វៀតណាម៖ ចំនួនអ្នកស្លា.ប់ដោយសារព្យុះទីហ្វុង Bualoi នៅក្នុងប្រទេសវៀតណាម បានកើនឡើងដល់ 26 នាក់ហើយ ជាមួយនឹងទឹកជំនន់ ការរអិលបាក់ដី និងខ្យល់បក់បោកយ៉ាងខ្លាំង ដែលបណ្តាលឱ្យមនុស្ស 22 នាក់បាត់ខ្លួន និងជាង 100 នាក់ទៀតរងរបួស។ នេះបើយោងតាមទីភ្នាក់ងារ VN Express កាលពីថ្ងៃអង្គារ ទី៣០ ខែកញ្ញា។

នាយកដ្ឋានគ្រប់គ្រងទំនប់ទឹក និងបង្ការគ្រោះមហន្តរាយធម្មជាតិ ក្រោមក្រសួងកសិកម្មវៀតណាម បានឱ្យដឹងថា គិតត្រឹមម៉ោង១រសៀល ព្យុះផ្គររន្ទះ និងទឹកជំនន់បាននាំយកជនរងគ្រោះទៅតាមទឹកអស់ជាច្រើននាក់ ដោយមានអ្នកស្លា.ប់ចំនួន 11 នាក់នៅ Ninh Binh និង Hung Yen និង 8 នាក់នៅក្នុងការបាក់ដី។ ចំណែកអ្នកផ្សេងៗទៀតត្រូវបានសម្លា.ប់ដោយសារដើមឈើ ឬផ្ទះរលំសង្កត់ពីលើពួកគេ។

អាជ្ញាធរអាកាសចរណ៍ស៊ីវិលវៀតណាម (CAAV) បានបញ្ជាឱ្យបិទជាបណ្តោះអាសន្ននូវអាកាសយានដ្ឋានសំខាន់ៗមួយចំនួននៅភាគកណ្តាលវៀតណាម។ លើសពីនេះ តំបន់មួយចំនួនបានជួបប្រទះភ្លៀងធ្លាក់ខ្លាំង ទឹកជំនន់ ការរអិលបាក់ដី និងហេដ្ឋារចនាសម្ព័ន្ធដែលខូចខាត។ ផ្ទះសម្បែងជាង ១០០ ០០០ ខ្នងត្រូវបានបំផ្លាញ គ្មានអគ្គិសនីប្រើប្រាស់ ហើយមនុស្សរាប់ពាន់នាក់ត្រូវបានជម្លៀសចេញ។

គួរជម្រាបថា ព្យុះទីហ្វុង Bualoi បានជះឥទ្ធិពលយ៉ាងខ្លាំងមកលើតំបន់អាសុីអាគ្នេហ៍ ជាពិសេសនៅប្រទេសវៀតណាម ថៃ និងហ្វីលីពីន ប៉ុន្តែមិនសូវមានឥទ្ធិពលខ្លាំងលើកម្ពុជា ឡាវនិងមីយ៉ាន់ម៉ានោះទេ។

អាជ្ញាធរនៅក្នុងប្រទេសដែលរងផលប៉ះពាល់ទាំងអស់កំពុងបន្តតាមដានអាកាសធាតុ ចេញការព្រមាន និងចាត់វិធានការដើម្បីការពារអាយុជីវិត និងហេដ្ឋារចនាសម្ព័ន្ធ។ ប្រតិបត្តិការហោះហើរ និងការដឹកជញ្ជូននៅតែស្ថិតក្រោមការឃ្លាំមើលយ៉ាងដិតដល់ ជាមួយនឹងការរំខានបន្ថែមទៀត ប្រសិនបើព្យុះកាន់តែអាក្រក់ ឬផ្លាស់ប្តូរផ្លូវរបស់វា៕

ប្រទេសថៃ ៖ រដ្ឋមន្ត្រីក្រសួងការបរទេសថៃ លោក សីហស័ក្តិ ពួងកេតកែវ បាននិយាយមកកាន់សារព័ត៌មានកាលពីថ្ងៃទី៣០ ខែកញ្ញា ឆ្នាំ២០២៥ ថា ថៃបើកទ្វារចរចាបញ្ចប់ជម្លោះព្រំដែនជាមួយកម្ពុជា ប៉ុន្តែកម្ពុជាពុំទាន់មានភាពស្មោះត្រង់ក្នុងការចរចា ។ លោកបានបញ្ជាក់ពីគោលជំហរការពារអធិបតេយ្យរបស់ខ្លួន និងសហការជាមួយគ្រប់ផ្នែកដោះស្រាយបញ្ហាព្រំដែនកម្ពុជា-ថៃ ដើម្បីឱ្យទំនាក់ទំនងប្រទេសទាំងពីរត្រឡប់មកធម្មតាវិញ ។

លោក សីហស័ក្តិ ពួងកេតកែវ រដ្ឋមន្ត្រីក្រសួងការបរទេសបានលើកឡើងពីគោលនយោបាយការបរទេស និងការដោះស្រាយបញ្ហាព្រំដែនកម្ពុជា-ថៃថា គោលនយោបាយការបរទេសថៃផ្តោតលើគ្រប់ផ្នែកត្រូវចូលរួមសហការ ពីព្រោះវាជាកិត្តិយស និងផលប្រយោជន៍ជាតិ លោកក៏ត្រូវពិភាក្សាជាមួយគណបក្សប្រឆាំងផងដែរ ។ បញ្ហាព្រំដែនពាក់ព័ន្ធនឹងកត្តាជាច្រើន រួមមាន ៖ សន្តិសុខ សេដ្ឋកិច្ច ឧក្រិដ្ឋកម្មឆ្លងដែន នយោបាយក្នុងប្រទេស និងពលរដ្ឋប្រទេសទាំងពីរត្រូវរួមគ្នាដោះស្រាយជម្លោះដើម្បីឱ្យទំនាក់ទំនងកម្ពុជា-ថៃត្រឡប់មកប្រក្រតី ។

យើងត្រូវតែព្យាយាមបញ្ចប់ជម្លោះព្រំដែនឱ្យបាន ប៉ុន្តែវាពុំងាយស្រួលទេ ត្រូវមានការចរចា ។ ថៃប្រកាន់គោលជំហរចរចាដោយសន្តិវិធី ប៉ុន្តែពុំព្រមបាត់បង់ទឹកដី ហើយការបើកទ្វារចរចាត្រូវតែពិនិត្យមើលការត្រៀមខ្លួនរបស់កម្ពុជា ។ ចំណុចសំខាន់ កុំដោះស្រាយបញ្ហាតែមួយថ្ងៃៗ ត្រូវកំណត់យុទ្ធសាស្ត្រផ្សេងៗ រួមមាន ៖ យុទ្ធសាស្ត្រព័ត៌មាន ដោយលោកចោទប្រកាន់កម្ពុជាទទួលបានប្រយោជន៍តែម្ខាងក្នុងការផ្សាយព័ត៌មាន និងលើកឡើងពីរឿងព្រំដែនប្រាប់អន្តរជាតិ ។

សមាជិកសភាថៃមួយចំនួននិយាយថា លោកមានជម្លោះជាមួយកម្ពុជានៅមុខអន្តរជាតិក្នុងកិច្ចប្រជុំមហាសន្និបាតអង្គការសហប្រជាជាតិ លើកទី៨០ នៅទីក្រុងញូវយ៉ក គឺលោកពុំបានឈ្លោះជាមួយអ្នកណាទេ លោកលើកឡើងក្នុងឋានៈមន្ត្រីតំណាងថៃដើម្បីការពារប្រទេសថៃ និងកិត្តិយសជាតិ ។ ថៃពុំបានបិទទ្វារចរចាទេ បើកម្ពុជាយល់ព្រមចរចា ប៉ុន្តែពេលនេះ កម្ពុជាពុំទាន់ស្មោះត្រង់ក្នុងការចរចា ។ ការចរចាបញ្ចប់ជម្លោះព្រំដែនត្រូវមានភាពច្បាស់លាស់លើការឈប់បាញ់ជារៀងរហូត ដោះមីន បង្ក្រាបឧក្រិដ្ឋកម្មឆ្លងដែន និងដកអាវុធធុនធ្ងន់ចេញពីព្រំដែន ដើម្បីឱ្យតំបន់ព្រំដែនស្ងប់ស្ងាត់ និងសុវត្ថិភាព ។

ស្ថានការណ៍បច្ចុប្បន្ន ក្រសួងការបរទេសត្រូវចាប់ផ្តើមធ្វើការងារក្នុងប្រទេសដោយមានការសហការពីគ្រប់ផ្នែក ហើយក្រសួងការបររទេសនឹងផ្តោតលើការធ្វើការជាមួយកងទ័ព ដើម្បីកុំឱ្យប្រទេសជិតខាងមើលមកកាន់ក្រសួងការបរទេសថៃទន់ជ្រាយ ។ ការទូតត្រូវតែគាំទ្រកងទ័ព ហើយកងទ័ពក៏ត្រូវគាំទ្រការទូត ហេតុនេះ ការចូលរួមសហការមានសារៈសំខាន់ណាស់ ។

គួរបញ្ជាក់ថា រដ្ឋមន្ត្រីក្រសួងការបរទេសថៃ លោក សីហស័ក្តិ បានទៅចូលរួមកិច្ចប្រជុំនៅមហាសន្និបាតអង្គការសហប្រជាជាតិ លើកទី៨០ នៅទីក្រុងញូវយ៉ក ខណៈកម្ពុជាមានឯកឧត្តមឧបនាយករដ្ឋមន្ត្រី ប្រាក់ សុខុន បានអញ្ជើញចូលរួមក្នុងកិច្ចប្រជុំនេះ ។ ឯកឧត្តម ប្រាក់ សុខុន បានថ្លែងថា ៖ «ខ្ញុំពិតជាមានសេចក្តីឈឺចាប់ជាពន់ពេក សន្តិភាពនៅក្នុងប្រទេសរបស់ខ្ញុំផ្ទាល់ ដែលទទួលបានដោយលំបាក បច្ចុប្បន្ន កំពុងរងការរគំរាមកំហែងពីជម្លោះព្រំដែនជាមួយប្រទេសជិតខាងមួយ» ៕

ប្រទេសថៃ ៖ តាមការចុះផ្សាយរបស់សារព័ត៌មានថៃ Top News កាលពីថ្ងៃទី៣០ ខែកញ្ញា ឆ្នាំ២០២៥ ឱ្យដឹងថា អគ្គមេបញ្ជាការរងកងទ័ពអាកាសថ្មីរបស់ថៃបានប្រកាសពីគោលជំហរពុំចង់ធ្វើសង្គ្រាមទេ ប៉ុន្តែកងទ័ពអាកាសថៃត្រូវតែត្រៀមប្រ.យុទ្ធដើម្បីទទួលបានសន្តិភាព ។ អគ្គមេបញ្ជាការរងកងទ័ពអាកាសរូបនេះត្រៀមខ្លួនបំពេញតួនាទីភ្លាមៗដោយគ្មានពេលវេលារៀបចំកម្មវិធីអបអរសាទរការឡើងកាន់តំណែង និងប្រាប់ឱ្យពលរដ្ឋថៃមានទំនុកចិត្តលើកងទ័ពអាកាស ។

កាលពីថ្ងៃទី៣០ ខែកញ្ញា នៅទីបញ្ជាការកងទ័ពអាកាស អគ្គមេបញ្ជាការរងកងទ័ពអាកាសថ្មី លោក សេកសាន់ ខាន់ថា បានផ្តល់សម្ភាសន៍ជាមួយសារព័ត៌មានក្រោយពីបញ្ចប់ពិធីទទួល និងផ្ទេរភារកិច្ចរបស់មេបញ្ជាការកងទ័ពអាកាស ដោយលោកប្តេជ្ញាចិត្តបំពេញតួនាទី និងទទួលខុសត្រូវតាមអំណាចរបស់ខ្លួនបន្តពីអគ្គមេបញ្ជាការកងទ័ពអាកាស លោក ផាន់ភក្តី ផាត់តាណាគុន ហើយលោកនឹងជំរុញឱ្យកងទ័ពអាកាសថៃមានភាពរឹងមាំ បំពេញការងារមានប្រសិទ្ធភាព ។

អគ្គមេបញ្ជាការរងកងទ័ពអាកាសថ្មី លោក សេកសាន់ បន្តថា គ្មានពេលវេលារៀបចំកម្មវិធីអបអរសាទរការឡើងកាន់តំណែងថ្មី ឬទទួលការចូលរួមរីករាយពីអ្នកណាទេ ពីព្រោះបច្ចុប្បន្ន កងទ័ពថៃកំពុងបំពេញតួនាទីរក្សាអធិបតេយ្យនៅព្រំដែនទាំងយប់ទាំងថ្ងៃ ។ ការងារដំបូងដែលត្រូវធ្វើ គឺលោកនឹងបញ្ជាអង្គភាពកងទ័ពអាកាសនៅក្រោមការគ្រប់គ្រងត្រៀមបំពេញតួនាទីភ្លាមៗ ថៃពុំត្រូវការសង្គ្រាម ប៉ុន្តែបើចង់បានសន្តិភាព ត្រូវតែត្រៀមប្រយុទ្ធ សូមពលរដ្ឋមានទំនុកចិត្តលើកងទ័ពអាកាស ។

ពិធីទទួល និងផ្ទេរភារកិច្ចរបស់មេបញ្ជាការរងកងទ័ពអាកាសថ្មី គឺមានការចូលរួមពីមេបញ្ជាការកងទ័ពជាន់ខ្ពស់ កងទ័ពអាកាស និងអនុព័ន្ធយោធាបរទេស ដោយអគ្គមេបញ្ជាការកងទ័ពអាកាស លោក ផាន់ភក្តី ផាត់តាណាគុន បានប្រកាសឱ្យលោក សេកសាន់ កាន់តំណែងអគ្គមេបញ្ជាការរងកងទ័ពអាកាសជាផ្លូវការ ។ ក្រៅពីនេះ កងទ័ពអាកាសថៃក៏បានបើកយន្តហោះចម្បាំង Gripen ចំនួន១គ្រឿង ដើម្បីបង្ហាញពីការត្រៀមខ្លួនប្រយុទ្ធរបស់កងទ័ពអាកាស ។

ការប្រកាសពីគោលជំហររបស់អគ្គមេបញ្ជាការរងកងទ័ពអាកាសថ្មីថៃដែលថា «បើចង់បានសន្តិភាព ត្រូវតែត្រៀមប្រយុទ្ធ» គឺបញ្ជាក់ពីកងទ័ពអាកាសថៃនៅតែមានមហិច្ឆតាលោភលន់ និងឈ្លានពានកម្ពុជាដោយការប្រើប្រាស់យន្តហោះចម្បាំង ។ រីឯកម្ពុជាមានគោលបំណងជំរុញការបន្តអនុវត្តបទឈប់បាញ់រវាងកម្ពុជា-ថៃឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ ៕

បាងកក៖ រដ្ឋមន្ត្រីការបរទេសថៃ លោក Sihasak Phuangketkeow បានសម្តែងពីការត្រៀមខ្លួនរួចរាល់ ក្នុងការជួបពិភាក្សាជាមួយកម្ពុជាជុំវិញបញ្ហាព្រំដែន ប៉ុន្តែបានបញ្ជាក់ថា ថៃត្រូវការភាពស្មោះត្រង់ពីកម្ពុជាដើម្បីការចរចាគ្នាមានលក្ខណៈច្បាស់លាស់ និងមានសន្តិភាពយូរអង្វែង។ នេះបើតាមសារព័ត៌មាន The Nation កាលពីថ្ងៃទី៣០ ខែកញ្ញា។

ថ្លែងនៅក្នុងសភាក្នុងអំឡុងសន្និសីទសង្ខេបគោលនយោបាយ លោក Sihasak បាននិយាយថា ប្រទេសថៃកំពុងស្វែងរកការសន្ទនាក្នុងគោលបំណងរក្សាស្ថិរភាពជាមួយកម្ពុជា មិនមែនជាការពិចារណាឡើងវិញលើការទាមទារទឹកដីនោះទេ។ យ៉ាងណាក៏ដោយ លោកបានកត់សម្គាល់ថា ការចរចាលើកមុនៗជាមួយកម្ពុជាតែងមានភាពមិនស៊ីសង្វាក់គ្នាជានិច្ច នេះក៏ព្រោះតែកង្វះភាពស្មោះត្រង់របស់កម្ពុជា។

រដ្ឋមន្ត្រីការបរទេសថៃរូបនេះបានសង្កត់ធ្ងន់ថា ប្រសិនបើការចរចាចាប់ផ្តើមឡើងវិញម្ដងទៀត ប្រទេសថៃរំពឹងថាការពិភាក្សានឹងផ្តោតតែលើអាទិភាពចំនួនបីរួមមាន៖ បទឈប់បាញ់ជាអចិន្ត្រៃយ៍ ការដកអាវុធធុនធ្ងន់ និងគ្រាប់មីនចេញពីតំបន់ជម្លោះ និងកិច្ចសហប្រតិបត្តិការកាន់តែរឹងមាំដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងព្រំដែនរវាងប្រទេសទាំងពីរ។ ឥឡូវនេះ ប្រទេសថៃកំពុងរង់ចាំសញ្ញាឆ្លើយតបពីរដ្ឋាភិបាលកម្ពុជាវិញ ថាតើកម្ពុជាសុខចិត្តដើរទៅមុខក្រោមលក្ខខណ្ឌទាំងនេះដែរឬទេ។

គួរជម្រាបថា រាល់ការលើកឡើងទាំងឡាយរបស់រដ្ឋមន្រ្តីថៃដូចខាងលើនេះ គឺគ្រាន់តែជាការនិយាយយកល្អសម្រាប់ប្រទេសថៃខ្លួនឯងតែប៉ុណ្ណោះ។ កន្លងមកឲ្យតែរៀងរាល់ពេលដែលកិច្ចប្រជុំត្រូវបានបញ្ចប់ហើយគណៈប្រតិភូថៃត្រឡប់ទៅដល់ស្រុកវិញ កិច្ចព្រមព្រៀងតែងត្រូវបានផ្លាស់ប្តូរជាឯកតោភាគីដោយសារតែគំនិតផ្ទុយគ្នានៅក្នុងប្រព័ន្ធផ្ទៃក្នុងរបស់ថៃជានិច្ច។ រឿងនេះពុំមែនទើបកើតឡើងម្ដង ឬពីរដងនោះទេ ពោលគឺសឹងតែគ្រប់ពេលទៅហើយដែលថៃប្រែក្រឡាស់សំដីមិនអាចយកជាការបានបែបនេះ។

បន្ថែមពីនោះ ក្រៅពីភាពរញ៉េរញ៉ៃខាងការទូតហើយ ងាកទៅខាងយោធាឯណោះក៏បង្កចលាចលមិនចេះចប់ផងដែរ។ តាមការកត់សម្គាល់ មិនថាមានកិច្ចប្រជុំពិភាក្សាថ្នាក់គណៈកម្មាធិការព្រំដែនចម្រុះ ព្រំដែនរួម ឬថ្នាក់យោធភូមិភាគនោះទេ នៅរាល់ពេលមានព្រមបឲព្រៀងឯកភាពគ្នាលើចំណុចផ្សេងៗដោយសន្តិវិធីរួច យោធាថៃដឹងតែបង្កើតសាច់រឿងថ្មីដើម្បីរករឿងកម្ពុជាដូចជារឿងមីន ការល្មើសចូលអធិបតេយ្យ ឬបំពានបទឈប់បា.ញ់ជាដើម។ ក្បួនដដែលៗបែបនេះ ត្រូវបានថៃយកមកអនុវត្តលើកម្ពុជាជាប្រចាំ ប៉ុន្តែពេលនេះបែរជាមកសម្ដែងធ្វើជាត្រឹមត្រូវ ចោ.ទកម្ពុជាមិនស្មោះត្រង់ទៅវិញ៕

ប្រទេសថៃ ៖ សាស្ត្រាចារ្យសេដ្ឋកិច្ច និងនយោបាយថៃបានសំណូមពរឱ្យរដ្ឋាភិបាលរបស់ខ្លួនបិទព្រំដែនជាមួយកម្ពុជារៀងរហូត ក្រោមហេតុផលពលរដ្ឋថៃឆ្លងដែនមកលេងកាស៊ីណូនៅទីក្រុងប៉ោយប៉ែត ។ សាស្ត្រាចារ្យរូបនេះចាត់ទុកការបិទព្រំដែនជាការអប់រំកម្ពុជា និងបង្ហាញពីភាពខ្លាំងឱ្យកម្ពុជាមើលឃើញថា រដ្ឋាភិបាលថៃពុំលះបង់ប្រទេសជាតិដើម្បីផលប្រយោជន៍របស់អ្នកនយោបាយ ឬបុគ្គលមួយចំនួន ។

កាលពីថ្ងៃទី២៥ ខែកញ្ញា ឆ្នាំ២០២៥ សាស្ត្រាចារ្យសេដ្ឋកិច្ច និងនយោបាយ អ្នកស្រី ឈិតតាវ៉ាន់ ឆាណាក់គូន បានបង្ហោះក្នុងហ្វេសប៊ុករបស់ខ្លួនក្រោយពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជាលើកឡើងពីថៃបិទព្រំដែន១០០ឆ្នាំ ក៏ពុំប៉ះពាល់កម្ពុជា ។ ស្ត្រីរូបនេះថា តាមការសិក្សាទិន្នន័យ គឺប្រាក់ចំណូលកាស៊ីណូនៅព្រំដែនកម្ពុជា-ថៃបានធ្លាក់ចុះខ្លាំង ដោយសារវិធានការរឹតបន្តឹងព្រំដែន ។

ស្ត្រីរូបនេះរៀបរាប់ថា កាលពីខែមិថុនា ឆ្នាំ២០២៥ នៅខេត្តស្រះកែវ កងទ័ពភូមិភាគ១របស់ថៃបានកែសម្រួលពេលវេលាបើក-បិទព្រំដែន ធ្វើឱ្យកាស៊ីណូមួយនៅទីក្រុងប៉ោយប៉ែតមានភ្ញៀវចូលលេងធ្លាក់ចុះរហូតដល់៦២% ។ រីឯការស្នាក់នៅក្នុងសណ្ឋាគារក្បែរនោះធ្លាក់ចុះ៤២%ក្នុង១ថ្ងៃ រហូតដល់ប្រាក់ចំណូលនៅត្រីមាសទី២ (ចាប់ពីមេសា ដល់ខែមិថុនា) របស់កាស៊ីណូនេះធ្លាក់ចុះ៣១.៤% ។

កម្ពុជាបានហាមឃាត់ពលរដ្ឋចូលលេងកាស៊ីណូ ទើបធ្វើឱ្យប្រាក់ចំណូលកាស៊ីណូភាគច្រើនបានពីជនបរទេសចូលលេងកាស៊ីណូ រួមមាន ៖ ថៃ ស្មើ៣០.៩%, វៀតណាម ១៤% និងចិន ១១.១% ។ ជនជាតិថៃបានចូលលេងកាស៊ីណូច្រើនជាងជនជាតិផ្សេង ដោយសាររដ្ឋាភិបាលថៃគ្រប់អាណត្តិគ្មានច្បាប់ ឬវិធានការទប់ស្កាត់មិនឱ្យពលរដ្ឋចូលកាស៊ីណូ ទើបជនជាតិថៃអាចចូលកាស៊ីណូយ៉ាងសេរី ។

ប្រទេសចិនបានហាមឃាត់ពលរដ្ឋចូលកាស៊ីណូក្នុងប្រទេស និងក្រៅប្រទេស រួមទាំងអនុវត្តច្បាប់យ៉ាងតឹងរ៉ឹង ។ ហេតុនេះ ជនជាតិចិនត្រូវប្រុងប្រយ័ត្នក្នុងការចូលកាស៊ីណូនៅក្រៅប្រទេស ដោយសារប្រឈមនឹងការចាត់វិធានការផ្លូវច្បាប់ពេលត្រឡប់ទៅចិន ។ រីឯកូរ៉េខាងត្បូងហាមឃាត់ពលរដ្ឋលេងកាស៊ីណូក្នុងប្រទេស និងចាត់ទុកការចូលកាស៊ីណូនៅក្រៅប្រទេស គឺខុសច្បាប់ ។

ពលរដ្ឋ អ្នកនយោបាយ និងមន្ត្រីរាជការថៃ ដែលបើកកាស៊ីណូ វែបសាយខុសច្បាប់ និងលក់ថ្នាំញៀនឆ្លងចូលទឹកដីកម្ពុជាដោយងាយ គឺធ្វើឱ្យកាស៊ីណូនៅកម្ពុជាកើនឡើងច្រើន ។ កាលពីឆ្នាំ២០១៤ កម្ពុជាមានកាស៊ីណូចំនួន៥៧កន្លែង នៅឆ្នាំ២០១៩ កាស៊ីណូកើនឡើងដល់១៥០កន្លែង ដោយស្ត្រីរូបនេះបានចោទប្រកាន់ និងមូលបង្កាច់កម្ពុជាយកប្រាក់ចំណូលពីកាស៊ីណូមកទិញអាវុធឱ្យកងទ័ពធ្វើសង្គ្រាមជាមួយកងទ័ពថៃ និងពលរដ្ឋថៃ ។

ស្ត្រីរូបនេះបន្តថា កម្ពុជាមានពលរដ្ឋត្រឹមតែ១៧លាននាក់ ខណៈថៃមានពលរដ្ឋរហូតដល់៧០លាននាក់ ប៉ុន្តែកម្ពុជាថា ការបិទព្រំដែន១០០ឆ្នាំ មិនប៉ះពាល់កម្ពុជា គឺវាដូចគ្នានឹងការទះកំផ្លៀងថៃ ។ ស្ត្រីរូបនេះថែមទាំងនិយាយបំភ្លៃថា កងទ័ពកម្ពុជាហ៊ានធ្វើសង្គ្រាមជាមួយថៃ ដោយសារឃើញអ្នកនយោបាយ មន្ត្រីរាជការ និងឈ្មួញថៃមួយចំនួនមិនស្រឡាញ់ជាតិ គិតតែប្រយោជន៍ផ្ទាល់ខ្លួនជាងប្រយោជន៍ជាតិ ។

ទើបស្ត្រីរូបនេះសំណូមពរឱ្យរដ្ឋាភិបាលថ្មីក្រោមការដឹកនាំរបស់លោកនាយករដ្ឋមន្ត្រី អនុថីន ឆាន់វីរៈគូន អប់រំកម្ពុជាដោយការបិទព្រំដែនកម្ពុជា-ថៃ ។ វាមិនត្រឹមតែធ្វើឱ្យពលរដ្ឋថៃនៅឆ្ងាយពីកាស៊ីណូប៉ុណ្ណោះទេ គឺវាជាការបង្ហាញពីភាពខ្លាំងឱ្យកម្ពុជាមើលឃើញថា រដ្ឋាភិបាលថៃពុំលះបង់ប្រទេសជាតិដើម្បីផលប្រយោជន៍របស់អ្នកនយោបាយ ឬបុគ្គលមួយចំនួន ។ នេះបើតាមការលើកឡើងរបស់សាស្ត្រាចារ្យថៃ ។

គួរបញ្ជាក់ថា ខ្លឹមសារខាងលើនេះជាការចោទប្រកាន់របស់សាស្ត្រាចារ្យថៃ ដែលសំណូមពរឱ្យរដ្ឋាភិបាលរបស់ខ្លួនបិទព្រំដែនជាមួយកម្ពុជារៀងរហូត ដោយនិយាយបំភ្លៃថា កាស៊ីណូនៅទីក្រុងប៉ោយប៉ែត មានចំនួនកើនឡើងធ្វើឱ្យពលរដ្ឋថៃឆ្លងដែនមកកម្ពុជាច្រើន ៕

ប្រទេសហ្វីលីពីន ៖ គ្រោះរញ្ជួយដីកម្រិត៦.៩រិចទ័របានវាយប្រ.ហារនៅឆ្នេរសមុទ្រកោះសេប៊ូ ភាគកណ្តាលប្រទេសហ្វីលីពីនកាលពីយប់ថ្ងៃទី៣០ ខែកញ្ញា ឆ្នាំ២០២៥ បណ្តាលឱ្យពលរដ្ឋហ្វីលីពីនបាត់ប.ង់ជីវិតរហូតដល់២០នាក់ និងអគារជាច្រើនកន្លែងបាក់រលំដោយសារកម្លាំងរំញ័រខ្លាំង ។ នេះបើតាមការផ្សព្វផ្សាយរបស់សារព័ត៌មានបរទេសនៅថ្ងៃទី១ ខែតុលា ឆ្នាំ២០២៥ ។

គ្រោះរញ្ជួយដីធ្វើឱ្យតំបន់ជាច្រើនដាច់ចរន្តអគ្គិសនី អគារបាក់រលំនៅតំបន់ Visayas ដែលធ្វលឱ្យភ្នាក់ងារសង្គ្រោះព្យាយាមស្វែងរកមនុស្សស្លាប់ និងរងរបួសនៅក្រោមគំនរអគារ ។ ភ្នាក់ងារអង្កេតភូមិសាស្ត្រអាមេរិក (USGS) បញ្ជាក់ថា ចំណុចកណ្តាលរបស់គ្រោះរញ្ជួយដីនេះមានជម្រៅ១០គីឡូម៉ែត្រ នៅឆ្ងាយពីទីក្រុងកាឡាប៉េ ខេត្តបូហូល ទៅកាន់ទិសអាគ្នេយ៍ប្រមាណ១១គីឡូម៉ែត្រ បន្ទាប់មក មាន Aftershocks ជាច្រើនលើក ។

ទីក្រុងសេប៊ូ ដែលមានពលរដ្ឋរស់នៅជិត១លាននាក់ ទទួលកម្លាំងរំញ័រយ៉ាងខ្លាំងដោយសារគ្រោះរញ្ជួយដី ។ លោកវរសេនីយ៍ឯក Enrico Figueroa ស្នងការប៉ូលិសនៅទីក្រុងសេប៊ូ និយាយថា ឧបករណ៍អគ្គិសនីនៅលើបង្គោលភ្លើងបានផ្ទុះពេលរញ្ជួយដី ខណៈលោក Ian Poe ស្នងការប៉ូលិសទីក្រុង Villaba ខេត្តឡេយតេ បញ្ជាក់ថា រញ្ជួយដីមានរយៈពេលប្រមាណ១០វិនាទី និងធ្វើឱ្យអគារស្ថានីយប៉ូលិសរង្គើ ។

តាមសេចក្តីរាយការណ៍របស់សារព័ត៌មាន AFP គឺអគារ និងផ្លូវបានខូចខាត ព្រមទាំងដាច់ចរន្តអគ្គិសនីនៅតំបន់ជាច្រើន ប៉ុន្តែគ្មានការគំរាមកំហែងពីរលកយក្សស៊ូណាមិទេ ។ ទោះយ៉ាងណា ពលរដ្ឋហ្វីលីពីននៅឆ្នេរសមុទ្រគួរតែប្រុងប្រយ័ត្នកម្រិតទឹកសមុទ្រផ្លាស់ប្តូរយ៉ាងឆាប់រហ័ស និងរលកសមុទ្រ ។ ភ្នាក់ងារសង្គ្រោះបានស្វែងរកមនុស្សបាត់ខ្លួននៅក្រោមអគារក្នុងទីក្រុង San Remigio និងទីក្រុង Bogo ដែលបានបាក់រលំក្រោយរញ្ជួយដី ប៉ុន្តែពិបាកស្វែងរកមនុស្សបាត់ខ្លួនដោយសារងងឹត ។

អាជ្ញាធរបានប្រាប់ទៅពលរដ្ឋដែលរស់នៅលើកោះ Leyte, Cebu និងកោះ Biliran នៅឱ្យឆ្ងាយពីឆ្នេរសមុទ្រ ឬកុំទៅឆ្នេរសមុទ្រដាច់ខាត ខណៈអភិបាលខេត្តសេប៊ូ លោកស្រី ប៉ាមេឡា បារិខួត្រូ បាន Live តាមហ្វេសប៊ុកប្រាប់ពលរដ្ឋតាំងស្មារតី នៅឆ្ងាយពីរបងថ្ម ឬការដ្ឋានសាងសង់ ព្រមទាំងប្រយ័ត្ន Aftershocks លោកស្រីបានទំនាក់ទំនងជាមួយអាជ្ញាធរដើម្បីវាយតម្លៃស្ថានការណ៍ ៕