នាថ្ងៃទី៣១ ធ្នូ កន្លងមក លោក Suthipong Kongpool មកពីផ្នែកអាកាសចរប្រទេសថៃ បង្ហាញថា ខណៈចិនមាននយោបាយបើកប្រទេសនៅថ្ងៃទី៨ ខែមករានេះ មានជើងហោះហើរចិនជាច្រើនសួរនាំការធ្វើដំណើរមកកាន់ប្រទេសថៃ ព្រមទាំងជើងហោះហើរថៃមានគម្រោងបើកការហោះហើរទៅទីក្រុងផ្សេងៗរបស់ចិនផងដែរ ។ អ្នកធ្វើការផ្នែកហោះហើរនានានឹងពន្លឿនផែនការរបស់ខ្លួន ព្រមទាំងបន្ថែមជើងហោះហើរមកកាន់ថៃក្នុងឆ្នាំនេះ ដូច្នេះ ថៃត្រៀមទទួលអ្នកទេសចរចិននាពេលបុណ្យចូលឆ្នាំចិនខាងមុខ ។

លោកបន្តថា ការត្រឡប់មកធ្វើដំណើររបស់អ្នកទេសចរចិន នឹងជាកត្តាសំខាន់សម្រាប់ការងើបឡើងវិញផ្នែកហោះហើររបស់ថៃ ។ ភ្ញៀវទេសចរក្នុងឆ្នាំនេះ នឹងកើនឡើងប្រមាណ៦២លាននាក់ ឬស្មើ៥០% បើធៀបនឹងឆ្នាំ២០១៩ មុនពេលផ្ទុះជំងឺកូវីត-១៩ ព្រោះចិនជាទីផ្សារសំខាន់សម្រាប់ថៃ ។

លោកបន្តទៀត ថា បច្ចុប្បន្ន មានជើងហោះហើរពីថៃទៅកាន់ប្រទេសចិន សរុប១៥លើកក្នុង១សប្តាហ៍ ដែលជាចំនួនតិចបំផុតបើធៀបនឹងឆ្នាំ២០១៩ មានជើងហោះហើរដល់ទៅជាង៤០០ជើងក្នុង១សប្តាហ៍ ។ លោកជឿថា ពេលចិនបន្ធូរបន្ថយលក្ខខណ្ឌការធ្វើដំណើរនោះ ជើងហោះហើរពីចិននឹងកើនឡើងភ្លាមៗ ពីព្រោះថៃជាប្រទេសគោលដៅសំខាន់ដែលជនជាតិចិននិយមមកកម្សាន្តស្រាប់ទៅហើយ ។

ប្រទេសថៃនឹងត្រឡប់មកធ្វើការហោះហើរនៅទីក្រុងបាងកក ឈៀងម៉ៃ និងភូកេត ជាមុនសិន ពីព្រោះជើងហោះហើរនៅព្រលានយន្តហោះទាំងនេះត្រៀមរួចរាល់ក្នុងការទទួលអ្នកទេសចរចិន ។ ថៃប៉ាន់ស្មានថា នៅក្នុងឆ្នាំ២០២៣នេះ នឹងមានភ្ញៀវទេសចរចិនធ្វើដំណើរឆ្លងកាន់អាកាសយានដ្ឋានប្រមាណ៧-១០លាននាក់ ៕ ប្រភព ៖ 3Plus NEWS

នាយករដ្ឋមន្ត្រីកូរ៉េខាងត្បូង លោក Han Deok-soo បានមានប្រសាសន៍កាលពីថ្ងៃទី៣០ ធ្នូថា កូរ៉េខាងត្បូងត្រៀមបង្ខំឱ្យអ្នកដំណើរគ្រប់រូបពីប្រទេសចិន ត្រូវបង្ហាញលទ្ធផលពិនិត្យកូវីត ចាប់តាំងពីថ្ងៃទី៥ មករា តទៅ ។ លទ្ធផលពិនិត្យនេះ បើជាទម្រង់ PCR គឺត្រូវធ្វើមុនពេលធ្វើដំណើរមិនលើសពី៤៨ម៉ោង ប៉ុន្តែបើពិនិត្យតាមបែប ATK គឺធ្វើមិនលើសពី២៤ម៉ោងមុនពេលធ្វើដំណើរ ។

មិនត្រឹមតែប៉ុណ្ណោះ អ្នកដំណើរពីប្រទេសចិន គិតចាប់ពីថ្ងៃទី២ មករា នឹងត្រូវពិនិត្យ PCR ម្តងទៀតពេលធ្វើដំណើរមកដល់កូរ៉េខាងត្បូង ។
នាយករដ្ឋមន្ត្រីកូរ៉េខាងត្បូងបន្ថែមថា នឹងផ្តល់ទិដ្ឋាការដោយមានកំណត់ចំពោះជនជាតិចិន រហូតដល់ចុងខែមករានេះ ព្រមទាំងផ្អាកបន្ថែមជើងហោះហើរពីប្រទេសចិនជាបណ្តោះអាសន្ន ។ ជើងហោះហើរពីចិន ត្រូវមកចុះចតនៅព្រលានយន្តហោះអន្តរជាតិ Incheon តែមួយប៉ុណ្ណោះ ។

ការធ្វើបែបនេះ កើតឡើងក្រោយពីរដ្ឋាភិបាលចិនមាននយោបាយបន្ធូរបន្ថយគោលនយោបាយជំងឺកូវីត-១៩ ក្នុងប្រទេសរបស់ខ្លួនភ្លាមៗ ដែលធ្វើឱ្យមេរោគនេះរាតត្បាតយ៉ាងឆាប់រហ័ស ។ ជាមួយគ្នានេះ ចិនក៏បានលើកលែងការឃុំខ្លួនអ្នកដំណើរចូលប្រទេសផងដែរ ដែលធ្វើឱ្យពលរដ្ឋជាច្រើននាំគ្នាកក់សំបុត្រយន្តហោះចេញពីប្រទេស ព្រោះពួកគេអាចត្រឡប់មកវិញបានដោយងាយស្រួល ប៉ុន្តែបែរជាធ្វើឱ្យប្រទេសជាច្រើនកង្វល់ទៅវិញ ។

នៅមុននេះ ប្រទេសជប៉ុនប្រកាសថា អ្នកដំណើរពីចិនតម្រូវឱ្យត្រួតរកជំងឺកូវីតនៅព្រលានយន្តហោះសិន រីឯសហរដ្ឋអាមេរិកក៏ប្រកាសថា ត្រូវមានលទ្ធផលពិនិត្យជំងឺកូវីតមុនធ្វើដំណើរចូលប្រទេសរបស់ខ្លួនផងដែរ៕

ប្រភព ៖ sanook

រដ្ឋធានីវ៉ាស៊ីតោន៖ ដោយសារតែបន្ទះឈីប កំពុងតែដើរតួនាទីយ៉ាងសំខាន់ នៅក្នុងសម័យបច្ចេកវិទ្យាដ៏ទំនើប នាពេលបច្ចុប្បន្ន ទើបធ្វើឲ្យសហរដ្ឋអាមេរិក និង ចិន ដែលជាមហាអំណាចសេដ្ឋកិច្ចទី១ និង ទី២ កំពុងតែប្រជែងគ្នាយ៉ាងខ្លាំង នៅក្នុងវិស័យនេះ។

សារព័ត៌មាន The New York Times បានចេញផ្សាយ កាលពីថ្ងៃអាទិត្យ ទី១ ខែមករា ឆ្នាំ២០២៣ ថា ចំពេលមានសង្គ្រាមត្រជាក់ នៃការប្រកួតប្រជែងបច្ចេកវិទ្យាជាមួយនឹងចិន នោះ បណ្ដាក្រុមហ៊ុនជាច្រើនរបស់សហរដ្ឋអាមេរិក បានសន្យាផ្ដល់ទឹកប្រាក់ រហូតដល់ជិត២០០ពាន់លានដុល្លារ សម្រាប់គម្រោងវិនិយោគបន្ទះឈីប ចាប់តាំងពីដើមឆ្នាំ២០២០ រហូតមក។ ប៉ុន្ដែការវិនិយោគទៅលើវិស័យនេះ មិនមែនជារឿងសាមញ្ញនោះឡើយ។

នៅក្នុងអំឡុងខែកញ្ញា កន្លងទៅនេះ ក្រុមហ៊ុនឈីបដ៏ធំ Intel បានប្រមូលប្រមូលផ្តុំក្រុមមន្ត្រី នៅលើដែនដីមួយកន្លែង នៅជិតទីក្រុង Columbus រដ្ឋអូហាយ៉ូ (Ohio) ជាកន្លែងដែលក្រុមហ៊ុនយក្សមួយនេះ បានសន្យា ថា នឹងវិនិយោគយ៉ាងហោចណាស់ មានទំហំទឹកប្រាក់ រហូតដល់២០ពាន់លានដុល្លារ នៅក្នុងរោងចក្រថ្មី ចំនួន២ សម្រាប់ការបង្កើត Semiconductor ។

មួយខែក្រោយមកទៀត ក្រុមហ៊ុនបច្ចេកវិទ្យា Micron បានប្រារព្ធសម្ពោធកន្លែងផលិតថ្មីមួយនៅជិត Syracuse រដ្ឋញូវយ៉ក ជាកន្លែងដែលក្រុមហ៊ុនបន្ទះឈីប រំពឹង ថា នឹងចំណាយប្រាក់ រហូតដល់២០ពាន់លានដុល្លារ នៅចុងទសវត្សរ៍នេះ ហើយនៅទីបំផុត អាចនឹងកើនឡើងប្រហែលជា៥ដង។

នៅក្នុងអំឡុងខែធ្នូ ទើបនឹងកន្លងផុតទៅនេះ ក្រុមហ៊ុនផលិតឈីបរបស់តៃវ៉ាន់ Taiwan Semiconductor Manufacturing Company បានរៀបចំកម្មវិធី shindig នៅទីក្រុង Phoenix ជាកន្លែងដែលក្រុមហ៊ុនមួយនេះ គ្រោងនឹងបង្កើននូវការវិនិយោគរបស់ខ្លួន ចំនួន៣ដង មានទំហំទឹកប្រាក់ កើនដល់ដល់៤០ពាន់លានដុល្លារសហរដ្ឋអាមេរិក និង សាងសង់រោងចក្រថ្មីទីពីរ សម្រាប់ការបង្កើតបន្ទះឈីបកម្រិតខ្ពស់។

ការសន្យានេះ ក្លាយជាផ្នែកមួយ នៃការកើនឡើងដ៏ធំសម្បើម នៅក្នុងផែនការផលិតបន្ទះឈីបរបស់សហរដ្ឋអាមេរិក នៅក្នុងរយៈពេល១៨ខែកន្លងមក ដែលទំហំនេះ ត្រូវបានគេប្រដូចទៅនឹងការវិនិយោគ នៅក្នុងសម័យសង្រ្គាមត្រជាក់ នៃការរត់ប្រណាំងគ្នា នៅក្នុងវិស័យអវកាស។ ចំណែកការរីកដុះដាលនៅក្នុងវិស័យនេះ មានផលប៉ះពាល់ដល់ភាពជាអ្នកនាំបច្ចេកវិជ្ជាសកលលោក និង ភូមិសាស្ត្រនយោបាយ ព្រោះសហរដ្ឋអាមេរិក មានគោលបំណងរារាំង ដល់ប្រទេសចិន ពីការក្លាយជាមហាអំណាចឈានមុខគេ នៅក្នុងបន្ទះសៀគ្វី ជាបំណែកស៊ីលីកូន (silicon) ដែលបានជំរុញនូវការបង្កើតឧបករណ៍កុំព្យូទ័រ ប្រកបដោយការច្នៃប្រឌិត ដូចជា ស្មាតហ្វូន …ជាដើម។

បច្ចុប្បន្ននេះ បន្ទះឈីប ក្លាយជាផ្នែកមួយដ៏សំខាន់ នៃជីវិតនាសម័យទំនើប សូម្បីតែការបង្កើតរបស់ឧស្សាហកម្មបច្ចេកវិទ្យា ចាប់ទាំងពីឧបករណ៍យោធា និង រថយន្ត រហូតដល់ឧបករណ៍ផ្ទះបាយ និង ប្រដាប់ក្មេងលេង ក៏ត្រូវការវាផងដែរ។

បើតាមសមាគមឧស្សាហកម្ម Semiconductor ដែលជាក្រុមពាណិជ្ជកម្ម បានឲ្យដឹង ថា នៅទូទាំងប្រទេសមហាអំណាចកំពូលរបស់ពិភពលោក ទាំងសេដ្ឋកិច្ច និង យោធាមួយនេះ មានក្រុមហ៊ុនចំនួន៣៥ បានសន្យាផ្ដល់លុយ រហូតដល់ជិត២០០ពាន់លានដុល្លារអាមេរិក សម្រាប់គម្រោងផលិតពាក់ព័ន្ធនឹងបន្ទះឈីប ចាប់តាំងពីនិទាឃរដូវ ឆ្នាំ២០២០ រហូតមក។ ប្រាក់ទាំងនេះ គ្រោងនឹងចំណាយលើកផលិត នៅក្នុងរដ្ឋចំនួន១៦ រួមទាំងរដ្ឋតិចសាស់ អារីហ្សូណា និងញូវយ៉ក …នៅក្នុងរោងចក្រផលិតបន្ទះឈីបថ្មី ចំនួន២៣ ហើយការពង្រីករោងចក្រចំនួន៩ និង ការវិនិយោគពីក្រុមហ៊ុនផ្គត់ផ្គង់ឧបករណ៍ និង សម្ភារដល់ឧស្សាហកម្ម។

ការជំរុញលើការផលិតបន្ទះឈីបនេះ ក៏ជាផ្នែកមួយ នៃគំនិតផ្តួចផ្តើមគោលនយោបាយឧស្សាហកម្ម បង្កើតឡើង ដោយរដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ដែលកំពុងដាក់ចុះផែនការ ចំណាយយ៉ាងហោចណាស់៧៦ពាន់លានដុល្លារ នៅក្នុងជំនួយ ពន្ធឥណទាន និង ប្រាក់ឧបត្ថម្ភផ្សេងៗទៀត ដើម្បីលើកទឹកចិត្តដល់ការផលិតបន្ទះឈីប នៅក្នុងស្រុក។ ទន្ទឹមនឹងការផ្តល់មូលនិធិដ៏ច្រើន សម្រាប់ហេដ្ឋារចនាសម្ព័ន្ធ និងថាមពលស្អាត កិច្ចខិតខំប្រឹងប្រែងនេះ បង្កើតបានជាការវិនិយោគដ៏ធំបំផុតរបស់សហរដ្ឋអាមេរិក នៅក្នុងការផលិត ដែលគិតចាប់តាំងពីសង្គ្រាមលោកលើកទី២មក ខណៈរដ្ឋាភិបាលសហព័ន្ធន៍ បញ្ចេញការចំណាយលើនាវាថ្មី បំពង់បង្ហូរប្រេង និង រោងចក្រផលិតអាលុយមីញ៉ូម និង កៅស៊ូ។

លោកប្រធានាធិបតី បៃដិន បានកាន់កាប់ផ្នែកមួយដ៏សំខាន់ នៃរបៀបវារៈសេដ្ឋកិច្ចរបស់គាត់ លើការជំរុញឲ្យផលិតបន្ទះឈីបរបស់សហរដ្ឋអាមេរិក ប៉ុន្តែហេតុផលរបស់គាត់ គឺហួសពីអត្ថប្រយោជន៍សេដ្ឋកិច្ច។ បន្ទះឈីដ៏បទំនើបបំផុតរបស់ពិភពលោក នាពេលបច្ចុប្បន្ននេះ ត្រូវបានផលិត នៅតៃវ៉ាន់ ដែលចិនតែតែងទាមទារសិទ្ធិគ្រប់គ្រង នៅលើដែនកោះមួយនេះ។ បញ្ហានេះ បានបង្កឱ្យមានការភ័យខ្លាច ថា ខ្សែសង្វាក់ផ្គត់ផ្គង់ Semiconductor អាចត្រូវបានរំខាននៅក្នុងហេតុការណ៍ជម្លោះណាមួយ អាចនឹងកើតឡើង ហើយថា សហរដ្ឋអាមេរិក នឹងប្រឈមមុខ នៅក្នុងគុណវិបត្តិផ្នែកបច្ចេកវិទ្យានេះ។

លោក ស៊ី ជិនពីង ប្រធានាធិបតីចិន កាលពីកន្លងទៅថ្មីៗនេះ បានដាក់ចេញផែនការវិនិយោគ លើវិស័យបន្ទះឈីបដោយខ្លួនឯង ដែលគ្រោងនឹងចំណាយ រហូតដល់១៤៣ពាន់លានដុល្លារអាមេរិក។ សកម្មភាពបែបនេះ ជាប្រកួតប្រជែងគ្នាជាថ្មី រវាងប្រទេសមហាអំណាចលោកខាងលិច និង មហាយក្សចិន៕

រដ្ឋធានីកៀវ៖ ស្របពេលឆ្នាំចាស់ ទើបនឹងផ្លាស់ចូលមកដល់ឆ្នាំថ្មីនេះ កងទ័ពការពារទឹកដីរបស់អ៊ុយក្រែន បានអះអះអាង អំពីការវាយប្រហារកម្ទេចទីតាំងឈរជើងរបស់កម្លាំងទាហានរុស្ស៊ី ខណៈក្រុងមូស្គូ បានអះអាង អំពីការបាញ់ទម្លាក់យន្ដហោះចម្បាំងរបស់ក្រុងកៀវ។

សារព័ត៌មាន The Eurasia Times បានចេញផ្សាយ កាលពីថ្ងៃអាទិត្យ ទី១ ខែមករា ឆ្នាំ២០២៣ ថា ក្រសួងការពារជាតិរុស្ស៊ី បានះអាងថា កម្លាំងទាហានអាកាសរបស់ក្រុងមូស្គូ បានប្រើប្រាស់យន្ដហោះមួយគ្រឿង ប្រភេទ Su-35S (ស៊ូ-35S) បាញ់ទម្លាក់យន្ដហោះចម្បាំង និង ឧទ្ធម្ភាគចក្ររបស់អ៊ុយក្រែន សរុប៣គ្រឿង រួមមាន យន្ដហោះចម្បាំង ប្រភេទ MiG-29 (មីគ-២៩) ចំនួន១គ្រឿង និង ឧទ្ធម្ភាគចក្រ ប្រភេទ Mi-8 ចំនួន២គ្រឿង។ ចំណែកការវាយប្រហារទៅលើកម្លាំងសត្រូវនេះ បានធ្វើឡើង កាលពីថ្ងៃទី២៩ និង ៣០ ខែធ្នូ នៅលើតំបន់ដូណែតស្ក៍ (Donetsk) នាភាគខាងកើត ប្រទេសអ៊ុយក្រែន។

សារព័ត៌មាន Ukrinform បានចេញផ្សាយ កាលពីថ្ងៃអាទិត្យ ទី១ ខែមករា ថា កងទ័ពអាកាសរបស់អ៊ុយក្រែន បានវាយប្រហារ ទៅលើទីតំាំងឈរជើងរបស់ទាហានរុស្ស៊ី ចំនួន១៣កន្លែង ហើយកងមីស៊ីល និង កាំភ្លើងធំ បានវាយចំគោលដៅ ដែលជាកន្លែងប្រមូលផ្តុំកម្លាំងទាហាន និង ឧបករណ៍យោធារបស់សត្រូវ ចំនួន២កន្លែង។

អគ្គសេនាធិការកងទ័ពអ៊ុយក្រែន បានបញ្ជាក់ នៅក្នុងសេចក្ដីរាយការណ៍របស់ខ្លួន ហើយបានបង្ហោះ នៅលើបណ្ដាញសង្គមហ្វេសប៊ុក កាលពីវេលាម៉ោង៦ល្ងាច ថ្ងៃអាទិត្យ ទី១ ខែមករា ថា កម្លាំងទាហានរុស្ស៊ី កាលពីថ្ងៃដដែលនេះ បានវាយប្រហារតាមអាកាស ចំនួន៣៥លើក។ ស្របគ្នានោះ កម្លាំងសត្រូវ បានប្រើប្រាស់ដ្រូនសាហ៊ីត-136 (Shahed-136) ផលិតនៅក្នុងប្រទេសអ៊ីរ៉ង់ ហើយដ្រូនទាំងនោះក៏ត្រូវបានកងទ័ពអ៊ុយក្រែន បាញ់ទម្លាក់អស់ផងដែរ។ ប៉ុន្ដែកាលពី១ថ្ងៃមុននេះ កងទ័ពរុស្ស៊ី បានវាយប្រហារ ចំនួន១៦លើក ដោយប្រើប្រាស់ប្រព័ន្ធកាំភ្លើង MLRS ដោយរួមទាំងការវាយប្រហារទៅលើមន្ទីរពេទ្យរបស់កុមារមួយកន្លែង នៅក្នុងទីក្រងខឺរសុន (Kherson)។

អគ្គសេនាធិការកងទ័ពអ៊ុយក្រែន បានបន្ដថា «រហូតមកដល់ពេលនេះ ការគំរាមកំហែង ដោយការវាយប្រហារតាមអាកាស និង មីស៊ីល ពីកម្លាំងទាហានរុស្ស៊ី នៅតែបន្ដពាសពេញដែនដីរបស់អ៊ុយក្រែន។ ប៉ុន្ដែទោះជាយ៉ាងណា កាលពីថ្ងៃសៅរ៍ ទី៣១ ខែធ្នូ រុស្ស៊ី បានបាត់បង់កម្លាំងទាហាន ចំនួន៧៦០នាក់ ខណៈពួកគេបានព្យាយាមប៉ុនប៉ង វាយប្រហារកាន់កាប់សមរភូមិបាឃ្មូត (Bakhumt) ហើយព្យាយាមស្ដារទីតាំងយុទ្ធសាស្រ្ដយោធារបស់ខ្លួន នៅលើសមរភូមិគូព្យានស្ក៍ (Kupiansk) លីម៉ាន់ (Lyman) និង អាវឌីវកា (Avdiivka) ឡើងវិញ។ កម្លាំងសត្រូវ កំពុងតែព្យាយាមការពារសមរភូមិណូវ៉ូប៉ាវលីវស្កេ (Novopavlivske) និង ហ្សាប៉ូរីសហ្សា (Zaporizhzhia) ហើយប្រមូលផ្ដុំកម្លាំងទ័ពឡើងវិញ នៅក្នុងតំបន់ខឺរសុន។

អគ្គសេនាធិការកងទ័ពអ៊ុយក្រែន បានបន្ថែម ថា វិធានការការចល័តទ័ពរបស់រុស្ស៊ី កំពុងតែបន្ត នៅតំបន់គ្រីមៀ ដែលបានដណ្ដើមកាន់កាប់ជាបណ្តោះអាសន្ន ពីអ៊ុយក្រែន កាលពីអំឡុងឆ្នាំ២០១៤។ កងទ័ពការពារទឹកដីរបស់អ៊ុយក្រែន បានសម្លាប់ទាហានរុស្ស៊ី ចំនួន ១០៦ ៧២០នាក់ ចាប់តាំងពីការផ្ទុះសង្គ្រាម នៅថ្ងៃទី២៤ ខែកុម្ភៈ ឆ្នាំ២០២២ រហូតមកដល់ថ្ងៃទី១ ខែមករា ឆ្នាំ២០២៣ ហើយបានកម្ទេចគ្រឿងសឹកអស់រាប់ពាន់លានដុល្លារ៕

បរទេស៖ មានហេតុការណ៍ដ៏គួរឱ្យភ្ញាក់ផ្អើល ក្រោយអាជ្ញាធរក្នុងព្រលានយន្តហោះប្រទេសម៉ិកស៊ិក រឹបអូសបានកញ្ចប់មួយដែលនៅខាងក្នុងមានលលាដ៍ក្បាលមនុស្សចំនួន ៤ សម្រាប់ការដឹកជញ្ជូនតាមសំបុត្រអន្តរជាតិ ក្នុងគោលដៅផ្ញើទៅកាន់សហរដ្ឋអាមេរិក។

កាលពីថ្ងៃទី៣១ ខែធ្នូ ឆ្នាំ២០២២កន្លងទៅនេះ មន្ត្រីម៉ិកស៊ិកបានរាយការណ៍ អំពីករណីប្រទះឃើញនូវកញ្ចប់មួយដែលត្រូវបានរឹបអូសនៅអាកាសយានដ្ឋាន Queretaro ម៉ិកស៊ិកកណ្តាល។

ប៉ុន្តែជាលទ្ធផលក្នុងការធ្វើ X-ray ប្រអប់វាបានបង្ហាញថា នៅខាងក្នុងកញ្ចប់នេះមានលលាដ៍ក្បាលមនុស្សចំនួន 4 រុំដោយ foil  ដែលអីវ៉ាន់នេះហៀបនឹងបញ្ជូនទៅកាន់សហរដ្ឋអាមេរិកទៅហើយ។

ជាមួយគ្នានោះបើតាមការបញ្ជាក់របស់ឆ្មាំជាតិ ម៉ិកស៊ិកបានឱ្យដឹងបន្ថែមថា កញ្ចប់នេះត្រូវបានផ្ញើពីទីក្រុងមួយក្នុងរដ្ឋ Michoacan  នៅឆ្នេរខាងលិចនៃប្រទេសម៉ិកស៊ិក ដែលជាតំបន់អសន្ដិសុខ និងមានហិង្សាបំផុតមួយក្នុង ប្រទេស។

ទោះជាយ៉ាង ឆ្មាំជាតិម៉ិកស៊ិកនោះមិនបានផ្តល់ព័ត៌មានឱ្យលម្អិតបន្ថែមអំពីអាយុ អត្តសញ្ញាណ ឬហេតុផលដែលអាចកើតមានឡើងសម្រាប់ការបញ្ជូនអដ្ឋិធាតុមនុស្សនេះពីម៉ិកស៊ិកទៅកាន់សហរដ្ឋអាមេរិកនោះបានទេ។

ទោះជាយ៉ាងណាក្រុមហ៊ុនដឹកជញ្ជូន ​និងអជ្ញារធរកំពុងតែធ្វើការស៊ើបអង្កេតទាក់ទងនឹងរឿងរ៉ាវខាងលើ ហើយនឹងបន្តចាត់ការទៅតាមផ្លូវច្បាប់៕ ប្រភព៖ pptvhd36