ប្រទេសថៃ ៖ ក្រោយពីពលរដ្ឋខ្មែរសាមគ្គីគ្នាបណ្តេញកងទ័ពឈ្លានពានថៃដែលយកបន្លាលួសមករាយនៅភូមិជោគជ័យ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ដើម្បីទន្ទ្រានយកដីភូមិ ដីផ្លូវ និងចម្ការរបស់ពលរដ្ឋខ្មែរ នាយករដ្ឋមន្ត្រីស្តីទីថៃបានបង្ហាញការគាំទ្រកងទ័ពរបស់ខ្លួនយ៉ាងពេញទំហឹង និងសន្យាផ្តល់ឧបករណ៍ប្រើប្រាស់គ្រប់ប្រភេទ បើកងទ័ពត្រូវការបន្ទាន់ ។ លោកប្រាប់ឱ្យកងទ័ពនៅព្រំដែនរាយការណ៍បើចង់បានឧបករណ៍អ្វី រដ្ឋាភិបាលនឹងផ្តល់ឱ្យភ្លាម ពីព្រោះព្រំដែនកម្ពុជា-ថៃជាបញ្ហាសំខាន់របស់ប្រទេស ។

សារព័ត៌មានថៃ Khaosod បានផ្សព្វផ្សាយនៅថ្ងៃទី២៦ ខែសីហា ឆ្នាំ២០២៥ ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយក្នុងកិច្ចប្រជុំគណៈរដ្ឋមន្ត្រីឱ្យស្ថាប័នទាំងអស់គាំទ្រការបំពេញភារកិច្ចនៅព្រំដែនរបស់កងទ័ព បើកងទ័ពចង់បានឧបករណ៍អ្វី ត្រូវរាយការណ៍មកមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ គឺរដ្ឋាភិបាលនឹងផ្តល់ឱ្យភ្លាម ។ ក្រៅពីនេះ លោកបានបញ្ជាឱ្យស្ថាប័នពាក់ព័ន្ធបង្ក្រាបការឆបោកអនឡាញនៅប្រទេសថៃ ដែលកំពុងតែកើនឡើងជាបន្តបន្ទាប់ ។

នៅថ្ងៃទី២៦ ខែសីហា នៅវិមានរដ្ឋាភិបាល លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃបាននិយាយក្រោយកិច្ចប្រជុំគណៈរដ្ឋមន្ត្រីថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបាននិយាយក្នុងកិច្ចប្រជុំគណៈរដ្ឋមន្ត្រីឱ្យគ្រប់ស្ថាប័នពាក់ព័ន្ធគាំទ្រការបំពេញភារកិច្ចនៅព្រំដែនរបស់កងទ័ព និងផ្តល់ឧបករណ៍ប្រើប្រាស់ ក៏ដូចជាធនធាន ។

លោក ភូមិថាំ ក៏បានអរគុណកងទ័ពទាំងអស់ដែលប្រចាំការនៅតាមព្រំដែនគ្រប់តំបន់ ជាពិសេស អរគុណកងទ័ពនៅព្រំដែនកម្ពុជា-ថៃ ដោយលោកចោទប្រកាន់ថា មានការញុះញង់ផ្សេងៗពីកម្ពុជា ។ ហេតុនេះ បើកងទ័ពថៃត្រូវការឧបករណ៍ប្រើប្រាស់ ឬធនធានបន្ទាន់ កងទ័ពអាចរាយការណ៍មកកាន់មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ដើម្បីឱ្យមជ្ឈមណ្ឌលនេះទំនាក់ទំនងមករដ្ឋាភិបាលបញ្ជូនឧបករណ៍ឱ្យកងទ័ពភ្លាមៗ ពីព្រោះស្ថានការណ៍ព្រំដែនជាបញ្ហាសំខាន់របស់ប្រទេស ។

ក្រៅពីនេះ លោក ភូមិថាំ បានបញ្ជាឱ្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃអនុវត្តការងារសម្រេចបានលទ្ធផល និងពង្រឹងផ្នែកកងទ័ព ទំនាក់ទំនងក្រៅប្រទេស ការជូនដំណឹង រួមទាំងការអនុវត្តការងាររបស់សមត្ថកិច្ច ក្រសួងមហាផ្ទៃ និងការចាត់វិធានការផ្សេងៗ ដូចជា ៖ រឹតបន្តឹងហាមឃាត់ពលរដ្ឋខ្មែរកុំឱ្យតវ៉ានៅភូមិជោគជ័យ ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ និងបង្ក្រាបការឆបោកអនឡាញ ។

កាលពីរសៀលថ្ងៃទី២៥ ខែសីហា ពលរដ្ឋខ្មែរជាច្រើននាក់បានសាមគ្គីគ្នាកាន់ដំបងម្នាក់មួយតវ៉ាប្រឆាំងកងទ័ពថៃ ដែលប្រមូលកម្លាំងមកព័ទ្ធបន្លាលួសយកដីរបស់ពួកគាត់នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ ការទន្ទ្រានយកដីពលរដ្ឋខ្មែរពីសំណាក់កងទ័ពថៃធ្វើឱ្យពលរដ្ឋខ្មែរឈឺចាប់ទូទាំងប្រទេស ប៉ុន្តែពលរដ្ឋថៃបែរជាគាំទ្រ និងជំរុញឱ្យកងទ័ពខ្លួនបន្តការឈ្លានពាន ។ នៅថ្ងៃទី២៦ ខែសីហា ពលរដ្ឋថៃជាច្រើនបានធ្វើដំណើរមកប្រមូលផ្តុំគ្នានៅព្រំដែនគាំទ្រការឈ្លានពានរបស់កងទ័ពថៃ និងអំពាវនាវឱ្យរដ្ឋាភិបាលថៃបណ្តេញពលរដ្ឋខ្មែរចេញពីលំនៅឋាន ៕

ប្រធានធិបតីអាមេរិក លោក ដូណាល់ត្រាំ គ្រោងនឹងប្តូរឈ្មោះ ក្រសួងការពារជាតិអាមេរិក ទៅជានាយកដ្ឋានសង្គ្រាមជំនួសវិញ។

លោក ត្រាំ បានលើកឡើងថា៖”នាយកដ្ឋានសង្គ្រាម គឺជាឈ្មោះចាស់ ដែលអាមេរិកធ្លាប់បានប្រើក្នុងជ័យជំនះសង្គ្រាមលោកលើកទី១ និងសង្គ្រាមលោកលើក២”។

នាយកដ្ឋានសង្គ្រាម ត្រូវបានបង្កើតឡើងដោយប្រធានាធិបតីលោក George Washington ក្នុងឆ្នាំ ១៧៨៩ មានតួនាទីប្រតិបត្តិការ និងថែរក្សាកងទ័ពសហរដ្ឋអាមេរិក។

លុះដល់ ចប់សង្គ្រាមលោកលើកលើទី២ បាន៤ឆ្នាំ ពោលនៅឆ្នាំ ១៩៤៩ ប្រធានាធិបតីអាមេរិកលោក Harry Truman ក៏បានប្តូរឈ្មោះមកជាក្រសួងការពារជាតិវិញ។

លោក Harry Truman យល់ឃើញថា ក្រសួងការពារជាតិ មានតួនាទីថែរក្សាការពារបូរណាភាពទឹកដី បើដាក់ឈ្មោះ “នាយកដ្ឋានសង្គ្រាម” ហាក់បីដូចជាផ្តោតទៅលើតែការធ្វើសង្គ្រាម ដែលអាចប៉ះពាល់ដល់សន្តិសុខជាតិអាមេរិក៕

ប្រធានាធិបតីអាមេរិក លោក ដូណាល់ ត្រាំ បានបញ្ជានាវាពិឃាត៣គ្រឿង អមជាមួយទាហានម៉ារីន៤ពាន់នាក់ ចូលទៅកាន់តំបន់មួយស្ថិតនៅក្បែរដែនទឹកប្រទេសវ៉េណេស៊ុយអេឡា។
ការដាក់ពង្រាយកងទ័ពជើងទឹកអាមេរិកនេះ ធ្វើឡើងដើម្បីប្រយុទ្ធជាមួយក្រុមឧក្រិដ្ឋជនគ្រឿងញៀន ដែលអាមេរិកសង្ស័យថា ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolás Maduro) ជាមេកើយនៅពីក្រោយ។

ជាការឆ្លើយតប លោក ម៉ាឌូរ៉ូ (Maduro) បានពង្រាយកងជីវពលជាង ៤.៥លាននាក់នៅជុំវិញប្រទេស ដោយប្ដេជ្ញាការពារប្រឆាំងនឹងការឈ្លានពានអាមេរិក។

ភាពតានតឹងរបស់ប្រទេសទាំងពីរ កើតឡើង ក្រោយពីរដ្ឋាភិបាលោកត្រាំ បានប្រកាសផ្តល់រង្វាន់៥០លានដុល្លារ ក្នុងការផ្តល់ព័ត៌មាន ដែលឈានដល់ការឃាត់ខ្លួនលោក ម៉ាឌូរ៉ូ (Maduro)។

គួរបញ្ជាក់ថា លោក នីកូឡាស ម៉ាឌូរ៉ូ ត្រូវបានរដ្ឋអាជ្ញាអាមេរិក តាមឃាត់ខ្លួនតាំងពីឆ្នាំ២០២០ ដោយចោទថាលោកជាមនុស្សនៅពីក្រោយ ការសមគំនិតរត់ពន្ធកូកាអ៊ីន អាភៀន និងគ្រឿងញៀនដ៏ច្រើនសន្ធឹកសន្ធាប់ចូលទៅក្នុងទឹកដីសហរដ្ឋអាមេរិក៕

(ភ្នំពេញ)៖ ប្រទេសស៊ុយអែតធ្លាប់ដកស្ថានទូតពីប្រទេសកម្ពុជា ដោយថាកម្ពុជាមានកម្រិតសិទ្ធិមនុស្ស និងលទ្ធិប្រជាធិបតេយ្យខ្សោយ ខុសពីគោលនយោបាយរបស់ស៊ុយអែតដែលប្រកាន់យកសិទ្ធិមនុស្សជាធំ។ ប៉ុន្តែក្រោយមក ប្រទេសដដែលនេះបែរជាតាំងទីស្ថានទូតនៅកូរ៉េខាងជើង ដែលមានការប្រកាន់យកសិទ្ធិមនុស្សទាបខ្លាំង ព្រមទាំងការលក់យន្តហោះចម្បាំង Gripen ទៅឲ្យប្រទេសថៃ។ នេះសបញ្ជាក់ឲ្យឃើញថា ពាក្យសំដីទាំងនោះ ពេលខ្លះគ្រាន់ជាការបិទបាំងដើម្បីផលប្រយោជន៍ផ្ទាល់ខ្លួន ឬគោលបំណងនយោបាយប៉ុណ្ណោះ។ នេះបើតាមពាក្យសម្ដីរបស់បណ្ឌិត សឺន សំ អ្នកជំនាញវិទ្យាសាស្ត្រនយោបាយនៃរាជបណ្ឌិត្យសភាកម្ពុជា។

នៅថ្ងៃទី២៦ ខែសីហា ឆ្នាំ២០២៥ លោក សឺន សំ បានបង្ហោះសំណេរនៅលើហ្វេសប៊ុកជាមួយនឹងន័យសេចក្ដីថា៖ ប្រទេសស៊ុយអែត បានសម្រេចចិត្តដកស្ថានទូតចេញពីប្រទេសកម្ពុជា ដោយលើកហេតុផលថាមានការធ្លាក់ចុះខ្លាំងនៃសិទ្ធិមនុស្ស និងលទ្ធិប្រជាធិបតេយ្យ ប៉ុន្តែបែរជាទៅបើកស្ថានទូតឡើងវិញនៅកូរ៉េខាងជើង ជាប្រទេសមួយដែលមានកំណត់ត្រាសិទ្ធិមនុស្ស និងលទ្ធិប្រជាធិបតេយ្យអន់ជាងកម្ពុជាទៅទៀត។ មិនត្រឹមតែប៉ុណ្ណោះ ពេលនេះស៊ុយអែតថែមទាំងបានលក់យន្តហោះទម្លាក់គ្រាប់បែកទៅឱ្យប្រទេសផ្សេងទៀត ដែលបានប្រើប្រាស់សព្វាវុធទាំងនោះដើម្បីវាយប្រហារនៅកម្ពុជា បណ្តាលឱ្យជនស្លូតត្រង់ជាច្រើនបាត់បង់ជីវិត។

លោក សឺន សំ បន្ថែមថា សកម្មភាពបែបនេះបានបង្ហាញឱ្យឃើញច្បាស់ថា ការនិយាយអំពីសិទ្ធិមនុស្ស និងលទ្ធិប្រជាធិបតេយ្យ ជួនកាលគ្រាន់តែជាពាក្យសំដីដ៏ស្រស់ស្អាតដែលប្រើដើម្បីបិទបាំងផលប្រយោជន៍ផ្ទាល់ខ្លួន ឬគោលបំណងនយោបាយប៉ុណ្ណោះ។ ពាក្យសំដីទាំងនោះ ទោះបីជាស្តាប់ទៅហាក់មានឧត្តមគតិក៏ដោយ ប៉ុន្តែបើគ្មានការអនុវត្តជាក់ស្តែងដែលស្របនឹងគោលការណ៍ទាំងនោះទេ វាគ្រាន់តែជាពាក្យទទេប៉ុណ្ណោះ។ ផ្ទុយទៅវិញ អ្វីដែលសំខាន់គឺត្រូវសង្កេតមើលទង្វើជាក់ស្តែង និងផលប៉ះពាល់នៃសកម្មភាពទាំងនោះ ដើម្បីវាយតម្លៃថាតើមានភាពស្មោះត្រង់ ឬគ្រាន់តែជាការប្រើឧត្តមគតិជាលេសដើម្បីសម្រេចផលប្រយោជន៍ផ្សេង។

លោកបានគូសបញ្ជាក់ជាចុងក្រោយថា ដូច្នេះ នៅពេលដែលគេនិយាយអំពីសិទ្ធិមនុស្ស ឬលទ្ធិប្រជាធិបតេយ្យ យើងគួរតែប្រុងប្រយ័ត្ន និងពិនិត្យឱ្យច្បាស់លាស់អំពីបរិបទ និងគោលបំណងនៅពីក្រោយ។ ការវិនិច្ឆ័យមិនគួរផ្អែកតែលើពាក្យសំដីដ៏ល្អផូរផង់នោះទេ ប៉ុន្តែត្រូវផ្អែកលើទង្វើ និងលទ្ធផលជាក់ស្តែងដែលអាចវាស់វែងបាន។ តាមរយៈការសង្កេតបែបនេះ យើងនឹងអាចស្វែងយល់បានកាន់តែច្បាស់អំពីភាពស្មោះត្រង់ និងគោលបំណងពិតប្រាកដនៅពីក្រោយការប្តេជ្ញាចិត្តទាំងនោះ។

គួរជម្រាបថា ការលើកឡើងរបស់លោក បណ្ឌិត សឺន សំ ដូចខាងលើនេះ ត្រូវបានធ្វើឡើង បន្ទាប់ពីការប្រកាសនូវកិច្ចព្រមព្រៀងរវាងប្រទេសស៊ុយអែត និង ថៃ ក្នុងការទិញ-លក់យន្តហោះចម្បាំង Saab Gripen ចំនួន4 គ្រឿង ដើម្បីយកមកប្រតិបត្តិការនៅព្រំដែនជាប់កម្ពុជា។ ការបញ្ជាទិញយន្តហោះបន្ថែមរបស់ថៃ ចំពេលជម្លោះព្រំដែនជាមួយកម្ពុជាមិនទាន់មានភាពធូរស្បើយនៅឡើយនេះ អាចចាត់ទុកបានថាជាការគំរាមកំហែងមកលើកម្ពុជាតាមរយៈការដំឡើងសាច់ដុំជាសព្វាវុធទំនើបៗ ហើយវានឹងជំរុញឲ្យស្ថានការណ៍កាន់តែតានតឹងខ្លាំងឡើង៕

(បាងកក)៖ អ្នកស្រី Mallika Boonmeetrakul Mahasuk អ្នកនយោបាយវ័យចំណាស់ថៃដែលនិយាយស្ដីមិនសូវដឹងល្ហើយ និងធ្លាប់ប្រមា.ថមើលងាយខ្មែរ ត្រូវបានអតីតរដ្ឋមន្ត្រីការបរទេសថៃប្ដឹ.ងពីបទបរិហាកេរ្តិ៍ ព្រមទាំងនិយាយឌឺដងយ៉ាងដូច្នេះថា ប្រាក់សំណងដែលលោកទទួលបានពីបណ្ដឹងនេះ នឹងត្រូវឧបត្ថម្ភដល់មន្ទីរពេទ្យផ្លូវចិត្ត ដើម្បីជួយដល់មនុស្សដែលមានបញ្ហាដូចជាលោកស្រី។

អតីតរដ្ឋមន្ត្រីការបរទេសថៃ លោក Noppadon Pattama បានឲ្យដឹងនៅថ្ងៃទី២៥ ខែសីហា ឆ្នាំ២០២៥ ថា លោកបានដាក់ពាក្យបណ្តឹងទៅកាន់អ្នកស្រី Mallika Boonmeetrakul Mahasuk
ពីបទបរិហាកេរ្តិ៍ ហើយលោកបានបញ្ជាក់ថា បណ្តឹងនេះ នឹងមិនមានការយោគយល់ឡើយ។

តាមការផ្សាយរបស់ទូរទស្សន៍ Amarin TV របស់ថៃកាលពីថ្ងៃចន្ទ ទី២៥ ខែសីហា ឆ្នាំ២០២៥, លោក Noppadon បានប្រាប់អ្នកកាសែតថា បញ្ហានេះបានចាប់ផ្តើមនៅពេលអ្នកស្រី Mallika ផ្តល់បទសម្ភាសន៍ដល់បណ្តាញសារព័ត៌មានចំនួនពីរ ដោយអះអាងថា លោកជាអ្នកធ្វើឲ្យប្រទេសថៃបាត់បង់ទឹកដីជុំវិញប្រាសាទព្រះវិហារ ប៉ុន្តែនោះគឺជាការចោ.ទប្រកាន់ដែលមិនត្រឹមត្រូវ ហើយលោកបានធ្វើការច្រានចោលទាំងស្រុង។

បន្ថែមពីនេះ នៅពេលអ្នកសារព័ត៌មានសួរលោកថា តើអាចមានការសម្រុះសម្រួលជាមួយអ្នកស្រី Mallikaទេ? លោក Noppadon បានបញ្ជាក់ថា នឹងគ្មានការយោគយល់ឡើយនៅក្នុងបណ្តឹងនេះ ហើយករណីនេះនឹងត្រូវដំណើរការតាមផ្លូវច្បាប់ពេញលក្ខណៈ។ លើសពីនេះលោកបន្ថែមថា សម្រាប់ប្រាក់សំណងទាំងអស់ពីបណ្តឹងនេះ នឹងត្រូវបរិច្ចាគទៅជួយអ្នកដែលមានបញ្ហាផ្លូវចិត្ត។

គួរជម្រាបថា ក្នុងបទសម្ភាសន៍ជាច្រើនអ្នកស្រី Mallika តែងចោទប្រកាន់លោក Noppadon ម្តងហើយម្តងទៀត ថាជាអ្នកដែលធ្វើឲ្យបាត់បង់ប្រាសាទព្រះវិហារ ជាហេតុនាំឲ្យលោក Noppadon ទប់លែងជាប់ក៏សម្រេចដាក់ពាក្យបណ្តឹងទៅកាន់នាយកដ្ឋានបង្ក្រាបបទឧក្រិដ្ឋ (CSD) របស់ថៃតែម្តង៕

ប្រទេសថៃ ៖ មេបញ្ជាការយោធភូមិភាគ២ថៃ លោក ប៊ុនស៊ីន ផាកក្លាង ដែលល្បីល្បាញខាងបង្កសង្គ្រាមឈ្លានពានកម្ពុជា បាននិយាយក្តែងៗទៅកាន់និស្សិតនៅសាកលវិទ្យាល័យថា សង្គ្រាមអាចនឹងកើតឡើងម្តងទៀតជាមួយកម្ពុជា ហើយលោកចរចាដោយសន្តិវិធីក៏បាន ពុំចាំបាច់ចរចាក៏បានដែរ ពីព្រោះកងទ័ពថៃបានត្រៀមខ្លួនរួចហើយ ។ ការលើកឡើងបែបនេះ ស្របពេលកម្ពុជាមានជំនួបចរចាជាមួយថៃជាបន្តបន្ទាប់ដើម្បីស្វែងរកសន្តិភាព និងឱ្យស្ថានការណ៍ព្រំដែនត្រឡប់មកប្រក្រតីវិញ ប៉ុន្តែថៃនៅតែមានគំនិតឈ្លានពានមិនឈប់ឈរ ។

តាមការផ្សព្វផ្សាយរបស់សារព័ត៌មាន Thairath កាលពីថ្ងៃទី២៥ ខែសីហា ឆ្នាំ២០២៥ ឱ្យដឹងថា លោក ប៊ុនស៊ីន ផាកក្លាង មេបញ្ជាការយោធភូមិភាគ២ថៃ បាននិយាយពីសង្គ្រាមអាចកើតឡើងម្តងទៀតអាស្រ័យលើទង្វើរបស់កងទ័ពកម្ពុជានៅព្រំដែន បើកងទ័ពកម្ពុជាចាប់ផ្តើមបង្កហេតុមុន ថៃនឹងតបតរវិញ ។ ក្រៅពីនេះ លោកស្នើឱ្យភាគីថៃដែលចរចាជាមួយកម្ពុជា ត្រូវតែដើរឱ្យទាន់នយោបាយ និងគិតពីផលប្រយោជន៍ជាតិ ។

កាលពីថ្ងៃទី២៥ ខែសីហា លោក ប៊ុនស៊ីន ផាកក្លាង មេបញ្ជាការយោធភូមិភាគ២ បានទៅចូលរួមពិធីជួបជុំបុគ្គលិក និងនិស្សិតសាកលវិទ្យាល័យ Kasetsart ហើយពេលបញ្ចប់កម្មវិធី លោកក៏បានសន្ទនាពិសេសពីប្រធានបទ «រឿងពិតពីព្រំដែន» និងឆ្លើយតបសំណួររបស់និស្សិត ។ លោកថា ព្រំដែនកម្ពុជា-ថៃ គឺជាបញ្ហាទឹកដី បច្ចុប្បន្ន ភាគីទាំងសងខាងគិតថា ជាទឹកដីរបស់ខ្លួន បើប្រទេសទាំងពីរពុំអាចជជែកគ្នាបានទេ នឹងឈានទៅមានជម្លោះប្រើប្រាស់អាវុធ ។

លោកនិយាយថា រដ្ឋាភិបាលថៃបានចរចាជាមួយកម្ពុជា រីឯកងទ័ពត្រៀមខ្លួនចរចា ឬមិនចរចាក៏បាន ។ លោកចរចាជាមួយមេបញ្ជាការកងទ័ពកម្ពុជា ប៉ុន្តែចុងក្រោយ លោកពុំអាចសម្រេចចិត្តអ្វីបាន បើកើតសង្គ្រាម គឺនឹងមានផលប៉ះពាល់ដល់ប្រទេសទាំងសេដ្ឋកិច្ច និងសង្គម ។ បើបាត់បង់ផលប្រយោជន៍ ថៃនឹងពុំចរចា ថៃត្រូវតែដើរឱ្យទាន់នយោបាយ និងគិតពីផលប្រយោជន៍ជាតិ ដូចជា ៖ កម្ពុជានឹងយកបញ្ហាប្រាសាទទាំង៣ និងតំបន់១ ទៅដោះស្រាយនៅតុលាការយុត្តិធម៌អន្តរជាតិ (ICJ) គឺថៃនឹងពុំទទួលស្គាល់ ។

ថៃមានព្រំដែនជាប់ឡាវ មីយ៉ាន់ម៉ា និងម៉ាឡេស៊ី ប៉ុន្តែថៃពុំមានជម្លោះព្រំដែនជាមួយប្រទេសទាំង៣ ទេ ថៃមានជម្លោះព្រំដែនតែជាមួយកម្ពុជា ។ លោកអន់ចិត្តនឹងពលរដ្ឋថៃដែលសួរសំណួរថា តើប្រទេសថៃមានកងទ័ពសម្រាប់ធ្វើអ្វី? បើប្រទេសគ្មានសង្គ្រាម គឺកងទ័ពបានជួយសង្គ្រោះពលរដ្ឋ មិនថាជួយពេលទឹកជំនន់ អគ្គិភ័យ បង្ក្រាបថ្នាំញៀន ហើយកងទ័ពបានជួយអភិវឌ្ឍន៍ប្រទេសពេលបញ្ចប់សង្គ្រាម និងពុំគិតពីផលប្រយោជន៍ ។

ចុងក្រោយ លោកបាននិយាយពីសង្គ្រាមអាចកើតឡើងម្តងទៀតអាស្រ័យលើទង្វើរបស់កងទ័ពកម្ពុជានៅព្រំដែន ។ បើកងទ័ពកម្ពុជាចាប់ផ្តើម ឬបង្កហេតុមុន ថៃនឹងប្រើប្រាស់សិទ្ធិតបតរវិញ លោកនឹងបំពេញតួនាទីឱ្យល្អបំផុតរហូតដល់ពេលចូលនិវត្តន៍នៅថ្ងៃទី៣០ ខែកញ្ញា ខាងមុខ ។

លោក ប៊ុនស៊ីន ផាកក្លាង ទទួលបានការគាំទ្រពីពលរដ្ឋថៃយ៉ាងខ្លាំងតាំងពីលោកធ្វើសង្គ្រាមឈ្លានពានកម្ពុជា និងកុហកពលរដ្ឋថៃថា កម្ពុជាបង្កសង្គ្រាមមុន ថៃគ្រាន់តែប្រើប្រាស់សិទ្ធិការពារខ្លួន ។ ពលរដ្ឋថៃគាំទ្រឱ្យលោកបំពេញភារកិច្ចបន្តទៀត កុំទាន់ចូលនិវត្តន៍ ប៉ុន្តែត្រូវបានលោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបដិសេធ ដោយសារខុសពីប្រព័ន្ធការងារមន្ត្រីរាជការថៃ ។

លោក ប៊ុនស៊ីន ផាកក្លាង បាននិយាយពេលកន្លងមកថា ព្រះមហាក្សត្រថៃយកចិត្តទុកដាក់ខ្លាំងលើសភាពការណ៍ព្រំដែនជាមួយកម្ពុជា ហើយគ្រប់សភាពការណ៍ទាំងអស់កងទ័ពត្រូវតែរាយការណ៍ឱ្យព្រះអង្គជ្រាប ។ ហេតុនេះ សង្គ្រាមរវាងកម្ពុជា-ថៃកើតឡើងដោយសារព្រះមហាក្សត្រថៃចេញមុខ ដែលព្រះអង្គមានរឿងអាស្រូវជាច្រើនមុនពេលឡើងគ្រងរាជ្យ ៕