ខេត្តសុរិន្ទ៖ មជ្ឈមណ្ឌលបញ្ជាការដ្ឋានខេត្តសុរិន្ទសម្រាប់ការជម្លៀសតាមអាកាសបានប្រកាសនៅថ្ងៃទី២៦ សីហាម្សិលមិញថា ជំរុំស្នាក់នៅសម្រាប់ជនភៀសសឹកនៅក្នុងខេត្តសុរិន្ទត្រូវបានរៀបចំឡើងវិញរួចរាល់ដើម្បីត្រៀមខ្លួនសម្រាប់ការសង្រ្គោះបន្ទាន់ ខណៈស្ថានការណ៍មានភាពស្ងប់ស្ងាត់ប៉ុន្តែមិនអាចទុកចិត្តបាន ដោយសារកម្ពុជានៅរឹងទទឹង។ នេះបើយោងតាមសារព័ត៌មាន Khaosod។

មន្ត្រីមូលដ្ឋានបាននិយាយថា វិធានការនេះធ្វើឡើងដោយមានការសម្របសម្រួលជាមួយភ្នាក់ងាររដ្ឋ និងវត្តមួយចំនួនក្នុងតំបន់ និងដើម្បីធានាឲ្យបានថាប្រតិបត្តិការជួយសង្គ្រោះ និងជម្លៀសពលរដ្ឋក្នុងករណីមានភាពមិនប្រក្រតីណាមួយកើតឡើង អាចធ្វើទៅបានទាន់ពេលវេលា។

ការសម្រេចចិត្តនេះកើតឡើងបន្ទាប់ពីជម្រកភៀសសឹកនេះត្រូវបានបិទជាផ្លូវការកាលពីថ្ងៃទី 10 ខែសីហាកន្លងទៅ ដោយបង្កើនការព្រួយបារម្ភថាការជម្លៀសភ្លាមៗអាចនឹងមិនត្រូវបានអនុវត្តលឿនគ្រប់គ្រាន់ទេ ប្រសិនបើអំពើហិង្សាកើតឡើងម្តងទៀត ខណៈពលរដ្ឋ និងរដ្ឋាភិបាលថៃចោ.ទប្រកាន់ថា កម្ពុជាកំពុងព្យាយាមបង្កឲ្យមានភាពតានតឹង តាមរយៈការអនុញ្ញាតឲ្យប្រជាពលរដ្ឋខ្មែរធ្វើការតវ៉ា ដើម្បីប្រឆាំងនឹងទាហានថៃ។

ជាមួយគ្នានេះ កាលពីថ្ងៃទី២៦ សីហា នេះ លោក ណាត់ថាផុន ណាក់ផានិត រដ្ឋមន្រ្តីស្ដីទីក្រសួងការពារជាតិថៃ បានបញ្ជាក់ថា៖ ថៃកំពុងរៀបចំពាក្យបណ្ដឹងស្ដីពីបទបំផ្លាញទ្រព្យសម្បត្តិ ក្រោពលរដ្ឋខ្មែរបានរឹបអូសយកបន្លាលួសដែលកងទ័ពថៃបានដាក់ព័ទ្ធនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

លើសពីនេះ លោក ណាត់ថាផុន បានប្រកាសថានឹងបើកដៃឲ្យទាហានថៃចាត់ការលើពលរដ្ឋខ្មែរ ប្រសិនបើនៅតែហ៊ានតវ៉ា សម្រុកចូលទឹកដីថៃដូចកាលពីថ្ងៃទិ២៥ ខែសីហាទៀត។

យ៉ាងណាមិញ សម្រាប់ខាងរដ្ឋាភិបាលកម្ពុជានៅតែបញ្ជាក់ជំហររក្សាសន្តិភាព ជ្រើសយកការចរចាជាយន្តការដោះស្រាយបញ្ហាព្រំដែន និងទទូចឲ្យថៃបញ្ឈប់រាល់សកម្មភាពបំពានកម្ពុជា និងកិច្ចព្រមព្រៀង GBC ដែលសម្រេចឲ្យភាគីទាំងពីរឈរជើងតែនៅក្នុងភូមិសាស្រ្តដែលខ្លួននៅបច្ចុប្បន្ន និងការហាមធ្វើសកម្មភាពបង្កើន ឬចល័តយោធាចូលក្នុងភូមិសាស្រ្តរបស់ភាគីម្ខាងទៀតជាដាច់ខាត៕

ឈៀងម៉ៃ៖ សោ.កនាដកម្មបាក់ដីដ៏រន្ធត់ដែលបង្កឡើងដោយព្យុះត្រូពិច Kajiki បានវា.យប្រហារលើភូមិមួយនៅខេត្តឈៀងម៉ៃ ប្រទេសថៃ បណ្ដាលមនុស្សម្នាក់បានបាត់បង់ជីវីត 10នាក់រងរបួស និងមានមនុស្សម្នាក់ទៀតបាត់ខ្លួន កំពុងត្រូវបានក្រុមជួយសង្រ្គោះតាមស្វែងរក។ នេះបើយោងតាមសារព័ត៌មាន Khaosod។

នៅវេលាម៉ោង 2 និង 50 នាទីយប់ ឈានចូលថ្ងៃទី 27 ខែសីហា ឆ្នាំ 2025 ហេតុការណ៍បាក់ស្រុតដីល្បាប់ពីលើភ្នំ ដែលបង្កឡើងដោយភ្លៀងធ្លាក់ខ្លាំងជាប់ៗគ្នា រួមជាមួយខ្យល់កន្រ្តាក់ បានគ្របសង្កត់ពីលើភូមិ Pang Ung ឃុំ Mae Suek ស្រុក Mae Chaem ខេត្ត Chiang Mai ប្រទេសថៃ។

លោក Dusit Phongsapipat ប្រធានការិយាល័យបង្ការ និងកាត់បន្ថយគ្រោះមហន្តរាយខេត្តឈៀងម៉ៃ បានប្រាប់ឲ្យដឹងថា ហេតុការណ៍នេះបានបំផ្លាញផ្ទះប្រជាពលរដ្ឋយ៉ាងតិច៥ខ្នង ធ្វើឲ្យមនុស្សរងរបួស10នាក់ ដែលកំពុងត្រូវបានគេបញ្ជូនទៅមន្ទីរពេទ្យឃុនយាន និងមន្ទីរពេទ្យ Mae Chaem ។ ក្រៅពីនេះ ក្រុមជួយសង្រ្គោះបានរកឃើញថា មានមនុស្សម្នាក់បានស្លា.ប់ និងមានម្នាក់ទៀតបានបាត់ខ្លួន។

គួរបញ្ជាក់ថា ភ្លៀងធ្លាក់យ៉ាងគំហុកឥតឈប់ឈរដែលបង្កឡើងដោយឥទ្ធិពលព្យុះ Kajiki បានបណ្តាលឱ្យតំបន់ជាច្រើនក្នុងខេត្ត Chiang Mai ប្រទេសថៃ ទទួលរងការជន់លិចភ្លាមៗ និងបង្កឱ្យមានការកកស្ទះចរាចរណ៍យ៉ាងខ្លាំង។ បន្ថែមពីនេះ ព្យុះ Kajiki បានវាយប្រហារខេត្តចំនួន៥៨ នៅភាគខាងជើង ឦសាន កណ្តាល និងខាងត្បូងប្រទេសថៃផងដែរ ដែលបណ្តាលឲ្យមានទឹកជំនន់ បំណាក់ដី និងបាតុភូតរន្ទះបាញ់ លាយលំនឹងខ្យល់កន្រ្តាក់យ៉ាងគួរឲ្យខ្លាច។

ជាមួយគ្នានេះ ប្រទេសឡាវ និងវៀតណាម ក៏ទទួលរងឥទ្ធិពលរបស់ព្យុះនេះខ្លាំងក្លាផងដែរ ដោយបាននាំមកនូវទឹកជំនន់ជន់លិចខេត្ត-ក្រុងជាច្រើនរបស់ប្រទេសទាំងពីរនេះ។ ឥទ្ធិពលរបស់វា ក៏បានសាយភាយមកដល់កម្ពុជាខ្លះៗផងដែរ ដែលបង្កឲ្យមានភ្លៀងធ្លាក់មធ្យមនៅក្រុងភ្នំពេញ និងខេត្តមួយចំនួន ព្រមទាំងភ្លៀងធ្លាក់ខ្លាំងនៅតំបន់ផ្សេងទៀតដែលជាប់ព្រំដែន ប៉ុន្តែពុំបង្ហាញពីកម្រិតហានិភ័យដែលគួរឲ្យព្រួយបារម្ភឡើយ៕

បច្ចុប្បន្ន កងទ័ពឈ្លានពានថៃកាន់តែឈ្លានពានខ្លាំងឡើងនៅតំបន់ព្រំដែនស្រុកអូរជ្រៅ ខេត្តបន្ទាយមានជ័យ ដែលធ្វើឱ្យពលរដ្ឋខ្មែរអស់ការអត់ធ្មត់នឹងទង្វើឈ្លានពានដណ្តើមយកទឹកដីកម្ពុជា ។ ថៃមានចេតនាចង់បង្កសង្គ្រាមឡើងវិញដោយការបណ្តេញពលរដ្ឋខ្មែរឱ្យចាកចេញពីភូមិជោគជ័យ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ត្រឹមរយៈពេល៦ខែ ដោយចោទប្រកាន់ថា ពលរដ្ឋខ្មែរមករស់នៅលើទឹកដីរបស់ខ្លួនដោយខុសច្បាប់តាំងពីឆ្នាំ១៩៧៩ ។

ក្រោយពីចុះពិនិត្យមើលតំបន់ដែលកងទ័ពឈ្លានពានថៃបានរាយបន្លាលួសព័ទ្ធយកដីខ្មែរ និងបណ្តេញពលរដ្ឋខ្មែរចេញពីលំនៅឋាននៅភូមិជោគជ័យ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ លោក ម៉ាណាស់ ចាន់ឌី លេខាធិការទីបញ្ជាការកងទ័ពថៃនិយាយបំភ្លៃថា ពលរដ្ឋខ្មែររស់នៅលើទឹកដីថៃខុសច្បាប់ ដូច្នេះ ថៃនឹងបណ្តេញពលរដ្ឋខ្មែរឱ្យចាកចេញពីតំបន់នេះត្រឹមរយៈពេល៦ខែ បើពុំចាកចេញទេ ថៃនឹងអនុវត្តវិធានការក្តៅ ។ នេះបើតាមការផ្សព្វផ្សាយរបស់សារព័ត៌មានថៃ នៅថ្ងៃទី២៦ ខែសីហា ឆ្នាំ២០២៥ ។

នៅថ្ងៃទី២៦ ខែសីហា លោក ម៉ាណាស់ ចាន់ឌី លេខាធិការទីបញ្ជាការកងទ័ព ព្រមទាំងលោក វ៉ាន់ឆាណាក់ សាវ៉ាត់ឌី (ឬភូផាន់បឺត) អ្នកនាំពាក្យរងទីបញ្ជាការកងទ័ពថៃ រួមដំណើរដោយកងកម្លាំងប៊ូរ៉ាផា និងក្រុមសារព័ត៌មានថៃ បានចុះមកពិនិត្យមើលស្ថានការណ៍នៅភូមិជោគជ័យ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ គឺជាតំបន់ដែលកងទ័ពថៃឈ្លានពាន ។

យោងតាមឯកសារបំភ្លៃរបស់ថៃ គឺភូមិជោគជ័យស្ថិតនៅទឹកដីថៃ ដែលជាអតីតតំបន់ថៃធ្លាប់ឱ្យពលរដ្ឋខ្មែរភៀសសឹករស់នៅកាលពីឆ្នាំ១៩៧៩ តាំងពីពេលនោះមក ពលរដ្ឋខ្មែរពុំព្រមចាកចេញរហូតដល់បច្ចុប្បន្ន ។ នៅទីនេះ មានពលរដ្ឋខ្មែរជាង២០០គ្រួសាររស់នៅ បន្ទាប់មក នៅឆ្នាំ២០០៦ កម្ពុជា និងថៃបានចុះពិនិត្យមើលតំបន់នេះរួមគ្នា ប៉ុន្តែមានគំនិតពុំយល់ស្របគ្នា ទើបគូសបន្ទាត់ក្រហមនៅផ្នែកកណ្តាលក្នុងផែនទី ។ ពលរដ្ឋខ្មែរបានមករស់នៅតំបន់បន្ទាត់ក្រហមដែលប្រទេសទាំងពីរបានពិនិត្យមើលតំបន់រួមគ្នាកាលពីឆ្នាំ២០០៦ ដែលពុំពាក់ព័ន្ធនឹងកិច្ចព្រមព្រៀង MOU ឆ្នាំ២០០០ ។

លោក ម៉ាណាស់ ចាន់ឌី លេខាធិការទីបញ្ជាការកងទ័ពនិយាយថា លោកនឹងត្រួតពិនិត្យមើលទិន្នន័យភស្តុតាង រួចហើយ លោកនឹងពិភាក្សាឱ្យកម្ពុជាយល់ស្រប និងយល់ព្រមជម្លៀសពលរដ្ឋខ្លួនចេញពីតំបន់នេះ ដែលប្រទេសទាំងពីរបានឯកភាពគ្នាកាលពីឆ្នាំ២០០៦ ។ ថៃនឹងអនុវត្តផែនការច្បាស់លាស់ក្នុងរយៈពេល៦ខែ ពីព្រោះពលរដ្ឋខ្មែរបានល្មើសចូលទឹកដីថៃ ។ រីឯលោក វ៉ាន់ឆាណាក់ សាវ៉ាត់ឌី (ឬភូផាន់បឺត) អ្នកនាំពាក្យរងទីបញ្ជាការកងទ័ពថៃនិយាយថា កម្ពុជាត្រូវតែជម្លៀសពលរដ្ឋរបស់ខ្លួនចេញពីតំបន់នេះ ៕

ថៃ៖ រដ្ឋមន្ត្រីក្រសួងការពារជាតិស៊ុយអែតបញ្ជាក់ថា មិនមានអ្វីអាចរារាំងប្រទេសថៃ មិនឲ្យប្រើប្រាស់យន្តហោះទម្លាក់គ្រាប់បែ.ក Gripen ដែលទិញពីស៊ុយអែតបានឡើយ ព្រោះថៃក៏ដូចជាប្រទេសដទៃដែរ គឺសិទ្ធិប្រើកម្លាំងដើម្បីការពារខ្លួនស្របតាមច្បាប់អន្តរជាតិ។ នេះបើតាមការចុះផ្សាយរបស់សារព័ត៌មាន Khaosod។

លោក Pål Jonson រដ្ឋមន្ត្រីក្រសួងការពារជាតិស៊ុយអែតបានឲ្យដឹងថ្ងៃទី២៦ ខែសីហា ឆ្នាំ២០២៥ថា៖ ប្រទេសថៃ និង ស៊ុយអែត នាពេលនេះកំពុងស្វែងរកនូវកិច្ចសហប្រតិបត្តិការសុីជម្រៅជាមួយគ្នា ហើយប្រទេសស៊ុយអែតក៏បានផ្តល់យោបល់លើការប្រើប្រាស់យន្តហោះចម្បាំង Gripen ទៅកាន់ថៃផងដែរ ក្នុងអំឡុងពេលជម្លោះព្រំដែនថ្មីៗនេះរវាងថៃ និងកម្ពុជា។

ជាមួយគ្នានេះ ជុំវិញសំណួរពីអ្នកសារព័ត៌មានដែលចោ.ទសួរពីផលប៉ះពាល់នៃការប្រើប្រាស់យន្តហោះ Gripen រដ្ឋមន្ត្រីការពារជាតិស៊ុយអែតរូបនេះបានឆ្លើយតបថា៖ ថៃមានសិទ្ធិប្រើប្រាស់ Gripen ក្រោមច្បាប់អន្តរជាតិសម្រាប់ការពារខ្លួន។ ហើយវាគឺជាជម្រើសរបស់ថៃ ដរាបណាថៃប្រើវាស្របតាមធម្មនុញ្ញអង្គការសហប្រជាជាតិ និងច្បាប់អន្តរជាតិ”។

លោក Jonson បានសង្កត់ធ្ងន់ថា៖ «ជាការពិតណាស់ ប្រទេសថៃក៏ដូចជាប្រទេសដទៃទៀតដែរ គឺថៃមានសិទ្ធិការពារខ្លួន ហើយយើងគោរពចំពោះគោលការណ៍នេះ»។ បន្ថែមពីលើនេះ លោក Jonson បានឆ្លៀតឱកាសសាទរចំពោះប្រទេសថៃ និងកម្ពុជា ដែលបានខិតខំប្រឹងប្រែងដើម្បីបន្ធូរបន្ថយស្ថានការណ៍ និងសម្តែងការពេញចិត្តចំពោះការបង្កើតគណៈកម្មការចម្រុះ និងការចូលរួមពីអ្នកសង្កេតការណ៍អាស៊ាន ដែលជាផលប្រយោជន៍ល្អបំផុតរបស់ប្រជាជននៃប្រទេសទាំងពីរ។

គួរជម្រាបថា បើតាមអ្វីដែលរដ្ឋមន្រ្តីការពារជាតិស៊ុយអែតបានលើកឡើងខាងលើ ពាក់ព័ន្ធនឹងសិទ្ធិស្របច្បាប់របស់ថៃក្នុងការប្រើប្រាស់យន្តហោះ Gripen នោះគឺចង់សំដៅលើច្បាប់អន្តរជាតិ មាត្រា ៥១ នៃធម្មនុញ្ញអង្គការសហប្រជាជាតិ៖ ស្ដីពី «សិទ្ធិប្រើប្រាស់កម្លាំង» មានលក្ខណៈវិនិច្ឆ័យបីដែលត្រូវចាត់ទុកថាជាការការពារខ្លួន។ ការវាយប្រហារដោយអាវុធ ភាពចាំបាច់ និងសមាមាត្រ។ វាត្រូវបានចែងថា “កម្រិតនៃកម្លាំងដែលប្រើមិនគួរហួសប្រមាណ ឬហួសពីអ្វីដែលចាំបាច់ ដើម្បីសម្រេចបាននូវគោលដៅស្របច្បាប់នៃការការពារខ្លួនឡើយ”។

ផ្ទុយទៅវិញ បើយើងក្រឡេកទៅមើលពីសកម្មភាពថៃនៅក្នុងការប្រយុទ្ធគ្នាជាមួយកម្ពុជាកាលពីថ្មីៗនេះ គឺមិនមានលក្ខណៈណាមួយដែលអាចចាត់ទុកបានថាជាការប្រើកម្លាំងសមាមាត្រក្នុងការការពារខ្លួននោះទេ។ អ្វីដែលកាន់តែមិនអាចទទួលយកបាន គឺថៃបានប្រើប្រាស់ Gripens និង F-16 ដើម្បីវាយប្រហារកម្ពុជា។

សរុបមក ប្រទេសថៃបានប្រើប្រាស់កាំភ្លើងធំលើសទម្ងន់រួមមាន យន្តហោះចម្បាំង រថក្រោះ ផ្សែងផូស្វ័រពណ៌ស មកលើប្រទេសដែលមិនមានយន្តហោះចម្បាំង និងមិនមែនជាគូរប្រៀបរបស់ថៃ។ វាបង្ហាញថាសកម្មភាពថៃកន្លងមក ពុំមែនជាការការពារខ្លួនឡើយ។ ដោយឡែក ការមានយន្តហោះចម្បាំងស៊េរីទំនើបនៅក្នុងដែយ៉ាងដូច្នេះ តើស៊ុយអែតមានអ្វីមកធានា ថាថៃនឹងមិនប្រើវាមកគាបសង្កត់កម្ពុជា?

ប្រទេសថៃ ៖ ការទិញយន្តហោះចម្បាំងបន្ថែមរបស់ថៃស្របពេលថៃកំពុងមានភាពតានតឹងព្រំដែនជាមួយកម្ពុជា ហើយថៃហាក់ពុំត្រឹមតែប្រើប្រាស់យន្តហោះចម្បាំងសម្រាប់ការពារដែនអាកាសរបស់ខ្លួនដូចការអះអាងទេ គឺថៃមានចេតនាគំរាមកំហែងប្រទេសជិតខាង ។ ថៃបានទិញយន្តហោះចម្បាំងថ្មីទំនើបបំផុតពីស៊ុយអែត ចំនួន៤គ្រឿង សម្រាប់ជំនួសយន្តហោះចម្បាំង F-16 ដែលមានរយៈពេលប្រើប្រាស់តាំងពីឆ្នាំ១៩៨០ មេបញ្ជាការកងទ័ពអាកាសថៃអះអាងថា ស៊ុយអែតពុំហាមឃាត់ការប្រើប្រាស់យន្តហោះចម្បាំង Gripen ក្នុងការវាយប្រ.ហារដែនអាកាសទេ ។

កាលពីថ្ងៃទី២៥ ខែសីហា ឆ្នាំ២០២៥ លោក ផាន់ភក្តី ផាត់ថាណាគុន មេបញ្ជាការកងទ័ពអាកាសថៃបានផ្តល់សម្ភាសន៍ជាមួយសារព័ត៌មាន ក្រោយពីថៃចុះហត្ថលេខាជាមួយស៊ុយអែតលើគម្រោងទិញយន្តហោះចម្បាំង Gripen E/F ដំណាក់កាលដំបូងចំនួន៤គ្រឿង ស្មើទឹកប្រាក់១៩,៥០០លានបាត ថា ស៊ុយអែតពុំបានហាមឃាត់ការប្រើប្រាស់យន្តហោះចម្បាំងក្នុងការវាយប្រ.ហារដែនអាកាសទេ ថៃអាចប្រើប្រាស់យន្តហោះចម្បាំងការពារប្រទេស ប៉ុន្តែត្រូវគោរពគោលការណ៍អន្តរជាតិ ។

កងទ័ពអាកាសថៃនឹងសិក្សាពីការប្រើប្រាស់យន្តហោះចម្បាំង Gripen បន្ថែមទៀត ដូចជា ៖ ការផ្ទេរច្ចេកវិទ្យាយន្តហោះដើម្បីបង្កើតមូលដ្ឋានគ្រឹះដ៏រឹងមាំសម្រាប់ឧស្សាហកម្មការពារប្រទេស ព្រមទាំងសហការជាមួយកងទ័ពជើងគោក កងទ័ពជើងទឹក និងវិស័យសន្តិសុខផ្សេងៗនាថ្ងៃអនាគត ។

ថៃទិញយន្តហោះចម្បាំង Gripen មិនមែនដោយសារវាមានទំហំធំទេ ប៉ុន្តែដោយសារអាចប្រតិបត្តិការយ៉ាងមានប្រសិទ្ធភាព ។ ការទិញយន្តហោះចម្បាំងបន្ថែមជាច្រើនគ្រឿង គឺសម្រាប់ការពារប្រទេសថៃនៅភាគខាងកើត និងភាគឦសាន ហើយកងទ័ពអាកាសថៃជឿថា យន្តហោះចម្បាំងទិញលើកចុងក្រោយនេះ នឹងអាចប្រើប្រាស់មានប្រសិទ្ធភាពខ្លាំងជាងយន្តហោះចម្បាំងទិញលើកមុន ។ នេះបើតាមការលើកឡើងរបស់លោក ផាន់ភក្តី ផាត់ថាណាគុន មេបញ្ជាការកងទ័ពអាកាស ។

លោកបន្តថា ថៃមានគម្រោងទិញយន្តហោះចម្បាំងយូរហើយ តាំងពីមុនពេលមានសង្គ្រាមជាមួយកម្ពុជា ហើយថៃនឹងពុំប្រើប្រាស់យន្តហោះចម្បាំងនេះធ្វើឱ្យប៉ះពាល់ប្រទេសណាទេ ។ ប៉ុន្តែពេលសង្គ្រាមកើតឡើង ថៃចាំបាច់ត្រូវប្រើប្រាស់យន្តហោះចម្បាំងក្នុងសង្គ្រាមដើម្បីផ្តល់ទំនុកចិត្តដល់ពលរដ្ឋ និងការពារសន្តិសុខប្រទេសខ្លួន ។ លោកបានច្រានចោលព័ត៌មានដែលថា ស៊ុយអែតពុំលក់យន្តហោះចម្បាំងឱ្យថៃ គឺថៃបានជជែកជាមួយស៊ុយអែតរហូតមក និងពង្រឹងទំនាក់ទំនងកាន់តែខ្លាំងជាមួយស៊ុយអែត ។

លោកក៏បានអរគុណរដ្ឋាភិបាលថៃ ដែលមានគោលនយោបាយឱ្យកងទ័ពអាកាសទិញយន្តហោះចម្បាំងពីស៊ុយអែតបន្ថែម ។ មតិភាគច្រើនលើកឡើងថា ថៃចំណាយប្រាក់ច្រើនរហូតដល់៦៧,០០០លានបាតសម្រាប់ទិញយន្តហោះចម្បាំង ប៉ុន្តែអ្វីដែលកងទ័ព និងរដ្ឋាភិបាលថៃទទួលបាននឹងមានតម្លៃខ្ពស់ជាងប្រាក់ ពីព្រោះយន្តហោះចម្បាំងនឹងជួយពង្រឹងភាពរឹងមាំផ្នែកកងទ័ព និងសេដ្ឋកិច្ចនាថ្ងៃអនាគត ជាពិសេស កងទ័ពថៃបានសហការជាមួយស៊ុយអែតរយៈពេល១៧ឆ្នាំហើយ ។

ចុងក្រោយ មេបញ្ជាការកងទ័ពអាកាសថៃបញ្ជាក់ថា ស៊ុយអែតពុំបានហាមឃាត់ថៃប្រើប្រាស់យន្តហោះចម្បាំង Gripen ក្នុងការវាយប្រ.ហារដែនអាកាសទេ ថៃអាចប្រើប្រាស់យន្តហោះចម្បាំងការពារប្រទេស និងគ្រប់ការបំពេញភារកិច្ច ប៉ុន្តែត្រូវគោរពគោលការណ៍អន្តរជាតិក្នុងការប្រតិបត្តិការយន្តហោះចម្បាំង ។

ស៊ុយអែតធ្លាប់មានកេរ្តិ៍ឈ្មោះល្អក្នុងការគោរពសិទ្ធិមនុស្សជាមូលដ្ឋានគ្រឹះនៃគោលនយោបាយការបរទេសរបស់ខ្លួន ពេលនេះ បែរជាបង្ហាញទង្វើផ្ទុយតាមរយៈការលក់យន្តហោះចម្បាំងឱ្យថៃដើម្បីប្រើប្រាស់ឈ្លានពានប្រទេសជិតខាងទៅវិញ ។ ការសម្រេចចិត្តរបស់រដ្ឋាភិបាលស៊ុយអែតក្នុងការសហការលក់យន្តហោះចម្បាំងឱ្យថៃពេលស្ថានការណ៍តានតឹង នឹងធ្វើឱ្យស៊ុយអែតបាត់បង់កិត្យានុភាពលើការលើកកម្ពស់សិទ្ធិមនុស្ស ៕

ប្រទេសថៃ ៖ សម្តីរបស់អនុរដ្ឋមន្ត្រីក្រសួងការពារជាតិថៃ លោក ណាត់ថាផុង ណាកផានិច កាន់តែព្រហើន និងបញ្ជាក់ថា ថៃពុំចង់បានសន្តិភាពដូចការលើកឡើងឡើយ ពីព្រោះបច្ចុប្បន្ន កម្ពុជា-ថៃកំពុងអនុវត្តកិច្ចព្រមព្រៀងបទឈប់បា.ញ់ និងចរចាគ្នាដើម្បីស្វែងរកសន្តិភាពនៅតំបន់ព្រំដែន បែរជាលោក ណាត់ថាផុង បើកដៃឱ្យកងទ័ពខ្លួនបា.ញ់កងទ័ពខ្មែរបើសង្ស័យបង្កប់មីនក្នុងទឹកដីថៃ ។ លើសពីនេះ លោកថែមទាំងត្រៀមប្តឹងពលរដ្ឋខ្មែរដែលរុះរើបន្លាលួសនៅភូមិព្រៃចាន់ក្នុងទឹកដីកម្ពុជាទៀតផង ។

តាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី២៦ ខែសីហា ឆ្នាំ២០២៥ ឱ្យដឹងថា លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិត្រៀមប្តឹងពលរដ្ឋខ្មែរដែលរុះរើបន្លាលួសនៅភូមិព្រៃចាន់ស្ថិតក្នុងទឹកដីកម្ពុជា ព្រមទាំងប្រើប្រាស់កម្លាំងសមត្ថកិច្ចបង្ក្រាបពលរដ្ឋខ្មែរ ។ លោកឯកភាពជាមួយលោក ប៊ុនស៊ីន ផាកក្លាង មេបញ្ជាការយោធភូមិភាគ២ បើកដៃឱ្យកងទ័ពថៃបា.ញ់កងទ័ពខ្មែរបើសង្ស័យបង្កប់មីន បើទោះជាកម្ពុជា-ថៃកំពុងអនុវត្តបទឈប់បា.ញ់ក្តី ។

នាវេលាម៉ោង៩និង៥៥នាទី ថ្ងៃទី២៦ ខែសីហា នៅវិមានរដ្ឋាភិបាល លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិបានផ្តល់សម្ភាសន៍ជាមួយសារព័ត៌មានអំពីកងទ័ពថៃចូលមកឈ្លានពានជាថ្មីនៅភូមិព្រៃចាន់ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ និងត្រូវបានពលរដ្ឋខ្មែរសាមគ្គីគ្នាបណ្តេញចេញថា លោកអភិបាលខេត្តស្រះកែវ នឹងធ្វើដំណើរមកជួបពលរដ្ឋថៃក្នុងតំបន់នេះ ។

កងទ័ពភូមិភាគ១ និងកងកម្លាំងប៊ូរ៉ាផា បានយកបន្លាលួសមករាយលើទឹកដីកម្ពុជាបន្ថែមទៀតខុសពីកន្លែងដើមដើម្បីការពារកុំឱ្យពលរដ្ឋខ្មែរតវ៉ា ប៉ុន្តែលោក ណាត់ថាផុង បែរជានិយាយបំភ្លៃថា ភូមិព្រៃចាន់ជាទឹកដីថៃ ពលរដ្ឋខ្មែរពុំអាចតវ៉ាបានទេ ពីព្រោះល្មើសច្បាប់ព្រហ្មទណ្ឌពីបទបំផ្លាញទ្រព្យសម្បត្តិថៃទៅវិញ ។ លោកបើកដៃឱ្យកងទ័ពថៃចាត់វិធានការពលរដ្ឋខ្មែរតាមច្បាប់ បើហ៊ានតវ៉ាដូចកាលពីថ្ងៃទី២៥ ខែសីហា ទៀត ពីព្រោះពលរដ្ឋថៃទទួលយកមិនបានទេ ដែលឃើញពលរដ្ឋខ្មែរតវ៉ានឹងការឈ្លានពានរបស់ថៃ ។

លោក ណាត់ថាផុង បានបញ្ជាឱ្យផ្ញើលិខិតតវ៉ាតាមរយៈក្រសួងការបរទេស និងអះអាងថា ភូមិព្រៃចាន់ជាទឹកដីថៃ ពលរដ្ឋខ្មែរពុំអាចតវ៉ាទេ ។ ការបង្ក្រាបពលរដ្ឋខ្មែរ គឺកងទ័ពថៃចាប់ផ្តើមប្រើប្រាស់ឧបករណ៍ LRAD ដើម្បីបំបែកហ្វូងមនុស្ស ហើយថៃនឹងពង្រាយកងទ័ពបន្ថែមទៀតនៅភូមិព្រៃចាន់ ។ លោកថា កងទ័ពខ្មែរគាំទ្រឱ្យពលរដ្ឋខ្មែរទាមទារយកទឹកដីវិញ ថៃនឹងយកបញ្ហានេះជជែកក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) នាដើមខែកញ្ញា ឆ្នាំ២០២៥ ។

លោកឯកភាពជាមួយលោក ប៊ុនស៊ីន ផាកក្លាង មេបញ្ជាការយោធភូមិភាគ២ ដែលបើកដៃឱ្យកងទ័ពថៃបា.ញ់កងទ័ពខ្មែរបើសង្ស័យបង្កប់មីន ទោះជាកម្ពុជា-ថៃកំពុងអនុវត្តបទឈប់បា.ញ់ក្តី ដោយលោកថា មិនមែនថៃអនុវត្តបទឈប់បាញ់រួចហើយ កងទ័ពថៃពុំអាចបាញ់នោះទេ ។ ក្រសួងការពារជាតិបានផ្តល់អំណាចឱ្យមេបញ្ជាការកងទ័ពរួចហើយ បច្ចុប្បន្ន កងទ័ពថៃបានត្រៀមខ្លួន និងត្រៀមជម្លៀសពលរដ្ឋ បើមានសង្គ្រាមកើតឡើងម្តងទៀត ដូចជា ៖ អភិបាលខេត្តសុរិន្ទបានរៀបចំកន្លែងភៀសសឹកបន្ថែម ពីព្រោះពុំដឹងពីស្ថានការណ៍មុន ។

គួរបញ្ជាក់ថា ថ្មីៗនេះ លោក ប៊ុនស៊ីន ផាកក្លាង បានបើកដៃឱ្យកងទ័ពថៃបាញ់គំរាម បើសង្ស័យកងទ័ពខ្មែរបង្កប់មីន ហើយបើកងទ័ពខ្មែរនៅតែពុំព្រមចាកចេញទៀត កងទ័ពថៃអាចបាញ់ភ្លាមៗនៅកន្លែង ។ ថៃតែងតែចោទប្រកាន់កម្ពុជាបង្កប់មីនថ្មី និងរកលេសផ្ទុះអាវុធមុនជាមួយកម្ពុជា ដែលទង្វើបែបនេះបញ្ជាក់ថា ថៃនៅតែចង់បង្កសង្គ្រាម និងពុំគោរពបទឈប់បាញ់ ទោះជាកម្ពុជាបញ្ជាក់ម្តងហើយម្តងទៀតថា កងទ័ពកម្ពុជាពុំបានបង្កប់មីនក្នុងទឹកដីថៃ ហើយភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតលើទីតាំងរបស់ភាគីម្ខាងទៀត ៕