ប្រទេសថៃ ៖ ក្រោយបាត់មុខពីការងារនយោបាយជាច្រើនឆ្នាំ លោក អាភីស៊ីត វេចាជីវ៉ា បានត្រឡប់មកប្រឡូកក្នុងនយោបាយឡើងវិញ ដោយកាន់តំណែងជាប្រធានគណបក្សប្រជាធិបតេយ្យ ដើម្បីឈរឈ្មោះក្នុងការបោះឆ្នោតឆ្នាំ២០២៦ ប្រជែងយកតំណែងជានាយករដ្ឋមន្ត្រីថៃ ។ លោក អាភីស៊ីត បានប្រាប់ទៅនាយករដ្ឋមន្ត្រីថៃកុំទុកចិត្តកម្ពុជា ថៃត្រូវតែអនុវត្តទាំងការទូត និងកងទ័ព ទោះជាប្រទេសទាំងពីរចុះហត្ថលេខាលើកិច្ចព្រមព្រៀងសន្តិភាពកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ក្តី ។

លោក អាភីស៊ីត វេចាជីវ៉ា (Abhisit Vejjajiva) អតីតនាយករដ្ឋមន្ត្រីថៃ និងបច្ចុប្បន្នជាប្រធានគណបក្សប្រជាធិបតេយ្យ (ឬប្រាឆាធិប៉ាត់) បាននិយាយនៅថ្ងៃទី២៨ ខែតុលា ឆ្នាំ២០២៥ ថា លោកបានប្រាប់ទៅលោកនាយករដ្ឋមន្ត្រី Anutin Charnvirakul រួចហើយ ត្រូវអនុវត្តការទូតផង និងកងទ័ពផង កុំទុកចិត្តកម្ពុជាឱ្យសោះ ប្រយ័ត្នកម្ពុជារាយការណ៍ទៅពិភពលោក ។ គោលដៅនៃការចុះហត្ថលេខាលើកិច្ចព្រមព្រៀងសន្តិភាព គឺគ្រប់គ្នាឃើញថា កិច្ចព្រមព្រៀងនេះទូលំទូលាយ ដែលត្រូវពិនិត្យមើលចំណុចលម្អិតបន្ថែម ដូចជា ៖ ការបំពេញការងាររបស់ក្រុមអ្នកសង្កេតការណ៍ ហើយថៃស្នើកម្ពុជាអនុវត្តលក្ខខណ្ឌ៤ចំណុច ទើបការងារផ្សេងៗដំណើរការបាន ។ បើរដ្ឋាភិបាលថៃអាចបង្ហាញទៅពិភពលោកពីមូលហេតុត្រូវអនុវត្ត៤លក្ខខណ្ឌនេះ គឺមានសារៈសំខាន់ និងទទួលប្រយោជន៍ច្រើន ។

បន្ទាប់ពីកម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាព លោក អាភីស៊ីត ថា លោកមិនគិតពីការមានប្រៀប និងចាញ់ប្រៀបទេ រហូតដល់ថៃដឹងថា តើមានក្រុមអ្នកសង្កេតការណ៍ ឬប្រទេសនានាចូលមកសង្កេតការណ៍បែបណា រួមទាំងអនុវត្តការទូត និងកងទ័ពរបស់ប្រទេសទាំងពីរដូចម្តេច ។ វាជាភារកិច្ចរបស់កងទ័ព ក្រសួងការបរទេស និងរដ្ឋាភិបាល ដែលត្រូវដំណើរការគ្រប់យ៉ាងដោយប្រុងប្រយ័ត្ន ។

លោក អាភីស៊ីត បន្តថា ធ្លាប់បានជជែកជាមួយលោកនាយករដ្ឋមន្ត្រី Anutin ឱ្យប្រុងប្រយ័ត្នកម្ពុជា ពីព្រោះកម្ពុជាអាចរាយការណ៍ទៅពិភពលោកក្នុងកិច្ចប្រជុំដោយពុំចាំបាច់មានរបៀបវារៈ និងមិនមែនជាគោលបំណងរបស់កិច្ចប្រជុំ ហេតុនេះ ថៃត្រូវត្រៀមខ្លួនគ្រប់ពេលវេលាទាំងការទូត និងកងទ័ព ។ ចំពោះការលើកឡើងពីប្រធានាធិបតីអាមេរិក លោក Donald Trump ធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃនៅទីក្រុងកូឡាឡាំពួរ នឹងធ្វើឱ្យកម្ពុជាមិនហ៊ានផ្លាស់ប្តូរគោលជំហរ គឺពុំអាចទុកចិត្តកម្ពុជាទេ ត្រូវតាមដានស្ថានការណ៍ពិតប្រាកដ និងធ្វើឱ្យពិភពលោកឃើញការអនុវត្ត៤លក្ខខណ្ឌពិតប្រាកដ ។

គួរបញ្ជាក់ថា លោក អាភីស៊ីត ជាអតីតនាយករដ្ឋមន្ត្រីថៃ ទី២៧ បានត្រឡប់មកកាន់តំណែងជាប្រធានគណបក្សប្រជាធិបតេយ្យ ក្រោយពីគណបក្សនេះបោះឆ្នោតជ្រើសរើសអ្នកដឹកនាំ ។ ក្រុមអ្នកនយោបាយចាស់ៗក្នុងគណបក្សប្រជាធិបតេយ្យគាំទ្រលោកឱ្យដឹកនាំគណបក្ស បន្ទាប់ពីចាញ់ឆ្នោតជាច្រើនលើក និងមិនបានក្លាយជាប្រធានគណបក្សនយោបាយក្នុងការបង្កើតរដ្ឋាភិបាលដូចមុន ។ បច្ចុប្បន្ន លោកមានក្មួយប្រុសប្រឡូកក្នុងនយោបាយដែរ គឺលោក Parit Wacharasindhu (ឈ្មោះហៅក្រៅ អៃទីម) ជាសមាជិកសភាគណបក្សប្រជាជន ដែលជាគណបក្សប្រឆាំងនៅប្រទេសថៃ ៕

ប្រទេសថៃ៖ អារម្មណ៍ឡើងចុះតាមមិនចង់ទាន់! មេបញ្ជាការទ័ពជើងទឹកថៃបានបង្ហាញការអបអរ និងកោតសរសើរចំពោះកិច្ចសហប្រតិបត្តិការការទូតរវាងប្រទេសថៃ និងកម្ពុជា ប៉ុន្តែបានឆ្លៀតបញ្ជាក់ជាថ្មីបន្ថែមទៀតថា ខ្លួននឹងប្ដេជ្ញាចិត្តក្នុងការរក្សាការត្រៀមខ្លួនប្រយុទ្ធឲ្យបានរួចរាល់ជានិច្ច ដើម្បីការពារផលប្រយោជន៍ជាតិ។ នេះបើតាមការរបស់សារព័ត៌មាន The Nation នៅថ្ងៃអង្គារនេះ។

នៅថ្ងៃទី២៨ ខែកញ្ញា ឆ្នាំ២០២៥ មេបញ្ជាការកងទ័ពជើងទឹកថៃ ឧត្តមនាវីឯក អាឌុង ផាន់យ៉ាម (Adung Phan-iam) បានមានប្រាប់អ្នកសារព័ត៌មានកាលពីថ្ងៃចន្ទថា ខណៈពេលដែលទំនាក់ទំនងជាមួយកម្ពុជានៅតែជាមិត្តភាព និងសហប្រតិបត្តិការ កងទ័ពជើងទឹកយើងនឹងនៅតែបន្តរក្សាបេសកកម្មរបស់ខ្លួន ក្នុងការការពារអធិបតេយ្យភាព និងបូរណភាពទឹកដីរបស់ប្រទេសថៃ។

បន្ថែមពីលើការអបអរសារទរការផ្សះផ្សារទំនាក់ទំនង លោក អាឌុង បានសង្កត់ធ្ងន់ថា យ៉ាងណាក៏ដោយ កងទ័ពជើងទឹកត្រូវតែត្រៀមខ្លួនយ៉ាងល្អសម្រាប់ស្ថានភាពណាមួយ ដោយសង្កត់ធ្ងន់លើតម្រូវការសម្រាប់ការហ្វឹកហ្វឺនជាបន្តបន្ទាប់ ការត្រៀមខ្លួនជាយុទ្ធសាស្ត្រ និងការធ្វើទំនើបកម្មឧបករណ៍កងទ័ពជើងទឹក។ លោកបានបញ្ជាក់ទៀតថា “សន្តិភាពតែងតែជាគោលដៅរបស់យើង ប៉ុន្តែការត្រៀមខ្លួនជាកាតព្វកិច្ចរបស់យើង”។

មេបញ្ជាការទ័ពជើងទឹករូបនេះបានបន្ថែមថា រដ្ឋាភិបាលថៃតែងតែផ្តល់អាទិភាពដល់មធ្យោបាយសន្តិភាព ដើម្បីដោះស្រាយជម្លោះតាំងពីដើមដំបូងមក។ ទោះជាយ៉ាងណាក៏ដោយ កងទ័ពថៃក៏នៅតែត្រូវរក្សាសមត្ថភាពការពារជាតិ ដោយឆ្លុះបញ្ចាំងពីយុទ្ធសាស្ត្រសន្តិសុខទូលំទូលាយរបស់ប្រទេសថៃនៅក្នុងតំបន់ជានិច្ច។

ការលើកឡើងរបស់មេទ័ពជើងទឹកថៃខាងលើនេះ គឺធ្វើឡើងបន្ទាប់ពីកម្ពុជានិងថៃបានចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព នាទីក្រុងគួឡាឡាំពួ ប្រទេសម៉ាឡេស៊ី ដោយមានការចូលរួមធ្វើជាសាក្សីពីលោក ដូណាល់ ត្រាំ ប្រធានាធិបតីអាមេរិក និងលោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី។

ចំពោះការចុះកិច្ចព្រមព្រៀងសន្តិភាពនេះទៀតសោត កម្ពុជារីករាយនឹងទទួលយក ព្រមទាំងបានប្ដេជ្ញាចិត្តយ៉ាងមុតមាំក្នុងការអនុវត្តតាមគោលការណ៍ដែលបានចរចាគ្នា ដើម្បីឈានទៅរកប្រក្រតីភាព នៃទំនាក់ទំនងរវាងប្រជាជាតិទាំងពីរ។ ប៉ុន្តែតាមការសង្កេត វាហាក់មិនទំនងជាអ្វីដែលយោធាថៃចង់បានពិតប្រាកដនោះទេ ទើបបានជាក្រោយពេលប្រទេសទាំងពីរឯកភាពចុះហត្ថលេខារួមគ្នាបញ្ចប់ជម្លោះទៅហើយ មេបញ្ជាការយោធាទាំងនោះនៅតែចេញមកប្រកាសពីការត្រៀមខ្លួនដដែលបែបនេះទៅវិញ៕

បរទេស៖ យោងតាមរបាយការណ៍ដែលទទួលបានមកពីគេហទំព័រ Compare the Market ដ៏ល្បីមួយរបស់ចក្រភពអង់គ្លេស បានបង្ហាញថា ទីក្រុងបាងកករបស់ប្រទេសថៃត្រូវបានចាត់ថ្នាក់ជាទីក្រុងដ៏អាក្រ.ក់បំផុតនៅទូទាំងពិភពលោកសម្រាប់ការលួ.ចប្លន់ លូកហោប៉ៅ និងការបោកប្រាស់។

តាមរយៈអត្ថបទព័ត៌របស់ទីភ្នាក់ងារ VN Express នៅថ្ងៃទី២៦ ខែតុលា នេះបានឲ្យដឹងពីការស្ទង់មតិ និងប្រមូលទិន្នន័យពីតាមបណ្ដារទីក្រុងរបស់ប្រទេសនានានៅជុំវិញពិភពលោក របស់គេហទំព័រ Compare the Market បានឲ្យដឹងថា រាជធានីរបស់ថៃទទួលបានពិន្ទុ 83.45 លើសគេក្នុងចំណាត់ថ្នាក់នៃការលួចប្លន់ និងការបោកប្រាស់ទូទាំងពិភពលោក ដែលបានចេញផ្សាយនៅថ្ងៃពុធ សប្ដាហ៍មុន។

ចំពោះចំណាត់ថ្នាក់ទាំង១០ នៃទីក្រុងដែលទទួលបានពិន្ទុខ្ពស់ជាងគេនៅទូទាំងពិភពលោករួមមាន៖ ទីក្រុង Mumbai: 36.86, ទីក្រុង Shenzhen: 39.51, Phuket: 40.52, Pattaya: 44.43, Rome: 45.53, Agra: 47.48, Shanghai: 51.83, Prague: 52.16, Paris: 68.81 និងចំណាត់ថ្នាក់លេខ១ ដែលខ្ពស់ជាងគេគឺ Bangkok: 83.45។

តាមរយៈទិន្នន័យនេះ Compare the Market បានលើកឡើងថា ព្រះបរមរាជវាំង ដែលជាទីតាំងសម្គាល់ដ៏ល្បីល្បាញបំផុតមួយរបស់ទីក្រុងបាងកក ត្រូវបានសម្គាល់ថាជាទីតាំងដ៏អាក្រ.ក់បំផុតនៅលើពិភពលោកសម្រាប់ឧក្រិដ្ឋកម្មទេសចរណ៍ ដោយទទួលបានការរាយការណ៍អំពីករណីបោកប្រាស់ និងការលួចច្រើនជាងគេ នៅក្នុងការវាយតម្លៃពីអ្នកទៅលេងកម្សាន្តជាងគោលដៅទេសចរណ៍ផ្សេងៗទៀត។

គេហទំព័រ Compare the Market បានឲ្យដឹងដែរថា ដើម្បីកាត់បន្ថយហានិភ័យនៃការលួចលូកហោប៉ៅ និងការឆបោ.ក អ្នកធ្វើដំណើរ ឬភ្ញៀវទេសចរដែលទៅលេងនៅទីក្រុងខាងលើគួរតែចាត់វិធានការបង្ការបែបសាមញ្ញៗដូចជា៖ រក្សាទុករបស់មានតម្លៃនៅកន្លែងសុវត្ថិភាព ការជៀសវាងតាក់ស៊ីដែលគ្មានអាជ្ញាប័ណ្ណ និងការប្រុងប្រយ័ត្ននៅពេលដែលមនុស្សចម្លែកចូលទៅជិត។

អ្នកទេសចរក៏គួរតែកត់សម្គាល់ខ្លួនឯង ពាក់ព័ន្ធនឹងការឆបោកទូទៅនៅគោលដៅនីមួយៗ ដើម្បីឲ្យដឹងបានថាឥរិយាបថណាគួរឱ្យសង្ស័យ និងជៀសវាងការក្លាយជាជនរងគ្រោះ។ ការរកឃើញនៃនេះនឹងបម្រើជាការរំលឹកថា ខណៈពេលដែលការធ្វើដំណើរអាចជាបទពិសោធន៍ដ៏សម្បូរបែប និងសប្បាយរីករាយ វាក៏មានហានិភ័យជាក់លាក់ផងដែរ៕

តារាសម្ដែងហុងកុង Benz Hui ឬទស្សនិកជនស្គាល់ថាលោកបង ហួនស៊ី ដែលល្បីក្នុងខ្សែភាពយន្តជាច្រើនរបស់ស្ថានីយទូរទស្សន៍TVB បានទទួលមរណភាពក្នុងជន្មាយុ ៧៦ ឆ្នាំដោយសារជំងឺមហារីកនៅព្រឹកថ្ងៃទី ២៨ ខែតុលា។

យោងតាម St Headline សាច់ញាតិរបស់សិល្បករជើងចាស់រូបនេះបាននិយាយថា នៅប៉ុន្មានថ្ងៃមុនពេលគាត់លាចាកលោក រាងកាយរបស់គាត់អស់កម្លាំងខ្លាំង ហើយគ្រួសាររបស់គាត់បាននៅក្បែរគាត់ដើម្បីមើលថែគាត់ក្នុងនាទីចុងក្រោយរបស់គាត់។ លើកចុងក្រោយដែលលោកបង្ហាញមុខជាសាធារណៈគឺនៅក្នុងពិធីជប់លៀង Mid-Autumn Festival សម្រាប់សិល្បករ។

ក្នុងប៉ុន្មានខែថ្មីៗនេះ លោក Benz Hui បានធ្វើការជាធម្មតា ដោយម្តងម្កាលថតវីដេអូជាមួយកូនស្រីរបស់លោក។ ស្ថានភាពរបស់គាត់កាន់តែអាក្រក់ទៅៗ ភ្លាមៗនោះ សាច់ញាតិ និងមិត្តភក្តិរបស់គាត់ មានការតក់ស្លុតជាខ្លាំង។

កាលពីថ្ងៃទី២៧ ខែតុលា សិល្បករជាង ២០នាក់បានទៅមន្ទីរពេទ្យដើម្បីសួរសុខទុក្ខតារាសម្ដែងរួមមាន Charmaine Sheh , ស្តេចល្បែងអាចែ (Chow Yun Fat), Bosco Wong និងតារាជាច្រើនរូបទៀត។ តារាសម្តែង Charmaine Sheh ជាតារាសម្តែងដែលធ្លាប់សម្តែងជាមួយលោកបង ហួនស៊ី ជាច្រើនដង។ ដើមឡើយរូបនាងមានគម្រោងទៅទីក្រុងប៉េកាំងដើម្បីចូលរួមព្រឹត្តិការណ៍មួយ ប៉ុន្តែ បានលុបចោលកាលវិភាគរបស់នាងដើម្បីទៅសួរសុខទុក្ខលោក Benz Hui នៅមន្ទីរពេទ្យ។

លោក Benz Hui Siu Hung បានរៀបការក្នុងឆ្នាំ ១៩៩២ ហើយមានកូនស្រីម្នាក់អាយុ ២៨ ឆ្នាំ។ កើតនៅថ្ងៃទី ៤ ខែវិច្ឆិកាឆ្នាំ ១៩៤៨ លោកបានចាប់ផ្តើមអាជីពសម្តែងរបស់ខ្លួននៅឆ្នាំ ១៩៧២។ លោក Benz Hui គឺជាមុខមាត់ដែលធ្លាប់ស្គាល់នៅលើអេក្រង់ហុងកុង ដោយបានចូលរួមក្នុងការងារភាពយន្ត និងទូរទស្សន៍ជិត២០០។ លោកបានសាងភាពល្បីល្បាញតាមរយៈរឿង You’re Hired (២០០៩)», Line Walker (២០១៤), Modern Dynasty (២០២២ និង ២០២៤) និងរឿង Themis នាពេលខាងមុខ។

ទឹកមុខនិងការសម្ដែងរបស់លោកបានបន្សល់ទុកនូវការចាប់អារម្មណ៍យ៉ាងខ្លាំងដល់ទស្សនិកជនជាច្រើន។ នៅក្នុងឧស្សាហកម្មទូរទស្សន៍លោកត្រូវបានគេកោតសរសើរយ៉ាងខ្លាំងចំពោះការសម្តែង។ តារារូបនេះធ្លាប់និយាយថាការសម្ដែងគឺដូចជាជីវិត វាផ្តល់កម្លាំងចិត្តក្នុងការរស់នៅ ដូច្នេះហើយលោកគ្មានចេតនាឈប់ធ្វើការនោះទេ៕