ថៃ ៖ នាយកប្រតិបត្តិរបស់ក្រុមហ៊ុនចំនួន 100 បង្ហាញការអំពាវនាវឲ្យលោកស្រី Paetongtarn Shinawatr លាលែងពីតំណែងជានាយករដ្ឋមន្រ្តី ដើម្បីដោះស្រាយវិបត្តិនយោបាយ ស្ដារសេដ្ឋកិច្ច និងរដ្ឋាភិបាលរបស់ប្រទេសថៃឡើងវិញ បន្ទាប់ពីវិនិយោគគ្រិនបរទេសជាច្រើនបានសម្រុកលក់ភាគហ៊ុនរបស់ខ្លួនចេញ។ នេះបើយោងតាមការចុះផ្សាយរបស់សារព័ត៌មានថៃ The Nation។

នាព្រឹកថ្ងៃសុក្រ ទី២០ មិថុនា សារព័ត៌មានរបស់ថាមួយនេះបានឲ្យដឹងថា ៖ ការស្ទង់មតិនាពេលថ្មីៗនេះដែលធ្វើឡើងដោយ Krungthep Turakij បានសាកសួរនាយកប្រតិបត្តិចំនួន 100 នាក់មកពីវិស័យឈានមុខដូចជា ផលិតកម្ម កសិកម្ម ថាមពល អចលនទ្រព្យ ការនាំចេញ ហិរញ្ញវត្ថុ .ល. អំពីទស្សនៈវិស័យរបស់ពួកគេ។ ភាគច្រើននៃនាយកប្រតិបត្តិទាំងនោះ បានអំពាវនាវឲ្យលោកស្រី Paetongtarn ធ្វើការលាលែងពីតំណែងនាយករដ្ឋមន្រ្តី ព្រោះពួកគេជឿជាក់ថា ការដឹកនាំរបស់នាងកំពុងធ្វើឱ្យស្ថានភាពនយោបាយ និងសេដ្ឋកិច្ចក្នុងប្រទេសថៃកាន់តែអាក្រ.ក់ទៅៗ ។

ការស្ទង់មតិនេះ បានឲ្យដឹងទៀតថា ៖ ទីផ្សារហ៊ុនក្នុងស្រុកកាន់តែធ្លាក់ចុះខ្លាំង បន្ទាប់ពីលេចធ្លាយការសន្ទនារបស់លោកស្រីជាមួយអតីតនាយករដ្ឋមន្ត្រីកម្ពុជា ដែលប៉ះពាល់យ៉ាងខ្លាំងដល់ទំនុកចិត្តរបស់សាធារណជនចំពោះរដ្ឋាភិបាល។ ហើយវិបត្តិនេះ កាន់តែធ្ងន់ធ្ងរថែមទៀតនៅពេលគណបក្ស Bhumjaithai បានដកខ្លួនចេញពីរដ្ឋាភិបាលចម្រុះ។

នាយកប្រតិបត្តិប្រហែល 42.6% នៅក្នុងប្រទេសចង់ឲ្យលោកស្រី Paetongtarn ចុះចេញពីតំណែង ខណៈ 27.7% ស្នើសុំរំលាយសភា និង 26.7% គិតថាការរុះរើគណៈរដ្ឋមន្ត្រីជាដំណោះស្រាយដ៏សមស្របបំផុត។

គួរឲ្យដឹងផងដែរថា 55% នៃនាយកប្រតិបត្តិក្រុមហ៊ុនក្នុងប្រទេសថៃ ជឿជាក់ថាភាពមិនប្រាកដប្រជាខាងនយោបាយនៅក្នុងពេលបច្ចុប្បន្ន កំពុងជះឥទ្ធិពលយ៉ាងខ្លាំងដល់ការធ្វើផែនការយុទ្ធសាស្រ្តអាជីវកម្ម ដោយបង្ខំឱ្យក្រុមហ៊ុនពិចារណាពីហានិភ័យនយោបាយកាន់តែប្រុងប្រយ័ត្ន ក្នុងការរៀបចំយុទ្ធសាស្រ្តរយៈពេលវែងរបស់ពួកគេ។

ទោះជាយ៉ាងណាក៏ដោយ នៅពេលសួរថាតើរដ្ឋាភិបាលមានផែនការ ឬយុទ្ធសាស្ត្រមានប្រសិទ្ធភាពក្នុងការដោះស្រាយបញ្ហាសេដ្ឋកិច្ចដែរឬទេ? នាយកប្រតិបត្តិជាង 57.4% បាននិយាយថា ពួកគេមានអារម្មណ៍ថារដ្ឋាភិបាលសព្វថ្ងៃខ្វះផែនការច្បាស់លាស់ ឬមានប្រសិទ្ធភាព។ ដូច្នេះទើបមាននាយកប្រតិបត្តិខ្ឡះបានដកការវិនិយោគរបស់ខ្លួនចេញពីប្រទេសថៃ រីឯនាយកប្រតិបត្តិដែលនៅសេសសល់បានកត់សម្គាល់ថាពួកគេមិនបានឃើញការខិតខំប្រឹងប្រែងរបស់រដ្ឋាភិបាលដើម្បីដោះស្រាយបញ្ហានោះទេ៕

ប្រទេសថៃ ៖ ថ្មីៗនេះ សារព័ត៌មានថៃផ្សាយថា ស្ថានការណ៍ព្រំដែនកម្ពុជា-ថៃមានភាពតានតឹងក្រោយការប៉ះទង្គិចរវាងកងទ័ពទាំងពីរប្រទេស ធ្វើឱ្យភាគីថៃរឹតបន្តឹងការឆ្លងដែនជាឯកតោភាគី និងផ្លាស់ប្តូរម៉ោងបើក-បិទទ្វារច្រកព្រំដែន ខណៈច្រកព្រំដែនខ្លះបើកតែ៣ថ្ងៃក្នុង១សប្តាហ៍ ។ កម្ពុជាក៏បានហាមឃាត់ការនាំចូលបន្លែ ផ្លែឈើថៃគ្រប់ច្រកព្រំដែន ដែលធ្វើឱ្យរដ្ឋមន្ត្រីក្រសួងការបរទេសថៃ លោក ម៉ារីស សាងៀមផុង បញ្ជាទៅឯកអគ្គរាជទូតថៃប្រចាំកម្ពុជាត្រឡប់មកថៃវិញ ដើម្បីកាត់បន្ថយទំនាក់ទំនងការទូតមកនៅត្រឹមឧបទូត ដែលនេះជាចំណាត់ការរបស់ថៃមកលើកម្ពុជា ។

ក្រោយសារព័ត៌មានថៃផ្សាយបែបនេះ កាលពីថ្ងៃទី២០ ខែមិថុនា ឆ្នាំ២០២៥ ក្រសួងការបរទេសថៃបានបដិសេធចំពោះព័ត៌មាននេះថា ក្រសួងការបរទេសថៃគ្រាន់តែអញ្ជើញមន្ត្រីស្ថានទូតថៃប្រចាំកម្ពុជា មកប្រជុំនៅថៃដើម្បីវាយតម្លៃស្ថានការណ៍ និងកំណត់វិធានការឆ្លើយតបជាមួយកម្ពុជានាពេលខាងមុខ ប៉ុន្តែក្រសួងពុំទាន់ឈានដល់ពេលកាត់បន្ថយទំនាក់ទំនងការទូតជាមួយកម្ពុជាពេលនេះទេ ។

បើតាមមន្ត្រីក្រសួងការបរទេសថៃ គឺក្រសួងបានអញ្ជើញមន្ត្រីស្ថានទូតថៃប្រចាំកម្ពុជាមកប្រជុំពិភាក្សានៅថៃតាមធម្មតាប៉ុណ្ណោះ ហើយក្រសួងពុំបានកាត់ផ្តាច់ទំនាក់ទំនងការទូតជាមួយកម្ពុជា រីឯមន្ត្រីស្ថានទូតថៃនឹងធ្វើដំណើរត្រឡប់មកកម្ពុជាវិញនាពេលឆាប់ៗ ។

គួរបញ្ជាក់ថា ថ្មីៗនេះ សារព័ត៌មានថៃរាយការណ៍ថា ក្រសួងការបរទេសថៃបានហៅមន្ត្រីស្ថានទូតថៃប្រចាំកម្ពុជាមកថៃវិញ រួមទាំងកាត់បន្ថយទំនាក់ទំនងការទូតមកនៅត្រឹមឧបទូតដើម្បីឆ្លើយតបទៅកម្ពុជា ហើយក្រសួងការបរទេសថៃនឹងចាត់វិធានការឆ្លើយតបបន្ថែមទៀត ។ កន្លងមក កម្ពុជា និងថៃធ្លាប់កាត់ផ្តាច់ទំនាក់ទំនងការទូតចំនួន២លើក ដោយសាររឿងប្រាសាទព្រះវិហារ ហើយប្រទេសទាំងពីរធ្លាប់កាត់បន្ថយទំនាក់ទំនងការទូត ចំនួន២លើក ដោយសារការដុតស្ថានទូតថៃ ។

សារព័ត៌មានថៃរាយការណ៍ទៀតថា ថៃកាត់ផ្តាច់ទំនាក់ទំនងការទូតជាមួយកម្ពុជា ដោយសារស្ថានការណ៍តានតឹងនៅតំបន់ព្រំដែន និងមានការបែកធ្លាយកិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ។ ក្រសួងការបរទេសថៃក៏អញ្ជើញមន្ត្រីទូតកម្ពុជាប្រចាំប្រទេសថៃមកទទួលលិខិតតវ៉ា ដែលមានខ្លឹមសារថា ការបែកធ្លាយកិច្ចសន្ទនា គឺជាការខុសក្រមសីលធម៌រវាងប្រទេស និងជាការបំផ្លាញទំនុកចិត្តយ៉ាងខ្លាំងរវាងប្រទេសជិតខាង ៕

ទូរទស្សន៍ NHK របស់ជប៉ុនបានរាយការណ៍កាលពីថ្ងៃទី 19 ខែមិថុនា ដោយដកស្រង់ប្រភពការទូតដែលមិនបញ្ចេញឈ្មោះមួយនៅប្រទេសលោកខាងលិច និងរុស្ស៊ីថា ៖ ប្រទេសកូរ៉េខាងជើងកំពុងពិចារណាបញ្ជូនកម្មកររហូតដល់ 25,000 នាក់ទៅកាន់ប្រទេសរុស្ស៊ីដើម្បីជួយក្នុងការផលិតយន្តហោះគ្មានមនុស្សបើកប្រភេទ Shahed ។

កម្មករទាំងនោះ នឹងត្រូវបានបញ្ជូនទៅកាន់តំបន់សេដ្ឋកិច្ចពិសេស Alabuga ក្នុងសាធារណរដ្ឋ តាតាស្តង់ របស់រុស្ស៊ី ជាកន្លែងដែលទីក្រុងម៉ូស្គូដំណើរការកន្លែងសម្រាប់ដំឡើងយន្តហោះគ្មានមនុស្សបើក Shahed ដែលរចនាដោយអ៊ីរ៉ង់។ នេះបង្ហាញពីការអភិវឌ្ឍយ៉ាងឆាប់រហ័សក្នុងកិច្ចសហប្រតិបត្តិការយោធារវាងក្រុងម៉ូស្គូនិងក្រុងព្យុងយ៉ាង។

គួររំលឹកថា កាលពីថ្ងៃទី 17 ខែមិថុនាកន្លងទៅ រដ្ឋលេខាធិការក្រុមប្រឹក្សាសន្តិសុខរុស្ស៊ីលោក Sergei Shoigu បានទៅបំពេញទស្សនកិច្ចនៅកូរ៉េខាងជើងតាមសេចក្តីរាយការណ៍ពី “ការចាត់តាំងពិសេស” ពីប្រធានាធិបតីរុស្ស៊ី លោក Vladimir Putin ។ បន្ទាប់ពីបានជួបលោក Kim Jong Un រួច លោក Shoigu បាននិយាយថា ទីក្រុងព្យុងយ៉ាងបានយល់ព្រមបញ្ជូនវិស្វករប្រយុទ្ធចំនួន 1,000 នាក់ និងអ្នកសាងសង់ផ្នែកយោធាចំនួន 5,000 នាក់ទៅកាន់តំបន់ Kursk របស់ប្រទេសរុស្ស៊ីដើម្បីជួយក្នុងការកសាងយន្តហោះគ្មានមនុស្សបើក Shahed។

គួរជម្រាបថា យន្តហោះគ្មានមនុស្សបើក Shahed ដែលត្រូវបានគេស្គាល់ពីភាពខ្លាំងរបស់វា ហើយត្រូវបានប្រើប្រាស់យ៉ាងទូលំទូលាយដោយប្រទេសរុស្ស៊ីចាប់តាំងពីចុងឆ្នាំ 2022 ក្នុងការវាយប្រហារទីក្រុងនានារបស់អ៊ុយក្រែន។ ដែលជាហេតុនាំឲ្យទីតាំងដែលផលិតយន្តហោះនេះនៅ Alabuga ត្រូវបានកងកម្លាំងអ៊ុយក្រែនវា.យប្រហារម្តងហើយម្តងទៀតដើម្បីរំខានដល់ការផលិត។

ប្រមុខចារកម្មយោធាអ៊ុយក្រែន លោក Kyrylo Budanov បាននិយាយកាលពីថ្ងៃទី ៩ ខែមិថុនាថា ទីក្រុងព្យុងយ៉ាង និងទីក្រុងមូស្គូ បានព្រមព្រៀងគ្នាក្នុងការចាប់ផ្តើមការផលិតយន្តហោះគ្មានមនុស្សបើក Shahed-136 ក្នុងស្រុកនៅលើទឹកដីកូរ៉េខាងជើង។

បើតាមការអង្កេត គេអាចសន្មត់បានថា លោក Kim គឺជាមិត្តល្អរបស់លោក ពូទីន ដោយមិនត្រឹមតែផ្គត់ផ្គង់ផ្នែកទាហានប៉ុណ្ណោះទេ តែថែមទាំងមានកាំភ្លើងធំ យន្តហោះគ្មានមនុស្សបើក និងកាំជ្រួចផ្លោងទៀតផង។ ក្នុងអំឡុងពេលព្យុហយាត្រាទិវាជ័យជម្នះ ៩ ឧសភា របស់រុស្ស៊ីនៅទីក្រុងមូស្គូ លោក ពូទីន បានស្វាគមន៍ដោយផ្ទាល់ដល់ទាហានកូរ៉េខាងជើង ទោះបីជាលោក គីម មិនបានចូលរួមក៏ដោយ។ នេះបង្ហាញពីចំណងមិត្តភាពដ៏ជិតស្និតរបស់ប្រទេសមហាអំណាចសព្វាវុធទាំងពីរ៕

ប្រទេសថៃ ៖ សារព័ត៌មានថៃ MGR Online រាយការណ៍ថា ហ្វេសប៊ុកផេកការទូត និងកងទ័ពថៃឈ្មោះ «Military & Diplomacy» បានបង្ហាញពីគោលជំហរពាក់ព័ន្ធនឹងទំនាក់ទំនងកម្ពុជា-ថៃថា ថៃពុំគួរបើកព្រំដែនដូចដើមទេ បើកម្ពុជាពុំដកពាក្យបណ្តឹងនៅតុលាការយុត្តិធម៌អន្តរជាតិ (ICJ) ហើយងាកមកចរចាទ្វេភាគី ។ ហ្វេសប៊ុកផេកនេះក៏បានសួរពីគោលជំហររដ្ឋាភិបាលថៃហាក់កាត់បន្ថយលក្ខខណ្ឌដាក់សម្ពាធលើកម្ពុជាត្រឹមការដកកងទ័ព និងគួរជំរុញឱ្យកម្ពុជាចរចាទ្វេភាគីដើម្បីបញ្ចប់ស្ថានការណ៍តានតឹង ។

កាលពីថ្ងៃទី២០ ខែមិថុនា ឆ្នាំ២០២៥ ហ្វេសប៊ុកផេក «ការទូត និងកងទ័ពថៃ» បានបង្ហោះសារថា ថៃពុំគួរបើកព្រំដែនដូចដើមទេ រហូតដល់កម្ពុជាដកពាក្យបណ្តឹងនៅតុលាការយុត្តិធម៌អន្តរជាតិ (ICJ) និងងាកមកចរចាទ្វេភាគីជាមួយថៃប៉ុណ្ណោះ ។ អ្វីគួរឱ្យបារម្ភខ្លាំងជាងការបែកធ្លាយកិច្ចសន្ទនារបស់នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ គឺជាច្រើនថ្ងៃមកនេះ រដ្ឋាភិបាលថៃហាក់កាត់បន្ថយលក្ខខណ្ឌរបស់ខ្លួន បើកម្ពុជាយល់ព្រមដកកងទ័ព ឬកែសម្រួលកងកម្លាំង គឺថៃនឹងបើកព្រំដែនដូចមុនឡើងវិញ មានន័យថា រដ្ឋាភិបាលថៃចង់ឱ្យកម្ពុជាដកកងទ័ព គឺគ្រប់គ្រាន់ហើយដើម្បីឱ្យទំនាក់ទំនងកម្ពុជា-ថៃត្រឡប់មកធម្មតាវិញ ។

ខ្លឹមសារការបង្ហោះរបស់ហ្វេសប៊ុកផេកនេះបញ្ជាក់ថា បើក្រឡេកទៅមើលពេលកងទ័ពថៃប្រកាសច្បាប់អាជ្ញាសឹកនៅព្រំដែន គឺលក្ខខណ្ឌរបស់ថៃមិនត្រឹមតែឱ្យកម្ពុជាដកកងទ័ពប៉ុណ្ណោះទេ ប៉ុន្តែឱ្យកម្ពុជាចរចាទ្វេភាគីជាមួយថៃផងដែរ ។ រីឯការដកកងទ័ពមានភាពសំខាន់បន្ទាប់បន្សំប៉ុណ្ណោះ ហើយថៃដើរតាមក្រោយកម្ពុជារឿងនយោបាយ ។ ហេតុនេះ ការដកពាក្យបណ្តឹងនៅតុលាការ ICJ និងការចរចាទ្វេភាគីមានសារៈសំខាន់ណាស់សម្រាប់ថៃ ។

ហ្វេសប៊ុកផេក «ការទូត និងកងទ័ពថៃ» ចោទប្រកាន់ថា កម្ពុជាពុំព្រមចរចាទ្វេភាគីដោះស្រាយបញ្ហាព្រំដែនជាមួយថៃ ប៉ុន្តែបានអនុវត្តគ្រប់វិធីដើម្បីឱ្យការចរចាទ្វេភាគីបរាជ័យ ដូចជា ៖ កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ បានបញ្ចប់ កម្ពុជាក៏ចេញសេចក្តីថ្លែងការណ៍តែម្ខាង និងពុំចូលរួមប្រជុំគណៈកម្មការព្រំដែនតំបន់ (RBC) ហើយកម្ពុជាបានដាក់ពាក្យបណ្តឹងទៅតុលាការ ICJ ។

ក្នុងស្ថានការណ៍បែបនេះ ថៃអាចដាក់សម្ពាធលើកម្ពុជាបាន បើពុំចង់ធ្វើសង្គ្រាមនាំឱ្យខាតបង់ គឺថៃត្រូវតែឱ្យកងទ័ពកំណត់វិធានការបើក-បិទច្រកព្រំដែនកម្ពុជា-ថៃ ។ រដ្ឋាភិបាលថៃពុំគួរកាត់បន្ថយលក្ខខណ្ឌការបើកព្រំដែនត្រឹមដកកងទ័ពទេ ប៉ុន្តែរដ្ឋាភិបាលថៃគួរកំណត់វិធានការបន្ថែមដើម្បីដាក់សម្ពាធកម្ពុជា រហូតដល់កម្ពុជាឈប់លេងហ្គេមនយោបាយ និងងាកមកចរចាទ្វេភាគីជាមួយថៃ ។ ដូច្នេះ ដរាបណាកម្ពុជាពុំចរចាទ្វេភាគីជាមួយថៃ គឺថៃពុំគួរបើកព្រំដែនដូចមុនដាច់ខាត ។ នេះបើតាមខ្លឹមសារក្នុងហ្វេសប៊ុកផេក «ការទូត និងកងទ័ពថៃ» ៕

ប្រទេសថៃ ៖ សារព័ត៌មាន Thairath រាយការណ៍ថា ក្រោយការបែកធ្លាយកិច្ចសន្ទនាតាមទូរស័ព្ទរវាងលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ ជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា លោកស្រីក៏ចុះសួរសុខទុក្ខកងទ័ពនៅខេត្តឧប៊ុនរ៉ាជធានី និងជួបមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ដើម្បីសូមទោស ។ ពេលមកដល់ទីក្រុងបាងកកវិញ លោកស្រីបានពិភាក្សាជាមួយលោក ម៉ារីស សាងៀមផុង រដ្ឋមន្ត្រីក្រសួងការបរទេស ដើម្បីត្រៀមកំណត់វិធានការតទល់ជាមួយកម្ពុជា រួចហើយលោកស្រីក៏សរសេរក្នុងបណ្តាញសង្គម X បញ្ជាក់ពីគោលជំហររដ្ឋាភិបាលគាំទ្រកងទ័ព ។

កាលពីថ្ងៃទី២០ ខែមិថុនា ឆ្នាំ២០២៥ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ បានត្រឡប់មកទីក្រុងបាងកកវិញ បន្ទាប់ពីធ្វើដំណើរទៅស្រុកណាមយឺន ខេត្តឧប៊ុនរ៉ាជថានី ដើម្បីសូមទោសលោក ប៊ុនស៊ីន ផាកក្លាង មេបញ្ជាការកងទ័ពភូមិភាគទី២ ករណីបែកធ្លាយកិច្ចសន្ទនាតាមទូរស័ព្ទ ។ លោកស្រីបានមកដល់មជ្ឈមណ្ឌលចល័តកងទ័ពជើងគោក ទីក្រុងបាងកក នាពេលម៉ោង៤និង៤០នាទីថ្ងៃដដែល ហើយក៏បានពិភាក្សាជាមួយលោក ម៉ារីស សាងៀមផុង រដ្ឋមន្ត្រីក្រសួងការបរទេស ដែលមករង់ចាំជួបក្នុងបន្ទប់ ។

លោក ម៉ារីស សាងៀមផុង រដ្ឋមន្ត្រីក្រសួងការបរទេស ក៏បានរាយការណ៍ពីស្ថានការណ៍ព្រំដែនកម្ពុជា-ថៃទៅកាន់លោកស្រី ផេថងថាន រួមទាំងកំណត់វិធានការបន្ថែមសម្រាប់តទល់ជាមួយកម្ពុជា ដោយការពិភាក្សាគ្នានេះចំណាយពេលប្រមាណ ៤៥នាទី ។ ក្រោយបញ្ចប់ការពិភាក្សា លោកស្រី ផេថងថាន ពុំបានផ្តល់សម្ភាសន៍ជាមួយក្រុមអ្នកសារព័ត៌មានទេ ហើយក៏ឡើងជិះរថយន្តចាកចេញតែម្តង រីឯលោក ម៉ារីស សាងៀមផុង ក៏ឡើងជិះរថយន្តចាកចេញដូចគ្នា ។

បន្ទាប់មក នាវេលាម៉ោង៦និង៧នាទីល្ងាច លោកស្រី ផេថងថាន បានសរសេរក្នុងបណ្តាញសង្គម X ថា ថ្ងៃនេះ (ថ្ងៃទី២០ ខែមិថុនា) នាងខ្ញុំបានធ្វើដំណើរទៅផ្តល់កម្លាំងចិត្តកងទ័ពដែលបំពេញតួនាទីនៅព្រំដែន ដោយឃើញពីភាពរឹងមាំ និងការលះបង់របស់កងទ័ពគ្រប់រូបដែលរួមគ្នាបំពេញតួនាទីការពារអធិបតេយ្យជាតិ ។ ខ្ញុំដឹងថា វាជាភារកិច្ចលំបាកទាំងអាកាសធាតុ និងនៅឆ្ងាយពីក្រុមគ្រួសារ ប៉ុន្តែកងទ័ពគ្រប់រូបពុំចុះចាញ់ដើម្បីការពារទឹកដីថៃ និងរក្សាសន្តិសុខរបស់ពលរដ្ឋ ។ ក្នុងនាមរដ្ឋាភិបាល ខ្ញុំសូមអរគុណអស់ពីចិត្ត និងបញ្ជាក់ថា រដ្ឋាភិបាលពុំបោះបង់កងទ័ពគ្រប់រូប រដ្ឋាភិបាលនឹងគាំទ្រកងទ័ពដើម្បីឱ្យកងទ័ពបំពេញតួនាទីនៅជួរមុខ ៕