បន្ទាប់ពីប្រកាសពន្យារពេលការប្រគំតន្រ្តីរបស់តារាចម្រៀង G-Dragon នៅឯរាជធានី បាងកក ប្រទេសថៃ ពេលនេះការប្រគំតន្រ្តីរបស់តារាចម្រៀងល្បីឈ្មោះរូបនេះ គឺមិនបានពន្យារពេលទៀតនោះទេប៉ុន្តែគឺបានប្រកាសលុបចោលតែម្តង។

អ្នករៀបចំការប្រគំតន្ត្រីរបស់ G-Dragon AEG Presents Asia បានប្រកាសនៅថ្ងៃទី១០ ខែកក្កដា ថា កម្មវិធីដែលបានគ្រោងទុកដំបូងនៅថ្ងៃទី ២ ខែសីហា នៅពហុកីឡដ្ឋានជាតិ Rajamangala ក្នុងទីក្រុងបាងកក ត្រូវបានលុបចោលដោយសារតែ «កាលៈទេសៈដែល មិនបានមើលឃើញទុកជាមុន»។ ក្រុមហ៊ុនបានចេញធ្វើការសូមទោស ចំពោះការរអាក់រអួល និងការខកចិត្តទៅកាន់អ្នកគាំទ្រ។

កាលពីថ្ងៃទី៧ កក្កដា អ្នករៀបចំកម្មវិធីប្រគំតន្រ្តី G-Dragon បានប្រកាសពីការពន្យារពេលរៀបចំកម្មវិធីនៅក្នុងទីក្រុងបាងកក ប៉ុន្តែពេលនេះហ្វេនត្រូវខកចិត្តទាំងស្រុងព្រោះតែការប្រគំតន្រ្តីត្រូវលុបចោលតែម្តង។
ទោះបីខាងអ្នករៀបចំការប្រគំតន្រ្តីរបស់ G-Dragon បានបង្ហាញហេតុផលថា «កាលៈទេសៈដែលមិនបានមើលឃើញទុកជាមុន» ក្តី ហ្វេនៗមួយចំនួននៅតែគិតថានេះជាហេតុផលមិនគ្រប់គ្រាន់នោះទេ។

ការលុបចោលនេះបានធ្វើឱ្យអ្នកគាំទ្រមានការមិនសប្បាយចិត្តយ៉ាងខ្លាំង ដែលភាគច្រើននៃអ្នកទាំងនោះបានលើកឡើងពីការព្រួយបារម្ភរួចមកហើយអំពីការចាត់ចែងរបស់ Galaxy Corporation នៃដំណើរទេសចរណ៍ជាពិសេសទាក់ទងនឹងការ លុបចោលនៅប្រទេសថៃ។

អ្នកគាំទ្រមួយចំនួនក៏ចោទទៅលើក្រុមហ៊ុនរបស់តារាចម្រៀងរូបនេះដែលរៀបចំមិនបានល្អ ពុំមានបទពិសោធន៍លើវិស័យតន្រ្តី ធ្វើឱ្យការប្រគំតន្រ្តីរបស់សមាជិក Big Bang រូបនេះជួបនៅស្ថានការណ៍រអាក់រអួល។ យ៉ាងណាបើងាកទៅកាន់ស្ថានភាព នយោបាយប្រទេសថៃមានភាពវឹកវរយ៉ាងខ្លាំងអាចធ្វើឱ្យភ្ញៀវទេសចរព្រួយបារម្ភពី សុវត្ថិភាព ដោយសារតែបញ្ហាអសន្តិសុខក្នុងប្រទេស។

ការប្រកាសលុបចោលការប្រគំតន្រ្តីរបស់ G-Dragon ប្រទេសថៃក៏នឹងរងការខាតបង់ដូចគ្នាព្រោះរាល់ពេលមានការប្រគំតន្រ្តីពីតារាល្បីនឹងជួយជំរុញសេដ្ឋកិច្ចជាតិតាមរយៈទស្សនិកជនដែលចូលរួមព្រោះអ្នកចូលរួមនឹងចំណាយលើការស្នាក់នៅ ធ្វើដំណើរ និងចំណាយលើថ្លៃអាហារជាដើម៕

តារាសម្តែងនិងជាតារាទិកតុក Lee Si Young បានធ្វើទស្សនិកជនមានការភ្ញាក់ផ្អើល យ៉ាងខ្លាំងនៅពេលដែលនាងបញ្ជាក់ថា នាងមានផ្ទៃពោះកូនទីពីរ ហើយឪពុករបស់កូន នោះ គឺជាអតីតស្វាមីរបស់នាងដែលនាងបានលែងលះគ្នាកាលពីប៉ុន្មានខែមុន។

ថ្មីៗនេះ សារព័ត៌មានកូរ៉េបានចុះផ្សាយថា តារាសម្តែងស្រី Lee Si Young មានផ្ទៃពោះ និងទទួលការមើលថែទាំមុនពេលសម្រាល។ ឪពុករបស់កូនគឺជាអតីតស្វាមីរបស់នាង ដែលនាងបានលែងលះគ្នាក្នុងខែមីនា ឆ្នាំ ២០២៥។ ក្នុងឆ្នាំ ២០១៨ បន្ទាប់ពីសម្រាល បានកូនដំបូង Lee Si Youngនិងអតីតស្វាមី បានទទួលការបង្កាត់ពូជសិប្បនិម្មិត និងដាក់អំប្រ៊ីយ៉ុងទុកដោយសម្ងាត់ ដោយមានបំណងចង់មានកូនបន្ថែមទៀត។

ទោះជាយ៉ាងណាក៏ដោយ អាពាហ៍ពិពាហ៍របស់ពួកគេបានបែកបាក់គ្នាបន្ទាប់ពី ៨ ឆ្នាំដោយសារតែបុគ្គលិកលក្ខណៈខុសគ្នា។Lee Si Young មានបំណងចង់បានកូនទីពីរយ៉ាងខ្លាំង ហើយមិនបោះបង់ចោលក្តីសង្ឃឹមឡើយ បើទោះបីមានអាយុ ៤៣ ឆ្នាំក៏ដោយ។

កាលពីថ្ងៃទី ៨ ខែកក្កដា ក្រុមហ៊ុនគ្រប់គ្រងរបស់ Lee Si Young គឺ ACE Factory បានចេញមកបញ្ជាក់។ យ៉ាងណាពេលវេលានៃការមានផ្ទៃពោះរបស់តារាស្រីរូបនេះមិនត្រូវបានគេបង្ហើបឱ្យដឹងនោះទេ។ ក្រោយមក Lee Si Young ក៏បានសារភាពដោយផ្ទាល់ថា ការមានគភ៌គឺជាការសម្រេចចិត្ត ផ្ទាល់ខ្លួនរបស់នាង ដោយមិនមានការយល់ព្រម ពីអតីតស្វាមីឡើយ។

«នៅពេលដែលទំនាក់ទំនងរបស់ខ្ញុំជាមួយអតីតស្វាមីរបស់ខ្ញុំបានបញ្ចប់បន្តិចម្តងៗ វាក៏ស្របគ្នានឹងរយៈពេលនៃការរក្សាអំប្រ៊ីយ៉ុងរយៈពេល ៥ ឆ្នាំនឹងបញ្ចប់ ហើយខ្ញុំត្រូវធ្វើការសម្រេចចិត្ត។ខ្ញុំជាអ្នកសម្រេចចិត្តដាក់អំប្រ៊ីយ៉ុងដោយផ្ទាល់មុនពេលលុបចោល។ បើទោះជាភាគីម្ខាងទៀតមិនយល់ព្រមក៏ដោយ ខ្ញុំនឹងទទួលខុសត្រូវទាំងស្រុងចំពោះការសម្រេចចិត្តរបស់ខ្ញុំ»។

ដំបូងឡើយអតីតស្វាមីរបស់ Lee Si Young បានជំទាស់នឹងរឿងនេះ។ ប៉ុន្តែ Lee Si Young មិនបានផ្លាស់ប្តូរជំហររបស់នាងទេ។ នាងបានទៅមន្ទីរពេទ្យតែម្នាក់ឯង ធ្វើ IVF ហើយមានផ្ទៃពោះកូនទីពីរ ដោយគ្មានការយល់ព្រមពីអតីតស្វាមី។

អតីតស្វាមីរបស់តារាស្រីរូបនេះបាននិយាយថា លោកប្រឆាំងនឹងការមានកូនទៀតព្រោះពួកគេបានលែងលះ។ ទោះជាយ៉ាងណាពេលនេះកូនកើតមក លោកនឹងបំពេញតួនាទីជាឪពុក។

Lee Si Young កើតក្នុងឆ្នាំ ១៩៨២ ជាអ្នកប្រដាល់អាជីព និងជាតារាសម្ដែងកូរ៉េ។ នាងបានចូលប្រឡូកក្នុងវិស័យសិល្បៈក្នុងឆ្នាំ ២០០៨។ តារាសម្តែងរូបនេះបានសាងភាព ល្បីល្បាញក្នុងរឿងភាគទូរទស្សន៍ដ៏ល្បី «Boys Over Flowers » ឆ្នាំ២០០៩ និងរឿង «Sweet Home»ឆ្នាំ២០២៤ ។

នៅឆ្នាំ ២០១៧ តារាសម្តែងរូបនេះ បានរៀបការនៅកំពូលនៃអាជីពរបស់នាង។ ស្វាមីរបស់នាងនៅពេលនោះជាអ្នកជំនួញដ៏ល្បីឈ្មោះក្នុងអាជីវកម្មភោជនីយដ្ឋាន។ Lee Si Young តែងតែចែករំលែកអំពីជីវិតដ៏ប្រណីតរបស់នាងនៅលើទំព័រផ្ទាល់ខ្លួនរបស់នាង។

តារាសម្តែងវ័យ ៤៣ឆ្នាំ ធ្លាប់បានធ្វើឱ្យមហាជនភ្ញាក់ផ្អើលជាខ្លាំង នៅពេលដែលនាងបង្ហោះរូបថតដែលនាងយកកូនប្រុសដំបូងទៅសិក្សានៅសាលាអន្តរជាតិ មួយដែលគេស្គាល់ថាជាសាលា «អភិជន» ដែលមានតម្លៃសិក្សាជាង ៧០០លានវ៉ុន។

ទោះបីជារៀបការជាមួយអ្នកជំនួញក៏ដោយ Lee Si Young នៅតែឯករាជ្យផ្នែកហិរញ្ញវត្ថុ ដោយសារប្រភពចំណូលចម្បងរបស់នាងពីកិច្ចសន្យាសម្តែង និងពាណិជ្ជកម្ម៕

ទំនាក់ទំនងរវាង Zhao Lusi និងក្រុមហ៊ុនគ្រប់គ្រងហាក់បង្ហាញសកម្មភាព មិនស៊ីសង្វាក់គ្នាធ្វើឱ្យទស្សនិកជនសង្ស័យថាភាគីទាំងពីរកំពុងតែតានតឹងដាក់គ្នា។ ទោះយ៉ាងណាអ្នកគាំទ្ររបស់តារាស្រីរូបនេះសង្ឃឹមថានាងនឹងបញ្ចប់កុងត្រាជាមួយក្រុមហ៊ុនប្រកបដោយសន្តិវិធី។

ថ្មីៗនេះ អ្នកគាំទ្របានរកឃើញថា Zhao Lusi បានលុបការផ្ទៀងផ្ទាត់របស់ក្រុមហ៊ុនគ្រប់គ្រងចេញពីគណនី Xiaohongshu របស់នាង។ នេះបានធ្វើឱ្យមានការសង្ស័យអំពីការបញ្ចប់កិច្ចសន្យារវាងនាងនិង Galaxy Cool Entertainment) ហៅកាត់ថា GC Entertainment (។ភ្លាមៗនោះ សារព័ត៌មានដ៏ល្បីមួយក្នុងប្រទេសចិនបានទាក់ទងទៅក្រុមហ៊ុនខាងលើដើម្បីបំភ្លឺព័ត៌មាននេះ។ ក្រុមហ៊ុនបានឆ្លើយតបថា៖ «មិនមានការបញ្ចប់កុងត្រាជាមួយ Zhao Lusi ទេសូមអរគុណ»។ដូច្នេះហើយអាចបញ្ជាក់បានថាតារាស្រីរូបនេះ នៅតែដំណើរការក្រោមការផលិត GC Entertainment។

កន្លងមកមានប្រភពជាច្រើនបានបង្ហើបថា Zhao Lusi ចង់បញ្ចប់កុងត្រា និងស្វែងរកគោលដៅថ្មី។ ទោះជាយ៉ាងណាក៏ដោយ GC Entertainment មិនងាយនឹងបោះបង់ Zhao Lusi ទេ ព្រោះនាងគឺជាអ្នកសិល្បៈដ៏ល្បីល្បាញម្នាក់នៅក្រោមការគ្រប់គ្រង របស់ពួកគេ។ឧបទ្ទវហេតុរវាង Zhao Lusi និងក្រុមហ៊ុនគ្រប់គ្រងរបស់នាងកំពុងធ្វើឱ្យមាន ការរំជើបរំជួលនៅលើបណ្តាញសង្គម សូម្បីតែឈានដល់ការស្វែងរក និងពិភាក្សានៅលើ Weibo ក៏ដោយ។ អ្នកគាំទ្រតួឯកស្រីរូបនេះ សង្ឃឹមថានាងអាចបញ្ចប់ទំនាក់ទំនងជាមួយក្រុមហ៊ុនគ្រប់គ្រងដោយសន្តិវិធី ហើយអាចត្រឡប់មកសម្តែងវិញក្នុងពេលដ៏ខ្លីខាងមុខនេះ។

ចុងក្រោយនេះ Zhao Lusi ថ្វីដ្បិតតែមិនបានសម្តែងក្នុងភាពយន្តក៏ដោយ ក៏នៅតែចូលរួមក្នុងសកម្មភាពកម្សាន្ត និងទទួលយកការផ្សាយពាណិជ្ជកម្មឱ្យ ម៉ាកយីហោផងដែរ។ តារាស្រីរូបនេះនឹងបង្ហាញមុខក្នុងទស្សនាវដ្តី Elle ក្នុងពេលឆាប់ៗនេះ។ គម្រោង «Love’s Ambition» ជាមួយ William Chan ក៏នឹងចាក់ផ្សាយក្នុងពេលឆាប់ៗនេះផងដែរ។ មនុស្សជាច្រើនបានបញ្ជាក់ថា ពាក្យចចាមអារ៉ាមដែលថា Zhao Lusi ត្រូវបានហាមឃាត់មិនពិតទេ។

Zhao Lusi កើតនៅឆ្នាំ ១៩៩៨ នៅទីក្រុង Chengdu ប្រទេសចិន។ បន្ទាប់ពីមាន ជម្លោះជាមួយអតីតក្រុមហ៊ុនគ្រប់គ្រងរបស់នាង Zhao Lusi បានចូលរួមជាមួយ GC Entertainment ក្នុងឆ្នាំ ២០១៦ ហើយចាប់ផ្តើមល្បីល្បាញ បន្តិចម្តងៗ។
ក្នុងអំឡុងពេលដំណើរការនេះ មានជម្លោះតូចតាចដែលជៀសមិនរួចរវាង Zhao Lusi និងក្រុមហ៊ុន។ ទោះជាយ៉ាងណាក៏ដោយវាមិនអាចបដិសេធបានទេថា GC Entertainment ក៏បាននាំយកគម្រោងល្អដល់នាងផងដែរ៕