ប្រទេសថៃ ៖ ក្រសួងការងារថៃបានដាស់តឿនដល់និយោជកទាំងឡាយ ដែលជួលកម្មករបរទេសមកធ្វើការដោយគ្មានប័ណ្ណអនុញ្ញាត នឹងត្រូវពិន័យជាប្រាក់ចាប់ពី១ម៉ឺនបាត ដល់១០ម៉ឺនបាតសម្រាប់កម្មករបរទេសម្នាក់ ។ ក្នុងករណីធ្វើខុសម្តងទៀត នឹងជាប់គុកមិនលើសពី១ឆ្នាំ ហើយពិន័យចាប់ពី៥ម៉ឺនបាត ដល់២០ម៉ឺនបាត ឬទាំងជាប់គុក ទាំងពិន័យ ។ កម្មករបរទេសដែលលួចមកធ្វើការខុសច្បាប់នៅប្រទេសថៃ គឺត្រូវពិន័យចាប់ពី៥ពាន់បាត ដល់៥ម៉ឺនបាត និងត្រូវបញ្ជូនត្រឡប់ទៅប្រទេសកំណើតវិញ ។

លោក សុឆាត ឈុំគ្លីន រដ្ឋមន្ត្រីក្រសួងការងារបង្ហាញថា លោក ប្រាយុទ្ធ ចាន់អូចា នាយករដ្ឋមន្ត្រីថៃ បានជំរុញឱ្យក្រសួងការងារគ្រប់គ្រងលើការងាររបស់កម្មករបរទេស ក្រោយពីការរាតត្បាតនៃជំងឺកូវីដ-១៩ បានធូរស្បើយ ។ កម្លាំងពលកម្មជាកត្តាមិនអាចខ្វះបានក្នុងការងើបឡើងវិញនៃសេដ្ឋកិច្ច ហេតុនេះ ក្រសួងការងារបានកែតម្រូវច្បាប់ ដោយផ្តោតលើនិយោជក គ្រឹះស្ថាននានា និងកម្មករបរទេស ត្រូវអនុវត្តតាមសេចក្តីសម្រេចរបស់គណៈរដ្ឋមន្ត្រី ដែលអនុញ្ញាតឱ្យកម្មករបរទេសស្នាក់នៅ និងធ្វើការជាបណ្តោះអាសន្ន ។

បច្ចុប្បន្ន គេប្រទះឃើញកម្មករបរទេសលួចចូលមកធ្វើការជាបន្តបន្ទាប់ ហេតុនេះ ក្រសួងការងារសហការជាមួយផ្នែកសន្តិសុខដូចជា ទាហាន និងប៉ូលិស បានរៀបចំក្រុមការងារពិសេសចុះត្រួតពិនិត្យ បង្ក្រាប និងចាប់ខ្លួនកម្មករបរទេស និយោជក និងអ្នកពាក់ព័ន្ធនឹងការនាំចូលកម្មករបរទេសខុសច្បាប់មកធ្វើការ ដើម្បីការពារមិនឱ្យធ្វើខុសទៀត និងដាក់ទោសឱ្យចងចាំ ។

លោក សុឆាត ឈុំគ្លីន និយាយថា ៖ «សូមដាស់តឿន និងសហការជាមួយនិយោជក ម្ចាស់គ្រឹះស្ថាន មិនត្រូវជួលកម្មករបរទេសខុសច្បាប់ទេ បើចង់ជួលពួកគេ គឺនិយោជកត្រូវអនុវត្តឱ្យបានត្រឹមត្រូវតាមច្បាប់ ។ បើនិយោជក និងកម្មករបរទេសបានអនុវត្តតាមលក្ខខណ្ឌ និងច្បាប់ត្រឹមត្រូវ ពួកគេនឹងទទួលបានអត្ថប្រយោជន៍ពីសន្តិសុខសង្គម និងទទួលបានការការពារសិទ្ធិតាមច្បាប់ការងារ មិនខុសគ្នាពីពលរដ្ឋថៃ ព្រោះយើងមើលថែកម្មករបរទេសនិងថៃ ស្មើភាពគ្នាតាមសិទ្ធិមនុស្ស» ។

ចំណែកលោក ផៃរ៉ូច ឈោតិសៈធៀន អគ្គនាយកដ្ឋានការងារ ថ្លែងថា បើអ្នកណាម្នាក់ប្រទះឃើញ ឬសង្ស័យថា មានជនបរទេសលួចចូលមកធ្វើការខុសច្បាប់ក្នុងប្រទេសថៃ គឺអាចផ្តល់ដំណឹងទៅកាន់ការិយាល័យការងារគ្រប់ខេត្ត ការិយាល័យការងារក្រុងបាងកក ឬរាយការណ៍ទៅក្រសួងការងារ ៕

ប្រភព ៖ The States Times

សហរដ្ឋអាមេរិក ៖ កាលពីថ្ងៃទី២៥ ខែមករា នៅសេតវិមាន លោកប្រធានាធិបតីអាមេរិក ចូ បៃដេន ថ្លែងថា លោកបានសម្រេចចិត្តបញ្ជូនរថក្រោះ Abrams ចំនួន៣១គ្រឿងទៅឱ្យអ៊ុយក្រែន ក្នុងតម្លៃសរុប៤០០លានដុល្លារអាមេរិកនាប៉ុន្មានខែខាងមុខ ។ លោកក៏បានអរគុណប្រទេសអាល្លឺម៉ង់ដែលសម្រេចចិត្តបញ្ជូនរថក្រោះប្រភេទ Leopard 2 ចំនួន១៤គ្រឿងឱ្យអ៊ុយក្រែន និងសរសើរបណ្តាប្រទេសអឺរ៉ុបផ្សេងទៀត រួមទាំងប៉ូឡូញផងដែរ ដែលបញ្ជូនរថក្រោះប្រភេទដូចគ្នាផលិតនៅអាល្លឺម៉ង់ទៅឱ្យអ៊ុយក្រែន ។

លោក បៃដេន ថ្លែងថា ៖ «ការបញ្ជូនរថក្រោះនេះធ្វើឱ្យប្រធានាធិបតីរុស្ស៊ីដឹងថា ខ្លួនគិតខុស ដែលថាអឺរ៉ុប និងអាមេរិកមិនឯកភាពគ្នាជួយអ៊ុយក្រែន ខណៈរុស្ស៊ីគិតថា រថក្រោះទាំងនេះមិនអាចគំរាម និងវាយប្រហាររុស្ស៊ីបានទេ» ។

លោក បៃដេន និយាយបែបនេះទំនងជាមិនចង់បង្កជម្លោះផ្ទាល់ជាមួយរុស្ស៊ី ខណៈសម្ព័ន្ធមិត្តលោកខាងលិចដឹកនាំដោយអាមេរិក កំពុងត្រៀមជួយអ៊ុយក្រែនវាយបកទៅរុស្ស៊ីវិញ ដោយបណ្តេញកងទ័ពរុស្ស៊ីចេញពីដែនដីអ៊ុយក្រែនក្នុងនិទាឃរដូវខាងមុខ ។

មន្ត្រីជាន់ខ្ពស់នៅវិមានប្រធានាធិបតីអ៊ុយក្រែន លោក Andriy Yermak បានសរសើរពីការប្រកាសបញ្ជូនរថក្រោះជួយអ៊ុយក្រែនរបស់អាល្លឺម៉ង់ អាមេរិក និងប្រទេសផ្សេងទៀត ។ លោកថា ៖ «វាជាថ្ងៃប្រវត្តិសាស្ត្រហើយដែលប្រទេសទាំងនេះដោះស្រាយបញ្ហាចម្រូងចម្រាស់រវាងរុស្ស៊ី និងអ៊ុយក្រែន» ។

មុននេះ លោក Dmitry Peskov អ្នកនាំពាក្យរដ្ឋាភិបាលរុស្ស៊ី ថ្លែងថា ការបញ្ជូនរថក្រោះ Abrams ទៅឱ្យអ៊ុយក្រែន គឺជាការចំណាយប្រាក់ចោល ព្រោះទោះយ៉ាងណា វានឹងត្រូវបានដុតកម្ទេចចោល មិនខុសពីរថក្រោះផ្សេងទៀតនៅអ៊ុយក្រែនទេ ។

រថក្រោះ Abrams មិនដូចគ្នានឹងរថក្រោះ Leopard 2 របស់អាល្លឺម៉ង់ដែលងាយគ្រប់គ្រង សន្សំសំចៃប្រេង និងមានប្រសិទ្ធភាពក្នុងសមរភូមិទេ រថក្រោះ Abrams បំពាក់ដោយអាវុធទំនើប និងតម្លៃថ្លៃ វាលំបាក និងចំណាយខ្ពស់ជាងលើការថែទាំ ព្រោះវាប្រើប្រេងដូចគ្នានឹងយន្តហោះ Jet ។ កងទ័ពអ៊ុយក្រែនត្រូវទទួលការហ្វឹកហាត់ជាមុនសិន ប៉ុន្តែបច្ចុប្បន្ន មិនទាន់មានការប្រកាសពីកន្លែងហ្វឹកហាត់ទេ គឺត្រូវចំណាយពេលច្រើនខែទៀត ។

អ្នកនាំពាក្យក្រុមប្រឹក្សាសន្តិជាតិសេតវិមានអាមេរិក លោក John Kirby ថ្លែងថា វាអាចចំណាយពេលច្រើនខែដែលអាមេរិកនឹងបញ្ជួនរថក្រោះ Abrams ទៅអ៊ុយក្រែនតាមលោកប្រធានាធិបតី ចូ បៃដេន ប្រកាស ព្រោះត្រូវរង់ចាំលក្ខខណ្ឌពាក់ព័ន្ធទាំងអស់រួចរាល់សិន រួមទាំងការត្រៀមខ្លួនរបស់អ៊ុយក្រែនផងដែរ ។ លោកបញ្ជាក់ថា អាមេរិកនឹងគាំទ្រអ៊ុយក្រែននៅពេលចាំបាច់ណាមួយ ហើយមិនទាន់មានការលើកឡើងពីលោកប្រធានាធិបតីរុស្ស៊ី ពូទីន នឹងវាយលុកព្រំដែនអង្គការសន្ធិសញ្ញាអាត្លង់ទិកខាងជើង (ណាតូ) ទេ ៕

ប្រភព ៖ TNN World

្រទេសរុស្ស៊ី ៖ អ្នកនាំពាក្យវិមានក្រឹមឡាំង លោក Dmitry Peskov បាននិយាយទៅកាន់សារព័ត៌មាននៅទីក្រុងមូស្គូថា រថក្រោះប្រយុទ្ធប្រភេទ Abrams របស់អាមេរិក ដែលនឹងបញ្ជូនទៅឱ្យអ៊ុយក្រែននោះ នឹងត្រូវដុតកំទេចចោលក្នុងប្រទេសអ៊ុយក្រែន ។ ប៉ុន្តែលោកថា នៅពេលនេះ នៅមិនទាន់មានការបញ្ជាក់ថា អាមេរិកនឹងបញ្ជូនរថក្រោះ Abrams ឱ្យអ៊ុយក្រែនទេ គឺមានតែការផ្សាយព័ត៌មានប៉ុណ្ណោះ ហើយបើអាមេរិកបញ្ជូនរថក្រោះមែននោះ នឹងជាការខាតបង់ប្រាក់ទទេៗ ព្រោះរថក្រោះទាំងនេះនឹងត្រូវបានដុតចោលនៅអ៊ុយក្រែន ដូចគ្នានឹងអាវុធផ្សេងទៀតដែលប្រទេសលោកខាងលិចបានបញ្ជូនទៅឱ្យអ៊ុយក្រែនកាលពីពេលមុននេះ ។

លោក Dmitry Peskov លើកឡើងបែបនេះ បន្ទាប់ពីមន្ត្រីរបស់អាមេរិកនិយាយទៅកាន់សារព័ត៌មានរ៉យទ័រថា រដ្ឋាភិបាលអាមេរិកត្រៀមបញ្ជូនរថក្រោះ M1 Abrams ជាច្រើនគ្រឿងទៅឱ្យអ៊ុយក្រែន ក្រោយទទួលបានព័ត៌មានថា ប្រទេសអាល្លឺម៉ង់នឹងបញ្ជូនរថក្រោះ Leopard 2 ទៅឱ្យអ៊ុយក្រែនដូចគ្នា ខណៈកាលពីដំបូង អាល្លឺម៉ង់បានបដិសេធបញ្ជូនរថក្រោះរបស់ខ្លួនទៅឱ្យអ៊ុយក្រែន ។

កាលពីពេលមុននេះ ប្រទេសអ៊ុយក្រែនបានអង្វរប្រទេសលោកខាងលិច ឱ្យបញ្ជូនរថក្រោះមកជួយក្នុងសង្គ្រាមជាមួយរុស្ស៊ី ព្រោះកងទ័ពអ៊ុយក្រែនចាំបាច់ត្រូវប្រើប្រាស់អាវុធទំនើបទើបអាចទប់ទល់ជាមួយកងទ័ពរុស្ស៊ីបាន ដើម្បីរំដោះទឹកដីអ៊ុយក្រែនដែលបាត់បង់មកវិញ ដែលទឹកដីនេះស្ថិតនៅភាគខាងកើត និងខាងត្បូងអ៊ុយក្រែន ៕

ប្រភព ៖ TNN World