កាលពីពេលថ្មីៗនេះ​ ភាពចម្រូងចម្រាស់មួយបានកើតឡើងរវាងប្រទេសកម្ពុជា និងថៃ  ដោយកីឡាប្រដាល់សេរីនឹងត្រូវបានគេហៅថា “គុនខ្មែរ” នៅក្នុងព្រឹត្តិការណ៍កីឡាអាស៊ីអាគ្នេយ៍ ស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ 

នាឱកាសចូលរួមការសម្តែង Muay Thai ដែលធ្វើឡើងដោយសិស្សសាលា Nong Hin និងអ្នកប្រដាល់អាជីពប៉ុន្មានរូបទៀតនោះ លោកប្រាយុទ្ធ បានលើកឡើងថា ” Muay Thai ជាសិល្បៈក្បាច់គុនពិសេសមួយ និងជាវប្បធម៌ដ៏មានតម្លៃ មិនអាចកាត់ថ្លៃបាន។ លោកក៏បានស្នើឱ្យស្ថាប័នពាក់ព័ន្ធបន្តលើកកម្ពស់ Muay Thai ជាថាមពលទន់ដែលអាចជួយជំរុញសេដ្ឋកិច្ចប្រកបដោយនិរន្តរភាព”។

ទន្ទឹមគ្នានេះដែរលោកប្រាយុទ្ធ បានសង្កត់ធ្ងន់“មហោស្រព Muay Thai ដ៏អស្ចារ្យឆ្នាំ 2023” នឹងទទួលបានជោគជ័យយ៉ាងខ្លាំង និងអាចធ្វើឱ្យមហាជនស្គាល់ Muay Thai កាន់តែច្បាស់។ ព្រឹត្តិការណ៍នេះនឹងប្រព្រឹត្តទៅចាប់ពីថ្ងៃទី 4 ដល់ថ្ងៃទី 6 ខែកុម្ភៈ នៅឧទ្យាន Rajabhakti”។

ដោយឡែកបញ្ហាមួយថៃ និងគុនខ្មែរ លោកប្រាយុទ្ធ ចាន់អូចា បានអះអាងថា ” យើងនឹងខំអភិរក្ស និងអភិវឌ្ឍន៍ ក្បាច់គុនរបស់យើងមិនឱ្យបាត់បង់ ហើយច្បាស់ណាស់ក្បាច់គុននោះ គួរតែហៅ “Muay Thai”៕

ប្រភព៖ National Thailand

ប្រទេសវៀតណាម ៖ កាលពីថ្ងៃទី២៩ ខែមករា កន្លងមក សារព័ត៌មានវៀតណាម (Vietnam News) រាយការណ៍ថា ចំនួនការផ្ទេរប្រាក់ពីក្រៅប្រទេសមកកាន់វៀតណាម ស្មើ១៩ពាន់លានដុល្លារអាមេរិកនៅឆ្នាំ២០២២ ធ្វើឱ្យវៀតណាមជាប់ចំណាត់ថ្នាក់ក្នុងចំណោម១០ប្រទេស ដែលទទួលបានប្រាក់ផ្ទេរពីក្រៅប្រទេស ។ បច្ចុប្បន្ន ពលករវៀតណាមចំនួន៥,៣លាននាក់ធ្វើការនៅ១៣០ប្រទេសទូទាំងពិភពលោក ។

សារព័ត៌មានវៀតណាមបានដកស្រង់របាយការណ៍ថ្មីៗរបស់ធនាគារពិភពលោកថា ការផ្ទេរប្រាក់ពីក្រៅប្រទេសមកកាន់វៀតណាមបានកើនឡើង៥% នៅឆ្នាំ២០២២ ហើយអាចកើនឡើងពី៣,៦% ទៅ៤,៥% នៅឆ្នាំបន្ទាប់ទៀត ។ ក្នុងចំណោមប្រភពនៃការផ្ទេរប្រាក់ពីបរទេស សហរដ្ឋអាមេរិកជាទឹកដីដែលជនអន្តោប្រវេសន៍វៀតណាមរស់នៅច្រើនជាងគេ បន្ទាប់មកគឺ អង់គ្លេស អូស្ត្រាលី និងកាណាដា ខណៈជប៉ុន កូរ៉េខាងត្បូង និងតៃវ៉ាន់ បានជួលពលករវៀតណាមច្រើនបំផុត ។

បើទោះជាមានការរាតត្បាតនៃជំងឺកូវីដ-១៩ ធ្វើឱ្យប៉ះពាល់ដល់សេដ្ឋកិច្ចពិភពលោកក្នុងរយៈពេល២ឆ្នាំកន្លងមក និងអត្រាអតិផរណាកើនឡើងនៅប្រទេសជាច្រើនក្តី ប៉ុន្តែការផ្ទេរប្រាក់ពីក្រៅប្រទេសមកកាន់វៀតណាម នៅតែមានស្ថេរភាពបើធៀបជាមួយឆ្នាំមុនៗ ។

ធនាគារមួយចំនួនជឿថា ការផ្ទេរប្រាក់ពីបរទេសកើនឡើង មិនត្រឹមតែជួយឱ្យធនាគារទទួលប្រាក់ចំណូលពីការប្រើប្រាស់សេវាកម្មកាន់តែច្រើនប៉ុណ្ណោះទេ ប៉ុន្តែវាជួយបង្កើនទុនបម្រុងរូបិយប័ណ្ណបរទេសផងដែរ ស្របនឹងគោលនយោបាយទាក់ទាញរូបិយប័ណ្ណបរទេសរបស់វៀតណាម ។

តាមរបាយការណ៍បង្ហាញថា ទីក្រុងហូជីមិញបានទទួលការផ្ទេរប្រាក់ពីក្រៅប្រទេសច្រើនបំផុត ស្មើ៦,៨ពាន់លានដុល្លារអាមេរិកនៅឆ្នាំ២០២២ ។ Committee for Overseas Vietnamese រាយការណ៍ថា បច្ចុប្បន្ន មានជនជាតិវៀតណាម៥,៣លាននាក់រស់នៅ និងធ្វើការនៅ១៣០ប្រទេសទូទាំងពិភពលោក ។

តាមទិន្នន័យរបស់ក្រសួងការងារថា ចំនួនពលករវៀតណាមទាំងអស់ដែលធ្វើការនៅក្រៅប្រទេសក្នុងឆ្នាំ២០២២ ស្មើ១៤២.៧៧៩នាក់ ។ ចំនួននេះបានកើនឡើងខ្ពស់បំផុតក្នុងរយៈពេល៣ឆ្នាំកន្លងមក ។ គេរំពឹងថា នៅឆ្នាំ២០២៣នេះ ពលករវៀតណាមទៅធ្វើការក្រៅប្រទេសស្មើប្រមាណ១១ម៉ឺននាក់ ហេតុនេះ នៅឆ្នាំខាងមុខ ការផ្ទេរប្រាក់ពីក្រៅប្រទេសមកកាន់វៀតណាមនឹងកាន់តែច្រើន ៕

ប្រភព ៖ The Better News

ប្រទេសចិន ៖ កាលពីថ្ងៃទី៣០ ខែមករា លោកស្រី ម៉ៅ នីង (Mao Ning) អ្នកនាំពាក្យក្រសួងការបរទេសចិន បានដាស់តឿនសមាជិកសភាតំណាងរាស្ត្រអាមេរិកថា កុំធ្វើដំណើរទៅកាន់ទឹកដីតៃវ៉ាន់ជាដាច់ខាត បន្ទាប់ពីមានព័ត៌មានថា ក្រសួងការពារជាតិអាមេរិកកំពុងត្រៀមបញ្ជូនលោក Kevin McCarthy ប្រធានសភាតំណាងរាស្ត្រអាមេរិក ឱ្យធ្វើដំណើរទៅកាន់តៃវ៉ាន់នៅឆ្នាំ២០២៣នេះ ។

លោកស្រី ម៉ៅ នីង បានឆ្លើយតបសំណួររបស់ក្រុមអ្នកសារព័ត៌មានទាក់ទងនឹងព័ត៌មានខាងលើនេះ ដោយលោកស្រីមិនបានលើកឈ្មោះលោក Kevin នោះទេ ប៉ុន្តែលោកស្រីនិយាយថា សមាជិកសភាតំណាងរាស្ត្រអាមេរិកដែលពាក់ព័ន្ធត្រូវគិតពីការប្រព្រឹត្តរបស់ខ្លួនផងដែរ ដែលអាចធ្វើឱ្យប៉ះពាល់ដល់សម្ព័ន្ធមិត្តរវាងប្រទេសចិន និងអាមេរិក ។ លើសពីនេះ វានឹងបំផ្លាញសន្តិភាព និងស្ថេរភាពនៃច្រកសមុទ្រតៃវ៉ាន់ ។

គួរបញ្ជាក់ថា កាលពីខែសីហា ឆ្នាំ២០២២ កន្លងមក លោកស្រី Nancy Pelosi អតីតប្រធានសភាតំណាងរាស្ត្រអាមេរិក បានធ្វើដំណើរទៅកាន់តៃវ៉ាន់តាមយន្តហោះយោធាអាមេរិក ។ វាជាការធ្វើដំណើរទៅកាន់តៃវ៉ាន់លើកដំបូងក្នុងរយៈពេល២៥ឆ្នាំមកនេះ ។

ការធ្វើដំណើរទៅកាន់តៃវ៉ាន់នេះ ធ្វើឱ្យប្រទេសចិនមិនពេញចិត្តយ៉ាងខ្លាំង និងសងសឹកវិញដោយការបាញ់កាំជ្រួចផ្លោងជាលើកដំបូងឆ្លងកាត់ក្រុងតៃប៉ិរបស់តៃវ៉ាន់ ខណៈប្រទេសចិនមិនធ្លាប់ធ្វើបែបនេះពីមុនមក ព្រមទាំងកាត់ផ្តាច់ទំនាក់ទំនងជាមួយអាមេរិកផងដែរ ៕

ប្រភព ៖ TNN World

យន្តហោះចម្បាំងប្រភេទ Su-22 នៃកងពលលេខ ៩២១ របស់កងទ័ពអាកាសបានជួបឧបទ្ទវហេតុពេលចុះចតនៅអាកាសយានដ្ឋាន Yen Bai ភាគខាងជើងប្រទេសវៀតណាម ដែលបណ្តាលឱ្យអ្នកបើកយន្តហោះបានបង់ជីវិត។

នៅម៉ោង១២និង០៩ នាទីថ្ងៃត្រង់ ថ្ងៃទី៣១ ខែមករា លោក Tran Ngoc Duy បានបើកយន្តហោះ ដែលជាវគ្គហ្វឹកហ្វឺន ហើយនៅម៉ោង១២និង២៧នាទីថ្ងៃត្រង់ ពេលចុះចតយន្តហោះបានជួបបញ្ហាតែម្តង។

អំឡុងពេលជួបបញ្ហា អ្នកបើកយន្តហោះត្រូវបានអគ្គបញ្ជាការ បញ្ជាឱ្យបើកឆ័ត្រយោងចេញពីយន្តហោះ ក៏ប៉ុន្តែ អ្នកបើកយន្តហោះ បានព្យាយាមជួសជុលវាជំនួសវិញ ហើយក៏បានជួបរឿងអកុសលបែបនេះ។

គួរបញ្ជាក់ផងដែរថាយន្តហោះចម្បាំង Su-22 ដែលបានធ្លាក់នេះ ត្រូវបានផលិតដោយសហភាពសូវៀត បានដំណើរការ តាំងពីទសវត្សរ៍ឆ្នាំ ១៩៧០ មកម្ល៉េះ៕

ប្រភព៖ VN Express

ប្រទេសជប៉ុន ៖ លោក Jens Stoltenberg អគ្គលេខាធិការនៃអង្គការសន្ធិសញ្ញាអាត្លង់ទិកខាងជើង (NATO) បានថ្លែងក្នុងអំឡុងពេលលោកធ្វើដំណើរមកកាន់ប្រទេសជប៉ុន និងចូលជួបនាយករដ្ឋមន្ត្រីជប៉ុន លោក ហ្វូមីអូ គីស៊ីដា ថា NATO នៅតែជាសម្ព័ន្ធមិត្តដ៏រឹងមាំជាមួយប្រទេសជប៉ុនបន្តទៀត ។
លោក Jens Stoltenberg បានធ្វើដំណើរទៅកាន់មូលដ្ឋានទ័ពអាកាស Iruma ក្នុងខេត្ត Saitama ដើម្បីជួបជាមួយកងកម្លាំងស្វ័យការពារអាកាស និងទស្សនាយន្តហោះចម្បាំង និងអាវុធយុទ្ធភណ្ឌផ្សេងៗរបស់ប្រទេសជប៉ុនផងដែរ ។

លោក Jens Stoltenberg ថ្លែងថា សង្គ្រាមនៅអ៊ុយក្រែន គឺជារឿងសំខាន់សម្រាប់ប្រទេសទាំងអស់ ដូច្នេះ NATO ស្នើសុំឱ្យមានការគាំទ្រពីជប៉ុន ។ លោកបានសរសើរជប៉ុនថា ជាមិត្តភក្តិចាស់ និងជាដៃគូដ៏មានប្រសិទ្ធភាពរបស់ NATO ។ ហេតុនេះ ការធ្វើដំណើរមកកាន់ប្រទេសជប៉ុនរបស់លោក គឺដើម្បីជំរុញសម្ព័ន្ធភាពដ៏រឹងមាំនេះបន្តទៀតរវាងប្រទេសជប៉ុន និង NATO ។

លោកអគ្គលេខាធិការរូបនេះបានធ្វើដំណើរមកកាន់អាស៊ីខាងជើង ដើម្បីជំរុញសម្ព័ន្ធភាពជាមួយប្រទេសសម្ព័ន្ធមិត្តរបស់សហរដ្ឋអាមេរិក ដែលប្រឈមមុខនឹងសង្គ្រាមនៅអ៊ុយក្រែន ។ ប្រទេសជប៉ុនបានថ្កោលទោសការឈ្លានពានរបស់រុស្ស៊ីមកលើអ៊ុយក្រែន ជាមួយគ្នានេះ ជប៉ុនក៏បានផ្តល់ជំនួយយោធា ជំនួយមនុស្សធម៌ និងហិរញ្ញវត្ថុដល់អ៊ុយក្រែនផងដែរ តាំងពីរុស្ស៊ីឈ្លានពានអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ ។ វាជាប្រតិបត្តិការពិសេសមួយដើម្បីលុបបំបាត់ការគំរាមកំហែងដល់សន្តិសុខដែលបង្កឡើងដោយរុស្ស៊ី ៕

ប្រភព ៖ TNN World

រដ្ឋធានីវ៉ាស៊ីនតោន៖ ដោយសារតែការខឹងសម្បានឹងរដ្ឋាភិបាលក្រុងស្ដុកខម (Stockholm) មិនព្រមធ្វើបត្យាប័ន បញ្ជូនអ្នកដែលរងការចោទប្រកាន់ ពីក្រុងអង់ការ៉ា មកកាន់ប្រទេសតួកគី ទើបធ្វើឲ្យសមាជិកព្រឹទ្ធសភាសហរដ្ឋអាមេរិក ស្ដីបន្ទោសដល់មេដឹកនាំប្រធានាធិបតី អេដូហ្គេន ហើយបានអំពាវនាវឲ្យមានការដាក់ទណ្ឌកម្មជាថ្មី និង ហាមឃាត់ការលក់យន្ដហោះចម្បាំង ប្រភេទ F-16 ទៅដល់ប្រទេសមួយនេះ ប្រសិនបើនៅតែរារាំងដល់ស៊ុយអែត និង ហ្វាំងឡង់ដ៍។

សារព័ត៌មាន Alarabiya News បានចេញផ្សាយ កាលពីព្រឹក ថ្ងៃពុធ ទី១ ខែកុម្ភៈ ថា លោក គ្រីស វ៉ាន់ ហូលឡែន (Chris Van Hollen) សមាជិកព្រឹទ្ធសភាសហរដ្ឋអាមេរិក កាលពីថ្ងៃអង្គារ បានស្ដីបន្ទោស ដល់លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី ដោយសារតែរដ្ឋាភិបាលអង់ការ៉ារបស់គាត់ បានរារាំងដល់សមាជិកភាពរបស់អង្គការណាតូ សម្រាប់ប្រទេសស៊ុយអែត និង ហ្វាំងឡង់ដ៍ ហើយថែមទាំងបានអំពាវនាវឲ្យមានដាក់ទណ្ឌកម្មជាថ្មីបន្ថែមទៀត។

សមាជិកព្រឹទ្ធសភា មកពីគណបក្សប្រជាធិបតេយ្យ រូបនេះ ក៏បានរិះគន់ ដល់ប្រទេសតួកគី សម្រាប់តួនាទីអវិជ្ជមានរបស់ក្រុងអង់ការ៉ា នៅក្នុងការប្រយុទ្ធប្រឆាំងនឹងក្រុមរដ្ឋអ៊ិស្លាម (ISIS) ជាពិសេស នៅក្នុងប្រទេសស៊ីរី។

លោក Van Hollen បានបញ្ជាក់ ថា «ខ្ញុំជឿ ថា លោក Erdogan បានធ្វើឱ្យប្រទេសតួកគី ធ្លាក់ចុះយ៉ាងខ្លាំង ហើយយើងក៏កំពុងធ្វើជាសាក្សី អំពីរឿងនេះ ខណៈយើងកំពុងតែសម្លឹងមើលទៅលើការបោះឆ្នោត តាមអ្វីដែលគាត់បានអំពាវនាវឱ្យធ្វើឡើង នៅពាក់កណ្តាលខែឧសភា»។

ជាមួយគ្នានេះ លោក Van Hollen បានលើកឡើង អំពីការចោទប្រកាន់ ប្រឆាំងនឹងអភិបាលក្រុងអ៊ីស្ដង់ប៊ូល (Istanbul) និង ការបង្រ្កាបរបស់ប្រធានាធិបតីតួកគី លោក Erdogan ទៅលើគណបក្សប្រឆាំង។ ដូច្នេះ គាត់ច្បាស់ណាស់ ថា ប្រធានាធិបតីតួកគី មិនលេងតាមផ្លូវច្បាប់បោះឆ្នោត ដោយសេរី និង យុត្តិធម៌នោះឡើយ។

លោក រេសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី កាលពីសប្ដាហ៍មុន បានបញ្ជាក់ ថា ការបោះឆ្នោតសភា និង ប្រធានាធិបតី នៅក្នុងប្រទេសរបស់គាត់ អាចនឹងធ្វើឡើង នៅក្នុងខែឧសភា។

លោក អេក្រែម អ៊ីម៉ាម៉ូហ្លូ (Ekrem Imamoglu) អភិបាលក្រុងអ៊ីស្ដង់ប៊ូល កាលពីឆ្នាំមុន ត្រូវបានហាមឃាត់មិនឱ្យធ្វើនយោបាយ ដោយសារតែការរិះគន់ ទៅលើក្រុមប្រឹក្សាបោះឆ្នោតកំពូលរបស់ប្រទេសតួកគី ក្រោយពេលគាត់បានអំពាវនាវឱ្យមានការបោះឆ្នោតមួយផ្សេងទៀត បន្ទាប់ពីទទួលបានជ័យជម្នះភ្លូកទឹកភ្លូកដី លើគណបក្សរបស់លោក Erdogan ។ ប៉ុន្តែអ្វីដែលកំពុងតែធ្វើឲ្យក្រុមមន្ត្រីសហរដ្ឋអាមេរិក និង សមាជិកសភា ផ្ទុះកំហឹងនោះ គឺតួកគី នៅតែបន្ដរារាំងដល់ស៊ុយអែត និង ហ្វាំងឡង់ដ៍ ចូលរួមជាមួយនឹងសម្ពន្ធមិត្តរបស់អង្គការណាតូ។

ចាប់តាំងពីការឈ្លានពានរបស់រុស្ស៊ី ទៅលើប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២នោះមក ប្រទេសលោកខាងលិច បានបញ្ចុះបញ្ចូលប្រទេសអឺរ៉ុបខាងជើងទាំងពីរនេះ ឱ្យដាក់ពាក្យសុំចូលជាសមាជិករបស់អង្គការណាតូ។ ប៉ុន្តែតួកគី នៅតែទាមទារនូវការផ្ដល់សម្បទាន ពីហ្វាំងឡង់ដ៍ និង ស៊ុយអែត រួមទាំងការប្រគល់មនុស្ស ដែលក្រុងអង់ការ៉ា អះអាង ថា ជាក្រុមភេរវករនោះ បញ្ជូនមកកាន់ប្រទេសតួកគី។

ប្រទេសតួកគីបានគំរាមកំហែង ថា ការឈ្លានពានចូលទៅលើទឹកដី នាភាគខាងជើង ប្រទេសស៊ីរី គឺជាការប្រឆាំងនឹងក្រុមយុទ្ធជនឃឺដ ដែលបានបង្ហាញ ថា ជាដៃគូដ៏សំខាន់ សម្រាប់សហរដ្ឋអាមេរិក នៅក្នុងការប្រយុទ្ធប្រឆាំងនឹងក្រុម ISIS ។ ប៉ុន្ដែការការគំរាមកំហែងរបស់តួកគី ត្រូវបានផ្អាកទៅ សម្រាប់ពេលនេះ ក្រោយមានការព្រមានម្តងហើយម្តងទៀត ពីរដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន និង មន្ទីរបញ្ចកោណ ប្រឆាំងនឹងការឆ្ពោះទៅមុខ ជាមួយនឹងប្រតិបត្តិការរបស់ក្រុងអង់ការ៉ា នៅតំបន់ភាគខាងជើង ប្រទេសស៊ីរី។

លោក គ្រីស វ៉ាន់ ហូលឡែន (Chris Van Hollen) ជាសមាជិកគណៈកម្មាធិការទំនាក់ទំនងកិច្ចការបរទេសរបស់ព្រឹទ្ធសភាសហរដ្ឋអាមេរិក មួយផងដែរនោះ បានសង្កត់ធ្ងន់ ថា «វាមានតម្រូវការចាំបាច់ ត្រូវសម្របសម្រួលជាមួយនឹងសហភាពអឺរ៉ុប ដើម្បីពិចារណា អំពីប្រភេទផ្សេងៗគ្នា នាពេលខាងមុខ ជាមួយនឹងលោក Erdogan ។ ប៉ុន្ដែប្រសិនបើប្រធានាធិបតីតួកគី នៅតែបន្ដរារាំង ដល់ប្រទេសស៊ុយអែត និង ហ្វាំងឡង់ដ៍ ចូលរួមជាមួយអង្គការណាតូ នោះ យើងចាំបាច់ត្រូវសម្លឹងមើល ទៅលើទណ្ឌកម្មជាច្រើនទៀត។ អ្នកបានដឹងច្បាស់ ថា សេដ្ឋកិច្ចរបស់តួកគី មិនស្ថិតនៅលើទម្រង់ដ៏អស្ចារ្យនោះឡើយ»។

សមាជិកព្រឹទ្ធសភារូបនេះ ក៏បានចង្អុលបង្ហាញ អំពីសំណើរបស់តួកគី នៅក្នុងការទទួលបានយន្តហោះចម្បាំង F-16 របស់អាមេរិក ផងដែរ។ កាលពីពេលមុន តួកគី ត្រូវបានលុបចេញពីកម្មវិធីយន្តហោះចម្បាំង F-35 របស់សហរដ្ឋអាមេរិក ដោយសារតែក្រុងអង់ការ៉ា បានទិញប្រព័ន្ធការពារដែនអាកាសពីរុស្ស៊ី ខណៈសម្ពន្ធមិត្តណាតូ បានបញ្ជាក់ ថា វានឹងគំរាមកំហែងដល់សន្តិសុខរបស់ពួកគេ។ ឥឡូវរដ្ឋបាលរបស់លោក បៃដិន បានគាំទ្រដល់ការលក់យន្ដហោះចម្បាំង F-16 មានតម្លៃ ប្រហែល២០ពាន់លានដុល្លារ។ សភាទាំង២ អាចនឹងជំទាស់ ប្រសិនបើតួកគី នៅតែបន្ដរារាំង ដល់ប្រទេសអឺរ៉ុបខាងជើងទាំង២នេះ៕