ប្រទេសឡាវ ៖ ប្រទេសឡាវបានរងឥទ្ធិពលខ្យល់ព្យុះប៊ូឡូយ (Bualoi) ធ្វើឱ្យពលរដ្ឋបាត់ប.ង់ជីវិតយ៉ាងហោចណាស់៣នាក់នៅខេត្តសាយសំបួរ ខណៈផ្លូវជាច្រើន និងលំនៅឋានពលរដ្ឋរាប់រយខ្នងនៅភាគកណ្តាល និងខាងជើងប្រទេស ខូចខាតខ្ទេចខ្ទីដោយសារទឹកហូរខ្លាំង និងការបាក់ដី ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១ ខែតុលា ឆ្នាំ២០២៥ ។

ក្រោយពីខ្យល់ព្យុះប៊ូឡូយបានបោកបក់មកលើប្រទេសវៀតណាម និងឡាវ កាលពីថ្ងៃទី២៩ ខែកញ្ញា កន្លងមក បានធ្វើឱ្យតំបន់ជាច្រើនរបស់ប្រទេសទាំងពីររងការខូចខាតយ៉ាងធ្ងន់ធ្ងរ ជាពិសេស នៅតំបន់កណ្តាលរបស់ឡាវ ។ បើតាមសេចក្តីរាយការណ៍ចុងក្រោយ គឺមានពលរដ្ឋឡាវស្លាប់ដោយសារខ្យល់ព្យុះនេះ យ៉ាងហោចណាស់៣នាក់ ។

កាលពីថ្ងៃទី៣០ ខែកញ្ញា លោក ផ្លយខាំ រុងប៊ុនយួង អភិបាលខេត្តសាយសំបួរ បាននាំមន្ត្រីពាក់ព័ន្ធទៅពិនិត្យមើលការខូចខាតដោយសារខ្យល់ព្យុះប៊ូឡូយ នៅភូមិករហៃ ស្រុកអនុវង្ស ដែលរងឥទ្ធិពលខ្យល់ព្យុះជាបន្តបន្ទាប់តាំងពីយប់ថ្ងៃទី២៩ ខែកញ្ញា ។ ទឹកបានហូរយ៉ាងខ្លាំងចូលលំនៅឋានពលរដ្ឋបណ្តាលឱ្យខូចខាតចំនួន២ខ្នង ខណៈមនុស្សរស់នៅក្នុងលំនៅឋានទាំងនេះស្លាប់៣នាក់ ហើយទឹកជំនន់បានហូរផ្តាច់ផ្លូវជាច្រើនរហូតពុំអាចធ្វើចរាចរណ៍បាន ។

ក្រៅពីការខូចខាតនៅខេត្តសាយសំបួរ ឥទ្ធិពលខ្យល់ព្យុះនេះបានធ្វើឱ្យមានទឹកជំនន់ បាក់ដី បំផ្លាញផ្លូវជាច្រើន អគារ និងលំនៅឋានពលរដ្ឋរាប់រយខ្នងទៀតនៅបណ្តាខេត្តរបស់ឡាវជាច្រើននៅភាគកណ្តាល និងខាងជើង រួមទាំងទីក្រុងហ្លួងព្រះបាង ទីក្រុងវៀងចន្ទន៍ ។

ផ្លូវ១ខ្សែដែលតភ្ជាប់ពីទីក្រុងវាំងវៀន ទៅកាន់ទីក្រុងហ្លួងព្រះបាង ត្រូវបានទឹកហូរកាត់ផ្តាច់ ខណៈផ្លូវទើបធ្វើថ្មីតភ្ជាប់ទីក្រុងហុងសា ខេត្តសាយបូរី កាត់តាមទីក្រុងឈៀងមេន ទៅកាន់ទីក្រុងហ្លួងព្រះបាង ដែលជាតំបន់ទេសចរណ៍ដ៏សំខាន់ ហើយពលរដ្ឋឡាវចូលចិត្តធ្វើដំណើរតាមផ្លូវនេះ គឺបានបាក់ដីបិទផ្លូវពុំអាចបើកបររថយន្តឆ្លងកាត់ ។

ចំណែកជណ្តើរថ្មឡើងទៅកាន់វត្តភូសិ នៅទីក្រុងហ្លួងព្រះបាង ត្រូវបានដើមឈើនៅសងខាងបាក់រលំសង្កត់ធ្វើឱ្យដាច់ចរន្តអគ្គិសនី ។ ដូចគ្នានេះ លំនៅឋានពលរដ្ឋជាច្រើនខ្នងទៀតនៅខេត្តឈៀងខ្វាង និងខេត្តហួផាន់ បានខូចខាតដោយសារដីបាក់សង្កត់ ៕

ប្រទេសថៃ ៖ កាលពីថ្ងៃទី១៥ ខែមិថុនា ឆ្នាំ២០២៥ រាជរដ្ឋាភិបាលកម្ពុជាបានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយពាក់ព័ន្ធនឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ត្រូវនឹងថ្ងៃប្រវត្តិសាស្ត្រ៦៣ឆ្នាំមុន ដែលតុលាការយុត្តិធម៌អន្តរជាតិ (ICJ) បានសម្រេចឱ្យកម្ពុជាឈ្នះក្តីប្រាសាទព្រះវិហារ ។ ប៉ុន្តែភាគីថៃទាមទារឱ្យកម្ពុជាដោះស្រាយវិវាទព្រំដែនទ្វេភាគី ដោយពុំចាំបាច់មានការអន្តរាគមន៍ពីប្រទេសផ្សេងៗ និងបដិសេធតុលាការយុត្តិធម៌អន្តរជាតិ ។

សារព័ត៌មានថៃ Khaosod រាយការណ៍ថា កាលពីថ្ងៃទី១ ខែតុលា ឆ្នាំ២០២៥ នាយករដ្ឋមន្ត្រីថៃ លោក អនុថីន ឆាន់វីរៈគូន បានលើកឡើងពីគោលជំហរថៃពាក់ព័ន្ធនឹងកម្ពុជាដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ (ICJ) ថា គឺជាសិទ្ធិរបស់កម្ពុជាដែលស្វែងរកដំណោះស្រាយបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ខណៈថៃមានគោលជំហរដោះស្រាយវិវាទច្បាស់លាស់ផ្អែកលើផលប្រយោជន៍ជាតិ និងពលរដ្ឋ ។ នៅថ្ងៃទី២ ខែតុលា ក្រុមប្រឹក្សាសន្តិសុខជាតិនឹងប្រកាសឈ្មោះប្រធាន JBC ថ្មីរបស់ថៃ ដោយសារប្រធានចាស់នឹងបញ្ចប់តួនាទីឆាប់ៗនេះ ។

នៅវិមានរដ្ឋាភិបាល លោក អនុថីន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ បាននិយាយពីកម្ពុជាដាក់ពាក្យបណ្តឹងទៅតុលាការ ICJ កាលពីខែមិថុនា ឆ្នាំ២០២៥ ដើម្បីដោះស្រាយវិវាទព្រំដែននៅតំបន់ទាំង៤ ដោយលោក អនុថីន ថា ពុំជ្រាបតុលាការ ICJ បានទទួលពាក្យបណ្តឹងពីកម្ពុជាឬយ៉ាងណា ។ ការប្តឹងតុលាការ ICJ ជាសិទ្ធិរបស់កម្ពុជា ខណៈថៃមានគោលជំហរដោះស្រាយវិវាទច្បាស់លាស់ផ្អែកលើផលប្រយោជន៍ជាតិ និងពលរដ្ឋជាចម្បង ប៉ុន្តែរដ្ឋាភិបាលថៃនឹងតាមដានបណ្តឹងនៅតុលាការ ICJ ។

រដ្ឋាភិបាលថៃបានត្រៀមខ្លួនធ្វើការដោយឈរលើមូលដ្ឋានច្បាប់អន្តរជាតិ រួមទាំងប្រើប្រាស់គ្រប់យន្តការការទូតដើម្បីការពារផលប្រយោជន៍ជាតិ ។ នៅថ្ងៃទី២ ខែតុលា នឹងមានកិច្ចប្រជុំក្រុមប្រឹក្សាសន្តិសុខជាតិពិភាក្សាពីការតែងតាំងប្រធាន JBC ថ្មី ខណៈប្រធាន JBC ចាស់របស់ថៃនឹងបញ្ចប់តួនាទីឆាប់ៗ ហើយការតែងតាំងប្រធាន JBC ថ្មី នឹងប្រកាសច្បាស់លាស់ក្រោយកិច្ចប្រជុំក្រុមប្រឹក្សាសន្តិសុខជាតិ ។

តាមហ្វេសប៊ុកផេកផ្លូវការរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានបញ្ជាក់ថា កម្ពុជាមិនដកថយទេពាក់ព័ន្ធនឹងការស្នើសុំឱ្យតុលាការ ICJ ជួយដោះស្រាយបញ្ហាព្រំដែនកម្ពុជា-ថៃ នៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ។ រាជរដ្ឋាភិបាលកម្ពុជានឹងបន្តកិច្ចការនេះប្រកបដោយការប្តេជ្ញាចិត្ត និងការទទួលខុសត្រូវខ្ពស់ដើម្បីការពារបូរណភាពទឹកដី ក៏ដូចជាឧត្តមប្រយោជន៍ជាតិ និងពលរដ្ឋខ្មែរ ។

គួរបញ្ជាក់ថា មុនពេលកម្ពុជារៀបចំឯកសារប្តឹងថៃទៅតុលាការ ICJ គឺប្រទេសទាំងពីរមានភាពតានតឹងនៅតំបន់ព្រំដែនទាំង៤ ហើយកងទ័ពខ្មែរម្នាក់ត្រូវបានកងទ័ពថៃបាញ់ស្លាប់នៅតំបន់មុំបី ខេត្តព្រះវិហារ កាលពីថ្ងៃទី២៨ ខែឧសភា ។ កម្ពុជានឹងឈ្នះថៃនៅតុលាការ ICJ ដោយសារកម្ពុជាមានឯកសាររឹងមាំបញ្ជាក់ពីកម្មសិទ្ធិរបស់ខ្លួនលើតំបន់ទាំងនេះ ៕

ប្រទេសថៃ ៖ នៅខែកញ្ញា ឆ្នាំ២០២៥ ខ្យល់ព្យុះបួឡូយបានវាយប្រ.ហារប្រទេសថៃបណ្តាលឱ្យទឹកជំនន់ជន់លិចខេត្តចំនួន១៧ និងពលរដ្ឋថៃយ៉ាងហោចណាស់៧នាក់បាត់ប.ង់ជីវិត ព្រមទាំងគំរា.មកំហែងដល់សុវត្ថិភាពពលរដ្ឋថៃជាង២សែននាក់ទៀត ។ ដូចគ្នានេះ នៅខេត្តពិស្នុលោករបស់ថៃ ក៏មានទឹកជំនន់លិចលំនៅឋានពលរដ្ឋផងដែរ ក្នុងនោះលំនៅឋាន១ខ្នងកម្ពស់២ជាន់ បានរងគ្រោះផ្ទួនៗដោយសារទឹកជំនន់លិចជាន់ក្រោម អគ្គិភ័យឆាបឆេះជាន់លើ ។

សារព័ត៌មានថៃ Khaosod រាយការណ៍ថា ថ្មីៗនេះ លំនៅឋានពលរដ្ឋថៃមួយកន្លែងកម្ពស់២ជាន់ នៅខេត្តពិស្នុលោក បានរងគ្រោះផ្ទួនៗគ្នា ឬហៅថា ទុក្ខជាន់លើទុក្ខ គឺពេលម្ចាស់លំនៅឋានកំពុងតែប្រមូលសម្ភារៈនៅផ្ទះជាន់ក្រោមគេចពីទឹកជំនន់ ស្រាប់តែអគ្គិភ័យឆាបឆេះលំនៅឋានជាន់លើដោយសារទុសេចរន្តអគ្គិសនី ។ ហេតុការណ៍នេះធ្វើឱ្យម្ចាស់លំនៅឋានស្រងោចចិត្តអាណិតខ្លួន ពីព្រោះទឹកជំនន់វាយប្រហារខ្លាំងហើយ មកជួបអគ្គិភ័យទៀត ដែលធ្វើឱ្យអ្នកលេងបណ្តាញសង្គមជួយផ្តល់កម្លាំងចិត្ត ។

នៅថ្ងៃទី១ ខែតុលា អ្នកលេង TikTok ម្នាក់ឈ្មោះ «user782283628063» បានបង្ហោះវីដេអូហេតុការណ៍គួរឱ្យខ្លោចចិត្តបំផុតដែលបានកើតឡើងនាពេលថ្មីៗនេះ គឺក្រោយពីទឹកជំនន់លិចលំនៅឋានជាន់ក្រោមហើយ ថែមទាំងត្រូវអគ្គិភ័យឆាបឆេះជាន់លើទៀត ដោយអ្នកបង្ហោះវីដេអូសរសេរថា ៖ «ពេលជញ្ជូនរបស់របរគេចពីទឹកជំនន់ ស្រាប់តែភ្លើងឆេះលំនៅឋានជាន់លើថែមទៀត លើកនេះពិតជាធ្ងន់ធ្ងរមែន» ។

ហេតុការណ៍នេះបានកើតឡើងនៅខេត្តពិស្នុលោក ដែលលំនៅឋាននេះជាលំនៅឋានឪពុក-ម្តាយរបស់ម្ចាស់វីដេអូក្នុង TikTok ។ ពេលនោះ ទឹកជំនន់បានលិចយ៉ាងខ្លាំង ហើយសមាជិកគ្រួសារកំពុងនាំគ្នាជញ្ជូនរបស់របរនៅផ្ទះជាន់ក្រោមទៅទុកនៅជាន់លើ ប៉ុន្តែសុខៗ ក៏ទុសេចរន្តអគ្គិសនីនៅជាន់លើ ។ លំនៅឋានជាន់ក្រោមជាស៊ីម៉ងត៍ និងជាន់ឈើធ្វើពីឈើងាយនឹងឆាបឆេះ ។

អគ្គិភ័យបានឆាបឆេះលំនៅឋានជាន់លើយ៉ាងឆាប់រហ័ស និងពុំអាចពន្លត់ភ្លើងបានឡើយ ។ ក្រោយពីវីដេអូហេតុការណ៍នេះត្រូវបានបង្ហោះក្នុង TikTok ធ្វើឱ្យអ្នកលេងបណ្តាញសង្គមអាណិតអាសូរម្ចាស់លំនៅឋាន និងផ្តល់កម្លាំងចិត្តដល់អ្នកបង្ហោះវីដេអូផងដែរ ដែលមកជួបហេតុការណ៍ទុក្ខជាន់លើទុក្ខបែបនេះក្នុងពេលតែមួយ ។ អ្នកលេងបណ្តាញសង្គមជាច្រើនបានបន់ស្រន់ឱ្យម្ចាស់លំនៅឋានឆ្លងផុតរឿងអាក្រក់នេះឆាប់ៗ ៕

ប្រទេសថៃ ៖ តាមការចុះផ្សាយរបស់សារព័ត៌មានថៃ Mgr Online កាលពីថ្ងៃទី៣០ ខែកញ្ញា ឆ្នាំ២០២៥ ឱ្យដឹងថា តួឯកឥណ្ឌារឿងព្រះពុទ្ធ លោក Gagan Malik បានសរសេរពាក្យ «I Love Thailand» លើផ្ទាំងរូបភាពលោក ប៊ុនស៊ីន ផាកក្លាង អតីតមេបញ្ជាការយោធភូមិភាគ២ថៃ ក្នុងពេលតួឯកឥណ្ឌារូបនេះចូលរួមកម្មវិធីមួយនៅទីក្រុងប៉ាតាយ៉ា ។ ការបង្ហាញក្តីស្រឡាញ់ទៅកាន់ប្រទេសថៃនេះធ្វើឱ្យពលរដ្ឋថៃសរសើរមិនដាច់ពីមាត់ ដែលលោកជាជនបរទេសមានបេះដូងស្រឡាញ់ថៃ និងចាត់ទុកថៃជាផ្ទះទី២ ក្រោយលាលែងពីតំណែងឯកអគ្គរដ្ឋទូតសុច្ឆន្ទៈទេសចរណ៍របស់កម្ពុជា ។

កាលពីថ្ងៃទី៣០ ខែកញ្ញា អភិបាលក្រុងប៉ាតាយ៉ា លោក ប៉ារ៉ាមេត ង៉ាមផិសេត បានធ្វើជាប្រធានកម្មវិធីសូត្រមន្តប្រគេនចង្ហាន់ព្រះសង្ឃក្នុងឱកាសគម្រប់ខួប១៧ឆ្នាំ នៃការសាងសង់សាលារៀននៅទីក្រុងប៉ាតាយ៉ា ដែលមានការចូលរួមពីមន្ត្រីពាក់ព័ន្ធជាច្រើន ។ ប៉ុន្តែអ្វីដែលធ្វើឱ្យអ្នកចូលរួមកម្មវិធីភ្ញាក់ផ្អើលយ៉ាងខ្លាំងនោះ គឺតារាសម្តែងដ៏ល្បីរបស់ឥណ្ឌា លោក Gagan Malik បានធ្វើដំណើរមកចូលរួមកម្មវិធីដែរ ហើយលោកថែមទាំងសរសេរពាក្យ «I Love Thailand» នៅលើផ្ទាំងរូបភាពរបស់លោក ប៊ុនស៊ីន ផាកក្លាង អតីតមេបញ្ជាការយោធភូមិភាគ២ និងចុះហត្ថលេខា ។

លោក Gagan Malik ទទួលបានការគាំទ្រខ្លាំងពីជនជាតិថៃ ក្រោយលាលែងពីតំណែងឯកអគ្គរដ្ឋទូតសុច្ឆន្ទៈទេសចរណ៍របស់កម្ពុជា ក្រោមហេតុផលដើម្បីបង្ហាញការគោរពដល់ប្រទេសថៃ និងចាត់ទុកថៃជាផ្ទះទី២ របស់ខ្លួន ។ បើទោះជាលោកបង្ហាញក្តីស្រឡាញ់ប្រទេសថៃក្តី ប៉ុន្តែមតិមួយចំនួនថា លោកសម្រេចជ្រើសយកថៃ ដោយសារថៃជាប្រទេសធំ មានពលរដ្ឋច្រើន ដែលធ្វើឱ្យលោកនឹងទទួលបានផលប្រយោជន៍ច្រើនពីថៃ ។ ម្យ៉ាងទៀត ដើម្បីកុំឱ្យអ្នកគាំទ្រនៅថៃខឹងសម្បាររូបលោកដែលបានសរសើរកម្ពុជា ។

គួរបញ្ជាក់ថា តារាសម្តែងឥណ្ឌាដ៏ល្បីល្បាញ លោក Gagan Malik ដែលធ្លាប់សម្តែងជាតួអង្គព្រះពុទ្ធ បានប្រកាសលាលែងពីតំណែងជាឯកអគ្គរដ្ឋទូតសុឆន្ទៈផ្នែកទេសចរណ៍របស់កម្ពុជា ជាផ្លូវការ ។ លោកបានសូមទោសទៅកាន់អ្នកគាំទ្រជ.នជាតិថៃទាំងអស់ ប្រសិនបើដំណើរទស្សនកិច្ចចុងក្រោយរបស់លោកមកកាន់កម្ពុជា បង្កឱ្យមានការឈឺចាប់ណាមួយ និងចាត់ទុកប្រទេសថៃជាផ្ទះទី២ របស់ខ្លួន ។

លោកនិយាយថា ៖ «ខ្ញុំសូមអភ័យទោសដោយស្មោះចំពោះអ្នកគាំទ្រថៃទាំងអស់របស់ខ្ញុំ ប្រសិនបើការមកលេងប្រទេសកម្ពុជានាពេលថ្មីៗនេះបណ្តាលឱ្យមានការឈឺចាប់ណាមួយ ។ ថៃគឺជាផ្ទះទី២របស់ខ្ញុំ ហើយខ្ញុំកាន់តែគោរពប្រទេសនេះដ៏ជ្រាលជ្រៅបំផុត» ៕

បាងកក៖ ការងារជួសជុលក្រហូងដីដ៏ធំតាមបណ្តោយផ្លូវ Samsen ទល់មុខស្ថានីយ៍ប៉ូលីស Samsen ទីក្រុងបាងកក ត្រូវបានជាប់គាំងបន្ទាប់ពីវិស្វករជំនាញបានរកឃើញប្រហោងពុកចំនួនពីរបន្ថែមទៀតនៅផ្នែកខាងក្រោមនៃរណ្ដៅនោះ។ នេះបើតាមការចុះផ្សាយរបស់សារព័ត៌មាន The Nation។

លោក Kitti Akewanlop ជំនួយការអភិបាលនៃអាជ្ញាធរដឹកជញ្ជូនរហ័សនៃប្រទេសថៃ (MRTA) បាននិយាយថា ក្រោយការប្រើប្រាស់ដងស្ទូចទម្ងន់ 200 តោនដើម្បីយកការកកស្ទះចេញពីរណ្ដៅដីនោះ កម្មករបានរកឃើញបែហោងធ្មែញ ឬប្រហោងពុកនៅគ្រឹះខាងក្រោមដែលតម្រូវឲ្យមានការផ្លាស់ប្ដូរវិធីសាស្រ្តក្នុងការជួសជុល។

ស្នាមប្រហោងថ្មីៗដែលគេទើបតែបានរកឃើញទាំងនេះ ត្រូវបានគេសន្និដ្ឋានថាបង្កើតឡើងដោយសារតែការរួញមាឌនិងការប្រេះនៃបេតុង។ ហើយភ្លាមៗ ការជួសជុលពាក់ព័ន្ធនឹងការចាក់បេតុងចូលទៅក្នុងប្រហោងទាំងនោះ មិនអាចធ្វើទៅបាននោះទេ ដោយខ្លាចថាវាអាចនឹងមានការបាក់ពុកបន្ថែមទៀត។ ការពន្យារពេលនេះបណ្តាលឱ្យមានការបញ្ឈប់ការងារប្រហែលពីប្រាំពីរទៅប្រាំបីម៉ោង។

ការជួសជុលពេញលេញត្រូវបានគេរំពឹងថានឹងត្រូវការខ្សាច់ពី 7,000 ទៅ 8,000 ម៉ែត្រគូប ឬមានចំនួនស្មើនឹងឡានដឹកទំនិញជាង 1,000 គ្រឿងឯណោះ ទើបអាចបំពេញនូវចន្លោះបាក់ស្រុតនេះបាន។

យ៉ាងណាក៏ដោយ មកដល់ថ្ងៃទី1 ខែតុលា ការបាក់ស្រុតផ្លូវមួយទៀតបានកើតមាននៅទីក្រុងបាងកក ក្នុងតំបន់ Chrown Krung នេះបើតាមការរាយការណ៍របស់កាសែតក្នុងស្រុកថៃ។ ការបាក់ស្រុតនេះ បានប៉ះពាល់លើផ្លូវជាច្រើនម៉ែត្រ ដែលបង្កឱ្យមានការកកស្ទះចរាចរណ៍ជាខ្លាំង។

មន្ត្រីមជ្ឈមណ្ឌលសង្គ្រោះនៅតំបន់ Charown Krung និងក្រុមពាក់ព័ន្ធបានប្រញាប់ប្រញាល់ទៅតំបន់នោះដើម្បីវាយតម្លៃស្ថានភាព អនុវត្តវិធានការត្រួតពិនិត្យចរាចរណ៍ និងបង្ការគ្រោះថ្នាក់បន្ថែមទៀត។ភ្នាក់ងារពាក់ព័ន្ធកំពុងរៀបចំធ្វើការស៊ើបអង្កេតយ៉ាងហ្មត់ចត់លើមូលហេតុនៃការបាក់ស្រុតនេះ៕

ប្រទេសថៃ ៖ អតីតមេបញ្ជាការយោធភូមិភាគ២ លោក ប៊ុនស៊ីន ផាកក្លាង ដែលបានចូលនិវត្តន៍ពីការងារកងទ័ពកាលពីថ្ងៃទី៣០ ខែកញ្ញា ឆ្នាំ២០២៥ និងត្រូវស្តេចថៃប្រគល់តំណែងថ្មីធ្វើជាអង្គរក្សពិសេសបាននិយាយក្នុងកម្មវិធីមួយថា បានបំពេញតួនាទីល្អបំផុតសម្រាប់ប្រទេសជាតិនាពេលកន្លងមក ។ ជម្លោះព្រំដែនរវាងកម្ពុជា-ថៃអាចនឹងបញ្ចប់នាពេលឆាប់ៗនេះ និងផ្តាំផ្ញើទៅកាន់កងទ័ពថៃតាំងពីថ្នាក់លើដល់ថ្នាក់ក្រោមត្រូវប្រឹងប្រែងបំពេញតួនាទី និងស្មោះត្រង់ចំពោះជាតិ ។

លោក ប៊ុនស៊ីន ផាកក្លាង បានចូលនិវត្តន៍ពីតួនាទីជាមេបញ្ជាការយោធភូមិភាគ២កាលពីថ្ងៃទី៣០ ខែកញ្ញា លោកបានចូលរួមកម្មវិធីមួយឈ្មោះ «ពីកូនកសិករក្លាយជាកងទ័ពបំពេញភារកិច្ចការពារទឹកដី» នៅវិទ្យាស្ថានធីវ៉ា (TVA Institute) ដោយក្នុងកម្មវិធី លោកនិយាយថា ចាប់ពីពេលនេះ លោកពុំមែនជាមេបញ្ជាការកងទ័ពទៀតទេ គឺគ្រាន់តែជាពូម្នាក់ប៉ុណ្ណោះ ។ លោកមកចូលរួមកម្មវិធីដោយសារគ្មានការប៉ះទង្គិចនៅព្រំដែនកម្ពុជា-ថៃ លោកមិនមែនមកដើម្បីផលប្រយោជន៍ ប៉ុន្តែដើម្បីពលរដ្ឋថៃ ។

កងទ័ពយោធភូមិភាគ២គ្រប់អង្គភាពបានបំពេញភារកិច្ចតាមព្រះរាជតំរិះរបស់ព្រះមហាក្សត្រថៃ រួមទាំងចូលរួមក្នុងគម្រោងកសិកម្មដែលបង្កើតឡើងដោយព្រះមហាក្សត្រនៅតំបន់ខៅយ៉ៃ ។ ក្រោយចូលនិវត្តន៍ពីការងារកងទ័ព លោក ប៊ុនស៊ីន នឹងធ្វើជាទីប្រឹក្សារបស់មេបញ្ជាការកងទ័ពជើងគោក និងអង្គរក្សពិសេសព្រះមហាក្សត្រ ពេលទំនេរ លោកនឹងចូលរួមក្នុងគម្រោងកសិកម្មដែលជាគម្រោងល្អសម្រាប់ពលរដ្ឋថៃទូទាំងប្រទេស ។

ក្រោយពីបញ្ចប់កម្មវិធីនៅវិទ្យាស្ថានធីវ៉ា លោក ប៊ុនស៊ីន ក៏បានផ្តល់សម្ភាសន៍ជាមួយសារព័ត៌មានដែលសាកសួរពីស្ថានការណ៍ព្រំដែនកម្ពុជា-ថៃ ដោយលោកនិយាយថា ជម្លោះព្រំដែនរវាងកម្ពុជា-ថៃអាចនឹងបញ្ចប់នាពេលឆាប់ៗនេះ ។ ចាប់ពីពេលនេះ លោកនឹងធ្វើជាទីប្រឹក្សាកងទ័ព និងមេបញ្ជាការទ័ព ដោយផ្តល់ការណែនាំផ្សេងៗដែលកងទ័ពមានចម្ងល់ ។

ក្រៅពីនេះ លោកនឹងជួបពលរដ្ឋនៅតំបន់ផ្សេងៗដូចមុន លោកមានការងារច្រើនត្រូវបំពេញ ដូចជា ៖ រៀបចំកម្មវិធីរត់កីឡានៅភ្នំទ្រព្យ ។ រីឯមេបញ្ជាការយោធភូមិភាគ២ថ្មី លោក វីរៈយុទ្ធ រ៉ាក់ស៊ីន គឺជាមិត្តភក្តិរបស់លោក និងធ្វើការងារជាមួយគ្នាពេលថៃប៉ះទង្គិចជាមួយកម្ពុជា ។ លោក វីរៈយុទ្ធ ដឹងពីតួនាទីត្រូវធ្វើអ្វី ចំណែកលោកវិញបានបំពេញការងារសម្រាប់ជាតិយ៉ាងល្អនាពេលកន្លងមក ។ លោក ប៊ុនស៊ីន ក៏បានផ្តាំផ្ញើទៅកាន់កងទ័ពតាំងពីថ្នាក់លើដល់ថ្នាក់ក្រោមត្រូវបំពេញភារកិច្ចឱ្យល្អ និងស្មោះត្រង់ចំពោះជាតិ ។

គួរបញ្ជាក់ថា លោក ប៊ុនស៊ីន គឺជាបុគ្គលបង្កជម្លោះ និយាយមូលបង្កាច់ និងចោទប្រកាន់កម្ពុជា រហូតទទួលបានការលើកតម្កើងពីពលរដ្ឋថៃទូទាំងប្រទេស ក៏ដូចជាស្តេចថៃសព្វប្រទ័យចេញព្រះរាជក្រឹត្យតែងតាំងមេទ័ពឈ្លានពាននេះធ្វើជាអង្គរក្សពិសេស ។ ប៉ុន្តែអ្នកជំនាញសេដ្ឋកិច្ចថៃមើលឃើញថា លោក ប៊ុនស៊ីន គ្មានចំណេះដឹងផ្នែកសេដ្ឋកិច្ច ដឹងតែធ្វើសង្គ្រាម លោករស់នៅព្រំដែនស្ទើរមួយជីវិត ពុំយល់ដឹងពីផលប៉ះពាល់សេដ្ឋកិច្ចថៃដោយសារការបិទព្រំដែនកម្ពុជា-ថៃជាឯកតោភាគីរបស់កងទ័ព ៕