បន្ទាប់ពីរង់ចាំយ៉ាងអន្ទះសារនិងបរាជ័យក្នុងការស្នើសុំ Visa លើកទី១ពេលនេះទាំង ហុក សារិតុលា និង យូ ថនវណ្ណៈ ទទួលបាន Visa ដោយជោគជ័យហើយ។ អ្នកទាំងពីរនឹងតំណាងប្រទេសកម្ពុជាក្នុងការប្រកួតនៅឯប្រទេសប៉ូឡូញលើឆាក Miss and Mister Supranational។
នៅថ្ងៃទី២៩ ខែមិថុនា ហុក សារិតុលា Miss Supranational Cambodia 2026 បានបង្ហាញមកកាន់អ្នកគាំទ្រថារូបនាងទទួលបាន Visa ចេញទៅប្រកួតនៅក្រៅប្រទេសហើយ។ កន្លងមកអ្នកគាំទ្រមានការព្រួយបារម្ភយ៉ាងខ្លាំងបន្ទាប់ពីការដាក់លើកទី១ បរាជ័យ ខណៈខ្លាចប្រវត្តិសាស្រ្តច្រំដែលកើតឡើងចំពោះរូបនាង។
កាលពីដើមឆ្នាំ២០២៥ ដែលពេលនោះ ហុក សារិតុលា ជាលំដាប់រងទី២ Miss Supranational Cambodia 2025 និងទទួលបានការតែងតាំងជា Miss Intercontinental Cambodia 2025 ដែលត្រូវតំណាងប្រទេសកម្ពុជាប្រកួតនៅលើឆាកអន្តរជាតិបានខកខានក្នុងការចេញទៅប្រកួតដោយសារតែបញ្ហានេះ។ បន្ទាប់ពីទទួលដំណឹងថា ហុក សារិតុលា ទទួលបាន Visa នេះមានទស្សនិកជនជាច្រើនបានបង្ហាញការអបអរមកកាន់នាង។
មិនខុសពី ហុក សារិតុលា ប៉ុន្មាននោះទេក្នុងពេលស្នើសុំលើកទី១ យូ ថនវណ្ណៈ Mister Supranational Cambodia 2026 ក៏បរាជ័យក្នុងការទទួលបាន Visa ដូចគ្នា ប៉ុន្តែនៅពេលរៀបចំឯកសារឡើងវិញក្រោមការជួយជ្រោមជ្រែងយ៉ាងខ្លាំងពីអ្នកនាង Sara Pich លោកក៏ទទួលបាន Visa ចេញទៅប្រកួតនៅប្រទេសប៉ូឡូញផងដែរដោយលទ្ធផលទទួលបានគឺមុន ហុក សារិតុលា។ លោក យូ ថនវណ្ណៈ មិនត្រឹមតែឈរជាអ្នកតំណាងប្រទេសកម្ពុជាក្នុងការប្រកួតប្រជែងសម្រស់ប៉ុណ្ណោះទេតែលោកក៏មានសមត្ថភាពដោយមានតួនាទីជាបុគ្គលិកបម្រើការលើយន្តហោះ (Cabin Crew) ផងដែរ។ ដូច្នេះអ្នកគាំទ្រមិនបារម្ភទៅលើការប្រើប្រាស់ភាសារបស់ Mister Supranational Cambodia 2026។
ជាមួយនឹងមុខមាត់ថ្មីរបស់ ហុក សារិតុលា និង យូ ថនវណ្ណៈ ក្នុងការតំណាងជាតិនៅលើឆាក Miss and Mister Supranational អ្នកគាំទ្រសង្ឃឹមថាអ្នកទាំងពីរនឹងទទួលបានចំណាត់ថ្នាក់ល្អដោយការប្រកួតវគ្គផ្តាច់ព្រ័ត្រ Miss Supranational នឹងប្រព្រឹត្តទៅនៅថ្ងៃទី ៣១ ខែកក្កដា និងថ្ងៃទី១ ខែសីហា ឆ្នាំ២០២៦ ទៅលើកម្មវិធី Mister Supranational ៕
