ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon កាលពីថ្ងៃទី៥ ខែកក្កដា ឆ្នាំ២០២៥ ឱ្យដឹងថា នាយកដ្ឋានការងារថៃនឹងអនុញ្ញាតឱ្យពលករខ្មែរ ចំនួន៤ម៉ឺន៧ពាន់នាក់ ដែលមានលិខិតធ្វើការអស់សុពលភាពអាចធ្វើការនៅប្រទេសថៃបន្តទៀតជាបណ្តោះអាសន្នរហូតដល់ព្រំដែនបើកឡើងវិញ ។ នាយកដ្ឋានការងារត្រៀមស្នើទៅគណៈរដ្ឋមន្ត្រីពិចារណាឱ្យពលរដ្ឋខ្មែរស្នាក់នៅបន្ត ហើយពេលព្រំដែនកម្ពុជា-ថៃបើកដំណើរការប្រក្រតី គឺពលករខ្មែរត្រូវធ្វើដំណើរចាកចេញពីប្រទេសថៃក្នុងរយៈពេល៧ថ្ងៃដើម្បីធ្វើឯកសារ ។

កាលពីថ្ងៃទី៥ ខែកក្កដា អគ្គនាយកនៃនាយកដ្ឋានការងារ លោក ស៊ុមឆាយ មរកតស៊ីវ៉ាន់ ឱ្យដឹងថា ក្រោយពីបានប្រជុំពិភាក្សាជាមួយអ្នកតំណាងភ្នាក់ងារសន្តិសុខ រួមមាន ៖ កងទ័ពជើងគោក កងទ័ពជើងទឹក ក្រសួងការពារជាតិ ក្រសួងមហាផ្ទៃ ភ្នាក់ងាររក្សាសន្តិសុខផ្ទៃក្នុង និងការិយាល័យក្រុមប្រឹក្សាសន្តិសុខជាតិ ស្តីពីពលករខ្មែរនៅតាមព្រំដែនដែលកាន់ប័ណ្ណព្រំដែន (Border Pass) ពួកគេជួបការលំបាកយ៉ាងខ្លាំងពុំអាចឆ្លងដែនដោយសារវិធានការបិទព្រំដែន ។ នាយកដ្ឋានការងារបានទទួលដំណឹងពីខេត្តជាប់ព្រំដែនកម្ពុជាថា ពលករខ្មែរលំបាករឿងធ្វើឯកសារ ហើយសំណូមពរឱ្យប្រញាប់ដោះស្រាយបញ្ហានេះ ។

កិច្ចប្រជុំក៏សម្រេចឯកភាពឱ្យពលករខ្មែរអាចស្នាក់នៅ និងធ្វើការនៅប្រទេសថៃបន្តទៀត ប៉ុន្តែពលករត្រូវតែទៅបង្ហាញខ្លួននៅការិយាល័យអន្តោប្រវេសន៍ថៃ រៀងរាល់៣០ថ្ងៃ ។ នេះគ្រាន់តែជាវិធានការបណ្តោះអាសន្នដែលនាយកដ្ឋានការងារអនុញ្ញាតឱ្យពលករខ្មែរស្នាក់នៅថៃក្នុងករណីពិសេស រហូតដល់ព្រំដែនបើកឡើងវិញ ហើយពេលព្រំដែនបើកប្រក្រតី គឺពលករខ្មែរត្រូវធ្វើដំណើរចាកចេញពីប្រទេសថៃក្នុងរយៈពេល៧ថ្ងៃដើម្បីធ្វើឯកសារ ។

នាយកដ្ឋានការងារនឹងបញ្ជូនសំណើនេះទៅគណៈកម្មការគោលនយោបាយគ្រប់គ្រងពលករបរទេសដើម្បីពិចារណាអនុម័ត រួចហើយបញ្ជូនទៅគណៈរដ្ឋមន្ត្រីពិចារណាយ៉ាងឆាប់បំផុត បច្ចុប្បន្ន ភ្នាក់ងារសន្តិសុខនឹងគ្រប់គ្រង រួមទាំងរក្សាសណ្តាប់ធ្នាប់ ។ នេះបើតាមការលើកឡើងរបស់លោក ស៊ុមឆាយ អគ្គនាយកនៃនាយកដ្ឋានការងារ ។

លោក ស៊ុមឆាយ បន្តថា ថៅកែថៃនៅតែត្រូវការពលករខ្មែរឱ្យធ្វើការក្នុងផ្នែកកសិកម្ម រហូតដល់ដំណាច់ឆ្នាំ២០២៥ ជាពិសេស ការងារបេះផ្លែឈើតាមរដូវកាល ដូចជា ៖ បេះផ្លែមៀន ទុរេន និងមង្ឃុត ។ តាមធម្មតា លិខិតអនុញ្ញាតការងាររបស់ពលករខ្មែរមានរយៈពេល៩០ថ្ងៃ ហើយពលករក្រុមនេះមានចំនួនប្រមាណ៤ម៉ឺន៧ពាន់នាក់ ក្នុងនោះពលករចាប់ពី៧ពាន់នាក់ ទៅ៨ពាន់នាក់ នឹងជិតអស់សុពលភាពលិខិតអនុញ្ញាតការងារ ។ យើងនឹងមានវិធានការបន្ធូរបន្ថយដើម្បីឱ្យពួកគេអាចស្នាក់នៅ និងធ្វើការនៅថៃបណ្តោះអាសន្នរយៈពេលខ្លីៗ រហូតដល់ព្រំដែនកម្ពុជា-ថៃបើកឡើងវិញ ៕

ប្រទេសថៃ ៖ សារព័ត៌មានថៃរាយការណ៍ថា នៅថ្ងៃទី៧ ខែកក្កដា ឆ្នាំ២០២៥ ក្រុមអាជីវករថៃលក់ដូរនៅផ្សាររុងក្លឿ ព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ (ទល់មុខច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ) បានប្រមូលផ្តុំគ្នាតវ៉ាឱ្យរដ្ឋាភិបាល និងកងទ័ពបើកព្រំដែនជាមួយកម្ពុជាជាបន្ទាន់ ពីព្រោះការបិទព្រំដែនធ្វើឱ្យប៉ះពាល់ចំណូលរបស់អាជីវករធ្ងន់ធ្ងរ ជាពិសេស ចំណូលពីវិស័យទេសចរណ៍ ។ មុនពេលបិទព្រំដែន អាជីវករថៃទទួលបានចំណូលរហូតដល់រាប់ម៉ឺនបាតក្នុង១ខែ ប៉ុន្តែបច្ចុប្បន្ន រកចំណូលបានត្រឹម១០០បាត ឬ២០០បាតក្នុង១ថ្ងៃ ។

ការបិទព្រំដែនជាឯកតោភាគីពីសំណាក់កងទ័ពថៃក្រោមការបញ្ជាពីលោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ ធ្វើឱ្យព្រំដែនបានឃ្លងលឹក មានសភាពស្ងាត់ជ្រងំ ។ អាជីវករថៃនៅព្រំដែនពុំអាចអត់ធ្មត់នឹងស្ថានការណ៍បែបនេះទៀតទេ និងតវ៉ាទៅរដ្ឋាភិបាលប្រញាប់បើកព្រំដែនជាបន្ទាន់ ។ អាជីវករថៃថៃលើកស្លាកសញ្ញាសរសេរអក្សរធំៗថា ៖ «យើងយល់ពីកិត្តិយសរបស់ពួកអ្នក ប៉ុន្តែពលរដ្ឋរស់នៅព្រំដែនកំពុងដាច់ពោះស្លាប់ សូមយល់ពីពួកយើងខ្លះផង ។ ជម្លោះកើតឡើងនៅកន្លែងណា ហេតុអ្វីពុំដោះស្រាយនៅកន្លែងនោះ ពួកយើងលក់ដូរជាមួយពលរដ្ឋវៀតណាម និងខ្មែរ តើនឹងបណ្តោយបែបនេះឱ្យខូចខាត មែនទេ?» ។

ការតវ៉ាឱ្យបើកព្រំដែនកម្ពុជា-ថៃឡើងវិញធ្វើឡើងស្របពេលលោក រ៉ាំងស៊ិម៉ាន់ រ៉ូម សមាជិកសភា និងជាអនុប្រធានគណបក្សប្រជាជន មានតួនាទីជាគណៈកម្មកការសន្តិសុខរដ្ឋកិច្ចការព្រំដែនថៃ យុទ្ធសាស្ត្រជាតិ និងកំណែទម្រង់ បានចុះមកពិនិត្យមើលវិធានការបើក-បិទព្រំដែនកម្ពុជា-ថៃ នៅព្រំដែនបានឃ្លងលឹក-ច្រកព្រំដែនអន្តរជាតិប៉ោយប៉ែត ។

លោក រ៉ាំងស៊ិម៉ាន់ រ៉ូម សមាជិកសភា និយាយថា ព្រំដែនបានឃ្លងលឹក មានការលក់ដូរទំនិញ និងការធ្វើដំណើរឆ្លងដែនចេញ-ចូលរបស់ពលរដ្ឋប្រទេសទាំងពីរ ។ បច្ចុប្បន្ន ភាគីថៃបានបើកទ្វារព្រំដែន ប៉ុន្តែទ្វារព្រំដែនកម្ពុជាបិទ ហើយនៅថ្ងៃទី៧ ខែកក្កដា ពលរដ្ឋថៃបានមកតវ៉ាឱ្យកងទ័ពបើកព្រំដែនឡើងវិញដើម្បីឱ្យការលក់ដូរត្រឡប់មកធម្មតា ដោយសារការបិទព្រំដែនធ្វើឱ្យពលរដ្ឋថៃបាត់បង់ការងារ និងបារម្ភពីការលក់ដូររបស់ប្រទេសទាំងពីរនឹងដំណើរការដូចម្តេច?

កម្ពុជា និងថៃមានបញ្ហាច្រើន ក្នុងនោះក៏មានបញ្ហារវាងរដ្ឋាភិបាលនិងរដ្ឋាភិបាល រួមទាំងការបង្ក្រាបឧក្រិដ្ឋកម្មឆ្លងដែន ។ បើប្រទេសទាំងពីរគ្មានការលក់ដូរ គឺមិនត្រឹមតែប៉ះពាល់ពលរដ្ឋនៅស្រុកអារញ្ញប្រាថេត ខេត្តស្រះកែវប៉ុណ្ណោះទេ ប៉ុន្តែវានឹងប៉ះពាល់គ្រប់ផ្នែកទាំងអស់ ។ បើមានដំណោះស្រាយបញ្ហា វានឹងក្លាយជាប្រយោជន៍សម្រាប់ពលរដ្ឋខ្មែរ-ថៃ ។ កម្ពុជាប្រាប់ឱ្យថៃបើកព្រំដែនមុន ប៉ុន្តែការពិត ថៃពុំបានបិទព្រំដែន រដ្ឋាភិបាលថៃកំពុងអនុវត្តវិធានការទប់ស្កាត់កុំឱ្យពលរដ្ឋទៅធ្វើជាក្រុមឆបោកអនឡាញ ឬចូលកាស៊ីណូ ។

គួរបញ្ជាក់ថា ការតវ៉ារបស់អាជីវករថៃ គឺដឹកនាំដោយលោក ស៊ុឃួន ភួនស៊ីខាំ ជាឈ្មួញនាំចេញទំនិញថៃ ដោយលោកបានប្រគល់លិខិតឱ្យលោក រ៉ាំងស៊ិម៉ាន់ រ៉ូម សមាជិកសភា ដែលមានខ្លឹមសារ៧ចំណុច សូមឱ្យរដ្ឋាភិបាលពិនិត្យមើលវិធានការបិទព្រំដែន ពីព្រោះអាជីវកររងផលប៉ះពាល់ពុំអាចលក់ដូរបាន ខណៈអាជីវករនៅខេត្តឧប៊ុនរ៉ាជថានី និង៥ខេត្តទៀត ក៏លក់ដូរមិនដាច់ដែរ ។ ការបិទព្រំដែនពុំអាចជួយដោះស្រាយបញ្ហាទេ ប៉ុន្តែពលរដ្ឋថៃដែលរកស៊ីស្មោះត្រង់ប៉ះពាល់ធ្ងន់ ។ បើមានសង្គ្រាម ចាំគិតទៀត ពេលនេះ ពលរដ្ឋត្រូវចិញ្ចឹមគ្រួសារ បើចង់បិទព្រំដែន ត្រូវប្រាប់ពលរដ្ឋឱ្យត្រៀមខ្លួនជាមុន ។

ម្យ៉ាងទៀត ទំនិញថៃដែលនាំចេញតាមព្រំដែនបានឃ្លងលឹក គឺផលិតនៅទូទាំងប្រទេសថៃ ប៉ុន្តែការបិទច្រកនឹងធ្វើឱ្យប៉ះពាល់សេដ្ឋកិច្ច និងពលរដ្ឋថៃខ្លួនឯង ។ សូមអ្នកមានអំណាចពិនិត្យឡើងវិញ និងដោះស្រាយបញ្ហាឱ្យពលរដ្ឋ បើពុំដោះស្រាយទេ ផលប៉ះពាល់នឹងកើតឡើងថែមទៀត ។ ចុងក្រោយ លោក រ៉ាំងស៊ិម៉ាន់ សន្យាយកលិខិតតវ៉ារបស់អាជីវករថៃដាក់ជូនរដ្ឋាភិបាល ៕

ប្រទេសថៃ ៖ ពលរដ្ឋថៃរស់នៅខេត្តផាំងង៉ា បានរៀបចំសម្ភារៈ និងប្រមូលទ្រព្យសម្បត្តិមានតម្លៃជម្លៀសចេញពីលំនៅឋានទៅស្នាក់នៅកន្លែងមានសុវត្ថិភាព ដោយសារបារម្ភពីសុវត្ថិភាពក្រោយមានការផ្សព្វផ្សាយព័ត៌មានជាបន្តបន្ទាប់ថា ប្រទេសថៃនឹងកើតរលកយក្សស៊ូណាមិ ។ ក្រុមគ្រួសារខ្លះបាននាំកូនចៅ និងមនុស្សចាស់ទៅស្នាក់នៅក្នុងជម្រកបណ្តោះអាសន្ន ខណៈអ្នកខ្លះទៀតយករថយន្តទៅចតនៅទីខ្ពស់ ។ នេះបើតាមការផ្សព្វផ្សាយរបស់សារព័ត៌មាន Thairath កាលពីថ្ងៃទី៥ ខែកក្កដា ឆ្នាំ២០២៥ ។

ពលរដ្ឋរស់នៅភូមិណាមឃេម ឃុំបាងមួង ស្រុកតាក់គួប៉ា ខេត្តផាំងង៉ា បានភ័យជ្រួលច្របល់ខ្លាំងក្រោយមានពាក្យចចាមអារ៉ាមថា នឹងមានរលកយក្សស៊ូណាមិកើតឡើងនៅដើមខែកក្កដា ។ ពលរដ្ឋនៅទីនេះតាមដានស្ថានការណ៍គ្រោះធម្មជាតិជានិច្ច ព្រមទាំងត្រៀមខ្លួនជម្លៀសចាកចេញពីលំនៅឋានជាមុន ខណៈពលរដ្ឋខ្លះទៀតរៀបចំសម្ភារៈ និងជម្លៀសទ្រព្យសម្បត្តិមានតម្លៃ ដូចជា ៖ យករថយន្តទៅចតនៅកន្លែងមានសុវត្ថិភាព ។

កាលពីយប់ថ្ងៃទី៤ ខែកក្កដា កន្លងមក ពលរដ្ឋជាច្រើនដែលមានសមាជិកគ្រួសារជាមនុស្សចាស់ និងកុមារតូចៗបាននាំគ្នាជម្លៀសចេញពីភូមិណាមឃេម មកស្នាក់នៅជម្រកបណ្តោះអាសន្ន ។ នាព្រឹកថ្ងៃទី៥ ខែកក្កដា ពលរដ្ឋថៃជាច្រើននាក់ទៀតបានចេញមកសម្រាកនៅទីធ្លាក្រៅលំនៅឋាន ដោយសារបារម្ភបើមានរលកយក្សស៊ូណាមិកើតឡើង ខ្លាចពុំឮសំឡេងប្រកាសអាសន្នដែលអាជ្ញាធរដាក់នៅទីតាំងចំនួន២កន្លែង ។

ពលរដ្ឋបារម្ភថា បើមានរលកយក្សស៊ូណាមិកើតឡើ់ងពេលយប់ ពួកគេសម្រាកលក់ពុំឮសំឡេងប្រកាសអាសន្ន ទើបនាំគ្នាមកសម្រាកនៅក្រៅលំនៅឋាន ។ ការភ័យខ្លាចរបស់ពលរដ្ឋធ្វើឱ្យភូមិណាមឃេម ឃុំបាងមួង ស្រុកតាក់គួប៉ា ខេត្តផាំងង៉ា មានសភាពស្ងប់ស្ងាត់ខុសធម្មតា ដោយលំនៅឋាននីមួយៗបិទទ្វារ ក្រោយពីមានព័ត៌មានថា នឹងមានរលកយក្សស៊ូណាមិ និងគ្រោះរញ្ជួយដីកើតឡើង ជាពិសេស ពលរដ្ឋដែលធ្លាប់រងគ្រោះដោយសារគ្រោះធម្មជាតិកាលពីឆ្នាំ២០០៤ ពុំហ៊ានរស់នៅក្នុងលំនៅឋានឡើយ ។

អ្នកស្រី អាណុង សាយសុវណ្ណ អាយុ៦៨ឆ្នាំ និងកូនស្រី អាយុ៤៣ឆ្នាំ រស់នៅភូមិណាមឃេម ប្រាប់ថា នៅយប់ថ្ងៃទី៥ ខែកក្កដា អ្នកស្រីបានសម្រាកនៅក្រៅលំនៅឋានជាមួយកូន អ្នកស្រីបានត្រៀមឯកសារសំខាន់ៗក្នុងគ្រួសាររួចហើយ ។

ចំណែកអាជ្ញាធរឃុំបាងមួង បានរៀបចំផែនការទាំងការស្នាក់នៅ និងសុវត្ថិភាពពលរដ្ឋ ដោយបង្កើតជម្រកបណ្តោះអាសន្នដើម្បីឱ្យពលរដ្ឋមកស្នាក់នៅ ចាប់ពីយប់ថ្ងៃទី៤ ខែកក្កដា កន្លងមក ។ វាបានធ្វើបរិយាកាសនៅជម្រកបណ្តោះអាសន្នសម្បូរទៅដោយក្មេងៗ និងមនុស្សចាស់ ។

កាលពីថ្ងៃទី៧ ខែកក្កដា នៅនាយកដ្ឋានបង្ការ និងកាត់បន្ថយគ្រោះមហន្តរាយ លោកស្រី ធីរ៉ាត់ សាំរេចវ៉ានីត រដ្ឋមន្ត្រីក្រសួងមហាផ្ទៃ បានប្រាប់ទៅពលរដ្ឋឈប់បារម្ភពីរលកយក្សស៊ូណាមិ ក្រោយកើតគ្រោះរញ្ជួយដីនៅប្រទេសជប៉ុន និងឥណ្ឌា ។ សូមឱ្យពលរដ្ឋជឿជាក់លើប្រព័ន្ធប្រកាសអាសន្ន និងការផ្ញើសារទៅពលរដ្ឋតាមរយៈប្រព័ន្ធ Cell Broadcast ។ អ្នកស្រីថា មានការផ្សាយព័ត៌មានជាច្រើនពីរញ្ជួយដីនៅមហាសមុទ្រឥណ្ឌា និងមហាសមុទ្រប៉ាស៊ីហ្វិក ទើបធ្វើឱ្យពលរដ្ឋថៃបារម្ភ ៕

ចិន ៖ ក្លឹបបាល់ទាត់ Changchun Xidu នៅក្នុងប្រទេសចិនត្រូវបានពិន័យជាប្រាក់ចំនួន 30,000 យ័ន (4,000 ដុល្លារអាមេរិក) សម្រាប់ការបញ្ជូនវិញ្ញាណអាក្រ.ក់ផ្លូវងងឹតដើម្បីជួយពួកគេក្នុងការផ្តួលដៃគូប្រជែងរបស់ពួកគេ។

ក្លឹបបាល់ទាត់ Changchun Xidu ដែលលេងក្នុងកម្រិតទី3 របស់ប្រទេសចិន ត្រូវបានគេរកឃើញថាមានកំហុសក្នុងការបិទ “យ័ន្ត” នៅក្នុងបន្ទប់ផ្លាស់សំលៀកបំពាក់របស់ក្រុម Shanxi Chongde Ronghai ជាគូប្រជែង នៅមុនពេលការប្រកួតនៅថ្ងៃសៅរ៍ ដែលក្រុម Changchun Xidu ធ្វើជាម្ចាស់ផ្ទះ។ ហើយជាលទ្ធផល Changchun បានយកឈ្នះការប្រកួតក្នុងលទ្ធផល 2-0 និងទទួលបានចំណាត់ថ្នាក់លេខប្រាំបីនៅក្នុងលីគទី2។

យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក ក្លឹបផ្សេងទៀតនៅក្នុងផ្នែកទី 3 របស់ប្រទេសចិនក៏បានរកឃើញក្រដាស “យ័ន្ទ” នៅពេលពួកគេបានទៅលេងនៅក្លឹប Changchun ។ សមាគមបាល់ទាត់ បាននិយាយនៅក្នុងសេចក្តីថ្លែងការណ៍មួយ ដោយប្រកាសផាកពិន័យកាលពីថ្ងៃពុធថា “សមាគមកីឡាបាល់ទាត់ចិននឹងដោះស្រាយបញ្ហានេះយ៉ាងម៉ឺងម៉ាត់ និងយកចិត្តទុកដាក់បំផុត ចំពោះរាល់ការបំពានច្បាប់ និងបទប្បញ្ញត្តិ”។

គួរឲ្យដឹងថា នេះមិនមែនជាលើកទីមួយទេ ដែលក្លឹបបាល់ទាត់នៅក្នុងប្រទេសចិន បានប្រើក្រដាសយ័ន្តដើម្បីដាស់វិញ្ញាណងងឹត ក្នុងការយកឈ្នះលើការប្រកួត។ នៅឆ្នាំ 2017 ក្រុម Henan Jianye បានធ្លាក់ដល់បាតតារាងនៃក្របខ័ណ្ឌ Chinese Super League បានអញ្ជើញបូជាចារ្យ Taoist ចំនួន15 នាក់ដើម្បីធ្វើពិធីនៅលើទីលានមុនពេលការប្រកួតរបស់ពួកគេជាមួយក្រុម Shandong Luneng Taishan ។

ជាលទ្ធផល Henan បានឈ្នះការប្រកួតនេះ 2-1 ដែលជាការឈ្នះលើកទីពីររបស់ពួកគេក្នុងរដូវកាលនេះ។ ទីបំផុតពួកគេបានគេចផុតពីការដកចេញ និងបញ្ចប់ដោយទទួលបានប្រាំបីពិន្ទុពីលើតំបន់ជម្រុះ៕

ប្រទេសឡាវ កំពុងរៀបចំបញ្ជូនកងទ័ពប្រមាណ៥០នាក់ទៅជួយរុស្សុីក្នុងសង្គ្រាមជាមួយអ៊ុយក្រែន ក្រោមការក្លែងបន្លំជាសកម្មភាពមនុស្សធម៌។

កងទ័ពឡាវ នឹងបញ្ជូនទៅរុស្សុី ដើម្បីជួយដល់ប្រតិបត្តិការបោសសម្អាតមីន នៅក្នុងតំបន់ Kursk ព្រំប្រទល់ប្រទេសរុស្សុី និងអ៊ុយក្រែន។

រុស្សុី ចាត់ទុកការបញ្ជូនកងទ័ពឡាវនេះ គឺជាបេសកកម្មមនុស្សធម៌ ប៉ុន្តែចារកម្មអ៊ុយក្រែនយល់ឃើញថា នេះគឺជាការកៀងគរយោធាបរទេស ដែលជាសម្ព័ន្ធមិត្តជិតស្និទ្ធរបស់រុស្សុីឱ្យចូលរួមប្រយុទ្ធឆាំងនឹងរដ្ឋាភិបាលទីក្រុងកៀវ។

សូមរំលឹកថា ឡាវជាប្រទេសទីមួយក្នុងតំបន់អាស៊ានដែលបញ្ជូនទៅកងទ័ពទៅជួយរុស្សុី ខណៈពេលកន្លងទៅមានតែកូរ៉េខាងជើងមួយប៉ុណ្ណោះ ដែលបញ្ជូនទ័ពប្រមាណ៣មុឺននាក់ទៅកាន់វិមានក្រឹមឡាំង។

ការជួយពីកូរ៉េខាងជើងនេះ គឺជាថ្នូរនៃការដោះដូរគ្នា ដែលរុស្សុីបានប្រគល់ប្រព័ន្ធការពារដែនអាកាស និងដ្រូន៕