កៀវ៖ ការហៅទូរស័ព្ទរវាងប្រធានាធិបតីអាមេរិក លោក ចូ បៃឌិន (Joe Biden) និងប្រធានាធិបតីអ៊ុយក្រែនលោក  វ្លូឌៀមៀ ហ្សាលេនស្គី​ (Vladimir Zelensky) កាន់តែក្តៅគគុក នៅពេលដែលមេដឹកនាំនៃរដ្ឋាភិបាលទីក្រុងកៀវ ចាប់ផ្តើមទាមទារជំនួយបន្ថែម បើទោះបីជាលោក Biden បានចុះហត្ថលេខាលើជំនួយយោធាដែលមានតម្លៃ ១ពាន់លានដុល្លារកាលពីដើមឆ្នាំនេះក៏ដោយ។ នេះបើយោងតាមការចុះផ្សាយរបស់សារព័ត៌មាន Nypost ។

ការហៅទូរស័ព្ទកាលពីខែមិថុនា ដែលជាការហៅទូរស័ព្ទមួយក្នុងចំនោមមេដឹកនាំទាំងពីរបានប្រែក្លាយការសាកល្បងនៅពេលដែលលោក ហ្សាលេនស្គី (Zelensky) ចាប់ផ្តើមរាយបញ្ជីនូវអ្វីដែលទីក្រុងកៀវ (Kiev) ត្រូវការ ខណៈជំនួយមិនទទួលបានភ្លាមៗបន្ទាប់ពីលោក បៃឌិន (Biden) បានប្រកាសកញ្ចប់ជំនួយនោះ។

ប្រធានាធិបតីអាមេរិក លោក បៃឌិន (Biden) បានរំឭក ហ្សាលេនស្គី (Zelensky) អំពីចិត្តសប្បុរសរបស់ប្រជាជនអាមេរិក ដោយសង្កត់ធ្ងន់ថារដ្ឋបាលរបស់គាត់ និងយោធាអាមេរិកកំពុងធ្វើអស់ពីសមត្ថភាពដើម្បីជួយអ៊ុយក្រែនក្នុង សង្គ្រាមជាមួយរុស្ស៊ី ដោយលោកបានសង្កត់ធ្ងន់ថា ប្រជាជនអាមេរិកមានចិត្តទូលាយ ហើយរដ្ឋបាលរបស់លោកកំពុងធ្វើការ ដើម្បីផ្តល់អាវុធដល់អ៊ុយក្រែន ដូច្នេះ លោក Zelensky អាចបង្ហាញការដឹងគុណបន្ថែមទៀត។

គួររំលឹកដែលថា ក្នុងរយៈពេល៨ខែ ចាប់តាំងពីមានការផ្ទុះសង្រ្គាមរវាងប្រទេសអ៊ុយក្រែន និងរុស្សី សហរដ្ឋអាមេរិក បានផ្គត់ផ្គង់ជំនូយដល់អ៊ុយក្រែនជាហូហែរ ខណៈជំនួយបច្ចុប្បន្ននេះបាន​កើនឡើង​រហូត​ដល់​ចំនួន ១៤.៦០០ លាន​ដុល្លារ ៕