ប្រទេសលោកខាងលិចបានប្រកាសដាក់ទណ្ឌកម្មបន្ថែមទៀតដល់ប្រទេសមីយ៉ាន់ម៉ា ក្នុងនោះ អង្គភាព និងបុគ្គលដែលជាប់ឈ្មោះក្នុងបញ្ជីខ្មៅ មានទាំងគណៈកម្មការបោះឆ្នោត មន្ត្រីថាមពល និងសមាជិករដ្ឋាភិបាលយោធា ។

ក្រសួងហិរញ្ញវត្ថុអាមេរិកបានប្រកាសកាលពីថ្ងៃទី៣១ ខែមករា ពីការបង្កើនទណ្ឌកម្មប្រឆាំងនឹងបុគ្គល៦រូប និងអង្គភាពចំនួន៣ របស់មីយ៉ាន់ម៉ា រួមទាំងគណៈកម្មការបោះឆ្នោត ក្រុមហ៊ុនរុករករ៉ែ នាយកប្រតិបត្តិក្រសួងថាមពល មន្ត្រី និងអតីតមន្ត្រីកងទ័ព ដោយអ្នកទាំងអស់នេះមិនអាចប្រើប្រាស់ប្រាក់ និងធនធានក្រោមការគ្រប់គ្រងរបស់អាមេរិកបានទេ ។ អ្នកនាំពាក្យក្រសួងបញ្ជាក់ថា លើកនេះជាលើកដំបូងដែលអាមេរិកដាក់ទណ្ឌកម្មក្រុមហ៊ុនមីយ៉ាន់ម៉ា Oil and Gas Enterprise (MOGE) ជាក្រុមហ៊ុនថាមពលរបស់រដ្ឋ និងជាកន្លែងបង្កើតប្រាក់ចំណូលធំបំផុតតែមួយរបស់រដ្ឋាភិបាលយោធា ដោយនាយកគ្រប់គ្រង និងនាយករងត្រូវបានដាក់ឈ្មោះក្នុងបញ្ជីខ្មៅ ។

លើសពីនេះ ប្រទេសកាណាដាក៏បានដាក់ទណ្ឌកម្មបុគ្គល៦រូប និងហាមនាំចេញ ចែកចាយ ឬផ្គត់ផ្គង់ប្រេងឥន្ធនៈដល់អាកាសយានដ្ឋានមីយ៉ាន់ម៉ា ។ ចំណែកប្រទេសអូស្ត្រាលីបានដាក់ទណ្ឌកម្មសមាជិកក្នុងរដ្ឋាភិបាលយោធា និងក្រុមហ៊ុនគ្រប់គ្រងដោយកងទ័ព ហើយប្រទេសអង់គ្លេសបានដាក់ទណ្ឌកម្មក្រុមហ៊ុនចំនួន២ និងបុគ្គល២រូប ដែលមានចំណែកផ្គត់ផ្គង់ប្រេងឥន្ធនៈដល់អាកាសយានដ្ឋានកងទ័ពអាកាសប្រើក្នុងប្រតិបត្តិការទម្លាក់គ្រាប់បែក ។

ការប្រកាសដាក់ទណ្ឌកម្មរបស់ប្រទេសទាំង៤នេះកើតឡើងក្នុងឱកាសគម្រប់ខួប២ឆ្នាំ ដែលកងទ័ពមីយ៉ាន់ម៉ាធ្វើរដ្ឋប្រហារដណ្តើមអំណាចកាលពីថ្ងៃទី១ ខែកុម្ភៈ ឆ្នាំ២០២១ ហើយនាំឱ្យមានការធ្វើបាតុកម្ម និងការបង្ក្រាបយ៉ាងបង្ហូរឈាម ។

គួរបញ្ជាក់ថា នៅថ្ងៃទី១ ខែកុម្ភៈ ពលរដ្ឋមីយ៉ាន់ម៉ារស់នៅក្រៅប្រទេសបានជួបជុំគ្នាធ្វើបាតុកម្មក្នុងឱកាសគម្រប់ខួប២ឆ្នាំនៃរដ្ឋប្រហារ នៅផ្នែកខាងក្រៅនៃស្ថានទូតមីយ៉ាន់ម៉ា ក្រុងបាងកក ប្រទេសថៃ, ក្រុងតូក្យូ ប្រទេសជប៉ុន និងក្រុងម៉ានីល ប្រទេសហ្វីលីពីន ៕

ប្រភព ៖ NationWorldNews

ក្រោយតែមានហេតុការណ៍តារាស្រីតៃវ៉ាន់ម្នាក់ បានយក Vape ឆ្លងដែន ចូលក្នុងប្រទេសថៃ ហើយដោយបានឱ្យលុយប៉ូលិស២៧ពាន់បាត ដើម្បីបិទមាត់នោះ ​ពេលនេះមេធាវីប៉ូលីសក្រុងបាងកកបានចោទប្រកាន់ថា “ប៉ូលិសបានទទួលសូកប៉ាន់ពីតារាស្រីតៃវ៉ាន់ម្នាក់ ក្នុងការយករបស់ខុសច្បាប់ចូលប្រទេសខ្លួន”។

មេធាវីប៉ូលីសក្រុងបាងកក លោក រុន ណារ៉ុង បាន​ព្រមាន​ថា មនុស្ស​ដែល​ចាប់​បាន​ដោយ​ប្រើ​ថ្នាំ​ជក់​អាច​ត្រូវ​ផ្ដន្ទាទោស​ដាក់​ពន្ធនាគារ ៥ឆ្នាំ និង​ពិន័យ​ជា​ប្រាក់ ៤ ដង​នៃ​តម្លៃ​ឧបករណ៍។

មិនតែប៉ុណ្ណោះ ការ​ជក់​ Vape ​នៅ​ទី​សាធារណៈ​ក៏​បាន​រំលោភ​លើ​មាត្រា ៤២ នៃ​ច្បាប់​គ្រប់គ្រង​ថ្នាំ​ជក់​ដែល​ត្រូវ​ពិន័យ​ជា​ប្រាក់ ៥០០០ បាត។

លើសពីនេះទៅទៀតការនាំចូល Vape និងទឹកVape  គឹខុសនឹងច្បាប់នាំចូល/នាំចេញ ហើយត្រូវផ្តន្ទាទោសដាក់ពន្ធនាគាររហូតដល់ ១០ ឆ្នាំ និង/ឬពិន័យជាប្រាក់ប្រាំដងនៃតម្លៃទំនិញ។

គួរបញ្ជាក់ផងដែរថា​ កាលពីឆ្នាំ ២០១៥ ក្រុមបឹក្សាភិបាលការពារអ្នកប្រើប្រាស់ក៏បាន ហាមឃាត់ការលក់បារីអេឡិចត្រូនិច និង បារ៉ាគូ អ៊ីបារ៉ាគូ (ហ្សុីហ្សា)​ ដោយពិន័យជាប្រាក់ចំនួន៥សែណ បាត ឬក៏អាចឈានដល់ការជាប់ពន្ធនាគាររហូតដល់៥ឆ្នាំ ផងដែរ សម្រាប់អ្នកដែលបំពានច្បាប់នេះ៕

ប្រភព៖ National Thailand

PayPal ជាសេវាទូទាត់ប្រាក់តាមអនឡាញដ៏ធំបំផុតរបស់ពិភពលោក បានប្រកាសកាត់បន្ថយបុគ្គលិករបស់ខ្លួនចំនួន២.០០០នាក់ ឬស្មើ៧% របស់បុគ្គលិកទាំងអស់ ដោយសារបញ្ហាចម្បង គឺមកពីស្ថានភាពសេដ្ឋកិច្ច ។

លោក ឌែន ឈូលមែន ប្រធាន និងនាយកប្រតិបត្តិរបស់ PayPal បញ្ជាក់ថា ក្រុមហ៊ុនកំពុងរកវិធីដោះស្រាយនឹងបញ្ហាប្រឈមមុខសេដ្ឋកិច្ច ដោយក្រុមហ៊ុននឹងកាត់បន្ថយបុគ្គលិកនៅសប្តាហ៍ខាងមុខ ហើយសម្រាប់បុគ្គលិកណាដាក់ពាក្យឈប់នឹងទទួលបានប្រាក់សំណងយ៉ាងសមរម្យ ។ លោកថ្លែងថា ៖ «ខ្ញុំសូមថ្លែងអំណរគុណសម្រាប់ការមានចំណែករួមដ៏មានអត្ថន័យ ដែលបុគ្គលិកទាំងអស់បានបំពេញការងារឱ្យ PayPal» ។

លោកបន្ថែមថា ៖ «ការផ្លាស់ប្តូរអាចជារឿងលំបាកមួយ ជាពិសេសបំផុតនោះ សម្រាប់មិត្តរួមការងារទាំងអស់ និងបុគ្គលិកដែលចាកចេញទៅ យើងនឹងប្រឈមមុខជាមួយគ្នា ។ យើងធ្វើការវិនិយោគជាយុទ្ធសាស្ត្រដើម្បីពង្រឹងសមត្ថភាពស្នូលរបស់យើង ក៏ដូចជាទំនុកចិត្ត និងភាពស្មោះត្រង់របស់អតិថិន» ។

កាលពីឆ្នាំ២០២២ កន្លងមក តម្លៃភាគហ៊ុនរបស់ PayPal បានធ្លាក់ចុះលើសពី៥០% បើទោះជារបាយការណ៍លទ្ធផលប្រចាំត្រីមាសទី៣ ឆ្នាំ២០២២ ក្រុមហ៊ុននឹងបង្កើតប្រាក់ចំណូលច្រើនជាងការរំពឹងទុកក្តី ប៉ុន្តែតម្លៃភាគហ៊ុនរបស់ PayPal នៅតែធ្លាក់ចុះ ក្រោយពីប្រាក់ចំណូលប៉ាន់ស្មានក្នុងត្រីមាសទី៤ ឆ្នាំ២០២២ របស់ក្រុមហ៊ុនធ្លាក់ចុះជាងអ្នកវិភាគរំពឹងទុកទៅទៀត ។

នេះជាការកាត់បន្ថយបុគ្គលិកក្នុងឧស្សាហកម្មបច្ចេកវិទ្យា ដែលក្រុមហ៊ុនភាគច្រើនកំពុងព្យាយាមកាត់បន្ថយដើមទុន ដើម្បីទប់ទល់នឹងការផ្លាស់ប្តូរតម្រូវការសេវាកម្មឌីជីថល ឧបសគ្គសេដ្ឋកិច្ចកើតពីជំងឺរាតត្បាត អត្រាការប្រាក់កើនឡើង និងភាពភ័យខ្លាចនៃវិបត្តិសេដ្ឋកិច្ចផងដែរ ។

គួរបញ្ជាក់ថា នៅខែមករា ឆ្នាំ២០២៣ ក្រុមហ៊ុន Microsoft, Alphabet និង Amazon ព្រមទាំងក្រុមហ៊ុនផ្សេងៗទៀតបានប្រកាសកាត់បន្ថយបុគ្គលិករបស់ខ្លួនជាច្រើនពាន់នាក់ ៕

ប្រភព ៖ pptvhd36

ប្រទេសរុស្ស៊ី ៖ តាមសេចក្តីថ្លែងការណ៍ពីក្រសួងការបរទេសរុស្ស៊ី កាលពីថ្ងៃទី៣០ ខែមករាថា ប្រធានាធិបតីចិន លោក ស៊ី ជិនពីង នឹងធ្វើដំណើរទស្សនកិច្ចមកកាន់ទីក្រុងមូស្គូ ប្រទេសរុស្ស៊ី ក្នុងអំឡុងខួប១ឆ្នាំនៃសង្គ្រាមរុស្ស៊ី-អ៊ុយក្រែន និងជាហេតុការណ៍សំខាន់នៃរបៀបវារៈទ្វេភាគីរបស់ប្រទេសទាំងពីរ ។ គេចាត់ទុកជាការមកកាន់ទឹកដីរុស្ស៊ីលើកដំបូងរបស់លោក ជិនពីង តាំងពីខែមិថុនា ឆ្នាំ២០១៩ ដែលមេដឹកនាំចិនបានចូលរួមប្រជុំសេដ្ឋកិច្ច រយៈពេល៣ថ្ងៃ នៅក្រុង Saint Petersburg ។

វាជាការជួបមុខគ្នាលើកដំបូងរបស់មេដឹកនាំទាំងពីរ បន្ទាប់ពីចិនបន្ធូរបន្ថយវិធានការទប់ស្កាត់ជំងឺកូវីដ-១៩ ។ មេដឹកនាំទាំងពីរបានជួបមុខគ្នាលើកចុងក្រោយនៅកិច្ចប្រជុំកំពូលអង្គការសហប្រតិបត្តិការសៀងហៃ (Shanghai Cooperation Organization) នៅក្រុងសាម៉ាកខាន់ ប្រទេសអ៊ូសបេគីស្ថាន កាលពីកញ្ញា ឆ្នាំ២០២២ ។

ទោះយ៉ាងណា នៅមិនទាន់មានការបញ្ជាក់ណាមួយពីប្រទេសចិន អំពីការធ្វើទស្សនកិច្ចរបស់មេដឹកនាំចិនទេ ។ ប្រធានាធិបតីប្រទេសរុស្ស៊ី លោក វ៉្លាឌីមៀ ពូទីន បានអញ្ជើញលោក ជិនពីង ក្នុងពេលជជែកគ្នាតាមវីដេអូខល (video call) កាលពីចុងខែធ្នូ ឆ្នាំ២០២២ អំពីការសហការគ្នាលើផ្នែកជាច្រើន រួមទាំងពាណិជ្ជកម្ម និងថាមពលផងដែរ ។

សារព័ត៌មាន TASS របស់រុស្ស៊ីបានរាយការណ៍ដោយផ្អែកតាមក្រសួងការបរទេសរុស្ស៊ីថា ក្នុងឆ្នាំ២០២៣នេះ រុស្ស៊ី និងចិននឹងរួមដៃគ្នាពង្រឹង និងលើកកម្ពស់ទំនាក់ទំនងទ្វេភាគីរវាងរដ្ឋាភិបាលទាំងពីរ ។

សម្រាប់ព័ត៌មានថា មេដឹកនាំចិននឹងធ្វើដំណើរទៅកាន់រុស្ស៊ីនោះ បន្ទាប់ពីរដ្ឋមន្ត្រីក្រសួងការបរទេសអាមេរិក លោក Anthony Blinken ត្រៀមជួបជាមួយប្រទេសចិន នៅទីក្រុងប៉េកាំងក្នុងសប្តាហ៍នេះ ហើយអ្នកវិភាគបានចោទសួរពីការវិវត្តទៅមុខនៃទំនាក់ទំនងរវាងប្រទេសទាំងពីរ ។

South China Morning Post រាយការណ៍ថា ចិនជាដៃគូពាណិជ្ជកម្មធំបំផុតរបស់រុស្ស៊ីយូរមកហើយ ហើយការដាក់ទណ្ឌកម្មពាណិជ្ជកម្មពីប្រទេសលោកខាងលិចប្រឆាំងនឹងរុស្ស៊ី ដោយសារធ្វើសង្គ្រាមជាមួយអ៊ុយក្រែននោះ ធ្វើឱ្យពាណិជកម្មរបស់ពួកគេកើនឡើង ។

ក្រសួងការបរទេសរុស្ស៊ីបញ្ជាក់ថា កិច្ចសហការជាមួយប្រទេសជាមិត្តរបស់រុស្ស៊ីបានដំណើរការជាបន្តបន្ទាប់ ដើម្បីតស៊ូជាមួយការព្យាយាមរបស់អាមេរិកដែលចង់កាន់កាប់ពិភពលោក និងបញ្ជាក់ថា ចិនជាមិត្តរបស់រុស្ស៊ីក្នុងពេលបច្ចុប្បន្ននេះ ។ ស្របពេលមានការផ្លាស់ប្តូរភូមិសាស្ត្រនយោបាយធ្ងន់ធ្ងរ ទីក្រុងមូស្គូ និងប៉េកាំង បានសម្របសម្រួលគោលនយោបាយការបរទេសយ៉ាងមានប្រសិទ្ធភាព រក្សាសន្តិភាព និងស្ថេរភាពរបស់ពិភពលោក ដើម្បីបញ្ចប់ជម្លោះក្នុងភូមិភាគ ជម្នះការប្រឈមមុខដាក់គ្នា និងលើកកម្ពស់ការរួមកម្លាំង ៕

ប្រភព ៖ TNN World

ប្រទេសជប៉ុន ៖ កាលពីថ្ងៃទី៣០ ខែមករា កន្លងមក ក្រសួងកិច្ចការផ្ទៃក្នុង និងទំនាក់ទំនងរបស់ប្រទេសជប៉ុនបង្ហាញថា ចំនួនពលរដ្ឋដែលមកធ្វើការនៅទីក្រុងតូក្យូ បានកើនឡើងយ៉ាងខ្លាំងក្នុងឆ្នាំ២០២២ កន្លងមក ហើយវាជាការកើនឡើងលើកដំបូងក្នុងរយៈពេល៣ឆ្នាំ ក្រោយពីការរាតត្បាតនៃជំងឺកូវីដ-១៩ ។

ស្ថិតិការផ្លាស់ប្តូរទីលំនៅដែលចេញផ្សាយដោយក្រសួងកិច្ចការផ្ទៃក្នុង និងទំនាក់ទំនងបញ្ជាក់ថា ចំនួនពលរដ្ឋជប៉ុនដែលមករស់នៅទីក្រុងតូក្យូនៅឆ្នាំ២០២២ ស្មើ៣៨.០២៣នាក់ បានកើនឡើងយ៉ាងឆាប់រហ័សពីតួលេខឆ្នាំ២០២១ ស្មើតែ៥.៤៣៣នាក់ប៉ុណ្ណោះ ខណៈតួលេខក្នុងឆ្នាំ២០២១ ជាកម្រិតទាបបំផុតតាំងពីឆ្នាំ២០១៤ មក។

គួរបញ្ជាក់ថា ចំនួនពលរដ្ឋជប៉ុនដែលផ្លាស់មករស់នៅទីក្រុងតូក្យូនៅឆ្នាំ២០២២ ស្មើ៤៣៩.៧៨៧នាក់ កើនឡើង១៩.៦២០នាក់ពីឆ្នាំ២០២១ ខណៈចំនួនអ្នកផ្លាស់ចេញពីទីក្រុងតូក្យូស្មើ៤០១.៧៦៤នាក់ ថយចុះ១២.៩៧០នាក់ ។ ដូចនេះ ចំនួនអ្នកមកកាន់ទីក្រុងតូក្យូ គឺខ្ពស់ជាងចំនួនអ្នកផ្លាស់ចេញ ប្រមាណពី៧ម៉ឺន ទៅ៨ម៉ឺននាក់ក្នុង១ឆ្នាំ រវាងឆ្នាំ២០១៤ ដល់ឆ្នាំ២០១៩ មុនពេលជំងឺកូវីដរាតត្បាត ។ ទោះយ៉ាងណា ចំនួនពលរដ្ឋជប៉ុនដែលរស់នៅក្រៅទីក្រុងតូក្យូក៏បានកើនឡើងខ្ពស់ផងដែរ ដោយសារពួកគេចង់គេចពីជំងឺរាតត្បាត៕

ប្រភព ៖ The Better

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃដិន បានត្រៀមពិភាក្សាជាមួយមេដឹកនាំប្រទេសអ៊ុយក្រែន លោក Volodymy Zelensky អំពីការជួយសង្គ្រោះផ្នែកអាវុធមានប្រសិទ្ធភាពដើម្បីទប់ទប់ជាមួយកងទ័ពរុស្ស៊ី បន្ទាប់ពីអាមេរិកមិនបញ្ជូនយន្តហោះចម្បាំង F-16 ឱ្យអ៊ុយក្រែន ។

ប្រធានាធិបតីអាមេរិក លោក ចូ បៃដិន បានថ្លែងកាលពីថ្ងៃ៣១ ខែមករាថា លោកនឹងពិភាក្សាជាមួយប្រធានាធិបតីអ៊ុយក្រែន លោក Volodymy Zelensky អំពីការស្នើសុំអាវុធទំនើបដើម្បីទប់ទប់ជាមួយកងទ័ពរុស្ស៊ី ។ លោកបានថ្លែងទៅកាន់អ្នកសារព័ត៌មានថា ៖ «យើងនឹងជជែកគ្នា ខណៈពេលមុននេះ លោកបានបដិសេធការបញ្ជូនយន្តហោះចម្បាំង F-16 ឱ្យអ៊ុយក្រែន» ។

អាមេរិកជាប្រទេសឧបត្ថម្ភអាវុធដ៏ធំបំផុតរបស់អ៊ុយក្រែន ខណៈជម្លោះរវាងប្រទេសរុស្ស៊ី និងអ៊ុយក្រែន ជិតគ្រប់១ឆ្នាំ ។ ចំណែកប្រទេសលោកខាងលិចផ្សេងទៀត ក៏បានបញ្ជូនអាវុធគ្រប់ប្រភេទ រថពាសដែក និងកាំភ្លើងធំឱ្យអ៊ុយក្រែនផងដែរ ។

ទោះយ៉ាងណា ខណៈរុស្ស៊ីគ្មានសញ្ញាបញ្ចប់ជម្លោះជាមួយអ៊ុយក្រែន ប្រធានាធិបតីអ៊ុយក្រែន លោក Volodymy Zelensky ក៏បានប្រកាសសុំការឧបត្ថម្ភអាវុធមានប្រសិទ្ធភាព និងកម្លាំងខ្លាំងពីប្រទេសលោកខាងលិច ហើយអាមេរិក និងអាល្លឺម៉ង់ ក៏យល់ព្រមបញ្ជូនរថក្រោះជួយអ៊ុយក្រែន តាមពីក្រោយអង់គ្លេស ។ បច្ចុប្បន្ន អ៊ុយក្រែនកំពុងតែដាក់សម្ពាធលើប្រទេសលោកខាងលិចឱ្យបញ្ជូនយន្តហោះចម្បាំង និងមីស៊ីលបាញ់ចម្ងាយឆ្ងាយ ដែលអាចវាយលុកគោលដៅរបស់រុស្ស៊ី ។

រដ្ឋមន្ត្រីក្រសួងការបរទេសអ៊ុយក្រែន លោក Dmytro Kuleba បានថ្លែងកាលពីថ្ងៃទី៣១ ខែមករាថា អ៊ុយក្រែននឹងទទួលបានរថក្រោះពី១២០ ទៅ១៤០គ្រឿងក្នុងការបញ្ជូនលើកដំបូងពី១២ប្រទេស ។ នៅខែមករា ប្រទេសលោកខាងលិចសន្យាជាមួយអ៊ុយក្រែនថា នឹងបញ្ជូនរថក្រោះដើម្បីការពារការវាយលុកពីរុស្ស៊ី ខណៈរុស្ស៊ីបានព្យាយាមវាយលុកឆ្ពោះទៅទិសខាងកើតរបស់អ៊ុយក្រែនកាន់តែខ្លាំង ៕

ប្រភព ៖ TNN World