ក្រុមចម្រៀង K-Pop NCHIVE បានទម្លាក់បទចម្រៀងមួយបទចេញពីអាល់ប៊ុមទោលទី២ ដែលថតនៅប្រទេសកម្ពុជាទាំងស្រុងអំឡុងពេលពួកគេមកផ្សព្វផ្សាយក្នុងរយៈពេល៣សប្តាហ៍។ អ្វីដែលធ្វើឱ្យអ្នកគាំទ្រកម្ពុជារំជួលចិត្ត ក្រុមនេះសម្រេចចិត្តទម្លាក់ MV ទោះបីជាដឹងថាអាចប្រឈមនឹងបញ្ហាដោយសារតែស្ថានភាពយល់ច្រឡំប្រទេសកូរ៉េមើលមកកម្ពុជាមិនល្អ ចំណែកឯថៃនិងកម្ពុជាក៏មានជម្លោះ។
នៅយប់ថ្ងៃទី២៧ ខែតុលា ក្រុមចម្រៀង NCHIVE បានទម្លាក់ MV បទ « Luv+me» ។ បទនេះគឺជាបទក្នុងអាល់ប៊ុលទោលទី២របស់ក្រុម NCHIVE មានចំណងជើងថា «BELIEVE» ជាមួយនឹងបទ « CAN’T CATCH ME» , « Flash» ដែលនឹងទម្លាក់នៅថ្ងៃទី៣១ ខែតុលា ឆ្នាំ២០២៥។ ក្រុមចម្រៀង Kpop ដែលមានសមាជិកចំនួន៦នាក់នេះបានធ្វើឱ្យអ្នកគាំទ្ររំភើបចិត្តព្រោះ MV បទរបស់ពួកគេគឺថតនៅប្រទេសកម្ពុជាទាំងស្រុង។
បើកក្បាលដំបូងនៃបទ «Luv+me» ក្រុម NCHIVE បានបង្ហាញពីរូបភាពនៅវិមានឯករាជ្យ អាគារពាណិជ្ជកិច្ចនៅកោះពេជ្រ មុខព្រះបរមរាជវាំង ទិដ្ឋភាពនៅខេត្តព្រះសីហនុដែលពួកគេធ្វើដំណើរទៅកាន់កោះរ៉ុងសន្លឹម ជិះឡានក្រុងអត់ដំបូលនៅលើស្ពានកោះនរា និងទីតាំងផ្សេងៗទៀត។
អ្វីដែលអ្នកគាំទ្រកាន់តែរំជួលចិត្តអមដោយសេចក្តីរំភើបគឺនៅពីក្រោយការសម្រេចចិត្តទម្លាក់ MV នេះរបស់ក្រុម NCHIVE ទោះបីជាស្ថិតក្នុងកាលៈទេសៈប្រថុយប្រថាន។ ដោយសារតែក្រុមចម្រៀងបុរសមកពីកូរ៉េខាងត្បូងនេះត្រូវយកកេរ្តិ៍ឈ្មោះរបស់ខ្លួនដាក់ចិត្តដាក់កាយទោះបីដឹងថាប្រជាជនកូរ៉េសម្លឹងមកប្រទេសកម្ពុជាដោយក្រសែភ្នែកអវិជ្ជមានដោយសារតែរឿងរ៉ាវទាក់ទងនឹងឧក្រិដ្ឋកម្មអនឡាញ។ មួយវិញទៀត NCHIVE ក៏ប្រឈមនឹងការធ្លាក់ចុះការគាំទ្រពីអ្នកគាំទ្រប្រទេសផ្សេងទៀតដោយសារតែស្ថានភាពជម្លោះព្រំដែន។
គួរបញ្ជាក់ផងដែរថា NCHIVE ធ្លាប់បានមកប្រទេសកម្ពុជារយៈពេល៣សប្តាហ៍ដើម្បីផ្សព្វផ្សាយក្រុមរបស់ខ្លួនដែលពោរពេញដោយអនុស្សាវរីយ៍។ ក្រុមនេះពេញដោយអារម្មណ៍រំជួលចិត្តនៅមុនពេលពួកគេហោះហើរទៅប្រទេសកូរ៉េខាងត្បូងវិញ។ ជាពិសេស NCHIVE បានអះអាងថាពួកគេសម្រេចចិត្តមិនខុសនោះទេដែលមិនពន្យារពេលមកកម្ពុជាដែលពេលនោះកំពុងប្រឈមនឹងបញ្ហាព្រំដែន៕
