ទីក្រុងបាងកក៖ នៅតែចចេសខ្លាចគេថាអន់! នាយករដ្ឋមន្រ្តីថៃ លោក អនុទីន ឆាន់វីរៈគុល បាន បញ្ជាក់ថា ការបើកច្រកព្រំដែនឡើងវិញជាមួយនឹងភាគីកម្ពុជានឹងក្លាយជាជម្រើសចុងក្រោយ ដោយថៃត្រូវរង់ចាំមើលទង្វើរបស់កម្ពុជាជាមុនសិន។ ការថ្លែងរបស់លោក អនុទីន បែបនេះធ្វើឡើងស្របពេលដែលអាជីវកម្មនៅថៃ កំពុងទាមទារដ្ឋាភិបាលឲ្យចាត់វិធានការសង្គ្រោះជាបន្ទាន់ ជុំវិញបញ្ហាព្រំដែនដែលធ្វើឲ្យខាតបង់ដល់សេដ្ឋកិច្ចថៃប្រមាណ ៤៥៨ លានដុល្លារក្នុងមួយខែៗ។

យោងតាមការចុះផ្សាយរបស់សារព័ត៌មានថៃកាលពីថ្ងៃចន្ទ ទី២៧ តុលាម្សិលមិញនេះ បានឲ្យដឹងពីគោលជំហររបស់រដ្ឋាភិបាលថៃ បន្ទាប់ពីចុះកិច្ចព្រមព្រៀងសន្តិភាពជាមួយកម្ពុជារួចថា «ការបើកច្រកព្រំដែនឡើងវិញជាមួយនឹងភាគីកម្ពុជា នឹងក្លាយជាជម្រើសចុងក្រោយ នៅក្នុងការសម្រេចចិត្តរបស់ថៃ ដោយលោកត្រូវប្រាកដចិត្តជាមុនសិនថា កម្ពុជានឹងលែងបង្កការគំរាមកំហែងដល់សន្តិសុខជាតិរបស់ថៃ»។ នេះបើតាមពាក្យសម្ដីរបស់លោក អនុទីន ប្រាប់ទៅកាន់អ្នកកាសែត។

បន្ថែមពីលើនោះ លោក អនុទីន បានសង្កត់ធ្ងន់ថា៖ «ការបើកឡើងវិញអាស្រ័យលើសកម្មភាពរបស់កម្ពុជា ក្នុងការអនុវត្តសេចក្តីប្រកាសរួមដែលលោកបានចុះហត្ថលេខាជាមួយសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។ លោកថា ប្រទេសថៃនឹងចាំវាយតម្លៃពីសកម្មភាពរបស់កម្ពុជា មុននឹងបន្តទៅជំហានបន្ទាប់នៅក្រោមកិច្ចព្រមព្រៀង។ លោកថែមទាំងគូសបញ្ជាក់ទៀតថា «ប្រទេសថៃមិនមែនជាប្រទេសដែលបំពានលក្ខខណ្ឌបទឈប់បាញ់នោះទេ ដូច្នេះរាល់សកម្មភាពត្រូវតែចាប់ផ្តើមពីប្រទេសកម្ពុជា។ មានតែបន្ទាប់ពីបញ្ហាទាំងអស់ដែលប៉ះពាល់ដល់សន្តិសុខជាតិត្រូវបានដោះស្រាយ យើងនឹងចាប់ផ្តើមការពិភាក្សាដើម្បីធ្វើឲ្យទំនាក់ទំនងដូចដើម។ ច្រកព្រំដែនអាចបើកឡើងវិញបន្ទាប់ពីនោះ»។

ការលើកឡើងទាំងទទឹងទិសរបស់លោក អនុទីន ធ្វើឡើងចំពេលដែលអាជីវកម្មថៃកំពុងទាមទារសុំជំនួយពីរដ្ឋាភិបាលរបស់លោកដោយព្រមានថា ការបិទព្រំដែនជាមួយកម្ពុជាដែលកំពុងបន្តអូសបន្លាយ អាចបង្កការខាតបង់យ៉ាងធ្ងន់ធ្ងរដល់សេដ្ឋកិច្ចថៃ ដោយពួកគេទាមទារឱ្យមានវិធានការសង្គ្រោះជាបន្ទាន់។

យោងតាមរបាយការណ៍របស់ទីភ្នាក់ងារ Bloomberg News កាលពីសប្ដាហ៍មុនបានបង្ហាញថា បន្ទាប់ពីការបិទច្រកព្រំដែនគោករវាងប្រទេសថៃជាមួយកម្ពុជា ធុរកិច្ចថៃបានខាតបង់ប្រមាណ ១៥ ពាន់លានបាត (៤៥៨ លានដុល្លារ) ក្នុងមួយខែ។ របាយការណ៍នេះបានគណនាទុកមុនថា ការខាតបង់សរុបអាចនឹងឈានដល់ ១០០ ពាន់លានបាត (៣.១ ពាន់លានដុល្លារ) ប្រសិនបើព្រំដែននៅតែបន្តបិទរហូតដល់ចុងឆ្នាំ។

ទោះជាយ៉ាងណា រដ្ឋាភិបាលថៃនៅតែប្រកាន់គោលជំហរមិនចុះញម ចង់ឲ្យកម្ពុជាជាអ្នកបន្ទន់ឥរិយាបថទៅស្នើសុំខ្លួនចរចាដើម្បីបើកច្រកព្រំដែនឡើវិញ ទាំងដែលបញ្ហានេះថៃជាបានផ្ដួចផ្ដើមឡើងដោយឯកតោភាគីកាលពីខែមិថុនាកន្លងទៅ។ ការចង់ឈ្នះដោយមិនខ្វល់ពីការខាតបង់នេះ កំពុងធ្វើឲ្យអ្នកធុរកិច្ច សហគ្រិន និងអាជីវករថៃរងផលប៉ះពាល់កាន់តែខ្លាំងឡើង ខណៈដូចបានដឹងកន្លងមកហើយថា ទាក់ទងនឹងពាណិជ្ជកម្មតាមព្រំដែន ភាគីថៃគឺជាអ្នកនាំចេញមកកម្ពុជាច្រើន ដែលបានន័យថាថៃជាអ្នកដែលទទួលបានផលប្រយោជន៍ច្រើនជាងកម្ពុជា ដូច្នេះមិនមានអ្វីចម្លែកនោះទេដែលបន្ទាប់ពីការបិទព្រំដែន ថៃខាតបង់ច្រើនជាងកម្ពុជានោះ៕

ប្រទេសថៃ ៖ កាលពីថ្ងៃទី២៧ ខែតុលា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul បានរងការវា.យប្រ.ហារពាក្យសម្តីពីសំណាក់ពលរដ្ឋថៃក្រោយនិយាយថា តំបន់ព្រំដែនកម្ពុជា-ថៃ ដែលលោកចាត់ទុកជាតំបន់ត្រួតស៊ីគ្នាមានការល្មើសអធិបតេយ្យទាំងសងខាង គឺកម្ពុជាល្មើសអធិបតេយ្យថៃ ហើយថៃល្មើសអធិបតេយ្យកម្ពុជា ។ ហេតុនេះ បើចង់បានភាពយុត្តិធម៌ ត្រូវតែយុត្តិធម៌ទាំងសងខាង ពលរដ្ឋថៃដែលរស់នៅលើទឹកដីកម្ពុជាត្រូវត្រឡប់មកវិញ រដ្ឋាភិបាលថៃនឹងស្វែងរកទីលំនៅថ្មីឱ្យពលរដ្ឋថៃដែលរស់នៅទឹកដីកម្ពុជា ខណៈកម្ពុជាក៏ត្រូវដកថយដែរ ។

ពលរដ្ឋថៃក្នុងបណ្តាញសង្គមបានរិះគន់ពាក្យសម្តីនាយករដ្ឋមន្ត្រីរបស់ខ្លួនថា យកផែនទីមកបង្ហាញឱ្យពលរដ្ឋនៅទូទាំងប្រទេសមើលជាបន្ទាន់ ហេតុអ្វីលោក Anutin ជានាយករដ្ឋមន្ត្រីថៃបែរជានិយាយពីពលរដ្ឋខ្លួនលើសអធិបតេយ្យកម្ពុជាទៅវិញ ឬលោកនាយករដ្ឋមន្ត្រីកម្ពុជា? ពលរដ្ឋថៃមិនពេញចិត្តនឹងពាក្យនេះ ជួយបកស្រាយផង តើថៃល្មើសអធិបតេយ្យកម្ពុជានៅតំបន់ណា ពីព្រោះការនិយាយបែបនេះធ្វើឱ្យថៃខាតបង់ ។ លោកនាយករដ្ឋមន្ត្រីនិយាយបែបនេះទៅកើត នឹងធ្វើឱ្យកម្ពុជាយកពាក្យសម្តីរបស់លោកចែកចាយ និងធ្វើភស្តុតាងប្រាប់ពិភពលោក ។ មិនគួរឱ្យទុកចិត្តនាយករដ្ឋមន្ត្រីថ្មី មិនខុសគ្នាពីនាយករដ្ឋមន្ត្រីចាស់ទេ ។

ក្រោយពីនាយករដ្ឋមន្ត្រីថៃរងការរិះគន់ពីសំណាក់ពលរដ្ឋ អ្នកនាំពាក្យរដ្ឋាភិបាលថៃ លោក Siripong Angkasakulkiat បានបកស្រាយនៅថ្ងៃដដែល គឺលោក Anutin មិនបាននិយាយថា ថៃល្មើសអធិបតេយ្យកម្ពុជាទេ គ្រាន់តែប្រៀបធៀបពីការគ្រប់គ្រងតំបន់ព្រំដែនដោយយុត្តិធម៌ ។ ពលរដ្ឋថៃមិនយល់ពីលោក Anutin ផ្តល់សម្ភាសន៍ជាមួយសារព័ត៌មានពីការអនុវត្តតាមសេចក្តីថ្លែងការណ៍រួមដែលចុះហត្ថលេខាដោយនាយករដ្ឋមន្ត្រីកម្ពុជា-ថៃ នៅទីក្រុងកូឡាឡាំពួរ កាលពីថ្ងៃទី២៦ ខែតុលា ឆ្នាំ២០២៥ គឺកម្ពុជាត្រូវអនុវត្តតាមលក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបការឆបោកអនឡាញ និង៤-ការគ្រប់គ្រងតំបន់ព្រំដែនរួមគ្នា ។

ការគ្រប់គ្រងតំបន់ព្រំដែនរួមគ្នាដែលមានបញ្ហា គឺលោក Anutin បាននិយាយពីតំបន់ដែលថៃល្មើសអធិបតេយ្យកម្ពុជាក៏មានដែរ វាជាការនិយាយប្រៀបធៀបក្នុងការគ្រប់គ្រងតំបន់ព្រំដែនប៉ុណ្ណោះ ក្រោយពីអ្នកសារព័ត៌មានសួរនាំពីការគ្រប់គ្រងតំបន់ត្រួតស៊ីគ្នា ។ នាយករដ្ឋមន្ត្រីថៃចង់ប្រៀបធៀបថា បើពលរដ្ឋថៃល្មើសអធិបតេយ្យកម្ពុជា គឺត្រូវត្រឡប់មកថៃវិញ រដ្ឋាភិបាលថៃស្វែងរកទីលំនៅថ្មីឱ្យ ខណៈពលរដ្ឋកម្ពុជាល្មើសអធិបតេយ្យថៃ គឺរដ្ឋាភិបាលកម្ពុជាត្រូវស្វែងរកទីលំនៅថ្មីដូចគ្នា ។

លោកនាយករដ្ឋមន្ត្រី Anutin បាននិយាយពីតំបន់ព្រំដែនអាចមានពលរដ្ឋកម្ពុជាចូលនៅដីថៃ ហើយពលរដ្ឋថៃក៏ចូលនៅដីកម្ពុជាដូចគ្នា បើមានការព្រមព្រៀងហើយត្រូវឱ្យអ្នកដែលចូលរស់នៅខុសនោះរើចេញទាំងសងខាង រដ្ឋាភិបាលទាំងពីរនឹងរកដីឱ្យពលរដ្ឋរៀងៗខ្លួន គឺចង់សំដៅលើការគ្រប់គ្រងតំបន់ព្រំដែនដោយភាពយុត្តិធម៌ លោកមិនបាននិយាយថា ថៃល្មើសអធិបតេយ្យកម្ពុជានៅតំបន់ណាមួយទេ ហើយការដោះស្រាយបញ្ហាត្រូវផ្អែកលើការពិត ។ នេះបើតាមការលើកឡើងរបស់អ្នកនាំពាក្យរដ្ឋាភិបាលថៃ ។

គួរបញ្ជាក់ថា លោក Anutin បានផ្តល់សម្ភាសន៍ជាមួយសារព័ត៌មានក្រោយការចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ ប្រទេសម៉ាឡេស៊ី ពីការគ្រប់គ្រងតំបន់ព្រំដែន ជាពិសេស នៅភូមិណងចាន់ ភូមិណងយ៉ាកែវ (ទល់មុខភូមិជោគជ័យ និងភូមិព្រៃចាន់) ថា តំបន់ត្រួតស៊ីគ្នាកម្ពុជា-ថៃល្មើសអធិបតេយ្យទាំងសងខាង បើមានការរើចេញពីតំបន់ល្មើសអធិបតេយ្យទាំងសងខាងដោយយុត្តិធម៌នោះ បញ្ហាអសន្តិសុខក្នុងប្រទេសថៃនឹងកាត់បន្ថយ រួចហើយប្រទេសទាំងពីរចាប់ផ្តើមស្តារទំនាក់ទំនងការទូត ពីព្រោះបច្ចុប្បន្ន ថៃបានកោះហៅឯកអគ្គរាជទូតថៃនៅកម្ពុជាត្រឡប់មកប្រទេសវិញ ។

ក្រៅពីនេះ លោកសង្កត់ធ្ងន់ពីការអនុវត្ត គឺកម្ពុជាចាប់ផ្តើមអនុវត្តមុន ដូចជា ៖ ការដកអាវុធធុនធ្ងន់ចេញពីតំបន់ព្រំដែន បើកម្ពុជាដកអាវុធពីព្រំដែន ថៃក៏ដកអាវុធដូចគ្នាដើម្បីឈានទៅរកការចរចា ដោយចាប់ផ្តើមពិភាក្សាថ្នាក់កងទ័ពប្រទេសទាំងពីរធ្វើការដកអាវុធពីព្រំដែនទាំងសងខាងជាបន្តបន្ទាប់ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន ។ ជំហ៊ានបន្ទាប់ ថៃនឹងអនុវត្តការដោះមីនក្រោមការពិនិត្យមើលរបស់ក្រុមសង្កេតការណ៍អាស៊ានផងដែរ ហើយកម្ពុជានឹងមិនរារាំងពីព្រោះបានព្រមព្រៀងរួចហើយ ក៏ដូចជាសហការបង្ក្រាបការឆបោកអនឡាញ ៕

ក្រសួងការបរទេសអាល្លឺម៉ង់បានលើកឡើងពីការចុះហត្ថលេខាលើសេចក្តីថ្លែងការណ៍រួម (Joint Declaration) នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ដែលមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ចូលរួមចុះហត្ថលេខាជាសាក្សី ហើយប្រធានាធិបតីអាមេរិកចាត់ទុកជាកិច្ចព្រមព្រៀងសន្តិភាព ។ អាល្លឺម៉ង់ថា នេះជាការបោះជំហ៊ានដ៏សំខាន់ឆ្ពោះទៅរកសន្តិភាព និងសូមគាំទ្រប្រទេសទាំងពីរបើកព្រំដែនឡើងវិញដើម្បីស្តារទំនាក់ទំនងពាណិជ្ជកម្ម ។ នេះបើតាមការចុះផ្សាយរបស់សារព័ត៌មានថៃ Khaosod នៅថ្ងៃទី២៧ ខែតុលា ។

នៅថ្ងៃទី២៧ ខែតុលា ក្រសួងការបរទេសអាល្លឺម៉ង់បានចេញសេចក្តីថ្លែងការណ៍ពាក់ព័ន្ធនឹងការចុះហត្ថលេខាលើសេចក្តីថ្លែងការណ៍រួមដោយនាយករដ្ឋមន្ត្រីកម្ពុជា-ថៃក្រៅកិច្ចប្រជុំកំពូលអាស៊ាន នៅទីក្រុងកូឡាឡាំពួរ ប្រទេសម៉ាឡេស៊ី ថា នេះជាជំហ៊ានដ៏សំខាន់ឆ្ពោះទៅរកសន្តិភាព និងស្ថិរភាពក្នុងតំបន់អាស៊ាន ។ ហេតុនេះ អាល្លឺម៉ង់គាំទ្រឱ្យប្រទេសទាំងពីរធ្វើការចរចា និងពង្រឹងកិច្ចសហប្រតិបត្តិការបន្ថែម រហូតដល់មានការច្រកព្រំដែនឡើងវិញដើម្បីស្តារទំនាក់ទំនងពាណិជ្ជកម្មរវាងគ្នាម្តងទៀត ។

ដោយឡែក នាយករដ្ឋមន្ត្រីថៃ លោក Anutin Charnvirakul បានផ្តល់សម្ភាសន៍ជាមួយសារព័ត៌មាននៅថ្ងៃទី២៧ ខែតុលា ថា ការបើកព្រំដែនឡើងវិញ លុះត្រាតែកម្ពុជាអនុវត្តតាមលក្ខខណ្ឌ៤ចំណុចជាមុនសិន ដោយមានក្រុមអ្នកសង្កេតការណ៍អាស៊ាន AOT ចូលរួមសង្កេតការណ៍ការអនុវត្តរបស់កម្ពុជា ។ លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបការឆបោកអនឡាញ និង៤-គ្រប់គ្រងតំបន់ព្រំដែនរួមគ្នា ជាពិសេស នៅភូមិណងចាន់ និងភូមិណងយ៉ាកែវ (ទល់មុខភូមិជោគជ័យ និងភូមិព្រៃចាន់) គឺកម្ពុជាត្រូវអនុវត្តលក្ខខណ្ឌទាំងនេះឱ្យថៃឃើញជាមុន ។

នាយករដ្ឋមន្ត្រីថៃបានទទួលព័ត៌មានកម្ពុជាចាប់ផ្តើមកែសម្រួលយុទ្ធោបករណ៍ និងអាវុធធុនធ្ងន់មួយផ្នែកនៃជំហ៊ានទី១ ជានិមិត្តរូបរបស់កងទ័ពកម្ពុជា-ថៃ ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន AOT កាលពីយប់ថ្ងៃទី២៦ ខែតុលា ហើយថៃនឹងរង់ចាំឱ្យកម្ពុជាអនុវត្តលក្ខខណ្ឌផ្សេងៗរហូតដល់ដំណាក់កាលចុងក្រោយ ទើបមានការបើកព្រំដែនប្រក្រតី ។

គួរបញ្ជាក់ថា កាលពីថ្ងៃទី២៦ ខែតុលា ឆ្នាំ២០២៥ តបតាមការអញ្ជើញរបស់លោក Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានអាស៊ានឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា រួមទាំងលោក Anutin Charnvirakul នាយករដ្ឋមន្ត្រីថៃ បានអញ្ជើញចូលរួមក្នុងពិធីចុះហត្ថលេខាលើសេចក្តីថ្លែងការណ៍រួមទីក្រុងកូឡាឡាំពួរ ប្រទេសម៉ាឡេស៊ី ។ ពិធីនេះក៏មានការចូលរួមធ្វើជាសាក្សីពីលោក Donald Trump ប្រធានាធិបតីអាមេរិក និងលោក Anwar Ibrahim នាយករដ្ឋមន្ត្រីម៉ាឡេស៊ីផងដែរ ។

នៅថ្ងៃទី២៦ ខែតុលា នេះ ត្រូវបានកត់ត្រាជាព្រឹត្តិការណ៍ប្រវត្តិសាស្ត្រដ៏មានសារៈសំខាន់សម្រាប់កម្ពុជា និងថៃ ដែលបានបញ្ជាក់ឡើងវិញនូវការជឿជាក់រួមគ្នានៃប្រទេសទាំងពីរថា សន្តិភាពនៅតែអាចមានដរាបណាប្រទេសជាតិនានាមានសេចក្តីក្លាហាន និងសុភវិនិច្ឆ័យក្នុងការបន្តស្វែងរកសន្តិភាពជាមួយគ្នា ៕

ប្រទេសថៃ ៖ កងទ័ពភូមិភាគទី១ថៃបានបដិសេធព័ត៌មានកងទ័ពត្រៀមបើកព្រំដែនកម្ពុជា-ថៃឡើងវិញនៅថ្ងៃទី១ ខែវិច្ឆិកា ឆ្នាំ២០២៥ ដោយលោក វរ៉ាយ៉ត លឿងសុវណ្ណ មេបញ្ជាការកងទ័ពភូមិភាគទី១ និយាយថា គ្មានការបញ្ជាឱ្យបើកព្រំដែនជាមួយកម្ពុជានៅខេត្តស្រះកែវទេ ។ កងទ័ពថៃនៅតែអនុវត្តតាមគោលនយោបាយចាស់ គឺបិទព្រំដែនបន្តទៀត បើទោះជាប្រទេសទាំងពីរបានចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ក្តី ។

នៅថ្ងៃទី២៧ ខែតុលា ហ្វេសប៊ុកផេករបស់កងទ័ពភូមិភាគទី១ថៃបានបង្ហោះសារថា មានការផ្សព្វផ្សាយព័ត៌មានកងទ័ពថៃត្រៀមបើកព្រំដែនកម្ពុជា-ថៃនៅច្រកព្រំដែនបានខៅឌិន ស្ថិតនៅឃុំឃ្លងហាត ស្រុកឃ្លងហាត ខេត្តស្រះកែវ (ទល់មុខច្រកទ្វារព្រំដែនអន្តរជាតិភ្នំដី ស្រុកសំពៅលូន ខេត្តបាត់ដំបង) នៅថ្ងៃទី១ ខែវិច្ឆិកា ឆ្នាំ២០២៥ គឺកងទ័ពភូមិភាគទី១ សូមបញ្ជាក់ថា កងទ័ពថៃពុំបានទទួលបញ្ជាពីថ្នាក់លើឱ្យបើកព្រំដែនកម្ពុជា-ថៃនៅខេត្តស្រះកែវទេ ដែលជាការមើលខុសត្រូវរបស់កងទ័ពបូព៌ា (ឬកងកម្លាំងបូរ៉ាផា) ។ កងទ័ពភូមិភាគទី១ នៅតែអនុវត្តតាមគោលនយោបាយបិទព្រំដែនកម្ពុជា-ថៃក្នុងតំបន់ទទួលខុសត្រូវដូចមុន ។

ការបដិសេធរបស់កងទ័ពថៃពាក់ព័ន្ធនឹងការបើកព្រំដែនបានខៅឌិន (ឬច្រកទ្វារព្រំដែនអន្តរជាតិភ្នំដី) គឺក្រោយពីពលរដ្ឋថៃបង្ហាញការមិនពេញចិត្តក្នុងបណ្តាញសង្គមថា ទោះជាកម្ពុជា-ថៃបានចុះហត្ថលេខាលើសេចក្តីថ្លែងការណ៍រួមនៅទីក្រុងកូឡាឡាំពួរ ប្រទេសម៉ាឡេស៊ី ដើម្បីស្តារទំនាក់ទំនងឱ្យត្រឡប់មកប្រក្រតីក្តី ប៉ុន្តែពលរដ្ឋថៃមិនគាំទ្រការបើកព្រំដែនឡើងវិញឡើយ ពួកគេសំណូមពរឱ្យរដ្ឋាភិបាលថៃបិទព្រំដែនបន្តទៀតដើម្បីទប់ស្កាត់ការបញ្ជូនទំនិញថៃមកកម្ពុជាតាមរយៈផ្លូវគោក ។

ព័ត៌មានបើកព្រំដែនកម្ពុជា-ថៃនៅថ្ងៃទី១ ខែវិច្ឆិកានេះ បន្ទាប់ពីអតីតអ្នកនយោបាយថៃ បុគ្គល វីរៈ ស៊ុមក្វាមឃិត ដែលមិនពេញចិត្តជាមួយលទ្ធផលកិច្ចប្រជុំពេញអង្គគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) នៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ថា ថៃចាញ់ប្រៀបកម្ពុជាក្នុងកិច្ចប្រជុំ JBC លើកឡើងថា កងទ័ពថៃត្រៀមបើកព្រំដែនបានខៅឌិន នៅថ្ងៃទី១ ខែវិច្ឆិកា ។

នៅថ្ងៃទី២៧ ខែតុលា នាយករដ្ឋមន្ត្រីថៃ លោក Anutin Charnvirakul ក៏បានច្រានចានព័ត៌មានបើកព្រំដែនកម្ពុជា-ថៃនៅថ្ងៃទី១ ខែវិច្ឆិកា ដែរ លុះត្រាតែកម្ពុជាអនុវត្តតាមលក្ខខណ្ឌ៤ចំណុចជាមុនសិន ដោយមានក្រុមអ្នកសង្កេតការណ៍អាស៊ាន AOT ចូលរួមសង្កេតការណ៍ការអនុវត្តរបស់កម្ពុជា ហើយថៃមិនចាញ់ប្រៀប ។ លក្ខខណ្ឌ៤ចំណុច រួមមាន ៖ ១-ដកអាវុធធុនធ្ងន់ចេញពីតំបន់ព្រំដែន ២-ដោះមីន ៣-បង្ក្រាបការឆបោកអនឡាញ និង៤-គ្រប់គ្រងតំបន់ព្រំដែនរួមគ្នា ជាពិសេស នៅភូមិណងចាន់ និងភូមិណងយ៉ាកែវ (ទល់មុខភូមិជោគជ័យ និងភូមិព្រៃចាន់) គឺកម្ពុជាត្រូវអនុវត្តលក្ខខណ្ឌទាំងនេះឱ្យថៃឃើញជាមុន ។

លោកនាយករដ្ឋមន្ត្រីថៃបានទទួលព័ត៌មានកម្ពុជាចាប់ផ្តើមកែសម្រួលយុទ្ធោបករណ៍ និងអាវុធធុនធ្ងន់មួយផ្នែកនៃជំហ៊ានទី១ ជានិមិត្តរូបរបស់កងទ័ពកម្ពុជា-ថៃ ក្រោមការសង្កេតការណ៍របស់ក្រុមអ្នកសង្កេតការណ៍អាស៊ាន AOT កាលពីយប់ថ្ងៃទី២៦ ខែតុលា ហើយថៃនឹងរង់ចាំឱ្យកម្ពុជាអនុវត្តតាមលក្ខខណ្ឌផ្សេងៗ ទើបថៃដោះលែងកងទ័ពកម្ពុជាទាំង១៨នាក់ ។ ហេតុនេះ គ្មានការបើកព្រំដែននៅថ្ងៃទី១ ខែវិច្ឆិកា តាមពាក្យចចាមអារ៉ាមឡើយ ការបើកព្រំដែននឹងធ្វើឡើងនៅដំណាក់កាលចុងក្រោយនៃការអនុវត្តលក្ខខណ្ឌ ៕

ចាប់តាំងពីមានទំនាស់ព្រំដែនជាមួយគ្នាចន្លោះពាក់កណ្ដាលឆ្នាំ២០២៥នេះមក ប្រទេសថៃបានជ្រើសរើសបិទ IP អ្នកទស្សនានៅកម្ពុជាមិនឲ្យចូលមើលផេក ឬគេហទំព័រព័ត៌មានរបស់ខ្លួន និងបណ្ដាញព័ត៌មានខ្លះបានបិទមុខងារបញ្ចេញមតិរបស់ពួកគេ ក្នុងគោលបំណងដើម្បីរារាំងពលរដ្ឋកម្ពុជាដែលឃើញពីការផ្សាយព័ត៌មានរបស់ពួកគេរួចបានត្រឹមមើល មិនអាចខម្មិនអ្វីបាន។

សកម្មភាពបិទ IP អ្នកប្រើប្រាស់បណ្ដាញសង្គមនៅកម្ពុជានេះ ត្រូវបានគេសម្លឹងឃើញថា គឺជាយុទ្ធសាស្រ្តប្រកួតប្រជែងមួយរបស់ថៃ ក្នុងការយកប្រៀបលើកម្ពុជាតាមរយៈប្រព័ន្ធផ្សព្វផ្សាយ ដោយពួកគេមានបំណងមិនឲ្យពលរដ្ឋកម្ពុជាបានដឹង ឬមើលឃើញថាភាគីថៃកំពុងមានផែនការអ្វី ឬស្ថានការណ៍នៅប្រទេសថៃវិវត្តដល់ណា និងជាពិសេសគឺដើម្បីមានភាពងាយស្រួលក្នុងការបំភ្លៃព័ត៌មាន ដោយគ្មានប្រតិកម្មឆ្លើយតបពីសំណាក់អ្នកប្រើប្រាស់ប្រព័ន្ធបណ្ដាញសង្គមនៅកម្ពុជា។

ជាក់ស្ដែងដូចជាសារព័ត៌មាន Khaosod English និង Khaosod ភាសាថៃ គិតត្រឹមថ្ងៃទី២៦ ខែតុលាកាលពីម្សិលមិញនេះ បានសម្រេចបិទការចូលមើលពីអ្នកតាមដាននៅកម្ពុជា បន្ទាប់ពីសារព័ត៌មានធំៗរួមមាន Amarin TV, Bangkok Post, Thai PBS និងផេកជាច្រើនផ្សេងទៀត បានបិទអ្នកទស្សនានៅកម្ពុជាចាប់តាំងពីការប៉ះទង្គិចបានផ្ទះឡើង។

ដោយឡែក ចំពោះសារព័ត៌មាន The Nation ដែលក៏ជាសារព័ត៌មានភាសាអង់គ្លេសរបស់ថៃដែរនោះ ដ្បិតថាមិនបិទIP កម្ពុជា ប៉ុន្តែពួកគេបានបិទមុខងារបញ្ចេញមតិយោបល់ ដើម្បីរារាំងការចូលទៅខម្មិនរបស់បងប្អូនប្រជាពលរដ្ឋខ្មែរនៅលើការបង្ហោះរបស់ពួកគេ បើទោះជាបានឃើញប៉ុន្តែមិនអាចនិយាយអ្វីនៅលើព័ត៌មាននោះបានឡើយ។

យ៉ាងណាក៏ដោយ ការបំបិទមិនឲ្យមើលឃើញភាគច្រើន ផ្ដោតសំខានទៅលើបណ្ដាញសង្គមហ្វេសប៊ុក ខណៈបណ្ដាញសារព័ត៌មានមួយចំនួនរបស់ថៃនៅតែអនុញ្ញាតឲ្យអ្នកទស្សនានៅកម្ពុជាចូលមើលកាចុះផ្សាយរបស់ពួកគេនៅក្នុងគេហទំព័រ ឬវេបសាយបានធម្មតា។

ជាមួយគ្នានេះ អ្នកប្រើប្រាស់បណ្ដាញសង្គម និងអ្នកអត្ថាធិប្បាយឯករាជ្យជាច្រើនអះអាងថា ការរឹតត្បិតនេះអាចទាក់ទងនឹងការរិះគន់កាន់តែខ្លាំងឡើងពីអ្នកទស្សនានៅកម្ពុជា ដែលតែងលើកឡើងពីស្ថាប័នព័ត៌មានថៃមួយចំនួនថា បានពណ៌នាលាបពណ៌មកលើកម្ពុជា ឬរាយការណ៍មិនពិតអំពីបញ្ហាក្នុងតំបន់រសើប។ បន្ថែមពីនេះពលរដ្ឋកម្ពុជាជាច្រើនបានបញ្ជាក់ថា ការផ្សាយព័ត៌មាននៅក្នុងប្រព័ន្ធផ្សព្វផ្សាយថៃជាទូទៅ តែងមានខ្លឹមសារផ្ទុយពីអ្វីដែលពួកគេមើលឃើញថាជា “រឿងពិត” ដែលនាំឱ្យមានការឈ្លោះតទល់គ្នាទៅវិញទៅមកយ៉ាងក្តៅគគុក រវាងអ្នកលេងបណ្ដាញសង្គមរបស់ប្រទេសទាំងពីរ នៅក្នុងផ្នែកបញ្ចេញមតិ៕