ប្រទេសជាច្រើននៅអាស៊ីកំពុងប្រឈមនឹងអាកាសធាតុត្រជាក់ និងព្រិលធ្លាក់ខ្លាំង ដែលធ្វើឱ្យប៉ះពាល់ដល់ការរស់នៅប្រចាំថ្ងៃរបស់ពលរដ្ឋ និងការធ្វើដំណើរ ក្នុងនោះមានប្រទេសចិន ជប៉ុន កូរ៉េខាងត្បូង និងថៃ ។

ប្រទេសចិនបានប្រកាសពីអាកាសធាតុត្រជាក់ខ្លាំងក្នុងតំបន់ជាច្រើនទូទាំងប្រទេសកាលពីចុងសប្តាហ៍មុន ជាពិសេស ទីក្រុងម៉ូហេ និងខេត្តភាគឦសាន គេរាយការណ៍ថា មានសីតុណ្ហភាពទាបបំផុតស្មើ-៥៣អង្សាសេ ដូចគ្នានឹងទីក្រុងស៊ុនគែមានសីតុណ្ហភាពទាបបំផុតស្មើ-៤៩អង្សាសេ ។ លំនៅឋានពលរដ្ឋ និងផ្លូវនានាក្នុងទីក្រុងទាំងនេះគ្របដណ្តប់ទៅដោយព្រិល ។ រីឯនៅទីក្រុងយានថៃស្ថិតនៅភាគខាងកើតប្រទេសវិញ បុគ្គលិកធ្វើការលើរថភ្លើងបានចេញមកបោសសម្អាតព្រិលដែលធ្លាក់លើផ្លូវដែក ។

ដូចគ្នានេះដែរ តំបន់ជាច្រើននៅប្រទេសជប៉ុនបានប្រឈមនឹងអាកាសធាតុត្រជាក់ដែលមិនធ្លាប់ជួបពីមុន ជាពិសេស តំបន់ខាងលិចជាប់នឹងសមុទ្រ ទីក្រុងម៉ានីវ៉ា ខេត្តអូកាយ៉ាម៉ាមានព្រិលធ្លាក់ខ្លាំងបំផុត និងមានអ្នកស្លាប់ម្នាក់ផងដែរ ។ គេសង្កេតឃើញការធ្វើដំណើរតាមរថភ្លើង រថយន្ត និងយន្តហោះបានជួបនឹងបញ្ហាព្រិលធ្លាក់ខ្លាំងធ្វើឱ្យរថយន្ត និងរថយន្តដឹកទំនិញនានានៅលើផ្លូវជាតិនៅតំបន់កណ្តាលស្ទះចរាចរណ៍ប្រមាណ១០គីឡូម៉ែត្រ ។ លើសពីនេះ មានពលរដ្ឋ៣.០០០នាក់ត្រូវជាប់នៅតាមស្ថានីយរថភ្លើងក្នុងក្រុងក្យូតូ ដោយសាររថភ្លើងផ្អាកធ្វើដំណើរ ចំណែកយន្តហោះបានផ្អាកជើងហោះហើរជាង៣០០ជើង ។

រីឯប្រទេសកូរ៉េខាងត្បូង អាជ្ញាធរបានប្រកាសអំពីអាកាសធាតុត្រជាក់ខ្លាំងក្នុងតំបន់ជាច្រើន ជាពិសេស ទីក្រុងសេអ៊ូល សីតុណ្ហភាពនៅពេលព្រឹកធ្លាក់ចុះដល់-១៩,៣អង្សាសេ ខណៈខេត្តកាំងវ៉ន និងខេត្តហ្យុងហ្គីមានសីតុណ្ហភាពទាប-២៥,១អង្សាសេ ។ នាយកដ្ឋានឧតុនិយមកូរ៉េខាងត្បូងរំពឹងថា ព្រិលនឹងធ្លាក់ខ្លាំងពេញមួយថ្ងៃ ក្នុងនោះនៅខេត្តកូយង់ហ្គី ព្រិលអាចមានកម្ពស់ជាង១០សង់ទីម៉ែត្រ និងតំបន់ភ្នំលើកោះជេជូ ព្រិលមានកម្ពស់ពី៥-១០សង់ទីម៉ែត្រ ។ ទោះយ៉ាងណា ជើងហោះហើរចូលប្រទេស និងចេញពីប្រទេស បានផ្តល់សេវាកម្មឡើងវិញហើយ បន្ទាប់ពីបានលុបចោលការហោះហើររាប់រយជើងដោយសារខ្យល់ និងព្រិលធ្លាក់ខ្លាំង ។

ចំណែកខេត្តភាគខាងជើងប្រទេសថៃក៏មានសីតុណ្ហភាពធ្លាក់ចុះដែរ ហើយតំបន់ភាគខាងត្បូងជាប់ឈូងសមុទ្រថៃមានភ្លៀងធ្លាក់ និងរលកខ្លាំង ។ ខេត្តភាគឦសានក៏មានអាកាសធាតុត្រជាក់ដែរ ក្នុងនោះខេត្តបុរីរាំ សីតុណ្ហភាពបានធ្លាក់ចុះដល់១៤អង្សាសេកាលពីថ្ងៃទី២៥ ខែមករា កន្លងមក ៕

ប្រភព ៖ 3Plus News

ទីក្រុងប៊្រុចសែល៖ រហូតមកដល់ពេលនេះ ប្រមុខទីភ្នាក់ងារថាមពលអាតូមិកអន្ដរជាតិរបស់អង្គការសហប្រជាជាតិ (IAEA) បានចេញមុខ មកអះអាង ប្រាប់ដល់សភាអឺរ៉ុប ថា ប្រទេសអ៊ីរ៉ង់ មានសម្ភារៈនុយក្លេអ៊ែរគ្រប់គ្រាន់ សម្រាប់ការបង្កើតគ្រាប់បែកមហាប្រល័យលោកជាច្រើនគ្រាប់។

សារព័ត៌មាន The Times of Israel បានចេញផ្សាយ កាលពីព្រឹក ថ្ងៃព្រហស្បតិ៍ ទី២៦ ខែមករា ថា លោក រ៉ាហ្វែល ហ្ក្រូសស៊ី (Rafael Grossi) អគ្គនាយកទីភ្នាក់ងារថាមពលអាតូមិកអន្ដរជាតិ (IAEA) របស់អង្គការសហប្រជាជាតិ បានបញ្ជាក់ កាលពីថ្ងៃអង្គារ ថា គាត់មានគម្រោង នឹងធ្វើដំណើរទៅកាន់ប្រទេសអ៊ីរ៉ង់ នៅខែក្រោយនេះ សម្រាប់កិច្ចពិភាក្សាដែលមានតម្រូវការយ៉ាងខ្លាំង ស្តីអំពីការចាប់ផ្តើមកិច្ចសហប្រតិបត្តិការ លើសកម្មភាពនុយក្លេអ៊ែររបស់ក្រុងតេអ៊ីរ៉ង់។ ជាមួយគ្នានេះ ប្រមុខអង្គការឃ្លាមើលនុយក្លេអ៊ែរ រូបនេះ ថែមទាំង បានព្រមាន ថា ក្រុងតេអ៊ីរ៉ង់ មានសម្ភារគ្រប់គ្រាន់ សម្រាប់ផលិតអាវុធនុយក្លេអ៊ែរជាច្រើនគ្រាប់។

លោកអគ្គនាយកទីភ្នាក់ងារថាមពលអាតូមិកអន្ដរជាតិ បានប្រាប់ដល់សមាជិកសភាអឺរ៉ុប ថា «ខ្ញុំប្រហែលជានឹងវិលត្រឡប់ទៅកាន់ទីក្រុងតេអ៊ីរ៉ង់… នៅក្នុងខែកុម្ភៈ សម្រាប់ជាកិច្ចសន្ទនានយោបាយ ដែលត្រូវការចាំបាច់ ឬ ការបង្កើតកិច្ចព្រមព្រៀងឡើងវិញ ជាមួយនឹងប្រទេសអ៊ីរ៉ង់»។

ដំណើរទស្សនកិច្ចបែបនេះ នឹងកើតឡើង នៅក្នុងពេលដ៏អាក្រក់មួយ សម្រាប់ការចរចា ក្រោមកិច្ចសម្របសម្រួល ពីសហភាពអឺរ៉ុប នៅក្នុងគោលបំណងធ្វើឲ្យកិច្ចព្រមព្រៀង ឆ្នាំ២០១៥ រស់ឡើងវិញ ដើម្បីទប់ស្កាត់សកម្មភាពបរមាណូរបស់អ៊ីរ៉ង់ ជាថ្នូរនឹងការដកទណ្ឌកម្មអន្តរជាតិ។

ប្រមុខអង្គការឃ្លាំមើលនុយក្លេអ៊ែរ រូបនេះ បានបញ្ជាក់ ថា «គាត់មានក្ដីសង្ឃឹម អំពីវឌ្ឍនភាពមួយចំនួន ជុំវិញការស្ដារកិច្ចសហប្រតិបត្ដិការរបស់អ៊ីរ៉ង់ ឡើងវិញ ជាមួយនឹងទីភ្នាក់ងាររបស់គាត់ នៅក្នុងដំណើរទស្សនកិច្ច នាពេលខាងមុខនេះ។ ចំណែកសកម្មភាពអាតូមិករបស់ក្រុងតេអ៊ីរ៉ង់ នាពេលថ្មីៗនេះ រួមទាំង ការចម្រាញ់ជាតិអ៊ុយរ៉ានីញ៉ូម បានកើនឡើង ហួសការកំណត់របស់ JCPOA ឆ្ពោះទៅដល់កម្រិតមានតម្រូវការចាំបាច់បំផុត សម្រាប់ការផលិតអាវុធមហាប្រល័យលោកជាច្រើនគ្រាប់។ សកម្មភាពបែបនេះ ពិតជាមិនល្អទាល់តែសោះនោះឡើយ»។

លោក រ៉ាហ្វែល ហ្ក្រូសស៊ី (Rafael Grossi) បានសង្កត់ធ្ងន់ ថា «អ៊ីរ៉ង់ បានប្រមូលសម្ភារនុយក្លេអ៊ែរគ្រប់គ្រាន់ សម្រាប់ការផលិតអាវុធនុយក្លេអ៊ែរជាច្រើនគ្រាប់ ហើយនេះមិនមែនមានត្រឹមតែមួយនៅចំណុចនោះទេ ដោយបានរាយបញ្ជីអ៊ុយរ៉ាញ៉ូម ចំនួន៧០គីឡូក្រាម ដែលសម្បូរទៅដោយការបន្សុទ្ធ ចំនួន៦០ភាគរយ និង ១ ០០០ គីឡូក្រាម បានបន្សុទ្ធ ចំនួន២០ភាគរយ។ ចំណែកកម្រិត សម្រាប់ការផលិតអាវុធនុយក្លេអ៊ែរ ត្រូវបានគេចាត់ទុកថា មានការបន្សុទ្ធជិត ៩០ភាគរយ។

ទោះជាយ៉ាងណា លោកប្រធាន Grossi បានកត់សម្គាល់ ថា ឃ្លាំងស្តុកដ៏ធំ នៃសារធាតុអ៊ុយរ៉ាញ៉ូម ដែលចម្រាញ់រួច មិនមែនមានន័យ ថា អ៊ីរ៉ង់ មានអាវុធនុយក្លេអ៊ែរនោះឡើយ។ ចំណែកការផលិតគ្រាប់បែកអាតូមិក នឹងទាមទារឲ្យមានការរចនា និង ការសាកល្បង៕

ប្រទេសជប៉ុន ៖ នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានដាស់តឿនថា យើងត្រូវដោះស្រាយបញ្ហាចំនួនពលរដ្ឋជប៉ុនធ្លាក់ចុះ ខណៈប្រទេសជប៉ុនបានប្រឈមមុខនឹងវិបត្តិសង្គមមនុស្សចាស់កើនឡើង និងអត្រាកំណើតធ្លាក់ចុះ ។ លោកបានថ្លែងកាលពីពេលថ្មីៗនេះថា បច្ចុប្បន្ន ចំនួនពលរដ្ឋជប៉ុនកំពុងមានបញ្ហាប្រឈម ហើយអត្រាកំណើតធ្លាក់ចុះជាបន្តបន្ទាប់ ។ លោកថា ៖ «វិបត្តិនេះត្រូវតែដោះស្រាយភ្លាមៗ រង់ចាំយូរមិនបានទៀតទេ ព្រោះពេលនេះជាឱកាសមួយដើម្បីដោះស្រាយបញ្ហាបាន» ។

លោកនាយករដ្ឋមន្ត្រីត្រូវការជំរុញរឿងនេះជារឿងរបស់ជាតិ និងតាំងចិត្តផ្តល់ប្រាក់ឧបត្ថម្ភទ្វេដងដើម្បីបង្កើនចំនួនពលរដ្ឋនៅខែមិថុនា ដោយបង្កើតភ្នាក់ងារធ្វើការពាក់ព័ន្ធជាមួយកុមារនិងគ្រួសារ នៅក្នុងខែមេសា ។

ក្រសួងសុខាភិបាលជប៉ុនបង្ហាញថា ជប៉ុនជាប្រទេសមួយមានអត្រាកំណើតតិចបំផុតក្នុងពិភពលោក ខណៈកាលពីឆ្នាំ២០២២ មានទារកកើតថ្មីមិនដល់៨សែននាក់ផង ។ វាជាលើកទី១ហើយដែលមានអត្រាកំណើតទាបបំផុតចាប់តាំងពីឆ្នាំ១៨៩៩ មក ។ ជាមួយគ្នានេះ ជប៉ុនក៏ជាប្រទេសមានពលរដ្ឋអាយុវែងបំផុតក្នុងពិភពលោកផងដែរ តាមស្ថិតិឆ្នាំ២០២០ ជប៉ុនមានអ្នកអាយុច្រើនចំនួន១.៥០០នាក់ ពួកគេមានអាយុលើសឬអាយុ១០០ឆ្នាំ ប៉ុន្តែជប៉ុនមានអត្រាកំណើតទាបជាបន្តបន្ទាប់ រហូតក្លាយជាវិបត្តិធ្វើឱ្យប្រទេសនេះសម្បូរពលរដ្ឋអាយុច្រើន និងគ្មានយុវជនធ្វើការគ្រប់គ្រាន់ ។

អ្នកជំនាញនិយាយថា មានកត្តាជាច្រើនទៀតដែលបណ្តាលឱ្យកើតវិបត្តិដូចជា ការចាយវាយលើជីវភាពប្រចាំថ្ងៃខ្ពស់ ទីកន្លែងថែទាំកុមារក្នុងទីក្រុងមិនគ្រប់គ្រាន់ពិបាកចិញ្ចឹមក្មេង ដែលធ្វើឱ្យប្តីប្រពន្ធមានកូនកាន់តែតិច ខណៈពលរដ្ឋនៅតាមខេត្តក៏មានកូនតិចដូចគ្នា ។ អាកប្បកិរិយាចំពោះអាពាហ៍ពិពាហ៍ និងការមានកូនរបស់ពលរដ្ឋជប៉ុនក្នុងរយៈពេលប៉ុន្មានឆ្នាំចុងក្រោយនេះបានផ្លាស់ប្តូរ ខណៈគូស្នេហ៍នីមួយៗមិនព្រមរៀបការ និងមិនចង់មានកូន ដោយសារជួបនឹងការឆ្លងជំងឺកូវីដផង រួមទាំងយុវជនបារម្ភពីអនាគតការងាររបស់ខ្លួនផង ។

ទោះយ៉ាងណា ជាច្រើនឆ្នាំកន្លងមកនេះ រដ្ឋាភិបាលជប៉ុនបានព្យាយាមលើកទឹកចិត្តឱ្យពលរដ្ឋមានកូនឱ្យបានច្រើន ទាំងនយោបាយកែលម្អទីកន្លែងថែទាំក្មេង និងចំណាយប្រាក់បន្ថែមគាំទ្រឱ្យពលរដ្ឋមានកូនច្រើននៅតាមខេត្ត ។

តាមការស្ទង់មតិរបស់ YuWa Population Research បង្ហាញថា ជប៉ុនជាប្រទេសមានការចាយវាយលើការថែទាំកូនខ្ពស់ស្ថិតក្នុងលំដាប់ទី៣ របស់ពិភពលោក បន្ទាប់ពីចិន និងកូរ៉េខាងត្បូង ។ ប្រទេសចិន និងកូរ៉េខាងត្បូង ក៏ប្រឈមមុខនឹងផលប៉ះពាល់សេដ្ឋកិច្ចផងដែរ ដោយសារចំនួនពលរដ្ឋធ្លាក់ចុះ ៕

ប្រភព ៖ TNN Online

ផ្ទៃ​ផែន​ដី ​គ្រប់​ដណ្ដប់​ដោយ​មហាសមុទ្រ​ប្រមាណ​ ៧១%។ អ្នក​ជំនាញ​ខាង​ភូមិសាស្ត្រ​បាន​បែងចែក​ប្រភេទ​មហាសមុទ្រ​លើ​សកល​លោក​ ទៅ​តាម​ឈ្មោះ​តំបន់។

បើយោងទៅតាមប្រវត្តិសាស្រ្តតាំងពីដើមមកបានឱ្យដឹងថា ពិភពលោកយើងនេះមានអាងមហាសមុទ្រចំនួន៤ទីតាំង ដែលត្រូវបានគេដាក់ឈ្មោះឱ្យថា មហាសមុទ្រអាត្លង់ទិច មហាសមុទ្រប៉ាស៊ីហ្វិក មហាសមុទ្រឥណ្ឌា ព្រមទាំងមហាសមុទ្រអាក់ទិក។​

​មហាសមុទ្រប៉ាស៊ីហ្វិក គឺជាអាងទឹកធំបំផុត និងជ្រៅបំផុតនៃមហាសមុទ្រពិភពលោក ដោយគ្របដណ្ដប់លើផ្ទៃដីប្រមាណ ១៦៥ ២៥០​​ ០០០ លានគីឡូមែត្រការ៉េ។ វាលាតសន្ធឹងពីមហាសមុទ្រអាកទិកនៅភាគខាងជើងទៅមហាសមុទ្រខាងត្បូង ហើយមកជាប់នឹងទ្វីបអាស៊ី និងអូស្ត្រាលីនៅភាគខាងលិច ដោយឡែកជាប់អាមេរិកនៅភាគខាងកើត។

មហាសមុទ្រនេះ ត្រូវបានគេរុករកឃើញនៅសតវត្សទី១៦ ដោយលោក ហ្វឺ ឌី ណាន់ មេក ហ្គឺរ លេន (Ferdinand Magellan)។ មិនត្រឹមតែជាមហាសមុទ្រធំជាងគេនោះទេ វាក៏មហាសមុទ្រដែលមានជម្រៅជ្រៅជាងគេផងដែរ ដល់ទៅ ១០ ៩៣៥ម៉ែត្រ ដែលកន្លែងជ្រៅនោះស្ថិតនៅ ភាគខាងលិចនៃមហាសមុទ្រ។

ប្រទេសថៃ ៖ ការស្នើសុំ និងការអំពាវនាវពីការទុកម៉ូដសក់របស់សិស្ស-និស្សិតថៃហាក់មានប្រសិទ្ធភាព និងយល់ព្រមពីក្រសួងអប់រំ ក្រោយពីពួកគេស៊ូទ្រាំជាមួយសាលារៀន ដែលមានវិន័យយ៉ាងតឹងតែងទៅលើម៉ូតសក់របស់ពួកគេ ។ គ្រូដែលគ្រប់គ្រងវិន័យសិស្ស និងគ្រូបន្ទុកថ្នាក់មួយចំនួនបានប្រើប្រាស់អំណាចរបស់ខ្លួនចាត់ការជាមួយសិស្សដោយផ្ទាល់ ដូចជា កាត់សក់សិស្ស ហើយគ្រូទាំងនេះធ្វើអំពើមិនគប្បីទៅលើសិស្ស ដោយគ្រាន់តែម៉ូដសក់គ្មានរបៀប ។ លើសពីនេះ គ្រូខ្លះជេរប្រមាថធ្វើឱ្យសិស្សខ្មាស់មិត្តភក្តិ ឬស្តីបន្ទោសនៅមុខដងទង់ជាតិ ដោយប្រើអំណាចតាមតែចិត្តចង់ រហូតដល់ក្លាយជាការគំរាម រំលោភសិទ្ធិ និងសេរីភាពបុគ្គល ។

លោកស្រី ទ្រីនុត ថៀនថង (Treenut Thienthong ) រដ្ឋមន្ត្រីក្រសួងអប់រំថៃឱ្យដឹងថា លោកស្រីបានចុះហត្ថលេខាផ្តល់សិទ្ធទៅគ្រឹះស្ថានសិក្សាជាអ្នកកំណត់ម៉ូដសក់សិស្សតាំងពីឆ្នាំ២០២០ មកម៉្លេះ ។ ការទុកម៉ូដសក់ មិនថាសក់ខ្លី ឬសក់វែង ក្រសួងអប់រំបើកឱកាសឱ្យសាលារៀននីមួយៗមានសិទ្ធិចេញច្បាប់កំណត់ម៉ូដសក់សិស្សរបស់ខ្លួនផ្អែកតាមភាពសមរម្យ និងមតិយោបល់របស់អ្នកពាក់ព័ន្ធ ដូចជា សិស្ស ក្រុមប្រឹក្សានិស្សិត មាតាបិតា អាណាព្យាបាលសិស្ស សហគមន៍មូលដ្ឋាន បុគ្គល ឬក្រុមមនុស្សផ្សេងទៀតដែលសាលារៀនអញ្ជើញមកចូលរួមសម្រេចចិត្ត ។

បន្ទាប់ពីសាលារៀនកំណត់ច្បាប់ការទុកម៉ូដសក់ហើយ សាលារៀននីមួយៗត្រូវជូនដំណឹងពីរបៀបវិន័យម៉ូដសក់នេះឱ្យសាធារណជនទូទៅបានជ្រាប ឬបិទប្រកាសនៅបរិវេណសាលា ។ សាលារៀនត្រូវផ្តល់ដំណឹងដល់សិស្ស និស្សិត លោកគ្រូ អ្នកគ្រូ និងបុគ្គលិកក្នុងសាលារៀនទាំងអស់ ដើម្បីឱ្យសិស្សប្រតិបត្តិតាមបានត្រឹមត្រូវ មានរបៀបរៀបរយ និងច្បាស់លាស់ផងដែរ ។

ក្រសួងអប់រំបញ្ជាក់ថា បន្ទាប់ពីក្រសួងបានប្រកាសលុបចោលហើយ ការទុកម៉ូដសក់របស់សិស្សទាំងអស់ គឺស្ថិតនៅលើការសម្រេចចិត្តរបស់សាលារៀននីមួយៗ ។ ជាការពិត ម៉ូដសក់សិស្ស គឺតម្រូវទៅតាមការកំណត់របស់សាលារៀន ប៉ុន្តែបច្ចុប្បន្ននេះ គ្រូបង្រៀន និងនាយកសាលាមួយចំនួនមានអាកប្បកិរិយាចង់ប្រើអំណាចជាមួយសិស្សតែម្តង ៕ ប្រភព ៖ Khaosod