Influencer លីម សុណាលីស តួស្រីក្នុងបទចម្រៀង «៥០ ៥០» របស់ វណ្ណដា និង វណ្ណថាន បានបង្ហាញមុខរបស់នាងដោយគ្មានការ Makeup ហើយទស្សនិកជនបានឃើញពីស្លាកស្នាមលើផ្ទៃមុខរបស់នាងបានយ៉ាងច្បាស់។ ការបង្ហាញមុខបែបនេះ ណាលីស បញ្ជាក់ថានាងមិនចង់ឱ្យអ្នកគាំទ្រខ្លួនខកចិត្តពេលជួបមុខនៅខាងក្រៅ។

ថ្មីៗនេះ សុណាលីស បានបង្ហោះវីដេអូមួយនៅលើបណ្តាញសង្គមទិកតុកដោយទទួលបានសារយ៉ាងវែងនិងភ្ញាក់ផ្អើលពេលដែលនាងបង្ហាញពីស្នាមនៅលើផ្ទៃមុខព្រោះអ្នកលេង IG គេកម្រនឹងបង្ហាញផ្ទៃមុខដែលមានមុន មិនស្អាតរបស់ខ្លួនបែបនេះណាស់។ សុណាលីស ថានាងបង្ហោះបែបនេះដោយសារតែចង់ចែករំលែកទៅអ្នកទស្សនារបស់នាងថាមុខនាងមិនរលោងនោះទេហើយទីពីរនោះគឺចង់ឱ្យអ្នកគាំទ្រទុកចិត្តនាង។

Influencer រូបនេះបន្តទៀតថា នាងចង់ឱ្យអ្នកគាំទ្រឃើញទាំងភាពស្រស់ស្អាត ឃើញទាំងបញ្ហារបស់នាង ហើយនៅពេលជួបនាងនៅខាងក្រៅគឺមិនខកចិត្តព្រោះនាងបានប្រាប់រួចហើយទើបមិនរំពឹងខ្ពស់មកកាន់នាង។ ណាលីស ថាការប្រាប់អ្នកគាំទ្របែបនេះគឺធ្វើឱ្យផ្លូវចិត្តរបស់នាងល្អ ហើយអ្នកគាំទ្រក៏មិនខកចិត្តចំពោះនាង។ យ៉ាងណាតារាស្រីរូបនេះ បានផ្ញើសារថា រាល់អ្នកដែលធ្វើវីដេអូទាំងអស់គឺគាត់ជាមនុស្សធម្មតា នៅពីក្រោយគាត់ធ្វើវីដេអូ Makeup គឺគាត់មានបញ្ហាសុខភាពស្បែក បើសិនជាជួបនៅខាងក្រៅមានសភាពមិនដូចអ្វីធ្លាប់ឃើញនៅលើបណ្តាញសង្គមគឺចង់ឱ្យអ្នកគាំទ្រមានអារម្មណ៍ធម្មតាចំពោះគាត់ កុំវាយប្រហារ ដូចជាពាក្យ «ឃើញនៅក្រៅអាក្រក់ នៅខាងក្នុងផ្សេង» ជាដើម។

លីម សុណាលីស បានលើកឡើងទៀតថាចំពោះអ្នកដែលបង្ហាញវិញទៀតសោត បើបង្ហាញអ្វីដែលស្អាតរហូតតែម្តងនោះវាជាធម្មតាទេពេលអ្នកមើលភ្ញាក់ផ្អើលដូច្នេះយើងគួរបង្ហាញអ្វីដែលស្មើភាពគ្នាដើម្បីឱ្យអ្នកទស្សនាទទួលយកបានហើយយើងក៏ទទួលបានផលវិជ្ជមានពីអ្នកទស្សនាដូចគ្នា។ ណាលីស ថា វាអាស្រ័យទាំងអ្នកមើលនិងអាស្រ័យទាំងអ្នកបង្ហាញហើយការដែលនាងបង្ហាញមុខរបស់នាងបែបនេះ នាងក៏មានអារម្មណ៍ភ័យដូចគ្នាប៉ុន្តែនាងជ្រើសរើសប្រាប់អ្នកគាំទ្រខ្លួន៕

ក្រុមចម្រៀងដ៏ពេញនិយមសម្បូរបទផ្អែមល្ហែម La Cima បានធ្វើឱ្យស្រទាប់មហាជនពេញចិត្តយ៉ាងខ្លាំងនៅក្នុងកម្មវិធីប្រគំតន្រ្តីដ៏ធំកាលពីពេលថ្មីៗនេះបន្ទាប់ពីបានសម្តែងបទ «មិត្តរួមអាវុធ» ហើយទស្សនិកជនបានច្រៀងតាមយ៉ាងកងរំពង។

«មិត្តរួមអាវុធ» ពីតារាចម្រៀង All3rgy ft Hasha នៃសមាជិកក្រុមចម្រៀង La Cima បានចេញផ្សាយកាលពីថ្ងៃទី១៤ ខែមិថុនា ឆ្នាំ២០២៥ ដោយបទនេះបានរួមបញ្ជូលចម្រៀងកងទ័ព គន់មើលទៅមេឃ និងលាយបញ្ចូលប៉ារ៉ូលថ្មី ផងដែរ។ នៅក្នុងការប្រគំតន្រ្តីកាលពីរាត្រីថ្ងៃទី៥ កក្កដា ថ្មីៗនេះ តារាចម្រៀង All3rgy និង Hasha រួមទាំងសមាជិកផ្សេងទៀតរបស់ក្រុម La Cima បានជ្រើសរើសបទនេះក្នុងចំណោមបទផ្សេងទៀតមកសម្តែង។

អ្វីដែលធ្វើឱ្យទស្សនិកជនពេញចិត្តគឺក្បាលដំបូងនៃបទចម្រៀងនេះដែលជាចម្រៀងអំពីកងទ័ពអ្នកគាំទ្របានស្រែកច្រៀងកងរំពងពេញកន្លែងប្រគំតន្រ្តីធ្វើឱ្យទស្សនីយភាពនេះក្លាយជាទិដ្ឋភាពប្រកបដោយភាពកក់ក្តៅក្នុងរូបភាពស្នេហាជាតិមាតុភូមិជាពិសេសគឺការផ្តល់កម្លាំងចិត្តមួយទៅកាន់កងទ័ពជួរមុខដែលកំពុងឈរជើងប្រកបដោយភាពអង់អាចការពារបូរណភាពទឹកដី។

ក្រុមចម្រៀង La Cima ក៏បានបង្ហាញចំណាប់អារម្មណ៍អរគុណអ្នកគាំទ្រជាមួយនឹងពាក្យពេចន៍ថា «សូមអរគុណ សម្រាប់ក្តីស្រឡាញ់ និងស្នាមញញឹម ក៏ដូចជាអំឡុងពេល បទមិត្តរួមអាវុធ
ខ្មែរស្រឡាញ់ខ្មែរ និងផ្តល់ក្តីនឹករលឹកដល់បងៗកងទ័ពជួរមុខផងដែរ»។

គួរបញ្ជាក់ផងដែរថា គិតត្រឹមល្ងាចថ្ងៃទី៧ ខែកក្កដា បទចម្រៀងស្នេហាជាតិខាងលើនេះឈរនៅចំណាត់លេខ១២ នៅលើយូធូបជាមួយនឹងការទស្សនាជាង១លានដង៕

នៅថ្ងៃទី៨ ខែកក្កដា ឆ្នាំ២០២៥ តុលាការថៃបានចេញដីកាឱ្យសមត្ថកិច្ច Cyber ថៃចា.ប់ខ្លួនលោកឧកញ៉ា កុក អាន សញ្ជាតិខ្មែរ ដោយចោទប្រកាន់ថា លោកជាម្ចាស់ទីតាំងឧក្រិដ្ឋ.កម្មឆ្លងដែន ព្រមទាំងពាក់ព័ន្ធជាមួយឧក្រិដ្ឋ.កម្មឆ្លងដែន និងលាងលុយក.ខ្វក់ ។ ជំហ៊ានដំបូង សមត្ថកិច្ចថៃបានរឹបអូសរថយន្តទំនើបជាច្រើនគ្រឿង និងរឹបអូសប្រាក់ សរុបចំនួន២៧លានបាត ។ នេះបើតាមការផ្សព្វផ្សាយរបស់សារព័ត៌មានថៃ Khaosod ។

ខ្លឹមសារក្នុងដីកាតុលាការថៃបញ្ជាក់ថា លោកឧកញ៉ា កុក អាន សញ្ជាតិខ្មែរ គឺជាម្ចាស់អគារ Crown Casino Resort មានកម្ពស់២៥ជាន់ រួមទាំងជាម្ចាស់អគារ១៨ជាន់ បានបង្កើតទីតាំង Call Center ដ៏ធំនៅទីក្រុងប៉ោយប៉ែត ដែលឆបោកពលរដ្ឋថៃ នៅប្រទេសកម្ពុជា ។ ក្រៅពីនេះ តុលាការថៃក៏បានចោទថា លោក កុក អាន ពាក់ព័ន្ធនឹងឧក្រិដ្ឋកម្មឆ្លងដែន និងលាងលុយកខ្វក់ ហើយសមត្ថកិច្ចថៃបានឆ្មក់ឆែកឆែរទីតាំង១៩កន្លែង នៅទីក្រុងបាងកក ខេត្តសមុទ្រប្រាកាន និងខេត្តឈុនបុរី ដែលជាបណ្តាញរបស់លោក កុក អាន ។

តាមការផ្សាយសារព័ត៌មាន Khaosod គឺជនល្មើសបានបោកប្រាស់តាមអ៊ីនធើរណេតក្នុងរូបភាពផ្សេងៗ ដូចជា ៖ Hybrid Scam, Call Center និងលាងលុយកខ្វក់តាមរយៈគណនីក្លែងក្លាយ និងរូបិយប័ណ្ឌឌីជីថល ។ លើសពីនេះ ថែមទាំងបោកប្រាស់ពលរដ្ឋថៃជាច្រើនឱ្យមកធ្វើការ រួមទាំងបង្ខំឱ្យស្កេនផ្ទៃមុខដើម្បីបញ្ជាក់ពីប្រតិបត្តិការ និងឃុំខ្លួនជនបរទេស ។

ក្រោយការស៊ើបអង្កេតបង្ហាញថា លោក កុក អាន គឺជាម្ចាស់អគារដែលក្រុមឧក្រិដ្ឋកម្មឆ្លងដែនធ្វើជាទីតាំងប្រព្រឹត្តល្មើស ហើយលោកបានចូលរួមក្នុងសកម្មភាព មិនថាដោយផ្ទាល់ ឬប្រយោលដើម្បីប្រព្រឹត្តឧក្រិដ្ឋកម្មឆ្លងដែន ។ លោកបានធ្វើសកម្មភាព និងប្រព្រឹត្តឧក្រិដ្ឋកម្មធ្ងន់ធ្ងរក្នុងក្រុមឧក្រិដ្ឋកម្មឆ្លងដែនតាមរយៈការចាត់ការ ការបញ្ជា ការញុះញង់ ផ្តល់ភាពងាយស្រួល ឬផ្តល់យោបល់ឱ្យប្រព្រឹត្តល្មើសធ្ងន់ធ្ងរ ។

ហេតុនេះ ភ្នាក់ងារស៊ើបអង្កេតថៃបានដាក់សំណើទៅតុលាការព្រហ្មទណ្ឌឱ្យចេញដីកាចាប់ខ្លួនលោក កុក អាន ដើម្បីចាត់វិធានការតាមផ្លូវច្បាប់បន្តទៀត ។ មានសេចក្តីរាយការណ៍ថា សមត្ថកិច្ច Cyber របស់ថៃបានឆ្មក់ឆែកឆែរទីតាំង ចំនួន១៩កន្លែង ហើយសមត្ថកិច្ចបានរឹបអូសរថយន្តទំនើបជាច្រើនគ្រឿង និងរឹបអូសប្រាក់ សរុបចំនួន២៧លានបាត ៕