនោះវិញភ្លាមៗដោយមិនប្រណីដៃឡើយ ដូចដែលខ្លួនវាយប្រ.ហារប្រទេសនានានៅមជ្ឈិមបូព៌ា ។

អ៊ីរ៉ង់បានព្រមានទៅកាន់បណ្តាប្រទេសអឺរ៉ុបកាលពីថ្ងៃទី៦ ខែមីនា ថា នឹងក្លាយជាគោលដៅវាយប្រហាររបស់អ៊ីរ៉ង់ភ្លាមៗ ប្រសិនបើប្រទេសទាំងនោះហ៊ានសហការ ឬគាំទ្រអាមេរិក និងអ៊ីស្រាអែលធ្វើសង្គ្រាមជាមួយអ៊ីរ៉ង់ ព្រមទាំងបញ្ជាក់ថា ការវាយប្រហារលើមូលដ្ឋានកងទ័ព និងទ្រព្យសម្បត្តិរបស់អាមេរិកនៅតំបន់មជ្ឈិមបូព៌ា គឺជារឿងសមហេតុផល ។

កាលថ្ងៃទី៦ ខែមីនា លោក Majid Takht-Ravanchi អនុរដ្ឋមន្ត្រីក្រសួងការបរទេសអ៊ីរ៉ង់ថា បើប្រទេសអឺរ៉ុបណាសម្រេចចិត្តចូលរួម ឬផ្តល់ការគាំទ្រប្រតិបត្តិកងទ័ពរបស់អាមេរិក និងអ៊ីស្រាអែលក្នុងការធ្វើសង្គ្រាមជាមួយអ៊ីរ៉ង់ ប្រទេសនោះនឹងក្លាយជាគោលដៅសងសឹករបស់អ៊ីរ៉ង់ភ្លាមៗ ។ អ៊ីរ៉ង់បានជូនដំណឹងទៅកាន់រដ្ឋាភិបាលប្រទេសនានានៅអឺរ៉ុបឱ្យប្រុងប្រយ័ត្ន និងចៀសវាងការចូលរួមក្នុងសង្គ្រាមដែលអ៊ីរ៉ង់ចាត់ទុកជាការឈ្លានពាន ប៉ុន្តែលោកមិនបានបញ្ជាក់ឈ្មោះប្រទេសណាមួយឡើយ ។

ក្រៅពីនេះ អនុរដ្ឋមន្ត្រីក្រសួងការបរទេសអ៊ីរ៉ង់ លោក Ravanchi ក៏បានបញ្ជាក់ឡើងវិញអំពីគោលជំហររបស់អ៊ីរ៉ង់ចំពោះស្ថានភាពក្នុងតំបន់ឈូងសមុទ្រពែក្សថា អ៊ីរ៉ង់បានជូនដំណឹងជាមុនទៅកាន់ប្រទេសជិតខាងពីផលប៉ះពាល់នឹងកើតឡើង ប្រសិនបើអាមេរិកបន្តអនុវត្តគោលនយោបាយអរិភាព ។ រីឯមូលដ្ឋានកងទ័ព និងទ្រព្យសម្បត្តិទាំងអស់របស់អាមេរិកនៅមជ្ឈិមបូព៌ា គឺជាគោលដៅវាយប្រហាររបស់អ៊ីរ៉ង់ មិនថាស្ថិតនៅកន្លែងណាទេ ដើម្បីសងសឹកនឹងប្រតិបត្តិការកងទ័ពអាមេរិក និងអ៊ីស្រាអែល ដែលធ្វើឱ្យស្ថានការណ៍តានតឹងខ្លាំងឡើង ។

លោកបានរិះគន់រដ្ឋាភិបាលអាមេរិកដែរថា បានបង្អាក់ការខិតខំប្រឹងប្រែងការទូត ដែលកន្លងមក អ៊ីរ៉ង់ចូលរួមចរចាជាមួយអាមេរិកដោយស្មោះត្រង់ដើម្បីស្វែងរកដំណោះស្រាយនៅមុនពេលកើតសង្គ្រាម ប៉ុន្តែអាមេរិក និងអ៊ីស្រាអែល បែរជាសម្រេចចិត្តបើកការវាយប្រហារទៅវិញ ។ នេះជាការរារាំងដល់ដំណើរការចរចាទាំងអស់ និងធ្វើឱ្យស្ថានការណ៍តានតឹងរាលដាលកាន់តែខ្លាំងរហូតដល់បច្ចុប្បន្ន ។

គិតត្រឹមថ្ងៃទី៧ ខែមីនា សង្គ្រាមនៅអ៊ីរ៉ង់បន្តក្តៅគគុក ខណៈប្រធានាធិបតីអាមេរិក លោក Donald Trump ទាមទារឱ្យអ៊ីរ៉ង់សុំចុះចាញ់ដោយឥតលក្ខខណ្ឌ និងប្រកាសមិនធ្វើកិច្ចព្រមព្រៀងជាមួយអ៊ីរ៉ង់ ។ ការវាយប្រហារតាមអាកាសនៅតែកើតឡើងនៅទីក្រុងតេហេរ៉ង់ និងទីក្រុងផ្សេងៗ បណ្តាលឱ្យមនុស្សស្លាប់ និងរងរបួសជាច្រើននាក់ ខណៈអ៊ីរ៉ង់បានវាយតបវិញដោយប្រើមីស៊ីល និងដ្រូនទៅកាន់គោលដៅរបស់អាមេរិក និងអ៊ីស្រាអែលនៅមជ្ឈិមបូព៌ា ដែលធ្វើឱ្យប៉ះពាល់ពិភពលោក បើទោះមានប្រទេសខ្លះព្យាយាមសម្រុះសម្រួលបញ្ចប់សង្គ្រាម ក៏មិនទាន់មានដំណោះស្រាយច្បាស់លាស់នៅឡើយ ៕