សហរដ្ឋអាមេរិក ៖ បន្ទាប់ពីការកសាងប្រទេសជាតិរយៈពេលជាង២០០ឆ្នាំមក បច្ចុប្បន្ន អាមេរិកបានក្លាយជាប្រទេសមានសេដ្ឋកិច្ចរីកចម្រើនជាងគេក្នុងពិភពលោក ហើយអ្នកមានទ្រព្យសម្បត្តិជាច្រើនរស់នៅទីនេះ ស្មើ៣៦% នៃអ្នកមានទ្រព្យសម្បត្តិក្នុងពិភពលោក ។ ទោះយ៉ាងណា ការផ្លាស់ប្តូរបានកើតឡើងនៅឆ្នាំ២០២៣ ដោយគេរាយការណ៍ថា អ្នកមានសម្បត្តិនៅអាមេរិកកំពុងស្វែងរកឱកាសល្អជាងមុននៅក្រៅប្រទេស ។

តាមរបាយការណ៍ពីទ្រព្យសម្បត្តិអាមេរិក (USA Wealth Report) រៀបចំដោយក្រុមហ៊ុនជំនាញវិនិយោគដើម្បីផ្លាស់ប្តូរទីតាំង (Henley & Partners) ជាមួយក្រុមហ៊ុនទ្រព្យសម្បត្តិពិភពលោក (New World Wealth) បញ្ជាក់ថា អាមេរិកបានបាត់បង់ការទាក់ទាញអ្នកមានទ្រព្យសម្បត្តិពីក្រៅប្រទេសដែលត្រូវការផ្លាស់ទីលំនៅ ខណៈអ្នកមានទ្រព្យសម្បត្តិនៅអាមេរិក ក៏មានបំណងផ្លាស់ទីលំនៅចេញពីទីនេះកាន់តែច្រើន ។

គេសង្កេតឃើញថា អ្នកមានទ្រព្យសម្បត្តិក្នុងពិភពលោកបានចូលមករស់នៅអាមេរិកធ្លាក់ចុះនៅឆ្នាំ២០២២ នៅសល់ត្រឹមតែ១.៥០០នាក់ប៉ុណ្ណោះ ។ គេចាត់ទុកថា វាធ្លាក់ចុះខ្លាំងបើធៀបនឹងឆ្នាំ២០១៣-២០១៩ ដែលអ្នកមានទ្រព្យសម្បត្តិក្នុងពិភពលោកបានមករស់នៅអាមេរិកចំនួន៦.៤០០នាក់ ទៅ១០.៨០០នាក់/១ឆ្នាំ ។

Mehdi Kadir ប្រធានប្រចាំតំបន់អាមេរិកខាងជើងមកពី Henley & Partners បង្ហាញថា កាលពីឆ្នាំ២០២២ មានវិនិយោគិនអាមេរិកជាច្រើនបានសាកសួរព័ត៌មានពីការផ្លាស់ទីលំនៅ ស្មើ៤៤៧% ពីឆ្នាំ២០១៩ ។ វាជាលើកដំបូងហើយ ដែលវិនិយោគិនអាមេរិកជាច្រើនបានមកចុះឈ្មោះក្នុងគម្រោងវិនិយោគផ្លាស់ទីលំនៅ និងស្នើសុំសញ្ជាតិបរទេស បើធៀបនឹងវិនិយោគិនមកពីប្រទេសផ្សេង ។

Jeff D. Opdike អ្នកជំនាញវិនិយោគបញ្ជាក់ថា អត្រាអតិផរណាកើនឡើងខ្ពស់ សង្គមមិនស្ងប់ស្ងាត់ និងបញ្ហានយោបាយ បានធ្វើឱ្យពលរដ្ឋអាមេរិកដែលមានទ្រព្យសម្បត្តិច្រើនផ្លាស់ប្តូរទីលំនៅ ឬលះបង់សញ្ជាតិរបស់ខ្លួន ។ អ្នកជំនាញរូបនេះថា ៖ «បញ្ហាទាំងអស់នេះហើយធ្វើឱ្យពលរដ្ឋអាមេរិកដែលមានទ្រព្យសម្បត្តិស្តុកស្តម្ភនាំគ្រួសារចាកចេញពីទឹកដីនេះ» ។

ទោះយ៉ាងណា នៅតាមទីក្រុងនានាដូចជា Austin, Scottsdale, Greenwich និង Miami អ្នកមានទ្រព្យសម្បត្តិបានមករស់នៅច្រើន ខណៈទីក្រុងធំៗបែរជាធ្លាក់ចុះដូចជា Los Angeles, Chicago និង New York ។

បច្ចុប្បន្ន New York បានក្លាយជាទីក្រុងសម្រាប់អ្នកមានទ្រព្យសម្បត្តិរស់នៅច្រើនជាងគេនៅអាមេរិក និងក្នុងពិភពលោក គឺស្មើ៣៤ម៉ឺននាក់ បន្ទាប់មកគឺ San Francisco ស្មើ២៨ម៉ឺន៥ពាន់នាក់, Los Angeles ស្មើ២០ម៉ឺន៥ពាន់៤០០នាក់, Chicago ស្មើ១២ម៉ឺន៤ពាន់នាក់ និង Houston ស្មើ៩៨.៥០០នាក់ ៕

ប្រភព ៖ PPTVHD36

ប្រទេសអារ៉ាប៊ីសាអូឌីត ៖ អារ៉ាប៊ីសាអូឌីត គឺជាប្រទេសមួយទៀតដែលបានចាប់ផ្តើមប្រើប្រាស់គំនូសពន្លឺបំភ្លឺផ្លូវ បន្ទាប់ពីប្រទេសអូស្ត្រាលី និងបារាំង ដែលចាប់ផ្តើមប្រើគំនូសពន្លឺបំភ្លឺផ្លូវកាលពីពេលមុននេះ ។ ការប្រើប្រាស់គំនូសនេះមានប្រយោជន៍ច្រើនដូចជា មានសុវត្ថិភាព កាត់បន្ថយការចំណាយប្រាក់លើការជួសជុលផ្លូវ និងកាត់បន្ថយការដាក់បង្គោលភ្លើងផងដែរ ។គំនូសពន្លឺបំភ្លឺផ្លូវនឹងជួយឱ្យការបើកបរយានយន្តលើផ្លូវងងិតមានសុវត្ថិភាព ដូចជា ការបើកបរឡើងភ្នំ ឬការបើកបរនៅតំបន់ឆ្ងាយ ដែលអ្នកបើកបរមើលមិនឃើញផ្លូវ បើទោះជាពួកគេប្រើចង្កៀងភ្លើងក្រោមរថយន្តក្តី និងជួយកាត់បន្ថយការប្រើប្រាស់ភ្លើងសញ្ញាខ្ពស់ (ចង្កៀងភ្លើងបាញ់ឆ្ងាយ) ។ ដូច្នេះ ការប្រើប្រាស់ចង្កៀងភ្លើងមុខពេលបើកបរផ្លូវឆ្ងាយបញ្ច្រាសទិសគ្នា ធ្វើឱ្យកើតគ្រោះថ្នាក់រាប់មិនអស់ ។

លើសពីនេះ គំនូសពន្លឺបំភ្លឺផ្លូវនឹងអាចកាត់បន្ថយការចំណាយប្រាក់លើការជួសជុលផ្លូវក្នុងរយៈពេលយូរ ខណៈវារឹងមាំជាងផ្លូវធម្មតា ។ ប្រទេសអារ៉ាប៊ីសាអូឌីតងាកមកប្រើប្រាស់គំនូសពន្លឺបំភ្លឺផ្លូវ ដើម្បីធ្វើឱ្យទីក្រុងមានរបៀបរៀបរយជាងការដាក់បង្គោលភ្លើងជាច្រើនតាមដងផ្លូវ ។

គំនូសពន្លឺបំភ្លឺផ្លូវ មានពណ៌ស្រដៀងគ្នានឹងស្ទិកក័រភ្លឺចែងចាំងដែលអាចមើលឃើញក្នុងទីងងិត ប៉ុន្តែទោះយ៉ាងណា នៅប្រទេសអូស្ត្រាលីឯណោះវិញបានជួបបញ្ហាមួយចំនួន ពីព្រោះពន្លឺភ្លើងពណ៌លើគំនូសបានរលត់បាត់ ដោយសារវាស្រូបពន្លឺមិនគ្រប់គ្រាន់ក្នុងអំឡុងពេលថ្ងៃ និងមានភ្លៀងធ្លាក់ខ្លាំង ។ ហេតុនេះ យើងឃើញថា ការប្រើប្រាស់ផ្លូវនេះបានសម្រួលដល់អ្នកបើកបររថយន្តជាច្រើនដូចជា កាត់បន្ថយគ្រោះថ្នាក់ពេលបើកបរនៅតាមតំបន់ឆ្ងាយៗ បើកលើផ្លូវឡើងភ្នំខ្ពស់ ឬបើកចុះភ្នំ ខណៈផ្លូវខ្លះគ្មានបង្គោលភ្លើងបំភ្លឺទេ ៕

ប្រភព ៖ springnews

្រទេសថៃ ៖ កាលពីថ្ងៃទី១៦ ខែកុម្ភៈ អ្នកនាង ឆៈណក ចន្ថាថង សមាជិកសភាមកពីគណបក្សភឿថៃ បានលើកឡើងពីភាពបរាជ័យរបស់រដ្ឋាភិបាលថៃក្នុងការបង្ក្រាបថ្នាំញៀន ដោយអនុញ្ញាតឱ្យមានការប្រើប្រាស់កញ្ឆា ដែលធ្វើឱ្យពិបាកព្យាបាលអ្នកញៀនថ្នាំ និងបន្ថែមចំនួនអ្នកជំងឺផ្លូវចិត្តផងដែរ ។

អ្នកនាង ឆៈណក ឱ្យដឹងថា រដ្ឋាភិបាលមិនបានយកចិត្តទុកដាក់ក្នុងការដោះស្រាយបញ្ហានេះទេ ព្រោះបានកាត់បន្ថយថវិកាសម្រាប់ការបង្ក្រាបថ្នាំញៀន និងស្តារនីតិសម្បទា ។ យោងតាមព័ត៌មានពីការិយាល័យថវិកាឃើញថា ថវិកាសម្រាប់បង្ក្រាបថ្នាំញៀនក្នុងឆ្នាំ២០២១ ស្មើ១.០៥៨លានបាត និងនៅឆ្នាំ២០២២ ស្មើតែ៧៤៤លានបាតប៉ុណ្ណោះ គឺធ្លាក់ចុះ៣០% ។

អ្នកនាង ឆៈណក បានលើកឡើងថា ហេតុការណ៍បាញ់ប្រហារមួយនៅខេត្តណងប៊ូឡាំភូ គឺជាការបង្ក្រាបថ្នាំញៀនបរាជ័យរបស់រដ្ឋាភិបាល ។ នាងបន្តថា បើយើងក្រឡេកមើលឆ្នាំ២០០១ កន្លងមក លោក ថាក់ស៊ីន អតីតនាយករដ្ឋមន្ត្រីថៃ ធ្លាប់បានប្រកាសសង្គ្រាមជាមួយថ្នាំញៀន ហើយពេលនោះ ថ្នាំញៀនបានធ្លាក់ចុះជាបន្តបន្ទាប់ ។ ក្រោយមក នៅឆ្នាំ២០១១ លោកស្រី យីងឡាក់ អតីតនាយករដ្ឋមន្ត្រីថៃ ក៏បានប្រកាសបង្ក្រាបថ្នាំញៀនផងដែរ និងចាត់ទុកបញ្ហាថ្នាំញៀនជារបៀបវារៈជាតិ ។ ដូច្នេះឃើញថា វាផ្ទុយនឹងអ្វីដែលលោក ប្រាយុទ្ធ ចាន់អូចា និយាយថា ទោះជាមាននាយករដ្ឋមន្ត្រី១០០នាក់ ក៏មិនអាចដោះស្រាយបញ្ហាថ្នាំញៀនបានដែរ ៕ ប្រភព ៖ khaosod

រដ្ឋធានីវ៉ាស៊ីនតោន៖ ដោយសារតែក្រុងវ៉ាស៊ីនតោន កំពុងតែរវល់នឹងតាមប្រមាញ់បាឡុង ជាច្រើន ហោះនៅលើពិភពលោក ធ្វើឲ្យរុស្ស៊ី មើលឃើញឱកាសល្អ បញ្ជូនយន្ដហោះទម្លាក់គ្រាប់បែក និង យន្ដហោះចម្បាំងជាច្រើនគ្រឿង ហោះទៅជិតតំបន់ការពាររបស់សហរដ្ឋអាមេរិក។

សារព័ត៌មាន The Eurasia Times បានចេញផ្សាយ កាលពីថ្ងៃព្រហស្បតិ៍ ទី១៦ ខែកុម្ភៈ ថា រុស្ស៊ី បានបញ្ជូនយន្ដហោះទម្លាក់គ្រាប់បែក ប្រភេទ Tu-95 (ទូ-៩៥) ជាច្រើនគ្រឿង អមដោយយន្ដហោះចម្បាំង Su-35 (ស៊ូ-៣៥) ព្យាយាមទៅកាន់រដ្ឋអាឡាស្កា សហរដ្ឋអាមេរិក។ សកម្មភាពរបស់កងទ័ពអាកាសរបស់រុស្ស៊ី បានកើតឡើង ស្របពេលកងទ័ពអាកាសសហរដ្ឋអាមេរិក កំពុងតែតាមបាញ់ទម្លាក់វត្ថុនៅលើអាកាសមិនស្គាល់អត្ដសញ្ញាណ (UFO) និង បាឡុងចារកម្មហោះ នៅតំបន់អាមេរិកខាងជើង។

ទីបញ្ជាការការពារដែនអាកាសអាមេរិកខាងជើង (NORAD) បានប្រកាស ថា យន្តហោះចម្បាំងរបស់ខ្លួន កាលពីថ្ងៃទី១៣ ខែកុម្ភៈ បានដេញស្ទាក់យន្តហោះទម្លាក់គ្រាប់បែកយុទ្ធសាស្ត្រ Tu-95MS និង យន្តហោះ Su-35 របស់រុស្ស៊ី ហោះចូលទៅក្នុងតំបន់កំណត់អត្តសញ្ញាណការពារដែនអាកាសអាឡាស្កា រហូតបង្កឱ្យមានការជូនដំណឹង នៅក្នុងការបញ្ជា។

ទីបញ្ជាការការពារដែនអាកាសអាមេរិកខាងជើង (NORAD) បានបញ្ជាក់ នៅលើបណ្ដាញសង្គមធ្វីធើរ ថា «តំបន់អាឡាស្ការបស់ទីបញ្ជាការការពារដែនអាកាសអាមេរិកខាងជើង (NORAD) បានរកឃើញ និង តាមដាន កំណត់អត្តសញ្ញាណជាវិជ្ជមាន ហើយបានដេញស្ទាក់យន្តហោះរបស់រុស្ស៊ី ចំនួន៤គ្រឿង ហោះចូល និង ប្រតិបត្តិការនៅក្នុងតំបន់កំណត់អត្តសញ្ញាណការពារដែនអាកាសរបស់រដ្ឋអាឡាស្កា (ADIZ) កាលពីថ្ងៃទី១៣ ខែកុម្ភៈ ឆ្នាំ២០២៣។ យន្ដហោះរបស់រុស្ស៊ី ទាំងនោះ រួមមាន យន្ដហោះទម្លាក់គ្រាប់បែក Tu-95 យន្ដហោះចម្បាំង Su-35»។

ទោះជាយ៉ាងណាក៏ដោយ សេចក្តីថ្លែងការណ៍របស់ NORAD បានបញ្ជាក់ថា យន្តហោះនៅតែស្ថិតក្នុងដែនអាកាសអន្តរជាតិ ហើយមិនបានចូលមកក្នុងដែនអាកាស នៃអធិបតេយ្យភាពរបស់អាមេរិក ឬ កាណាដា នោះឡើយ។ នៅពេលចូលទៅក្នុងតំបន់កំណត់ការពារដែនអាកាសនោះ យន្តហោះត្រូវប្រកាសតាមវិទ្យុ ទៅកាន់ឧបករណ៍បញ្ជាចរាចរណ៍ផ្លូវអាកាសជាមួយនឹងផ្លូវ ដែលមានគោលបំណង និង ទិសដៅចុងក្រោយរបស់យន្ដហោះ។

យន្តហោះចម្បាំងរបស់រុស្ស៊ី បានហោះរំលោភចូលជាប្រចាំ នៅតំបន់កំណត់ដែនអាកាសរបស់អាមេរិកខាងជើង ហើយត្រូវបានដេញស្ទាក់ និង អមដោយយន្តហោះចម្បាំងរបស់ទីបញ្ជាការការពារដែនអាកាសអាមេរិកខាងជើង (NORAD)។ កាលពីឆ្នាំ ២០២០ កងទ័ពសហរដ្ឋអាមេរិក បានដេញស្ទាក់បែបនេះ ចំនួន៦០លើក។

សកម្មភាពរបស់យន្ដហោះកងទ័ពអាកាសរុស្ស៊ី បានកើតឡើង ក្រោយពេលសហរដ្ឋអាមេរិក បានបាញ់ទម្លាក់បាឡុងរបស់ចិន កាលពីថ្ងៃទី៤ ខែកុម្ភៈ ដែលសង័្សយជាយានចារកម្ម។ ក្រុមមន្រ្ដីសហរដ្ឋអាមេរិក បានបាញ់ទម្លាក់វត្ថុនៅលើអាកាស ចំនួន៣ផ្សេង បន្ទាប់ពីការបាញ់ទម្លាក់បាឡុងរបស់ចិន៕

ប្រទេសថៃ ៖ កាលពីថ្ងៃទី១៥ ខែកុម្ភៈ លោក វុទ្ធិក្រៃ លីវីរ៉ាផាន់ អគ្គនាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានថ្លែងថា កាលពីខែមករាកន្លងមក ខាងនាយកដ្ឋានរួមជាមួយនាយកដ្ឋានប្រឆាំងបទល្មើសសេដ្ឋកិច្ច ការិយាល័យពាណិជ្ជកម្មខេត្ត ព្រមទាំងផ្នែកឯកជន បានសហការគ្នាចុះតាមកន្លែងនានាដើម្បីត្រួតពិនិត្យ និងបង្ក្រាបការលក់ផលិតផលក្លែងក្លាយក្នុងតំបន់ពាណិជ្ជកម្មសំខាន់ៗទូទាំងប្រទេសថៃ ដើម្បីគាំទ្រការបើកប្រទេសទទួលភ្ញៀវទេសចរ ក្រោយពីស្ថានការណ៍ការរាតត្បាតនៃជំងឺកូវីដ-១៩ បានធូរស្រាល និងលើកកម្ពស់បរិយាកាសពាណិជ្ជកម្ម បង្កើតទំនុកចិត្តសម្រាប់ពាណិជ្ជករ និងវិនិយោគិនអន្តរជាតិជាបន្តបន្ទាប់ ។ការចុះពិនិត្យទីតាំងពាណិជ្ជកម្ម រួមមាន ទីក្រុងបាងកក ដោយមានតំណាងម្ចាស់កម្មសិទ្ធិពាណិជ្ជកម្ម Louis Vuitton និង CHANEL បានសហការគ្នាចុះពិនិត្យតាមកន្លែងលក់ផលិតផលនៅខ្លងថុម, ផ្សារទំនើបផានធីប ផ្លាហ្សា, មជ្ឈមណ្ឌល MBK និងហាងលក់ផលិតផលនៅតាមផ្លូវសុខុមវីដ … ។ រីឯការចុះពិនិត្យមើលការលក់ផលិតផលនៅភាគខាងជើងប្រទេស រួមមាន ខេត្តឈៀងម៉ៃ មជ្ឈមណ្ឌលផ្សារទំនើបកុំព្យូទ័រ ផ្លាហ្សា, មជ្ឈមណ្ឌលផ្សារទំនើប icon, ផ្សាររាត្រីផ្លាហ្សា និងផ្សាររិនខាំ ។

ចំណែកនៅខេត្តភាគខាងត្បូងមាន ខេត្តប្រាជួប ស៊ីរីខាន់, សុងក្លា, ក្រៈប៊ី, ភូកេត និងសុរ៉ាចថានី ក្នុងនោះមាន តំបន់ផ្សារអ្នកនេសាទ, ផ្សារគីមយ៉ុង និងហាងនៅឆ្នេរ Chaweng … រីឯភាគខាងកើតប្រទេស រួមមាន ខេត្តឈុនបុរី តំបន់ពាណិជ្ជកម្មនៅឆ្នេរប៉ាតាយ៉ា, ផ្សារណាត់ចាក់តុចាក់ ឈុនបុរី និងមជ្ឈមណ្ឌលផ្សារទំនើបកុំព្យូទ័រ ផ្លាហ្សា ។

មន្ត្រីជំនាញបានណែនាំទៅកាន់អាជីវករអំពីការលក់ផលិតផលយ៉ាងត្រឹមត្រូវ ផ្សព្វផ្សាយចំណេះដឹងពីម៉ាកយីហោ និងការបន្ថែមតម្លៃផលិតផល ដើម្បីជំរុញឱ្យមានការប្រើប្រាស់កម្មសិទ្ធិបញ្ញា អត្ថប្រយោជន៍ពាណិជ្ជកម្ម ព្រមទាំងការពារបញ្ហាលក់ផលិតផលក្លែងក្លាយ ។

ការលក់ផលិតផលក្លែងក្លាយ នឹងផ្តន្ទាទោសដាក់គុកចំនួន៤ឆ្នាំ និងពិន័យជាប្រាក់ខ្ពស់បំផុត៤០ម៉ឺនបាត ឬទាំងជាប់គុក ទាំងពិន័យ ។ ចំណែកការលក់ផលិតផលលួចចម្លង មានទោសជាប់គុក៤ឆ្នាំ និងពិន័យជាប្រាក់ខ្ពស់បំផុត៨០ម៉ឺនបាត ឬទាំងជាប់គុក ទាំងពិន័យ ។ លើសពីនេះ បើពលដ្ឋបានឃើញការលក់ផលិតផលបំពានកម្មសិទ្ធិបញ្ញា ពួកគេអាចរាយការណ៍ទៅកាន់វែបសាយ www.ipthailand.go.th លើប្រធានបទ «រាយការណ៍អំពីការរំលោភកម្មសិទ្ធិបញ្ញា» ឬទូរស័ព្ទទៅកាន់លេខ ១៣៦៨ ៕

ប្រភព ៖ khaosod

ប្រទេសចិន ៖ កាលពីថ្ងៃទី១៤ ខែកុម្ភៈ កន្លងមក លោក ឈីន កាង រដ្ឋមន្ត្រីក្រសួងការបរទេសចិន បានជួបជាមួយលោក ហូសៀន អាមី អបឌុលឡាហៀន (Hossein Amir-Abdollahian) រដ្ឋមន្ត្រីក្រសួងការបរទេសអ៊ីរ៉ង់ នៅទីក្រុងប៉េកាំង ក្នុងឱកាសរដ្ឋមន្ត្រីក្រសួងការបរទេសអ៊ីរ៉ង់ធ្វើដំណើរទស្សនកិច្ចមកកាន់ប្រទេសចិន ។

លោក ឈីន កាង ថ្លែងថា ការពិភាក្សារវាងមេដឹកនាំចិន និងអ៊ីរ៉ង់ បានឯកភាពគ្នាលើប្រធានបទសំខាន់ៗ ហើយក្លាយជាមគ្គុទ្ទេសក៍យុទ្ធសាស្ត្រ និងភាពរឹងមាំឈានទៅរកការអភិវឌ្ឍទំនាក់ទំនងទ្វេភាគី ។ ចិនព្រមសហការជាមួយអ៊ីរ៉ង់ក្នុងការអនុវត្ត បង្កើតភាពរឹងមាំ និងការឯកភាពចុងក្រោយដែលសម្រេចបានរវាងមេដឹកនាំប្រទេសទាំងពីរ ព្រមទាំងជំរុញការឈានទៅមុខជាថ្មីអំពីភាពជាដៃគូយុទ្ធសាស្ត្រគ្រប់ផ្នែក ។

លោក ឈីន កាង បន្តថា ចិន និងអ៊ីរ៉ង់គួរតែបន្តគាំទ្រគ្នាទៅវិញទៅមកក្នុងប្រធានបទពាក់ព័ន្ធនឹងផលប្រយោជន៍ចម្បងរបស់ប្រទេសទាំងពីរ រួមទាំងជួយគ្នារក្សាប្រយោជន៍រួមរបស់ប្រទេសកំពុងអភិវឌ្ឍន៍ទាំងឡាយ រហូតដល់ការពារយុត្តិធម៌រវាងប្រទេស ។

ចំណែកលោក អបឌុលឡាហៀន រដ្ឋមន្ត្រីក្រសួងការបរទេសអ៊ីរ៉ង់ បានថ្លែងទៅកាន់លោក ឈីន កាង អំពីការវិវត្តថ្មីៗលើបញ្ហានុយក្លេអ៊ែរអ៊ីរ៉ង់ ការឈានទៅមុខនៃកិច្ចពិភាក្សាដើម្បីអនុវត្តផែនការសកម្មភាពរួមដ៏ទូលំទូលាយ ព្រមទាំងថ្លែងអំណរគុណចិន ដែលដើរតួនាទីស្ថាបនាបញ្ហានុយក្លេអ៊ែរអ៊ីរ៉ង់ ។

រដ្ឋមន្ត្រីក្រសួងការបរទេសអ៊ីរ៉ង់បន្តថា អ៊ីរ៉ង់ផ្តល់ភាពសំខាន់យ៉ាងខ្លាំងចំពោះសម្ព័ន្ធភាព និងបង្កើនកិច្ចសហការរឹងមាំជាមួយចិន ការទំនាក់ទំនង រួមទាំងបន្តគាំទ្រគ្នាទៅវិញទៅមកលើបញ្ហាទាក់ទងនឹងប្រយោជន៍ស្នូលរបស់ភាគីនីមួយៗ ។ ក្រៅពីនេះ រដ្ឋមន្ត្រីក្រសួងការបរទេសចិន និងអ៊ីរ៉ង់ ក៏បានផ្លាស់ប្តូរយោបល់គ្នាពីបញ្ហាក្នុងតំបន់ និងពិភពលោក ដែលចិន និងអ៊ីរ៉ង់ចាប់អារម្មណ៍រួមគ្នាផងដែរ ៕ ប្រភព ៖ TNN World