ប្រទេសថៃ ៖ បន្ទាប់ពីកម្ពុជា-ថៃអនុវត្តតាមកិច្ចព្រមព្រៀងសន្តិភាពមិនយូរប៉ុន្មាន ភាគីថៃក៏ប្រឌិតរឿងកងទ័ពខ្លួនជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ដើម្បីយកលេសឈប់អនុវត្តកិច្ចព្រមព្រៀងសន្តិភាព និងចាប់ផ្តើមបង្កជម្លោះ លាបពណ៌កម្ពុជាជាថ្មី ។ នៅថ្ងៃទី១១ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ លោក Anutin Charnvirakul បានបញ្ជាឱ្យក្រសួងការពារជាតិ និងក្រសួងការបរទេសឈប់អនុវត្តកិច្ចព្រមព្រៀងសន្តិភាព បញ្ឈប់ការចរចា និងបើកដៃឱ្យកងទ័ពចាត់ការរឿងព្រំដែន ។

អ្នកនាំពាក្យរដ្ឋាភិបាលថៃ លោក Siripong Angkasakulkiat និយាយនៅថ្ងៃទី១១ ខែវិច្ឆិកាថា លោកនាយករដ្ឋមន្ត្រី Anutin សោកស្តាយយ៉ាងខ្លាំងចំពោះហេតុការណ៍កងទ័ពថៃជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ។ លោកបញ្ជាឱ្យក្រសួងការពារជាតិ និងក្រសួងការបរទេសឈប់អនុវត្តកិច្ចព្រមព្រៀងសន្តិភាពដែលចុះហត្ថលេខានៅទីក្រុងកូឡាឡាំពួរ ហើយងាកមកបង្កើនវិធានការសន្តិសុខតាមព្រំដែន និងការពារសុវត្ថិភាពពលរដ្ឋ ។

លោក Siripong បាននិយាយពីលទ្ធផលកិច្ចប្រជុំក្រុមប្រឹក្សាសន្តិសុខជាតិកាលពីព្រឹកថ្ងៃទី១១ ខែវិច្ឆិកា ដែលដឹកនាំដោយនាយករដ្ឋមន្ត្រីថៃ ថា ក្រុមប្រឹក្សាសន្តិសុខជាតិសម្រេចឱ្យស្ថាប័នពាក់ព័ន្ធ រួមមាន ៖ ក្រសួងការពារជាតិ និងក្រសួងការបរទេសឈប់អនុវត្តតាមសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព (Joint Declaration) ដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី រហូតដល់ស្ថានការណ៍ធូរស្រាល ។ នាយករដ្ឋមន្ត្រីថៃបានបញ្ជាឱ្យក្រសួងការពារជាតិរឹតបន្តឹងវិធានការកងទ័ពដើម្បីការពារអធិបតេយ្យ និងសុវត្ថិភាពពលរដ្ឋនៅព្រំដែន ។

ក្រៅពីនេះ នាយករដ្ឋមន្ត្រីថៃបញ្ជាឱ្យក្រសួងការបរទេសចាត់វិធានការការទូតឱ្យពិភពលោកយល់ពីមូលហេតុដែលថៃឈប់អនុវត្តកិច្ចព្រមព្រៀងសន្តិភាព ជាពិសេស បណ្តាប្រទេសសង្កេតការណ៍ ព្រមទាំងបញ្ជាឱ្យក្រសួងមហាផ្ទៃជូនដំណឹងទៅពលរដ្ឋនៅខេត្តជាប់ព្រំដែនទាំង៧ ត្រៀមខ្លួនពេលកើតហេតុការណ៍បន្ទាន់ ខណៈក្រសួងអប់រំត្រូវបង្ហាត់កូនសិស្សឱ្យត្រៀមខ្លួន ។ រីឯក្រសួងសុខាភិបាលក៏ត្រៀមខ្លួនដែរ ករណីពលរដ្ឋនៅខេត្តជាប់ព្រំដែនមានបញ្ហា គឺត្រៀមគ្រូពេទ្យ និងការពារមន្ទីរពេទ្យឱ្យរងផលប៉ះពាល់តិចតួចបំផុត ជាពិសេស ការជម្លៀសអ្នកជំងឺ ។

គួរបញ្ជាក់ថា ថៃបានសម្តែងល្ខោនរឿងកងទ័ពជាន់មីនដើម្បីទម្លាក់កំហុស និងលាបពណ៌កម្ពុជាពេលស្ថានការណ៍ស្ងប់ស្ងាត់ ដែលការសម្តែងល្ខោននេះដើម្បីយកលេសមិនដោះលែងវីរកងទ័ពកម្ពុជាទាំង១៨រូប ដែលកងទ័ពថៃចាប់ខ្លួនដោយខុសច្បាប់ និងឈប់អនុវត្តកិច្ចព្រមព្រៀងសន្តិភាព ជាការផ្តួចផ្តើមគំនិតដោយប្រធានាធិបតីអាមេរិក លោក Donald Trump ។ ពលរដ្ឋថៃបន្ទោសនាយករដ្ឋមន្ត្រីរបស់ខ្លួនដែលចុះកិច្ចព្រមព្រៀងសន្តិភាពជាមួយកម្ពុជា ទាំងដែលកងទ័ពថៃពុំទាន់ដណ្តើមបានទឹកដីកម្ពុជានៅឡើយ ហើយការឈប់អនុវត្តកិច្ចព្រមព្រៀងសន្តិភាពទទួលបានការសាទរយ៉ាងខ្លាំងពីសង្គមថៃ ។

ថៃមិនដោះលែងវីរកងទ័ពកម្ពុជា យើងគួរទុកឱ្យសហគមន៍អន្តរជាតិជួយតាមដានទង្វើរបស់ថៃ ពីព្រោះថៃកែប្រែពាក្យសម្តីរហូតមក ម្តងថាដោះលែង ម្តងមិនដោះលែង ថៃដាក់លក្ខខណ្ឌអស់ពីមួយ ចូលលក្ខខណ្ឌមួយទៀត ពេលកម្ពុជាអនុវត្តតាមលក្ខខណ្ឌ ថៃក៏ប្រឌិតរឿងកងទ័ពជាន់មីន ដោយពួកគេបានប្រើគ្រប់ល្បិច ។ យើងត្រូវរួមគ្នាអំពាវនាវឱ្យសហគមន៍អន្តរជាតិដឹងឮ ជាពិសេស ប្រធានាធិបតីអាមេរិក លោក Donald Trump ដើម្បីជួយអន្តរាគមន៍ឱ្យថៃដោះលែងវីរកងទ័ពកម្ពុជាជាបន្ទាន់ និងឱ្យថៃគោរពកិច្ចព្រមព្រៀងសន្តិភាព ៕

ប្រទេសថៃ៖ អនុរដ្ឋមន្រ្តីក្រសួងការពារជាតិថៃ លោក ណាត់ថានផន ណាក់ផានិត បាននិយាយបន្ទាប់ពីកិច្ចប្រជុំដ៏តានតឹងជាមួយរដ្ឋមន្រ្តីនៅមុននេះបន្តិចថា ប្រទេសថៃនឹងបើកភ្លើងខៀវដល់យោធាក្នុងការដោះស្រាយស្ថានការណ៍ព្រំដែនកម្ពុជា-ថៃ ទៅតាមការចាំបាច់ ដោយនឹងមិនចរចាអ្វីទៀតនោះទេប្រសិនបើកម្ពុជាមិនទទួលខុសត្រូវចំពោះទាហានថៃដែលរងរបួសដោយសារគ្រាប់មីន។ នេះបើតាមសារព័ត៌មាន Khaosod ។

បន្ទាប់ពីសម្រេចផ្អាកការអនុវត្តសេចក្ដីថ្លែងការណ៍រួមរវាងកម្ពុជា-ថៃ ដែលបានចុះហត្ថលេខាកាលពីចុងខែតុលាកន្លងមក ពេលនេះក្រុមប្រឹក្សាសន្តិសុខជាតិរបស់ថៃបានប្រជុំសម្រេចថានឹងផ្ដល់សិទ្ធិដល់យោធា ក្នុងការចាត់វិធានការចាំបាច់ដើម្បីដោះស្រាយបញ្ហាព្រំដែនជាមួយកម្ពុជា។ លោក ណាត់ថានផន ណាក់ផានិត បាននិយាយថា ប្រទេសថៃមាននីតិវិធីសម្រាប់ការប្រើប្រាស់កម្លាំង រួមទាំងការព្រមាន និងការបាញ់ប្រហារចាប់ពីអាវុ.ធធុនស្រាល រហូតដល់អាវុធធ្ងន់ ប៉ុន្តែលោកបានបដិសេធសុំមិនពន្យល់លម្អិត។

លោកបន្ថែមថា ប្រតិបត្តិការយោធាថៃ នឹងធ្វើឡើងនៅក្នុងដែនអធិបតេយ្យភាពរបស់ថៃ ដោយយោធាថៃ នឹងអនុវត្តទៅតាមស្ថានភាពជាក់ស្តែង ហើយកិច្ចពិភាក្សាអន្តរជាតិ នឹងត្រូវធ្វើឡើងទៅតាមនីតិវិធី នៃច្បាប់អន្តរជាតិ។

ជាមួយគ្នានេះផងដែរ ក្រសួងការបរទេសថៃ ក៏កំពុងរៀបចំពាក្យបណ្តឹង ដើម្បីប្តឹងកម្ពុជា ដោយជំរុញឱ្យកម្ពុជាទទួលខុសត្រូវ និងសុំទោសទាហានថៃដែលរងរបួស ប្រសិនបើកម្ពុជាចង់វិលត្រឡប់ទៅរកសភាពដើមឡើងវិញ ដោយជំហរអនាគតរបស់ថៃម្តងនេះ អាស្រ័យលើគោលជំហររបស់កម្ពុជាហើយ ពោលគឺស្ថានការណ៍នឹងធូរស្រាល ឬកាន់តែតានតឹង គឺថៃនឹងរង់ចាំមើលទង្វើរបស់កម្ពុជា។

បន្ថែមលើនោះ លោក ស៊ីហាសាក់ ភួងកេតកែវ រដ្ឋមន្ត្រីក្រសួងការបរទេសថៃ បានថ្លែងថា ប្រទេសថៃ បានផ្អាកជាផ្លូវការហើយ ដោយថៃនឹងមិនអនុវត្តទៅតាម “កិច្ចព្រមព្រៀងសន្តិភាព” ដែលបានចុះហត្ថលេខារួមគ្នា នៅប្រទេសម៉ាឡេស៊ីនោះឡើយ ដើម្បីបញ្ឈប់នូវការបញ្ជូនកងទ័ពកម្ពុជាទាំង ១៨រូបត្រឡប់មកកម្ពុជាវិញ»។

យ៉ាងណាមិញ តាមសេចក្ដីថ្លែងការណ៍របស់រាជរដ្ឋាភិបាលកម្ពុជា បានគូសបញ្ជាក់យ៉ាងច្បាស់ថា កម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ដែលថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។ ចាប់តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។

រាជរដ្ឋាភិបាលកម្ពុជា ក៏បានបង្ហាញការព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ក្នុងការផ្អាកការអនុវត្តសេចក្តីថ្លែងការណ៍រួម ប៉ុន្តែកម្ពុជា នឹងនៅតែបន្តប្តេជ្ញាចិត្តក្នុងការធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕

រាជធានីភ្នំពេញ៖ ក្រសួងការពារជាតិកម្ពុជា អំពាវនាវឱ្យភាគីថៃដើរល្បាតតាមគន្លងត្រាយចាស់ឲ្យបានត្រឹមត្រូវ ចៀសវាងការដើរល្បាតចូលក្នុងតំបន់ចម្ការមីនចាស់ៗ ជាពិសេសតំបន់ដែលត្រូវបានអន្តរជាតិទទួលស្គាល់ថាជាចម្ការមីនដែលជាសំណល់ពីសង្គ្រាម ដើម្បីចៀសវាងគ្រោះថ្នាក់ដោយសារការផ្ទុះមីនចាស់ទាំងនេះ ដែលអាចបង្កឱ្យមានភាពតានតឹងដោយមិនចាំបាច់។

បើតាមប្រសាសន៍របស់លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា នៅថ្ងៃទី១១ ខែវិច្ឆិការ នេះបានឲ្យដឹងថា ក្រសួងការពារជាតិកម្ពុជា សូមសម្តែងការសោកស្តាយចំពោះឧបទ្ទវហេតុនៃការផ្ទុះគ្រាប់មីនដែលបណ្តាលឱ្យកងទ័ពថៃមួយចំនួនរងរបួសនៅពេលដើរល្បាតចូលតំបន់ចម្ការមីនចាស់ដែលបន្សល់ទុកពីសង្គ្រាមស៊ីវិលរបស់កម្ពុជា កាលពីថ្ងៃទី១០ ខែវិច្ឆិកា ឆ្នាំ២០២៥។ ជាមួយគ្នានេះ ក្រសួងការពារជាតិកត់សម្គាល់ឃើញថា ចាប់តាំងពីថ្ងៃម្សិលមិញរហូតមកដល់ថ្ងៃនេះ បណ្តាសារព័ត៌មានរបស់ថៃមួយចំនួនបានចេញផ្សាយដោយដកស្រង់សម្តីថ្នាក់ដឹកនាំប្រទេសថៃ និងមន្ត្រីនៃកងយោធាថៃដែលបានចោទប្រកាន់មកលើកម្ពុជាថាបានដាក់គ្រាប់មីនថ្មី និងបណ្តាលឱ្យយោធារបស់ខ្លួនជាន់ផ្ទុះ និងរងរបួសធ្ងន់ នៅខេត្តព្រះវិហារ។ ក្រសួងការពារជាតិ នៃព្រះរាជាណាចក្រកម្ពុជា សូមប្រកាសបដិសេធការចោទប្រកាន់ទាំងនេះរបស់ភាគីថៃមកលើកម្ពុជា។

ក្រសួងការពារជាតិ សូមបញ្ជាក់យ៉ាងមុតមាំថា ចាប់តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។

ជាការពិតណាស់ បើទោះបីជាមានកិច្ចខិតខំប្រឹងប្រែង ក្នុងការបោសសម្អាតមីនអស់រយៈពេលជាច្រើនទសវត្សរ៍កន្លងមកនេះក៏ដោយ គ្រាប់មីនមិនទាន់ផ្ទុះដែលជាសំណល់ពីសង្គ្រាមនៅតែបន្តគំរាមកំហែងដល់សន្តិសុខ និងសុវត្ថិភាពប្រជាជនស្លូតត្រង់កម្ពុជានៅតាមតំបន់ជាច្រើន ជាពិសេសនៅតាមតំបន់ព្រំដែនកម្ពុជា និងប្រទេសជិតខាង ក្នុងនោះរួមទាំងថៃផងដែរ។ ក្នុងន័យនេះ ក្រសួងការពារជាតិអំពាវនាវឱ្យភាគីថៃចៀសវាងការដើរល្បាតចូលក្នុងតំបន់ចម្ការមីនចាស់ៗ ជាពិសេសតំបន់ដែលត្រូវបានអន្តរជាតិទទួលស្គាល់ថាជាចម្ការមីនដែលជាសំណល់ពីសង្គ្រាម ដើម្បីចៀសវាងគ្រោះថ្នាក់ដោយសារការផ្ទុះមីនចាស់ទាំងនេះ ដែលអាចបង្កឱ្យមានភាពតានតឹងដោយមិនចាំបាច់។

សូមជម្រាបជូនផងដែរថា យោងតាមព័ត៌មានដែលទទួលបានពីយោធភូមិភាគទី៤ របស់កម្ពុជា បានបញ្ជាក់ថាក្រោយពេលកើត ហេតុរួចកងកម្លាំងទាំងសងខាងដែលនៅជួរមុខបានធ្វើការទំនាក់ទំនងគ្នា ហើយគិតមកដល់ម៉ោងនេះសភាពការណ៍មានភាពស្ងប់ស្ងាត់មិនមានភាពតានតឹងទេ។

ក្រសួងការពារជាតិ នៃព្រះរាជាណាចក្រកម្ពុជា បន្តប្តេជ្ញាចិត្តក្នុងការធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕

ឥណ្ឌូណេសុីបាតុកម្ម, កម្ពុជា-ថៃឈ្លោះគ្នា, ហ្វីលីពីនជួបគ្រោះធម្មជាតិ និងបញ្ហាមួយចំនួនរបស់ប្រទេសក្នុងតំបន់ផ្សេងទៀត បានជំរុញឲ្យវៀតណាមក្លាយជាគោលដៅទេសចរណ៍ដែលល្អបំផុតតែមួយគត់នៅអាសុីអាគ្នេយ៍ និងទទួលបានផលចំណេញយ៉ាងច្រើនលើសលប់។ គេរំពឹងថា វៀតណាមនឹងទទួលបានភ្ញៀវទេសចរចន្លោះពី ២២ ទៅ ២៥ លាននាក់ ក្នុងឆ្នាំ២០២៥ នេះ។

យោងតាមអត្ថបទព័ត៌មានរបស់គេហទំព័រ Nikkei Asia កាលពីថ្ងៃទី ៧ វិច្ឆិកា ២០២៥ បានឲ្យដឹងថា ឧស្សាហកម្មទេសចរណ៍របស់វៀតណាមកំពុងជួបប្រទះនឹងការងើបឡើងវិញយ៉ាងឆាប់រហ័ស ខណៈដែលចំនួនភ្ញៀវទេសចរចិនកើនឡើងខ្ពស់គួរឲ្យកត់សម្គាល់ ដែលជាការងើបឡើងវិញដ៏ខ្លាំងបំផុតមួយចាប់តាំងពីជំងឺរាតត្បាត។ មន្ត្រីវៀតណាមបាននិយាយថា ការកើនឡើងយ៉ាងខ្លាំងនៃភ្ញៀវទេសចរ ជាពិសេសជនជាតិចិននេះ បានផ្តល់ការជំរុញយ៉ាងខ្លាំងដល់អាជីវកម្មក្នុងស្រុក សណ្ឋាគារ និងគោលដៅទេសចរណ៍ដ៏ពេញនិយមទូទាំងប្រទេស។

អ្នកជំនាញឧស្សាហកម្មទេសចរណ៍ បានកត់សម្គាល់ពីការកើនឡើងនេះថា ភ្ញៀវទេសចរជាច្រើនកំពុងជ្រើសរើសប្រទេសវៀតណាមសម្រាប់គោលដៅទេសចរណ៍របស់ពួកគេ ជាជាងប្រទេសជិតខាងវៀតណាមផ្សេងទៀតដោយសារតែបញ្ហាដែលកំពុងបន្ត។

របាយការណ៍មួយបានគូសបញ្ជាក់ថា ភាពមិនប្រាកដប្រជាខាងនយោបាយនៅក្នុងប្រទេសថៃ, ជម្លោះព្ដែនរវាងកម្ពុជានិងថៃ, ហេដ្ឋារចនាសម្ព័ន្ធមានកម្រិតនៅក្នុងប្រទេសឡាវ, ការបាតុកម្មនៅប្រទេសឥណ្ឌូណេសុី, គ្រោះធម្មជាតិនៅហ្វីលីពីន និងបញ្ហាមួយចំនួនរបស់ប្រទេសក្នុងតំបន់ដទៃទៀត គឺជាចំណែកដ៏ធំមួយ ដែលផ្ដល់ក្ដីកង្វល់ដល់ភ្ញៀវទេសចរ។

យ៉ាងណាក៏ដោយ គេក៏ទទួលស្គាល់ផងដែរថា កំណើននេះក៏អាចបណ្ដាលមកពីគោលនយោបាយរបស់វៀតណាម ក្នុងការកែសម្រួលទិដ្ឋាការឲ្យប្រសើរឡើងសម្រាប់ភ្ញៀវទេសចរ ការតភ្ជាប់ជើងហោះហើរដែលបានស្តារឡើងវិញ និងការផ្សព្វផ្សាយទេសចរណ៍យ៉ាងទូលំទូលាយ។

យោងតាមរដ្ឋបាលទេសចរណ៍ជាតិវៀតណាម ប្រទេសចិនឥឡូវនេះបានដណ្តើមយកតំណែងកំពូលរបស់ខ្លួនមកវិញ ជាទីផ្សារទេសចរណ៍ដ៏ធំបំផុតមួយរបស់ប្រទេសវៀតណាម ដោយផ្លូវហោះហើរ និងកញ្ចប់ទេសចរណ៍នៅក្នុងប្រទេសវៀតណាមកំពុងពង្រីកខ្លួនយ៉ាងឆាប់រហ័ស ដើម្បីបំពេញតម្រូវការដែលកំពុងកើនឡើង៕

ទីក្រុងបាងកក៖ លោក ប៊ុនស៊ីន ផាត់ក្លាង អតីតមេទ័ពភូមិភាគ២ បាននិយាយលាងខ្លួន និងបង្វែរសាច់រឿងឡើងវិញ ក្រោយពីគណៈកម្មាធិការកិច្ចការយោធា និងសន្តិសុខរដ្ឋនៃព្រឹទ្ធសភាថៃបានកោះហៅឲ្យចូលខ្លួនមកបំភ្លឺអំពីការលើកឡើងរបស់ខ្លួន ទាក់ទងនឹងបទបញ្ជាអាថ៌កំបាំងពីថ្នាក់លើឲ្យលោកបញ្ឈប់ការប្រយុទ្ធជាមួយកម្ពុជា ដែលឥឡូវនេះកំពុងធ្វើឲ្យពលរដ្ឋថៃខឹ.ងសម្បារជាខ្លាំង។

យោងតាមសារព័ត៌មាន The Nation នៅថ្ងៃទី១០ ខែវិច្ឆកា បានឲ្យដឹងថា លោក Somjate Boonthanom ប្រធានគណៈកម្មាធិការកិច្ចការយោធា និងសន្តិសុខរដ្ឋនៃព្រឹទ្ធសភាថៃបាននិយាយថា លោក ប៊ុនស៊ីន ផាត់ក្លាង នឹងត្រូវចូលរួមក្នុងកិច្ចប្រជុំសង្ខេបមួយ ដើម្បីបកស្រាយពីអ្វីដែលខ្លួនបានលើកឡើងជាសាធារណៈកាលពីថ្ងៃសៅរិ៍ ជុំវិញអ្វីដែលលោកហៅថា «បទបញ្ជាឈប់បា.ញ់សម្ងាត់» ពីថ្នាក់លើអាថ៌កំបាំងម្នាក់ ដែលបញ្ជាឱ្យលោកឈប់ប្រយុទ្ធត្រឹមតែប្រាំមួយម៉ោងបន្ទាប់ពីការប៉ះទង្គិចគ្នាលើកដំបូងកាលពីថ្ងៃទី 24 ខែកក្កដា។

ការហៅលោក ប៊ុនសុីន មកបំភ្លឺដូច្នេះ គឺដើម្បីបកស្រាយបញ្ជាក់ថាតើវាជាការពិតឬយ៉ាងណា ព្រោះឥឡូវនេះមហាជនថៃជាច្រើនកំពុងមានការខឹ.ងសម្បារនឹងបុគ្គលរូបនោះយ៉ាងខ្លាំង ដោយពួកគេចង់ដឹងច្បាស់ថា តើថ្នាក់លើដែលបញ្ជាឲ្យលោក ប៊ុនសុីន ឈប់ប្រយុទ្ធជាមួយកម្ពុជានោះគឺជាអ្នកណា? ហេតុអ្វីចង់បញ្ឈប់វិរៈបុរសរបស់ពួកគេពីការការពារអធិបតេយ្យជាតិបែបនេះ?

លោក Somjate បានបញ្ជាក់ថាគោលដៅរបស់គណៈកម្មាធិការដែលកោះហៅលោក ប៊ុនសុីន មកបំភ្លឺ គឺដើម្បីធានាបាននូវតម្លាភាព លាតត្រដាងការពិត និងការពារការភាន់ច្រឡំក្នុងចំណោមសាធារណជន ខណៈការអះអាងណាមួយដែលទាក់ទងនឹងបញ្ជាការយោធាក្នុងអំឡុងពេលប្រតិបត្តិការសកម្មគឺមានភាពរសើបខ្លាំង ហើយអាចប៉ះពាល់ដល់សន្តិសុខជាតិ។

ក្រោយត្រូវបានសួរនាំដេញដោល អតីតមេភូមិភាគ២បែរជាក្រឡាស់សម្ដីថា ខ្លួនមិនទទួលបញ្ជាពីនរណាឡើយ ហើយប្រាប់ទៅពលរដ្ឋថៃឲ្យបំភ្លេចអតីតកាល រួមទាំងអ្វីដែលលោកបាននិយាយចោលទៅ ដោយផ្តោតលើតែបច្ចុប្បន្ន និងអនាគត ជាជាងការគិតអំពីព្រឹត្តិការណ៍ការប៉ះទង្គិចគ្នាតាមព្រំដែនកាលពីខែកក្កដាកន្លងទៅអី នាំតែស្មុគស្មាញនិងមិនសប្បាយចិត្ត។

ការនិយាយបាតដៃ ខ្នងដៃរបស់ ប៊ុនសុីន ផាត់ក្លាង បង្ហាញថាអតីតមេទ័ពល្មោ.ភសង្រ្គា.មរូបនេះ ហាក់កំពុងព្យាយាមទាញយកប្រជាប្រិយភាពពីប្រជាពលរដ្ឋថៃ ឲ្យចាត់ទុកខ្លួនគឺជាកំពូលមេទ័ពដ៏ខ្លាំងក្លាមួយរូប ខណៈទម្លាក់កំហុសទាំងស្រុងទៅលើរដ្ឋាភិបាលខ្លួនតាមរយៈការប្រកាសដោយគ្មានមូលដ្ឋានច្បាស់លាស់៕

ប្រទេសថៃ ៖ ក្រោយពីថៃប្រឌិតរឿងកងទ័ពជាន់មីនបណ្តាលឱ្យរងរបួសពេលដើរល្បាតនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត កាលពីថ្ងៃទី១០ ខែវិច្ឆិកា ឆ្នាំ២០២៥ និងចោទប្រកាន់កម្ពុជាបង្កប់មីនថ្មី នាយករដ្ឋមន្ត្រីថៃ លោក Anutin Charnvirakul ប្រកាសថា ថៃនឹងមិនបន្តសុពលភាពប័ណ្ណការងារឱ្យពលករខ្មែរជិត១សែននាក់ទេ ពីព្រោះបារម្ភពីអសន្តិសុខ និងឧក្រិដ្ឋ.កម្មឆ្លងដែន ។ ជាមួយគ្នានេះ រដ្ឋមន្ត្រីក្រសួងការងារថៃត្រៀមបន្តសុពលភាពប័ណ្ណការងារឱ្យពលករមកពី៣ប្រទេសធ្វើការនៅថៃបន្ត មុនពេលបណ្តេញពលករខ្មែរ ។

រដ្ឋមន្ត្រីក្រសួងការងារថៃ អ្នកស្រី Trinuch Thienthong នឹងដាក់លិខិតទៅគណៈរដ្ឋមន្ត្រីដើម្បីបន្តសុពលភាពប័ណ្ណការងារពលករមកពីប្រទេសវៀតណាម មីយ៉ាន់ម៉ា និងឡាវ ដើម្បីឱ្យធ្វើការនៅថៃដោយស្របច្បាប់ រីឯពលករខ្មែរដែលមានប័ណ្ណការងារផុតសុពលភាព ក្រសួងការងារថៃនឹងពិភាក្សាជាមួយស្ថាប័នសន្តិសុខ មុនពេលបណ្តេញចេញពីប្រទេសថៃ ។ នេះបើតាមការចុះផ្សាយរបស់សារព័ត៌មាន The Reporters នៅថ្ងៃទី១១ ខែវិច្ឆិកា ឆ្នាំ២០២៥ ។

នាថ្ងៃទី១១ ខែវិច្ឆិកា នៅវិមានរដ្ឋាភិបាល រដ្ឋមន្ត្រីក្រសួងការងារ អ្នកស្រី Trinuch បានផ្តល់សម្ភាសន៍ជាមួយសារព័ត៌មានពីចំណាត់ការលើពលករខ្មែរនៅថៃ ក្រោយពីថៃប្រឌិតរឿងកងទ័ពជាន់មីនដាច់ជើងនិងរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ថា ហេតុការណ៍កងទ័ពថៃជាន់មីនបានប៉ះពាល់ដល់ពលករខ្មែរ ជាពិសេស ពលករខ្មែរធ្វើការផ្នែកកសិកម្ម ។ យើងនឹងស្វែងរកពលករវៀតណាម មីយ៉ាន់ម៉ា និងឡាវ មកធ្វើការជំនួសពលករខ្មែរនៅកន្លែងខ្វះខាត ដោយមានកិច្ចប្រជុំគណៈរដ្ឋមន្ត្រីនៅថ្ងៃទី១១នេះ ។

អ្នកស្រីបន្តថា ការបណ្តេញពលករខ្មែរចេញពីប្រទេសថៃ គឺពាក់ព័ន្ធនឹងការសម្រេចចិត្តរបស់ស្ថាប័នជាច្រើន ជាពិសេស ស្ថាប័នសន្តិសុខ ដែលត្រូវពិភាក្សាក្នុងកិច្ចប្រជុំគណៈរដ្ឋមន្ត្រី ។ ពេលនេះ យើងត្រៀមបន្តសុពលភាពប័ណ្ណការងារពលករវៀតណាម មីយ៉ាន់ម៉ា និងឡាវ ដើម្បីធ្វើការនៅថៃបន្ត ខណៈការងារផ្នែកកសិកម្មនឹងរងផលប៉ះពាល់ ជាពិសេស ការងារកាត់ដើមអំពៅ ដោយសារពលករខ្មែរភាគច្រើនធ្វើការក្នុងផ្នែកនេះ រីឯការងារនេសាទមិនប៉ះពាល់ទេ ។

បច្ចុប្បន្ន ពលករខ្មែរធ្វើការនៅថៃស្មើជិត១សែននាក់ ក្នុងនោះពលករខ្មែរប្រមាណ៩ម៉ឺននាក់ធ្វើការស្របច្បាប់ ប៉ុន្តែប័ណ្ណការងារផុតសុពលភាពដោយសារបិទច្រកព្រំដែន ទើបធ្វើឱ្យពួកគេមិនអាចធ្វើដំណើរទៅប្រទេសវិញ ក្រសួងការងារថៃនឹងពិភាក្សាជាមួយស្ថាប័នពាក់ព័ន្ធ រួមទាំងស្ថាប័នសន្តិសុខ មុនពេលបណ្តេញពលករខ្មែរដែលមានប័ណ្ណការងារផុតសុពលភាព ។ លោកនាយករដ្ឋមន្ត្រី Anutin គាំទ្រចំណាត់ការរបស់ក្រសួងការងារក្នុងការស្វែងរកពលករមកពីប្រទេសផ្សេងៗ ព្រមទាំងយកជនភៀសសឹកមីយ៉ាន់ម៉ាជាង៤ម៉ឺននាក់មកធ្វើការជំនួសពលករខ្មែរ ។

គួរបញ្ជាក់ថា ថៃបានប្រឌិតរឿងកងទ័ពជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ដើម្បីធ្វើលេសផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងកូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ហើយថៃក៏យកហេតុការណ៍ជាន់មីនជាមូលហេតុមិនដោះលែងវីរកងទ័ពកម្ពុជាទាំង១៨រូប និងរាលដាលដល់ពលករខ្មែរ ។ ការប្រកាសមិនអនុវត្តកិច្ចព្រមព្រៀងសន្តិភាព គឺបង្ហាញពីចរិតរបស់ថៃ ដែលតែងតែមិនស្មោះត្រង់ ក្រឡាស់ពាក្យសម្តី ចោទប្រកាន់ អស់ពីលេសមួយ ចូលលេសមួយទៀតរាប់មិនអស់ ៕