ប្រទេសថៃ ៖ សង្គ្រាមកម្ពុជា-ថៃនៅតំបន់ព្រំដែនកាលពីខែកក្កដា ឆ្នាំ២០២៥ កើតឡើងដោយសារកងទ័ពថៃចាប់ផ្តើមបា.ញ់ប្រ.ហារមុនមកលើកម្ពុជា ខណៈកងទ័ពកម្ពុជាប្រើប្រាស់សិទ្ធិការពារខ្លួន ដោយកងទ័ពថៃបានប្រើប្រាស់សព្វាវុ.ធគ្រប់ប្រភេទ ថែមទាំងប្រើប្រាស់យន្តហោះចម្បាំង F-16 ទម្លាក់គ្រា.ប់បែកមកលើទីតាំងកងទ័ព និងតំបន់ស៊ីវិលកម្ពុជា ។ ប៉ុន្តែបែរជានិយាយលាបពណ៌ ចោទប្រកាន់កម្ពុជាបា.ញ់មុន ហើយកងទ័ពអាកាសថៃថា ការប្រើប្រាស់យន្តហោះចម្បាំងវាយប្រ.ហារកម្ពុជា គឺស្របច្បាប់អន្តរជាតិ និងដើម្បីការពារខ្លួន ។

ក្រោយមានការចុះផ្សាយក្នុងសារព័ត៌មាន និងបណ្តាញសង្គមថា សង្គ្រាមនៅតំបន់ព្រំដែនកម្ពុជា-ថៃកន្លងមក កើតឡើងដោយសារកងទ័ពថៃជាអ្នកបាញ់មុនមកលើកម្ពុជាដោយប្រើប្រាស់យន្តហោះចម្បាំង F-16 នោះ អ្នកនាំពាក្យកងទ័ពអាកាសថៃ លោក ចាក់គ្រីត ថាំម៉ាវិឆ័យ បាននិយាយកាលពីថ្ងៃទី១៥ ខែតុលា ឆ្នាំ២០២៥ ថា ការប្រើប្រាស់យន្តហោះចម្បាំង F-16 និង Gripen វាយប្រហារកម្ពុជា គឺជាការទប់ទល់នឹងការវាយប្រហាររបស់កងទ័ពកម្ពុជា ។

លោក ចាក់គ្រីត បានចោទប្រកាន់កងទ័ពកម្ពុជាប្រើប្រាស់គ្រាប់រ៉ុក្កែត និងកាំភ្លើងធំបាញ់លើតំបន់ស៊ីវិលរបស់ថៃ ដូចជា ៖ បាញ់គ្រាប់រ៉ុកែត BM-21 មកលើស្រុកកាបឈើង ខេត្តសុរិន្ទ កាលពីថ្ងៃទី២៤ ខែកក្កដា បណ្តាលឱ្យពលរដ្ឋថៃស្លាប់២នាក់ និងរងរបួស២នាក់ ។ លោកថែមទាំងចោទប្រកាន់កងទ័ពកម្ពុជាបាញ់លើតំបន់ស៊ីវិលជាបន្តបន្ទាប់ ជាពិសេស បាញ់ហាងលក់ទំនិញ 7-11 ធ្វើឱ្យពលរដ្ឋថៃស្លាប់៧នាក់ និងរងរបួសជាច្រើននាក់ ។

កងទ័ពអាកាសថៃក៏សម្រេចចិត្តវាយប្រហារកម្ពុជាតាមផ្លូវអាកាស ដោយកំណត់គោលដៅកំទេចទីតាំងកងទ័ពកម្ពុជាដើម្បីបំផ្លាញសមត្ថភាពប្រតិបត្តិការ ក្រោយពីភាគីថៃចោទប្រកាន់ថា សកម្មភាពរបស់កងទ័ពកម្ពុជាបានបំពានអធិបតេយ្យ និងធ្វើឱ្យពលរដ្ឋថៃគ្មានសុវត្ថិភាព ក៏ដូចជាខូចខាតទ្រព្យសម្បត្តិ ។ យន្តហោះចម្បាំង F-16 របស់ថៃបានទម្លាក់គ្រាប់បែកលើទីតាំងកងទ័ពកម្ពុជាលើកដំបូងកាលពីវេលាម៉ោង១០និង៣៨នាទី ថ្ងៃទី២៤ ខែកក្កដា ដែលកងទ័ពអាកាសថៃអួតអាងការទម្លាក់គ្រាប់បែកចំគោលដៅ ។

ការប្រើប្រាស់យន្តហោះចម្បាំងវាយប្រ.ហារកម្ពុជា គឺស្របច្បាប់អន្តរជាតិ ថៃប្រើប្រាស់ដើម្បីការពារខ្លួនតាមមាត្រា៥១ នៃធម្មនុញ្ញអង្គការសហប្រជាជាតិ និងដោយសារចាំបាច់ ព្រមទាំងបែងចែករវាងទីតាំងកងទ័ពកម្ពុជា និងតំបន់ស៊ីវិលកម្ពុជា ។ សូមពលរដ្ឋថៃជឿជាក់មកលើកងទ័ពអាកាសក្នុងការត្រៀមខ្លួនប្រយុទ្ធគ្រប់ពេលវេលាដើម្បីការពារឯករាជ្យ អធិបតេយ្យជាតិ ការពារជីវិត និងទ្រព្យសម្បត្តិពលរដ្ឋ រួមទាំងកំណត់លក្ខខណ្ឌយុទ្ធសាស្ត្រសម្រាប់ការចរចាឈានទៅរកសន្តិភាព ។ នេះបើតាមការលើកឡើងរបស់អ្នកនាំពាក្យកងទ័ពអាកាសថៃ ។

គួរបញ្ជាក់ថា លោកស្រី អាំងខាណា សមាជិកព្រឹទ្ធសភាថៃបាននិយាយការពិតប្រាប់សារព័ត៌មាន Amarin កាលពីថ្ងៃទី១៤ ខែតុលា ថា លោកស្រីមិនកាន់ជើងកម្ពុជាទេ ប៉ុន្តែអ្វីដែលនិយាយ សុទ្ធតែជាការពិត គឺថៃជាអ្នកវាយប្រហារមុនមកលើកម្ពុជា ហើយថែមទាំងបើកការវាយប្រហារដោយយន្តហោះចម្បាំង F-16 លើកម្ពុជា ។ ការនិយាយការពិត ទើបពេលនេះ លោកស្រីរងការរិះគន់យ៉ាងខ្លាំងពីក្រុមជ្រុលនិយមវង្វេងប្រវត្តិសាស្ត្ររួមគ្នាថ្កោលទោស ។

សង្គ្រាមកម្ពុជា-ថៃកាលពីខែកក្កដា ឆ្នាំ២០២៥ កងទ័ពថៃបានប្រើប្រាស់សព្វាវុធធុនធ្ងន់មកលើដែនអធិបតេយ្យកម្ពុជា ជាបន្តបន្ទាប់ ដោយប្រើប្រាស់យន្តហោះចម្បាំង F-16 គ្រាប់បែកចង្កោម ដ្រូនអត្តឃាត គ្រាប់រ៉ុក្កែត កាំភ្លើងធំ និងបាញ់ផ្សែងពុល មកលើទីតាំងកងទ័ព លំនៅឋានពលរដ្ឋកម្ពុជា រួមទាំងវត្តអារ៉ាម ។ ក្រោយពីមានការអន្តរាគមន៍ពីប្រធានាធិបតីអាមេរិក លោក Donald Trump ភាគីទាំងពីរក៏ធ្វើកិច្ចព្រមព្រៀងបទឈប់បាញ់ដោយឥតលក្ខខណ្ឌ ប៉ុន្តែថៃល្មើសបទឈប់បាញ់រហូតមក ។

លោក Trump ថ្លែងថា ថៃនៅតែព្យាយាមឈ្លានពានកម្ពុជា ហើយមិនអើពើនឹងការគោរពបទឈប់បាញ់ដែលរៀបចំដោយម៉ាឡេស៊ី ។ វានឹងធ្វើឱ្យថៃក្លាយជាប្រទេសមិនគោរពច្បាប់អន្តរជាតិ លោកនឹងអំពាវនាវឱ្យពិភពលោក ដាក់ទណ្ឌកម្មប្រឆាំងថៃក្នុងអំឡុងកិច្ចប្រជុំកំពូលអាស៊ាននាខែតុលា នៅម៉ាឡេស៊ី ៕

ប្រទេសថៃ ៖ វាបានក្លាយជាទម្លាប់ដែលបុគ្គលណាម្នាក់នៅប្រទេសថៃហ៊ាននិយាយការពិតពីថៃឈ្លានពាន គឺបុគ្គលនោះតែងតែរងការរិះគ.ន់វាយប្រ.ហារយ៉ាងចាស់ដៃពីក្រុមជ្រុលនិយម រហូតបុគ្គលផ្សេងទៀតលែងហ៊ានបញ្ចេញមតិ ទោះដឹងថាកងទ័ពថៃបើកការឈ្លា.នពានកម្ពុជាក្តី ។ លោកស្រី អាំងខាណា នីឡៈផៃជីត សមាជិកព្រឹទ្ធសភាថៃ បានរងការគំរា.មសម្លា.ប់ ក្រោយនិយាយថា ថៃវាយប្រ.ហារកម្ពុជាមុនដោយប្រើប្រាស់យន្តហោះចម្បាំង F-16 ហើយលោកស្រីបារម្ភពីការបើកសំឡេងរំខានពលរដ្ឋខ្មែរនៅព្រំដែន បែរជារងការថ្កោលទោស គំរា.មបញ្ចប់ជីវិត ដែលធ្វើឱ្យអ្នករាយការណ៍ពិសេស UN បារម្ភពីសុវត្ថិភាពសមាជិកព្រឹទ្ធសភារូបនេះ ។

ថ្មីៗនេះ លោកស្រី អាំងខាណា សមាជិកព្រឹទ្ធសភាថៃបានដាស់តឿនរដ្ឋាភិបាលរបស់ខ្លួនឱ្យគិតគូរចំពោះសកម្មភាពក្រុមជ្រុលនិយមឡើងវិញ អំពីការបើកសំឡេងផ្សេងៗរំខានសុខភាពផ្លូវកាយ ផ្លូវចិត្តដល់កុមារ ស្ត្រី ចាស់ជរា អ្នកជំងឺ និងជនពិការ នៅភូមិជោគជ័យ និងភូមិព្រៃចាន់ ។ លោកស្រីបញ្ជាក់ថា សកម្មភាពរបស់ក្រុមជ្រុលនិយមបានបំពានយ៉ាងធ្ងន់ធ្ងរលើបទឈប់បាញ់ និងបំពានគោលការណ៍ធម្មនុញ្ញនៃអង្គការសហប្រជាជាតិ តើរដ្ឋាភិបាលថៃនឹងដោះស្រាយបញ្ហានេះជាមួយកម្ពុជាលើឆាកអន្តរជាតិបែបណា បើអន្តរជាតិដឹងរឿងនេះ ។

លោកស្រីបានសរសេរក្នុងបណ្តាញសង្គមពីការបណ្តោយឱ្យ Influencer ធ្វើសកម្មភាពដាក់សម្ពាធ ឬបន្លាចដោយការបើកសំឡេងខ្មោចស្រែក សំឡេងយន្តហោះចម្បាំង ឆ្កែលូ ពេលកម្ពុជា-ថៃកំពុងមានជម្លោះ ដែលអាចជាបញ្ហាប្រឈមដល់រដ្ឋាភិបាលថៃ ជាពិសេស រដ្ឋមន្ត្រីក្រសួងការបរទេសថៃក្នុងការចរចារកដំណោះស្រាយរួមគ្នាជាមួយកម្ពុជា ។ ប៉ុន្តែក្រោយពីលោកស្រីនិយាយការពិតបែរជាសង្គមថៃរិះគន់វាយប្រហារយ៉ាងចាស់ដៃ ថែមទាំងប្រមាថជីវិតលោកស្រីទៀតផង ។

តាមការចុះផ្សាយរបស់សារព័ត៌មាន Matichon កាលពីថ្ងៃទី១៥ ខែតុលា ឆ្នាំ២០២៥ ឱ្យដឹងថា អ្នករាយការណ៍ពិសេសរបស់អង្គការសហប្រជាជាតិ (UN) បារម្ភពីសុវត្ថិភាពលោកស្រី អាំងខាណា សមាជិកព្រឹទ្ធសភាថៃ ក្រោយក្រុមជ្រុលនិយមគំរា.មសម្លា.ប់ ដោយអ្នករាយការណ៍ពិសេសថា លោកស្រីគួរតែទទួលបានការការពារ មិនមែនត្រូវសង្គមថ្កោលទោសទេ ។

កាលពីថ្ងៃទី១៥ ខែតុលា អ្នករាយការណ៍ពិសេសអង្គការសហប្រជាជាតិ លោកស្រី Mary Lawlor បានសរសេរក្នុងហ្វេសប៊ុកផេកឈ្មោះ «Mary Lawlor UN Special Rapporteur for human rights defenders» ថា លោកស្រីបារម្ភយ៉ាងខ្លាំងពីការគំរាមសម្លា.ប់ និងរិះគន់វាយប្រហារតាមបណ្តាញសង្គមលើលោកស្រី អាំងខាណា សមាជិកព្រឹទ្ធសភា គឺជាអតីតមន្ត្រីសិទ្ធិមនុស្ស និងអ្នកការពារសិទ្ធិស្ត្រីនៅប្រទេសថៃ ដែលបញ្ចេញមតិការពិត ផ្តល់ភាពយុត្តិធម៌ និងសេចក្តីថ្លៃថ្នូររបស់មនុស្ស មិនមែនជាឧក្រិដ្ឋកម្មទេ ។ លោកស្រី អាំងខាណា គួរតែទទួលបានការការពារ មិនមែនរងការថ្កោលទោស ។

គួរបញ្ជាក់ថា ពលរដ្ឋថៃនៅភូមិណងចាន់ (ទល់មុខភូមិជោគជ័យ) បានស្តីបន្ទោសលោកស្រី អាំងខាណា ដែលមិនគាំទ្របុគ្គល កាន់ ចមផ្លាំង Influencer បើកសំឡេងរំខានពលរដ្ឋខ្មែរ ។ ពលរដ្ឋថៃទាំងនេះរិះគន់លោកស្រី អាំងខាណា អង្គុយតែក្នុងម៉ាស៊ីនត្រជាក់ និងចង់ឱ្យចុះពិនិត្យមើលដោយផ្ទាល់ថា តើ កាន់ ចមផ្លាំង ហត់នឿយកម្រិតណាក្នុងការឈ្លានពានទឹកដីកម្ពុជា ។ ពួកគេថែមទាំងគំរាមទម្លាក់លោកស្រីពីតំណែង និងបណ្តេញឱ្យមករស់នៅកម្ពុជា ដោយសារមិនចេះនិយាយលាបពណ៌ ។

កន្លងមក ក្រុមអ្នកនយោបាយមកពីគណបក្សប្រឆាំង ក៏រងការរិះគន់យ៉ាងចាស់ដៃផងដែរពីក្រុមជ្រុលនិយមថៃ គ្រាន់តែសំណូមពរឱ្យរដ្ឋាភិបាលថៃបើកព្រំដែនឡើងវិញដោយសារសេដ្ឋកិច្ចថៃធ្លាក់ចុះខ្លាំង គ្មានចំណូល ពលរដ្ឋអត់ឃ្លាន ។ ក្រុមជ្រុលនិយមថៃពុំទទួលស្គាល់ការពិតទេ និងតែងវាយប្រហារអ្នកហ៊ាននិយាយពីថៃឈ្លានពានកម្ពុជា ទើបគ្មានអ្នកហ៊ានបញ្ចេញមតិ ៕

ធនាគារ ព្រីនស៍ បានប្រកាសពីគោលជំហររបស់ខ្លួនក្នុងដំណើរប្រតិបត្តិការដោយឯករាជ្យភាព និងប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍ជូនដល់អតិថិជនគ្រប់រូប បើទោះជាប្រធានសម្ព័ន្ធ ព្រីនស៍ ហូលឌីងគ្រុប ដែលជាក្រុមហ៊ុនមេ កំពុងស្ថិតក្រោមការតាមចាប់ខ្លួនរបស់សហរដ្ឋអាមេរិក និងត្រូវបានគេរឹបអូសទ្រព្យសម្បត្តិជារូបិយវត្ថុ Bitcoin សរុបអស់ 15ពាន់លានដុល្លារក៏ដោយ។

យោងតាមសេចក្ដីប្រកាសរបស់ធនាគារ ព្រីនស៍ (Prince Bank Plc.) នៅរសៀលថ្ងៃទី15 ខែតុលានេះបានឲ្យដឹងថា ធនាគារនឹងនៅតែបន្តប្រតិបត្តិការយ៉ាងឯករាជ្យ ស្របច្បាប់ និងមានអាជ្ញាប័ណ្ណពេញលេញ ជាធនាគារពាណិជ្ជក្រោមការត្រួតពិនិត្យរបស់ធនាគារជាតិនៃកម្ពុជា (NBC)។ ជាមួយគ្នានេះ ធនាគារបានបញ្ជាក់ថា សម្រាប់ប្រតិបត្តិការធនាគារទាំងអស់ សេវាអេធីអឹម វេទិកាធនាគារឌីជីថល និងសេវានៅតាមសាខា គឺនៅតែដំណើរការយ៉ាងពេញលេញជាធម្មតា។

បន្ថែមពីនេះ ធនាគារ ព្រីនស៍ បានធ្វើការអះអាងថា ធនាគារនឹងនៅតែប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ និងការពារសិទិ្ធប្រយោជន៍អតិថិជនគ្រប់រូប។ យើងនឹងបន្តធ្វើការយ៉ាងជិតស្និទ្ធជាមួយធនាគារជាតិនៃកម្ពុជា ដើម្បីធានាថាប្រតិបត្តិការរបស់យើងអនុលោមតាមច្បាប់យ៉ាងពេញលេញ និងមានតម្លាភាពគ្រប់ដំណាក់កាល។

គួរជម្រាបថា ជុំវិញការប្រកាសរបស់ធនាគារដូចខាងលើនេះគឺធ្វើឡើងបន្ទាប់ពីប្រធានក្រុមហ៊ុន Prince Group លោក Chen Zhi ត្រូវបានសហរដ្ឋអាមេរិករកឃើញថាមានជាប់ពាក់ព័ន្ធនឹងបទឧក្រិដ្ឋឆបោ.កតាមអនឡាញ និងការលាងលុយកខ្វក់ដ៏ធំសម្បើមនៅ ដោយបានកេងប្រវ័ញ្ចលើជនរងគ្រោះនៅទូទាំងពិភពលោករាប់លាននាក់ និងបង្កើតប្រាក់ចំណេញខុសច្បាប់រាប់ពាន់លានដុល្លារ។

ប្រតិបត្តិការបង្ក្រាបដ៏កក្រើកនេះ រឹបអូសបាន 127,271 Bitcoin ដែលបច្ចុប្បន្នមានតម្លៃប្រហែល 15 ពាន់លានដុល្លារ ដែលទាំងនោះគឺជាប្រាក់ចំណូលពីការក្លែងបន្លំ និងសកម្មភាពលាងលុយកខ្វក់របស់ Chen Zhi។

រដ្ឋអាជ្ញាសហរដ្ឋអាមេរិកនៅទីក្រុង Brooklyn និងទីក្រុងញូវយ៉ក បានចោ.ទប្រកាន់ក្រុមហ៊ុន Prince Group របស់លោក Chen ដែលរកសុីខាងអចលនទ្រព្យ និងហិរញ្ញវត្ថុនៅកម្ពុជា ថាវាបានប្រែក្លាយដោយសម្ងាត់ទៅជា “អង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី” ខណៈមានបុគ្កលិកជាច្រើនត្រូវបានពួកគេជួញដូរ បង្ខាំងទុក និងបង្ខំឱ្យធ្វើការងារ ផ្នែកឆបោកតាមអ៊ីនធឺណិតក្រោមការគំរាមកំហែង និងទារុ.ណកម្ម។

ប្រតិបត្តិការបង្រ្កាបឧក្រិដ្ឋជនឆបោ.ក និងលាងលុយកខ្វក់ដែលមានគោលដៅសង្កត់ធ្ងន់នៅកម្ពុជានេះ កំពុងទាញទម្លាក់កេរ្តិ៍ឈ្មោះរបស់កម្ពុជានៅលើឆាកអន្តរជាតិ ខណៈក្រសួងរតនាគារសហរដ្ឋអាមេរិកបានហាមឃាត់ក្រុមហ៊ុន និងពលរដ្ឋអាមេរិកមិនឱ្យធ្វើអាជីវកម្មជាមួយក្រុមហ៊ុន និងបណ្ដាញព្រីនស៍គ្រុបជាដាច់ខាត៕

ប្រទេសថៃ ៖ នៅថ្ងៃទី១៥ ខែតុលា ឆ្នាំ២០២៥ សារព័ត៌មានមួយចំនួនរបស់ថៃបានផ្សាយបំភ្លៃថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាដាក់សម្ពាធឱ្យថៃបើកព្រំដែនឡើងវិញនៅថ្ងៃទី២០ ខែតុលានេះ ប៉ុន្តែត្រូវបានអ្នកនាំពាក្យក្រសួងការពារជាតិថៃឆ្លើយតបទៅវិញថា កម្ពុជាត្រូវតែអនុវត្តតាមលក្ខខណ្ឌរបស់ថៃ៤ចំណុចជាមុនសិន ទើបថៃជជែកពីប្រធានបទផ្សេង ។

តាមការចុះផ្សាយរបស់សារព័ត៌មានថៃ The Better នៅថ្ងៃទី១៥ ខែតុលា ឱ្យដឹងថា លោក ស៊ុរ៉ាសាន់ គង់ស៊ិរិ អ្នកនាំពាក្យក្រសួងការពារជាតិថៃនិយាយថា ពេលនេះ ថៃមិនទាន់មានវិធានការផ្សេងក្រៅពីការកំណត់លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ ២-ដោះមីន ៣-បង្ក្រាបបទល្មើសឆ្លងដែន និង៤-គ្រប់គ្រងតំបន់ព្រំដែនដែលមានបញ្ហាតាមសំណើក្នុងកិច្ចប្រជុំ GBC កម្ពុជា-ថៃ ព្រមទាំងមានយន្តការសហការដើម្បីពិភាក្សាគ្នាឱ្យភាគីទាំងពីរឈានដល់កិច្ចព្រមព្រៀងសិន ចាំជជែករឿងផ្សេង ។ ថៃនិយាយច្បាស់លាស់ថា បើមានកិច្ចចរចា គឺកម្ពុជាត្រូវយល់ព្រមតាមលក្ខខណ្ឌ៤ចំណុចនេះ ទើបជជែកពីប្រធានបទផ្សេងទៀត ។

ឆ្លើយតបនឹងសំណួររបស់សារព័ត៌មានថៃដែលចោទប្រកាន់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថាដាក់សម្ពាធឱ្យថៃបើកព្រំដែនដោយសារបាត់បង់ចំណូល លោក ស៊ុរ៉ាសាន់ អ្នកនាំពាក្យក្រសួងការពារជាតិថៃនិយាយថា គ្មានទិន្នន័យពីការបាត់បង់ចំណូលរបស់កម្ពុជាទេ ប៉ុន្តែលោកគិតថា កម្ពុជាអាចរងផលប៉ះពាល់ផ្នែកពាណិជ្ជកម្មតាមព្រំដែនដោយសារវិធានការបិទព្រំដែនរបស់ថៃ ។ ទោះយ៉ាងណា ការបិទព្រំដែនរបស់ថៃមានភាពសមស្រប និងដើម្បីដាក់សម្ពាធកម្ពុជា ។

លោក ស៊ុរ៉ាសាន់ បញ្ជាក់ថា ៖ «កម្ពុជាក៏ត្រូវក្រឡេកមើលខ្លួនឯងថា តើបានត្រៀមខ្លួនកម្រិតណាមុននឹងនិយាយឱ្យថៃបើកព្រំដែន ពីព្រោះពេលនេះ ភាគីថៃមានគោលជំហរដូចគ្នាទាំងអស់ ចាប់ពីរដ្ឋាភិបាលរហូតដល់ថ្នាក់តំបន់ គឺត្រូវអនុវត្តតាមលក្ខខណ្ឌ៤ចំណុច មុននឹងជជែកពីប្រធានបទផ្សេង» ។

ចំណែកនាយករដ្ឋមន្ត្រីថៃ លោក អនុថីន ឆាន់វីរៈគូន ក៏បានបញ្ជាក់ពីលក្ខខណ្ឌ៤ចំណុចថា កម្ពុជាត្រូវយល់ព្រមជាមុន ទើបឈានទៅរកការចរចា ។ រីឯថ្នាក់តំបន់ក៏បញ្ជាក់ពីគោលជំហរតែមួយដែរ ត្រូវមានផែនការសកម្មភាពច្បាស់លាស់ រួមមាន ៖ ការដោះមីន និងជម្លៀសពលរដ្ឋចេញពីតំបន់ព្រំដែនដែលថៃចោទប្រកាន់ល្មើសអធិបតេយ្យ ប៉ុន្តែកម្ពុជាបែរជាគ្មានផែនការសកម្មភាពណាមួយ ។

រីឯកងទ័ពភូមិភាគទី២ថៃក៏បានជូនដំណឹងទៅកម្ពុជា អំពីការលើកពេលកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ជាមួយយោធភូមិភាគទី៤កម្ពុជាដោយគ្មានពេលកំណត់ ដោយសារកម្ពុជាពុំទាន់បញ្ជូនផែនការសកម្មភាព ។

លោក ស៊ុរ៉ាសាន់ បន្តថា ចំពោះគោលជំហររបស់ប្រធានាធិបតីអាមេរិក លោក Donald Trump ដែលត្រៀមធ្វើជាសាក្សីក្នុងការចរចាសន្តិភាពកម្ពុជា-ថៃ គឺអាមេរិកមានសក្តានុពលចាត់វិធានការ និងមានប្រទេសជាមិត្តផ្សេងៗគាំទ្រ ។ វាជារឿងល្អក្នុងតំបន់ និងបង្ហាញឱ្យឃើញថា អាមេរិកបារម្ភពីតំបន់អាស៊ាន ។ បញ្ហាសំខាន់ក្នុងការដោះស្រាយបញ្ហារវាងកម្ពុជា-ថៃ គឺបង្កើតសន្តិសុខ ហើយលោកយល់ថា កត្តាសំខាន់ឈានទៅរកការចរចាមួយផ្នែក គឺអាចមកពីសេដ្ឋកិច្ចកម្ពុជា ខណៈថៃក៏ចង់បន្ធូរបន្ថយភាពតានតឹងនៅតាមព្រំដែនដើម្បីឱ្យពលរដ្ឋរស់នៅក្នុងបរិយាកាសដូចមុន គ្មានការភ័យខ្លាច ឬបារម្ភពីការប៉ះទង្គិចនៅព្រំដែន ។

គួរបញ្ជាក់ថា នៅថ្ងៃទី១៥ ខែតុលានេះ សារព័ត៌មានមួយចំនួនរបស់ថៃបានចុះផ្សាយបំភ្លៃថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាដាក់សម្ពាធឱ្យថៃបើកព្រំដែននៅថ្ងៃទី២០ ខែតុលា ប៉ុន្តែពុំបានបង្ហាញពីការដកស្រង់ប្រភពច្បាស់លាស់នោះទេ ។

កន្លងមក សម្តេចតេជោ ហ៊ុន សែន ថ្លែងថា ចាប់តាំងពីយោធាថៃបិទព្រំដែនជាឯកតោភាគីមក កម្ពុជាមិនដែលបានសុំភាគីថៃបើកច្រកវិញទេ គ្រាន់តែប្រាប់ទៅភាគីថៃថា ថៃជាអ្នកបិទ ថៃគឺជាអ្នកបើក មិនបាច់ចរចាជាមួយកម្ពុជាទេ ហើយកម្ពុជានឹងបើកតាមក្រោយយ៉ាងយូរ៥ម៉ោង ។ ជំហរកម្ពុជានឹងមិនផ្លាស់ប្តូរ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ ថៃអាចបន្តបិទសូម្បី១០០ឆ្នាំទៀត ក៏កម្ពុជាមិនស្លាប់ដែរ ៕

កូរ៉េខាងជើង ទទួលបានជំនួយបច្ចេកទេស ក្នុងការអភិវឌ្ឍនាវាមុជទឹ ដែលមានសមត្ថភាពបាញ់មីស៊ីលបាលិស្ទិកចេញក្រោមបាតសមុទ្រ។

បើយោតាម រដ្ឋមន្រ្តីការពារជាតិកូរ៉េខាងត្បូងលោក Ahn Gyu-back បានលើកឡើងថា៖” វាហាក់បីដូចជាលឿនពេក ដែលកូរ៉េខាងជើងអាចមានសមត្ថភាពផលិតនាវាមុជទឹក ដើរដោយថាមពលនុយក្លេអ៊ែរ ដោយគ្មានជំនួយពីប្រទេសដ៏ទៃ”។

ថ្លែងនៅចំពោះមុខគណៈកម្មាធិការការពារជាតិនៃរដ្ឋសភា រដ្ឋមន្រ្តីការពារជាតិរូបនេះ បានអះអាងថា៖” កូរ៉េខាងជើង ទំនងជាទទួលបានជំនួយបច្ចេកវិទ្យាផ្សេងៗក្នុងការអភិវឌ្ឍនាវាមុជទឹកប្រទេសរុស្សុី ខណៈរយៈពេលពីរឆ្នាំកន្លងមកនេះ ប្រទេសទាំង២បានពង្រឹងកិច្ចសហប្រតិបត្តិការយោធាយ៉ាងស៊ីជម្រៅ។

ក្រៅពីពង្រឹងសមត្ថភាពនាវាមុជទឹក រុស្សុី និងកូរ៉េខាងជើង ក៏បានរួមគ្នាអភិវឌ្ឍន៍មីស៊ីលផ្លូវអាកាសដែលមានសមត្ថភាពខ្លាំងមួយប្រភេទទៀតផងដែរ។

គួរបញ្ជាក់ថា កូរ៉េខាងជើង បានបញ្ជូនទ័ពជាងមួយម៉ឺននាក់ទៅជួយរុស្ស៊ីក្នុងសង្រ្គាមនៅអ៊ុយក្រែន ដើម្បីជាជាថ្នូរ នៃការផ្តល់ជំនួយបច្ចេកវិទ្យាសម្រាប់ការអភិវឌ្ឍវិស័យការពារជាតិរបស់ខ្លួន៕