ទីក្រុងតៃប៉ិ៖ ស្របពេលក្រុងប៉េកាំង បាន និង កំពុងតែបង្កើនសកម្មភាពយោធា នៅក្នុងតំបន់នោះ មានការវាយតម្លៃខុសៗគ្នាជាច្រើន ជុំវិញល្បែងសង្គ្រាមនេះ ហើយការចំណាយគ្រឿងសឹកចម្បាំង និង កម្លាំងទ័ព នឹងត្រូវខាតបង់អស់យ៉ាងច្រើន ទាំងកម្លាំងទាហានចិន តៃវ៉ាន់ សហរដ្ឋអាមេរិក និង ជប៉ុន។

គេហទំព័ររបស់បណ្ដាញទូរទស្សន៍ CNN បានចេញផ្សាយ កាលពីថ្ងៃចន្ទ ទី៩ ខែមករា ថា បើតាមវិទ្យាស្ថានឯករាជ្យ Think Tank ដែលសិក្សា អំពីនយោបាយសង្គម យុទ្ធសាស្រ្ដនយោបាយ យោធា បច្ចេកវិទ្យា និង វប្បធម៌ មានមូលដ្ឋាននៅរដ្ឋធានីវ៉ាស៊ីនតោន សហរដ្ឋអាមេរិក បានវាយតម្លៃ នៅលើរបាយការណ៍របស់ខ្លួន ថា ប្រសិនបើចិន លើកកងទ័ព វាយលុកលុយទៅលើតៃវ៉ាន់ នៅក្នុងឆ្នាំ២០២៦ នឹងបណ្តាលឱ្យមនុស្សស្លាប់ និង របួសរាប់ពាន់នាក់ នៅក្នុងចំណោមកងទ័ពចិន សហរដ្ឋអាមេរិក តៃវ៉ាន់ និង ជប៉ុន ដែលចូលពាក់ព័ន្ធ។ ល្បែងសង្គ្រាមនេះ ទំនងជាមិនអាចធ្វើឱ្យក្រុងប៉េកាំង ទទួលបានជ័យជម្នះនោះឡើយ។

សង្គ្រាមទៅលើកោះតៃវ៉ាន់ អាចនឹងធ្វើឲ្យកងទ័ពសហរដ្ឋអាមេរិក ទទួលបានជ័យជម្នះ ទាំងលំបាក ខណៈកម្លាំងទាហានចិនបរាជ័យ។ នៅចុងបញ្ចប់ នៃជម្លោះនេះ យ៉ាងហោចណាស់ ក៏មាននាវាផ្ទុកយន្ដហោះរបស់សហរដ្ឋអាមេរិក ចំនួន២គ្រឿង បានលិចទៅដល់បាតមហាសមុទ្រប៉ាស៊ីហ្វិក។ ជាមួយគ្នានេះដែរ កងទ័ពជើងទឹកដ៏ទំនើបរបស់ចិន ដែលជាកម្លាំងដ៏ធំជាងគេបំផុត នៅលើពិភពលោក ក៏នឹងត្រូវរង្គោះរង្គើ។

ការអះអាងទាំងនេះ ជាសេចក្តីសន្និដ្ឋាន ដែលមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ (CSIS) ធ្វើឡើង ក្រោយពេលដំណើរការនូវអ្វីដែលវិទ្យាស្ថាននេះ អះអាងថា ជាការក្លែងធ្វើសង្គ្រាមយ៉ាងទូលំទូលាយបំផុតមួយមិនធ្លាប់មាន នៅក្នុងជម្លោះមួយ អាចនឹងកើតមានឡើង នៅលើកោះតៃវ៉ាន់ គ្រប់គ្រងតាមបែបប្រជាធិបតេយ្យ ដោយមានប្រជាជន ប្រហែលជា២៤លាននាក់។ បក្សកុម្មុយនិស្តចិន តែងតែទាមទារកោះតៃវ៉ាន់ ជាផ្នែកមួយ នៃដែនអធិបតេយ្យភាពរបស់ខ្លួន បើទោះជាក្រុងប៉េកាំង មិនធ្លាប់គ្រប់គ្រង នៅលើដែនកោះមួយនេះយ៉ាងណាក៏ដោយ។

លោក ស៊ី ជិនពីង (Xi Jinping) ប្រធានាធិបតីចិន មិនធ្លាប់បដិសេធ អំពីការប្រើប្រាស់កម្លាំងយោធា ដើម្បីរឹបអូសកោះតៃវ៉ាន់ យកមកដាក់ ឲ្យស្ថិតនៅក្រោមការគ្រប់គ្រងរបស់ក្រុងប៉េកាំងនោះឡើយ។ ប៉ុន្ដែរដ្ឋាភិបាលក្រុងតៃប៉ិ តែងតែងប្រឆាំងយ៉ាងដាច់អហង្ការ ចំពោះការប្រកាសរបស់ចិន មកលើដែនកោះរបស់ខ្លួន។

លោក ម៉ាក កាន់សៀន (Mark Cancian) ប្រធានគម្រោង និង ជាទីប្រឹក្សាជាន់ខ្ពស់ នៃមជ្ឈមណ្ឌលសិក្សាយុទ្ធសាស្រ្ដ និង អន្ដរជាតិមួយរូប បានអះអាង ថា «មិនមានល្បែងសង្គ្រាម ណា មិនបានចាត់ថ្នាក់នៅទីនោះទេ ដោយមើលឃើញ អំពីជម្លោះ រវាងសហរដ្ឋអាមេរិក និង ចិន។ នៅក្នុងចំណោមល្បែងសង្គ្រាម មិនត្រូវបានចាត់ថ្នាក់ ជាធម្មតាពួកគេធ្វើត្រឹមតែម្តង ឬពីរដងប៉ុណ្ណោះ»។

របាយការណ៍មួយ បានអះអាង ថា «ប្រសិនបើសង្គ្រាម ផ្ទុះឡើង នៅលើកោះតៃវ៉ាន់ មែននោះ សហរដ្ឋអាមេរិក និង ជប៉ុន នឹងបាត់បង់នាវាចម្បាំងយ៉ាងច្រើន ខូចខាតយន្ដហោះ រាប់រយគ្រឿង និង កងទ័ពរាប់ពាន់នាក់។ ការបាត់បង់ដ៏ច្រើនបែបនេះ នឹងធ្វើឲ្យខូចខាតដល់តួនាទីនៅលើពិភពលោករបស់សហរដ្ឋអាមេរិក ដែលកំពុងតែឈរជើងយ៉ាងរឹងមាំ អស់រយៈពេលសិបឆ្នាំកន្លងមកនេះ»។

នៅក្នុងសេណារីយ៉ូជាច្រើន បានបង្ហាញ ថា កងទ័ពជើងទឹករបស់សហរដ្ឋអាមេរិក នឹងបាត់បង់នាវាផ្ទុកយន្ដហោះ យ៉ាងតិច២គ្រឿង និង នាវាពិឃាដ ចន្លោះពី១០ទៅ២០គ្រឿង។ រីឯកងទ័ពប្រហែលជាជាង៣០០០នាក់ នឹងត្រូវស្លាប់ នៅក្នុងការវាយប្រយុទ្ធគ្នា ត្រឹមតែរយៈពេល៣សប្ដាហ៍ ដែលស្មើនឹងជិតពាក់កណ្ដាល នៃកងទ័ពសហរដ្ឋអាមេរិក បានបាត់បង់ នៅក្នុងការធ្វើសង្គ្រាម អស់រយៈពេល២ទសវត្សរ៍ នៅក្នុងប្រទេសអ៊ីរ៉ាក់ និង អាហ្វហ្កានីស្ថាន។

ជាមួយគ្នានេះ ចិនក៏នឹងរងគ្រោះធ្ងន់ធ្ងរផងដែរ។ កងទ័ពជើងទឹករបស់ក្រុងប៉េកាំង ជាស្នូលនៃមហិច្ឆតារបស់ចិន នឹងបែកបាក់អស់ ហើយទាហានរាប់ម៉ឺននាក់ នឹងក្លាយជាឈ្លើយសឹក។ ក្រៅពីនេះ ចិន នឹងបាត់បង់កងទ័ព ប្រហែល១ម៉ឺននាក់ ហើយខូចខាតយន្ដហោះចម្បាំងជាង១៥០គ្រឿង និង នាវាចម្បាំង ប្រហែល១៣០គ្រឿង។

របាយការណ៍ដដែល បានបន្ដ ថា កងទ័ពរបស់តៃវ៉ាន់ ក៏នឹងបែកបាក់អស់ ហើយធ្វើឲ្យខូចខាតយ៉ាងធ្ងន់ធ្ងរ ដល់សេដ្ឋកិច្ចរបស់ដែនកោះមួយនេះ ដោយមិនមានទាំងអគ្គិសនីប្រើប្រាស់ និង សេវាជាមូលដ្ឋានថែមទៀតផង។ ក្រុងតៃប៉ិ ក៏នឹងបាត់បង់កងទ័ព ប្រហែល៣៥០០នាក់ និង នាវាពិឃាត ប្រហែលជិត៣០គ្រឿង ត្រូវលិចទៅបាតសមុទ្រ។

ជប៉ុន ទំនងជានឹងបាត់បង់យន្ដហោះចម្បាំង ប្រហែលជាង១០០គ្រឿង និង នាវាចម្បាំងប្រហែល ជិត៣០គ្រឿង ដោយសារមូលដ្ឋានកងទ័ពសហរដ្ឋអាមេរិក នៅលើទឹកដីរបស់ខ្លួន នឹងត្រូវរងការវាយប្រហារ ពីកងទ័ពរបស់ចិន។

ទោះជាយ៉ាងណា មជ្ឈមណ្ឌលសិក្សាយុទ្ធសាស្រ្ដ និង អន្ដរជាតិ (CSIS) បានអះអាង ថា CSIS មិនចង់ឱ្យរបាយការណ៍របស់ខ្លួនបង្ហាញ ថា សង្គ្រាមនៅលើកោះតៃវ៉ាន់ «ជៀសមិនរួច ឬ ប្រហែលជានឹងកើតឡើងនោះដែរ»។

CSIS បានបន្ដ ថា «ជាមួយនឹងគ្រោះថ្នាក់ដ៏ធ្ងន់ធ្ងរបែបនេះ មេដឹកនាំចិន អាចនឹងអនុវត្តនូវយុទ្ធសាស្ត្រការទូតដាក់ឲ្យនៅឯកោ ដាក់សម្ពាធតំបន់ពណ៌ប្រផេះ ឬ ការបង្ខិតបង្ខំខាងសេដ្ឋកិច្ចប្រឆាំងនឹងតៃវ៉ាន់»។

លោក ដាន ហ្ក្រាហ្ស៊ា (Dan Grazier) មន្រ្ដីជាន់ខ្ពស់គោលនយោបាយការពារជាតិរបស់រដ្ឋាភិបាល បានអះអាង ថា«ចិននឹងធ្វើអ្វីគ្រប់យ៉ាង ដែលពួកគេអាចធ្វើ នៅក្នុងការប៉ាន់ប្រមាណរបស់ខ្ញុំ ដើម្បីបញ្ចៀស អំពីជម្លោះជាមួយនឹងប្រទេសណាមួយ។ ដើម្បីប្រជែងជាមួយនឹងសហរដ្ឋអាមេរិក សម្រាប់ការគ្រប់គ្រងពិភពលោកនោះ ក្រុងប៉េងកាំង នឹងប្រើប្រាស់អំណាចឧស្សាកម្ម និង សេដ្ឋកិច្ច ជំនួសការប្រើប្រាស់កម្លាំងយោធាវិញ៕

ខណៈដែលវៀតណាមកំពុងប្រជែងគ្នាដើម្បីទាក់ទាញភ្ញៀវទេសចរបរទេស ឱ្យត្រឡប់ចូលទៅប្រទេសខ្លួនវិញ បន្ទាប់ពីការបិទព្រំដែនអស់រយៈពេលជាងពីរឆ្នាំនោះ ការយាយី និងការបោកប្រាស់នៅតែជាបញ្ហាធំដែលធ្វើឱ្យខូចកេរ្តិ៍ឈ្មោះទេសចរណ៍របស់ប្រទេសនេះ។

ក្នុងអំឡុងពេលធ្វើដំណើរទៅកាន់ទីក្រុងហូជីមិញ នាពេលថ្មីៗនេះ ភ្ញៀវទេសចរជនជាតិឥណ្ឌា លោក អេនតូនីញ៉ូ (Antonio) បាននិយាយថា លោកមានការខកចិត្ត នៅថ្ងៃដំបូង ខណៈដែលគាត់ត្រូវបានអ្នកលក់ក្នុងស្រុកបោក ពេលកំពុងដើរជាមួយមិត្តរបស់គាត់នៅជិតការិយាល័យប្រៃសណីយ៍កណ្តាល ក្នុងសង្កាត់លេខ ១ ។ បុរសក្នុងតំបន់ម្នាក់បានសួរលោក អេនតូនីញ៉ូ ថា តើលោកចង់ផឹកទឹកដូងដែរឬទេ ហើយពេលគាត់សួរថាដូងថ្លៃប៉ុន្មាន បុរសនោះបានឆ្លើយថា “មិនគិតថ្លៃទេ”។
នៅពេលដែលលោក អេនតូនីញ៉ូ សួរអ្នកលក់ម្តងទៀត អ្នកលក់នៅតែឆ្លើយថា “ទេ មិនគិតថ្លៃទេ”។

បន្ទាប់មក អ្នកលក់បានអញ្ជើញលោក អេនតូនីញ៉ូ ឱ្យថតរូបឈរក្បែររទេះរុញភេសជ្ជៈដូងរបស់គាត់ បន្ទាប់មក លោកបានគិតប្រាក់អ្នកទេសចរបរទេសចំនួន ៣០ម៉ឺន ដុង (១២.៨៧ ដុល្លារ) សម្រាប់ថ្លៃដូង។ លោក អេនតូនីញ៉ូ មិនយល់អំពីអត្រាប្តូរប្រាក់ ហើយគិតថាអ្នកលក់ចិត្តល្អ លោកទទួលយកការបង់ប្រាក់យ៉ាងច្រើន ដល់អ្នកលក់។

លោក អេនតូនីញ៉ូ បាននិយាយថា៖ «ពេលខ្ញុំត្រឡប់ទៅសណ្ឋាគារក្នុងប្រទេសថៃ ខ្ញុំបានពិនិត្យអត្រាប្តូរប្រាក់ ហើយបានដឹងថា ខ្ញុំត្រូវបានគេបោកប្រាក់» ។ «បើខ្ញុំប្រៀបធៀបតម្លៃនេះ ខ្ញុំអាចទិញដូងបាន៣០ផ្លែ ក្នុងប្រទេសរបស់ខ្ញុំ »។ លោក អេនតូនីញ៉ូ ទួញសោកថា “ល្បិចពេកហើយ”… គ្មានហេតុផលសម្រាប់ គាត់ធ្វើបែបនោះទេ។

កាលពីសប្តាហ៍មុន គ្រួសារអ្នកទេសចរជប៉ុនចំនួន ៥ នាក់ត្រូវបានគិតប្រាក់ ចំនួន ១ លានដុង (៤២.៦១ ដុល្លារ) សម្រាប់ការការធ្វើដំណើរ មួយគីឡូម៉ែត្រ ពីស្ថានីយអន្តរជាតិ ទៅកាន់ស្ថានីយក្នុងស្រុកនៃអាកាសយានដ្ឋានអន្តរជាតិ ណយ បាយ (Noi Bai)។ ការបើកតាក់ស៊ី ចម្ងាយមួយគីឡូម៉ែត្រ ក្នុងប្រទេសវៀតណាម ជាធម្មតា មានតម្លៃក្រោម ១ ដុល្លារអាមេរិក៕

ប្រភព៖ VN Express

ប្រទេសថៃ៖ ឧទ្យាន បែន ចាក់ កិតិ (Benjakitti) ដែលជាឧទ្យានសាធារណៈថ្មី និងធំជាងគេបំផុតរបស់ទីក្រុងបាងកក ឥឡូវនេះកំពុងទទួលភ្ញៀវទេសចរណ៍ ជាមួយនឹងសម្រស់ដ៏ស្រស់ស្អាតបង្អួតនៅចំកណ្ដាលនៃទីក្រុង។

ឧទ្យានព្រៃឈើ Benjakitti ក្នុងសង្កាត់ ខ្លង តើយ (Klong Toey) មានទំហំប្រហែល ៤០ ហិតតា និងស្ថិតនៅលើអតីតទីតាំងរោងចក្រដែលជាកម្មសិទ្ធិរបស់អាជ្ញាធរថ្នាំជក់នៃប្រទេសថៃ។

ការអភិវឌ្ឍឧទ្យាននេះគឺស្របតាមព្រះរាជបំណងរបស់ព្រះមហាក្សត្រភូមិបុល អាឌុលយ៉ាដេត ដ៏ឧត្តុង្គឧត្តម និងព្រះមហាក្សត្រិយានី Sirikit ព្រះមហាក្សត្រី និងជាផ្នែកមួយនៃផែនការរយៈពេល៣០ ឆ្នាំ របស់រដ្ឋាភិបាលក្នុងការបង្កើតសួនសាធារណៈក្នុងទីក្រុងធំៗ។

ដោយឡែកសម្រាប់ការចំណាយលើការបង្កើតគម្រោងនេះត្រូវបានគេដឹងថា បានចំណាយអស់ជាង ៦៥០ លានបាតឬ ប្រហែល 19,428,214 ដុល្លារ  សម្រាប់ការអភិវឌ្ឍឡើងវិញនៃឧទ្យាននេះគឺជាផ្នែកមួយនៃការបណ្តាក់ទុនរួមគ្នារវាងនាយកដ្ឋានរតនាគារនៃក្រសួងហិរញ្ញវត្ថុ និងកងទ័ពភូមិន្ទថៃ ខណៈដែលវិទ្យាស្ថាន Arsom Silp Institute of the Arts បានត្រួតពិនិត្យការរចនារួចរាល់។

បន្ថែមពីនោះផែនការនេះគឺដើម្បីពង្រីកឧទ្យាន Benjakitti  ដោយបានបង្កើត សួតនៃទីក្រុងដែលអាចឱ្យភ្ញៀវមើលឃើញឧទ្យាននេះក្លាយជាកន្លែងទាក់ទាញទេសចរណ៍ និងជាកន្លែងបៃតងដែលប្រជាជននៅទីក្រុងបាងកកអាចរីករាយ ក៏ដូចជាការទទួលយកនូវអារម្មណ៍ផ្សេងពីភាពអូអរនៅក្នុងកន្លែងតែមួយនៃទីក្រុង។

ពិតណាស់ការពង្រីកសួនឧទ្យាននេះ មានន័យថាវាបាននឹងក្លាយជាសួនឧទ្យានដ៏ធំបំផុតក្នុងទីក្រុងបាងកកក្រោយពីបញ្ចប់នៃគម្រោង។ ព្រោះថាឧទ្យាននេះមានផ្លូវលំធម្មជាតិ ៥.៨ គីឡូម៉ែត្រ ផ្លូវរត់ ២.៨ គីឡូម៉ែត្រ និងផ្លូវជិះកង់ ៣.៤ គីឡូម៉ែត្រ ដែលត្រូវបានរចនាឡើងជាពិសេសដើម្បីលើកកម្ពស់សកម្មភាពសុខភាពរាងកាយ។

គួរបញ្ជាក់ផងដែរថាឧទ្យានជាតិ Benjakitti បើកដំណើរការតាំងពីក្នុងឆ្នាំ ១៩៩៤  ប៉ុន្តែឧទ្យាននេះត្រូវ បានទទួលការជួសជុលឡើងវិញក្នុងដំណាក់កាលដំបូងរបស់ខ្លួននៅឆ្នាំ ២០១៦  និងរួចរាល់ ព្រមទាំងបើកជាផ្លូវការនៅថ្ងៃទី១២ ខែសីហា ឆ្នាំ២០២២កន្លងទៅនេះ៕ ប្រភព៖ huahintoday

រដ្ឋធានីវ៉ាស៊ីនតោន៖ ជាមួយសម័យបច្ចេកវិទ្យាកាន់តែទំនើប បន្ទះឈីបកំពុងតែដើរតួយ៉ាងសំខាន់បំផុត នៅក្នុងវិស័យជាច្រើន រួមទាំងសម្ភារយោធាផងដែរ ហើយឥឡូវនេះ មានប្រទេសជាច្រើន នៅលើពិភពលោក កំពុងតែហក់ចូលទៅក្នុងសង្គ្រាមបន្ទះឈីបនេះ ស្របពេលសហរដ្ឋអាមេរិក និង ចិន កំពុងតែប្រជែងគ្នាយ៉ាងខ្លាំងបំផុត នៅលើវិស័យឧស្សាហកម្មមួយនេះ។

សារព័ត៌មាន Bloomberg (ប៊្លូមប៊ឺគ) បានចេញផ្សាយ កាលពីថ្ងៃចន្ទ ទី៩ ខែមករា ថា រដ្ឋាភិបាលចិន កំពុងតែការពារក្រុមហ៊ុនផលិតបន្ទះឈីបមួយចំនួនរបស់ខ្លួន ដោយការចំណាយលុយយ៉ាងខ្ជះខ្ជាយ សម្រាប់ការផ្គត់ផ្គង់របស់ពួកគេ ព្រោះតម្រូវការតិច កំពុងតែធ្វើឱ្យមានការលំបាក សម្រាប់ក្រុមហ៊ុនផលិតបន្ទះឈីប នៅទូទាំងពិភពលោក។ ប៉ុន្តែឧស្សាហកម្ម Semiconductor របស់ប្រទេសចិន ក៏ប្រឈមមុខនឹងបញ្ហាជាមួយនឹងគូប្រជែងរបស់ខ្លួន នៅកន្លែងផ្សេងៗទៀត ដែលមិនមានការព្រួយបារម្ភ អំពីភាពអរិភាព ដែលមិនចេះរីងស្ងួត ពីរដ្ឋាភិបាលសហរដ្ឋអាមេរិក។

ក្រុងប៉េកាំង អាចព្យាយាមចំណាយ តាមវិធីសាស្រ្ដរបស់ខ្លួន ងាកចេញពីបញ្ហាទាំងនោះ ប៉ុន្តែប្រហែលជាមានរឿងទាក់ទងនឹងការផលិតឧបករណ៍អេឡិចត្រូនិកទំនើបៗ ដែលមានលុយមិនអាចទិញបាន។ ឧស្សាហកម្មបន្ទះឈីបរបស់ប្រទេសចិន តែងតែដើរយឺតជាងសហរដ្ឋអាមេរិក ហើយក្រុងប៉េកាំង បានពឹងផ្អែកទៅលើបច្ចេកវិទ្យារបស់បណ្ដាប្រទេសបស្ចិមលោក សម្រាប់ការទិញឧបករណ៍ Semiconductor ដ៏ទំនើបបំផុត ឧបករណ៍ផលិតបន្ទះសៀគ្វី និង ចំណេះដឹង។

ក្រោយពេលមានភាពតានតឹងកើនឡើង អស់រយៈពេលជាច្រើនឆ្នាំកន្លងមកនេះ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានចំណាយពេលយ៉ាងច្រើន កាលពីឆ្នាំ២០២២ សម្រាប់បង្កើតវិធីសាស្រ្ដ កាត់ផ្តាច់ប្រទេសចិន ចេញពីបច្ចេកវិទ្យាបែបនេះ ព្រោះក្រុងវ៉ាស៊ីនតោន ព្យាយាមពន្យឺតនូវការវិវឌ្ឍរបស់ចិន នៅក្នុងបន្ទះឈីប កម្មវិធីបញ្ញាសិប្បនិម្មិត និង បច្ចេកវិទ្យាយោធា។

បើតាមលោកស្រី Reva Goujon នាយិកាក្រុមហ៊ុន Rhodium Group LLC (រ៉ូឌៀម ហ្គ្រុប អិលអិលស៊ី) បានឱ្យដឹង ថា «ផលប៉ះពាល់ អាចជាការបង្កកនៅនឹងកន្លែង នៅក្នុងវិស័យឧស្សាហកម្ម Semiconductor របស់ប្រទេស ព្រោះសហរដ្ឋអាមេរិកកំពុងតែបង្កើតសៀវភៅហ្គេមថ្មី នៅទីនេះ»។

មុនពេលគោលនយោបាយរបស់សហរដ្ឋអាមេរិក ត្រូវបានប្រកាសនោះ ក្រុមហ៊ុនចិនមួយចំនួនបានចាប់ផ្តើមបិទគម្លាត ទៅលើមេដឹកនាំពិភពលោក។ ចំណែកក្រុមហ៊ុនបច្ចេកវិទ្យាមេម៉ូរី យ៉ាងហ្សេ (Yangtze Memory Technologies Co.) ជាក្រុមហ៊ុនផ្គត់ផ្គង់បន្ទះឈីប Flash Memory ក្លាយជាគន្លឹះផែនការដ៏ធំរបស់ប្រទេសចិន នៅក្នុងការបង្កើតអាជីវកម្មផលិតបន្ទះសៀគ្វីជាសកល។ ក្រុមហ៊ុននេះ បាន និង កំពុងចរចា សម្រាប់ការផ្គត់ផ្គង់ ដល់ក្រុមហ៊ុន Apple Inc. ដែលជាកិច្ចព្រមព្រៀងមួយ នឹងមានសុពលភាពដ៏សំខាន់ សម្រាប់ការបង្កើនសមត្ថភាពរបស់ក្រុមហ៊ុន។

កាលពីខែតុលា ឆ្នាំ២០២២ សហរដ្ឋអាមេរិក បានប្រកាសអំពីការរឹតបន្តឹងនូវការនាំចេញបន្ទះឈីប ដែលរារាំងដល់សមត្ថភាពរបស់ក្រុមហ៊ុនចិន ជាច្រើន រួមទាំងក្រុមហ៊ុន Yangtze ក្នុងការទទួលបានគ្រឿងចក្រផលិតឧបករណ៍ទាំងនេះ។ ក្រោយមកទៀត នៅថ្ងៃទី១៥ ខែធ្នូ ក្រុមហ៊ុន Yangtze ក្លាយជាក្រុមហ៊ុនមួយ នៅក្នុងចំណោមក្រុមហ៊ុនចំនួន៣៦របស់ចិន ដែលបានដាក់បញ្ចូលទៅក្នុងបញ្ជីឈ្មោះអង្គភាព តម្រូវឱ្យក្រុមហ៊ុនណាមួយ ផ្គត់ផ្គង់ជាមួយបច្ចេកវិទ្យារបស់អាមេរិក ទទួលបានអាជ្ញាប័ណ្ណ ពីក្រុងវ៉ាស៊ីនតោន។ នេះពិតជាបានសម្លាប់ឱកាសរបស់ក្រុមហ៊ុន Yangtze នៅក្នុងការផ្គត់ផ្គង់ដល់ក្រុមហ៊ុន Apple ឲ្យទាន់ពេលវេលា នៅក្នុងពេលឆាប់ៗនេះ។

កិច្ចខិតខំប្រឹងប្រែងរបស់សហរដ្ឋអាមេរិក គឺចង់រក្សាបច្ចេកវិទ្យាទំនើបរបស់ខ្លួន ឲ្យនៅឆ្ងាយពីដៃរបស់ចិន ហើយក៏ជាការបង្កើនសម្ពាធ ទៅលើរដ្ឋាភិបាលរបស់ប្រធានាធិបតី លោក ស៊ី ជិនពីង (Xi Jinping) នៅក្នុងការកសាងសមត្ថភាពផលិតបន្ទះសៀគ្វីរបស់ប្រទេសចិន។

លោក បាររី ណ័រតុន (Barry Naughton) សាស្រ្តាចារ្យ នៃសាកលវិទ្យាល័យកាលីហ្វ័រញ៉ា នៅ ទីក្រុងសាន់ឌៀហ្គូ (San Diego) បានមានប្រសាសន៍ ថា «ពួកគេពិត ជាមានការព្រួយបារម្ភចំពោះការហាមឃាត់បន្ទះឈីបនេះ។ ជាការឆ្លើយតបដ៏យូរអង្វែងរបស់ពួកគេ គឺថា ពួកគេនឹងថែរក្សានូវឧស្សាហកម្មបន្ទះឈីបផ្ទាល់ខ្លួនរបស់ពួកគេ»។

នៅទីបញ្ចប់ ការប្រជែងគ្នា រវាងសហរដ្ឋអាមេរិក និង ចិន លើវិស័យបច្ចេកវិទ្យាដ៏ទំនើបនេះ ក្លាយជាហ្គេមតស៊ូដ៏ខ្លាំងក្លា។ សហរដ្ឋអាមេរិក នឹងត្រូវតែរក្សាកម្រិតនយោបាយ ដែលប្រេះស្រាំរបស់ខ្លួន នៅក្នុងទិសដៅដូចគ្នា ខណៈក្រុងវ៉ាស៊ីនតោន បានបញ្ចុះបញ្ចូលប្រទេសជប៉ុន ហូឡង់ដ៍ និង សម្ពន្ធមិត្តសំខាន់ៗផ្សេងទៀត ឱ្យបន្តដើរតាមផែនការរបស់ខ្លួន។ ភូមិសាស្ត្រនយោបាយ អាចនឹងពិបាកទៅមុខ។

ទន្ទឹមនឹងនេះដែរ ចិន ជាទូទៅបានបង្ហាញសមត្ថភាព នៅក្នុងការប្រកាន់ខ្ជាប់នូវផែនការ រយៈពេលវែង បើទោះបីជាវាពាក់ព័ន្ធនឹងរយៈពេល នៃភាពមិនរលូនយ៉ាងក៏ដោយ៕

អន្តរជាតិ៖ រដ្ឋធំៗថ្មី ចំនួនពីរទៀតរបស់សហរដ្ឋអាមេរិកគឺ New Jersey និង Ohio បានចូលរួមនៅក្នុងយុទ្ធនាការហាម​ឃាត់​ការ​ប្រើប្រាស់កម្មវិធី TikTok នៅលើទូរស័ព្ទ និងឧបករណ៍ផ្សេងៗទៀតរបស់មន្ត្រីរដ្ឋាភិបាល ក្នុងគោលដៅរក្សាសុវត្ថិភាព និងសន្តិសុខ​ជាតិ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១០ ខែមករា ឆ្នាំ២០២៣។

អភិបាលរដ្ឋ New Jersey លោក Phil Murphy ដែលជាអ្នកប្រជាធិបតេយ្យបាននិយាយថា បន្ថែមពីលើការហាមប្រាមកម្មវិធីវីដេអូខ្លីដែលជាកម្មសិទ្ធិរបស់ក្រុមហ៊ុនបច្ចេកវិទ្យាចិន ByteDance ពីឧបករណ៍របស់រដ្ឋ លោកក៏កំពុងហាមឃាត់អ្នកលក់កម្មវិធី ផលិតផល និងសេវាកម្មពីអ្នកលក់ជាងរាប់សិបនាក់ រួមទាំងក្រុមហ៊ុន Huawei, Hikvision , Tencent Holdings LTD , ZTE Corporation និង Kaspersky Lab ។

ការិយាល័យរបស់ Murphy បាននិយាយថា «មានការព្រួយបារម្ភផ្នែកសន្តិសុខជាតិអំពីទិន្នន័យអ្នកប្រើប្រាស់ ដែលរដ្ឋាភិបាលចិនអាចតម្រូវឱ្យ ByteDance ផ្តល់»។

អភិបាលរដ្ឋ Ohio លោក Mike DeWine មកពីគណបក្សសាធារណរដ្ឋ បាននិយាយថា «ការអនុវត្តភាពឯកជន និងសុវត្ថិភាពតាមអ៊ីនធឺណិតទាំងនេះ បង្កការគំរាមកំហែងដល់សន្តិសុខជាតិ និងក្នុងតំបន់ និងសុវត្ថិភាពតាមអ៊ីនធឺណិតដល់អ្នកប្រើប្រាស់កម្មវិធី និងវេទិកាទាំងនេះ និងឧបករណ៍ដែលរក្សាទុកកម្មវិធី និងវេទិកានានា»។

កាលពីថ្ងៃសុក្រកន្លងទៅនេះ អភិបាលរដ្ឋ Wisconsin លោក Tony Evers បាននិយាយថា លោកមានគម្រោងចូលរួមជាមួយរដ្ឋផ្សេងទៀតក្នុងការហាមឃាត់ការប្រើប្រាស់កម្មវិធីវីដេអូដ៏ពេញនិយមដែលមានអ្នកប្រើប្រាស់ច្រើនជាង ១០០លាននាក់នៅសហរដ្ឋអាមេរិក។

អភិបាលរដ្ឋនៃសាធារណរដ្ឋបានដឹកនាំការចោទប្រកាន់ដើម្បីហាមឃាត់ TikTok ពីឧបករណ៍របស់រដ្ឋ ហើយអភិបាលរដ្ឋប្រជាធិបតេយ្យមួយចំនួនមានភាពយឺតយ៉ាវក្នុងការធ្វើដូច្នេះ។

ការអំពាវនាវដើម្បីហាមឃាត់ TikTok ពីឧបករណ៍របស់រដ្ឋាភិបាលបានឡើងកំដៅបន្ទាប់ពីលោក Christopher Wray នាយក FBI របស់សហរដ្ឋអាមេរិកបាននិយាយកាលពីខែវិច្ឆិកាថាវាបង្កហានិភ័យសន្តិសុខជាតិ។ Wray បានដាក់ទង់ការគំរាមកំហែងដែលរដ្ឋាភិបាលចិនអាចទាញយកកម្មវិធីដើម្បីមានឥទ្ធិពលលើអ្នកប្រើប្រាស់ ឬគ្រប់គ្រងឧបករណ៍របស់ពួកគេ។

Reutes បានរាយការណ៍កាលពីថ្ងៃសុក្រថា TikTok បានរៀបចំដំណើរការជួលអ្នកប្រឹក្សាដែលនឹងជួយវាឱ្យអនុវត្តកិច្ចព្រមព្រៀងសន្តិសុខដែលមានសក្តានុពលជាមួយសហរដ្ឋអាមេរិក ខណៈដែលមន្ត្រីសហរដ្ឋអាមេរិកកាន់តែច្រើនប្រឆាំងនឹងកិច្ចព្រមព្រៀងបែបនេះ។

អស់រយៈពេល ៣ឆ្នាំ TikTok បាននិងកំពុងស្វែងរកការធានាដល់ទីក្រុងវ៉ាស៊ីនតោនថាទិន្នន័យផ្ទាល់ខ្លួនរបស់ពលរដ្ឋអាមេរិកមិនអាចចូលប្រើប្រាស់បានទេ ហើយខ្លឹមសាររបស់វាមិនអាចត្រូវបានរៀបចំដោយបក្សកុម្មុយនិស្តចិន ឬអង្គភាពណាមួយដែលស្ថិតនៅក្រោមឥទ្ធិពលរបស់ទីក្រុងប៉េកាំងនោះទេ​ ៕

បរទេស៖ លទ្ធផលពីការក្រុមស្រាវជ្រាវមកពីប្រទេសចិន បានចង្អុលបង្ហាញទៅកាន់ទំនាក់ទំនងរវាងការទទួលទានភេសជ្ជៈប៉ូវកម្លាំង និងការទំពែកតាមលំនាំបុរស ដោយបញ្ជាក់ថា ភេសជ្ជៈប៉ូវកម្លាំងជាកត្តារួមចំណែកបង្កឱ្យមានការបាត់បង់សក់កាន់តែច្រើន។

ការបាត់បង់សក់ និងទំពែកចំពោះបុរស វាគឺជាបញ្ហាសុខភាពពិភពលោកដ៏ធំបំផុតមួយ និងពិបាកក្នុងការថែទាំ ឬជួសជុល ដោយសារតែមានហេតុផលជាច្រើនដែលប្រែប្រួលពីមនុស្សម្នាក់ទៅមនុស្សម្នាក់ ដោយមានកត្តាអំពីហ្សែន អាយុ កម្រិតស្ត្រេស ទម្លាប់អនាម័យ អំពីធម្មជាតិនៃជីវិត និងទាក់ទងនជាមួយអាហារ។

ទោះជាយ៉ាងណាកាលពីពេលថ្មីនេះ មានការសារស្រាវជ្រាវមួយត្រូវបានបោះពុម្ព ដែលបង្ហាញពីទំនាក់ទំនងរវាងការផឹកភេសជ្ជៈប៉ូវកម្លាំង និងការជ្រុះសក់ – ទំពែក ដោយក្រុមស្រាវជ្រាវដែលត្រួតពិនិត្យការស្រាវជ្រាវ បានអះអាងយ៉ាងដូច្នេះថា ភេសជ្ជៈដែលមានជាតិស្ករច្រើន ដូចជាភេសជ្ជៈប៉ូវកម្លាំងជាដើម វានឹងជួយពន្លឿនការជ្រុះសក់ក្នុងចំនោមបុរសវ័យក្មេងលឿនជាងមុន។

ដោយការសិក្សានេះបានធ្វើឡើង ដោយក្រុមអ្នកវិទ្យាសាស្ត្រមកពីសាកលវិទ្យាល័យ Tsinghua ក្នុងទីក្រុងប៉េកាំងបានត្រួតពិនិត្យករណីសិក្សានេះ។ ហើយទិន្នន័យដែលទទួលបានក្នុងការសិក្សាបានមកពីការសិក្សារយៈពេល ៤ ខែលើបុរសវ័យក្មេង​ ១,០០០ នាក់ដែលមានអាយុចន្លោះពី ១៨ ទៅ ៤៥ ឆ្នាំ។

ជាមួយគ្នានោះអ្នកចូលរួមក្នុងគម្រោងស្រាវជ្រាវនេះ ត្រូវបានកំណត់ពេលទទួលទានភេសជ្ជៈទាំងនេះ ចន្លោះពី ១ ទៅ ៣ លីត្រ ក្នុងមួយសប្តាហ៍ បន្ទាប់មកស្ថានភាពរាងកាយនឹងត្រូវបានវាយតម្លៃ។

ជាលទ្ធិផលក្រុមអ្នកស្រាវជ្រាវបានរកឃើញថា បុរសវ័យក្មេងនៅក្នុងក្រុមពិសោធន៍ដែលផឹកភេសជ្ជៈប៉ូវកម្លាំង ភេសជ្ជៈអេឡិចត្រូលីត និងភេសជ្ជៈជាច្រើនមុខ រួមទាំងតែកាហ្វេជាមួយនឹងការបន្ថែមនូវេឋរសជាតិផ្អែម ហានិភ័យខ្ពស់នៃការជ្រុះសក់។

បន្ថែមពីនោះនៅចុងបញ្ចប់នៃការពិសោធន៍ ត្រូវបានគេកត់សម្គាល់ឃើញថាអ្នកចូលរួមដែលបាន ពិសាភេសជ្ជៈផ្អែមច្រើនជាងម្តងក្នុងមួយថ្ងៃមានហានិភ័យនៃការជ្រុះសក់ខ្ពស់ជាងអ្នកចូលរួមដែល មិន បានពិសាភេសជ្ជៈផ្អែមដល់ទៅ ៤២ភាគរយ។

ប៉ុន្តែទោះជាយ៉ាងណាវាមិនអាចសន្និដ្ឋានបានទាំងស្រុងថាភេសជ្ជៈប៉ូវកម្លាំង និងភេសជ្ជៈផ្អែមផ្សេងទៀត គឺជាមូលហេតុផ្ទាល់នៃការជ្រុសសក់ទំពែកនោះឡើយ លើសពីនេះទៀតចំនួនមនុស្សដែលចូលរួមក្នុងការពិសោធន៍ស្រាវជ្រាវនេះដែលមានលទ្ធិផលជ្រុះសក់ ពួកគេក៏មានជីវិតប្រចាំថ្ងៃដែលខុសប្រក្រតី ដូចជាពួកគេបាន បញ្ហាថប់បារម្ភ និងរបបអាហារផងដែរ។

យ៉ាងណាមិញវាអាចទៅរួចដែលមានជាការរួមចំណែកពីភេសជ្ជៈប៉ូវកម្លាំង និងភេសជ្ជៈផ្អែមទាំងនោះដែលបណ្ដាលឱ្យជ្រុះសក់ ដូច្នេះលោកអ្នកគួរតែទទួលទានភេសជ្ជៈប៉ូវកម្លាំង និងភេសជ្ជៈផ្អែមដោយមានទំនួលខុសត្រូវ និងមានកម្រិតដែលត្រឹមត្រូវ៕ ប្រភព៖ dailynews