កាលពីថ្ងៃទី ២៧ ខែមិថុនា ឆ្នាំ ២០២៥ សារព័ត៌មាន រ៉យទ័រ រាយការណ៍ថា ប៉ូលីសកូរ៉េខាងត្បូងបានឃាត់ខ្លួនជនជាតិអាមេរិក៦នាក់ ដែលបានព្យាយាមបណ្ដែតដបទឹកផ្លាស្ទីកប្រហែល ១,៣០០ ដប ដែលមានផ្ទុកទៅដោយអង្ករ ប្រាក់ដុល្លារ រួមជាមួយនិងព្រះគម្ពីរទៅកាន់កូរ៉េខាងជើង។ ការបញ្ជាក់នេះត្រូវបានរាយការណ៍ដោយមន្ត្រីប៉ូលីសនៅស្ថានីយ៍ប៉ូលីស Incheon Ganghwa កាលពីថ្ងៃសុក្រ។

ក្រុមនេះបានព្យាយាមបណ្ដែតដបទឹកតាមសមុទ្រពីកោះមួយនៅជិតព្រំដែនភាគខាងលិចនៃទីក្រុងសេអ៊ូល មុនពេលត្រូវយោធាជាតិបានប្រទះឃើញ។ ការប្រព្រឹត្តនេះត្រូវបានគេសន្មតថាប្រឆាំងនឹងច្បាប់សន្តិសុខនិងគ្រោះមហន្តរាយនៅតំបន់ដែលរដ្ឋាភិបាលបានកំណត់ថាជា “តំបន់គ្រោះថ្នាក់” ដែលហាមឃាត់សកម្មភាពណាដែលអាចបង្កហានិភ័យដល់ប្រជាជន។

មន្ត្រីប៉ូលីសបាននិយាយថា “យើងកំពុងសួរចម្លើយពួកគេជាមួយនឹងអ្នកបកប្រែ ហើយនឹងសម្រេចចិត្តក្នុងរយៈពេល ៤៨ ម៉ោងថាអាចលើកលែងឬបន្តឃុំខ្លួនពួកគេ”។

គួរបញ្ជាក់ថា ចាប់តាំងពីបានចូលកាន់ដំណែងកាលពីដើមខែមិថុនា មក លោក Lee Jae Myung ប្រធានាធិបតីកូរ៉េខាងត្បូងបានសន្យានឹងធ្វើឲ្យទំនាក់ទំនងជាមួយកូរ៉េខាងជើងប្រសើរឡើង បន្ទាប់ពីភាពតានតឹងបានកើនឡើងជាបន្តបន្ទាប់រវាងប្រទេសទាំងពីរ។ លោកបានបញ្ឈប់ការផ្សាយសំឡេងប្រឆាំងកូរ៉េខាងជើងនៅតាមព្រំដែន និងបានអំពាវនាវឲ្យក្រុមសកម្មជនបញ្ឈប់ការបង្ហោះប៉េងប៉ោងដែលមានសាររិះគន់ទៅលើមេដឹកនាំកូរ៉េខាងជើង ក្នុងគោលបំណងជៀសវាងការបង្កភាពតានតឹងនៅលើទំនាក់ទំនងរវាងប្រទេសទាំងពីរ។

លោក Chung Dong-young ដែលត្រូវបានតែងតាំងជារដ្ឋមន្ត្រីបង្រួបបង្រួមកូរ៉េខាងត្បូង បាននិយាយកាលពីថ្ងៃពុធថា ប៉េងប៉ោងដែលផ្ទុកខិត្តប័ណ្ណបានដើរតួជា “កាតាលីករនៃភាពតានតឹង និងអរិភាព” រវាងប្រទេសកូរ៉េទាំង ២។ លោកបានបង្ហាញក្តីសង្ឃឹមយ៉ាងមុតមាំក្នុងការកសាងទំនាក់ទំនងឡើងវិញជាមួយកូរ៉េខាងជើង។

យ៉ាងណាម៉ិញ សកម្មជនទាំងនោះគឺស្ថិតក្នុងចំណោមអ្នករំដោះពីកូរ៉េខាងជើង និងសមាជិកក្រុមគ្រិស្តសាសនា ដែលតែងតែព្យាយាមផ្ញើគម្ពីរ និងឧបករណ៍ USB មានកម្មវិធីទូរទស្សន៍កូរ៉េខាងត្បូងតាមដបទឹក។

កូរ៉េខាងជើងបានហៅសកម្មជនទាំងនេះថា “ជាមនុស្សសំណល់” ហើយបានធ្វើការឆ្លើយតបកាលពីឆ្នាំមុន ដោយផ្ញើប៉េងប៉ោងដែលមានសំណល់ស្អុយរលួយទៅកូរ៉េខាងត្បូង និងចាក់សំឡេងប្រឆាំងកូរ៉េខាងត្បូងនៅតាមព្រំដែនផងដែរ។

ទោះជាយ៉ាងណា ប្រជាពលរដ្ឋនៅតំបន់ព្រំដែនបានតវ៉ាថា សកម្មភាពនេះអាចរំខានដល់សុវត្ថិភាពរបស់ពួកគេ ដែលបានធ្វើឲ្យកោះ Ganghwa និងតំបន់ជិតខាងមួយចំនួនត្រូវបានកំណត់ជាតំបន់គ្រោះថ្នាក់ ចាប់ពីចុងឆ្នាំមុន ដើម្បីអនុញ្ញាតឲ្យអាជ្ញាធរធ្វើការត្រួតពិនិត្យកាន់តែខ្លាំងលើសកម្មភាពប្រឆាំងកូរ៉េខាងជើង៕

ប្រទេសថៃ ៖ សារព័ត៌មានថៃ MGR Online រាយការណ៍ថា កាលពីថ្ងៃទី២៨ ខែមិថុនា ឆ្នាំ២០២៥ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ និងមន្ត្រីមួយចំនួនបានមកកាន់អាកាសយានដ្ឋានដនមឿង ដើម្បីធ្វើដំណើរទៅពិនិត្យមើលស្ថានការណ៍ទឹកជំនន់នៅខេត្តឈៀងរ៉ៃក្រោយភ្លៀងធ្លាក់ខ្លាំង និងជួយសង្គ្រោះពលរដ្ឋរងគ្រោះដោយទឹកជំនន់ ។ លោកស្រីពុំបារម្ភនឹងពលរដ្ឋប្រមូលផ្តុំគ្នាធ្វើបាតុ.កម្មបណ្តេញលោកស្រីពីតំណែងទេ ពីព្រោះនេះជាសិទ្ធិរបស់ពលរដ្ឋ ។

លោកស្រី ផេថងថាន គ្មានវិធានការអ្វីទៅលើក្រុមពលរដ្ឋតវ៉ាបណ្តេញលោកស្រីឱ្យលាលែងពីតំណែងទេ ដោយលោកស្រីថា ពលរដ្ឋមានសិទ្ធិធ្វើបាតុ.កម្មបណ្តេញនាយករដ្ឋមន្ត្រី ។ លោកស្រីនឹងពុំឆ្លើយតបអ្វីទាំងអស់ និងត្រៀមខ្លួនចរចាជាមួយពលរដ្ឋដោយសន្តិវិធី ប្រសិនបើពលរដ្ឋចង់ចរចា ។

នាវេលាម៉ោង៨និង៥០នាទីព្រឹក ថ្ងៃទី២៨ ខែមិថុនា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានធ្វើដំណើរមកដល់អាកាសយានដ្ឋានដនមឿង ទីក្រុងបាងកក ដើម្បីត្រៀមធ្វើដំណើរទៅពិនិត្យមើលស្ថានការណ៍ទឹកជំនន់នៅខេត្តឈៀងរ៉ៃ ដោយមានលោកស្រី ធីរ៉ារ៉ាត់ សាំរេចវ៉ានិក អនុរដ្ឋមន្ត្រីក្រសួងមហាផ្ទៃ និងមន្ត្រីពាក់ព័ន្ធធ្វើដំណើរជាមួយដែរ ។

នៅអាកាសយានដ្ឋានដនមឿង លោកស្រី ផេថងថាន បានផ្តល់សម្ភាសន៍ជាមួយអ្នកសារព័ត៌មានពីពលរដ្ឋធ្វើបាតុកម្មបណ្តេញលោកស្រីឱ្យលាលែងពីតំណែងនៅថ្ងៃនេះ (ថ្ងៃទី២៨ ខែមិថុនា) ថា លោកស្រីបានបញ្ជាឱ្យភ្នាក់ងារសន្តិសុខមើលការខុសត្រូវសណ្តាប់ធ្នាប់ គ្មានអ្វីកើតឡើងទេ ។ វាជាសិទ្ធិរបស់ពលរដ្ឋដែលអាចធ្វើបាតុកម្មបណ្តេញនាយករដ្ឋមន្ត្រី ។

លោកស្រីពុំចង់ឱ្យមានអំពើហិង្សាកើតឡើង ហើយសង្ឃឹមថា ការធ្វើបាតុកម្មនឹងពុំរាលដាលខ្លាំងជាងនេះ ។ លោកស្រីនឹងពុំចាត់វិធានការ ឬឆ្លើយតបអ្វីទាំងអស់ជាមួយក្រុមបាតុករ និងរង់ចាំមើលស្ថានការណ៍ ប្រសិនបើអ្នកដឹកនាំបាតុកម្មចង់ចរចាដោយសន្តិវិធី គឺលោកស្រីរីករាយនឹងចរចា ។

គួរបញ្ជាក់ថា នាយករដ្ឋមន្ត្រីថៃធ្វើដំណើរទៅខេត្តឈៀងរ៉ៃ គឺដើម្បីចុះទៅស្រុកផាយ៉ាម៉េងរ៉ាយ និងវត្តសន្តិសិរី ដើម្បីតាមដានស្ថានការណ៍ទឹកជំនន់ ផ្តល់កម្លាំងចិត្តដល់ពលរដ្ឋ និងប្រគល់អំណោយឱ្យជនរងគ្រោះដោយសារទឹកជំនន់ ។ បន្ទាប់មក លោកស្រី ផេថងថាន នឹងធ្វើដំណើរទៅស្រុកឈៀងសេន ដើម្បីតាមដានការដោះស្រាយបញ្ហាឧក្រិដ្ឋកម្មអនឡាញនៅព្រំដែនថៃ-ឡាវ-មីយ៉ាន់ម៉ា រួមទាំងពិភាក្សាជាមួយអាជ្ញាធរពីការបង្កើនប្រសិទ្ធភាពបង្ក្រាបការឆបោកអនឡាញ ៕

រាជធានីភ្នំពេញ ៖ ស្ថានទូតអាមេរិកប្រចាំនៅប្រទេសកម្ពុជាបានជូនដំណឹងដល់សាធារណជនទាំងអស់ថា ក្រុមកងទ័ពជើងអាកាសអាមេរិក «Pacific Brass» នឹងរៀបចំកម្មវិធីសម្ដែងពិសេសនៅផ្លូវថ្មើរជើងចតុមុខ (Walk Street) ទល់មុខវត្តឧណ្ណាលោម នាចុងសប្ដាហ៍នេះ។

បើតាមការបង្ហោះរបស់ទំព័រហ្វេសប៊ុករបស់ស្ថានទូតអាមេរិកប្រចាំនៅកម្ពុជា បានឲ្យដឹងថា នៅថ្ងៃ អាទិត្យ ទី២៩ ខែមិថុនា សប្តាហ៍នេះ នឹងមានការសម្ដែងតន្រ្តីពិសេសដោយក្រុមកងទ័ពជើងអាកាសអាមេរិក «Pacific Brass» នៅផ្លូវថ្មើរជើងចតុមុខចាប់ពីម៉ោង 6:30PM-7:30 PM តទៅ។

គួរជម្រាបថា «Pacific Brass» គឺជាក្រុមតន្ត្រីយោធាដ៏សម្បូរបែប ដែលមានសមត្ថភាពសម្តែងប្រកបដោយឥទ្ធិពលនៅក្នុងការកំណត់ផ្សេងៗ។ សមាសភាពនៃអ្នកលេងឧបករណ៍ភ្លេងដែលមានជំនាញវិជ្ជាជីវៈចំនួនប្រាំនាក់ ក្រុមនេះផ្តល់ និងតំណាងឱ្យប្រពៃណីតែមួយគត់នៃតន្ត្រីយោធា និងបង្កើតចំណាប់អារម្មណ៍យូរអង្វែងនៅក្នុងព្រឹត្តិការណ៍ ឬពិធីការនានាសម្រាប់សហគមន៍មូលដ្ឋានរបស់យើង។ ជាមួយគ្នានេះ ពួកគេនឹងធ្វើដំណើរមកកាន់ប្រទេសកម្ពុជារយៈពេលមួយសប្តាហ៍ពេញដើម្បីសម្តែង ចូលរួមជាមួយសាលារៀនមួយចំនួន និងសមភាគីយោធានៅរាជធានីភ្នំពេញ និងខេត្តព្រះសីហនុ៕

ប្រទេសថៃ ៖ កាលពីថ្ងៃទី២៨ ខែមិថុនា ឆ្នាំ២០២៥ សារព័ត៌មានថៃរាយការណ៍ថា ស្រុកចំនួន៥ នៅខេត្តឈៀងរ៉ៃ លិចទឹកជំនន់ខ្លាំងបំផ្លាញលំនៅឋានពលរដ្ឋរហូតដល់ជាង៤,៤០០ខ្នង និងហូរផ្តាច់ផ្លូវ៣កន្លែង ដែលធ្វើឱ្យភ្នាក់ងារសង្គ្រោះបង្កើនកម្លាំងជួយពលរដ្ឋរងគ្រោះក្រោយពីទទួលបញ្ជាពីនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ ។ រីឯភ្នាក់ងារឧតុនិយមប្រកាសថា ភាគខាងជើងប្រទេសថៃនឹងមានភ្លៀងធ្លាក់៧០% និងធ្លាក់នៅខេត្តចំនួន៤៩ ផងដែរ ។

បន្ទាប់ពីភ្លៀងធ្លាក់ពេញមួយយប់កាលពីថ្ងៃទី២៦ ខែមិថុនា ធ្វើឱ្យស្រុកផាយ៉ាមេងរ៉ាយ និងស្រុកវៀងឆ័យ មានទឹកហូរពីតំបន់ព្រៃភ្នំ ហើយទឹកមានកម្ពស់ខ្ពស់លិចលំនៅឋានពលរដ្ឋ ហូរផ្តាច់ផ្លូវ ក៏ដូចជាលិចអគារសាលារៀននៅភូមិថ្មីសុខសាន់ ឃុំតាកខ្វាន់ ស្រុកផាយ៉ាមេងរ៉ាយ ។ ពលរដ្ឋបានជញ្ជូនរបស់របរចេញពីលំនៅឋានគេចពីទឹកជំនន់ និងនាំក្រុមគ្រួសារទៅស្នាក់នៅកន្លែងមានសុវត្ថិភាព ។

ទឹកហូរពីព្រៃភ្នំក៏បានលិចឃុំមេប៉ៅ ស្រុកផាយ៉ាមេងរ៉ាយ ដែលធ្វើឱ្យលំនៅឋានពលរដ្ឋ និងផ្ទៃដីកសិកម្មជាច្រើនលិចលង់យ៉ាងខ្លាំង ។ ភ្នាក់ងារបង្ការ និងកាត់បន្ថយគ្រោះមហន្តរាយខេត្តឈៀងរ៉ៃ និងអាជ្ញាធរបានសហការជួយពលរដ្ឋនៅតាមតំបន់ផ្សេងៗ ខណៈនៅភូមិបានហួយក្វាន់ ឃុំបានស៊ែវ ស្រុកឈៀងសែន ក៏មានទឹកហូរពីព្រៃភ្នំដែរ ។

ដោយឡែក ខេត្តឧដនថានី ក្រោយពីភ្លៀងធ្លាក់ខ្លាំងធ្វើឱ្យស្រុកជាច្រើនមានទឹកជំនន់ភ្លាមៗ ដោយទឹកហូរលិចផ្លូវជាច្រើន មានកម្ពស់ចាប់ពី២០សង់ទីម៉ែត្រ ទៅ៤០សង់ទីម៉ែត្រ ។ យានជំនិះពិបាកបើកបរយ៉ាងខ្លាំង ជាពិសេស ទឹកលិចខ្លាំងនៅមុខមន្ទីរពេទ្យដែលមានកម្ពស់រហូតដល់៥០សង់ទីម៉ែត្រ ខណៈអគារក្នុងសាលារៀនក៏មានទឹកលិច កូនសិស្សត្រូវជម្លៀសទៅកាន់ទីខ្ពស់ ធ្វើឱ្យសាលារៀនប្រកាសបិទទ្វារ ។

ក្រោយពីមានទឹកជំនន់ភ្លាមៗនៅខេត្តឈៀងរ៉ៃ និងខេត្តឧដនថានី ភ្នាក់ងារសង្គ្រោះបានបញ្ជូនអាហារ និងឧបករណ៍សង្គ្រោះទៅកាន់តំបន់រងគ្រោះ ដោយសហការជាមួយអាជ្ញាធរខេត្តឈៀងរ៉ៃ និងភ្នាក់ងារពាក់ព័ន្ធដើម្បីជួយពលរដ្ឋជាបន្ទាន់ ។ ការជួយសង្គ្រោះផ្តោតលើការជម្លៀសអ្នកជំងឺ មនុស្សចាស់ កុមារ និងក្រុមងាយរងគ្រោះទៅកាន់កន្លែងមានសុវត្ថិភាព រួមទាំងផ្តល់សេវាពេទ្យ ។

របាយការណ៍របស់មជ្ឈមណ្ឌលគ្រប់គ្រងស្ថានការណ៍បង្ហាញថា ស្រុកចំនួន៥ នៅខេត្តឈៀងរ៉ៃ បានលិចទឹកជំនន់ខ្លាំងបណ្តាលឱ្យលំនៅឋានពលរដ្ឋខូចខាតរហូតដល់ជាង៤,៤០០ខ្នង, ទឹកហូរផ្តាច់ផ្លូវ៣កន្លែង, លិចមន្ទីរពេទ្យ២កន្លែង និងលិចផ្ទៃដីកសិកម្មប្រមាណ ៥០០រ៉ៃ (ឬ៨០ហិកតា) ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានបញ្ជាឱ្យអាជ្ញាធរ និងភ្នាក់ងារពាក់ព័ន្ធជួយសង្គ្រោះពលរដ្ឋ រួមទាំងបញ្ជាទៅក្រសួងការពារជាតិឱ្យបញ្ជូនកងទ័ព និងឧបករណ៍ ដោយសារជាមួយអភិបាលខេត្តដើម្បីទប់ទល់ស្ថានការណ៍ជាបន្ទាន់ ។ ក្រសួងសុខាភិបាលត្រូវត្រៀមគ្រូពេទ្យរយៈពេល២៤ម៉ោង ខណៈក្រសួងធនធានធម្មជាតិ និងបរិស្ថាន, ក្រសួងសេដ្ឋកិច្ច ឌីជីថល និងសង្គម ជាពិសេស ភ្នាក់ងារឧតុនិយមតាមដានស្ថានការណ៍ និងជូនដំណឹងទៅពលរដ្ឋឱ្យបានជ្រាប ។

តាមការព្យាកររបស់ភ្នាក់ងារឧតុនិយម គឺភាគខាងជើងប្រទេសថៃមានភ្លៀងធ្លាក់ខ្លាំង រីឯភាគខាងត្បូងមានភ្លៀងធ្លាក់ និងផ្គររន្ទះ ហេតុនេះ សូមពលរដ្ឋប្រុងប្រយ័ត្នគ្រោះថ្នាក់ដោយសារភ្លៀងដែលអាចមានទឹកជំនន់ភ្លាមៗ ទឹកហូរពីព្រៃភ្នំ បាក់ដី ជាពិសេស នៅបរិវេណជើងភ្នំក្បែរទឹកហូរ ឬតំបន់ទំនាប ។ ខ្យល់មូសុងបានបក់កាត់តំបន់ខាងជើងប្រទេសថៃ និងឡាវ និងបក់ទៅតំបន់សម្ពាធទាបនៅភាគខាងជើងវៀតណាម រួមទាំងខ្យល់មូសុងនិរតីបក់លើសមុទ្រអាន់ដាម៉ាន់ ប្រទេសថៃ និងឈូងសមុទ្រថៃ ៕

ថៃ ៖ «ក្រុមបា.តុ.ករថ្ងៃទី២៨ មិថុនា» ដែលទាមទារឲ្យនាយករដ្ឋមន្រ្តីលាលែងពីតំណែង បានប្រមូលផ្តុំគ្នាជាបណ្តើរៗនៅវិមានជ័យជំនះ ចាប់តាំងពីម៉ោង ០៧.៣០នាទីព្រឹក។ ព្រឹត្តការណ៍នេះ ត្រូវបានគេរំពឹងថានឹងមានមនុស្សចូលរួមរហូតដល់រាប់ពាន់នាក់ ហើយការតវ៉ាអាចនឹងមានរយៈពេញមួយថ្ងៃ។

យោងតាមសារព័ត៌មាន ថៃរ៉ាត់ ថ្ងៃទី២៨ ខែមិថុនា ឆ្នាំ២០២៥ នៅវេលាព្រឹកម៉ោង ០៧.៣០នាទី អ្នកសារព័ត៌មានបានបង្ហាញឲ្យឃើញពីបរិយាកាសមុនពេលចាប់ផ្តើមការជួបជុំថ្ងៃនេះ ដោយមានក្រុមបា.តុ.ករចាប់ផ្ដើមជួបជុំគ្នាជាបណ្ដើរៗនៅជុំវិញវេទិការ។ ចលនាតវ៉ានេះ ត្រូវបានគេហៅឈ្មោះថា “រណសិរ្សរួបរួមជាតិ ដើម្បីការពារបូរណភាពទឹកដី” ដឹកនាំដោយលោក ចាទូផន ព្រំផាន អតីតមេដឹកនាំក្រុមអាវក្រហម, លោក ប៉ាណាថេប ពុងផាន, លោកមេធាវី នីធីថន ឡាំឡុងកៃ និងមេបក្ស RC. ក្រុម។ល។

គោលបំណងនៃការជួបជុំនិងធ្វើការបាតុកម្មរបស់ក្រុមបា.តុ.ករទាំងនេះ គឺដើម្បីទាមទារឲ្យលោកស្រី ផែថងថាន ស៊ីណាវ៉ាត់ ធ្វើការចុះចេញពីតំណែងជានាយករដ្ឋមន្រ្តី បន្ទាប់ពីការបែកធ្លា.យកិច្ចសន្ទនាតាមទូរស័ព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ព្រមទាំងសកម្មភាពមួយចំនួនទៀតដែលបង្ហាញពីអស្ថិរភាពនយោបាយប្រកបដោយភាពទន់ខ្សោយរបស់នាយករដ្ឋមន្រ្តីរូបនេះ។

ជាមួយគ្នានេះ ស្នងការដ្ឋាននគរបាលទីក្រុងបាងកកស្នើសុំឱ្យសាធារណជនជៀសឱ្យឆ្ងាយពីការធ្វើដំណើរលើកំណត់ផ្លូវទាំង៤ ចាប់ពីម៉ោង៣រសៀលរហូតដល់ម៉ោង១០យប់។ ទន្ទឹមនឹងនេះ មានប៉ូលិសជាង 1,200នាក់ ត្រូវបានបញ្ជូនទៅរាជធានី ដើម្បីថែរក្សាសណ្តាប់ធ្នាប់ផ្លូវជុំវិញ «វិមានជ័យជម្នះ»។ ក្នុងនោះសេវាសាធារណៈធំៗមួយចំនួនដូចជា រថភ្លើងល្បឿនលឿន BTS នឹងផ្អាកដំណើរការជាបណ្ដោះអាសន្ន រួមជាមួយមន្ទីរពេទ្យ «រាមាធិបតី» ដែលស្ថិតនៅជិតនឹងកន្លែងបាតុកម្មនោះ បានប្រកាសបិទសេវាកម្មពិសេស (Premium Clinic) របស់ខ្លួនចាប់ពីម៉ោង ៣ល្ងាច ដោយសារកង្វះសុវត្ថិភាព។ លើសពីនេះ ក៏មានសេចក្ដីប្រកាសឲ្យស្ថានទូត និងអាជ្ញាធរ ត្រូវធ្វការណែនាំប្រជាជនបរទេសដែលនៅក្បែរៗតំបន់នោះ កុំចូលរួមការធ្វើបាតុកម្ម និងសូមប្រុងប្រយ័ត្នជាពិសេស។

ទោះជាយ៉ាងណា រដ្ឋមន្រ្តីការពារជាតិ និងជាឧបនាយករដ្ឋមន្រ្តីថៃ លោក ភូមថាម វិចាយ៉ាឆៃ នៅតែអំពាវនាវឱ្យប្រជាជនទាំងអស់ដែលត្រៀមចូលរួមចលនាបាតុកម្មនេះសូមព្យាយាមអត់ធ្មត់ និងជៀសវាងការធ្វើសកម្មភាពទាំងឡាយណាដែលរឹតតែធ្វើឱ្យបែកបាក់សាមគ្គីជាតិ និងរង្គើរផ្ទៃក្នុងរបស់ប្រទេស៕