ស្របពេលស្ថានការណ៍សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល កាន់តែតានតឹងខ្លាំងឡើង និងអូសបន្លាយពេលជាច្រើនថ្ងៃ មេដឹកនាំអាមេរិកប្រកាសយ៉ាងម៉ឺងម៉ាត់កាលពីថ្ងៃទី៦ ខែមីនា ឆ្នាំ២០២៦ ថា គ្មានការចរចា គ្មានកិច្ចព្រមព្រៀងអ្វីទាំងអស់ ប្រសិនបើអ៊ីរ៉ង់មិនព្រមចុះចាញ់ ។ មតិនានាយល់ថា វាមិនអាចទៅរួចឡើយដែលឱ្យអ៊ីរ៉ង់ព្រមធ្វើតាមមេដឹកនាំអាមេរិក ពីព្រោះចំនួនមនុស្សស្លា.ប់ដោយសារសង្គ្រា.មបានកើនឡើងរហូតដល់ជាង១,៣០០នាក់ និងប៉ះពាល់សេដ្ឋកិច្ចពិភពលោកយ៉ាងធ្ងន់ធ្ងរ ។

ប្រធានាធិបតីអាមេរិក លោក Donald Trump កាលពីថ្ងៃទី៦ ខែមីនា បានជំរុញឱ្យអ៊ីរ៉ង់ត្រូវតែយល់ព្រមចុះចាញ់សង្គ្រាមដោយឥតលក្ខខណ្ឌអ្វីទាំងអស់ ដែលការកំណត់នេះត្រូវបានចាត់ទុកជាការដាក់សម្ពាធលើអ៊ីរ៉ង់យ៉ាងខ្លាំង បន្ទាប់ពីអាមេរិក និងអ៊ីស្រាអែលរួមដៃគ្នាបើកការវាយប្រហារអ៊ីរ៉ង់កាលពីចុងខែកុម្ភៈកន្លងមក ដែលធ្វើឱ្យអ៊ីរ៉ង់សងសឹកវិញ និងបដិសេធការចរចាបញ្ចប់សង្គ្រាមនាពេលឆាប់ៗ ។

លោកប្រធានាធិបតី Trump បានបង្ហោះសារក្នុងបណ្តាញសង្គមឱ្យអ៊ីរ៉ង់យល់ព្រមចុះចាញ់នេះ គឺមិនប៉ុន្មានម៉ោងបន្ទាប់ពីប្រធានាធិបតីអ៊ីរ៉ង់ លោក Masoud Pezeshkian ប្រកាសថា មានប្រទេសខ្លះព្យាយាមសម្របសម្រួលបញ្ចប់សង្គ្រាម ដែលអ៊ីរ៉ង់ចាត់ទុកជាការប្រឹងប្រែងការទូត ។

លោកបញ្ជាក់ថា ៖ «នឹងគ្មានកិច្ចព្រមព្រៀងអ្វីជាមួយអ៊ីរ៉ង់ឡើយ លើកលែងតែពួកគេយល់ព្រមចុះចាញ់ដោយគ្មានលក្ខខណ្ឌ ។ បើអ៊ីរ៉ង់ព្រមចុះចាញ់ និងជ្រើសរើសមេដឹកនាំថ្មីដែលអាមេរិកទទួលស្គាល់ យើងជាមួយសម្ព័ន្ធមិត្តផ្សេងៗនឹងជួយប្រទេសអ៊ីរ៉ង់ឱ្យចៀសផុតពីការបំផ្លិចបំផ្លាញ ព្រមទាំងស្តារសេដ្ឋកិច្ចអ៊ីរ៉ង់ឱ្យរីកចម្រើនជាងមុន» ។

ប៉ុន្តែមតិនានាមើលឃើញថា វាមិនអាចទៅរួចឡើយ ពីព្រោះជម្លោះនៅមជ្ឈិមបូព៌ាបានធ្វើឱ្យប៉ះពាល់ដល់តម្លៃប្រេងឥន្ធនៈនៅទូទាំងពិភពលោក ថែមទាំងរង្គោះរង្គើដល់ទីផ្សារហិរញ្ញវត្ថុ និងទីផ្សារភាគហ៊ុនលើពិភពលោកធ្លាក់ចុះភ្លាមៗ ។

កាលពីថ្ងៃទី៥ ខែមីនា លោកប្រធានាធិបតី Trump បានផ្តល់សម្ភាសន៍តាមទូរស័ព្ទជាមួយសារព័ត៌មាន Reuters ថា លោកទាមទារឱ្យអាមេរិកមានសិទ្ធិជ្រើសរើសមេដឹកនាំកំពូលអ៊ីរ៉ង់ថ្មីដើម្បីជំនួសតំណែងលោក Ayatollah Ali Khamenei ដែលបាត់បង់ជីវិតកាលពីថ្ងៃទី២៨ ខែកុម្ភៈ អាមេរិកត្រូវតែចូលរួមជ្រើសរើសមេដឹកនាំថ្មីរបស់អ៊ីរ៉ង់ ។

ចំណែកប្រធានាធិបតីអ៊ីរ៉ង់ លោក Masoud Pezeshkian បានបង្ហោះសារក្នុងបណ្តាញសង្គម X ថា មានប្រទេសខ្លះព្យាយាមជួយសម្របសម្រួលបញ្ចប់សង្គ្រាម ប៉ុន្តែពុំបញ្ជាក់ឈ្មោះប្រទេស ឬរៀបរាប់ព័ត៌មានលម្អិត ។ លោកថា យើងចង់បានសន្តិសុខយូរអង្វែងក្នុងតំបន់ ប៉ុន្តែមិនស្ទាក់ស្ទើរក្នុងការការពារកិត្តិយស និងអំណាចប្រទេសយើង ។ បច្ចុប្បន្ន លោកបម្រើការងារក្នុងគណៈកម្មការបណ្តោះអាសន្ន និងបំពេញតួនាទីដឹកនាំប្រទេសជំនួសលោក Ali Khamenei ។

គួរបញ្ជាក់ថា រដ្ឋាភិបាលអាមេរិកត្រៀមពិភាក្សាជាមួយមន្ត្រីក្រសួងការពារជាតិអំពីការពន្លឿនផលិតអាវុធ ដោយសារប្រតិបត្តិការកងទ័ពជាច្រើនថ្ងៃមកនេះធ្វើឱ្យបរិមាណអាវុធនៅក្នុងឃ្លាំងរបស់អាមេរិកថយចុះ ៕

ស្របពេលស្ថានការណ៍ជម្លោះនៅតំបន់មជ្ឈិមបូព៌ាតានតឹងខ្លាំង លោក Vladimir Putin ប្រធានាធិបតីរុស្ស៊ី ក៏បានទូរស័ព្ទទៅកាន់ប្រធានាធិបតីអ៊ីរ៉ង់កាលពីថ្ងៃទី៦ ខែមីនា ឆ្នាំ២០២៦ ដោយអំពាវនាវឱ្យបញ្ចប់សង្គ្រា.មត្រឹមនេះ និងឱ្យគ្រប់ភាគីជម្លោះងាកមកចរចាគ្នា ។ ទន្ទឹមនឹងការអំពាវនាវនេះ ក៏មានសេចក្តីរាយការណ៍ថា រុស្ស៊ីកំពុងតែផ្តល់ទិន្នន័យសម្ងាត់ទៅឱ្យអ៊ីរ៉ង់អំពីទីតាំងឈរជើងរបស់កងទ័ពជើងគោក កងទ័ពជើងទឹក និងយន្តហោះចម្បាំងរបស់អាមេរិក ដើម្បីឱ្យអ៊ីរ៉ង់វាយប្រ.ហារចំៗគោលដៅ ។

លោក Putin បានទូរស័ព្ទទៅប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃទី៦ ខែមីនា ដើម្បីបង្ហាញការសោកស្តាយចំពោះការបាត់បង់ជីវិតរបស់មេដឹកនាំកំពូលអ៊ីរ៉ង់ លោក Ayatollah Ali Khamenei និងពលរដ្ឋអ៊ីរ៉ង់ជាច្រើននាក់ដោយសារការវាយប្រ.ហារពីសំណាក់អាមេរិក និងអ៊ីស្រាអែល ដោយប្រធានាធិបតីរុស្ស៊ីអំពាវនាវឱ្យឈប់ប្រើប្រាស់កម្លាំងកងទ័ព និងងាកមកចរចាគ្នា ។ នេះបើតាមការលើកឡើងរបស់វិមានប្រធានាធិបតីរុស្ស៊ី ។

ពេលជជែកគ្នា លោក Putin បានបង្ហាញការសោកស្តាយចំពោះការបាត់បង់ជីវិតរបស់មេដឹកនាំកំពូលអ៊ីរ៉ង់ លោក Ali Khamenei រួមទាំងសមាជិកក្រុមគ្រួសារមេដឹកនាំ, មន្ត្រីសំខាន់ៗក្នុងជួរកងទ័ព, អ្នកនយោបាយ និងពលរដ្ឋអ៊ីរ៉ង់ជាច្រើននាក់ ដោយសារការវាយប្រហារពីសំណាក់អាមេរិក និងអ៊ីស្រាអែល ។ មេដឹកនាំរុស្ស៊ីបានបង្ហាញពីគោលជំហររបស់ខ្លួនដោយអំពាវនាវឱ្យបញ្ចប់សង្គ្រាមត្រឹមនេះ និងមិនគួរធ្វើប្រតិបត្តិកងទ័ពដើម្បីដោះស្រាយបញ្ហាពាក់ព័ន្ធនឹងអ៊ីរ៉ង់ ឬស្ថានការណ៍នៅមជ្ឈិមបូព៌ាទេ ហើយលោកក៏អំពាវនាវឱ្យគ្រប់ភាគីជម្លោះងាកមកចរចានាពេលឆាប់ៗ ។

ចំណែកប្រធានាធិបតីអ៊ីរ៉ង់ លោក Pezeshkian បានអរគុណរុស្ស៊ីដែលបង្ហាញគោលជំហរគាំទ្រពលរដ្ឋអ៊ីរ៉ង់ក្នុងការការពារអធិបតេយ្យ និងឯករាជ្យប្រទេសអ៊ីរ៉ង់ ព្រមទាំងរៀបរាប់ពីស្ថានការណ៍សង្គ្រាមនៅពេលចុងក្រោយទៅកាន់លោក Putin ។ ភាគីទាំងពីរឯកភាពរក្សាទំនាក់ទំនង និងសម្របសម្រួលតាមរយៈបណ្តាញទំនាក់ទំនងផ្សេងៗ ស្របពេលភាពតានតឹងកំពុងតែកើនឡើងនៅតំបន់មជ្ឈិមបូព៌ា ។

គួរបញ្ជាក់ថា នេះជាការទូរស័ព្ទលើកដំបូងទៅកាន់អ៊ីរ៉ង់របស់មេដឹកនាំរុស្ស៊ី បើគិតតាំងពីកើតសង្គ្រាមនៅអ៊ីរ៉ង់កាលពីថ្ងៃទី២៨ ខែកុម្ភៈ កន្លងមក ។ ការបង្ហាញគោលជំហររបស់រុស្ស៊ី ស្របពេលមានសេចក្តីរាយការណ៍ថា រុស្ស៊ីកំពុងតែផ្តល់ទិន្នន័យសម្ងាត់ទៅឱ្យអ៊ីរ៉ង់ អំពីទីតាំងឈរជើងរបស់កងទ័ពជើងគោក កងទ័ពជើងទឹក និងយន្តហោះចម្បាំងរបស់អាមេរិក ហើយទិន្នន័យសម្ងាត់ភាគច្រើនដែលរុស្ស៊ីផ្តល់ឱ្យអ៊ីរ៉ង់ គឺរូបភាពពីផ្កាយរណប ដើម្បីឱ្យអ៊ីរ៉ង់វាយប្រហារចំគោលដៅកងទ័ពអាមេរិកនៅមជ្ឈិមបូព៌ា ។

តាមការចុះផ្សាយរបស់សារព័ត៌មានអាមេរិក Washington Post កាលពីថ្ងៃទី៦ ខែមីនា រុស្ស៊ីបានផ្តល់ទិន្នន័យសម្ងាត់ទៅឱ្យអ៊ីរ៉ង់អំពីទីតាំងឈរជើងកងទ័ព និងសព្វាវុធផ្សេងៗរបស់អាមេរិកនៅមជ្ឈិមបូព៌ា ដើម្បីឱ្យអ៊ីរ៉ង់វាយប្រហារចំៗគោលដៅ ប៉ុន្តែអ៊ីរ៉ង់ពិបាកស្វែងរកទីតាំងកងទ័ពអាមេរិក ព្រោះតែអាមេរិក និងអ៊ីស្រាអែលបានបើកការវាយប្រហារទីកន្លែងសំខាន់ៗនៅទីក្រុងតេហេរ៉ង់ ៕

តម្លៃប្រេងឥន្ធនៈនៅលើពិភពលោក រួមទាំងតំបន់អាស៊ីអាគ្នេយ៍ នឹងហក់ឡើងខ្ពស់ដោយសារអ៊ីរ៉ង់ប្រកាសបិទច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់ ។ ប្រទេសនានាក្នុងតំបន់អាស៊ីអាគ្នេយ៍កំពុងតែព្រួយបារម្ភពីការខ្វះខាតប្រេងប្រើប្រាស់ រួមទាំងហ្វីលីពីនផងដែរបានកំណត់វិធានការភ្លាមៗដើម្បីប្រើប្រាស់ប្រេងដោយសន្សំសំចៃ ស្របពេលស្ថានការណ៍នៅតំបន់មជ្ឈិមបូព៌ាកំពុងតែតានតឹងខ្លាំង ។

មេដឹកនាំហ្វីលីពីនបានកែសម្រួលពេលវេលាធ្វើការរបស់មន្ត្រីរាជការនៅទូទាំងប្រទេស ដោយកំណត់ឱ្យធ្វើការត្រឹមតែ៤ថ្ងៃប៉ុណ្ណោះក្នុង១សប្តាហ៍ ព្រមទាំងកំណត់វិធានការផ្សេងៗដើម្បីសន្សំសំចៃការប្រើប្រាស់ថាមពល និងកាត់បន្ថយសកម្មភាពទាំងឡាយណាដែលមិនចាំបាច់ បន្ទាប់ពីអ៊ីរ៉ង់ប្រកាសបិទច្រកសមុទ្រ Hormuz ដើម្បីសងសឹកនឹងការវាយប្រហារពីអាមេរិក និងអ៊ីស្រាអែល ដែលការបិទច្រកជំរុញឱ្យតម្លៃប្រេងលើពិភពលោកហក់ឡើងខ្ពស់ និងប៉ះពាល់សេដ្ឋកិច្ចប្រទេសនានា ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី៧ ខែមីនា ឆ្នាំ២០២៦ ។

ប្រធានាធិបតីហ្វីលីពីន លោក Ferdinand Marcos Jr. បានប្រកាសពីការកាត់បន្ថយពេលវេលាធ្វើការរបស់មន្ត្រីរាជការនៅទូទាំងប្រទេស គឺធ្វើការត្រឹមតែ៤ថ្ងៃក្នុង១សប្តាហ៍ អនុវត្តចាប់ពីថ្ងៃទី៩ ខែមីនា តទៅ ដើម្បីកាត់បន្ថយផលប៉ះពាល់សេដ្ឋកិច្ចដោយសារសង្គ្រាមនៅមជ្ឈិមបូព៌ាកំពុងឡើងកំដៅខ្លាំង ដោយសារអាមេរិករួមដៃគ្នាជាមួយអ៊ីស្រាអែលវាយប្រហារអ៊ីរ៉ង់កាលពីថ្ងៃទី២៨ ខែកុម្ភៈ ។

លោក Marcos និយាយថា ការបិទច្រកសមុទ្រ Hormuz បានប៉ះពាល់ដោយផ្ទាល់ដល់តម្លៃថាមពលនៅប្រទេសហ្វីលីពីន ហើយនៅសប្តាហ៍ទី២ ខែមីនា តម្លៃប្រេងនឹងហក់ឡើងខ្លាំងបន្ថែមទៀត ។ ក្រៅពីកាត់បន្ថយពេលវេលាធ្វើការរបស់មន្ត្រីរាជការ លោកក៏បញ្ជាឱ្យស្ថាប័នរដ្ឋទាំងអស់កាត់បន្ថយការប្រើប្រាស់អគ្គិសនីចាប់ពី១០% ទៅ២០% និងលុបចោលសកម្មភាពមិនចាំបាច់ ថែមទាំងកំណត់ឱ្យរៀបចំកិច្ចប្រជុំផ្សេងៗតាមអនឡាញ ។

ក្រៅពីនេះ លោកគ្រោងស្នើទៅកាន់សភាឱ្យកាត់បន្ថយពន្ធប្រេង ប្រសិនបើតម្លៃប្រេងឆៅលើពិភពលោកកើនឡើងលើស៨០ដុល្លារក្នុងបារ៉ែល ព្រមទាំងត្រៀមស្វែងរកថវិកាសម្រាប់ឧបត្ថម្ភធុនប្រេង និងផ្តល់ទៅឱ្យអ្នករងផលប៉ះពាល់ធ្ងន់ធ្ងរបំផុត ។

គួរបញ្ជាក់ថា ប្រទេសហ្វីលីពីនពឹងផ្អែកខ្លាំងលើការនាំចូលប្រេងឆៅពីមជ្ឈិមបូព៌ា ហើយហ្វីលីពីនក៏មានរោងចក្រថាមពលជាច្រើនដែលប្រើប្រាស់ប្រេងឥន្ធនៈហ្វូស៊ីល ។ សង្គ្រាមបានគំរាមកំហែងសុវត្ថិភាព និងប៉ះពាល់ដល់ការងាររបស់ពលករហ្វីលីពីនជាង២លាននាក់ ដែលកំពុងធ្វើការនៅតំបន់មជ្ឈិមបូព៌ាផងដែរ ៕

មានទៅមានមក! ប្រធានាធិបតីអ៊ុយក្រែន លោក Volodymyr Zelensky បានបង្ហើបថា សហរដ្ឋអាមេរិកបានទាក់ទងមកសុំជំនួយពីអ៊ុយក្រែនក្នុងការទប់ទល់នឹងបច្ចេកវិទ្យាយន្តហោះគ្មានមនុស្សបើករបស់អ៊ីរ៉ង់ ចំពេលមានជម្លោះរវាងលោកខាងលិចនឹងអ៊ីរ៉ង់នៅមជ្ឈិមបូព៌ាកើនឡើងកាន់តែខ្លាំង។ នេះបើយោងតាមរបាយការណ៍ដកស្រង់របស់ BBC នៅថ្ងៃសុក្រ ទី៦ មីនា។

តាមសម្ដីរបស់ប្រធានាធិបតីអ៊ុយក្រែន សហរដ្ឋអាមេរិកបានស្នើសុំជំនួយពីអ៊ុយក្រែនក្នុងការការពារសម្ព័ន្ធមិត្តឈូងសមុទ្រប្រឆាំងនឹងការវាយប្រហារដោយយន្តហោះគ្មានមនុស្សបើករបស់អ៊ីរ៉ង់។ ក្នុងនោះលោក Zelensky បាននិយាយថា ការពឹងពាក់នេះកើតឡើង ដោយសារអ៊ុយក្រែនមានបទពិសោធន៍ច្បាស់លាស់ក្នុងការដោះស្រាយជាមួយយន្តហោះគ្មានមនុស្សបើកដែលផលិតដោយប្រទេសអ៊ីរ៉ង់ និងត្រូវបានរុស្ស៊ីយកមកប្រើប្រាស់ក្នុងអំឡុងពេលធ្វើសង្គ្រាមជាមួយខ្លួន។

យោងតាមលោក Zelenskyy កងកម្លាំងអ៊ុយក្រែនបានចំណាយពេលជាច្រើនឆ្នាំក្នុងការអភិវឌ្ឍយុទ្ធសាស្ត្រ និងប្រព័ន្ធការពារជាតិ ដើម្បីសិក្សា និងរកវិធានការបាញ់ទម្លាក់យន្តហោះគ្មានមនុស្សបើករបស់អ៊ីរ៉ង់ ជាពិសេសម៉ូដែលយន្តហោះគ្មានមនុស្សបើក Shahed ដែលត្រូវបានប្រើប្រាស់យ៉ាងទូលំទូលាយនៅលើសមរភូមិ។ ដោយសារតែបទពិសោធន៍នេះ ទើបសហរដ្ឋអាមេរិកចាប់អារម្មណ៍ក្នុងការរៀនសូត្រពីយុទ្ធសាស្ត្ររបស់អ៊ុយក្រែន ដើម្បីការពារកងកម្លាំង និងសម្ព័ន្ធមិត្តរបស់ខ្លួនឱ្យកាន់តែប្រសើរឡើង។

គួរជម្រាបថា អ៊ីរ៉ង់មានភាពលេចធ្លោខ្លាំងចំពោះការផលិតយន្តហោះគ្មានមនុស្សបើកសម្រាប់ប្រយុទ្ធដែលមានតម្លៃថោក ប៉ុន្តែមានសមត្ថភាពបង្កការខូចខាតយ៉ាងធ្ងន់ធ្ងរ ដែលធ្វើឱ្យពួកវាក្លាយជាឧបករណ៍ដ៏មានប្រសិទ្ធភាពប្រឆាំងនឹងប្រព័ន្ធការពារដែនអាកាសដែលមានតម្លៃថ្លៃៗរបស់ប្រទេសធំៗជាច្រើន។

ទាក់ទងនឹងការស្នើសុំជំនួយពីសម្ព័ន្ធមិត្តអាមេរិក លោក Zelenskyy បាននិយាយថា អ៊ុយក្រែនរីករាយនឹងចែករំលែកចំណេះដឹង និងបទពិសោធន៍បច្ចេកទេសរបស់ខ្លួនជាមួយដៃគូជានិច្ច។ តាមរយៈការប្រកាសនេះដែរ អ្នកវិភាគបាននិយាយថា កិច្ចសហប្រតិបត្តិការបែបនេះអាចជួយសហរដ្ឋអាមេរិក និងសម្ព័ន្ធមិត្តរបស់ពួកគេក្នុងការពង្រឹងការការពារប្រឆាំងនឹងការវាយប្រហារដោយយន្តហោះគ្មានមនុស្សបើក ខណៈដែលភាពតានតឹងនៅតែបន្តកើនឡើងនៅមជ្ឈិមបូព៌ា៕

ប្រព័ន្ធផ្សព្វផ្សាយអាមេរិកបានវិភាគពីសង្គ្រា.មនៅតំបន់មជ្ឈិមបូព៌ា តើមានមូលហេតុអ្វីខ្លះនៅពីក្រោយខ្នង ទើបចិនដែលជាសម្ព័ន្ធមិត្តដ៏ជិតស្និទ្ធរបស់អ៊ីរ៉ង់ ហើយប្រទេសទាំងពីរថែមទាំងមានទំនាក់ទំនងជាយុទ្ធសាស្ត្រជាមួយគ្នាយូរអង្វែង បែរជាចិនមិនបញ្ជូនកងទ័ពទៅជួយអ៊ីរ៉ង់ធ្វើសង្គ្រា.មជាមួយអាមេរិក និងអ៊ីស្រាអែល ដោយគ្រាន់តែអំពាវនាវឱ្យភាគីជម្លោះទាំងអស់បញ្ចប់សង្គ្រា.ម និងងាកមកចរចា ។

សារព័ត៌មានដ៏ល្បីរបស់អាមេរិក Forbes បានផ្សព្វផ្សាយបទវិភាគដោយចោទសួរពីគោលជំហររបស់រដ្ឋាភិបាលទីក្រុងប៉េកាំង ជាពិសេស បន្ទាប់ពីអ៊ីរ៉ង់ប្រកាសបិទច្រកសមុទ្រ Hormuz គឺជាទីតាំងយុទ្ធសាស្ត្រសម្រាប់ថាមពលលើពិភពលោក ។ ការបិទច្រកសមុទ្រនេះកាន់តែធ្វើឱ្យស្ថានការណ៍នៅឧបទ្វីបអារ៉ាប់តានតឹងខ្លាំងឡើង និងជំរុញឱ្យតម្លៃប្រេងឥន្ធនៈលើពិភពលោកប្រែប្រួលភ្លាមៗ ពីព្រោះជាច្រកឆ្លងកាត់ដ៏សំខាន់សម្រាប់ការដឹកជញ្ជូនប្រេងអន្តរជាតិ ។

ការបិទច្រកសមុទ្រ Hormuz មិនមែនប៉ះពាល់ត្រឹមតែដល់តម្លៃប្រេងឥន្ធនៈ និងថាមពលប៉ុណ្ណោះទេ ប៉ុន្តែក៏ប៉ះពាល់ចិនដោយផ្ទាល់ផងដែរ ដោយសារចិនត្រូវពឹងផ្អែកលើប្រេងឥន្ធនៈដែលដឹកជញ្ជូនតាមច្រកនេះ ប្រមាណ៣៧% ។ ប្រទេសនានាមើលឃើញថា ចិនគួរតែបង្ហាញប្រតិកម្មខ្លាំងជាងនេះ ជាជាងគ្រាន់តែបង្ហាញការព្រួយបារម្ភសង្គ្រាមនៅមជ្ឈិមបូព៌ា និងអំពាវនាវឱ្យដោះស្រាយបញ្ហាតាមការទូត គឺចិនមិនលូកដៃក្នុងសង្គ្រាមដោយសារការពារផលប្រយោជន៍សេដ្ឋកិច្ចរបស់ខ្លួន ក៏ដូចជារក្សាសម្ព័ន្ធភាពជាមួយអ៊ីរ៉ង់ ។

បើទោះជាចិនបានធ្វើកិច្ចព្រមព្រៀងជាយុទ្ធសាស្ត្រជាមួយអ៊ីរ៉ង់រយៈពេលវែងក៏ដោយ ប៉ុន្តែគោលជំហររបស់ចិនគ្រាន់តែអំពាវនាវឱ្យគ្រប់ភាគីជម្លោះបញ្ចប់សង្គ្រាម និងជំរុញឱ្យការចរចា ហើយចិនថែមទាំងបញ្ជាក់ថា នឹងគាំទ្រស្ថិរភាពក្នុងតំបន់ ។ ការអំពាវនាវរបស់ចិនត្រូវបានចាត់ទុកថា គឺជាគោលជំហរដ៏ប្រុងប្រយ័ត្នបំផុត ។

គោលជំហររបស់ចិនក៏ឆ្លុះបញ្ចាំងពីទំនាក់ទំនងដ៏ស្មុគស្មាញជាមួយរដ្ឋាភិបាលអាមេរិក និងអ៊ីរ៉ង់ផងដែរ ដោយអ្នកវិភាគយល់ថា ចិនផ្តល់អាទិភាពលើការចៀសវាងហានិភ័យជាជាងការប្រឈមមុខគ្នា ។ ចិនមិនបានសន្យាបញ្ជូនកងទ័ពមកជួយការពារអ៊ីរ៉ង់ទេ បើទោះជាចិនទទួលបានផលប្រយោជន៍ថាមពលក៏ដោយ ។

សេចក្តីថ្លែងការណ៍របស់រដ្ឋមន្ត្រីក្រសួងការបរទេសចិន លោក Wang Yi ត្រូវបានចាត់ទុកជាការលើកឡើងបែបការទូតច្រើនជាងការបញ្ជូនកងទ័ពមកចូលរួមសង្គ្រាម ពីព្រោះចិនគ្មានគោលជំហរលូកដៃក្នុងជម្លោះដែលកំពុងតែឡើងកំដៅទេ ។

សារព័ត៌មាន Forbes កត់សម្គាល់ទៀតថា ភាពស្ទាក់ស្ទើររបស់ចិនអាចឆ្លុះបញ្ចាំងពីសមត្ថភាពកងទ័ពចិនមានកំណត់ ហើយប្រព័ន្ធការពារដែនអាកាសដែលអ៊ីរ៉ង់កំពុងតែប្រើប្រាស់បំពាក់ដោយបច្ចេកវិទ្យាចិន ហើយត្រូវបានបំផ្លាញតាំងពីអាមេរិក និងអ៊ីស្រាអែលវាយប្រហារអ៊ីរ៉ង់ថ្ងៃដំបូងម៉្លេះ ។

ជាងនេះទៅទៀត ប្រព័ន្ធការពារដែនអាកាសដែលចិនប្រគល់ឱ្យអ៊ីរ៉ង់ មិនមែនជាប្រព័ន្ធទំនើបបំផុត ទើបអ៊ីរ៉ង់មិនអាចទប់ទល់នឹងអាវុធរបស់អាមេរិក និងអ៊ីស្រាអែល ដែលមានបច្ចេកវិទ្យាទំនើបជាង ។ ស្ថានការណ៍នេះធ្វើឱ្យមានការចោទសួរពីគុណភាពសម្ភារៈកងទ័ពចិន និងភាពល្បីល្បាញរបស់អាវុធចិននៅលើពិភពលោក ។

ចុងក្រោយ ការវិភាគបានសន្និដ្ឋានថា ប្រសិនចិនសម្រេចចិត្តចូលរួមធ្វើប្រតិបត្តិការកងទ័ពក្នុងសង្គ្រាមដោយផ្ទាល់ ហើយសម្ភារៈកងទ័ពចិនគ្មានប្រសិទ្ធភាពនៅចំពោះមុខអន្តរជាតិ នឹងធ្វើឱ្យប៉ះពាល់ដល់ភាពជឿជាក់របស់កងទ័ពចិនខ្លួនឯង និងអាចប៉ះពាល់យុទ្ធសាស្ត្ររយៈពេលវែង ជាពិសេស ពេលរដ្ឋាភិបាលទីក្រុងប៉េកាំងចង់បង្ហាញសមត្ថភាពកងទ័ពខ្លួន ប្រសិនបើមានហេតុការណ៍កើតឡើងចំពោះតៃវ៉ាន់នាថ្ងៃអនាគត ៕