អ្នកជំនាញសេដ្ឋកិច្ចបារម្ភពីការរង្គោះរង្គើអង្គការផលិតប្រេងធំបំផុតលើពិភពលោក OPEC បន្ទាប់ពីប្រទេសអេមីរ៉ាតអារ៉ាប់រួម (UAE) សម្រេចចិត្តចាកចេញពីអង្គការនេះ ចាប់ពីថ្ងៃទី១ ខែឧសភា ឆ្នាំ២០២៦ គឺប្រទេសផ្សេងៗនឹងចាកចេញដែរ ស្របពេលសង្គ្រា.មនៅអ៊ីរ៉ង់ បង្កផលប៉ះពាល់យ៉ាងខ្លាំងដល់ទីផ្សារប្រេងពិភពលោក ។ វាជារឿងនឹកស្មានមិនដល់សម្រាប់ក្រុមប្រទេសផលិតប្រេង ដែលអេមីរ៉ាតអារ៉ាប់រួមសម្រេចចិត្តបែបនេះ ខណៈរដ្ឋមន្ត្រីថាមពលអេមីរ៉ាតអារ៉ាប់រួម បញ្ជាក់ថា អវត្តមានរបស់ប្រទេសខ្លួននឹងមិនប៉ះពាល់ខ្លាំងក្លាដល់ទីផ្សារប្រេងពិភពលោក ។

មូលហេតុដែលអេមីរ៉ាតអារ៉ាប់រួម សម្រេចចិត្តចាកចេញពីអង្គការ OPEC ដោយសារខកចិត្តទាក់ទងនឹងកូតា អេមីរ៉ាតអារ៉ាប់រួមត្រូវការបង្កើនការផលិតប្រេងដើម្បីប្រមូលប្រាក់ចំណូល ដែលផ្ទុយនឹងគោលនយោបាយកាត់បន្ថយការផលិតប្រេងរបស់អង្គការនេះ ។

បើតាមអ្នកជំនាញ បន្ទាប់ពីអេមីរ៉ាតអារ៉ាប់រូម (UAE) ចាកចេញពីអង្គការ OPEC វានឹងប៉ះពាល់យ៉ាងខ្លាំងដល់អង្គការផលិតប្រេងដ៏ធំលើពិភពលោកនេះ និងអាចបណ្តាលឱ្យរលំរលាយអង្គការទាំងមូល ប្រសិនបើ OPEC គ្មានវិធានការការពារកុំឱ្យប្រទេសផ្សេងទៀតចាកចេញដែរ ។

នាយកប្រតិបត្តិក្រុមហ៊ុនផ្តល់ការប្រឹក្សានៅទីក្រុងឌូបៃ Qamar Energy ឱ្យដឹងថា ប្រទេសកាហ្សាក់ស្ថាន ក៏ចាកចេញពី OPEC ដែរ ខណៈប្រទេសនេះផលិតប្រេងយ៉ាងច្រើន និងចង់បង្កើនការផលិត ។ រីឯអ្នកជំនាញសេដ្ឋកិច្ចមកពី Capital Economics ថា ទំនាក់ទំនងរវាងប្រទេសជាសមាជិក OPEC ចាប់ផ្តើមបែកបាក់ ហើយការចាកចេញរបស់អេមីរ៉ាតអារ៉ាប់រួម នឹងប៉ះពាល់ក្នុងរយៈពេលយូរទៅមុខទៀត គឺតម្លៃប្រេងពិភពលោកនឹងប្រែប្រួល ។

ផលប៉ះពាល់ចម្បង គឺ OPEC នឹងបាត់បង់ប្រាក់ចំណូលយ៉ាងច្រើនមហាសាល បើតាមទិន្នន័យរបស់ភ្នាក់ងារថាមពលអាមេរិក (EIA) ឱ្យដឹងថា កាលពីឆ្នាំ២០២៥ OPEC ទទួលបានប្រាក់ចំណូលពីការលក់ប្រេងរហូតដល់ជាង៤សែនលានដុល្លារ ហើយក្នុងចំនួននេះ ប្រាក់ចំណូលពីការលក់ប្រេងរបស់អេមីរ៉ាតអារ៉ាប់រួម ស្មើប្រមាណ ៧ម៉ឺន ៧ពាន់លានដុល្លារ (ឬជិត១៧%) ។

ការបាត់បង់អេមីរ៉ាតអារ៉ាប់រួម ដែលជាប្រទេសផលិតប្រេងលំដាប់ទី២ របស់ OPEC នឹងជំរុញឱ្យប្រទេសផ្សេងៗចាកចេញជាបន្តបន្ទាប់ ស្របពេលទំនាក់ទំនងរវាងប្រទេសសមាជិកមិនល្អស្រាប់តែហើយ ។ ក្រៅពីនេះ ស្ថានការណ៍អសន្តិសុខក្នុងតំបន់ដោយសារសង្គ្រាមនៅមជ្ឈិមបូព៌ា ព្រមទាំងការវាយប្រហារទីតាំងប្រេងអ៊ីរ៉ង់ដែលជាសមាជិក OPEC អាចជាមូលហេតុធ្វើឱ្យអង្គការនេះរលំលាយ ។

សូមរំឭកថា អេមីរ៉ាតអារ៉ាប់រួម គឺជាសមាជិកដ៏សំខាន់របស់ OPEC ហើយការបាត់បង់សមាជិកនេះ នឹងបង្កមានភាពចលាចលធ្វើឱ្យអង្គការនេះចុះខ្សោយ ។ កន្លងមក សមាជិកអង្គការនេះខ្វែងគំនិតគ្នាលើបញ្ហាផ្ទៃក្នុងជាច្រើន ចាប់ពីភូមិសាស្ត្រនយោបាយ រហូតដល់កូតាការផលិតប្រេង ។

អង្គការ OPEC ត្រូវបានបង្កើតឡើងកាលពីឆ្នាំ១៩៦០ ដោយប្រទេសជាសមាជិកដំបូង រួមមាន ៖ អារ៉ាប៊ីសាអូឌីត អ៊ីរ៉ង់ អ៊ីរ៉ាក់ វេណេស៊ុយអេឡា និងគុយវ៉ែត រីឯអេមីរ៉ាតអារ៉ាប់រួម បានក្លាយជាសមាជិកបន្ទាប់ពីបង្កើតអង្គការនេះបានរយៈពេល៧ឆ្នាំ ៕

និយាយមិនឈ្នះគេបែរជាចង់មកខ្ទប់មាត់គេលែងឲ្យនិយាយ! រដ្ឋមន្ត្រីក្រសួងការបរទេសថៃ បានចេញមកផ្ដល់បទសម្ភាសន៍ទាំងយប់ ដោយបង្ហាញការស្នើសុំលាយឡំនឹងការគំរា.មមកកាន់កម្ពុជា ឲ្យបញ្ឈប់ការធ្វើសេចក្ដីថ្លែងការណ៍វា.យប្រ.ហារថៃលើវេទិកាអន្តរជាតិតទៅទៀត ប្រសិនបើកម្ពុជានៅចង់បន្តទំនាក់ទំនងទៅមុខក្នុងបរិយាកាសល្អជាមួយថៃ។ តើថៃខ្លាចខូចទំនាក់ទំនងទ្វេភាគី ឬខ្លាចបាក់មុខលើឆាកអន្តរជាតិឲ្យប្រាកដ?

យោងតាមប្រព័ន្ធផ្សព្វផ្សាយក្នុងស្រុករបស់ថៃនៅយប់ថ្ងៃអង្គារ ទី២៨ ខែមេសា ឆ្នាំ២០២៦ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃ លោក Sihasak Phuangketkeow បានលើកឡើងថា ប្រទេសថៃនៅតែមានការព្រួយបារម្ភចំពោះសេចក្តីថ្លែងការណ៍របស់កម្ពុជានៅលើវេទិកាអន្តរជាតិ ដែលបានចោទប្រកាន់ថៃថាឈ្លានពានទឹកដីកម្ពុជា។

លោក Sihasak បានបន្តថា បទឈប់បា.ញ់រវាងកម្ពុជា-ថៃ បានចូលជាធរមានរួចហើយ ដូច្នេះ«សង្គ្រាមពាក្យសម្តី» តាមរយៈសេចក្ដីថ្លែងការណ៍ក៏គួរតែបញ្ឈប់ផងដែរ ជាពិសេសនៅលើវេទិការអន្តរជាតិតែម្តង ប្រសិនបើភាគីកម្ពុជានៅចង់បន្តទំនាក់ទំនងទៅមុខជាមួយនឹងថៃក្នុងការបង្កើតបរិយាកាសល្អជាមួយគ្នា។

និយាយដល់ការបង្កើតបរិយាកាសល្អដើម្បីពិភាក្សាគ្នា នៅពេលអ្នកកាសែតសួរនាំដល់រឿងកិច្ចប្រជុំ (JBC) ដែលថៃចេះតែពន្យាពេលម្ដងហើយម្ដងទៀតនោះ, លោក Sihasak បែរជាឆ្លើយតបថា «លោកមិនអាចទទួលយកបានឡើយ ដោយសារតែលោកបានបញ្ជាក់រួចមកហើយថា ប្រទេសថៃមិនទាន់ឆ្លងកាត់ដំណើរការផ្ទៃក្នុងរួចរាល់នៅឡើយទេ ដោយកន្លងមក ភាគីកម្ពុជាបានប្រកាសថ្ងៃប្រជុំ (JBC) ភ្លាមៗពេក ជាហេតុធ្វើឱ្យថៃ មិនបានត្រៀមខ្លួនទាន់ពេល និងមិនបានដឹងជាមុន»។

ផ្ទុយពីការអះអាងរបស់ថៃ រដ្ឋមន្រ្តីការបរទេសកម្ពុជា ឯកឧត្តម ប្រាក់ សុខុន បានបញ្ជាក់ពីជំហររបស់កម្ពុជាវិញថា៖ «កម្ពុជាចង់ឃើញការប្តេជ្ញាចិត្តពិតប្រាកដរបស់ថៃ តាមរយៈសកម្មភាពជាក់ស្តែង» ដែលក្នុងន័យនេះ ឯកឧត្តម បានសង្កត់ធ្ងន់លើការសម្រេចបាននូវសន្តិភាពយូរអង្វែងរវាងប្រទេសទាំងពីរ ដែលរួមចំណែកដល់សន្តិភាព ស្ថិរភាព និងសាមគ្គីភាពក្នុងអាស៊ាន ទាមទារឱ្យមានការប្តេជ្ញាចិត្តពិតប្រាកដ និងការគោរពពេញលេញចំពោះច្បាប់អន្តរជាតិ ធម្មនុញ្ញអាស៊ាន ក៏ដូចជាសន្ធិសញ្ញា និងកិច្ចព្រមព្រៀងដែលមានស្រាប់ទាំងអស់»។

គួរជម្រាបថា គិតមកទល់ពេលនេះ វាមានរយៈពេល៤ខែហើយ ក្រោយពេលកិច្ចប្រជុំ GBC ថ្ងៃទី២៧ ធ្នូ ប៉ុន្តែ សកម្មភាពការងាររបស់ JBC ត្រូវបានផ្អាកដោយភាគីថៃ និងទាមទារឲ្យកម្ពុជាពន្យាពេលជាច្រើនលើកច្រើនសារដោយអះអាងថា ខ្លួនជាប់រវល់បង្កើតរដ្ឋាភិបាលថ្មី និងមិនទាន់ត្រៀមខ្លួនរួចរាល់សម្រាប់កិច្ចប្រជុំ JBC ឡើយ។ ចំណុចទាំងនេះមានទម្ងន់សមល្មមក្នុងការឆ្លុះបញ្ចាំងឲ្យអន្តរជាតិឃើញហើយថា តើភាគីណាដែលចង់ដោះស្រាយបញ្ហា ឯភាគីណាព្យាយាមគេចវេសពីបញ្ហាឲ្យប្រាកដ៕

បន្ទាប់ពីដឹកនាំកងទ័ពបង្កសង្គ្រា.មឈ្លានពា.នកម្ពុជាជាបន្តបន្ទាប់កាលពីឆ្នាំ២០២៥ អតីតមេបញ្ជាការយោធភូមិភាគ២ លោក Boonsin Padklang នៅថ្ងៃទី២៨ ខែមេសា ឆ្នាំ២០២៦ ប្រកាសថា ខ្លួននឹងសាងផ្នួសរយៈពេល៣ខែ ដើម្បីឧទ្ទិសកុសលផលបុណ្យឱ្យកងទ័ព និងពលរដ្ឋថៃ ដែលបានបាត់បង់ជីវិ.តក្នុងសង្គ្រា.មកន្លងមក ។ ការពិត អតីតមេបញ្ជាការយោធភូមិភាគ២របស់ថៃរូបនេះ ចង់បួសដើម្បីជម្រះបាបកម្មជាប់ខ្លួនប៉ុណ្ណោះ បន្ទាប់ពីកសាងអំពើអាក្រ.ក់ច្រើនពេក ។

អតីតមេបញ្ជាការយោធភូមិភាគ២ លោក Boonsin ដែលល្បីល្បាញខាងបង្កសង្គ្រា.មឈានពានទឹកដីកម្ពុជា បានបញ្ជាក់ទៅកាន់ពលរដ្ឋថៃនៅថ្ងៃទី២៨ ខែមេសា ថា ខ្លួននឹងសាងផ្នួសរយៈពេល៣ខែ ដើម្បីឧទ្ទិសកុសលដល់កងទ័ព និងពលរដ្ឋថៃ ដែលស្លាប់ក្នុងសង្គ្រាមជាមួយកម្ពុជា ចំនួន២លើកកន្លងមក ។ ពិធីសាងផ្នួសនឹងរៀបចំឡើងយ៉ាងសាមញ្ញ ហើយបន្ទាប់ពីបួសរួច ខ្លួននឹងតាំងចិត្តប្រតិបត្តិធម៌ រៀនធម៌វិន័យ និងរស់នៅក្រោមឱវាទប្រៀនប្រដៅរបស់ព្រះពុទ្ធសាសនា ។

តាមការចុះផ្សាយរបស់សារព័ត៌មាននានានៅប្រទេសថៃ លោក Boonsin ដែលបច្ចុប្បន្ន ជាទីប្រឹក្សាអគ្គមេបញ្ជាការកងទ័ពជើងគោក និយាយថា ខ្លួនបានក្រាបបង្គំព្រះចៅអធិការវត្តមួយកន្លែងនៅខេត្តកាឡាក់ស៊ីន កាលពីថ្ងៃទី២៦ ខែមេសា កន្លងមក និងតាំងចិត្តសាងផ្នួសរយៈពេល៣ខែ ដើម្បីឧទ្ទិសកុសលដល់កងទ័ព និងពលរដ្ឋថៃ ដែលស្លាប់ក្នុងសង្គ្រាម ។

តើការសាងផ្នួសពិតជាអាចជួយលុបលាងអំពើបាបរបស់អតីតមេបញ្ជាការយោធភូមិភាគ២ថៃរូបនេះដែរឬទេ? បន្ទាប់ពីបុគ្គលនេះបានបង្កសង្គ្រាមជាមួយកម្ពុជា ហើយនៅសុខៗ ស្រាប់តែទៅបួសជម្រះអំពើបាប ។ វាគួរឱ្យអស់សំណើចណាស់ ដែលប្រទេសថៃមានបុគ្គលបែបនេះ ហើយត្រូវបានព្រះមហាក្សត្រលើកតម្កើងជាអង្គរក្សពិសេសចាំផ្តល់យោបល់ឱ្យព្រះអង្គពីការបញ្ជាកងទ័ព ។

គួរបញ្ជាក់ថា ក្រោយបញ្ចប់ភារកិច្ចជាមេបញ្ជាការយោធភូមិភាគ២ របស់ថៃ លោក Boonsin បានទទួលតួនាទីថ្មីមួយទៀតជាអង្គរក្សពិសេសរបស់ព្រះមហាក្សត្រថៃកាលពីខែកញ្ញា ឆ្នាំ២០២៥ ដែលមានតួនាទីណែនាំពីយុទ្ធសាស្ត្រការពារប្រទេស ផ្តល់នូវបទពិសោធន៍ពង្រឹងសន្តិសុខរបស់កងទ័ព និងផ្តល់យោបល់ទៅព្រះមហាក្សត្រថៃអំពីការចេញបទបញ្ជាកងទ័ព ប្រសិនបើមានការអញ្ជើញ ។

អតីតមេបញ្ជាការយោធភូមិភាគ២រូបនេះ ត្រូវបានចាត់ទុកគឺជាអ្នកនាំភ្លើងសង្គ្រាមចូលប្រទេសថៃ និងជាជនបង្កឱ្យមានការផ្ទុះអាវុធទ្រង់ទ្រាយធំរវាងកម្ពុជា-ថៃកន្លងមក ហើយជាជនមិនកោតខ្លាចច្បាប់អន្តរជាតិ ។ លើសពីនេះ ក៏ធ្លាប់ប្រឆាំងនឹងរដ្ឋាភិបាលថៃដែលបញ្ជាឱ្យឈប់បាញ់ក្នុងអំឡុងពេលធ្វើសង្គ្រាមកាលពីខែកក្កដា ឆ្នាំ២០២៥ ៕

ការិយាល័យកិច្ចការប្រឆាំងគ្រឿងញៀន និងអនុវត្តច្បាប់អន្តរជាតិរបស់ក្រសួងការបរទេសអាមេរិកកំពុងប្រកាសផ្តល់រង្វាន់រហូតដល់ ៤ លានដុល្លារ ចំពោះការផ្ដល់ព័ត៌មានដែលនាំទៅដល់ការចាប់ខ្លួនកំពូលឧក្រិដ្ឋជន Daren Li ពីបទសម្របសម្រួលការលាងលុយកខ្វក់សម្រាប់មជ្ឈមណ្ឌល Online Scams នានានៅទូទាំងតំបន់អាស៊ីអាគ្នេយ៍។

យោងតាមឯកសាររបស់ក្រសួងការបរទេសសហរដ្ឋអាមេរិក លោក Daren Li ដែលជាពលរដ្ឋនៃសាធារណរដ្ឋប្រជាមានិតចិន ត្រូវបានតុលាការសហរដ្ឋអាមេរិកចោ.ទប្រកាន់ និងកាត់ទោ.ស«កំបាំងមុខ»ឱ្យជាប់ពន្ធនាគារ ២០ ឆ្នាំ ពីបទលាងលុយកខ្វក់ចំនួន ៧៣លានដុល្លារដែលបានមកពីការបោកប្រាស់តាមប្រព័ន្ធគ្រីបតូ កាលពីខែកុម្ភៈ ឆ្នាំ២០២៦ ខណៈដែលបច្ចុប្បន្នជនល្មើសរូបនេះនៅតែកំពុងរត់គេចខ្លួន។

គួររម្លឹកថា កាលពីខែវិច្ឆិកា ឆ្នាំ ២០២៤ Daren Li ធ្លាប់បានបង្ហាញខ្លួននៅក្នុងតុលាការ ហើយបានយល់ព្រមសារភាពកំហុសជាផ្លូវកាអំពីការលាងលុយកខ្វក់, បើកគណនីធនាគារនៅសហរដ្ឋអាមេរិកក្នុងនាមក្រុមហ៊ុនសំបក, ការបញ្ចុះបញ្ចូលឱ្យជនរងគ្រោះវិនិយោគលើគេហទំព័រក្លែងក្លាយ និងចូលរួមបិទបាំងប្រភពដើមនៃលុយដែលបានមកពីបទល្មើសតាមរយៈការផ្ទេរប្រាក់អន្តរជាតិ។

ក្រោយការចូលខ្លួនមកសារភាពពីទោសកំហុសនេះ តុលាការសហព័ន្ធអាមេរិកបានចាត់វិធានការ ឃុំខ្លួនលោក Li នៅក្នុងផ្ទះបណ្ដោះអាសន្ន ដោយមានបំពាក់ខ្សែដៃត្រួតពិនិត្យអេឡិចត្រូនិច (Ankle Monitor) ដើម្បីតាមដានរាល់សកម្មភាព និងទីតាំងរបស់លោក ២៤ /២៤ ម៉ោង មុនការប្រកាសសាលក្រមជាស្ថាពរត្រូវបានធ្វើឡើង។ តែទោះជាយ៉ាងណា នៅខែធ្នូ ឆ្នាំ២០២៥ ខ្សែដៃត្រួតពិនិត្យអេឡិចត្រូនិច ត្រូវបានគេរកឃើញថាបានកាត់ផ្ដាច់ទៅហើយ ហើយបច្ចុប្បន្នលោកកំពុងត្រូវបានស្វែងរកខ្លួនជាសកល។

ដូច្នេះដើម្បីឆ្លើយតបនឹងការរត់គេចខ្លួនរបស់ រដ្ឋាភិបាលសហរដ្ឋអាមេរិកបានបង្កើនវិធានការយ៉ាងខ្លាំងក្លាបំផុត រួមមានទាំងការដាក់ចេញនូវប្រាក់រង្វាន់ចំនួន ៤ លានដុល្លា សម្រាប់ព័ត៌មានដែលឈានដល់ការចាប់ខ្លួនឧក្រិដ្ឋជនកំពូលរូបនេះ ដែលត្រូវបានអនុវត្តតាមរយៈកម្មវិធីផ្តល់រង្វាន់ប្រឆាំងនឹងបទឧក្រិដ្ឋឆ្លងដែនដែលមានអង្គការចាត់តាំង (TOCRP) របស់ក្រសួងការបរទេសសហរដ្ឋអាមេរិក។

ដោយឡែកចំពោះទីតាំងសង្ស័យ ទីភ្នាក់ងារសម្ងាត់សហរដ្ឋអាមេរិក (U.S. Secret Service) និងក្រសួងការបរទេសអាមេរិកជឿថា Daren Li អាចនឹងកំពុងលាក់ខ្លួននៅក្នុងភូមិសាស្រ្តមួយចំនួននៅក្នុងប្រទេសចិន កម្ពុជា ឬឌូប៉ៃ នៅអារ៉ាប់រួម តំបន់អាស៊ីអាគ្នេយ៍ផ្សេងទៀត៖ជាកន្លែងដែលគេធ្លាប់មានសកម្មភាពអាជីវកម្ម និងអចលនទ្រព្យជាច្រើនដែលមិនទាន់ត្រូវបានបង្កក និងអាចកំពុងប្រើប្រាស់ឈ្មោះក្លែងក្លាយដូចជា “Devon”, “KG”, “RF” ឬ “KGPERFECT” ដើម្បីបិទបាំងអត្តសញ្ញាណពិតប្រាកដនៅទីនោះ៕

មិនដឹងថាញាតិញោមនៅស្រុកនោះប្រគេន ឬទៅទិញដោយខ្លួនឯងនោះទេ! ក្រោយវិលត្រឡប់ពីប្រទេសថៃមកដល់ទឹកដីស្រីលង្កា ព្រះសង្ឃចំនួន ២២ អង្គត្រូវបានអាជ្ញាធរស្ទាក់ចាប់នៅព្រលានយន្តហោះភ្លាមៗ បន្ទាប់ពីមន្ត្រីសន្តិសុខអាកាសយានដ្ឋានបានឆែកឆេ និងរកឃើញកញ្ឆាទម្ងន់ ១១០ គីឡូក្រាម (២៤២ ផោន) ដែលលាក់ទុកនៅក្នុងវ៉ាលីរបស់ពួកគេ។

យោងតាមការចុះផ្សាយរបស់សារព័ត៌មាន BBC ព្រះសង្ឃដែលរងការឃាត់ខ្លួនទាំងនោះ ភាគច្រើនជាសង្ឃក្មេងៗដែលនិស្សិត និងទើបតែត្រឡប់មកពីដំណើរកម្សាន្តនៅប្រទេសថៃ ក្រោមការឧបត្ថម្ភសព្វគ្រប់បែបយ៉ាងពីសប្បុរសជនអាថ៌កំបាំងម្នាក់។ តាមរយៈការស៊ើបអង្កេតយ៉ាងយកចិត្តទុកដាក់ ប៉ូលីសបានឈានទៅដល់ការចាប់ព្រះកាយព្រះសង្ឃអង្គទី ២៣ ដែលជាអ្នករៀបចំគម្រោង ដោយរូបអង្គបានបញ្ឆោតព្រះសង្ឃដទៃថា កញ្ចប់ទាំងនោះគឺជា «អំណោយ» សម្រាប់ផ្ញើទៅស្រុកវិញ។

មន្ត្រីគយស្រីលង្កាបាននិយាយថា នៅក្នុងវ៉ាលីរបស់ព្រះសង្ឃគ្រប់អង្គត្រូវបានគេរកឃើញជាមួយនឹងថ្នាំញៀ.នប្រភេទ Kush ប្រហែល ៥ គីឡូក្រាម ដែលលាក់ទុកក្នុង “ថតសម្ងាត់” នៅក្នុងវ៉ាលីរបស់ពួកគេ នៅពេលដែលពួកគេមកដល់រដ្ឋធានីកូឡុំបូ កាលពីថ្ងៃសៅរ៍សប្ដាហ៍មុន។ ក្រៅពីរកឃើញនូវគ្រឿងញៀ.នទាំងនេះ សមត្ថកិច្ចក៏បានរកឃើញភស្តុតាងបន្ថែមក្នុងទូរស័ព្ទដៃ ដែលបង្ហាញពីសកម្មភាពព្រះសង្ឃទាំងនោះស្លៀកពាក់ជាគ្រហស្ថ និងដើរកម្សាន្តយ៉ាងសប្បាយរីករាយក្នុងអំឡុងពេលស្នាក់នៅប្រទេសថៃផងដែរ។

គួរជម្រាបថា សារធាតុញៀ.នប្រភេទ «Kush» ត្រូវបានគេចាត់ទុកជា កញ្ឆាមួយប្រភេទដែលមានផ្ទុកកម្រិតជាតិញៀ.នដ៏មានឥទ្ធិពល ហើយការរឹបអូសនេះត្រូវបានចាត់ទុកថាជាការស្ទាក់ចាប់គ្រឿងញៀនដ៏ធំបំផុតមិនធ្លាប់មាន នៅឯព្រលានយន្តហោះអន្តរជាតិរបស់ប្រទេសក្នុងតំបន់អាស៊ីខាងត្បូងមួយនេះ។

បច្ចុប្បន្នអាជ្ញាធរស្រីលង្កាកំពុងបើកការស៊ើបអង្កេត ដើម្បីកំណត់ថាតើជនសង្ស័យបានចូលរួមក្នុងអំពើជួញដូរដោយចេតនា ឬត្រូវបានគេប្រើប្រាស់ដោយបណ្តាញរត់ពន្ធធំជាអ្នករៀបចំ។ អ្នកស៊ើបអង្កេតក៏ត្រូវបានគេរំពឹងថានឹងពិនិត្យមើលពីរបៀបដែលគ្រឿងញៀនត្រូវបានវេចខ្ចប់ ដឹកជញ្ជូន និងអនុញ្ញាតឱ្យធ្វើដំណើរ។

ទោះជាយ៉ាងណា មន្ត្រីស្រីលង្កាមិនទាន់បានចេញផ្សាយព័ត៌មានលម្អិតពេញលេញអំពីការចោទប្រកាន់ ឬនីតិវិធីតុលាការនៅឡើយទេ ប៉ុន្តែករណីនេះត្រូវបានបណ្ដាញសារព័ត៌មានអន្តរជាតិធំៗយកទៅចុះផ្សាយយ៉ាងព្រោងព្រាតបាត់ហើយ និងមានសំណួរជាច្រើនចោ.ទសួរថា តើចំនួនគ្រឿងញៀ.នដ៏ច្រើនសន្ធឹកសន្ធាប់បែបនេះមានប្រភពចេញមកពីណា? តើប្រទេសថៃនឹងធ្វើការឆ្លើយតបចំពោះបញ្ហានេះយ៉ាងដូចម្ដេច?