កោះ Aoshima មានទីតាំងស្ថិតនៅក្នុងខេត្ត Ehime ប្រទេសជប៉ុន ត្រូវបានគេទទួលស្គាល់ថាជាឋានសួគ៌សម្រាប់សត្វឆ្មារស់នៅ​។

ជាមួយនឹងទំហំត្រឹម ៤០អា  កោះនេះ មានប្រជានជនប្រមាណជា៦០០នាក់តែប៉ុណ្ណោះ​ ខណៈសត្វឆ្មាមានប្រមាណជា៣០០ក្បាល នេះបើយោងតាមការជំរឿនចុងក្រោយនៅឆ្នាំ ២០១៨​។

ឆ្មាទាំងនោះ គឺជាឆ្មាអនាថា ដែលត្រូវបានរាជរដ្ឋាភិបាលចែកឱ្យកាលពីសម័យសង្គ្រាមលោកលើកទី២ ដោយគ្រានោះកំណើនសត្វឆ្មានៅទីក្រុង ច្រើនលើសលើសកម្រិត។

សឹងតែទាំងស្រុងនៃប្រជាជននៅលើកោះនេះ ប្រកបរបរនេសាទ ហេតុដូចនេះសត្វឆ្មានៅលើកោះនោះរំពឹងលើការផ្គត់ផ្គង់ម្ហូបអាហារពីពួកគេ។

បើទោះបីជាកោះនេះរាងតូចបន្តិចមែន តែវាការបានក្លាយជាកន្លែងទេសចរណ៍ដ៏មានសក្តានុពលផងដែរ ដោយវាបានទាក់ទាញភ្ញៀវទេសចរណ៍មកថតរូបលេង ឬក៏ដាក់ចំណីឱ្យវាសុីផងដែរ៕

ប្រទេសចិន ៖ ក្រសួងការបរទេសចិនបានបង្ហាញការមិនពេញចិត្តយ៉ាងខ្លាំង និងតវ៉ាករណីអាមេរិកប្រើយន្តហោះចម្បាំងបាញ់ទម្លាក់បាឡុងរបស់ចិន ។ អាមេរិកនិយាយថា ជាបាឡុងចារកម្មឈ្លានពានដែនអាកាសអាមេរិក និងកាណាដា បើទោះជាចិនបញ្ជាក់ថា វាគ្រាន់តែជាបាឡុងរបស់ជនស៊ីវិលដើម្បីពិនិត្យមើលបរិយាកាសប៉ុណ្ណោះ និងសុំឱ្យអាមេរិកដោះស្រាយបញ្ហានេះឱ្យសមស្រប ស្ងប់ស្ងាត់ និងមានវិជ្ជាជីវៈ ។

សេចក្តីថ្លែងការណ៍កាលពីថ្ងៃទី៥ ខែកុម្ភៈ បញ្ជាក់ថា ខាងចិនបានជូនដំណឹងទៅកាន់អាមេរិកជាច្រើនលើកហើយថា បាឡុងដែលឆ្លងទៅដែនអាកាសរបស់អាមេរិកនេះ គ្មានចេតនាទេ ហើយការចាត់ការបាឡុងដោយកងកម្លាំងអាមេរិក ជាសកម្មភាពមួយហួសហេតុ និងបំពានក្រមសីលធម៌អន្តរជាតិ ។ ចិននឹងការពារសិទ្ធិ និងផលប្រយោជន៍របស់ភាគីពាក់ព័ន្ធ ហើយចាត់វិធានការវិញក្នុងករណីចាំបាច់ ។

ក្រសួងការពារជាតិអាមេរិកឱ្យដឹងថា អាមេរិកបានបាញ់បំផ្លាញបាឡុងនេះដោយប្រើយន្តហោះចម្បាំង F-22 និងបាញ់ដោយកាំជ្រួច AIM-9X ចំនួន១គ្រាប់ បណ្តាលឱ្យបាឡុងធ្លាក់ក្នុងបរិវេណឆ្នេរសមុទ្រភាគខាងត្បូងរដ្ឋ Carolina ហើយទាហានអាមេរិក និងនាវារបស់កងទ័ពជើងទឹក២គ្រឿងកំពុងស្វែងរកបាឡុងដែលធ្លាក់ ។

មុននេះ អាមេរិកបានបញ្ជាឱ្យបិទអាកាសយានដ្ឋាន៣កន្លែងបណ្តោះអាសន្ននៅក្បែររដ្ឋ Carolina រួមទាំងជូនដំណឹងទៅនាវាផ្សេងៗឱ្យចេញពីតំបន់នេះ ដើម្បីសុវត្ថិភាពមុននឹងបាញ់ទម្លាក់បាឡុង ព្រោះត្រូវរង់ចាំឱ្យវាហោះមកកាន់ផ្ទៃទឹកសិន ដើម្បីងាយស្រួលបាញ់ទម្លាក់ និងមិនប៉ះពាល់សាធារណជន ។

អាមេរិកបានប្រទះឃើញបាឡុងរបស់ចិនដំបូងកាលពីថ្ងៃទី២៨ ខែមករា បន្ទាប់មកបាឡុងបានហោះសំដៅទៅកាន់ប្រទេសកាណាដា រួចហោះត្រឡប់មកកាន់ដែនអាកាសអាមេរិកម្តងទៀតនៅថ្ងៃទី៣១ ខែមករា លើទីតាំងទុកអាវុធនុយក្លេអ៊ែររបស់អាមេរិក ។

ករណីប្រទះឃើញបាឡុងធ្វើឱ្យ លោក Anthony Blinken រដ្ឋមន្ត្រីក្រសួងការបរទេសអាមេរិក លុបចោលផែនការធ្វើដំណើរទៅប្រទេសចិននៅថ្ងៃទី៥-៦ ខែកុម្ភៈ ។ កាលពីថ្ងៃទី៣ ខែកុម្ភៈ ក្រសួងការពារជាតិអាមេរិកក៏បានប្រទះឃើញបាឡុងចារកម្មរបស់ចិនមួយទៀតហោះលើដែនអាកាសប្រទេសកូស្តារីកា និងវេណេស៊ុយអេឡា ប៉ុន្តែចិនមិនបានបកស្រាយអ្វីទេ ៕

ប្រភព ៖ TNN World

ប្រទេសអ៊ុយក្រែន ៖ កាលពីថ្ងៃទី២ ខែកុម្ភៈ កន្លងមក អ្នកនយោបាយ និងសហគ្រិនអ៊ុយក្រែន លោក Denise Shmihal បានបង្ហាញផែនការពង្រីកពាណិជ្ជកម្មសេរីជាមួយសហភាពអឺរ៉ុប (EU) រហូតដល់ឆ្នាំ២០២៤ ។ លោកចង្អុលបង្ហាញថា ការបង្កើនទំនាក់ទំនងផ្នែកពាណិជ្ជកម្មជាមួយ EU គឺជារឿងសំខាន់របស់អ៊ុយក្រែន ខណៈអ៊ុយក្រែនកំពុងមានជម្លោះជាមួយប្រទេសរុស្ស៊ី ។

លោក Denise Shmihal បានប្រជុំជាមួយអនុប្រធានគណៈកម្មការអឺរ៉ុប (EU) លោក Valdis Dombrowski ខណៈលោកបានធ្វើដំណើរមកកាន់ប្រទេសអ៊ុយក្រែន ។ លោក Denise Shmihal បានថ្លែងអំណរគុណ EU សម្រាប់ការអនុម័តកញ្ចប់ជំនួយដល់ប្រទេសអ៊ុយក្រែន ក្នុងទឹកប្រាក់១,៨ម៉ឺនលានយូរ៉ូ ព្រមទាំងអំពាវនាវឱ្យមានការជួយអ៊ុយក្រែនបន្ថែមទៀត ។

ក្រៅពីនេះ លោក Denise Shmihal បញ្ជាក់ថា អ៊ុយក្រែនត្រូវការប្រាក់ប្រមាណ១,៧ម៉ឺនលានដុល្លារអាមេរិកសម្រាប់ការស្តារប្រទេសជាតិឡើងវិញ បន្ទាប់ពីកើតជម្លោះជាមួយរុស្ស៊ីនៅឆ្នាំនេះ ។ ចំណែកអនុប្រធានគណៈកម្មការអឺរ៉ុប លោក Valdis Dombrowski ថ្លែងថា EU នៅតែជួយគាំទ្រប្រទេសអ៊ុយក្រែនយ៉ាងពេញលេញបន្តទៀត ។

គួរបញ្ជាក់ថា ប្រព័ន្ធអនុគ្រោះពិសេសផ្នែកពាណិជ្ជកម្មរវាងប្រទេសអ៊ុយក្រែន និង EU គឺជាការលុបចោលការប្រមូលពន្ធសម្រាប់អ៊ុយក្រែន ដោយបានអនុវត្តនៅខែមិថុនា ឆ្នាំ២០២២ កន្លងមកនេះ ៕

ប្រភព ៖ New Paper Today

រដ្ឋធាធានីកៀវ៖ រដ្ឋាភិបាលក្រុងកៀវ បានផ្លាស់ប្ដូរតំណែងរដ្ឋមន្រ្ដី ក្រសួងការពារជាតិ ទៅឲ្យកាន់តំណែងផ្សេង ខណៈអ៊ុយក្រែន កំពុងតែធ្វើសង្គ្រាម ប្រឆាំងនឹងការឈ្លានពានរបស់រុស្ស៊ី និង ការបោសសម្អាត អំពើពុករលួយ នៅក្នុងប្រទេស។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃចន្ទ ទី៦ ខែកុម្ភៈ ថា មនុស្សជំនិតមួយរូបរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) បានបញ្ជាក់ កាលពីថ្ងៃអាទិត្យ ថា រដ្ឋាភិបាលក្រុងកៀវ បានផ្លាស់ប្ដូរតំណែងរដ្ឋមន្រ្ដីក្រសួងការពារជាតិរបស់លោក អូឡែកស៊ី រេស្នីកូវ (Oleksii Reznikov) ហើយត្រូវដាក់ជំនួស ដោយប្រធានទីភ្នាក់ងារចារកម្ម។

លោក ដេវីដ អារ៉ាខាមៀ (David Arakhamia) សមាជិកសភាជាន់ខ្ពស់ និង ជាប្រធានក្រុមអ្នកបម្រើសភាប្រជាជន បានបញ្ជាក់ ថា លោក Reznikov នឹងត្រូវបានផ្ទេរទៅ កាន់ការងារជារដ្ឋមន្ត្រីមួយផ្សេងទៀត។ ចំណែកតំណែងរបស់គាត់ នឹងត្រូវចូលមកជំនួស ដោយលោក គីរីឡូ ប៊ូដាណូវ (Kyrylo Budanov) ប្រធានទីភ្នាក់ងារចារកម្មយោធា GUR ។

លោក Arakhamia បានបញ្ជាក់ ថា ភ្នាក់ងារនានារបស់កងកម្លាំងអ៊ុយក្រែន ដើរតួនាទី ដូចជា ក្រសួងការពារជាតិ មិនគួរត្រូវបានដឹកនាំ ដោយអ្នកនយោបាយ នៅក្នុងអំឡុងពេលសង្រ្គាមនោះទេ ប៉ុន្តែក៏ជាមនុស្សមានសាវតាផ្នែកការពារជាតិ ឬសន្តិសុខផងដែរ។ ចំណែកលោក Reznikov នឹងអាចធ្វើជារដ្ឋមន្រ្ដីក្រសួងឧស្សាហកម្មយុទ្ធសាស្រ្ដ។

នៅក្នុងពេលកាន់តំណែងជារដ្ឋមន្ត្រីការពារជាតិ លោក Reznikov បានសង្កត់ធ្ងន់ អំពីអំពើពុករលួយ នៅក្នុងសម័យសង្គ្រាម ដោយគាត់បាននិយាយ ថា វាស្រដៀងគ្នាទៅនឹងការបោកប្រាស់។

ការដោះដូរតំណែងប្រមុខការពារជាតិ នាពេលនេះ បានកើតឡើង ស្របពេលប្រធានាធិបតីអ៊ុយក្រែន លោក ហ្សេឡែនស្គី កំពុងតែពុះពារ បោសសម្អាតអំពើពុករលួយ នៅក្នុងរដ្ឋាភិបាលរបស់គាត់។ ការធ្វើសង្គ្រាម ប្រឆាំងនឹងអំពើពុករលួយនេះ បាននាំឲ្យមន្រ្ដីជាច្រើននាក់បាត់បង់តំណែង ដោយខ្លះបានដាក់ពាក្យសុំលាលែងពីតំណែង និង ខ្លះទៀត ត្រូវបានបណ្ដេញចេញ។

សកម្មភាពរបស់ប្រធានាធិបតីអ៊ុយក្រែន ប្រឆាំងនឹងរឿងអាស្រូវពុករលួយនេះ ក៏ទទួលបានការកោតសរសើរ ពីតំណាងរាស្រ្ដរបស់សហរដ្ឋអាមេរិក ផងដែរ។ ក្រុមតំណាងរាស្រ្ដរបស់អាមេរិក បានអះអាង ថា ជំនួយ គួរតែត្រូវបានបញ្ជូនទៅកាន់អ៊ុយក្រែន បន្ដទៀត៕

ប្រទេសថៃ ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានស្នើសុំការសហការពីពលរដ្ឋដើម្បីដោះស្រាយបញ្ហាធូលីក្នុងបរិយាកាស PM 2.5 ដោយឈប់ដុតស្មៅក្នុងចម្ការដើម្បីដាំដុះដំណាំ ឬដុតព្រៃស្វែងរកអាហារជាដាច់ខាត ។ លើសពីនេះ លោកក៏បានស្នើទៅកាន់ពលរដ្ឋឱ្យប្រើប្រាស់រថយន្តសាធារណៈកាន់តែច្រើន ព្រមទាំងជំរុញឱ្យអាជ្ញាធរអនុវត្តតាមច្បាប់ឱ្យហ្មត់ចត់ និងចាប់រថយន្តបញ្ចេញផ្សែងខ្មៅគ្រប់ប្រទេស ។

លោក អនុឆា ប៊ូរ៉ាផាឆៃស្រ៊ី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យទីស្តីការនាយករដ្ឋមន្ត្រីបង្ហាញថា នាយករដ្ឋមន្ត្រីថៃ លោក ប្រាយុទ្ធ ចាន់អូចា បានជ្រាបពីបញ្ហាធូលី PM 2.5 ដែលធ្វើឱ្យប៉ះពាល់ដល់សុខភាពពលរដ្ឋគ្រប់តំបន់ក្នុងប្រទេស ។ មូលហេតុជាច្រើនបណ្តាលឱ្យមានធូលី ដូចជា ការដុតស្មៅក្នុងចម្ការត្រៀមដាំដំណាំក្នុងរដូវថ្មី ការសាងសង់ ការដឹកជញ្ជូននានា និងការធ្វើចរាចរណ៍ ។

លោកនាយករដ្ឋមន្ត្រីបានជំរុញក្រសួងធនធានធម្មជាតិ និងបរិស្ថាន ក្រសួងគមនាគមន៍ ក្រសួងឧស្សាហកម្ម ក្រសួងមហាផ្ទៃ ក្រសួងសុខាភិបាល ភ្នាក់ងារនគរបាលជាតិ និងស្ថាប័នពាក់ព័ន្ធទាំងអស់ សហការគ្នាដោះស្រាយបញ្ហាធូលីជាបន្ទាន់ ។ លើសពីនេះ លោកនាយករដ្ឋមន្ត្រីបានស្នើសុំការសហការពីពលរដ្ឋគ្រប់រូបផងដែរ ដោះស្រាយបញ្ហាធូលីក្នុងបរិយាកាស ព្រោះវាធ្វើឱ្យប៉ះពាល់សុខភាពរបស់មនុស្សទូទាំងប្រទេស ។

លោក អនុឆា ថ្លែងថា លោកនាយករដ្ឋមន្ត្រីបានផ្តោតលើការការពារ និងដោះស្រាយបញ្ហាធូលីក្នុង៣តំបន់គឺ ៖
១-ទីក្រុង ៖ ជាកន្លែងមានការធ្វើចរាចរណ៍ច្រើន និងមានរោងចក្រឧស្សាហកម្ម ដូច្នេះ សំណូមពរឱ្យថែទាំរថយន្តរបស់រដ្ឋ និងឯកជន ហើយអាជ្ញាធរត្រូវបន្ថែមការរឹតបន្តឹងពិនិត្យឡើងវិញ និងពង្រីកកន្លែងត្រួតពិនិត្យរថយន្តបញ្ចេញផ្សែងខ្មៅចាប់ពីពេលនេះទៅ ។ លើសពីនេះ ពិនិត្យតាមរោងចក្រឧស្សាហកម្មនានាដែលបំភាយឧស្ម័នខ្ពស់ និងពិនិត្យទីកន្លែងអាជីវកម្មដូចជា អាជីវកម្មលាយស៊ីម៉ងត៍ អាជីវកម្មរលាយលោហៈ យានដ្ឋានលាបថ្នាំរថយន្ត និងសកម្មភាពផលិតធូប ។

២-តំបន់កសិកម្ម ៖ ជាកន្លែងកកើតធូលីដោយសារការដុតស្មៅ ដូច្នេះ សូមឱ្យកសិករទាំងអស់ឈប់ដុតស្មៅក្នុងបរិវេណដីចម្ការរបស់ខ្លួន ។

៣-តំបន់ព្រៃ ៖ ជាកន្លែងកកើតធូលីដោយសារការដុតព្រៃ ដូច្នេះ គ្រប់គ្នាត្រូវសហការគ្រប់គ្រងការដុតព្រៃដើម្បីការពារភ្លើងឆេះព្រៃ ។

លោក អនុឆា បន្តថា ៖ «លោកនាយករដ្ឋមន្ត្រីបញ្ជាក់ហើយបញ្ជាក់ទៀតទៅកាន់ពលរដ្ឋឱ្យកាត់បន្ថយសកម្មភាពទាំងអស់ដែលបង្កឱ្យមានធូលី និងសូមឱ្យពលរដ្ឋសហការកាត់បន្ថយការប្រើប្រាស់រថយន្តផ្ទាល់ខ្លួន ដោយងាកមកជិះរថយន្តសាធារណៈវិញ ។ លើសពីនេះ អាជ្ញាធរថៃត្រូវអនុវត្តច្បាប់ឱ្យបានហ្មត់ចត់ ដោយចាប់រថយន្តបញ្ចេញផ្សែងខ្មៅគ្រប់ប្រភេទ ហើយមិនបន្តអាជ្ញាប័ណ្ណយានយន្តណាមិនគោរពច្បាប់ ហើយត្រូវតាមដានស្ថានការណ៍ជាបន្តបន្ទាប់» ៕

ប្រភព ៖ TODAY

ក្តាម Horseshoe ឬកម្ពុជាហៅថា ប្រឡាំងកាស គឺជា សត្វមួយប្រភេទដែលបានរស់នៅជាង៤៤៥លានឆ្នាំមកហើយនៅលើផែនដី មុនពេលដែលដាយណូស័រមានវត្តមានទៅទៀត នេះបើយោងទៅតាមហ្វូសីលដែលគេទើបតែបានរកឃើញ។

បើទោះបីជាមានវត្តមានរាប់រយលានឆ្នាំនៅលើផែនដីក៏ដោយ ក៏ប៉ុន្តែសត្វនេះមិនមានការផ្លាស់ប្តូររូបរាងសូម្បីតែបន្តិច។ ជាមួយរូបរាងដ៏ចម្លែករបស់វា សត្វប្រឡាំងកាស មិនត្រូវបានគេចាត់ទុកចូលជាពពួកសត្វក្តាម ត្រី ឬអណ្តើកណាទេ។ ម្យ៉ាងវិញទៀត សត្វនេះមានតែនៅអាមេរិក មុិកសុិច និងអាសុីអាគ្នេយ៍ប៉ុណ្ណោះ ហេតុដូចនេះ ពួកវាមិនទាន់ត្រូវបានទទួលស្គាល់ពេញលេញនៅលើពិភពលោកលើការបែងចែកពពួកនោះទេ។

បើនិយាយពីរូបរាងសត្វនេះវិញ វាមាន​ស្នូក​ដូច​អណ្ដើក តែ​ស្នូក​ស្ដើង​ស្រួយ និងមាន​ពង​ដូច​ក្ដាម តែ​ធំ​ៗ​ជាង​ពង​ក្ដាម។ អ្វីដែលពិសេសនោះសត្វនេះ មានភ្នែកដល់ទៅ១០ថែមទៀត។

ថ្វីបើមានរូបរាងដ៏ចម្លែកមិនសូវមានសាច់ តែសត្វប្រឡាំងកាស ត្រូវបានប្រជាជនកម្ពុជាយកមកធ្វើជាម្ហូបសម្រាប់ទទួលតានបានជាច្រើនមុខផងដែរ៕

រដ្ឋធានីវ៉ាស៊ីនតោន៖ កងទ័ពជើងទឹកសហរដ្ឋអាមេរិក កំពុងតែស្វែងរកកម្ទេចកម្ទីបាឡុងចារកម្មរបស់ចិន ដែលបានធ្លាក់ចូលទៅក្នុងមហាសមុទ្រអាត្លង់ទិក ក្រោយការបាញ់ទម្លាក់ នៅឆ្នេរសមុទ្រ រដ្ឋសៅការ៉ូលីណា (South Carolina) កាលពីចុងសប្តាហ៍នេះ។

សារព័ត៌មាន Aljazeera បានចេញផ្សាយ កាលពីព្រឹក ថ្ងៃចន្ទ ទី៦ ខែកុម្ភៈ ថា លោកឧត្ដមសេនីយ៍ ហ្គែន វ៉ាន់ហ៊ឺក (Glen VanHerck) មេបញ្ជាការ នៃទីបញ្ជាការការពារដែនអាកាសអាមេរិកខាងជើង និង ជាមេបញ្ជាការ នៃទីបញ្ជាការភាគខាងជើងរបស់សហរដ្ឋអាមេរិក បានបញ្ជាក់ ថា បាឡុង ដែលហោះ នៅក្នុងរយៈកម្ពស់ខ្ពស់ នៅអាមេរិកខាងជើង ចាប់តាំងពីចុងខែមករាមកនោះ ត្រូវបានបាញ់ទម្លាក់ នៅក្នុងដែនអាកាសរបស់សហរដ្ឋអាមេរិក ហើយវាបានធ្លាក់ចូលទៅក្នុងដែនទឹករបស់សហរដ្ឋអាមេរិក។

លោកមេបញ្ជាការ VanHerck បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃអាទិត្យ ថា «កងទ័ពជើងទឹកអាមេរិករបស់យើង បច្ចុប្បន្នកំពុងធ្វើប្រតិបត្តិការស្តារឡើងវិញ ដោយមានឆ្មាំឆ្នេរសមុទ្រអាមេរិក ជួយធានាសន្ដិសុខដល់តំបន់នោះ និង រក្សាសុវត្ថិភាពសាធារណៈ»។

ដោយឡែក ក្រុងប៉េកាំង បានបញ្ជាក់ ថា «បាឡុងនោះ ត្រូវបានប្រើប្រាស់ សម្រាប់ការស្រាវជ្រាវផ្នែកឧតុនិយម ហើយវាត្រូវបានបង្ហោះរសាត់ទៅ ដោយសារតែអាកាសធាតុដ៏អាក្រក់ និង សមត្ថភាពចង្កូត មានដែនកំណត់របស់វា។

លោក តាន់ កេហ្វី (Tan Kefei) អ្នកនាំពាក្យ ក្រសួងការពារជាតិចិន បានបញ្ជាក់ កាលពីថ្ងៃអាទិត្យ ថា ការបាញ់ទម្លាក់បាឡុង ដែលកំពុងតែហោះហោះ ប្រហែលកម្ពស់ ១៨ ៣០០ម៉ែត្រនោះ គឺជាប្រតិកម្មដ៏ហួសហេតុ។ ចិននឹងរក្សាសិទ្ធិ នៅក្នុងការចាត់វិធានការដ៏ចាំបាច់ ដើម្បីដោះស្រាយស្ថានភាពស្រដៀងគ្នា។

សូមជម្រាបថា បាឡុងនោះ បានចូលទៅកាន់ដែនកាសរបស់សហរដ្ឋអាមេរិក ជាលើកដំបូង នៅក្នុងរដ្ឋអាឡាស្កា (Alaska) កាលពីថ្ងៃទី២៨ ខែមករា មុនពេលវាបានធ្វើដំណើរ ចូលទៅក្នុងដែនអាកាសរបស់កាណាដា នាថ្ងៃទី៣០ ខែមករា។ បន្ទាប់មក បាឡុងនោះ បានវិលចូលមកដែនអាកាសរបស់សហរដ្ឋអាមេរិក ជាថ្មីវិញ នៅភាគខាងជើង អាយដាហូ (Idaho) នៅថ្ងៃទី៣១ ខែមករា។

សហរដ្ឋអាមេរិក បាននិយាយនៅមុននេះ ថា បាឡុងនោះ មានទំហំប៉ុនរថយន្ដក្រុងចំនួនបី ហើយកម្ទេចកម្ទីរបស់វា ត្រូវបានធ្លាក់ពាសពេញផ្ទៃសមុទ្រ មានទំហំជាង១១គីឡូម៉ែត្រ។ ឧបទ្ទវហេតុនេះ បានធ្វើឱ្យទំនាក់ទំនង រវាងសហរដ្ឋអាមេរិក និងចិន កាន់តែតានតឹងឡើង ហើយក្រុងវ៉ាស៊ីនតោន បានលុបចោលនូវដំណើរទស្សនកិច្ចរបស់រដ្ឋមន្ត្រីការបរទេស លោក អេតូនី ប៊ីលនខែន (Antony Blinken) ទៅកាន់រដ្ឋធានីប៉េកាំង ក្រោយពេលរកឃើញបាឡុងនោះ៕

រដ្ឋធានីកៀវ៖ រដ្ឋមន្រ្ដីក្រសួងការពារជាតិអ៊ុយក្រែន បានអះអាង ថា ក្រុងកៀវ មានកម្លាំងទ័ពដ៏ក្លាហាន និង ធនធានជាច្រើន សម្រាប់ទប់ទល់នឹងការវាយប្រហារទ្រង់ទ្រាយធំ ពីកម្លាំងទាហានរុស្ស៊ី នាពេលខាងមុខនេះ។

សារព័ត៌មាន Aljazeera បានចេញផ្សាយ កាលពីថ្ងៃអាទិត្យ ទី៥ ខែកុម្ភៈ ថា លោក អូឡែកស៊ី រេស្នីកូវ (Oleksii Reznikov) រដ្ឋមន្ត្រី ក្រសួងការពារជាតិអ៊ុយក្រែន បានបញ្ជាក់ ថា សម្ពន្ធមិត្តរបស់អ៊ុយក្រែន នឹងយល់ព្រមផ្តល់យន្តហោះចម្បាំង សម្រាប់ប្រយុទ្ធជាមួយនឹងកម្លាំងទាហានរបស់រុស្ស៊ី ទោះបីជាមានការអត្ថាធិប្បាយកាលពីពេលថ្មីៗរបស់មេដឹកនាំលោកខាងលិច បានលើកឡើង ថា យន្តហោះចម្បាំង នឹងមិនមកដល់ នាពេលខាងមុខនេះយ៉ាងណាក៏ដោយ។

លោករដ្ឋមន្រ្ដី បានថ្លែងទៅកាន់សន្និសីទសារព័ត៌មាន កាលពីថ្ងៃអាទិត្យ ថា រុស្ស៊ី នឹងចាប់ផ្ដើមវាយប្រហារទ្រង់ទ្រាយធំ នៅក្នុងរយៈពេលប៉ុន្មានសប្ដាហ៍ខាងមុខនេះ ប៉ុន្ដែកងទ័ពការពារទឹកដីរបស់អ៊ុយក្រែន និង ធនធានរបស់ប្រទេសនេះ អាចទប់ទល់នឹងការវាយប្រហារបែបនេះបាន។ យោធារបស់ក្រុងកៀវ នឹងរារាំងដល់សកម្មភាពយោធារបស់ក្រុងមូស្គូ បើទោះជារថក្រោះ និង ប្រព័ន្ធគ្រឿងសព្វាវុធផ្សេងៗទៀត មកពីលោកខាងលិច នៅតែមិនបានមកដល់ទាន់ពេលយ៉ាងណាក៏ដោយ។

ប្រមុខការពារជាតិអ៊ុយក្រែន បានព្យាករ ថា គ្រឿងសឹកដែលនឹងមកដល់នោះ អាចនឹងមានយន្តហោះចម្បាំងផងដែរ។ ប៉ុន្ដែនៅពេលមានសំណួរលើកឡើង ជាប្រភេទណាឲ្យពិតប្រាកដ … គាត់គ្រាន់តែគិត ថា បេសកកម្មនេះ ត្រូវបានបញ្ចប់រួចហើយ។

ទោះជាយ៉ាងណា រហូតមកដល់ពេលនេះ អ៊ុយក្រែន បានទទួលការគាំទ្រ ពីបណ្ដាប្រទេសនៅក្នុងតំបន់បាល់ទិក និង ប៉ូឡូញ នៅក្នុងដំណើរស្វែងរករបស់ក្រុងកៀវ ដើម្បីទទួលបានយន្តហោះចម្បាំងរបស់លោកខាងលិច។ ប៉ុន្តែមេដឹកនាំលោកខាងលិចមួយចំនួន បានសម្តែងនូវការព្រួយបារម្ភ ថា ការផ្តល់យន្តហោះចម្បាំង អាចជំរុញឲ្យវិមានក្រឹមឡាំង ទាញប្រទេសរបស់ពួកគេ ឱ្យចូលកាន់តែជ្រៅ ទៅក្នុងជម្លោះ ដែលបានធ្វើឱ្យមនុស្សរាប់ម៉ឺននាក់ ស្លាប់ និង បង្កនូវការបំផ្លិចបំផ្លាញដ៏ធំបំផុត នៅក្នុងសង្គ្រាមនេះ។

រដ្ឋាភិបាលក្រុងកៀវ បានបញ្ជាក់ ថា យន្ដហោះរបស់លោកខាងលិច មានសារៈសំខាន់យ៉ាងខ្លាំង សម្រាប់ការប្រជែងលើឧត្តមភាពដែនអាកាសរបស់រុស្ស៊ី និង ធានាបាន អំពីជោគជ័យទៅលើការវាយលុក ប្រឆាំងនឹងរុស្ស៊ី។ ជាមួយគ្នានេះ លោក Reznikov បានព្យាករ ថា ការវាយលុកដ៏ធំ អាចនឹងចាប់ផ្តើមឡើង នៅអំឡុងខួបមួយឆ្នាំ នៃសង្រ្គាមរបស់ក្រុងមូស្គូ នាថ្ងៃទី២៤ ខែកុម្ភៈ។

លោករដ្ឋមន្រ្ដី ក្រសួងការពារជាតិអ៊ុយក្រែន បានប្រាប់ដល់ក្រុមអ្នកកាសែត ថា «គ្រឿងសព្វាវុធរបស់លោកខាងលិចទាំងអស់ នៅមិនទាន់មកដល់នៅឡើយ ប៉ុន្ដែយើងមានគ្រឿសឹក និង ធនធានបម្រុងគ្រប់គ្រាន់ សម្រាប់ជួយរក្សាស្ថិរភាព និង ទប់ទល់នឹងការវាយប្រហារ ពីរុស្ស៊ី»។

ចាប់តាំងពីសង្គ្រាមបានចាប់ផ្តើមរហូតមក ក្រុមមន្ត្រីលោកខាងលិច បានច្រានចោលនូវសំណើមួយចំនួនរបស់អ៊ុយក្រែន ដូចជា មីស៊ីលរយៈចម្ងាយឆ្ងាយ ខណៈរថក្រោះប្រយុទ្ធធុនធ្ងន់ដ៏ទំនើប ទើបយល់ព្រម នាពេលនេះ។ ប៉ុន្ដែលោកខាងលិច នៅតែបដិសេធ ផ្គត់ផ្គង់យន្តហោះចម្បាំងទំនើបៗនៅឡើយ៕

ប្រទេសថៃ ៖ កាលពីថ្ងៃទី៣ ខែកុម្ភៈ កន្លងមក ក្រសួងការបរទេសថៃបានជូនដំណឹងដល់ពលរដ្ឋថៃនៅប្រទេសកូរ៉េខាងត្បូង ដែលលួចចូលធ្វើការខុសច្បាប់ឱ្យទៅបង្ហាញខ្លួននៅការិយាល័យប៉ូលិសអន្តោប្រវេសន៍កូរ៉េខាងត្បូង ត្រឹមថ្ងៃទី២៨ ខែកុម្ភៈ នេះ ។ បើហួសកំណត់ ពួកគេនឹងត្រូវបានពិន័យជាប្រាក់៣០លានវ៉ុន ឬប្រមាណ៨សែនបាត ។ ក្រោយមក នៅថ្ងៃទី៤ ខែកុម្ភៈ ប៉ូលិសបានចាប់ខ្លួនស្រីឈ្មួញកណ្តាលជនជាតិថៃ ដែលបោកប្រាស់ពលករថៃទៅធ្វើការនៅកូរ៉េខាងត្បូង ជាដំបូងរកឃើញថា មានអ្នកចាញ់បោកជាង៥០នាក់ ។

ស្រីឈ្មួញកណ្តាលរូបនេះឈ្មោះ អ៊ីន ថុន ត្រូវបានប៉ូលិសចាប់ខ្លួននៅផ្ទះលេខ៤/៣ ឃុំហ្វាហ្វាំង ស្រុកម៉ែព្រិក ខេត្តឡាំប៉ាង ដោយស្រ្តីរូបនេះអះអាងថា នឹងនាំពលករថៃទៅធ្វើការនៅប្រទេសកូរ៉េខាងត្បូង ហើយអ្នកជឿ ក៏ព្រមផ្ទេរប្រាក់ថ្លៃរត់ការឯកសារចាប់ពីរាប់ម៉ឺនបាត ដល់រាប់សែនបាតឱ្យនាង ។ តាមការសាកសួរបឋម ស្ត្រីជាប់ចោទបានយល់ព្រមសារភាព ហើយប៉ូលិសនឹងចាត់វិធានការតាមច្បាប់បន្តទៀត ។

កាលពីខែកក្កដា ឆ្នាំ២០២២ កន្លងមក មានអ្នកចាញ់បោកស្ត្រីខាងលើនេះជាច្រើននាក់បានមកដាក់ពាក្យបណ្តឹងនៅប៉ុស្តិ៍ប៉ូលិស ក្នុងករណីឆបោកប្រជាពលរដ្ឋ និងបោកបញ្ឆោតមនុស្សទៅធ្វើការនៅក្រៅប្រទេស ។ ជនរងគ្រោះនិយាយថា ស្ត្រីរូបនេះអះអាងថា ខ្លួនអាចនាំពលករថៃទៅធ្វើការនៅប្រទេសកូរ៉េខាងត្បូងបាន ដោយទាមទារប្រាក់ដល់ខ្ទង់សែនបាត ដោយនិយាយថា ប្រាក់នេះសម្រាប់ធានារ៉ាប់រងលើការធ្វើដំណើរ ប៉ុន្តែពលរដ្ឋថៃទាំងនោះមិនបានទៅធ្វើការពិតប្រាកដឡើយ ខណៈពួកគេបានផ្ទេរប្រាក់ទៅឱ្យនាងរួចហើយ ប៉ុន្តែមិនអាចទាក់ទងបានទៀត ។

ប៉ូលិសបានសាកសួរទៅកាន់ការិយាល័យកណ្តាលផ្នែកចុះឈ្មោះរកការងារ និងការពារសិទ្ធិអ្នករកការងារធ្វើ ដើម្បីស្វែងរកប្រវត្តិស្ត្រីឈ្មោះ អ៊ីន ថុន ។ តាមការស្រាវជ្រាវបង្ហាញថា ស្ត្រីឈ្មោះ អ៊ីន ថុន មិនបានទទួលការអនុញ្ញាតដើម្បីរកការងារឱ្យពលករថៃទៅធ្វើការនៅក្រៅប្រទេស និងមិនបានចុះឈ្មោះជាឈ្មួញកណ្តាលទេ ។ តាមទិន្នន័យរបស់នាយកដ្ឋានស្វែងរកការងារបង្ហាញថា មានជនរងគ្រោះចំនួន១៦នាក់បានទៅតវ៉ា ដោយសារពួកគេម្នាក់ៗចំណាយប្រាក់អស់៤សែនបាត ហើយគ្មានការងារធ្វើ ៕ ប្រភព ៖ 3PlusNews