ភាពតានតឹងនៅលើឧបទ្វីបកូរ៉េបានកើនឡើងជាថ្មី នៅព្រឹកថ្ងៃពុធនេះ បន្ទាប់ពីយោធាកូរ៉េខាងត្បូង បានរាយការណ៍ថា កូរ៉េខាងជើងបានបាញ់មីស៊ីលផ្លោងចម្ងាយខ្លីជាច្រើនគ្រាប់ឆ្ពោះទៅកាន់សមុទ្រជប៉ុន ដែលជំរុញឲ្យជប៉ុននិងកូរ៉េខាងត្បូងប្រុងប្រយ័ត្នជាមួយនឹងស្ថានការណ៍យ៉ាងខ្លាំង។ ការបា.ញ់ផ្លោងមីសីលនេះ ធ្វើឡើងក្រោយពេលកូរ៉េខាងត្បូងទើបធ្វើការសុំទោសទៅកាន់កូរ៉េខាងជើង ចំពោះឧប្បត្តិហេតុដ្រូន។

សារព័ត៌មាន France24, Euronews រួមទាំងសារព័ត៌អាស៊ីជាច្រើនផ្សេងទៀត នៅទី៨ ខែមេសា បានចុះផ្សាយដោយដកស្រង់នូវពាក្យសម្ដីរបស់អគ្គសេនាធិការចម្រុះកូរ៉េខាងត្បូង ដែលបាននិយាយថា “គ្រាប់ផ្លោងមិនស្គាល់អត្តសញ្ញាណ” ជាច្រើនត្រូវបានគេប្រទះឃើញបាញ់ចេញពីឆ្នេរសមុទ្រភាគខាងកើតរបស់កូរ៉េខាងជើង ហើយបានហោះចម្ងាយខ្លីមុនពេលធ្លាក់ចូលទៅក្នុងសមុទ្រជប៉ុន។

ឆ្មាំឆ្នេរសមុទ្រជប៉ុនក៏បាននិយាយផងដែរថា “វត្ថុមួយដែលសង្ស័យថាជាមីស៊ីលផ្លោងត្រូវបានបាញ់ចេញពីកូរ៉េខាងជើង” ដោយជំរុញឱ្យនាវាទាំងអស់ដែលកំពុងចរាចរ “រក្សាការប្រុងប្រយ័ត្ន”។ បន្ថែមលើនេះ ការិយាល័យសន្តិសុខជាតិរបស់ទីក្រុងសេអ៊ូល ក៏បានរៀបចំកិច្ចប្រជុំបន្ទាន់មួយ ដោយស្នើសុំឱ្យទីក្រុងព្យុងយ៉ាងបញ្ឈប់ការញុះញង់ជាបន្ទាន់ផងដែរ។

មន្ត្រីនៅកូរ៉េខាងត្បូង និងជប៉ុន បានថ្កោលទោសយ៉ាងឆាប់រហ័សចំពោះចលនានេះ ដោយហៅវាថាជាការរំលោភលើសេចក្តីសម្រេចរបស់អង្គការសហប្រជាជាតិ ដែលហាមឃាត់កូរ៉េខាងជើងពីការអភិវឌ្ឍបច្ចេកវិទ្យាមីស៊ីលផ្លោង។ ប្រទេសទាំងពីរបាននិយាយថា ពួកគេកំពុងតាមដានស្ថានការណ៍យ៉ាងដិតដល់ ហើយនៅតែស្ថិតក្នុងការប្រុងប្រយ័ត្នខ្ពស់សម្រាប់ការបាញ់បង្ហោះបន្ថែមទៀត។

ទាក់ទឹននឹងបញ្ហានេះ អ្នកវិភាគនិយាយថា ការសាកល្បងទាំងនេះច្រើនតែត្រូវបានកំណត់ពេលវេលាដើម្បីផ្ញើសារនយោបាយ ជាពិសេសក្នុងអំឡុងពេលនៃភាពតានតឹងសកលកំពុងកើនឡើង។ ជាមួយនឹងជម្លោះដែលកំពុងបន្តនៅក្នុងតំបន់ផ្សេងទៀតនៃពិភពលោក សកម្មភាពរបស់កូរ៉េខាងជើងបានបន្ថែមភាពមិនប្រាកដប្រជាមួយទៀត ដែលបង្កើនការព្រួយបារម្ភអំពីសន្តិសុខក្នុងតំបន់ និងហានិភ័យនៃការកើនឡើងបន្ថែមទៀត៕

តើសង្រ្គា.មកំពុងធ្វើឲ្យអំណាចអាមេរិកធ្លាក់ចុះមែនទេ ? យោងតាមការស្ទង់មតិដ៏សំខាន់មួយដោយវិទ្យាស្ថាន ISEAS – Yusof Ishak ដែលជាមជ្ឈមណ្ឌលសិក្សាអាស៊ាននាបានបង្ហាញថា ប្រជាជនអាស៊ីអាគ្នេយ៍ភាគច្រើន ពេញចិត្តចំពោះប្រទេសចិនជាងសហរដ្ឋអាមេរិក មកធ្វើជាដៃគូមហាអំណាចសំខាន់សម្រាប់ប្រទេសរបស់ពួកគេ។ នេះជាលើកដំបូងក្នុងរយៈពេលជាច្រើនឆ្នាំ ដែលប្រទេសចិនអាចនាំមុខអាមេរិកដូចនេះ។

យោងតាមការចុះផ្សាយរបស់ The Straits Times របាយការណ៍ “ស្ថានភាពនៃអាស៊ីអាគ្នេយ៍” ឆ្នាំ ២០២៦ បានបង្ហាញពីអ្នកចូលរួមចំនួន ៥២% បានជ្រើសរើសប្រទេសចិន ខណៈដែល ៤៨% បានជ្រើសរើសសហរដ្ឋអាមេរិក ដែលជាលទ្ធផលបញ្ច្រាស់ពីឆ្នាំមុនៗ ព្រោះកន្លងមកទីក្រុងវ៉ាស៊ីនតោនតែងនាំមុខជានិច្ច។

ហេតុផលធំបំផុតក្នុងចំណោមហេតុផលទាំងអស់ដែលនៅពីក្រោយការផ្លាស់ប្តូរនេះ គឺការព្រួយបារម្ភកាន់តែខ្លាំងឡើងអំពីគោលនយោបាយរបស់លោក ដូណាល់ ត្រាំ ជាពិសេសជុំវិញបញ្ហាជម្លោះនៅមជ្ឈិមបូព៌ា ដែលមនុស្សជាច្រើនយល់ឃើញថា លោក ត្រាំ កំពុងបំផ្លាញសន្តិភាពពិភពលោក។ ការស្ទង់មតិបានរកឃើញថា គោលនយោបាយការបរទេសរបស់លោក ត្រាំ ឥឡូវនេះគឺជាការព្រួយបារម្ភខាងភូមិសាស្ត្រនយោបាយកំពូលនៅក្នុងតំបន់។

អ្នកវិភាគនិយាយថា ភាពមិនប្រាកដប្រជាជុំវិញយុទ្ធសាស្រ្តពាណិជ្ជកម្មរបស់សហរដ្ឋអាមេរិក ការប្តេជ្ញាចិត្តលើសន្តិសុខ និងសកម្មភាពសកលបានធ្វើឱ្យប្រទេសអាស៊ីអាគ្នេយ៍ជាច្រើនលែងសូវជឿទុកចិត្តក្នុងការពឹងពឹងផ្អែកលើទីក្រុងវ៉ាស៊ីនតោនតទៅទៀត។ ក្នុងពេលជាមួយគ្នានេះ ទំនាក់ទំនងសេដ្ឋកិច្ចដ៏រឹងមាំរបស់ប្រទេសចិនកំពុងដើរតួនាទីយ៉ាងសំខាន់ជាមួយបណ្ដារប្រទេសនៅអាស៊ីអាគ្នេយ៍។

របាយការណ៍នេះគូសបញ្ជាក់ថា បច្ចុប្បន្នប្រទេសជាច្រើននៅក្នុងតំបន់នេះកំពុងពឹងផ្អែកយ៉ាងខ្លាំងទៅលើពាណិជ្ជកម្ម និងការវិនិយោគពីទីក្រុងប៉េកាំង ដែលធ្វើឱ្យវាក្លាយជាដៃគូដ៏មានឥទ្ធិពល។ ទោះជាយ៉ាងណាក៏ដោយ អ្នកជំនាញបានសង្កត់ធ្ងន់ថា នេះមិនមានន័យថាអាស៊ីអាគ្នេយ៍កំពុងជ្រើសរើសភាគីណាមួយក្នុងចំណោមពួកគេទាំងពីរទាំងស្រុងនោះទេ ប៉ុន្តែប្រទេសភាគច្រើននៅតែចង់ធ្វើឱ្យមានតុល្យភាពទំនាក់ទំនងជាមួយមហាអំណាចទាំងពីរជាជាងប្តេជ្ញាចិត្តចំពោះភាគីមួយតែម្ខាង។

សរុបមក ការស្ទង់មតិនេះបានកំណត់អត្តសញ្ញាណគោលនយោបាយការបរទេសរបស់លោក ដូណាល់ ត្រាំ ថា ជាកង្វល់ផ្នែកភូមិសាស្ត្រនយោបាយឈានមុខគេនៅក្នុងតំបន់។ ក្តីបារម្ភផ្នែកសេដ្ឋកិច្ចក៏បានកើនឡើងផងដែរ បន្ទាប់ពីការអនុវត្តពន្ធគយបដិការសកល ដោយរដ្ឋបាលលោកត្រាំ ដែលប៉ះពាល់ដល់ប្រទេសសិង្ហបុរី ឥណ្ឌូណេស៊ី ម៉ាឡេស៊ី និងថៃ៕

អ្នកចូលចិត្តផឹកទឹកដូងនៅប្រទេសថៃបារម្ភពីផលប៉ះពាល់សុខភាព បន្ទាប់ពីសមត្ថកិច្ច និងមន្ត្រីពាក់ព័ន្ធរកឃើញទីតាំងផលិតទឹកដូងក្លែងក្លាយចំនួន២កន្លែងនៅខេត្តសមុតសុងក្រាម ដែលការផលិតប្រើប្រាស់សារធាតុគីមីគ្រោះថ្នា.ក់លាយជាមួយទឹក និងស្ករ ប៉ុន្តែមិនប្រើប្រាស់ដូងពិតប្រាកដ ។ អភិបាលខេត្តសមុតសុងក្រាម បានកោះប្រជុំដោះស្រាយបញ្ហានេះជាបន្ទាន់ដើម្បីផ្តល់ទំនុកចិត្តដល់ពលរដ្ឋ រួមទាំងកុំឱ្យប៉ះពាល់ដល់កសិករដាំដូង ។

សារព័ត៌មានថៃរាយការណ៍ថា សមត្ថកិច្ច និងមន្ត្រីពាក់ព័ន្ធបានឆែកឆេរទីតាំងផលិតទឹកដូងក្លែងក្លាយ២កន្លែងនៅខេត្តសមុតសុងក្រាម ដែលប្រើប្រាស់សារធាតុគីមីគ្រោះថ្នា.ក់លាយជាមួយទឹក ដើម្បីបន្ថែមរសជាតិ និងក្លិនស្រដៀងនឹងទឹកដូងធម្មជាតិ ។ បន្ទាប់មក មន្ត្រីជំនាញបានយកទឹកដូងក្លែងក្លាយនេះទៅត្រួតពិនិត្យពីផលប៉ះពាល់សុខភាពដើម្បីចាត់វិធានការជនល្មើសតាមច្បាប់ ហើយ ទីតាំងទាំង២កន្លែងត្រូវបានរកឃើញបើកដំណើរការអាជីវកម្មមិនត្រឹមត្រូវតាមច្បាប់ ។

កាលពីថ្ងៃទី៧ ខែមេសា លោក ឆាក់យ៉ាឆៃ ស៊ែងអ៊ីន អភិបាលខេត្តសមុតសុងក្រាម បានប្រជុំបន្ទាន់ជាមួយមន្ត្រីពាក់ព័ន្ធស្តីពីចំណាត់ការលើជនល្មើសផលិតទឹកដូងក្លែងក្លាយ ដើម្បីកុំឱ្យប៉ះពាល់ដល់ផលប្រយោជន៍កសិករដាំដូង ។ លោកថា ទឹកដូងក្លែងក្លាយប៉ះពាល់ដល់សេដ្ឋកិច្ចក្នុងតំបន់យ៉ាងខ្លាំងដែលខេត្តត្រូវចាត់វិធានការ ខណៈកន្លងមក ខេត្តបានបង្កើតវិធានការសុវត្ថិភាពចំណីអាហារ និងបង្ក្រាបការផលិតទឹកដូងក្លែងក្លាយ ពីព្រោះដូងជាទំនិញសេដ្ឋកិច្ចដ៏សំខាន់ ។

សមត្ថកិច្ចបានឆែកឆេរទីតាំងផលិតទឹកដូងក្លែងក្លាយទាំង២កន្លែងកាលពីថ្ងៃទី២ ខែមេសា និងរកឃើញការផលិតទឹកដូងមិនស្របតាមស្តង់ដារ GMP ដែលចាត់ទុកល្មើសនឹងច្បាប់ស្តីពីចំណីអាហារ ។ ក្រៅពីនេះ ទីតាំងទាំង២បានបំពានច្បាប់ការអនុញ្ញាតបើកអាជីវកម្មដែលបង្កគ្រោះថ្នាក់ដល់សុខភាព ត្រូវប្រឈមនឹងការចាត់វិធានការតាមច្បាប់ ។

ដំណើរការផលិតទឹកដូង គឺពួកគេបានយកសារធាតុគីមីមកផ្សំជាមួយទឹកដើម្បីបន្ថែមរសជាតិ និងក្លិនស្រដៀងនឹងទឹកដូងធម្មជាតិ ហើយសមត្ថកិច្ចបានយកទឹកដូងក្លែងក្លាយនេះទៅត្រួតពិនិត្យនៅនាយកដ្ឋានវិទ្យាសាស្ត្រវេជ្ជសាស្ត្រដើម្បីស្វែងរកការលាយឡំសារធាតុលោហៈ ឬសារធាតុគ្រោះថ្នាក់ផ្សេងទៀត ។ បើលទ្ធផលត្រួតពិនិត្យបង្ហាញថា គ្មានសុវត្ថិភាពសម្រាប់សុខភាព អាជ្ញាធរខេត្តនឹងចាត់ការជនល្មើសតាមច្បាប់ដោយជនល្មើសត្រូវជាប់ពន្ធនាគារ និងពិន័យប្រាក់ ដើម្បីបំបាត់គំរូអាក្រក់ ។

លោក ឆាក់យ៉ាឆៃ អភិបាលខេត្តសមុតសុងក្រាម បន្តថា អាជ្ញាធរខេត្តបានចុះត្រួតពិនិត្យការផលិតទឹកដូងជាបន្តបន្ទាប់តាំងពីចុងឆ្នាំ២០២៥ រហូតដល់បច្ចុប្បន្ន គឺអាជ្ញាធរបានត្រួតពិនិត្យការផលិតទឹកដូងចំនួន១៥កន្លែង ព្រមទាំងជំរុញឱ្យម្ចាស់ទីតាំងថ្មីផលិតទឹកដូងតាមស្តង់ដារកំណត់របស់រដ្ឋបាលចំណីអាហារ និងឱសថ ។ យើងនឹងចាត់វិធានការទីតាំងទាំងនេះដើម្បីផ្តល់ទំនុកចិត្តដល់ពលរដ្ឋ និងរក្សាកេរ្តិ៍ឈ្មោះទឹកដូងខេត្តសមុតសុងក្រាម ។

គួរបញ្ជាក់ថា ទឹកដូងក្លែងក្លាយត្រូវបានបញ្ជូនទៅលក់នៅតាមហាងភេសជ្ជៈជាច្រើនកន្លែង ដោយការផ្សំជាមួយទឹកកកសម្រាប់លក់ឱ្យអតិថិជនផឹក ។ ព័ត៌មាននេះធ្វើឱ្យអ្នកចូលចិត្តផឹកទឹកដូងនៅប្រទេសថៃលែងហ៊ានផឹក និងប៉ះពាល់ដល់កសិករដាំដូងផងដែរ ៕

ព័ត៌មានប្រេងឥន្ធនៈភាគច្រើនតែងតែសរសេរពាក្យ «បារ៉ែល ឬធុង» ដែលមនុស្សភាគច្រើនយល់ថា គឺជាការកំណត់បរិមាណប្រេង ប៉ុន្តែមិនដឹងពីប្រេង១បារ៉ែលស្មើប៉ុន្មានលីត្រ ឬមានបរិមាណប្រេងច្រើន-តិចប៉ុនណា ។ អ្វីគូរឱ្យចាប់អារម្មណ៍ជាងនេះ ហេតុអ្វីឧស្សាហកម្មប្រេងនៅទូទាំងពិភពលោក កំណត់បរិមាណប្រេងគិតជា «បារ៉ែល ឬធុង» ដែលហាក់ដូចជាស្មុគស្មាញ ហេតុអ្វីមិនកំណត់ជា «លីត្រ» វិញ ដើម្បីឱ្យងាយស្រួលយល់ ។

សារព័ត៌មាន KBN News នឹងនាំលោកអ្នកមកឈ្វេងយល់ថា តើប្រេង១បារ៉ែល (ឬ១ធុង) ស្មើនឹងប៉ុន្មានលីត្រ និងយល់ពីប្រវត្តិដែលធ្វើឱ្យឧស្សាហកម្មប្រេងទូទាំងពិភពលោក នៅតែកំណត់បរិមាណប្រេងគិតជាបារ៉ែលរហូតមកដល់បច្ចុប្បន្ន ។

បរិមាណប្រេងឆៅចំនួន១បារ៉ែល (Barrel) ស្មើនឹង១៥៩លីត្រ ឬស្មើ៤២កាន (គឺសំដៅលើទំហំកានប្រេងដែលប្រើប្រាស់នៅអាមេរិក) ។ ហេតុនេះ នៅពេលមានការចុះផ្សាយព័ត៌មានពាក់ព័ន្ធនឹងប្រេង ដូចជា ៖ តម្លៃប្រេងស្មើ៨០ដុល្លារក្នុង១បារ៉ែល គឺចង់សំដៅលើតម្លៃប្រេងចំនួន១៥៩លីត្រ ។

ឧស្សាហកម្មប្រេងពិភពលោក បានកំណត់បរិមាណប្រេងគិតជាបារ៉ែលតាំងពីសតវត្សទី១៩ មកម៉្លេះ ដែលជាសម័យចាប់ផ្តើមឧស្សាហកម្មប្រេងនៅអាមេរិក ។ ពេលនោះ ប្រេងឆៅត្រូវបានគេផ្ទុកក្នុងបារ៉ែលឈើ (ឬធុងឈើ) សម្រាប់ដឹកជញ្ជូន ហើយបារ៉ែលឈើនេះក៏សម្រាប់ផ្ទុកត្រី ស្រាទំពាំងបាយជូរ ឬស្រាវីស្គីដែរកាលពីមុន ប៉ុន្តែបារ៉ែលឈើនីមួយៗមានទំហំខុសគ្នា ទើបមានបញ្ហារឿងស្តង់ដារ ។

ក្រោយមកទៀត គេក៏កំណត់ទំហំបារ៉ែលឈើឱ្យមានលក្ខណៈស្តង់ដារ គឺការផ្ទុកប្រេង១បារ៉ែល ស្មើនឹងប្រេង៤២កាន ដើម្បីឱ្យងាយស្រួលដល់ការទិញ-លក់, ដឹកជញ្ជូន និងកំណត់តម្លៃ ។ ហេតុអ្វីពិភពលោកនៅតែកំណត់បរិមាណប្រេងគិតជាបារ៉ែលរហូតដល់បច្ចុប្បន្ន?

ទោះជាបច្ចុប្បន្ន ប្រទេសនានាឈប់ប្រើប្រាស់បារ៉ែលឈើសម្រាប់ការដឹកជញ្ជូនប្រេង ប៉ុន្តែនៅតែកំណត់បរិមាណប្រេងគិតជាបារ៉ែលរហូតមក ពីព្រោះវាបានក្លាយជាស្តង់ដារសកលក្នុងឧស្សាហកម្មប្រេងរួចទៅហើយ ។ ការប្រើប្រាស់បារ៉ែលដូចៗគ្នាគ្រប់ប្រទេសជួយឱ្យការទិញ-លក់ប្រេង, ការកំណត់តម្លៃ និងវិភាគទីផ្សារមានភាពងាយស្រួល ជាពិសេស មានបរិមាណប្រេងស្មើគ្នា ។

ហេតុនេះ បារ៉ែលកំណត់បរិមាណប្រេង គឺមានដើមកំណើតពីបារ៉ែលឈើកាលពីមុន បច្ចុប្បន្ន វាបានក្លាយជាស្តង់ដារសំខាន់របស់ឧស្សាហកម្មប្រេងនៅទូទាំងពិភពលោក គឺ១បារ៉ែលមានប្រេងចំនួន១៥៩លីត្រ ៕

មេដឹកនាំប្រទេសនានាលើពិភពលោក បានបង្ហាញក្តីរីករាយដែលអាមេរិកព្រមព្រៀងជាមួយអ៊ីរ៉ង់ឈប់បា.ញ់រយៈពេល២សប្តាហ៍ ក្រោមលក្ខខណ្ឌបើកច្រកសមុទ្រ Hormuz ឱ្យនាវាផ្សេងៗឆ្លងកាត់ដោយសុវត្ថិភាព ហើយមេដឹកនាំទាំងនេះជំរុញឱ្យភាគីទាំងអស់ពាក់ព័ន្ធនឹងសង្គ្រា.មឈានទៅរកការចរចាដោយសន្តិវិធីដើម្បីទទួលបានសន្តិភាពយូរអង្វែងនៅតំបន់មជ្ឈិមបូព៌ា ។

នៅថ្ងៃទី៨ ខែមេសា ឆ្នាំ២០២៦ មេដឹកនាំប្រទេសជាច្រើនបានបង្ហាញក្តីរីករាយ បន្ទាប់ពីអាមេរិក និងអ៊ីរ៉ង់ ព្រមព្រៀងឈប់បាញ់រយៈពេល២សប្តាហ៍ ដែលជាការបង្ហាញសញ្ញាល្អពីសង្គ្រាមនៅមជ្ឈិមបូព៌ាអាចនឹងបញ្ចប់ ហើយពិភពលោកនឹងមានសន្តិភាពឡើងវិញ ។

អគ្គលេខាធិការអង្គការសហប្រជាជាតិ (UN) លោក António Guterres និយាយថា អង្គការសហប្រជាជាតិសូមអបអរចំពោះការប្រកាសឈប់បាញ់រយៈពេល២សប្តាហ៍របស់អាមេរិក និងអ៊ីរ៉ង់ ហើយយើងអំពាវនាវឱ្យគ្រប់ភាគីពាក់ព័ន្ធក្នុងជម្លោះនៅមជ្ឈិមបូព៌ាគោរពច្បាប់អន្តរជាតិ និងអនុវត្តតាមលក្ខខណ្ឌបទឈប់បាញ់ ដើម្បីឈានទៅរកសន្តិភាពយូរអង្វែងក្នុងតំបន់ ។

ចំណែកលោក Friedrich Merz នាយករដ្ឋមន្ត្រីអាល្លឺម៉ង់ថា រដ្ឋាភិបាលអាល្លឺម៉ង់រីករាយចំពោះការព្រមព្រៀងឈប់បាញ់រវាងអាមេរិក និងអ៊ីរ៉ង់ ហើយគោលដៅពេលនេះ គឺការចរចានាពេលឆាប់ៗដើម្បីបញ្ចប់សង្គ្រាមជារៀងរហូត ដោយការចរចាអាចធ្វើឡើងតាមរយៈការទូតប៉ុណ្ណោះ ។

រីឯរដ្ឋមន្ត្រីក្រសួងការបរទេសអ៊ុយក្រែន លោក Andrii Sybiha បានបង្ហោះសារបង្ហាញក្តីរីករាយក្នុងបណ្តាញសង្គម X និងអំពាវនាវឱ្យអាមេរិកបង្ហាញគោលជំហរដូចគ្នានេះ ដើម្បីបញ្ចង់សង្គ្រាមរវាងរុស្ស៊ី និងអ៊ុយក្រែន ។ លោកថា ៖ «ចំណាត់ការម៉ឺងម៉ាត់របស់អាមេរិកទទួលបានលទ្ធផល យើងជឿថា ដល់ពេលអាមេរិកមានចំណាត់ការម៉ឺងម៉ាត់បង្ខំឱ្យរុស្ស៊ីឈប់បង្កសង្គ្រាមជាមួយអ៊ុយក្រែន» ។

លោក មិណូរុ ឃិហារ៉ាក់ អគ្គលេខាធិការគណៈរដ្ឋមន្ត្រីជប៉ុនថា ការកាត់បន្ថយភាពតានតឹងនៅមជ្ឈិមបូព៌ាយ៉ាងពិតប្រាកដមានសារៈសំខាន់បំផុត ជប៉ុនរំពឹងនឹងមានកិច្ចព្រមព្រៀងចុងក្រោយតាមរយៈការទូតឆាប់ៗ ។ នាយករដ្ឋមន្ត្រីជប៉ុន លោកស្រី Sanae Takaichi បានព្យាយាមចរចាជាមួយថ្នាក់ដឹកនាំអ៊ីរ៉ង់តាមទូរស័ព្ទរួចហើយ ។

ដូចគ្នានេះ លោក Anwar Ibrahim នាយករដ្ឋមន្ត្រីម៉ាឡេស៊ី ក៏រីករាយចំពោះបទឈប់បាញ់ដែរ និងអំពាវនាវឱ្យជំរុញសន្តិភាពយូរអង្វែងក្នុងតំបន់ ។ ក្នុងសារបង្ហោះក្នុងបណ្តាញសង្គម នាយករដ្ឋមន្ត្រីម៉ាឡេស៊ីថា សំណើ១០ចំណុចបញ្ចប់សង្គ្រាមរបស់អ៊ីរ៉ង់ ត្រូវតែប្រែក្លាយជាសំណើសន្តិភាព ហើយមិនមែនសម្រាប់តែអ៊ីរ៉ង់ទេ ប៉ុន្តែសន្តិភាពនឹងកើតឡើងចំពោះប្រទេសអ៊ីរ៉ាក់ លីបង់ និងយេម៉ែន ផងដែរ ។

ចុងក្រោយ អ្នកនាំពាក្យក្រសួងការបរទេសឥណ្ឌូណេស៊ី ក៏បានបង្ហាញក្តីរីករាយដូចគ្នាចំពោះបទឈប់បាញ់នេះ ព្រមទាំងអំពាវនាវឱ្យភាគីទាំងអស់គោរពអធិបតេយ្យភាព បូរណភាពទឹកដី និងចរចាដោយសន្តិវិធី ៕