នេន ទុំ ព្រលះអ្នកវិភាគឯករាជ្យដែលយកលោកប្រៀបធៀបជាមួយនឹង វណ្ណដា ជី ដេវីត

តារាចម្រៀង នេន ទុំ បានចេញមកព្រលះចាស់ដៃទៅកាន់គណនីហ្វេកប៊ុកដែលមានឈ្មោះថា អ្នកវិភាគឯករាជ្យ បន្ទាប់ពីបង្ហោះផ្លែផ្កាក្នុងន័យថាលោកបន្ទាបតម្លៃសិល្បករជើងចាស់ហើយយកប្រៀបធៀបទៅនឹងតារារ៉េប វណ្ណដា និង ជី ដេវីត។ មិនត្រឹមតែប៉ុណ្ណោះ នេន ទុំ បានអះអាងថាអ្វីដែលលោកធ្វើគឺជារសជាតិថ្មីសូម្បីតែប្លង់ថតក៏លួចប្លង់ពីហូលីវូដ។

ប្រិយមិត្តមួយចំនួនជ្រាបហើយថា តារាចម្រៀង នេន ទុំ បានចេញបទចម្រៀងថ្មីជាមួយនឹងលោក ណូយ វ៉ាន់ណេត បានធ្វើឱ្យមនុស្សជាច្រើនបញ្ចេញមតិប្រតិកម្មយ៉ាងខ្លាំងក្លារហូតដល់លោកបានចេញវីដេអូបកស្រាយខណៈលោកកំពុងតែស្ថិតនៅសហរដ្ឋអាម៉េរិក។ រឿងរ៉ាវមិនបានបញ្ចប់ក្រោយលោកចេញបកស្រាយនោះទេ ប៉ុន្តែកាន់តែឡើងកម្តៅបន្ទាប់ពីឃើញការបង្ហោះរបស់ stephen row : អ្នកវិភាគឯករាជ្យ។

ការបង្ហោះរបស់អ្នកកាន់ផេក អ្នកវិភាគឯករាជ្យ បានធ្វើឱ្យ នេន ទុំ ឆេះឆួលយ៉ាងខ្លាំងដោយចេញមកតបតវិញមិនអាចឱ្យគណនីនេះវិភាគបានតាមចិត្តនោះទេទាំងលោកខិតខំលើកស្ទួយសិល្បករជើងចាស់យ៉ាងខ្លាំង និងបានជួយសង្គមជាច្រើន។ ការបង្ហោះរបស់អ្នកវិភាគឯករាជ្យ បានលើកឡើងថា «សរសើរ វណ្ណដា លើកវីរតន្ត្រីករជើងចាស់ លើឆាកតន្ត្រីស៊ីហ្គេម ហើយសំពះព្រឹទ្ធាចារ្យដល់ចុងជើងជាការគោរព មុនលោកអនិច្ចកម្ម កិត្យានុភាពបន្សល់ភាពល្បី និង ការចងចាំតជំនាន់ សាវតាឧស្សាហកម្មតន្ត្រីពាន់ឆ្នាំគ្មានថ្ងៃបំភ្លេច។ សរសើរ ជី ដេវីត លើកវីរសិល្បករចម្រៀងជើងចាស់ ជាមួយរសជាតិថ្មីចាំងរស្មី ព្រះអាទិត្យថ្មីលើដីស្រែចាស់ ទំនុកមិនផ្លាស់ ពី ឱ្យបងសុំស្រឡាញ់ផង មកជា ឱ!.. សង្សារបងអើយ! ផ្តល់ទំនុកច្រៀងដល់ជើងចាស់ ច្រៀងបានច្រើនជាងខ្លួន លើឆាកតុបតែងពេញដោយរស្មី Spotlight គួរឱ្យគោរព.. ធ្វើឱ្យកេរ្តិ៍ឈ្មោះតន្ត្រីករជើងចាស់រូបនោះ មានឈ្មោះកាន់តែច្រើនលើឆាកតន្ត្រី រហូតដល់សព្វថ្ងៃ។ ខុសពីអ្នកចម្រៀង១ថ្មីនេះ.. យកម្ចាស់បទ ដំរីជាន់ខ្លាដែលគេគោរពដាក់លើព្រំ មកជ្រុំក្រោមបាតជើង ចេញចម្រៀង MV រាំក្រោមភ្លើង និង ក្លៀកមនុស្សស្លៀកសំពត់ខើច ច្រៀងពីសត្វពើតពើងក្រោមក្បាលខ្សែក្រវ៉ាត់ .. ពីខ្ពស់ រសាត់ខ្ចាត់ បាត់ក្រោមក្រណាត់ជូតជើង ទ្រុស្តក្តីគោរព ជើងចាស់ មកជាការធ្លាក់សូន្យតម្លៃលាងឃ្លាំង.. អ្នកចម្រៀងខួរអាជីណូម៉ូតូ»។

តារាចម្រៀង នេន ទុំ ថាលោកគោរសរសើរចំពោះ វណ្ណដា និង ជី ដេវីត ហើយលោកក៏ពេញចិត្តដូចគ្នាប៉ុន្តែមិនត្រូវវិភាគលោកជាមួយនឹងអ្នកទាំងពីរ ហើយថាលោកថោកជាងតារាចម្រៀងទាំងពីររូបនេះឡើយ។ នេន ទុំ ថាលោកឱ្យតម្លៃសិល្បករជើងចាស់ណាស់សូម្បីតែលោកតាគង់ ណៃ ក៏លោកខិតខំជួយគាត់ឱ្យមានការសម្តែង ហើយលោកនិងគាត់គឺមានភាពសិទ្ធិស្នាលគ្នាខ្លាំង។ ក្រៅពីគាត់គឺមានសិល្បករជើងចាស់ជាច្រើនទៀតដូចជាលោក ព្រហ្ម ម៉ាញ លោក ហួរ ឡាវី និងបានជួយសង្គមជាច្រើនទៀតប៉ុន្តែអ្នកវិភាគរូបនេះមិនបើកភ្នែកមើលឡើយ។



តារាចម្រៀង នេន ទុំ បន្តទៀតថា អ្នកវិភាគរូបនេះមានការគិតពិចារណឬទេដែលសរសើរ វណ្ណដា និង ជី ដេវីត ហើយជាន់ពន្លិចលោកទាំងដែលតារាចម្រៀងទាំងពីររូបនេះមានបទជេរគ្នាមួយគំនរ។ លោកថាបទសម័យពីដើមមានពាក្យលេបខាយ លេចលើលេចក្រោម បទសម័យឥឡូវមានទំនោរខាងផ្លូវភេទមួយគំនរ មិនយកមកគិត មកគិតត្រឹមលោកដែលគ្រាន់តែលើកយកឃ្លាទូទៅ «ក្រោមក្បាលពោះនៅរស់រវើក»។

តារាចម្រៀងរូបនេះបន្តទៀតថា លោកប្រឡូកក្នុងអាជីពសិល្បៈជាង២០ឆ្នាំមកហើយដោយជួយសង្គមបានយ៉ាងច្រើន ធ្វើចម្រៀងបានច្រើនទម្រង់លើកឡើងតែបទរ៉េប ហ៊ីបហប ដោយឱ្យអ្នកវិភាគឯករាជ្យ មើលឱ្យគ្រប់ជ្រុងជ្រោយមុននឹងវិភាគបន្ទាបតម្លៃលោក។ លោកក៏បញ្ជាក់ទៀតថាប្លង់ដែលមានមតិរិះគន់គឺលោកលួចយកប្លង់ពីហូលីវូដមក គេដទៃធ្វើបានសរសើរថាឡូយ តែត្រង់ខ្មែរធ្វើអ្វីប្លែកបន្តិចទាញទម្លាក់ចុះតែម្តង៕