ប្រទេសថៃ ៖ ក្រោយពីគណបក្សប្រឆាំងមួយរបស់ថៃផ្តល់យោបល់ទៅរដ្ឋាភិបាលរបស់ខ្លួនឱ្យឈប់លក់ប្រេងឥន្ធនៈឱ្យកម្ពុជាដើម្បីឱ្យកម្ពុជាចុះចាញ់ ហើយសម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានបញ្ជាក់ទៅវិញថា កម្ពុជាមិនស្លា.ប់ដោយសារមិននាំប្រេងពីថៃទេ ប៉ុន្តែអ្នកស្លា.ប់ គឺក្រុមហ៊ុនថៃ PTT ។ ក្រោយមក សារព័ត៌មានថៃផ្សាយថា ពេលនេះ កម្ពុជាខ្វះខាតប្រេង ហើយតម្លៃប្រេងឡើងថ្លៃ ធ្វើឱ្យពលរដ្ឋខ្មែរនៅទីក្រុងប៉ោយប៉ែតសម្រុកទៅចាក់ប្រេងនៅថៃ ដែលធ្វើឱ្យស្ថានីយប្រេងថៃអះអាងថា គ្មានពលរដ្ឋខ្មែរណាម្នាក់មកចាក់ប្រេងនៅថៃដូចការផ្សាយរបស់សារព័ត៌មានថៃទេ ។

កាលពីថ្ងៃទី២១ ខែមិថុនា ឆ្នាំ២០២៥ សារព័ត៌មានថៃ Khaosod រាយការណ៍ថា ស្ថានីយប្រេងនៅខេត្តស្រះកែវ ប្រទេសថៃ បញ្ជាក់ថា គ្មានពលរដ្ឋខ្មែរនាំគ្នាសម្រុកមកចាក់ប្រេងនៅថៃដូចការផ្សព្វផ្សាយរបស់សារព័ត៌មានថៃទេ ហើយអ្នកដែលចាក់ប្រេង គឺមានតែមានពលរដ្ឋថៃប៉ុណ្ណោះ ។ នាយកសមាគមធុរកិច្ចទេសចរណ៍ប្រចាំខេត្តស្រះកែវ បានត្រួតពិនិត្យស្ថានការណ៍រួចហើយ គឺនៅទីក្រុងប៉ោយប៉ែត មានប្រេងប្រើប្រាស់គ្រប់គ្រាន់ ពុំខ្វះខាតឡើយ ។

ថ្មីៗនេះ សារព័ត៌មានមួយចំនួនរបស់ថៃផ្សាយថា ពលរដ្ឋខ្មែររស់នៅទីក្រុងប៉ោយប៉ែត ប្រទេសកម្ពុជា បាននាំគ្នាសម្រុកមកចាក់ប្រេងម៉ូតូ និងរថយន្តនៅថៃ ក្រោយពីកម្ពុជាខ្វះខាតប្រេង និងតម្លៃប្រេងខ្ពស់ជាងថៃ ។ កាលពីថ្ងៃទី២១ ខែមិថុនា នាយកសមាគមធុរកិច្ចទេសចរណ៍ខេត្តស្រះកែវ បានត្រួតពិនិត្យនៅតាមស្ថានីយលក់ប្រេងស្រុកអារញ្ញប្រាថេត និងទទួលបានព័ត៌មានពីស្ថានីយចាក់ប្រេងថៃថា មានអតិថិជនមកចាក់ប្រេងធម្មតា ប៉ុន្តែសុទ្ធតែជាអតិថិជនថៃទាំងអស់ គ្មានអតិថិជនខ្មែរមកបន្តកន្ទុយគ្នាចាក់ប្រេងនៅថៃទេ ។

បុគ្គលិកធ្វើការក្នុងស្ថានីយចាក់ប្រេងថៃនិយាយថា មានអតិថិជនថៃមកចាក់ប្រេងនៅស្ថានីយតាមធម្មតា គ្មានអតិថិជនខ្មែរឡើយ ។ រីឯសារព័ត៌មានថៃបង្ហោះរូបភាពពលរដ្ឋខ្មែរជាច្រើននាក់សម្រុកមកចាក់ប្រេងនៅថៃនោះ គឺជារូបភាពពលរដ្ឋខ្មែរឆ្លងដែនមកលក់ដូរនៅផ្សាររុងក្លឿង ។

លោកស្រី រ៉ាទ្រី ស៊ែងរុងរឿង នាយកសមាគមធុរកិច្ចទេសចរណ៍ប្រចាំខេត្តស្រះកែវ បានឃើញសារព័ត៌មាននានារបស់ថៃផ្សព្វផ្សាយពីទីក្រុងប៉ោយប៉ែតខ្វះខាតប្រេង ហើយអាជីវកម្មលក់ប្រេងនៅប៉ោយប៉ែតបិទលែងដំណើរការ ទើបលោកស្រីសាកសួរទៅកាន់ក្រុមហ៊ុនប្រេងនៅកម្ពុជាថា តើការផ្សព្វផ្សាយរបស់សារព័ត៌មានថៃជាការពិតដែរឬទេ? ក្រុមហ៊ុនប្រេងនៅកម្ពុជាប្រាប់ថា កម្ពុជាពុំបានខ្វះខាតប្រេងឡើយ នេះជាព័ត៌មានមិនពិត ៕

ប្រជាជននៅទូទាំងប្រទេសអ៊ីរ៉ង់កំពុងរស់នៅក្នុងភាពភ័យខ្លាច និងច្របូកច្របល់ បន្ទាប់ពីសហរដ្ឋអាមេរិកបានធ្វើការវាយប្រហារតាមអាកាស ទៅលើទីតាំងនុយក្លេអ៊ែរសំខាន់ៗមួយចំនួនរបស់ប្រទេសអ៊ីរ៉ង់។ ការវាយប្រហារបានវាយលុកលើទីតាំងសំខាន់ៗនៅក្នុងក្រុង Fordow, Natanz និង Isfahan ដែលជាចំណុចកណ្តាលនៃការផលិតនុយក្លេអ៊ែររបស់អ៊ីរ៉ង់ កាលពីថ្ងៃទី ២២ ខែ មិថុនា ម្សិលមិញនេះ។

ប្រជាជនអ៊ីរ៉ង់ជាច្រើនបានប្រាប់ក្រុមអ្នកសារព័ត៌មាន BBC ថាពួកគេមានការភ្ញាក់ផ្អើល និងមិនបានត្រៀមខ្លួនឡើយ ព្រោះពួកគេមិនបានទទួលបានការព្រមានណាមូយមុនពេលការបំ ផ្ទុះនោះទេ។ អ្នកខ្លះបាននិយាយថាពួកគេមានអារម្មណ៍ថា “ជាប់គាំង” ហើយមិនដឹងថាត្រូវធ្វើអ្វី។ មនុស្សម្នាក់ទៀតបាននិយាយថា៖ «យើងត្រូវបានគេតាមដានជានិច្ច។ “ជារៀងរាល់ថ្ងៃនាំមកនូវការភ័យខ្លាចកាន់តែច្រើន” ។

ចាប់តាំងពីមានការវាយប្រហារមក សង្កាត់ជាច្រើនបានជួបប្រទះនឹងការដាច់ភ្លើង និងការបិទអ៊ីនធឺណិត កាត់ផ្តាច់ទំនាក់ទំនង និងធ្វើឱ្យមនុស្សមានអារម្មណ៍ឯកោកាន់តែខ្លាំង។ ក្រុមគ្រួសារកំពុងស្នាក់នៅក្នុងផ្ទះដោយមានព័ត៌មានតិចតួចបំផុតអំពីអ្វីដែលកំពុងកើតឡើង។ លើសពីនេះ ប្រជាជនក៏ជួបការលំបាកជាមួយនឹងការខ្វះខាតស្បៀងអាហារ ថ្នាំពេទ្យ និងប្រេងឥន្ធនៈជាដើម។ ហើយ ការវាយប្រហារនេះ បានធ្វើឱ្យជីវិតដែលតែងតែលំបាកស្រាប់ ឲ្យកាន់តែយ៉ាប់យ៉ឺនថែមទៀត។

ខណៈពេលដែលអ្នកខ្លះបន្ទោសសហរដ្ឋអាមេរិកចំពោះការវាយប្រហារនេះ ប្រជាជនអ៊ីរ៉ង់ជាច្រើនក៏ខឹងសម្បារចំពោះរដ្ឋាភិបាលរបស់ពួកគេផងដែរ ដោយនិយាយថា រដ្ឋាភិបាលមិនបានការពារពួកគេ ឬប្រាប់ការពិតនោះទេ។ បុរសម្នាក់បាននិយាយថា “មេដឹកនាំរបស់យើងបន្តនិយាយថាអ្វីៗគឺល្អ ប៉ុន្តែយើងមើលមិនឃើញបែបនោះទេ យើងជាអ្នករងទុក្ខ”។ ទន្ទឹមនឹងនោះ ក៏មានការព្រួយបារម្ភយ៉ាងខ្លាំងថា ការវាយប្រហារពីបរទេសកាន់តែច្រើនអាចនាំឱ្យមានបញ្ហាកាន់តែច្រើនសម្រាប់ប្រជាជនអ៊ីរ៉ង់។ អ្នកខ្លះបារម្ភថា រដ្ឋាភិបាលអាចនឹងឆ្លើយតបដោយការបង្រ្កាបសេរីភាពកាន់តែខ្លាំង ឬកាន់តែឈ្លានពានចំពោះអ្នកក្រៅ។

គួររំលឹកថា ការវាយ.ប្រហារនេះបានកើតឡើងនៅព្រឹកព្រលឹមថ្ងៃទី ២២ ខែមិថុនា សំដៅលើទីតាំងចម្រាញ់សារធាតុអ៊ុយរ៉ាញ៉ូមក្រោមដីរបស់អ៊ីរ៉ង់នៅ Fordow, Natanz និង Isfahan ។ ប្រតិបត្តិការនេះត្រូវបានគេរាយការណ៍ថាមានឈ្មោះកូដថា “Midnight Hammer” ពាក់ព័ន្ធនឹងការប្រើប្រាស់យន្តហោះទម្លាក់គ្រាប់បែកបំបាំងកាយ B-2 ដែលហោះហើរមិនឈប់ពីរដ្ឋ Missouri និងបានទម្លាក់គ្រាប់បែកបំបាំងកាយ GBU-57 ដែលនីមួយៗមានទម្ងន់ប្រហែល ៣០,០០០ ផោន។ កាំជ្រួច Tomahawk ក៏ត្រូវបានបាញ់ចេញពីនាវាមុជទឹករបស់សហរដ្ឋអាមេរិក ដែលមានទីតាំងនៅក្នុងដែនទឹកក្បែរនោះផងដែរ។ សរុបមក មានយន្តហោះអាមេរិកជាង ១២៥ គ្រឿងបានចូលរួមក្នុងបេសកកម្មនេះ រួមទាំងយន្តហោះជំនួយសម្រាប់ការចាក់ប្រេង និងស៊ើបការណ៍។

ពេលនេះមនុស្សជាច្រើនបាននិយាយថា ពួកគេគ្រាន់តែព្យាយាមរក្សាសុវត្ថិភាពនិងរស់រានមានជីវិតប៉ុណ្ណោះ។ ប៉ុន្តែដោយគ្មានផែនការច្បាស់លាស់ គ្មានចម្លើយ និងគ្មានការគ្រប់គ្រងឡើយ មនុស្សជាច្រើននិយាយថាអនាគតរបស់ពួកគេមានភាពមិនច្បាស់លាស់ច្រើនជាងពេលណាៗទាំងអស់៕

ប្រទេសថៃ ៖ សារព័ត៌មានថៃ Khaosod រាយការណ៍ថា កាលពីថ្ងៃទី២២ ខែមិថុនា ឆ្នាំ២០២៥ ក្រសួងការបរទេសថៃបានចេញសេចក្តីប្រកាសហាមឃាត់ពលរដ្ឋថៃធ្វើដំណើរមកប្រទេសកម្ពុជា ប្រសិនបើគ្មានភាពចាំបាច់ ។ រីឯពលរដ្ឋថៃរស់នៅកម្ពុជា ត្រូវអនុវត្តតាមការណែនាំរបស់ស្ថានទូត និងស្ថានអគ្គកុងស៊ុលថៃប្រចាំកម្ពុជាដើម្បីសុវត្ថិភាព ចៀសវាងធ្វើដំណើរទៅកាន់ទីប្រជុំជន និងតាមដានស្ថានការណ៍ជានិច្ច ។

ស្របពេលមានស្ថានការណ៍តានតឹងកើតឡើងរវាងប្រទេសកម្ពុជា និងថៃ ក្រសួងការបរទេសថៃបានចេញសេចក្តីប្រកាសហាមពលរដ្ឋថៃធ្វើដំណើរមកកម្ពុជា ប្រសិនបើពុំចាំបាច់ដើម្បីសុវត្ថិភាព ខណៈពលរដ្ឋថៃរស់នៅកម្ពុជា សូមឱ្យបង្កើនការប្រុងប្រយ័ត្នក្នុងការរស់នៅប្រចាំថ្ងៃ និងចៀសវាងធ្វើដំណើរទៅទីប្រជុំជន ឬកន្លែងប្រឈមផ្សេងៗ ។ ក្រៅពីនេះ ពលរដ្ឋថៃត្រូវតាមដានស្ថានការណ៍ជានិច្ច និងអនុវត្តតាមការណែនាំរបស់ស្ថានទូត និងស្ថានអគ្គកុងស៊ុលថៃ ។

ប្រសិនបើពលរដ្ឋថៃរស់នៅប្រទេសកម្ពុជា ត្រូវការជំនួយ ឬមានហេតុការណ៍បន្ទាន់ ពលរដ្ឋថៃអាចទាក់ទងទៅកាន់ស្ថានទូតថៃនៅរាជធានីភ្នំពេញតាមរយៈលេខទូរស័ព្ទ ឬទូរស័ព្ទទៅកាន់ស្ថានអគ្គកុងស៊ុលថៃនៅខេត្តសៀមរាប ឬទូរស័ព្ទទៅកាន់នាយកដ្ឋានកិច្ចការកុងស៊ុលរយៈពេល២៤ម៉ោង ឬទាក់ទងតាមរយៈកម្មវិធីអនឡាញ Thai Consular ។

ការហាមឃាត់ពលរដ្ឋថៃចូលមកកម្ពុជានេះ ក្រោយពីស្ថានការណ៍ព្រំដែនរវាងកម្ពុជា និងថៃនៅតែតានតឹង ដោយសារថៃដាក់គំនាប និងកំណត់វិធានការផ្សេងៗមកលើកម្ពុជា ក្នុងគោលបំណងឱ្យកម្ពុជាដកពាក្យបណ្តឹងពីតុលាការយុត្តិធម៌អន្តរជាតិ (ICJ) និងងាកមកចរចាទ្វេភាគីជាមួយថៃដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ។

ប៉ុន្តែសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបញ្ជាក់ថា កម្ពុជាមិនមែនជាអ្នកចាប់ផ្តើមបញ្ហានេះទេ ។ ហេតុដូច្នេះ កម្ពុជាក៏មិនត្រូវជាអ្នកដែលបញ្ចប់បញ្ហានេះមុនដែរ ។ រឿងដែលកើតឡើងដោយឯកតោភាគី ត្រូវបញ្ចប់ដោយឯកតោភាគី មិនមានការចាំបាច់ចរចាគ្នានោះទេ ។ អ្នកណាចាប់ផ្តើមមុន អ្នកនោះបញ្ចប់មុនទៅជាការស្រេច ៕

រាធានីភ្នំពេញ ៖ ក្រសួងការពារជាតិកម្ពុជា បានធ្វើការច្រានចោលយ៉ាងដាច់អហង្ការចំពោះការអះអាងដែលផ្ទុយពីការពិតរបស់អ្នកនាំពាក្យកងទ័ពជើងគោកថៃ ជុំវិញករណីទាហានថៃនាំអ្នកជិះកង់ជនជាតិថៃចំនួន ១៥០នាក់ ឡើងប្រាសាទតាមាន់ធំ និងដោយមិនបានជូនដំណឹងកម្ពុជាជាមុន កាលពីព្រឹកថ្ងៃទី២២ ខែមិថុនា ឆ្នាំ២០២៥ ទាំងដែលទីតាំងខាងលើ គឺស្ថិតនៅក្នុងទឹកដីកម្ពុជា ហើយការធ្វើបែបនេះបាននាំឲ្យប៉ះពាល់ដល់ការជឿទុកចិត្តគ្នាទៅវិញទៅមក នឹងគំរាមកំហែងដល់ស្ថិរភាពក្នុងតំបន់ជាខ្លាំង។

ជាមួយគ្នានេះ ដើម្បីជាភាពច្បាស់លាស់ និងការពិតចំពោះឧប្បត្តិហេតុនេះ កងយោធពលខេមរភូមិន្ទ នៃព្រះរាជាណាចក្រកម្ពុជា សូមធ្វើការបញ្ជាក់ចំនួន ៤ចំណុចដូចតទៅ៖

ទីមួយ៖ ការអះអាងរបស់អ្នកនាំពាក្យកងទ័ពជើងគោកថៃ ដែលថាខ្លួនបានជូនដំណឹងដល់កងទ័ពកម្ពុជាអំពីការមកទស្សនារបស់អ្នកជិះកង់ជនជាតិថៃចំនួន១៥០នាក់នៅប្រាសាទតាមាន់ធំ គឺជារឿងមិនពិត។ កងទ័ពកម្ពុជាពុំបានទទួលការជូនដំណឹងពីភាគីថៃ មិនថាជាពាក្យសម្តី ឬតាមរយៈទំនាក់ទំនងផ្លូវការ អំពីការមកទស្សនាប្រាសាទរបស់ក្រុមអ្នកជិះកង់ជនជាតិថៃទាំងនេះទេ។ ប្រសិនបើកងទ័ពថៃពិតជាមានភាពស្អាតស្អំ និងគ្មានចេតនាមិនល្អនោះទេ គួរតែធ្វើសកម្មភាពប្រកបដោយតម្លាភាព និងស្របតាមកិច្ចព្រមព្រៀងនៃប្រទេសទាំងពីរ ដែលបញ្ជាក់យ៉ាងច្បាស់ពាក់ព័ន្ធនឹងពេលវេលា និងលក្ខខណ្ឌនៃការចេញចូលប្រាសាទ។

ទីពីរ៖ ពេលសង្កេតឃើញការមកទស្សនាដោយគ្មានការអនុញ្ញាត ពីសំណាក់អ្នកជិះកង់ជនជាតិថៃទាំងនេះ កងទ័ពកម្ពុជាបានឆ្លើយតបដោយសមរម្យ មានសុជីវធម៌ និងប្រកបដោយវិជ្ជាជីវៈខ្ពស់។ កងទ័ពកម្ពុជាបានរំឭកកងទ័ពថៃថា ការមកទស្សនាដោយគ្មានការឯកភាពគ្នាជាមុននេះ គឺជាការបំពានលើកិច្ចព្រមព្រៀងហើយបានជំរុញឱ្យភាគីថៃគោរពលក្ខខណ្ឌទាំងនេះឱ្យបានខ្ជាប់ខ្ជួន និងម៉ឺងម៉ាត់។ ទោះបីជាមានការបំពានដូចបានរៀបរាប់ខាងលើក៏ដោយ កងទ័ពកម្ពុជាបានអនុញ្ញាតឱ្យពួកគេថតរូប និងចាកចេញពីតំបន់នោះដោយសន្តិវិធី ដែលនេះបង្ហាញឱ្យឃើញពីការអត់ធ្មត់ ការទទួលខុសត្រូវ និងបំណងប្រាថ្នាដ៏ស្មោះស្ម័គ្ររបស់កងទ័ពកម្ពុជា ក្នុងការជៀសវាងកុំឱ្យមានភាពតានតឹងដោយមិនចាំបាច់។

ទីបី៖ ការអះអាងរបស់អ្នកនាំពាក្យកងទ័ពជើងគោកថៃថា បញ្ហាខាងលើនេះអាចបណ្តាលមកពីការយល់ច្រឡំក្នុងទំនាក់ទំនងផ្ទៃក្នុងរវាងកងទ័ពកម្ពុជា និងរាជរដ្ឋាភិបាលរបស់ខ្លួន ការលើកឡើងបែបនេះ គឺជាទង្វើដែលគ្មានការទទួលខុសត្រូវបំផុត ប្រាសចាកពីក្រមសីលធម៌វិជ្ជាជីវៈរបស់ខ្លួនក្នុងនាមជាអ្នកនាំពាក្យ ដែលមានតួនាទីត្រូវផ្តល់ការពិត និងផ្អែកលើភស្តុតាង។ ការចោទប្រកាន់បែបនេះ គឺជាចេតនាបិទបាំងកំហុសឆ្គងរបស់កងទ័ពថៃ ដែលបានល្មើសលើកិច្ចព្រមព្រៀង ហើយមិនហ៊ានទទួលខុសត្រូវ បែរជាមកចោទប្រកាន់កងទ័ពកម្ពុជា ក្នុងចេតនាបំភ័ន្តការពិតជាមួយប្រជាជនខ្លួន។ ក្នុងន័យនេះ រាជរដ្ឋាភិបាល កងទ័ព និងប្រជាជន នៃព្រះរាជាណាចក្រកម្ពុជា គឺរួមគ្នាតែមួយក្នុងការប្តេជ្ញាចិត្តការពារបូរណភាពទឹកដីទោះក្នុងតម្លៃណាក៏ដោយ។

ទីបួន៖ កងយោធពលខេមរភូមិន្ទ នៃព្រះរាជាណាចក្រកម្ពុជា សូមបញ្ជាក់ជាថ្មីថា តាមផែនទីមាត្រដ្ឋាន ១:២០០.០០០ ស្របតាមស្មារតីនៃអនុសញ្ញាបារាំងសៀមឆ្នាំ១៩០៤ និងសន្ធិសញ្ញាបារាំង-សៀម ១៩០៧ ប្រាសាទតាមាន់ធំ គឺជាដែនអធិបតេយ្យរបស់កម្ពុជា ដែលជាការពិតមិនអាចក្រឡាស់បាន។ កម្ពុជាអំពាវនាវឱ្យភាគីថៃគោរពតាមកិច្ចព្រមព្រៀងដែលមានស្រាប់ ឱ្យបានពេញលេញ និងម៉ឺងម៉ាត់ ប្រកបដោយភាពស្មោះត្រង់ ព្រមទាំងជៀសវាងរាល់សកម្មភាពបំភ័ន្តការពិត ដែលអាចបំផ្លាញទំនុកចិត្ត និងការជឿជាក់គ្នាទៅវិញទៅមក។ កងយោធពលខេមរភូមិន្ទ នៃព្រះរាជាណាចក្រកម្ពុជា ប្តេជ្ញាចិត្តក្នុងការរក្សា និងលើកកម្ពស់សន្តិភាព ស្ថិរភាព និងទំនាក់ទំនងមិត្តជិតខាងល្អ ប៉ុន្តែនឹងមិនអនុញ្ញាតឱ្យប្រទេសណាមួយមកឈ្លានពានបានជាដាច់ខាត៕

ថៃ ៖ ក្រុមហ៊ុន OR ដែលជាមេរបស់ក្រុមហ៊ុន PTT ប្រចាំនៅប្រទេសថៃបានបញ្ជាក់ថា បើទោះបីជាមានការហាមឃា.ត់នាំចូលប្រេងឥន្ធនៈពីថៃមកលក់នៅកម្ពុជាក៏ពិតមែន ប៉ុន្តែវានឹងមិនប៉ះពាល់ដល់ប្រាក់ចំណូលរបស់ OR ច្រើនទេ ព្រោះនៅក្នុងប្រទេសកម្ពុជាមានស្ថានីយ៍ PTT តិចតួចប៉ុណ្ណោះ បោះធៀបទៅនឹងប្រទេសថៃ។

យោងតាមការចុះផ្សាយរបស់សារព័ត៌មានថៃ Khaosod កាលពីថ្ងៃអាទិត្យ ទី២២ មិថុនា បានឲ្យដឹងថា ដោយសារកម្ពុជាបានហាមឃាត់ការនាំចូលប្រេងឥន្ធនៈរបស់ក្រុមហ៊ុន OR ដើម្បីលក់ក្នុងប្រទេស នោះ OR នឹងលក់ប្រេងដែលនៅសល់ទាំងអស់នៅក្នុងធុងសាំងរបស់ស្ថានីយ៍ប្រេងនីមួយៗរហូតដល់អស់ ដើម្បីតាមដានស្ថានភាព។

ជាមួយគ្នានេះ លោក Pirapan Salirathavibhaga រដ្ឋមន្រ្តីក្រសួងរ៉ែ និង ថាមពលរបស់ប្រទេសថៃ បានបញ្ជាក់ថា ៖ ការណ៍នេះនឹងមិនប៉ះពាល់ដល់ប្រាក់ចំណូលរបស់ក្រុមហ៊ុន OR ច្រើនទេ ព្រោះមានស្ថានីយ៍ប្រេងតែ 186 និង ហាងកាហ្វេ«អាម៉ាហ្សូន»ចំនួន 254 សាខាប៉ុណ្ណោះនៅក្នុងប្រទេសកម្ពុជា បើធៀបនឹងស្ថានីយ៍ប្រេង OR ចំនួនជាង 2,000 នៅក្នុងប្រទេសថៃ។

លើសពីនេះ ក្រសួងពាណិជ្ជកម្មថៃធ្លាប់បានរាយការណ៍ពីតម្លៃពាណិជ្ជកម្មតាមព្រំដែនរវាងថៃ និងកម្ពុជាក្នុងរយៈពេល៤ខែនៃដើមឆ្នាំនេះ ពោលចាប់ពីខែមករា ដល់ខែមេសា ឆ្នាំ២០២៥ ថៃបាននាំចេញប្រេងចម្រាញ់មកកម្ពុជាសរុបមានតម្លៃ២០,០១១លានបាត (ប្រហែល 540.3 លានដុល្លារអាមេរិក)។

ដោយឡែកនាពេលថ្មីៗនេះ ក្រសួងថាមពលក៏បានទទួលរបាយការណ៍ថា លោក Pirapan បានពិភាក្សាជាមួយនាយកប្រតិបត្តិ និងស្ថាប័នពាក់ព័ន្ធទាក់ទងនឹងការផ្អាកការនាំចូលប្រេងពីប្រទេសថៃ។ ដោយគេរំពឹងថា នឹងមានវឌ្ឍនភាពនិងព័ត៌មានលម្អិតបន្ថែមទៀតនឹងចេញផ្សាយនៅថ្ងៃចន្ទ ទី២៣ មិថុនា ២០២៥ ជាបន្តទៀត៕