ប្រទេសថៃ៖ សហរដ្ឋអាមេរិកទើបតែជំរុញឲ្យបន្តអនុវត្តតាមកិច្ចព្រមព្រៀងសន្តិភាពមិនទាន់បានប៉ុន្មានផង ពេលនេះថៃប្រកាសអួតក្ដែងៗថា យន្តហោះ F-16 បានត្រៀមរួចរាល់ហើយ ខណៈកងទ័ពអាកាសរក្សាការត្រៀមខ្លួន 24/7 ដើម្បីប្រយុទ្ធក្រោមហេតុផលការពារអធិបតេយ្យភាពជាតិ និងសុវត្ថិភាពរបស់ប្រជាជន។ នេះបើតាមការចុះផ្សាយរបស់សារព័ត៌មាន Khaosod។

នៅថ្ងៃទី 12 ខែវិច្ឆិកា ឆ្នាំ 2025 បន្ទាប់ពីបានធ្វើការត្រួតពិនិត្យការត្រៀមខ្លួននៅកងពលលេខ 1 ខេត្តនគររាជសីមា មេបញ្ជាការកងទ័ពអាកាសថៃ លោក រ៉ាវីន ថាណុមស៊ីង មេបញ្ជាការបញ្ជាការដ្ឋានត្រួតពិនិត្យប្រតិបត្តិការអាកាស (AOCC) បានធ្វើការប្រកាសថា យន្តហោះចម្បាំង F-16 បានត្រៀមលក្ខណៈរួចរាល់សម្រាប់ប្រតិបត្តិការហោះហើរ 24ម៉ោង ដោយនៅពេលនេះកងកម្លាំងទាំងអស់រង់ចាំតែការចេញបញ្ជាតែប៉ុណ្ណោះ។

សេចក្ដីថ្លែងការណ៍ខាងលើរបស់មេបញ្ជាការកងទ័ពអាកាសថៃ ត្រូវបានធ្វើឡើងស្របពេលដែលសហរដ្ឋអាមេរិក និងម៉ាឡេសុី កំពុងជំរុញឲ្យថៃបន្តគោរពនិងអនុវត្តតាមសេចក្ដីថ្លែងការណ៍រួមជាមួយកម្ពុជា ដើម្បីបញ្ឈប់អំពើហិង្សា និងរក្សាសន្តិភាពរយៈពេលវែងសម្រាប់ប្រទេសជិតខាងទាំងពីរ។

ក្រោយការប្រកាសរបស់នាយករដ្ឋមន្រ្តីថៃ លោក អនុទីន ក្នុងការបញ្ចប់សន្តិភាពទាំងស្រុងជាមួយនឹងកម្ពុជា និងលុបចោលកិច្ចព្រមព្រៀងនានា ព្រមទាំងផ្ដល់សិទ្ធិឲ្យអំណាចឲ្យយោធាក្នុងការដោះស្រាយជម្លោះ គេសង្កេតឃើញថា យោធាថៃកាន់តែបង្កើនសកម្មភាពក្អេងក្អាង ចង់ប្រើប្រាស់ច្បាប់ព្រៃដើម្បីគំរាមកំហែងកម្ពុជា ដោយមិនខ្វល់រាយការណ៍ ឬពិភាក្សាជាមួយភាគីណាទាំងអស់សូម្បីតែសហរដ្ឋអាមេរិក។

ទន្ទឹមនឹងនេះ សមាជិកសភា រួមទាំងគណបក្សប្រឆាំងរបស់ថៃ បាននាំគ្នាអំពាវនាវឱ្យលោកនាយករដ្ឋមន្ត្រីកាន់អំណាច អនុទីន ឆាន់វីរៈគុល ងាកមកប្រើការទូតវិញជាបន្ទាន់ ដើម្បីបញ្ឈប់ការគំរាមកំហែងដល់សន្តិភាពជាមួយកម្ពុជា ដោយព្រួយបារម្ភថាវិធានយោធានៅពេលនេះ នឹងលក់មុខថៃក្នុងឆាកអន្តរជាតិ និងធ្វើប្រទេសផ្សេងៗទៀតកាន់តែលែងទុកចិត្ត ព្រោះវាបង្ហាញថាថៃកំពុងអនុវត្តផ្ទុយពីគោលជំហររបស់ខ្លួននៅក្នុងកិច្ចព្រមព្រៀងដើម្បីសន្តិភាពកន្លងមក ។

ទោះជាយ៉ាងណាមកទល់ពេលនេះ រាជរដ្ឋាភិបាលកម្ពុជានៅតែប្ដេជ្ញាចិត្តអនុវត្តសេចក្ដីថ្លែងការណ៍រួមឲ្យទទួលបានប្រសិទ្ធភាពខ្ពស់បំផុត និងសូមអំពាវនាវឲ្យថៃបន្តចូលរួមសហការណ៍ ដើម្បីលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមកិច្ចព្រមព្រៀងសន្តិភាពដែលបានចុះហត្ថលេខានៅប្រទេសម៉ាឡេសុី កាលពីថ្ងៃទី២៦ ខែតុលា ឆ្នាំ២០២៥៕

ប្រទេសថៃ ៖ តាមការចុះផ្សាយរបស់សារព័ត៌មានថៃនៅថ្ងៃទី១២ ខែវិច្ឆិកា ឆ្នាំ២០២៥ ក្រោយពីនាយករដ្ឋមន្ត្រីថៃ លោក Anutin Charnvirakul បានប្រកាសបញ្ចប់កិច្ចព្រមព្រៀងសន្តិភាពដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី លោកក៏បញ្ជាឱ្យត្រៀមកម្លាំងទ័ពនៅតាមបណ្តោយព្រំដែនកម្ពុជា-ថៃដើម្បីការពារអធិបតេយ្យ និងបញ្ចប់ការចរចាជាមួយកម្ពុជា ។ នាយករដ្ឋមន្ត្រីថៃថែមទាំងចោទប្រកាន់កម្ពុជាបំពានកិច្ចព្រមព្រៀងសន្តិភាព ទើបថៃចាំបាច់ប្រើប្រាស់សិទ្ធិការពារខ្លួន និងមិនបារម្ភពីប្រធានាធិបតីអាមេរិក លោក Donald Trump ដំឡើងពន្ធទំនិញថៃ ។

នៅថ្ងៃទី១២ ខែវិច្ឆិកា លោកនាយករដ្ឋមន្ត្រី Anutin បាននិយាយពីស្ថានការណ៍ព្រំដែនកម្ពុជា-ថៃនាពេលនេះថា កិច្ចប្រជុំក្រុមប្រឹក្សាសន្តិសុខជាតិកាលពីថ្ងៃទី១១ ខែវិច្ឆិកា បានឯកភាពបញ្ចប់កិច្ចព្រមព្រៀងសន្តិភាព ដោយសារកម្ពុជាមិនគោរពកិច្ចព្រមព្រៀងនេះ ។ ថៃនឹងបញ្ចប់ការចរចាទាំងអស់ក្រោយពីកម្ពុជាមិនអនុវត្តតាម៤លក្ខខណ្ឌ ខណៈថៃអនុវត្តគ្រប់លក្ខខណ្ឌដើម្បីទទួលបានសន្តិភាពឆាប់ៗ ។

ប្រទេសថៃផ្តោតតែលើផលប្រយោជន៍ និងសុវត្ថិភាពពលរដ្ឋរបស់ខ្លួនប៉ុណ្ណោះ ហើយលោកពុំចាប់អារម្មណ៍នឹងអាមេរិកដំឡើងពន្ធទំនិញថៃខ្ពស់ទេ ។ ប្រសិនបើមិនអាចលក់ទំនិញទៅអាមេរិកបាន ថៃនឹងលក់ឱ្យប្រទេសផ្សេងវិញ អាមេរិកមិនអាចយកអត្រាពន្ធមកដាក់សម្ពាធទេ ។ ការបញ្ចប់កិច្ចព្រមព្រៀងសន្តិភាពជាមួយកម្ពុជា ក៏ពុំចាំបាច់រាយការណ៍ប្រាប់លោក Donald Trump ដែរ ពីព្រោះថៃជាប្រទេសឯករាជ្យ និងមានអធិបតេយ្យ ។

លោក Anutin បន្តថា ប្រទេសថៃបានត្រៀមខ្លួនគ្រប់ពេលវេលា ករណីលោក Trump ដំឡើងពន្ធទំនិញថៃដោយសារការបញ្ចប់កិច្ចព្រមព្រៀងសន្តិភាព ។ ថៃជាប្រទេសពឹងផ្អែកលើប្រាក់ចំណូលពីការនាំចេញទំនិញទៅក្រៅប្រទេសជាចម្បង ទើបត្រូវស្វែងរកទីផ្សារថ្មីសម្រាប់លក់ទំនិញជានិច្ច និងកែលម្អគុណភាពទំនិញដើម្បីបំពេញតម្រូវការអតិថិជនលើពិភពលោក យើងមិនយកបញ្ហាពន្ធធ្វើឱ្យចាញ់ប្រៀប ឬប៉ះពាល់អធិបតេយ្យដាច់ខាត ។

ចំណែកពលរដ្ឋថៃមួយចំនួនគាំទ្រឱ្យមានការប៉ះទង្គិចដោយអាវុធដើម្បីបញ្ចប់ជម្លោះឆាប់ៗ និងពលរដ្ឋខ្លះទៀតបារម្ភពីការប៉ះទង្គិចនោះ លោក Anutin ថា បានរៀបចំផែនការរួចហើយ ប៉ុន្តែរឿងសន្តិសុខ ការការពារប្រទេស មិនអាចនិយាយជាសាធារណៈទេ ។ រដ្ឋាភិបាលថៃបានដឹកនាំកិច្ចប្រជុំក្រុមប្រឹក្សាសន្តិសុខជាតិដើម្បីកំណត់វិធានការអនុវត្តឱ្យទទួលបានលទ្ធផលខ្ពស់ ការពារអធិបតេយ្យ និងសុវត្ថិភាពពលរដ្ឋ កងទ័ព បច្ចុប្បន្ន បានត្រៀមកម្លាំងទ័ពនៅតាមបណ្តោយព្រំដែនរួចរាល់ហើយ ។

ដោយឡែក អតីតនាយករដ្ឋមន្ត្រីថៃ លោក Abhisit Vejjajiva ដែលបច្ចុប្បន្ន ជាប្រធានគណបក្សប្រជាធិបតេយ្យ នៅថ្ងៃទី១២ ខែវិច្ឆិកា បានចោទប្រកាន់កម្ពុជាបំពានកិច្ចព្រមព្រៀងសន្តិភាពដោយការបង្កប់មីនថ្មី មិនមែនថៃទេ ហើយស្នើឱ្យពលរដ្ឋ និងសារព័ត៌មានថៃជួយគ្នាផ្សព្វផ្សាយទម្លាក់កំហុសលើកម្ពុជា ឬប្រាប់ទៅពិភពលោក ថាកម្ពុជាបំពានកិច្ចព្រមព្រៀង ។

នេះបញ្ជាក់ពីសន្តានរបស់ថៃដែលលុបចោលកិច្ចព្រមព្រៀងសន្តិភាពដោយខ្លួនឯង បែរជាមកចោទប្រកាន់កម្ពុជាជាអ្នកបំពានទៅវិញ ។ ថៃយកលេសការផ្ទុះមីនទម្លាក់កំហុសលើកម្ពុជារហូតមក ខណៈកម្ពុជាមិនដែលមានចិត្តបង្កជម្លោះ ឬបង្កប់មីនថ្មីដូចការចោទប្រកាន់ឡើយ កម្ពុជាមានតែប្រឹងប្រែងដោះមីននៅលើទឹកដីកម្ពុជា និងចង់មានសន្តិភាពជាមួយប្រទេសជិតខាង ។

ក្រសួងការពារជាតិកម្ពុជា សោកស្តាយចំពោះឧបទ្ទវហេតុការផ្ទុះមីនដែលបណ្តាលឱ្យកងទ័ពថៃមួយចំនួនរងរបួសពេលដើរល្បាតចូលតំបន់ចម្ការមីនចាស់ដែលបន្សល់ទុកពីសង្គ្រាមស៊ីវិលរបស់កម្ពុជា កាលពីថ្ងៃទី១០ ខែវិច្ឆិកា ឆ្នាំ២០២៥ និងបដិសេធការចោទប្រកាន់ទាំងនេះរបស់ភាគីថៃមកលើកម្ពុជា ។ តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីគំរាមកំហែងសន្តិសុខ និងសុវត្ថិភាពមនុស្សជាតិឡើយ ។

ក្រសួងការពារកម្ពុជាបន្តប្តេជ្ញាចិត្តធ្វើការឱ្យបានជិតស្និទ្ធជាមួយភាគីថៃក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេស ធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ៕

ប្រទេសថៃ ៖ នៅថ្ងៃទី១២ ខែវិច្ឆិកា ឆ្នាំ២០២៥ អគ្គមេបញ្ជាការកងទ័ពថៃបានប្រកាសដោះមីនក្នុង១៣ទីតាំងនៅតាមបណ្តោយព្រំដែនកម្ពុជា-ថៃដោយពុំចាំបាច់មានកម្ពុជាចូលរួម ក្រោមហេតុផលដើម្បីសុវត្ថិភាពពលរដ្ឋ និងកងទ័ពថៃនៅព្រំដែន ។ ការប្រកាសដោះមីនជាឯកតោភាគីនេះ ក្រោយពីនាយករដ្ឋមន្ត្រីថៃទើបបញ្ចប់កិច្ចព្រមព្រៀងសន្តិភាពដែលចុះហត្ថលេខានៅទីក្រុងកូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ដោយថៃចោទប្រកាន់កម្ពុជាបង្កប់មីនថ្មីបង្កគ្រោះថ្នា.ក់ដល់កងទ័ពខ្លួន ។

តាមការចុះផ្សាយរបស់សារព័ត៌មាន Khaosod នៅថ្ងៃទី១២ ខែវិច្ឆិកា អគ្គមេបញ្ជាការកងទ័ពថៃ លោក Ukrit Boontanon បានផ្តល់សម្ភាសន៍ជាមួយសារព័ត៌មានអំពីការបោសសម្អាតមីននៅតាមបណ្តោយព្រំដែនកម្ពុជា-ថៃថា បច្ចុប្បន្ន កំពុងដំណើរការដោះមីននៅតំបន់សាកល្បងចំនួន៥ឱ្យរួចរាល់សិន បន្ទាប់មក ភាគីថៃនឹងដោះមីននៅទីតាំងផ្សេងៗបន្តទៀតឱ្យគ្រប់១៣ទីតាំង ទោះជាកម្ពុជាមិនចូលរួមក្តី វាជាបញ្ហារបស់កម្ពុជា ថៃដោះមីនក្នុងអធិបតេយ្យរបស់ខ្លួន ។

លោកបន្តថា ប្រសិនបើកម្ពុជាពង្រាយកងទ័ព ក៏ថៃនៅតែដោះមីនដែរ ដើម្បីសុវត្ថិភាពពលរដ្ឋ និងកងទ័ពនៅព្រំដែន គ្មានអ្វីរារាំងបានទេ ។ ១៣ទីតាំងនេះស្ថិតនៅតំបន់ទទួលខុសត្រូវរបស់កងកម្លាំងបូព៌ា, កងទ័ពភូមិភាគទី១ ខេត្តស្រះកែវ, កងទ័ពភូមិភាគទី២, កងកម្លាំងស៊ុណារី នៅខេត្តឧប៊ុនរ៉ាជថានី សុរិន្ទ និងបុរីរាំ និងការទទួលខុសត្រូវរបស់កងកម្លាំងការពារព្រំដែនខេត្តចន្ទបុរី-ត្រាត ។ កម្ពុជាមិនឯកភាពឱ្យថៃដោះមីនក្នុង១៣ទីតាំង ប៉ុន្តែថៃនឹងដោះមីនទាំង១៣ទីតាំង កម្ពុជាមិនចាំបាច់មកចូលរួមដោះមីនជាមួយថៃទេ និងសូមកុំរារាំង ។

គួរបញ្ជាក់ថា ថៃតែងចោទប្រកាន់កម្ពុជាបង្កប់មីនរហូតឈានដល់ការប៉ះទង្គិច ដោយអាវុធ រយៈពេល៥ថ្ងៃកន្លងមក ហើយហេតុការណ៍កងទ័ពថៃជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ក៏ថៃចោទប្រកាន់កម្ពុជាដែរ ។ អាជ្ញាធរមីនកម្ពុជាសោកស្តាយចំពោះសារព័ត៌មានថៃមួយចំនួនដែលបានផ្សព្វផ្សាយក្នុងចេតនាចោទប្រកាន់ និងបង្ខូចកេរ្តិ៍ឈ្មោះកម្ពុជា ថាបានប្រើប្រាស់និងដាក់មីនថ្មី ខណៈកម្ពុជាប្រឹងប្រែងលុបបំបាត់គ្រាប់មីន និងទុក្ខវេទនារបស់សហគមន៍ ដែលបង្កឡើងដោយមីន និងសំណល់ជាតិផ្ទុះពីសង្គ្រាម ព្រមទាំងទទួលបានការវាយតម្លៃខ្ពស់ពីសហគមន៍អន្តរជាតិ ថាជាប្រទេសគំរូ និងឈានមុខក្នុងវិស័យសកម្មភាពមីនសាកល ។ ការចោទប្រកាន់គ្មានមូលដ្ឋាននេះ ប៉ះពាល់ដល់កិច្ចខិតខំប្រឹងប្រែងនៃក្រុមការងារសម្របសម្រួលរួម (JCTF) ដែលបានបង្កើតឡើងដោយប្រទេសទាំងពីរ ដើម្បីជំរុញការបោសសម្អាតមីនមនុស្សធម៌ និងបង្កើនទំនុកចិត្តរវាងគ្នានៅតាមបណ្តោយព្រំដែន ។

កាលពីថ្ងៃទី៨ ខែវិច្ឆិកា ក្រសួងការពារជាតិកម្ពុជាបានចេញសេចក្តីប្រកាសព័ត៌មានពីវឌ្ឍនភាពការងារដោះមីនមនុស្សធម៌ក្នុងតំបន់អាទិភាពនៅព្រំដែនកម្ពុជា-ថៃ ដែលក្នុងសេចក្តីប្រកាសព័ត៌មាននេះមាន៦ចំណុចលម្អិតពីការងារសំខាន់ៗនៃការដោះមីនរវាងកម្ពុជា-ថៃ ។ ក្រសួងការពារជាតិកម្ពុជាបញ្ជាក់ថា ការដោះមីនមនុស្សធម៌តាមបណ្តោយព្រំដែនកម្ពុជា-ថៃ ត្រូវស្ថិតក្រោមសមត្ថកិច្ច និងយន្តការក្រុមការងារសម្របសម្រួលចម្រុះកម្ពុជា-ថៃ (JCTF) មិនអនុញ្ញាតឱ្យធ្វើប្រតិបត្តិការដោះមីនមនុស្សធម៌ជាឯកតោភាគីឡើយ ។ កម្ពុជា-ថៃ ត្រូវគោរពគោលការណ៍ឯកភាពគ្នា និងនិយាមនីតិវិធីប្រតិបត្តិ (Standard Operating Procedures-SOP) ដែលធ្វើឡើងកាលពីថ្ងៃទី២៣ ខែតុលា ឆ្នាំ២០២៥ ៕

ប្រទេសថៃ៖ អតីតមេទ័ពល្មោ.ភសង្រ្គាមរបស់ថៃ ប៊ុនសុីន ផាត់ក្លាង បានរៀបរាប់ពីថ្ងៃនៃការប៉ះទង្គិចគ្នាជាមួយកម្ពុជាដំបូងនៅតំបន់ប្រាសាទតាមាន់ធំថា គឺជាថ្ងៃដែលខ្លួនមានអារម្មណ៍ថាពេញចិត្ត និងរីករាយបំផុតក្នុងជីវិត ព្រោះមានសិទ្ធិបា.ញ់ប្រហា.រលើទាហានខ្មែរបានយ៉ាងពេញលេញ។ នេះបើតាមការចុះផ្សាយរបស់សារព័ត៌មាន Khaosod នៅព្រឹកថ្ងៃពុធនេះ។

ក្នុងអំឡុងពេលចូលរួមកម្មវិធីពិសេសមួយដែលមានចំណងជើងថា ‘DNA ថៃ បេះដូងសម្រាប់ទឹកដី’ តាមការអញ្ជើញរបស់អង្គការរដ្ឋបាលខេត្តភូកេត (PAO) ទីប្រឹក្សាអគ្គមេបញ្ជាការកងទ័ពភូមិន្ទថៃ និងជាអតីតមេទ័ពភូមិភាគ២ ប៊ុនសុីន ផាត់ក្លាង បានរៀបរាប់ពីអារម្មណ៍របស់ខ្លួនជុំវិញការប៉ះទង្គិចគ្នាជាមួយកម្ពុជាកាលពីចុងខែកក្កដា និងបំភ្លៃការពិតថា គ្រប់យ៉ាងកើតចេញពីការញុះញង់របស់កម្ពុជា។

អតីតមេទ័ពរូបនេះបានថ្លែងថា «កងទ័ពថៃតែងតែចង់រុញច្រានទាហានខ្មែរចេញពីតំបន់ប្រាសាទយូរមកហើយ ប៉ុន្តែតើយើងអាចរុញច្រានសត្រូវចេញដោយរបៀបណា រហូតដល់ពួកគេញុះញង់យើងជាមុនសិន ដោយបង្ហាញសកម្មភាពរបស់ពួកគេនៅប្រាសាទតាមាន់ធំ? ដូច្នេះ យើងបានសម្រេចចិត្តបិទប្រាសាទតាមាន់ធំ ។ សកម្មភាពនេះបានធ្វើឲ្យទាហានខ្មែរមិនសប្បាយចិត្ត ហើយក៏បានបាញ់ប្រ.ហារទៅលើទាហានថៃមុនតែម្ដង។

លោក ប៊ុនសុីន រៀបរាប់បន្ថែមថា « ថ្ងៃនោះ លោកបានក្លាយជាមនុស្សដែលមានសុភមង្គល និងពេញចិត្តបំផុតក្នុងជីវិតរបស់គាត់ គឺថ្ងៃដែលទាហានខ្មែរបា.ញ់មកលើយើងមុន ពីព្រោះបន្ទាប់មកយើងអាចមានសិទ្ធិបាញ់តបទៅពួកគេវិញ។ លោកបន្តថា «ខ្ញុំតែងស៊ូទ្រាំនឹងការស្ដីបន្ទោសពីពលរដ្ឋថៃ សួរថាតើជើងទាហានថៃប៉ុន្មាននាក់ទៀតដែលត្រូវបាត់បង់? វាពិតជាពិបាកក្នុងខ្លួនខ្លាំងណាស់ ខ្ញុំមិនដឹងត្រូវធ្វើអ្វីនោះទេ។ ប៉ុន្តែនៅថ្ងៃនោះ ខ្ញុំពិតជាបានធូរចិត្តខ្លាំងណាស់ ក្រោយបានបំពេញកាតព្វកិច្ចរបស់ខ្ញុំ តំណាងឲ្យប្រជាជនថៃទាំង ៧០លាននាក់ ក្នុងការការពារអធិបតេយ្យជាតិ។»

ការរៀបរាប់ពីអារម្មណ៍ ដែលប្រៀបដូចជាការនិពន្ធសាច់រឿងរបស់លោក ប៊ុនសុីន ដូចខាងលើនេះបានធ្វើប្រជាជនថៃ ជាពិសេសអ្នកដែលគាំទ្រអតីតមេទ័ពរូបនេះ កោតសរសើពីមនសិកាស្នេហាជាតិ និងឆន្ទៈរបស់លោកពេញទំហឹង។

យ៉ាងណាក៏ដោយ នៅជ្រុងម្ខាងទៀតមនុស្សជាច្រើនបានយល់ឃើញថា ពាក្យសម្ដីទាំងនេះ គឺមិនស័ក្តិសមនឹងនិយាយចេញមកជាសាធារណៈបែបនេះឡើយ ដោយវាកំពុងតែបង្ហាញថា ប្រទេសថៃមិនអាចរកដំណោះស្រាយណាដែលសមស្របសម្រាប់ដោះស្រាយបញ្ហាបានក្រៅពីអំពើហិង្សា ហើយប្រជាជនថៃមានមោទនភាពចំពោះការធ្វើសង្រ្គាម ដែលទាំងទាំងនេះជាអ្វីដែលអន្តរជាតិកំពុងព្យាយាមទប់ស្កាត់។

តាមការកត់សម្គាល់ ក្រោយអស់តំណែងជាមេបញ្ជាការកងទ័ព ប៊ុនសុីន ផាត់ក្លាង តែងត្រូវបានគេអញ្ជើញឲ្យទៅចូលរួមកម្មវិធីសាធារណៈជាច្រើន ហើយមិនថាក្នុងកម្មវិធីណានោះទេ ប៊ុនសុីន មិនដែលភ្លេចអួតអាងពីភាពខ្លាំងរបស់ខ្លួនកាលពេលប្រយុទ្ធគ្នាជាមួយកម្ពុជាឡើយ។ ហេតុនេះយើងអាចវាយតម្លៃបានយ៉ាងខ្លីថា អតីតមេទ័ពរូបនេះ ពេញចិត្តនឹងការលើកសរសើពីមនុស្សជុំវិញខ្លួនជាខ្លាំង៕