អាម៉េរិក៖ មន្ត្រីជាន់ខ្ពស់ម្នាក់របស់រដ្ឋបាលសហរដ្ឋអាម៉េរិក ដែលបាននិយាយក្នុងលក្ខខណ្ឌមិនបញ្ចេញឈ្មោះ ប្រាប់ទៅកាន់ទីភ្នាក់ងារសារព័ត៌មាន កាលពីថ្ងៃអង្គារ ទី១១ ខែវិច្ឆិកា ថាលោកប្រធានាធិបតី ដូណាល់ ត្រាំ ប្តេជ្ញាចិត្តចំពោះការបញ្ឈប់ជម្លោះរវាងកម្ពុជា និងថៃ ហើយអាមេរិករំពឹងថារដ្ឋាភិបាលកម្ពុជា និងថៃនឹងគោរពយ៉ាងពេញលេញ ក្នុងការអនុវត្តកិច្ចព្រមព្រៀងសន្តិភាពដែលបានចុះហត្ថលេខារួមគ្នាកាលពីថ្មីៗនេះ។

យោងតាមកាសែត THE WASHINGTON POST បានរាយការណ៍ដោយដកស្រង់សំដីអ្នកនាំពាក្យក្រសួងការបរទេសអាម៉េរិកថា សហរដ្ឋអាម៉េរិកនៅតែរក្សាជំហររឹងមាំក្នុងបំណងប្រាថ្នារបស់ខ្លួនចង់ឃើញប្រទេសជិតខាងទាំងពីរខាងចាត់វិធានការសម្រាប់សន្តិភាពរយៈពេលវែង និងគោរពកិច្ចព្រមព្រៀងជាមួយគ្នា។

ជាមួយគ្នានេះ សហរដ្ឋអាមេរិកក៏កំពុងប្រមូលព័ត៌មានបន្ថែមអំពីឧទ្ទវហេតុ ដែលទាហានថៃជាន់មីននៅក្បែរព្រំដែនកម្ពុជា ជាមួយការជំរុញឱ្យប្រទេសជិតខាងទាំង២បន្តរក្សាស្ថិរភាព និងអនុវត្តតាមកិច្ចព្រមព្រៀងសន្តិភាពដែលត្រូវបានចុះហត្ថលេខាដោយមានប្រធានាធិបតីអាមេរិក លោក ដូណាល់ ត្រាំ ធ្វើជាសាក្សី។

សូមជម្រាបថា ការកត់សម្គាល់របស់មន្ត្រីអាមេរិកខាងលើកើតមានឡើង បន្ទាប់ពីភាគីថៃបានសម្រេចផ្អាកការអនុវត្តតាមកិច្ចព្រមព្រៀងសន្តិភាពជាមួយកម្ពុជា ក្រោយទាហានថៃ៣នាក់រងរបួសក្នុងហេតុការណ៍ជាន់គ្រាប់មីន អំឡុងការល្បាតមួយ ហើយដែលកំពុងក្លាយជាការធ្វើតេស្ដមួយលើបទឈប់បាញ់ សម្របសម្រួលដោយលោក ដូណាល់ ត្រាំ។

រដ្ឋាភិបាលថៃបានចោទកម្ពុជាថា បានដាំមីនថ្មីៗនៅតាមបណ្ដោយព្រំដែនកំពុងមានជម្លោះរវាងប្រទេសទាំង២។ ក៏ប៉ុន្តែក្រសួងការពារជាតិកម្ពុជា បានច្រានចោល ការចោទប្រកាន់របស់ថៃ និងបានជំរុញឱ្យភាគីថៃ ចៀសវាងការល្បាតនៅតំបន់មានមីនចាស់សល់ពីសម័យសង្រ្គាម ហើយកម្ពុជានៅតែប្ដេជ្ញាចិត្តធ្វើការជាមួយថៃ ស្របទៅតាមកិច្ចព្រមព្រៀងសន្តិភាពដែលត្រូវបានចុះហត្ថលេខាកាលពីខែតុលាកន្លងទៅ។

គួរបញ្ជាក់ថា នាយករដ្ឋមន្ត្រីថៃ លោក Anutin Charnvirakul កាលពីថ្ងៃអង្គារ បានប្រាប់ឱ្យក្រសួងការពារជាតិផ្អាកទាំងអស់ នូវការអនុវត្តតាមកិច្ចព្រមព្រៀងសន្តិភាពជាមួយកម្ពុជា ដោយមិនមានកាលកំណត់នោះ ហើយថែមទាំងប្រកាសទៀតផងថាសន្តិភាពបានបិទបញ្ចប់ហើយ៕

ប្រទេសថៃ ៖ បន្ទាប់ពីថៃបានប្រើល្បិចកងទ័ពខ្លួនរងរបួសដោយសារជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ដើម្បីទម្លាក់កំហុសលើកម្ពុជាបង្កប់មីនថ្មី និងជាលេសឈ្លានពានកម្ពុជាឡើងវិញ នៅថ្ងៃទី១១ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul បានធ្វើដំណើរទៅជួបកងទ័ពនៅភ្នំទ្រព្យ និងប្រកាសបញ្ចប់កិច្ចព្រមព្រៀងសន្តិភាពជាមួយកម្ពុជា ដោយនិយាយថា កិច្ចព្រមព្រៀងសន្តិភាពឈានដល់ទីបញ្ចប់ហើយ មិនបាច់ប្រាប់ប្រធានាធិបតីអាមេរិកទេ ពីព្រោះថៃជាប្រទេសឯករាជ្យ មានអធិបតេយ្យ ។ ប៉ុន្តែសមាជិកសភាគណបក្សប្រជាជនបានស្តីបន្ទោសរដ្ឋាភិបាលថៃដែលបញ្ចប់កិច្ចព្រមព្រៀងសន្តិភាពដោយងាយៗ គ្រាន់តែយកហេតុផលគ្រាប់មីនធ្វើជាលេស ។

លោក Jirat Thongsuwan សមាជិកសភាគណបក្សប្រជាជន (គណបក្សប្រឆាំង) ដែលធ្លាប់រងការរិះគន់ពីសង្គមថៃកន្លងមក គ្រាន់តែលោកសំណូមពរឱ្យកងទ័ពថៃបើកព្រំដែនជាមួយកម្ពុជាឡើងវិញដើម្បីស្តារសេដ្ឋកិច្ចថៃ និងសម្រាលទុក្ខលំបាករបស់ពលរដ្ឋរងផលប៉ះពាល់ដោយសារការបិទព្រំដែននោះ បានស្តីបន្ទោសរដ្ឋាភិបាលរបស់លោកនាយករដ្ឋមន្ត្រី Anutin Charnvirakul ថា ពុំគួរបញ្ចប់កិច្ចព្រមព្រៀងសន្តិភាពដោយងាយៗទេ ។ លោកថា ប្រសិនបើជាគ្រាប់មីនថ្មីធ្វើឱ្យកងទ័ពថៃរងរបួសនៅតំបន់ហួយតាម៉ារៀល ស្រុកកាន់ថាឡាក់ ខេត្តស៊ីសាកេត រដ្ឋាភិបាលថៃគួរប្រើប្រាស់កិច្ចព្រមព្រៀងសន្តិភាពដើម្បីដោះស្រាយបញ្ហានេះ មិនមែនលុបចោលឡើយ ។

កាលពីថ្ងៃទី១១ ខែវិច្ឆិកា ឆ្នាំ២០២៥ លោក Jirat Thongsuwan សមាជិកសភាគណបក្សប្រជាជនបានបង្ហោះសារក្នុងបណ្តាញសង្គម X អំពីរដ្ឋាភិបាល កងទ័ពជើងគោក និងកងទ័ពអាកាស ថៃ ប្រកាសបញ្ចប់កិច្ចព្រមព្រៀងសន្តិភាព ដោយលើកហេតុផលដើម្បីប្រើប្រាស់សិទ្ធិការពារខ្លួន និងចោទប្រកាន់កម្ពុជាបង្កគ្រោះថ្នាក់ ។ លោកថា ៖ «ចូរប្រើប្រាស់កិច្ចព្រមព្រៀងសន្តិភាពដោះស្រាយបញ្ហា ប្រសិនបើជាគ្រាប់មីនថ្មីទើបបង្កប់ គឺថៃកាន់តែមានប្រៀប មិនមែនបញ្ចប់កិច្ចព្រមព្រៀងសន្តិភាពទេ ។ ហេតុអ្វីនាយករដ្ឋមន្ត្រីថៃដកខ្លួនចេញពីកិច្ចព្រមព្រៀង និងបើកដៃឱ្យកងទ័ពសម្រេចចិត្តរឿងព្រំដែន» ។

សមាជិកសភារូបនេះធ្លាប់រងការរិះគន់ពីសង្គមថៃនាពេលកន្លងមក គឺពេលលោកនិងសមាជិកសភាគណបក្សប្រជាជនមួយចំនួនទៀតបានធ្វើដំណើរទៅតំបន់ព្រំដែនខេត្តស្រះកែវ ហើយពេលនោះ លោកស្នើឱ្យកងទ័ពថៃបើកព្រំដែនឡើងវិញដើម្បីកុំឱ្យប៉ះពាល់សេដ្ឋកិច្ច ។ ម្យ៉ាងទៀត កម្ពុជា-ថៃសុទ្ធតែជាប្រទេសស្ថិតក្នុងតំបន់អាស៊ានដូចគ្នា មិនគួរបិទព្រំដែន វាដូចនឹងការបិទផ្លូវឆ្លងកាត់អាស៊ានដែរ ។ ការលើកឡើងបែបនេះធ្វើឱ្យពលរដ្ឋថៃមិនពេញចិត្តយ៉ាងខ្លាំងថា លោកជាសមាជិកសភាកម្ពុជា ពីព្រោះនិយាយគាំទ្រកម្ពុជា ។

គួរបញ្ជាក់ថា កាលពីថ្ងៃទី១១ ខែវិច្ឆិកា នាយករដ្ឋមន្ត្រីថៃ លោក Anutin រួមទាំងមន្ត្រីពាក់ព័ន្ធបានធ្វើដំណើរទៅភ្នំទ្រព្យ នៅស្រុកកាន់ថាឡាក់ ខេត្តស៊ីសាកេត ដើម្បីសួរសុខទុក្ខកងទ័ពជួរមុខ និងស្តាប់ការរាយការណ៍ពីកងទ័ពរងរបួសដោយសារជាន់មីន ហើយលោកសន្យាដោះស្រាយបញ្ហាឱ្យបានឆាប់រហ័សបំផុត ។ លោកថា កិច្ចព្រមព្រៀងសន្តិភាពជាមួយកម្ពុជាបានបញ្ចប់ហើយ ចាប់ពីពេលនេះ រដ្ឋាភិបាលថៃនឹងធ្វើអ្វីជាប្រយោជន៍ដល់ប្រទេស ពុំចាំបាច់ពិភាក្សា ឬសុំការអនុញ្ញាតពីប្រទេសណា រដ្ឋាភិបាលថៃគាំទ្រប្រតិបត្តិការរបស់កងទ័ពយ៉ាងពេញទំហឹង ។ យើងពុំចាំបាច់រាយការណ៍ប្រាប់ប្រធានាធិបតីអាមេរិក លោក Donald Trump ពីការបញ្ចប់កិច្ចព្រមព្រៀងសន្តិភាពទេ ពីព្រោះថៃជាប្រទេសឯករាជ្យ មានអធិបតេយ្យ ។

តាមការចុះផ្សាយរបស់សារព័ត៌មាន Amarin News នៅថ្ងៃទី១២ ខែវិច្ឆិកានេះ លោកនាយករដ្ឋមន្ត្រី Anutin បានចោទប្រកាន់កម្ពុជាមិនអនុវត្តតាមលក្ខខណ្ឌ៤ចំណុចរបស់ថៃ និងប្រកាសបញ្ចប់ការចរចាជាមួយកម្ពុជា ។ លោកថា បើថៃលុបចោលសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព (Joint Declaration) ធ្វើឱ្យអាមេរិកមិនពេញចិត្តហើយដំឡើងពន្ធទំនិញថៃនាំចូលអាមេរិកនោះ ថៃនឹងស្វែងរកទីផ្សារលក់ទំនិញថ្មី ៕

ប្រទេសថៃ ៖ ក្រោយពីនាយករដ្ឋមន្ត្រីថៃ លោក Anutin Charnvirakul ប្រកាសកាលពីថ្ងៃទី១១ ខែវិច្ឆិកា ឆ្នាំ២០២៥ ថា កិច្ចព្រមព្រៀងសន្តិភាពកម្ពុជា-ថៃ ដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដល់ទីបញ្ចប់ហើយ ដោយចោទប្រកាន់កម្ពុជាបង្កប់មីនថ្មីធ្វើឱ្យកងទ័ពខ្លួនរងរបួសនៅខេត្តស៊ីសាកេត គណបក្សប្រជាជន (គណបក្សប្រឆាំង) បានចេញសេចក្តីថ្លែងការណ៍ណែនាំឱ្យរដ្ឋាភិបាលថៃអនុវត្តការទូត គឺនាយករដ្ឋមន្ត្រីថៃត្រូវទូរស័ព្ទទៅលោក Trump និងលោក Anwar ដើម្បីទម្លាក់កំហុសលើកម្ពុជាបំពានកិច្ចព្រមព្រៀងសន្តិភាព រួមទាំងផ្ញើលិខិតទៅអាមេរិកឱ្យបញ្ឈប់កិច្ចសហការកងទ័ពជាមួយកម្ពុជា ។

គណបក្សប្រជាជនបានបង្ហោះសេចក្តីថ្លែងការណ៍ក្នុងហ្វេសប៊ុកក្រោមចំណងជើងថា «សំណើបន្ទាន់ករណីជម្លោះកម្ពុជា-ថៃ រដ្ឋាភិបាលថៃត្រូវតែប្រញាប់អនុវត្តការទូតដើម្បីមានប្រៀបលើកម្ពុជា» ។ ការចេញសេចក្តីថ្លែងការណ៍របស់គណបក្សនេះ ក្រោយពីកងថៃប្រឌិតរឿងកងទ័ពខ្លួន២នាក់ ជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត (ទល់មុខប្រាសាទព្រះវិហារ) និងចោទប្រកាន់កម្ពុជាបង្កប់មីនថ្មី ហើយធ្វើឱ្យលោកនាយករដ្ឋមន្ត្រី Anutin ប្រកាសឈប់អនុវត្តកិច្ចព្រមព្រៀងសន្តិភាពជាមួយកម្ពុជាដែលចុះហត្ថលេខាកាលពីថ្ងៃទី២៦ ខែតុលា ។

គណបក្សប្រជាជនបានណែនាំវិធានការការទូតដល់រដ្ឋាភិបាលថៃដើម្បីមានប្រៀបលើកម្ពុជា ក្រោយពីថៃប្រកាសឈប់អនុវត្តកិច្ចព្រមព្រៀងសន្តិភាពជាឯកតោភាគី ក្រោមហេតុផលកងទ័ពខ្លួនជាន់មីន ដោយឱ្យលោកនាយករដ្ឋមន្ត្រី Anutin ទូរស័ព្ទជជែកជាមួយប្រធានាធិបតីអាមេរិក លោក Trump និងនាយករដ្ឋមន្ត្រីម៉ាឡេស៊ី លោក Anwar ជាបន្ទាន់ ក្នុងឋានៈបុគ្គលទាំង២រូបបានធ្វើសាក្សីក្នុងពិធីចុះហត្ថលេខាលើកិច្ចព្រមព្រៀងសន្តិភាព ដោយបញ្ជាក់ពីគោលជំហរថា ថៃចង់គោរពកិច្ចព្រមព្រៀងសន្តិភាព ថៃបានអនុវត្តកិច្ចព្រមព្រៀងរហូតមក និងទម្លាក់កំហុសលើកម្ពុជាល្មើសកិច្ចព្រមព្រៀង ។ ថៃត្រូវប្រាប់អាមេរិកថា ចង់ឱ្យកម្ពុជាទទួលខុសត្រូវចំពោះហេតុការណ៍ផ្ទុះមីន ថៃនឹងប្រើប្រាស់សិទ្ធិការពារខ្លួន បើកម្ពុជាបំផ្លាញសន្តិភាព ។

គណបក្សនេះថែមទាំងណែនាំឱ្យរដ្ឋាភិបាលថៃប្រញាប់អនុវត្តការទូតជាមួយអន្តរជាតិ មុនពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទូរស័ព្ទទៅប្រធានាធិបតីអាមេរិក លោក Trump និងនាយករដ្ឋមន្ត្រីម៉ាឡេស៊ី លោក Anwar ពីព្រោះគណបក្សយល់ថា ការជជែកផ្ទាល់ជាមួយមេដឹកនាំពិភពលោក ដើម្បីឱ្យថៃមានប្រៀបប្រាប់ពីគោលជំហរ និងរាយការណ៍ស្ថានការណ៍លម្អិត ។ លើសពីនេះ ត្រូវនិយាយថា ថៃចង់រក្សាកិច្ចព្រមព្រៀងសន្តិភាព និងទម្លាក់កំហុសលើកម្ពុជាបំពានកិច្ចព្រមព្រៀងសន្តិភាពដើម្បីកុំឱ្យថៃរងការស្ទីបន្ទោសពីអន្តរជាតិ ។

គណបក្សណែនាំឱ្យរដ្ឋាភិបាលថៃផ្ញើលិខិតជាផ្លូវការអំពាវនាវឱ្យអាមេរិកបញ្ឈប់កិច្ចសហការកងទ័ពជាមួយកម្ពុជា ហើយរដ្ឋាភិបាលថៃត្រូវរាយការណ៍ទៅអាមេរិកដោយទម្លាក់កំហុសលើកម្ពុជាថា បំផ្លាញកិច្ចព្រមព្រៀងសន្តិភាពដែលជាបំណងប្រាថ្នារបស់លោក Trump ។ ក្រៅពីនេះ ត្រូវលាបពណ៌កម្ពុជាជាប្រទេសឆបោកអនឡាញ និងកន្លែងលាយលុយកខ្វក់ ដោយថៃត្រូវសុំកិច្ចសហការពីពិភពលោកចាត់ការបញ្ហានេះ បើទោះជាថៃជាប្រទេសឆបោកអនឡាញដ៏ធំលើពិភពលោកក្តី ។ គណបក្សនេះជំរុញឱ្យរដ្ឋាភិបាលថៃអនុវត្តការទូតដើម្បីមានប្រៀបជាមួយអន្តរជាតិ រួមទាំងអាចទម្លាក់កំហុសលើកម្ពុជា ថាជាភាគីបំពានកិច្ចព្រមព្រៀងសន្តិភាព ព្រមទាំអត្រូវពន្យល់ប្រាប់ពិភពលោកពីថៃប្រើប្រាស់កម្លាំងទ័ពនៅព្រំដែន គឺដើម្បីការពារខ្លួន ។

គួរបញ្ជាក់ថា ហេតុការណ៍ផ្ទុះមីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត គ្រាន់តែជាការសម្តែងបំភាន់ភ្នែករបស់ថៃប៉ុណ្ណោះ ដើម្បីកុំឱ្យអាមេរិកដាក់សម្ពាធឱ្យថៃដោះលែងវីរកងទ័ពកម្ពុជាទាំង១៨រូប ព្រមទាំងជាលេសលុបចោលកិច្ចព្រមព្រៀងសន្តិភាពនៅទីក្រុងកូឡាឡាំពួរ ដែលប្រធានាធិបតីអាមេរិកព្យាយាមឱ្យកម្ពុជា-ថៃទទួលបានសន្តិភាពពេញលេញ ។ ថៃមិនសប្បាយចិត្តយ៉ាងខ្លាំងដែលអាមេរិកមានទំនាក់ទំនងល្អ និងមានកិច្ចសហការកងទ័ពជាមួយកម្ពុជា ទើបព្យាយាមរកល្បិចឱ្យអាមេរិកលុបចោលកិច្ចសហការកងទ័ពជាមួយកម្ពុជា ដោយចោទប្រកាន់កម្ពុជាបង្កប់មីន ។

អាជ្ញាធរមីនកម្ពុជាសោកស្តាយចំពោះសារព័ត៌មានថៃមួយចំនួនដែលបានផ្សព្វផ្សាយក្នុងចេតនាចោទប្រកាន់ និងបង្ខូចកេរ្តិ៍ឈ្មោះកម្ពុជា ប្រើប្រាស់ និងដាក់មីនថ្មី ខណៈកម្ពុជាកំពុងខិតខំប្រឹងប្រែងលុបបំបាត់គ្រាប់មីន និងទុក្ខវេទនារបស់សហគមន៍ ដែលបង្កឡើងដោយមីន និងសំណល់ជាតិផ្ទុះពីសង្គ្រាម ព្រមទាំងទទួលបានការវាយតម្លៃខ្ពស់ពីសហគមន៍អន្តរជាតិ ថាជាប្រទេសគំរូ និងឈានមុខក្នុងវិស័យសកម្មភាពមីនសាកល ។ ការចោទប្រកាន់គ្មានមូលដ្ឋាននេះ ប៉ះពាល់ដល់កិច្ចខិតខំប្រឹងប្រែងនៃក្រុមការងារសម្របសម្រួលរួម (JCTF) ដែលបានបង្កើតឡើងដោយប្រទេសទាំងពីរ ដើម្បីជំរុញដល់ការបោសសម្អាតមីនមនុស្សធម៌ និងបង្កើនទំនុកចិត្តរវាងគ្នានៅតាមបណ្តោយព្រំដែន ៕

ប្រទេសថៃ៖ លោក អនុទីន ឆានវីរៈគុល នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានហែកចោលសេចក្ដីថ្លែងការណ៍រួម និងធ្វើការប្រកាសក្នុងឯកសណ្ឋានជាយោធាថា «សន្តិភាពត្រូវបានបញ្ចប់ហើយ» ក្នុងនាមថៃជាប្រទេសឯករាជ្យ ការសម្រេចចិត្តនេះនឹងមិនចាំបាច់ត្រូវរាយការណ៍ ឬពិភាក្សាជាមួយភាគីណាមួយឡើយ។ នេះបើយោងតាមការចុះផ្សាយរបស់សារព័ត៌មាន Khaosod ។

នៅរសៀល ថ្ងៃទី 11 ខែវិច្ឆិកា ឆ្នាំ 2025 លោក អនុទីន ក្នុងឱកាសចុះត្រួតពិនិត្យនៅមូលដ្ឋានប្រតិបត្តិការឥន្ទ្រាម៉ាន់ (ភូម៉ាក់ឃួ) ស្រុកកន្ទាឡាក់ ខេត្តស៊ីសាកេត បានប្រកាសថា ចំណុចទាំង៤ ដែលកន្លងមកបានឯកភាពគ្នាជាមួយកម្ពុជានៅក្នុងកិច្ចព្រមព្រៀងសន្តិភាពនោះ នឹងមិនត្រូវបានថៃអនុវត្តបន្តទៀតទេ ពោលគឺរដ្ឋាភិបាលថៃនឹងប្រគល់សិទ្ធិអំណាចទៅឲ្យកងទ័ពក្នុងការដោះស្រាយបញ្ហាព្រំដែន។

លោក អនុទីន បានបន្ថែមថា ការសម្រេចបញ្ចប់កិច្ចព្រមព្រៀងសន្តិភាពជាផ្លូវការជាមួយកម្ពុជា នឹងត្រូវធ្វើឡើងចាប់ពីពេលប្រកាសនេះទៅតែម្ដង ដោយមិនត្រូវការរាយការណ៍ទៅកាន់លោក ដូណាល់ ត្រាំ ឬភាគីណាមួយឡើយ។ លោកបានគូសបញ្ជាក់ថា «ក្នុងនាមថៃ គឺជាប្រទេសប្រជាធិបតេយ្យមួយ និងឯករាជ្យ ដូច្នេះលោកមិនចាំបាច់រាយការណ៍ទៅកាន់នរណាម្នាក់ទៀតឡើយ។ ចាប់ពីពេលនេះតទៅ លោកនឹងធ្វើអ្វីដែលមានប្រយោជន៍សម្រាប់ប្រទេសថៃតែប៉ុណ្ណោះ ប្រសិនបើយើងត្រូវឆ្លើយតប យើងនឹងឆ្លើយតបភ្លាមៗតែម្ដង ដោយមិនចាំបាច់មានការពិភាក្សា ការពិគ្រោះយោបល់ ឬការអនុញ្ញាតពីភាគីណាមួយឡើយ។

ជាមួយនឹងការប្រកាសគេបានកត់សម្គាល់ឃើញថា ប្រទេសថៃកំពុងតែត្រៀមបញ្ជូនអាវុ.ធ និងកងទ័ពមកកាន់ព្រំដែនវិញផងដែរ។ ជុំវិញសកម្មភាពនេះ លោក ណាត់ថាផន ណាក់ផានិត បានបដិសេធសុំមិនពន្យល់លម្អិតទៅកាន់អ្នកកាសែត ដោយលើកឡើងត្រឹមថា ប្រទេសថៃមាននីតិវិធីរួចជាស្រេចសម្រាប់ការប្រើប្រាស់កម្លាំងយោធា។

យ៉ាងណាមិញ ក្រោយបានឃើញពីការប្រកាសខាងលើរបស់ថៃ មេបញ្ជាការកងកម្លាំងការពារជាតិម៉ាឡេស៊ី ឧត្តមសេនីយ៍ Tan Sri Mohd Nizam Jaffar បានប្រាប់ទៅកាន់ថៃចំៗថា ថៃត្រូវតែបន្ត «កិច្ចព្រមព្រៀងសន្តិភាព» និងគ្មានការរំខានណាមួយឡើយ ព្រោះការពន្យារពេលណាមួយអាចប្រឈមនឹងហានិភ័យនៃការវិលត្រឡប់ទៅរកជម្លោះតានតឹងដូចកាលពីមុនវិញ។

ដូចគ្នានេះដែរ រាជរដ្ឋាភិបាលកម្ពុជា ក៏បានបង្ហាញសញ្ញាព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ប៉ុន្តែកម្ពុជា នឹងនៅតែបន្តប្តេជ្ញាចិត្តក្នុងការធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕