ប្រទេសថៃ ៖ សារព័ត៌មានថៃ Matichon រាយការណ៍ថា កាលពីថ្ងៃទី២៦ ខែមិថុនា ឆ្នាំ២០២៥ លោកស្រី ផេថងថាន ស៊ីណាវ៉ាត់ បានទៅត្រួតពិនិត្យស្ថានការណ៍នៅច្រកព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ (ឬច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ) ក្រោយពីកងទ័ពថៃបិទព្រំដែនជាមួយកម្ពុជាទាំងអស់ ។ នាយករដ្ឋមន្ត្រីថៃបានជជែកជាមួយពលរដ្ឋ និងអាជីវករនៅបរិវណព្រំដែន ពលរដ្ឋមួយចំនួនផ្តល់កម្លាំងចិត្ត ពលរដ្ឋថៃខ្លះបណ្តេញចេញ ខណៈអាជីវករលក់ដូរផ្សាររុងក្លឿ នាំគ្នាតវ៉ាជាមួយនាយករដ្ឋមន្ត្រីថា ការបិទព្រំដែនបានឃ្លងលឹក ធ្វើឱ្យពិបាកលក់ដូរយ៉ាងខ្លាំង បាត់បង់ចំណូលរហូតដាច់ពោះស្លា.ប់ ពិបាកជាងពេលមានបញ្ហាប្រាសាទព្រះវិហារ ។

នាវេលាម៉ោង១១និង៤៥នាទី ថ្ងៃទី២៦ ខែមិថុនា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ រួមទាំងមន្ត្រីមួយចំនួនបានធ្វើដំណើរមកដល់ច្រកព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ ដើម្បីផ្តល់កម្លាំងចិត្តដល់កងទ័ព និងមន្ត្រីក្នុងតំបន់ រួមទាំងស្តាប់អភិបាលខេត្តស្រះកែវ រាយការណ៍ពីស្ថានការណ៍ទូទៅ ។ លោកស្រី ផេថងថាន និយាយថា ពលរដ្ឋនៅស្រះកែវ អាចសម្របខ្លួនបានជាមួយការបិទព្រំដែន ប៉ុន្តែអាជីវកររងផលប៉ះពាល់ ។

បន្ទាប់មក លោកស្រី ផេថងថាន ក៏បានដើរទៅជួបពលរដ្ឋដែលមករង់ចាំទទួលស្វាគមន៍ និងប្រគល់ផ្កាផ្តល់កម្លាំងចិត្តឱ្យនាយករដ្ឋមន្ត្រីតស៊ូបន្តទៀត ។ ប៉ុន្តែនៅបរិវេណមុខច្រកព្រំដែនបានឃ្លងលឹ មានពលរដ្ឋថៃប្រមាណ ៣០នាក់ បានស្រែកបណ្តេញលោកស្រី ផេថងថាន និងកាន់ស្លាកសរសេរថា «នាយករដ្ឋមន្ត្រីលក់ជាតិ» «នាយករដ្ឋមន្ត្រីបេះដូងខ្មែរ» ។

ចំណែកក្រុមអាជីវករថៃបានមករង់ចាំរថយន្តរបស់លោកស្រី ផេថងថាន អំពាវនាវឱ្យថៃបន្ធូរបន្ថយវិធានការរឹតបន្តឹងព្រំដែន ដើម្បីឱ្យអាជីវករងាយស្រួលលក់ដូរ ដោយសារអាជីវករនៅផ្សាររុងក្លឿ និងលក់នៅបរិវេណព្រំដែនបានឃ្លងលឹក រងផលប៉ះពាល់ខ្លាំង ពុំអាចទិញ-លក់ទំនិញជាមួយពលរដ្ឋខ្មែរ ។ អាជីវករប្រាប់ថា ពួកគេយល់ពីបញ្ហាសន្តិសុខ ប៉ុន្តែពេលមានបញ្ហាប្រាសាទព្រះវិហារកន្លងមក គ្មានការបិទព្រំដែនជាប់កម្ពុជាបែបនេះទេ ។ ពេលនេះ ស្ថានការណ៍ធ្ងន់ធ្ងរជាងពេលមានបញ្ហាប្រាសាទព្រះវិហារ ពលរដ្ឋលំបាកខ្លាំង សូមលោកស្រី ផេថងថាន បើកព្រំដែនឱ្យរថយន្តដឹកទំនិញអាចចេញ-ចូលបាន ។

ក្រុមអាជីករថៃនិយាយថា ពេលនេះ ពួកខ្លួនលំបាកបំផុតគ្មានប្រាក់ចំណូល ផ្ទះក៏ត្រូវបង់រំលស់ និងរថយន្តបង់រំលស់ ។ ហេតុនេះ នាយករដ្ឋមន្ត្រីត្រូវសម្រួលឱ្យរថយន្តដឹកទំនិញអាចឆ្លងដែនបានខ្លះៗ ។ អាជីវករថៃលក់ដូរនៅទីនេះអាចស្តាប់ភាសាខ្មែរបានទាំងអស់ គឺការបិទព្រំដែនពុំធ្វើឱ្យពលរដ្ឋខ្មែរស្លាប់ទេ ប៉ុន្តែពលរដ្ឋថៃស្លាប់ ពីព្រោះនៅកម្ពុជាមានការលក់ដូរទំនិញធម្មតា ពុំខ្វះខាតទំនិញទេ ។

ការបិទព្រំដែនជាឯកតោភាគីពីសំណាក់កងទ័ពថៃក្រោមហេតុផលបង្ក្រាបឧក្រិដ្ឋកម្មឆ្លងដែន និងការឆបោកតាមអនឡាញ ធ្វើឱ្យពលរដ្ឋ និងអាជីវករថៃលក់ដូរនៅព្រំដែនលំបាកយ៉ាងខ្លាំង មិនថាការលក់ដូរនៅព្រំដែនបានឃ្លងលឹក ការលក់ដូរនៅផ្សាររុងក្លឿ, ផ្សារឆងចម នៅច្រកព្រំដែនអូរស្មាច់-ឆងចម និងច្រកជប់គគី-សាយតាគូ ។ លើសពីនេះ រថយន្តដឹកទំនិញថៃរាប់រយគ្រឿងដែលបម្រុងដឹកទំនិញមកកម្ពុជា បានកកស្ទះនៅព្រំដែនធ្វើឱ្យឈ្មួញថៃខាតបង់ដើមទុន និងសំណូមពរទៅនាយករដ្ឋមន្ត្រី បិទព្រំដែនត្រឹមរយៈពេលខ្លី ៕

ប្រទេសថៃ ៖ ពលរដ្ឋថៃបានចែកចាយវីដេអូមួយក្នុងបណ្តាញសង្គម និងចោទប្រកាន់ថា គ្រូមន្តអាគមខ្មែរធ្វើអំពើដាក់មេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ដោយគ្រូមន្តអាគមខ្មែរយករូបថតមេបញ្ជាការកងទ័ព និងរូបថតមន្ត្រីជាន់ខ្ពស់ថៃជាច្រើនរូបមកដាក់ក្នុងពិធីសូត្រធ្វើអំពើ ។ ពលរដ្ឋថៃថា ការប្រើប្រាស់មន្តវិជ្ជាខ្មៅបែបនេះពុំអាចធ្វើអ្វីលោក ប៊ុនស៊ីន ផាកក្លាង បានទេ ពីព្រោះលោកមានបន្តោងព្រះ ។ នេះបើតាមការផ្សាយរបស់សារព័ត៌មាន Thairath កាលពីថ្ងៃទី២៦ ខែមិថុនា ឆ្នាំ២០២៥ ។

បន្ទាប់ពីពលរដ្ឋថៃចែកចាយវីដេអូនេះក្នុងបណ្តាញសង្គម ក៏មានការបញ្ចេញយោបល់យ៉ាងច្រើន មតិខ្លះថា នេះគ្រាន់តែជាជំនឿប៉ុណ្ណោះ ខណៈមតិខ្លះទៀតថា បើពលរដ្ឋថៃរួមកម្លាំងគ្នានឹងឈ្នះគ្រូមន្តអាគមខ្មែរ ពីព្រោះថៃមានមន្តអាគមជាច្រើនប្រភេទ ។ មតិខ្លះថា ហេតុអ្វីគ្រូមន្តអាគមខ្មែរមិនមើលបន្តោងខ្សែព្រះរបស់លោកមេបញ្ជាការកងទ័ព តើអាចតទល់បានឬអត់?

ពលរដ្ឋថៃផ្សេងទៀតបារម្ភពីការយករូបថតលោក ប៊ុនស៊ីន ផាកក្លាង និងរូបថតមន្ត្រីជាន់ខ្ពស់ថៃមកសូត្រក្នុងពិធីរបស់គ្រូមន្តអាគមខ្មែរ និងស្នើឱ្យគ្រូមន្តអាគមដ៏ល្បីនៅប្រទេសថៃ ឈ្មោះ គ្រូផ្លា មកទប់ទល់វិញ ។ អ្នកស្រឡាញ់ចូលចិត្តលោក ប៊ុនស៊ីន ផាកក្លាង និយាយថា ខ្មែរពុំអាចធ្វើអ្វីលោកបានទេ ពីព្រោះលោកជាមនុស្សល្អ មានទេវតាថែរក្សា ។

ក្រោយពីមានការចែកចាយវីដេអូគ្រូមន្តអាគមខ្មែរធ្វើពិធីលើរូបថតនោះ លោក ប៊ុនស៊ីន ផាកក្លាង និយាយថា ពលរដ្ឋថៃពុំបាច់បារម្ភពីគ្រូមន្តអាគមខ្មែរធ្វើអំពើដាក់លោកទេ លោកមិនខ្លាច ខ្មែរធ្វើអ្វីលោកពុំបានឡើយ ។

បើតាមការផ្សាយរបស់សារព័ត៌មានថៃ Khaosod គឺលោក ប៊ុនស៊ីន ផាកក្លាង និយាយថា ពុំចាប់អារម្មណ៍នឹងការធ្វើមន្តវិជ្ជាខ្មៅ ប៉ុន្តែលោកបានមកធ្វើបុណ្យថ្វាយព្រះពុទ្ធរូបនៅវត្តណូនសុវណ្ណនិមិត្ត ខេត្តឧត្តរថានី ហើយមានពលរដ្ឋថៃជាច្រើនមកផ្តល់កម្លាំងចិត្តលោក ។

នៅវត្តណូនសុវណ្ណនិមន្ត មេបញ្ជាការកងទ័ពភូមិភាគទី២ បាននិយាយមកកាន់សារព័ត៌មានថា កន្លងមក ពលរដ្ឋខ្មែរបានទៅច្រៀងចម្រៀងនៅប្រាសាទតាក្របី ដែលកម្ពុជា និងថៃបានព្រមព្រៀងមិនឱ្យពលរដ្ឋប្រទេសទាំងពីរបង្ហាញអត្តសញ្ញាណរបស់ខ្លួន ហើយភាគីថៃក៏ស្នើឱ្យពលរដ្ឋខ្មែរឈប់ច្រៀងនៅប្រាសាទតាក្របី ។ រីឯរឿងគ្រូមន្តអាគមខ្មែរ ពលរដ្ឋថៃពុំបាច់បារម្ភពីលោកទេ ខ្មែរធ្វើអ្វីលោកពុំបានឡើយ ៕

ប្រទេសថៃ ៖ កាលពីថ្ងៃទី២៥ ខែមិថុនា ឆ្នាំ២០២៥ សារព័ត៌មានថៃ Thai Press រាយការណ៍ថា លោកស្រី ឆ ផាន់នីកា អតីតសមាជិកសភាតំណាងរាស្ត្រមកពីគណបក្សអនាគតថ្មី បារម្ភពីស្ថានការណ៍ព្រំដែនកម្ពុជា-ថៃកាន់តែតានតឹង ក្រោយពីនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ប្រគល់អំណាចឱ្យមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ហើយមេបញ្ជាការរូបនេះនិយាយថា បើបា.ញ់មក លោកនឹងបា.ញ់វិញ ពុំរង់ចាំការបញ្ជាពីនាយករដ្ឋមន្ត្រី ។

លោកស្រី ឆ ផាន់នីកា អតីតសមាជិកសភាតំណាងរាស្ត្រមកពីគណបក្សអនាគតថ្មី បាននិយាយក្នុងកម្មវិធីមួយឈ្មោះ «បុគ្គលល្បីៗអង្គុយជជែកគ្នា» ថា មេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ប្រកាសរួចហើយ គឺបើបា.ញ់មក លោកនឹងបា.ញ់វិញ ពុំរង់ចាំការបញ្ជាពីនាយករដ្ឋមន្ត្រី ។ ស្ថានការណ៍បច្ចុប្បន្ន គួរឱ្យបារម្ភណាស់ ក្រោយពីលោកស្រី ផេថងថាន ប្រគល់អំណាចឱ្យកងទ័ពជាអ្នកសម្រេចចិត្តរឿងព្រំដែន វាអាចឈានដល់ការប៉ះទង្គិចគ្នា ។

លោកស្រីមានជំនឿលើសមត្ថភាពកងទ័ពក្នុងការការពារទឹកដីថៃ ប៉ុន្តែចង់សួរថា តើពីដំបូង កម្ពុជា និងថៃមានជម្លោះគ្នារឿងអ្វី? ពេលនេះ គ្រប់គ្នាភ្លេចអស់ហើយ រហូតដល់ជម្លោះរាលដាលខ្លាំង ។ លោកស្រីសួរថា តើមេបញ្ជាការកងទ័ព និងមេបញ្ជាការរងកងទ័ពមែនទេដែលបាននិយាយថា គ្មានមេបញ្ជាការកងទ័ពណាចង់ឱ្យកូនទាហានទៅស្លាប់ ឬរងរបួសទេ ពីព្រោះភរិយា និងកូនៗរបស់កូនទាហាននៅផ្ទះ ហើយយើងជាមេបញ្ជាការកងទ័ពទៅប្រាប់ក្រុមគ្រួសារកូនទាហានពីព័ត៌មានសោកសៅ ។

ហេតុនេះ លោកស្រីចង់លោកមេបញ្ជាការកងទ័ពនឹកឃើញនូវពាក្យសម្តីរបស់ខ្លួនឡើងវិញថា ស្ថានការណ៍ពេលនេះ មិនមែនជាការប៉ះទង្គិចគ្នា និងកើតសង្គ្រាមទេ ។ ប៉ុន្តែលោក ប៊ុនស៊ីន ផាកក្លាង ខ្លួនឯងជាអ្នកធ្វើឱ្យឈានទៅរកការប៉ះទង្គិចគ្នាដោយសារការបិទព្រំដែន ១០០% ។

លោកស្រីបន្តថា មិនមែនថៃពុំតស៊ូទេ ប៉ុន្តែតើថៃតស៊ូជាមួយប្រទេសជិតខាងដើម្បីអ្វី ក្នុងគោលដៅអ្វី? បច្ចុប្បន្ន ថៃបិទព្រំដែនទាំងអស់ជាប់កម្ពុជា គឺថៃល្មើសនឹងច្បាប់អន្តរជាតិ និងធ្វើឱ្យថៃចាញ់ប្រៀបនៅលើពិភពលោក ។ សមរភូមិនេះ ការពិត ពុំមែនជាសមរភូមិនៅព្រំដែនទេ ប៉ុន្តែអ្វីដែលថៃធ្វើ គឺធ្វើឱ្យខូចឈ្មោះរបស់ខ្លូន ។

គួរបញ្ជាក់ថា អ្នកនយោបាយថៃជាច្រើនរូបពុំគាំទ្រឱ្យលោកស្រី ផេថងថាន ប្រគល់អំណាចឱ្យកងទ័ពទាំងស្រុងទេ ពីព្រោះកងទ័ពមានតួនាទីត្រឹមតែការពារប្រទេសប៉ុណ្ណោះ កងទ័ពពុំដឹកនាំប្រទេស គ្មានសិទ្ធិជ្រៀតជ្រែកកិច្ចការនយោបាយ និងពុំមែនជាអ្នកសម្រេចបិទព្រំដែនកម្ពុជា-ថៃ ។ ការបិទព្រំដែនជាឯកតោភាគីពីសំណាក់កងទ័ពថៃ គឺជាការល្មើសច្បាប់អន្តរជាតិ និងបំបិទសិទ្ធិការធ្វើដំណើរចេញ-ចូលរបស់ពលរដ្ឋ ដែលកម្ពុជាគួរតែលើកឡើងពីបញ្ហាថៃបិទព្រំដែនប្រាប់ទៅបណ្តាប្រទេសអាស៊ាន ៕

តាណាវ៉ាត់ ប្រធានកម្មវិធី Miss Grand International កាន់តែគគ្លើនម្តងហើយម្តងទៀតមកកាន់ថ្នាក់ដឹកនាំប្រទេសកម្ពុជាគឺសម្តេចតេជោ ហ៊ុន សែន។ ម្តងជាពីរដងបុគ្គលនេះបានប្រើជាសំណេរប៉ុន្តែលើកនេះបានបង្ហោះរូបសម្តេច តេជោ ផ្ទាល់ជាមួយនឹងលោក ថាក់ស៊ីន ដោយចង់ផលិតជាខ្សែភាពយន្តរវាងអ្នកទាំងពីរ។

នៅថ្ងៃទី២៧ ខែមិថុនា តាណាវ៉ាត់ បានបង្ហោះរូបមួយសន្លឹកដែលជារូបភាពសម្តេចតេជោ ហ៊ុន សែន ប្រធានព្រឹទ្ធសភា និងលោក ថាក់ ស៊ីន ជាឪពុករបស់នាយករដ្ឋមន្រ្តីថៃបច្ចុប្បន្ន ដោយបានផ្លែផ្កថា សម្តេចតេជោ ហ៊ុនសែន និងលោក ថាក់ ស៊ីន កំពុងតែងរងក់ដាក់គ្នា ហើយបុគ្គលនេះចង់ផលិតជាខ្សែភាពយន្តស្នេហារវាងបុរសម្នាក់និងអ៊ំអ្នកជិតខាង។

ការបង្ហោះសំណេររបស់តាណាវ៉ាត់ គេបានឃើញអ្នកលេងបណ្តាញសង្គមថៃមួយចំនួនបញ្ចេញមតិផ្លែផ្កាជាច្រើនមកកាន់ថ្នាក់ដឹកនាំកម្ពុជានិងលោកថាក់ស៊ីន។

វាមិនមែនជាលើកទី១នោះទេដែល តាណាវ៉ាត់ ប្រធានកម្មវិធី MGI ប្រើសម្តីមិនសមរម្យ ប្រមាថមកកាន់សម្តេចតេជោ ហ៊ុន សែន ។ បុគ្គលនេះបានបង្ហោះសំណេរម្តងជាពីរដង ខណៈចុងក្រោយនេះបានបង្ហោះរូបសម្តេចតេជោ ហ៊ុន សែន ផ្ទាល់តែម្តង។ ការប្រមាថមកកាន់ថ្នាក់ដឹកនាំកម្ពុជាពីសំណាក់ តាណាវ៉ាត់ នេះបានធ្វើឱ្យអ្នកលេងបណ្តាញសង្គមបញ្ចេញប្រតិកម្មថែមទាំងគំរាមទៅដល់អ្នកដែលមានបំណងទិញអាជ្ញាប័ណ្ណកម្មវិធីនេះមកកាន់ប្រទេសកម្ពុជាថែមទៀត។

គួរបញ្ជាក់ផងដែរថា តាណាវ៉ាត់ ជារឿយៗបានបង្ហោះសំណេររបស់ខ្លួនជុំវិញប្រទេសថៃមានបញ្ហាព្រំដែនជាមួយកម្ពុជា ដូចជា កុំឱ្យរដ្ឋាភិបាលរបស់ខ្លួនធ្វើតាមការគំរាមកំហែងរបស់សម្តេចតេជោ ហ៊ុន សែន។ សំណេរមួយទៀតបន្ទោសដល់នាយករដ្ឋមន្រ្តីថៃ ផែថងថាន ឱ្យជនជាតិថៃសាមគ្គីគ្នាប៉ុន្តែចូលដៃជើងជាមួយសម្តេច ហ៊ុន សែន រួមទាំងការប្រមាថវិធីសាស្រ្តការដឹកនាំរបស់សម្តេចតេជោ និងចុងក្រោយនេះចង់ថតរឿងស្នេហារវាងសម្តេចនិងលោក ថាក់ស៊ីន៕

ប្រទេសថៃ ៖ សមាជិកសភាតំណាងរាស្ត្រមកពីគណបក្សប្រជាជន និងជាអតីតនាំពាក្យគណបក្សកាវក្លៃ លោក វិរ៉ូត លក្ខណាអាឌិសន បានស្នើទៅរដ្ឋាភិបាលរបស់លោកស្រី ផេថងថាន ស៊ីណាវ៉ាត់ កុំរវល់តែឈឺចិត្តជាមួយកម្ពុជា និងព្យាយាមទប់ទល់តែម្យ៉ាង រដ្ឋាភិបាលគួរតែកំណត់វិធានការផ្តល់ជំនួយដល់ពលរដ្ឋ-អាជីវករថៃនៅព្រំដែន ពីព្រោះនាយករដ្ឋមន្ត្រីមានអំណាចអនុម័តថវិកាកណ្តាលភ្លាមៗ ហើយ​គួរធ្វើយ៉ាងណាឱ្យកម្ពុជាចរចាជាមួយថៃ ។ លោកបញ្ជាក់ថា យើងធ្វើដាក់ប្រទេសជិតខាង ប៉ុន្តែយើងអាចរងផលប៉ះពាល់ខ្លួនឯងច្រើនជាង ។ នេះបើតាមការផ្សាយរបស់សារព័ត៌មានថៃ កាលពីថ្ងៃទី២៤ ខែមិថុនា ឆ្នាំ២០២៥ ។

លោក វិរ៉ូត លក្ខណាអាឌិសន សមាជិកសភាតំណាងរាស្ត្រមកពីគណបក្សប្រជាជន និយាយថា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ផ្តោតតែលើការទប់ទល់ជាមួយកម្ពុជាតែម្យ៉ាង និងពុំគិតពីផលប៉ះពាល់មកលើពលរដ្ឋ វាជាទង្វើពុំត្រឹមត្រូវ ។ ខ្ញុំសង្កេតឃើញថា ក្រោយពីការបែកធ្លាយកិច្ចសន្ទនាមក លោកស្រី ផេថងថាន លែងជាសាច់ញាតិល្អជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជាទៀតហើយ ប៉ុន្តែនៅមានក្តីបារម្ភពីរឿងប្រាក់ដែលពាក់ព័ន្ធនឹងលោកស្រី ឬត្រកូលលោកស្រី ។

ពេលផ្តល់សម្ភាសន៍ជាមួយក្រុមសារព័ត៌មាន លោក វិរ៉ូត លក្ខណាអាឌិសន សួរថា តើថៃមានគោលបំណងសំខាន់អ្វីក្នុងការកំណត់វិធានការដាក់សម្ពាធសេដ្ឋកិច្ចប្រទេសជិតខាង? ថៃគួរធ្វើយ៉ាងណាឱ្យកម្ពុជាចរចាជាមួយថៃ បើថៃគ្មានវិធានការផ្តល់ជំនួយដល់ពលរដ្ឋ និងអាជីវកររបស់ខ្លួននៅព្រំដែនទេនោះ ថៃអាចរងផលប៉ះពាល់ខ្លួនឯងច្រើនជាង ដោយសារថៃធ្វើដាក់ប្រទេសជិតខាង ។ ដូច្នេះ នាយករដ្ឋមន្ត្រីថៃដែលមានអំណាចអនុម័តថវិកាកណ្តាលត្រូវតែមើលពីបញ្ហាឱ្យគ្រប់ជ្រុងជ្រោយ ពេលនេះ មិនត្រូវផ្តោតតែលើការឈឺចិត្តជាមួយកម្ពុជា និងព្យាយាមទប់ទល់តែម្យ៉ាងទេ ។

យើងចង់បានមេដឹកនាំប្រទេសដែលសម្រេចចិត្តដោះស្រាយបញ្ហាយ៉ាងសមហេតុផល និងពិចារណាពីផលប៉ះពាល់ឱ្យបានគ្រប់ជ្រុងជ្រោយ និងផលប៉ះពាល់គ្រប់ផ្នែក ។ បើមានភាពចាំបាច់ត្រូវបិទព្រំដែនដើម្បីដាក់សម្ពាធសេដ្ឋកិច្ចកម្ពុជា ឬដាក់សម្ពាធលើមេដឹកនាំកម្ពុជា នាយករដ្ឋមន្ត្រីថៃត្រូវតែគិតថា តើការបិទព្រំដែនប៉ះពាល់ដល់ឈ្មួញថៃដែរឬទេ? ប៉ុន្តែនាយករដ្ឋមន្ត្រីថៃផ្តោតតែលើការទប់ទល់ជាមួយកម្ពុជាតែម្យ៉ាង ពុំគិតពីផលប៉ះពាល់មកលើពលរដ្ឋ ។

គួរបញ្ជាក់ថា លោកស្រី ផេថងថាន បានចោទប្រកាន់ និងលាបពណ៌មកលើកម្ពុជា គឺជាទីតាំងឧក្រិដ្ឋកម្មឆ្លងដែន និងការឆបោកតាមអនឡាញដ៏ធំនៅលើពិភពលោក ទើបធ្វើឱ្យថៃកំណត់វិធានការរឹតបន្តឹងការចេញ-ចូលព្រំដែន កាត់ផ្តាច់អគ្គិសនី និងបណ្តាញអ៊ីនធើរណេតដើម្បីទប់ស្កាត់ក្រុមឆបោកនៅកម្ពុជា ។ ការពិត ប្រទេសថៃទៅវិញទេ គឺជាទីតាំងឆបោកជនបរទេសដ៏ធំ ជាពិសេស បោកប្រាស់ជនជាតិចិនឱ្យមកធ្វើការនៅថៃ និងបញ្ជូនបន្តទៅមីយ៉ាន់ម៉ា ៕

ប្រទេសថៃ ៖ ក្រសួងឌីជីថល សេដ្ឋកិច្ច និងសង្គមថៃ បានដាស់តឿនពលរដ្ឋថៃកុំជឿព័ត៌មានក្លែងក្លាយពីការបិទព្រំដែនកម្ពុជា-ថៃ ចំនួន៦កន្លែង ហើយសំណូមពរឱ្យពលរដ្ឋជឿជាក់លើព័ត៌មានផ្លូវការពីរដ្ឋាភិបាលប៉ុណ្ណោះ ។ ការផ្សព្វផ្សាយព័ត៌មានពីការបិទព្រំដែននេះ គឺជាព័ត៌មានក្លែងក្លាយ ខណៈអ្នកនាំពាក្យរបស់រដ្ឋាភិបាលថៃនិយាយថា មានការផ្សាយព័ត៌មានបំភ្លើសក្នុងបណ្តាញសង្គមដែលអាចធ្វើឱ្យពលរដ្ឋយល់ខុស និងភ័យស្លន់ស្លោ ។

បើតាមការត្រួតពិនិត្យទិន្នន័យឃើញថា មានព័ត៌មានបំភ្លើសពាក់ព័ន្ធនឹងស្ថានការណ៍កម្ពុជា-ថៃ សរុបចំនួន៣៣ព័ត៌មាន ព័ត៌មានក្លែងក្លាយចំនួន៩ ជាពិសេស ព័ត៌មានពាក់ព័ន្ធនឹងការបិទព្រំដែន ខណៈភ្នាក់ងារសន្តិសុខថៃក៏បានបញ្ជាក់ដែរថា ព្រំដែនកម្ពុជា-ថៃទាំងអស់បើកទ្វារធម្មតា ។

ព័ត៌មានមួយចំនួនបានប្រើប្រាស់រូបភាពបង្កើតដោយបច្ចេកវិទ្យា AI និងសរសេរខុសដើម្បីឱ្យអ្នកអានយល់ច្រឡំ ។ ហេតុនេះ ពលរដ្ឋគួរតែជឿជាក់លើព័ត៌មានផ្លូវការពីរដ្ឋាភិបាល និងសារព័ត៌មានធំៗប៉ុណ្ណោះ រួមទាំងគួរពិនិត្យមើលឱ្យច្បាស់លាស់មុនពេលចែកចាយក្នុងបណ្តាញសង្គម ។ បើពលរដ្ឋណាម្នាក់ចែកចាយព័ត៌មានក្លែងក្លាយ គឺជាការល្មើសនឹងច្បាប់ឧក្រិដ្ឋកម្មកុំព្យូទ័រ នឹងមានទោសជាប់ពន្ធនាគារ រួមទាំងត្រូវពិន័យជាប្រាក់ ។ នេះបើតាមការលើកឡើងរបស់ក្រសួងឌីជីថល សេដ្ឋកិច្ច និងសង្គមថៃ ។

គួរបញ្ជាក់ថា អ្នកនាំពាក្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ លោក និកនឌេត ផ្លាំងគូន បាននិយាយកាលពីថ្ងៃទី២៤ ខែមិថុនា ថា ថៃពុំបានបិទព្រំដែន ឬពុំនាំចេញប្រេងឥន្ធនៈ អគ្គិសនី និងសេវាអ៊ីនធើរណេតទៅកម្ពុជាទេ គ្មានការផ្លាស់ប្តូរអ្វីទាំងអស់ក្នុងគោលនយោបាយពាណិជ្ជកម្ម និងកិច្ចសហការរវាងប្រទេសទាំងពីរ ។ ទំនាក់ទំនងពាណិជ្ជកម្ម និងសេដ្ឋកិច្ចរវាងកម្ពុជា-ថៃនៅតែដំណើរការធម្មតា គ្មានការផ្អាកឡើយ ។

ប្រទេសថៃពុំបានបិទព្រំដែនជាប់កម្ពុជាទេ ច្រកព្រំដែនទាំងអស់នៅតែបើកដំណើរការធម្មតា គ្រាន់តែថៃរឹតបន្តឹងការឆ្លងដែនដើម្បីសុវត្ថិភាពពលរដ្ឋ និងទប់ស្កាត់ការឆបោកតាមអនឡាញ ។ គ្រប់ច្រកព្រំដែនជាប់កម្ពុជាទាំងអស់ គឺថៃអនុញ្ញាតឱ្យឆ្លងដែនតាមគោរពគោលការណ៍មនុស្សធម៌ រួមទាំងបុគ្គលមានការចាំបាច់ ដូចជា ៖ អ្នកជំងឺបញ្ជូនសង្គ្រោះនៅមន្ទីរពេទ្យ និងកូនសិស្ស ៕

ថ្មីៗនេះនៅលើបណ្តាញសង្គមមានការជជែកវែកញែកយ៉ាងច្រើនអំពីអ្នកសិល្បៈជុំវិញបញ្ហាចម្រូងចម្រាសខ្មែរនិងថៃ។ យ៉ាងណាមិញតារាចម្រៀង ណុប បាយ៉ារិទ្ធ បានលើកឡើងថានេះជាពេលដែលយើងរួបរួមគ្នាមិនមែនជាពេលដែលត្រូវប្រកួតប្រជែងយកតំណែងតួឯកទេ។

លោក ណុប បាយ៉ារិទ្ធ បានបង្ហោះនៅលើបណ្តាញសង្គមក្នុងន័យដាស់តឿនកុំឱ្យខ្មែរនិងខ្មែរឈ្លោះប្រកែកគ្នាថា «ម៉ោងនេះពេលនេះតទៅ ជាពេលវេលាដែលពួកយើងជាប្រជាជនរួមគិត រួមធ្វើដើម្បីជាតិមាតុភូមិមិនមែនជាពេលវេលាប្រជែងយកតំណែងតួឯកសម្រាប់ខ្លួនឯងនៅក្នុងបណ្តាញសង្គមហើយមកវាយប្រហារខ្មែរដូចគ្នាទេ។ ក្នុងនាមជាប្រជាជនកម្ពុជា ទាំងខ្ញុំទាំងគេ អាចធ្វើអ្វីបាន យើងនិងធ្វើ ធ្វើក្នុងកម្រិតណាមួយ រូបភាពណាមួយ ដោយប្រើប្រាស់សេចក្តីថ្លៃថ្នូរនិងវិចារណញ្ញាណ»។

តារាចម្រៀងក្នុងទ្រនំរស្មីហង្សមាសរូបនេះបានបន្តទៀតថា « ទង្វើរបស់យើងស្តែងអោយឃើញពីឆន្ទៈដ៏មោះមុតក្នុងការចូលរួមឈឺឆ្អាល ការពារ និង រក្សាតម្លៃនៃជាតិរបស់យើងដោយមិនព្រមឱ្យជាតិសាសន៍ណាមួយបំពាន ឬ ជាន់ឈ្លីបានឡើយ ។ បើទោះជាស្ថិតក្នុងកាលៈទេសៈណា ក៏យើងនៅតែរក្សាស្មារតីថែរក្សាពីគុណតម្លៃនៃជាតិសាសន៍យើង ក្នុងនាមជាកូនខ្មែរ ធ្វើអីមួយក៏នៅតែរក្សាកិត្តិនាមរបស់ប្រទេសជាតិមិនឱ្យអាប់អោនដោយសារយើងឡើយ ។ ហើយយើងក៏មិនយកគំរូតាមប្រជាជនរបស់បច្ចារមិត្តដែលមានចរិត ព្រហើន ឈ្លើយ ទំនើង ដូចមនុស្សគ្មានមេបាប្រដៅដែរព្រោះទង្វើទាំងអស់នោះមិនបានបង្ហាញពីកម្រិត យល់ដឹងនិងផ្តល់នៅគុណតម្លៃសម្រាប់គេឡើយ។

លោក ណុប បាយ៉ារិទ្ធ បន្ថែមទៀតថា «បើទោះជាយើងចង់តបតក៏តបតបែបចាស់ទុំ ថ្លៃថ្នូរ មិនមែនបែបផ្សារត្រី ឬ បែបជនពាលតាមចិញ្ចើមថ្នល់នោះទេ។ សូមកុំធ្វើជាកូនដែល ឈ្លើយខ្វះការអប់រំ នាំឱ្យគេប្រមាថដល់អាណាព្យាបាល។ យើងមានជីវិតលើទឹកដីកំណើត ដ៏ពិសិដ្ឋជាកូនខ្មែរដែលមានឈាមជ័រនៃបុព្វបុរសដ៏អង់អាចក្លាហានរស់រានមានជីវិតសព្វថ្ងៃក្រោមម្លប់នៃសន្តិភាពក្រោមការបីបាច់ថែរក្សារបស់លោកឪពុកវីរបុរសជាតិគឺសម្តេចតេជា និង សម្តេចបវរធិបតីជាទីគោរពដ៏ខ្ពង់ខ្ពស់ លោកពិតជាមិនព្រមឱ្យជាតិសាសន៍ណាមួយ មកធ្វើបាបប្រជាជនខ្មែរនិងប្រទេសកម្ពុជាឡើយ»។

គួរបញ្ជាក់ផងដែរថា ការចេញមុខរបស់លោក ណុប បាយ៉ារិទ្ធ ឱ្យខ្មែររួបរួមគ្នាកុំប្រជែងយកតំណែងជាតួឯកនេះដោយសារតែមានការបង្ហោះដាក់បន្ទុកទៅដល់អ្នកសិល្បៈដែលមិនចេញតបតពេលតារាថៃជេរខ្មែរហើយថាតារាខ្មែរសំងំយកសុខ។ មិនត្រឹមតែប៉ុណ្ណោះក៏មានការបង្ហោះថា តារាល្បីៗមួយចំនួនមិនចេញប្រតិកម្មសៀមដោយសារតែជាប់ Sponsor ជាដើម។ រឿងនេះបានជំរុញឱ្យអ្នកសិល្បៈជាច្រើនចេញមុខមកតបត៕