ការបញ្ចេញមតិអវិជ្ជមានបំបាក់ទឹកចិត្តអ្នកខិតខំជួយប្រមូលលុយមូលនិធិជួយដល់ប្រជាជនរងគ្រោះអំពីសង្គ្រាមពិតជាធ្វើឱ្យអ្នកជួយបាក់ស្មារតីណាស់ហើយលែងចង់បន្តការងារមនុស្សធម៌នេះទៀត។ ជាក់ស្តែងដូចជា ប៉ីប៉ី ឌី ជាដើមបាននិយាយម្តងហើយម្តងទៀតរាងចាលរឿងលុយមូលនិធិនិងបាននិយាយថាមិនបានសាច់យកឆ្អឹងព្យួរក។ ឃើញការបាក់ទឹកចិត្តបែបនេះ ជី ដេវីត បានផ្តល់កម្លាំងចិត្តដល់ ប៉ីប៉ី ឌី ឱ្យញែកចេញជាពីរព្រោះមាន១០នាក់ស្អប់១០លាននាក់ស្រលាញ់។

នៅវេលាម៉ោង១យប់ឈានចូលថ្ងៃទី៨ សីហា ប៉ីប៉ី ឌី បានចែករំលែកវីដេអូមួយអមដោយសម្តីថា « ដឹងថាកន្លែងខ្ញុំកំពុងឈរហ្នឹង នៅកន្លែងណាឬអត់?ណ្ហើយ ខ្ញុំអត់ចង់រៀបរាប់ទេតែពេលខ្លះឃើញcmtអវិជ្ជមានម្តងៗ ខ្ញុំស្បថថាឈប់ហើយ ប្រៀបដូចសាច់មិនបានស៊ីយកឆ្អឹងព្យួរក»។ ប៉ីប៉ី ឌី បានបន្ថែមក្នុងផ្នែកបញ្ចេញមតិយោបល់ទៀតថា «ខ្ញុំក៏មិនគិតថានឹងបញ្ចេញរូបភាពនិងវីដេអូនៅកន្លែងហ្នឹងដែរ តែអូសឃើញនៅភ័យមិនទាន់បាត់ផងតែអ្វីដែលខំប្រឹង នៅតែមិនបានល្អក្នុងក្រសែភ្នែកមនុស្សមួយចំនួន…»។

ការបង្ហាញនូវអារម្មណ៍បែបនេះបានធ្វើឱ្យអ្នកគាំទ្រមិត្តរួមអាជីពសិល្បៈជាច្រើនបានផ្តល់កម្លាំងចិត្តទៅកាន់ ប៉ីប៉ី ឌី ក្នុងនោះក៏មានតារាចម្រៀង ជី ដេវីត ផងដែរ។ ជី ដេវីត បានលើកទឹកចិត្ត ប៉ីប៉ី ឌី ថា «បងសុខភាពផ្លូវចិត្តជារឿងសំខាន់ បងដើរមកឆ្ងាយហើយ វែកវាជាពីរទៅកុំឱ្យវាចូលគ្នា ព្រោះវាអាចឱ្យទ្រូងយើងតឹងដកដង្ហើមពិបាក។ ១០នាក់ស្អប់ ១០លាននាក់ស្រលាញ់និងយល់ពីចិត្តយើង ទោះជាចុងក្រោយមានតែម្នាក់ដែលនៅតែយល់ពីយើងច្បាស់ក៏ជាតម្លៃមហាសាលដែរ។ បងធ្វើត្រូវហើយ តែសារជាតិជាមនុស្សនិងធម្មជាតិគឺត្រូវតែមានពីរផ្លូវ ស្អប់ & ស្រលាញ់ , រីករាយ និង ទុក្ខសោក , ទោះថ្នាំព្យាបាលជំងឺមហារីកជា ក៏គង់និងត្រូវប៉ះពាល់ដល់សេរីរាង្គយើងផ្សេងទៀតដែរ។ សូមថែរក្សាសុខភាព ដើរទៅមុខទៀតបង»។

គួរបញ្ជាក់ផងដែរថា ប៉ីប៉ី ឌី ទទួលបានមតិអវិជ្ជមានមួយចំនួនតូចគឺបានវាយប្រហារអំពីលុយមូលនិធិដែលមានចំនួនច្រើននិងមានគំនិតអគតិថា ប៉ីប៉ី ឌី កិបគេងលុយមូលនិធិយកលុយទៅទិញឡានទំនើប។ ប៉ីប៉ី ឌី បានបង្ហាញរូបភាពមួយចំនួនអំពីការជួយជនភៀសសឹកជូនថវិកាទៅកាន់ក្រុមគ្រួសារពលី និងកន្លែងខ្លះទៀតគឺមិនបានបង្ហាញដោយសារតែគិតពីសុវត្ថិភាពពីសត្រូវឈ្លានពាន។ ការទទួលបានទឹកប្រាក់ជាច្រើនពីបងប្អូនមហាគ្រួសារខ្មែរ ប៉ីប៉ី ឌី ថាគឺទទួលបានអារម្មណ៍រងសម្ពាធ ទទួលបន្ទុកធំ៕

លទ្ធផលនៃការពិនិត្យជាមួយគ្រូពេទ្យជំនាញ ក្រោយជួបនឹងអាការឈឺចង្កេះខ្លាំង ពិបាកក្នុងការដើរ និងអង្គុយ គឺលោក ហេង វិសាល ជាអ្នកផលិតមាតិកាសង្គមក៏មានប្រជាប្រិយភាពម្នាក់ កំពុងប្រឈមនឹងបញ្ហានៃជំងឺលៀនឌីសឆ្អឹងខ្នង។

នេះជាការអះអាងរបស់អ្នកនាង ជា ស្រីនា ជាភរិយារបស់លោក វិសាល លើបណ្តាញទំនាក់ទំនងសង្គមផ្ទាល់ខ្លួនរបស់នាងនាថ្ងៃទី៧ ខែសីហា ឆ្នាំ២០២៥។

បើតាម ស្រីនា ទោះស្ថិតក្នុងកាលៈទេសៈលំបាកផ្នែកសុខភាពបែបណាក្តី តែអ្វីដែលប្ដីនាងបារម្ភខ្លាំងនាពេលនេះ គឺមិនមែនសុខភាពឆ្អឹងខ្នងរបស់ខ្លួនឯងទេ។ អ្វីដែលលោក វិសាល ព្រួយខ្លាំង គឺខ្លាចមូលនិធិដែលត្រូវផ្តល់ឲ្យកងទ័ពជួរមុខដែលឈរប្រចាំការតាមគោលដៅនានានៅតំបន់ព្រំដែនរវាងខ្មែរ និងថៃ មិនអាចបានទៅដល់ដៃកងទ័ពបានទាន់ពេលវេលាតាមគម្រោងដែលបានគ្រោងទុក។

ស្រីនា បានបញ្ជាក់បន្ថែមថា តាមរយៈសកម្មភាពបំពេញការងាររបស់ប្តីនាងក្នុងកិច្ចការមនុស្សធម៌អំឡុងពេលប្រមាណ ២សប្តាហ៍កន្លងមកនេះ នាងបានជ្រួតជ្រាបយ៉ាងច្បាស់អំពីទំហំនៃការលះបង់របស់មនុស្សជាច្រើនដែលហត់នឿយយ៉ាងខ្លាំងធ្វើការងារធំៗយ៉ាងស្ងៀមស្ងាត់ តែពួកគេបែរមិនទាមទារការតបស្នងអ្វីទាំងអស់។ សម្រាប់ ស្រីនា ហេង វិសាល គាត់គឺជាវិរបុរសក្នុងចិត្តនាងជានិច្ច។

តាមឯកសារវិជ្ជសាស្ត្រជាច្រើនបានធ្វើការបកស្រាយប្រហាក់ប្រហែលគ្នាអំពីជំងឺលៀនឌីស (herniated discs) ថាជាប្រភេទជំងឺដែលបណ្តាលមកពី ការលើកដាក់របស់ធ្ងន់ៗ រាង្គកាយលើសទំងន់ (ធាត់់) ឥរិយាបថក្នុងការអង្គុយមិនត្រឹមត្រូវក្នុងរយៈពេលយូរ ឬបណ្តាលមកពីរបួសស្នាមដល់ខួរឆ្អឹងខ្នងដែលបានមកពីគ្រោះថ្នាក់នានា ឬសកម្មភាពកីឡាជាដើម។

ឯការព្យាបាល គ្រូពេទ្យជំនាញនឹងធ្វើទៅតាមដំណាក់កាលផ្អែកទៅតាមស្ថានភាពរបស់អ្នកជំងឺ។ វិធីព្យាបាលជំងឺលៀនឌីស មានទាំងការលេបថ្នាំបំបាត់ការឈឺចាប់ ការធ្វើលំហាត់ប្រាណ ការព្យាបាលដោយចលនា ការចាក់ថ្នាំបញ្ចូលក្នុងសរសៃប្រាសាទឆ្អឹងខ្នង ការវះកាត់ដើម្បីកាត់ឆ្អឹងដែលសង្កត់លើសរសៃប្រាទចេញ និងការវះកាត់ខ្នាតតូចដើម្បីបង្ហាប់មីក្រូ ដោយប្រើឧបករណ៍មីក្រូទស្សន៍ជាដើម៕

តារាពហុជំនាញដ៏មានឈ្មោះបោះសំឡេងក្នុងអាជីពសិល្បៈអ្នកនាង ខាត់ សុឃីម បានបង្ហោះសំណេរមួយបង្កឱ្យមានប្រតិកម្មពីអ្នកនាង យូរ៉ា ដែលកន្លងមកនេះអ្នកលក់អនឡាញរូបនេះបានជួយទាហាននិងជនភៀសសឹកជាច្រើន។ ជាមួយគ្នានេះ យូរ៉ា ក៏បានឆ្លើយតបជាមួយនឹងវីដេអូមួយ ខណៈអ្នកនាង ខាត់ សុឃីម ក៏បានចេញវីដេអូមួយដូចគ្នាដើម្បីបញ្ចប់បញ្ហាព្រោះមិនចង់បង្កើតបញ្ហាស្របពេលប្រទេសជាតិមានសន្តិភាពវិញហើយ។

នៅថ្ងៃទី៧ សីហា អ្នកនាង ខាត់ សុឃីម បានបង្ហោះសំណេរមួយថា «បង្ហើយស្តុកចាស់ទំនិញថៃ ១ខែហើយមិនអស់សោះ ! បង្ហើយយូរៗ ថៃប្តូរយន្តហោះពី F-16 ទៅ F-35»។ ការបង្ហោះបែបនេះពីអ្នកនាង ខាត់ សុឃីម បានធ្វើឱ្យមានការជជែកវែកញែកយ៉ាងច្រើន ដោយទស្សនិកជនមួយចំនួនក៏បានគាំទ្រ ចំណែកអ្នកមួយចំនួនទៀតបង្ហាញការខកចិត្តចំពោះសំណេររបស់តារាចម្រៀងជើងចាស់រូបនេះជាពិសេសអ្នកក្នុងចង្កោមលក់អនឡាញ។

អ្នកនាង យូរ៉ា ដែលជាអ្នកលក់អនឡាញរស់នៅខេត្តឧត្តរមានជ័យហើយស្វាមីនិងគ្រួសាររបស់នាងទទួលបានការសរសើរយ៉ាងច្រើនពីទឹកចិត្តដ៏ប្រពៃជួយជនភៀសសឹកនិងទាហានជួរមុខនោះបានប្រតិកម្មចំពោះការលើកឡើងរបស់អ្នកនាង ខាត់ សុឃីម ។ អ្នកនាង យូរ៉ា បានចែករំលែកការបង្ហោះរបស់តារាចម្រៀង ខាត់ សុឃីម ជាមួយនឹងសម្តីថា «មីងឃីមអើយខ្ញុំសុំនិយាយតិចចុះមីង ឡេមុខខ្ញុំយកចូលខែ៤នេះ
ចំនួន៥ម៉ឺនក្លងឱ្យលក់បង្ហើយម៉ានខែនេះអោយអស់ភ្លាមតាមរបៀបណា បើបង្ហើយឱ្យចាក់សាំងដុតចោលអានឹងអាច១ម៉ោងអស់ អឺសនិយាយអ៊ីចឹងទៅឱ្យឆាប់យល់ ហត់ណាស់ មិនជួយយល់គ្នាតែមកផុសឱ្យគ្នាបែបនេះ»។ បន្តិចក្រោយមកអ្នកនាង យូរ៉ា បានចេញវីដេអូមួយដោយបានដាក់ចំណងជើងថា «ស្រុកចប់សង្គ្រាមភ្លាម ចេញមកភ្លាម CEOពួកខ្ញុំខុសអី ទាំងដែលកន្លងមកនេះខ្ញុំជួយបងប្អូនខ្មែរច្រើនណាស់ ខ្ញុំបើកសិប្បកម្មក្នុងស្រុកចាយអស់រាប់ម៉ឺន គ្រាន់តែផលិតផលខ្លះដែរខ្ញុំនាំចូលចង់ឱ្យបងប្អូនតំណាងដែលគាត់កាត់ស្តុកលក់ឱ្យអស់ប៉ុណ្ណោះ ហើយក៏ឈប់នាំចូលប៉ុណ្ណឹង»។

បន្ទាប់ពីអ្នកនាង យូរ៉ា ចេញវីដេអូហើយ អ្នកនាង ខាត់ សុឃីម បានចេញវីដេអូទាំងយប់វិញដោយបានដាក់ចំណងជើងថា «សូមបកស្រាយ ក៏បញ្ចប់ត្រឹមនេះ ព្រោះខ្ញុំអត់ចូលចិត្តបង្កើតបញ្ហាប្រទេសមានសន្តិភាពហើយក៏មកត្រូវឈ្លោះគ្នាឯងនោះទេ»។ នៅក្នុងវីដេអូនេះ អ្នកនាង ខាត់ សុឃីម ថាការបង្ហោះនោះគឺតាមអារម្មណ៍របស់ខ្លួន ហើយការនិយាយនោះមិនបានសម្តៅទៅលើអ្នកណានោះទេ គឺជាការផុសទូទៅពីព្រោះតែពេលខ្លួនដើរផ្សារគឺនៅឃើញមានផលិតផលពួកចោរមកច្រើនមិនចេះអស់ស្តុក។

តារាពហុជំនាញរូបនេះបានបន្តទៀតថា ខ្លួនក៏ជាអ្នកលក់អីវ៉ាន់ជាអ្នកលក់អនឡាញដូចគ្នាមិនមែនត្រឹមតែការច្រៀងនោះទេ ហើយផលិតផលរបស់ខ្លួនគឺមានទាំងកូរ៉េមានទាំងថៃនៅសល់ដូចគ្នា។ តារាចម្រៀងរូបនេះថា បើសិនជាអីវ៉ាន់របស់យើងលក់ប៉ុណ្ណឹងហើយក៏ឈប់លក់ទៀតដែរ។

អ្នកនាង ខាត់ សុឃីម បានបន្តទៀតថាខ្លួនមិនចង់ឈ្លោះបង្កជា Content ល្បីដោយសារតែបែបនេះនោះហើយមុននឹងមានការបង្ហោះខាងលើគឺមានការគិតដែរ និងមានអារម្មណ៍ឈឺចាប់។ អ្នកនាង ខាត់ សុឃីម ថាការនិយាយរបស់ក្មួយ(សម្តៅលើយូរ៉ា) គឺប្រៀបដូចជាចង់មានន័យថានាង ថាឱ្យប៉ុន្តែខ្លួនមិនបាននិយាយថាឱ្យម្ចាស់ប្រ៊េនណានោះទេ គឺនិយាយពីអីវ៉ាន់មកពីស្រុកចោរដែលប្រើប្រាស់ប្រចាំថ្ងៃ។

តារាពហុជំនាញរូបនេះថា មុននឹងនិយាយថាឱ្យខ្លួនគឺគិតទៅដល់បាបផង ហើយខ្លួនមិនខឹងនោះទេ។ មុននឹងបញ្ចប់វីដេអូអ្នកនាង ខាត់ សុឃីម បានផ្តាំផ្ញើថាអ្នកដែលមានឈាម ខ្មែរតែមួយរត់រកគ្នានេះគឺល្អខ្លាំងមែនទែននិងសង្ឃឹមថាបន្តស្រលាញ់គ្នាបែបនេះ សហការជាធ្លុងបែបនេះជារៀងរហូត សូមឱ្យខ្មែររីកចម្រើន។

ងាកទៅកាន់អ្នកលក់អនឡាញ យូរ៉ា វិញក៏បានបង្ហោះសំណេរមួយទៀតថា «ផុសបកស្រាយជាលើកចុងក្រោយឱ្យបងប្អូនស្ងប់ចិត្តមុនចូលគេង Videoខ្ញុំមុននេះមិនបានខឹងទេ Videoខ្ញុំផុសបកស្រាយ ងាយស្តាប់ងាយយល់ អរគុណបងប្អូនរាប់ម៉ឺននាក់ដែលយល់ »។ យូរ៉ា ក៏បានបន្ថែមទៀតថា «កុំបារម្ភ យូរ៉ាមិនចេះសាំច្រើនទេ បកស្រាយរឿងណាក៏ដោយ និយាយតែម្តងចប់ អរគុណអ្នកស្តាប់ហើយយល់គ្រប់គ្នា គេងហើយ ស្អែករបររកស៊ី កូនចូលរៀន ការងារសង្គមនៅច្រើនក្រែងដែល…»៕

លោក អ៊ូ ប៉ុណ្ណារ៉ាត់ ហៅ នាយក្រឹម កំពុងធ្វើឱ្យសាធារណជនបញ្ចេញមតិប្រតិកម្មសាជាថ្មីនៅពេលលោកនៅតែមិនទាន់ឈប់មានគំនិតរើសអើងទៅកាន់អ្នកស្រលាញ់ភេទដូចគ្នា។ មហាជនលើកឡើងថាពេលវេលាជាយូរមកហើយបន្ទាប់ពីសម្របសម្រួលជាមួយ ណុប ដាណេ កាលពីឆ្នាំ២០២៣ប៉ុន្តែតារាកំប្លែងជើងចាស់រូបនេះនៅតែមានគំនិតដដែល។

វាបានក្លាយជាប្រធានបទជជែកវែកញែកនិងប្រតិកម្មយ៉ាងខ្លាំងនៅថ្ងៃទី៧ សីហា នេះបន្ទាប់ពីតារាកំប្លែង នាយក្រឹម បានឆ្លើយតបទៅកាន់គណនីមួយដែលជីករឿងចាស់របស់លោក។ កាលពីថ្ងៃទី៥ នាយក្រឹម បានបង្ហោះរូបមួយសន្លឹកនិងអមដោយអត្ថន័យថាខ្លួនលោករស់នៅលើទឹកដីខ្មែរ មានពូជពង្សជាតិសាសន៍ខ្មែរឆ្លងកាត់សង្គ្រាមបីជំនាន់។ លោកក៏បានបញ្ជាក់ថា ខ្មែរមិនដែលចង់ឈ្លានពានទឹកដីប្រទេសដទៃ មិនមែនល្មោភសង្គ្រាមឡើយ រួមទាំងអំពាវនាវដល់អន្តរជាតិជួយរកយុត្តិធម៌ដល់ប្រទេសកម្ពុជា សុំឱ្យដោះលែងដល់ទាហានខ្មែរ១៨នាក់ដែលថៃចាប់យកទៅត្រឡប់មកមាតុភូមិវិញ។

យ៉ាងណាមិញ នាយក្រឹម បានធ្វើឱ្យមានរឿងចម្រូងចម្រាសកើតឡើងម្តងទៀតអំពីការរើសអើងម្តងទៀតអំពីអ្នកស្រលាញ់ភេទដូចគ្នាឬហៅថាភេទទី៣។ មានគណនីហ្វេកប៊ុកមួយបានបញ្ចេញមតិលើការបង្ហោះរបស់តារាកំប្លែងជើងចាស់រូបនេះថា «said:ភេទទី៣ធ្វើឱ្យបាត់ធនធានមនុស្ស។ ការខម្មិននេះ នាយក្រឹម បានឆ្លើយតបវិញថា «ថៃមានខ្ទើយច្រើនវាបាត់ធនធានយោធាដោយសារវាអ៊ីចឹងហើយបានជាចាញ់ខ្មែរព្រោះទាហានថៃភាគច្រើនខ្ទើយបានជាចាញ់ទ័ពកម្ពុជាយល់»។

ពាក្យសម្តីឆ្លើយតបរបស់នាយក្រឹមអំពីភេទទី៣ នេះហើយបានបង្កឱ្យសាធារណជនបញ្ចេញមតិរិះគន់លោកយ៉ាងចាស់ដៃ។ អ្នកលេងបណ្តាញសង្គមក៏បានលើកទាហានពីររូបរបស់ប្រទេសកម្ពុជាដែលស្រលាញ់ភេទដូចគ្នាប្រយុទ្ធជាមួយសត្រូវ ខណៈទាមទារឱ្យតារាកំប្លែងរូបនេះចេញមុខសូមទោស។ មិនត្រឹមតែប៉ុណ្ណោះអ្នកមួយចំនួនបានបញ្ចេញមតិថាគំនិតរបស់ នាយក្រឹម ដែលរើសអើងភេទទី៣នៅតែដដែលមិនបានធ្វើការផ្លាស់ប្តូរឡើយ។

គួរបញ្ជាក់ផងដែរថាកាលពីឆ្នាំ២០២៣ មហាជនបានរិះគន់យ៉ាងខ្លាំងទៅកាន់តារាកំប្លែងនាយក្រឹម ដែលនិយាយទៅកាន់ ណុប ដាណេ អំពីការបាត់បង់ធនធានមនុស្សមិនចង់ឱ្យមានភេទទី៣ច្រើន។ ក្រោយមក នាយក្រឹម និង ណុប ដាណេ បានជួបពិភាក្សាគ្នាជាមួយប្រធានគណៈកម្មាធិការសិទ្ធិមនុស្ស រួមទាំងប្រធានសមាគមសិល្បករកម្ពុជា។ បន្ទាប់ពីដោះស្រាយគ្នារួចប្រកបដោយភាពវិជ្ជមានតារាកំប្លែង នាយក្រឹម បាននិយាយថាខ្លួនមិនមានចេតនារើសអើងភេទទី៣នោះទេ បើរើសអើងមែនមិនមែនសម្តែងត្រាប់តាមភេទទី៣ឡើយ៕

តារាចម្រៀង ទេព បូព្រឹក្ស បាននិយាយថានាងនិងគ្រួសាររបស់ខ្លួនសួពូជជាមួយនឹងផ្ទះលេខ២រហូតមិនទោរទន់នោះទេព្រោះអ្វីដែលផ្ទះលេខ២ធ្វើដាក់ខ្មែរមិនមែនតែលើកនេះប៉ុន្តែតាំងពីដូនតាមកម្ល៉េះ។ នៅក្នុងកំឡុងពេលនេះ ទេព បូព្រឹក្ស ថាអ្នកណាក៏ឈឺចាប់ដែរ ហើយគ្មានចាំបាច់អ្វីមានសុជីវធម៌ជាមួយនោះទេ។

កាលពីពេលថ្មីៗនេះតារាចម្រៀង ទេព បូព្រឹក្ស បាន Live នៅលើបណ្តាញសង្គមរបស់ខ្លួនណែនាំផលិតផលថ្មីដែលជាស្នាដៃរបស់កូនខ្មែរនិងបញ្ជាក់ថាកូនខ្មែរមិនដែលទាល់ច្រកនោះទេ។ ជាមួយនឹងការ Live នេះ ទេព បូព្រឹក្ស បានបង្ហាញការឈឺចាប់ជាមួយជាតិសាសន៍ផ្ទះលេខ២ និងបាននិយាយម៉ាត់ៗដោយមិនខ្លាចរអាឡើយ។ តារាចម្រៀងរូបនេះបានរម្លឹកពីបទ «Top Of The Lady » ដែលអង្គុយលើជាន់ក្បាលសត្រូវឈ្លានពាន ហើយមិនមែនទើបតែឥឡូវនោះទេដែលផ្ទះលេខ២ឈ្លានពានគឺតាំងពីជំនាន់ដូនតាមកម្ល៉េះ។ ទេព បូព្រឹក្ស ថាគ្មានរឿងអ្វីដែលត្រូវខ្វល់នោះទេ នាងគឺ ទេព បូព្រឹក្ស មានប្តីឈ្មោះ ជី ដេវីត គ្រួសាររបស់នាងទាំងមូលផ្តាំតកូនតចៅ សួពូជជាមួយផ្ទះលេខ២។

ទេព បូព្រឹក្ស ថាបើសិនជាមានជាតិក្រោយ កើតជាតិណាៗសុំកើតមកជាខ្មែរទៀត ចងពារជាមួយនឹងផ្ទះលេខ២ហើយនឹងមិនទន់ទោរជាមួយនោះទេ។ តារាចម្រៀងរូបនេះថាជាតិសាសន៍នេះមិនដឹងជាសន្តានអ្វីនោះទេ។ ជាមួយគ្នានេះដែរ ទេព បូព្រឹក្ស ថានាងមានបទចម្រៀងថ្មីហើយជេរជាតិសាសន៍នេះទៀតប៉ុន្តែមិនទាន់ចេញនោះទេ ហើយនាងក៏មិនខ្វល់អ្វីដែរ បើទោះបីជាពេលនេះផេករបស់នាងជាប់ការព្រមានពីក្រុមហ៊ុនហ្វេកប៊ុកក៏ដោយ។

គួរបញ្ជាក់ផងដែរ ទេព បូព្រឹក្ស និង ជី ដេវីត ត្រូវបានមហាជនសម្លឹងឃើញថាជាចលករដ៏រឹងមាំមួយបញ្ចេញសំឡេងរបស់ខ្លួនយ៉ាងខ្លាំងចំពោះអំពើឈ្លានពានរបស់ប្រទេសថៃមកកាន់ខាងកម្ពុជា។ មិនមែនតែខ្វាយខ្វល់លើបណ្តាញសង្គមប៉ុណ្ណោះទេប៉ុន្តែអ្នកទាំងពីរបានបង្កើតមូលនិធិជួយដល់កងទ័ពនិងជនភៀសសឹកផងដែរដែលជាទង្វើដ៏គួរឱ្យសរសើរ៕