នៅថ្ងៃទី១៨ ខែមិថុនា ឆ្នាំ២០២៥ វេលាម៉ោង ២:០០នាទីរសៀល ភាគីគយថៃប្រចាំខេត្តច័ន្ទបុរី ប្រទេសថៃ បានសុំជួបសមត្ថកិច្ចភាគីកម្ពុជា នៅចំនុចស្ពានព្រំដែន។

ភាគីថៃ បានស្នើសុំកម្ពុជា២ចំណុច ដោយក្នុងនោះរួមមាន៖

ទី១-ភាគីថៃបានស្នើសុំអោយភាគីកម្ពុជា នាំបន្លែ និងផ្លែឈើចូលមកប្រទេសកម្ពុជាដូចមុន ព្រោះបន្លែ និងផ្លែវាងាយឆាប់ខូច។

ទី២-ភាគីកម្ពុជា បានឆ្លើយតបទៅភាគីថៃវិញថា បើភាគីថៃបើកដំណើរដូចមុនវិញ(ចាប់ពីម៉ោង៦៖០០នាទីព្រឹក ដល់ម៉ោង១០៖០០នាទីយប់) ភាគីកម្ពុជានឹងបើកអោយនាំចូលបន្លែ ផ្លែឈើធម្មតាវិញ។

គួរបញ្ជាក់ថា កម្ពុជា បានបិទច្រកទ្វារព្រំដែនទាំងអស់ ជាប់ប្រទេសថៃ ដោយមិនអនុញ្ញាតឱ្យមានការនាំចូលផ្លែឈើ និងបន្លែ ដើម្បីជាការឆ្លើយតប ដែលថៃបានរំលោភបំពានច្បាប់ស្តីពីការគ្រប់គ្រងច្រកព្រំដែន៕

ថៃ ៖ ក្រោយទទួលបានការបញ្ជាក់ពីខាងកម្ពុជាថាកិច្ចសន្ទនាតាមទូរស័ព្ទរវាងនាយករដ្ឋមន្រ្តីថៃ និងសម្ដេចតេជោ ហ៊ុន សែន ថាជាការពិត ពេលនេះប្រជាជនថៃបានបង្ហាញពីការខកចិត្ត និងអស់ជំនឿលើរដ្ឋាភិបាលរបស់ខ្លួន ហើយកាន់តែខឹ.ងសម្បារថែមទៀត ដែលនាយករដ្ឋមន្រ្តីខ្លួនបានហៅមេទ័ពភូមិភាគទីពីរថៃ ថាជាជនស្ថិតនៅខាងក្រុមប្រឆាំងរដ្ឋាភិបាល។

យោងតាមការចុះផ្សាយដោយសារព័ត៌មានថៃ PPTV HD36 នារសៀលថ្ងៃពុធ ទី១៨ មិថុនា នេះបានឲ្យដឹងថា ៖ នាយករដ្ឋមន្រ្តីថៃ លោកស្រី Paetongtarn Shinawatra បានថ្លែងក្នុងសន្និសីតសារព័ត៌មានជុំវិញការបែ.កធ្លាយនូវកិច្ចសន្ទនាជាជាមួយសម្ដេចតេជោ ហ៊ុន សែន ថា ៖ នេះគឺជាឃ្លីបពិត ចាប់ពីពេលនេះតទៅ លោកស្រីនឹងមិនមានការសន្ទនាជាលក្ខណៈឯកជន (Private) ទៀតហើយ។

ជាងនេះទៅទៀត លោកស្រី Paetongtarn បានបកស្រាយថា ៖ កាលដែលនិយាយថាមេទ័ពភូមិភាគទីពីររបស់ថៃថាជាក្រុមពួកប្រឆាំងរដ្ឋាភិបាល ចង់បានមុខមាត់ ប្រាប់ទៅកាន់សម្ដេច ហ៊ុន សែន នោះគឺជាបច្ចេកទេសក្នុងការចរចាប៉ុណ្ណោះ ពុំមែនជាចេតនាចង់ឲ្យមានការបែកបា.ក់ផ្ទៃក្នុងឡើយ។ លោកស្រីបានបញ្ជាក់ផងដែរថា រដ្ឋាភិបាលថៃ និងផ្នែកកម្លាំងយោធាថៃគ្មានការបែកបាក់គ្នានោះទេ ព្រោះរាល់កិច្ចការទាក់ទងនឹងព្រំដែនទាំងអស់ លោកស្រីតែងតែផ្លាស់ប្ដូរយោបល់ជាមួយយោធាជាមុន។ នេះបើយោងបើយោងតាមសារព័ត៌មានថៃ។

ដោយឡែក បើមើលទៅផ្នែកមតិយោបល់គេសង្កេតឃើញថា មានការមិនពេញចិត្តលើទង្វើររបស់នាយករដ្ឋមន្រ្តីរូបនេះពីសំណាក់ប្រជាជនថៃជាច្រើន។ ពួកគេភាគច្រើនបានចោ.ទប្រកាន់នាយករដ្ឋមន្រ្តីខ្លួនថា «គ្មានភាពរឹងមាំគ្រប់គ្រាន់ក្នុងការដឹកនាំប្រទេស» ខណៈដែលអ្នកខ្លះទៀតបានលើកឡើងថា «ចោ.ទមេទ័ពភូមិភាគពីររបស់យើងថាប្រឆាំងរដ្ឋាភិបាល តែអ្នកជានាយករដ្ឋមន្រ្តីថៃបេះដូងខ្មែរ» និងមនុស្សជាច្រើនទៀតបានស្នើសុំឲ្យលោកស្រី Paetongtarn ធ្វើការលារលែងពីតំណែងមុនពេលប្រទេសថៃត្រូវបាត់បង់ទឹកដីទៅឲ្យបរទេស។

យ៉ាងណាមិញ បញ្ហានេះបានបង្កើនសម្ពាធថ្មីមួយបន្ថែមទៀតទៅកាន់នាយករដ្ឋមន្រ្តីថៃ។ ប៉ុន្តែទោះជាយ៉ាងណា នាយករដ្ឋមន្រ្តីស្រីថៃរូបនេះនៅតែអះអាងនៅក្នុងបទសម្ភាសន៍ជាមួយអ្នកកាសែតថា ៖ ការរិះគន់ទៅលើយោធាថៃ គឺគ្រាន់តែជាបច្ចេកទេសក្នុងការចរចាប៉ុណ្ណោះ ហើយរដ្ឋាភិបាលថៃនៅតែប្រកាន់ជំហររបស់ខ្លួនក្នុងការប្រឆាំងនឹងយន្តការឡើងទៅតុលាការយុត្តិធម៌អន្តរជាតិរបស់កម្ពុជាដដែល ហើយនឹងមិនព្រមតាមការទាមទាររបស់កម្ពុជាដោយងាយៗឡើយ៕

រាជធានីភ្នំពេញ ៖ ក្រោយពីមានការចែករំលែកគ្នាជាបន្តបន្ទាប់ អំពីសម្លេងដែលគេអះអាងថាជាការសន្ទនារវាងសម្ដេចតេជោ និងនាយករដ្ឋមន្រ្តីថៃ ពេលនេះសម្ដេចបានចេញមកបកស្រាយហើយថាវាគឺជាការពិត ខណៈលោកក៏បានបញ្ជាក់ពីមូលហេតុដែលមានការថតសម្លេងនោះទុក និងមូលហេតុដែលសម្លេងនេះបានបែ.កធ្លាយចេញមកក្រៅផងដែរ។

តាមរយៈការបង្ហោះសារនៅលើទំព័រហ្វេសប៊ុកផ្លូវការ សម្តេចតេជោ ហ៊ុន សែន បានធ្វើការបកស្រាយថា៖ កាលពីល្ងាចថ្ងៃទី១៥ ខែមិថុនា ឆ្នាំ២០២៥ ខ្ញុំពិតជាបានសន្ទនាតាមទូរស័ព្ទជាមួយនាយករដ្ឋមន្រ្តីថៃ រយៈពេល១៧៖០៦នាទី ដោយមានលោក ឃ្លាំង ហួត ជាអ្នកបកប្រែ ហើយជាទម្លាប់ដើម្បីកិច្ចការទាំងឡាយមិនបានគេបំភាន់ ឬបន្លំ ចាំបាច់ត្រូវការថតសម្លេង និងដើម្បីតម្លាភាពជាមួយផ្ទៃក្នុងរបស់កម្ពុជាផងដែរ។

សម្ដេចបានបញ្ជាក់ថា សំឡេងសន្ទនាគ្នារវាងលោក និងនាយករដ្ឋមន្រ្តីថៃ ត្រូវបានផ្ញើទៅកាន់គណៈអចិន្រ្តៃយ៍គណបក្ស ក្រុមការងារព្រឹទ្ធសភា ក្រុមការងារសភា ក្រុមការងារទទួលបន្ទុកកិច្ចការបរទេស ក្រុមការងារឃោសនាអប់រំ ក្រុមការងារព្រំដែន និងកងកម្លាំងប្រដាប់អាវុធ ដែលមានចំនួនមនុស្សដឹងលឺសរុបប្រហាក់ប្រហែល ៨០នាក់។

ក្នុងន័យនេះ សម្ដេចតេជោបានគូសបញ្ចាក់ថា ៖ នៅក្នុងនោះប្រហែលអាចមាននរណាម្នាក់ ដែលមិនពេញចិត្តនឹងនាយករដ្ឋមន្រ្តីថៃ ព្រោះក្រោយនិយាយគ្នាជាមួយខ្ញុំប៉ុន្មានម៉ោង ក្រោយមកបែរជាមេដឹកនាំថៃចេញមក ចោ.ទមេដឹកនាំកម្ពុជាថា ធ្វើនយោបាយអត់វិជ្ជាជីវៈ (Unprofessional) ធ្វើនយោបាយតាម Facebook ដែលនេះបង្ហាញពីទង្វើ ដែលនិយាយផ្សេង ធ្វើផ្សឹង។

លោកបានសង្កត់ធ្ងន់ថា ៖ ទាក់ទងសារសំឡេងបែកធ្លាយនេះ ខ្ញុំឃើញគេបង្ហោះតែជាង៩នាទីប៉ុណ្ណោះ ដូច្នេះបើសិនភាគីថៃចង់បាន ខ្ញុំនឹងបញ្ជូលចេញទាំងស្រុងតែម្តងដែលមានរយៈពេល ១៧:០៦នាទី៕

នៅព្រឹកថ្ងៃទី១៨ មិថុនា សិល្បករ សិល្បការិនី បុគ្គលមានឥទ្ធិពលលើបណ្តាញសង្គម បង្ហាញវត្តមានយ៉ាងច្រើនកុះករចូលរួមកម្មវិធីដំណើរថ្មើរជើង «Solidarity March» ដើម្បី បង្ហាញការរួមគ្នាជាធ្លុងមួយ គាំទ្ររាជរដ្ឋាភិបាល និងកងកម្លាំងជួរមុខកម្ពុជា ក្នុងគ្រាដែល កម្ពុជា-ថៃ មានជម្លោះតានតឹងនៅបណ្តោយព្រំដែនដែលភាគីថៃជាអ្នកចាប់ផ្តើមបញ្ហាមុន។

នៅលើបណ្តាញសង្គមគេឃើញវត្តមាន តារាចម្រៀង ពេជ្រ សោភា , ជី ដេវីត , ទេព បូព្រឹក្ស , កុយ អេនណា ,សុគន្ធ ថេរ៉ាយុ ,ពិធីការិនី ចាន់ កែវនិមល, ឈិន ម៉ានិច្ច ម្ចាស់ពាន Cambodian Idol រដូវកាលទី២, ដួង វីរៈសិទ្ធិ , សុគន្ធ និសា , ណុប បាយ៉ារិទ្ធ , វី ឌីណែត , ឆន សុវណ្ណារាជ , សាយ , Influencer ល្បីៗ ហេង វិសាល, ជា ស្រីនា ,ពេជ្រ ពិសី រួមទាំងវត្តមានសិល្បករ សិល្បការិនី និងបុគ្គលមាន ឥទ្ធិពល ជាច្រើនទៀត។ មិនត្រឹមតែប៉ុណ្ណោះព្រឹត្តិការណ៍នេះមានទាំងព្រះតេជគុណ ព្រះសង្ឃ ចាស់ព្រឹទ្ធាចារ្យ មន្រ្តីរាជការ សហគ្រិន អាជីវករ កីឡាករ សិស្ស និស្សិត ជាពិសេសអ្នកចូលរួមមកពីគណបក្សនយោបាយ នានាក៏បានចូលរួមជាមួយគ្នាផងដែរ។

កម្មវិធីការធ្វើដំណើរថ្មើរជើង «Solidarity March» ដើម្បីបង្ហាញការរួមគ្នាជាធ្លុងមួយនេះគឺជាការផ្តួចផ្តើមគំនិតរៀបចំដោយសហភាពសហព័ន្ធយុវជនកម្ពុជា។ព្រឹត្តិការណ៏ដ៏អស្ចារ្យនេះក្រុមហ៊ុន វឌ្ឍនៈ ប្រ៊ូវើរី ដែលមានអ្នកឧកញ៉ា សំអាង វឌ្ឍនៈ ជាអគ្គនាយកក៏បានចូលរួមគាំទ្រឧបត្ថម្ភក្នុងកម្មវិធីផងដែរ។ នេះជាឆន្ទៈកូនខ្មែររស់ក្រោមដំបូលសន្តិភាពបង្ហាញការគាំទ្រចំពោះចំណាត់ការរបស់រដ្ឋាភិបាលក្នុងការដោះស្រាយវិវាទព្រំដែនដោយសន្តិវិធីនិងលើកទឹកចិត្តដល់វីរៈយុទ្ធជនកម្ពុជាដែលកំពុងបំពេញភារកិច្ចយ៉ាងម៉ឺងម៉ាត់នៅព្រំដែនដើម្បីការពារអធិបតេយ្យភាព និងបូរណភាពទឹកដី។

កម្ពុជាមិនដែលមានបំណងចង់ឈ្លានពាន ឬស្វែងរកទឹកដីរបស់ប្រទេសណាមួយឡើយ សូម្បីតែ១មីលីម៉ែត្រហើយ ប្រជាជនកម្ពុជានឹងមិនអនុញ្ញាតឱ្យមានការឈ្លានពានចូលដីរបស់ខ្លួនសូម្បីតែបន្តិចដូចគ្នា៕

រាជធានីភ្នំពេញ ៖ នាថ្ងៃអង្គារ ទី១៧ ខែមិថុនា ក្រសួងការពារជាតិកម្ពុជា បានចេញនូវសេចក្ដីប្រកាសព័ត៌មានស្ដីពីស្ថានភាពវិវត្តន៍ថ្មីៗនៅតំបន់ព្ររំដែនរវាងកម្ពុជា.ថៃ ដោយលើកឡើងអំពីសកម្មភាពដែលបំពានលើកិច្ចព្រមព្រៀង ផ្ទុយពីអនុស្សរនៈយោគយល់គ្នា និងបំពានលើអធិបតេយ្យភាពរបស់កម្ពុជា។

ក្នុងនោះក្រសួងការពារជាតិបានលើកឡើងថា៖
កម្ពុជាមានបំណងរក្សាសុខសន្តិភាព និងរក្សាជំហរដោះស្រាយបញ្ហាព្រំដែនជាមួយភាគីថៃ តាមរយៈតុលាការ អន្តរជាតិ (ICJ) នៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដោយសន្តិវិធី និងប្រកបដោយការទទួលខុសត្រូវខ្ពស់។ ក្រៅអំពីនេះ កម្ពុជា បានរៀបចំឱ្យមានកិច្ចប្រជុំគណៈកម្មការចម្រុះព្រំដែន (JBC) ដែលបានប្រព្រឹត្តិទៅនៅថ្ងៃទី១៤-១៥ ខែមិថុនា ឆ្នាំ២០២៥ ហើយបានឯកភាពគ្នាលើកិច្ចការដែលភាគីកម្ពុជា-ថៃ ត្រូវបំពេញបន្តទៀត ។

ជាការសោកស្តាយ ភាគីថៃ មិនបានគោរព នូវកិច្ចព្រមព្រៀង ហើយថែមទាំងបានបង្កើនការធ្វើសកម្មភាពរំលោភបំពាន លើអធិបតេយ្យ និងបូរណភាពទឹកដីកម្ពុជា ផ្ទុយពីអនុស្សារណៈយោគយល់គ្នាឆ្នាំ២០០០ (MOU2000)។

ក្រសួងបានបញ្ជាក់ថា ភាគីថៃ បានបង្កើនសកម្មភាពបង្ហោះដ្រូន ការជីកលេណដ្ឋាន ការបង្កើន និងចល័តអាវុធគាំទ្រ និងសព្វាវុធគ្រប់ប្រភេទ ការសាងសង់ហេដ្ឋារចនាសម្ព័ន្ធ និងបង្កើនចំនួនទាហាននៅតាមព្រំដែន ក្នុងភូមិសាស្ត្រខេត្តព្រះវិហារ និងខេត្តឧត្តរមានជ័យ ដែលជាការគំរាមកំហែងធ្ងន់ធ្ងរដល់សន្តិភាព និងសន្តិសុខ នៃប្រទេសទាំងពីរ ។

ជាមួយគ្នានេះ កងទ័ពកម្ពុជា គាំទ្រនូវជំហររបស់រាជរដ្ឋាភិបាលកម្ពុជា ក្នុងការដោះស្រាយជម្លោះតាមច្បាប់អន្តរជាតិ និងដោយសន្តិវិធី និងរក្សាជំហរយ៉ាងមុតមាំទាំងកងទ័ព ទាំងប្រជាជននៅទូទាំងប្រទេស គោរពអធិបតេយ្យរបស់ប្រទេសជិតខាង និងប្តេជ្ញាប្រែក្លាយតំបន់ព្រំដែន ទៅជាតំបន់សន្តិភាព ប៉ុន្តែមិនអនុញ្ញាតជាដាច់ខាតដល់ការប៉ុនប៉ងរំលោភឈ្លានពានពីប្រទេសណាមួយឡើយ ហើយប្តេជ្ញាការពារបូរណភាពទឹកដី ទោះជាក្នុងតម្លៃណាក៏ដោយ ៕