ប្រទេសជប៉ុន ៖ ចំនួនអ្នកស្លាប់ដោយសារជំងឺកូវីដនៅជប៉ុនបានកើនឡើងជាបន្តបន្ទាប់តាំងពីចុងឆ្នាំ២០២២ ។ គ្រូពេទ្យជប៉ុននិយាយថា អ្នកស្លាប់ដោយសារកូវីដលើកចុងក្រោយនេះ ភាគច្រើនជាមនុស្សចាស់ ដោយសាររាងកាយចុះខ្សោយ ព្រមទាំងមានជំងឺប្រចាំកាយ ហើយមនុស្សចាស់ងាយឆ្លងអូមីក្រុង ។

មុននេះ ជប៉ុនស្ថិតក្នុងចំណោមប្រទេសដែលមានអត្រាអ្នកស្លាប់ដោយសារកូវីដតិចបំផុតក្នុងពិភពលោក ប៉ុន្តែចាប់ពីចុងឆ្នាំ២០២២មក ចំនួនអ្នកស្លាប់ក៏បានកើនឡើងជាបន្តបន្ទាប់ ហើយថ្ងៃដែលមានអ្នកស្លាប់ច្រើនបំផុតក្នុងប្រវត្តិសាស្ត្រ គឺថ្ងៃទី២០ ខែមករា ឆ្នាំ២០២៣ លើសចំនួនអ្នកស្លាប់នៅអង់គ្លេស អាមេរិក និងកូរ៉េខាងត្បូង ។

តាំងពីឆ្នាំ២០២០ ជប៉ុនបានបិទប្រទេសហាមភ្ញៀវទេសចរទាំងអស់មកប្រទេសរបស់ខ្លួន រហូតដល់ពាក់កណ្តាលខែមិថុនា ឆ្នាំ២០២២ ។ ជប៉ុនមានផែនការបើកប្រទេសបន្តិចម្តងៗ ហើយនៅពេលបើកប្រទេសដំបូង ភ្ញៀវទេសចរត្រូវតែធ្វើដំណើរជាមួយក្រុមហ៊ុនអាកាសចរណ៍ប៉ុណ្ណោះ រួមទាំងមានធានារ៉ាប់រងសុខភាព និងពាក់ម៉ាស់នៅទីសាធារណៈគ្រប់ពេល ខណៈនៅតាមសាលារៀន ក្មេងៗត្រូវញ៉ាំបាយដោយស្ងាត់ស្ងៀមអស់រយៈពេល២ឆ្នាំ ដោយមិនឱ្យកូនសិស្សជជែកគ្នាក្នុងពេលញ៉ាំអាហារថ្ងៃត្រង់ ។

អ្នកជំនាញសុខាភិបាលជប៉ុនប្រាប់សារព័ត៌មាន BBC ថា ដោយសារលក្ខខណ្ឌផ្សេងៗនៃជំងឺកូវីដត្រូវបានបន្ធូរបន្ថយ ទើបធ្វើឱ្យមានអ្នកឆ្លងកូវីដខ្ពស់ ។ អ្នកស្លាប់ដោយសារជំងឺកូវីដពូជថ្មីនេះ ភាគច្រើនជាមនុស្សចាស់មានជំងឺប្រចាំកាយ ខុសគ្នាពីចំនួនអ្នកស្លាប់នៅពេលដំបូង គឺពួកគេស្លាប់ដោយសាររលាកសួត និងត្រូវព្យាបាលនៅបន្ទប់សង្គ្រោះបន្ទាន់ ។

លោក Hitoshi Oshitani អ្នកវិទ្យាសាស្ត្រមានកេរ្តិ៍ឈ្មោះល្បីម្នាក់និយាយថា គេពិបាកការពារការស្លាប់ដោយសារជំងឺកូវីដរបស់មនុស្សចាស់ណាស់ ដោយសារកូវីដពូជថ្មីអាចគេចពីភាពស៊ាំបានល្អជាងមុន ហើយបន្ទាប់ពីមានការរាតត្បាតរបស់អូមីក្រុង មានចំនួនអ្នកស្លាប់នៅទូទាំងប្រទេស ។

ទោះយ៉ាងណា អ្នកជំនាញណែនាំថា បើមនុស្សចាស់ទទួលបានការព្យាបាលយ៉ាងឆាប់រហ័ស នឹងអាចជួយការពារមិនឱ្យស្លាប់បាន ។ អ្នកជំនាញបានអំពាវនាវឱ្យរដ្ឋាភិបាលបន្ថយចំណាត់ថ្នាក់កូវីដពី «កម្រិត២ ៖ ជំងឺមានគ្រោះថ្នាក់ខ្លាំង» ចុះមកកម្រិតទាបវិញ ដើម្បីបើកឱកាសឱ្យគ្លីនិក ឬមន្ទីរពេទ្យឯកជនអាចព្យាបាលអ្នកជំងឺបាន ខណៈកាលពីមុន គេចាត់ចំណាត់ថ្នាក់កូវីតស្ថិតក្នុង «កម្រិត២» កំណត់ឱ្យអ្នកជំងឺត្រូវចូលព្យាបាលនៅមន្ទីរពេទ្យរដ្ឋតែប៉ុណ្ណោះ ។

នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានប្រកាសកាលពីដើមខែកុម្ភៈថា នឹងបន្ថយចំណាត់ថ្នាក់ជំងឺកូវីដតាមការស្នើសុំ ប៉ុន្តែនឹងអនុវត្តនៅថ្ងៃទី៨ ខែឧសភា ឬ៣ខែទៀត ៕

ប្រភព ៖ The Standard

ប្រទេសជប៉ុន ៖ ក្រុមហ៊ុនលក់ទំនិញដ៏ធំមួយរបស់ប្រទេសជប៉ុន អ៊ីអន (Aeon) បានប្រកាសដំឡើងប្រាក់ខែបុគ្គលិកក្រៅម៉ោង៧% ដើម្បីដោះស្រាយលើការចាយវាយប្រចាំថ្ងៃកើនឡើងខ្ពស់ ។

អ៊ីអនបានប្រកាសត្រៀមដំឡើងប្រាក់ខែ៧% បន្ថែមទៀតដល់បុគ្គលិកធ្វើការក្រៅម៉ោងជាង៤០ម៉ឺននាក់នៅតាមហាងចំនួន១៤៧ ទូទាំងប្រទេសជប៉ុន ។ គេសង្ឃឹមថា នឹងដំឡើងចាប់ពីខែមីនា តទៅ ដើម្បីទប់ទល់នឹងស្ថានការណ៍អតិផរណា និងការចាយវាយប្រចាំថ្ងៃកើនឡើងខ្ពស់ ។

អ៊ីអនមានបុគ្គលិកបម្រើការក្រៅម៉ោងច្រើនបំផុតក្នុងប្រទេសជប៉ុន ក្នុងនោះបុគ្គលិកជាង៨០%របស់ក្រុមហ៊ុន គឺជាបុគ្គលិកក្រៅម៉ោង ។ គេសង្ឃឹមថា ការដំឡើងប្រាក់ខែនៅពេលនេះ នឹងធ្វើឱ្យការចំណាយរបស់អ៊ីអនកើនឡើងក្នុង១ឆ្នាំ ចំនួន៣ម៉ឺនលានយេន ។

ក្នុងគោលបំណងកាត់បន្ថយផលប៉ះពាល់នៃការដំឡើងប្រាក់ខែនេះ អ៊ីអនបានបន្ថែមការលក់ផលិតផលទទួលបានប្រាក់ចំណេញខ្ពស់ ស្របពេលមានការប្រកួតប្រជែងកើនឡើងសម្រាប់កម្លាំងពលកម្មរបស់ជប៉ុនផងដែរ ។ បច្ចុប្បន្ន អ៊ីអនបានចំណាយប្រាក់លើបុគ្គលិកក្រៅម៉ោងជាមធ្យមប្រមាណ១.០០០យេន/១ម៉ោង ។

ក្រុមហ៊ុននានាក៏បានចាប់ផ្តើមដំឡើងប្រាក់ខែដូចគ្នា ដូចជា Tokyo Disney Resort នឹងដំឡើងប្រាក់ខែបុគ្គលិកក្រៅម៉ោងនៅខែមេសាខាងមុខ ចាប់ពី១.១៤០យេន ទៅ១.៥៣០យេន/១ម៉ោង ។

ក្រសួងការងារជប៉ុនបញ្ជាក់ថា បុគ្គលិកក្រៅម៉ោងនៅជប៉ុនជាទូទៅទទួលបានប្រាក់ចំណូលប្រមាណ៦០% របស់ប្រាក់ខែបុគ្គលិកពេញម៉ោង ។ ដូច្នេះ ការដំឡើងប្រាក់ខែដល់ពួកគេសង្ឃឹមថា នឹងជាប្រយោជន៍សម្រាប់គ្រួសារមានប្រាក់ចំណូលតិច ដែលរងផលប៉ះពាល់ពីការចាយវាយប្រចាំថ្ងៃខ្ពស់ជាងបុគ្គលិកពេញម៉ោង ៕ ប្រភព ៖ pptvhd36

ក្រោយពីអង្គការឃ្លាំមើលអំពើពុករលួយដែលមានមូលដ្ឋាននៅទីក្រុងប៊ែកឡាំង បានសិក្សា និងស្រាវជាវទៅលើសមាជិករបស់ខ្លួនទាំងអស់១៨០ប្រទេស គេរកឃើញថា ប្រទេស សូម៉ាលីស្ថិត ជាប្រទេសដែលមានអំពើពុករលួយខ្លាំងជាងគេកាលពីឆ្នាំ២០២២។

សូម៉ាលី​ មានឈ្មោះជាផ្លូវការថា សាធារណរដ្ឋសហព័ន្ធសូម៉ាលី ដែលជាប្រទេសស្ថិតនៅក្នុងទ្វីបអាហ្វ្រិក។ ប្រទេសនេះ គឺជាប្រទេសដែលមានឆ្នេរសមុទ្រវែងជាងគេនៅទ្វីបអាហ្រ្វិក។

តើកត្តាអ្វីដែលរុញច្រានប្រទេសមួយនេះទៅកាន់ អំពើពុករលួយដ៏ខ្លាំងក្លា មិនអាចដកខ្លួនរួច?

ជម្លោះមិនចេះចប់ក្នុងប្រទេស នៅតែជាមូលហេតុនាំមុខគេនៃអំពើពុករលួយនៅក្នុងប្រទេសនេះ។ កំណើននៃអំពើភេរវកម្ម ការគាបសង្កត់សេរីភាពសារព័ត៌មាន អស្ថិរភាពនយោបាយ សង្គម និងសេដ្ឋកិច្ច និងការគាបសង្កត់សេរីភាពនៃការបញ្ចេញមតិ បានធ្វើឱ្យប្រទេសនេះគ្មានការរីកចម្រើនទៅមុខ។

អ្នកមានអំណាច មានទ្រព្យបានចាក់គ្រឹះចូលទៅក្នុងខ្សែរាជរដ្ឋាភិបាល ដែលធ្វើឱ្យរដ្ឋាភិបាលប្រទេសនេះ មិនមានសមត្ថភាពការការពារប្រជាជន និងបំផ្លាញទំនុកចិត្តសាធារណៈ។

សូមរំលឹកផងដែរថា ប្រទេសនេះធ្លាប់រងគ្រោះដ៏សារគ្រោះធម្មជាតិ៤០ឆ្នាំ តែអាចកែប្រែស្ថានការប្រទេសឱ្យល្អវិញ​បាន ក៏ប៉ុន្តែអំពើពុករលួយត្រឹមរយៈពេលខ្លីបាននាំ​ឱ្យប្រទេសនេះចូលទៅក្នុងក្តីវិនាស៕

ប្រភព៖ QZ

សហរដ្ឋអាមេរិក ៖ ក្រសួងការពារជាតិរបស់អាមេរិកបង្ហើបថា បានប្រទះឃើញបាឡុងចារកម្មមួយហោះឆ្លងកាត់តំបន់សន្តិសុខកំពូលរបស់អាមេរិកកាលពីពេលថ្មីៗនេះ ។ គេរាយការណ៍ថា វាជាបាឡុងដែលប្រទេសចិនបញ្ជូនមក ដើម្បីប្រមូលព័ត៌មានពីកងទ័ពអាមេរិក ប៉ុន្តែកងទ័ពអាមេរិកសម្រេចចិត្តថា មិនបាញ់បាឡុងនេះទេ ដោយសារបារម្ភពីសុវត្ថិភាពរបស់ពលរដ្ឋដែលរស់នៅក្បែរតំបន់នោះ ។

លោក Lloyd Austin រដ្ឋមន្ត្រីក្រសួងការពារជាតិអាមេរិក ចង្អុលបង្ហាញថា អាមេរិកមានទំនុកចិត្តខ្ពស់ថា បាឡុងសង្ស័យខាងលើនេះ គឺជារបស់មន្ត្រីចិនដែលបញ្ជូនមកកាន់ទីកន្លែងសំខាន់ៗរបស់អាមេរិក ហើយក្នុងចំណោមទីកន្លែងសំខាន់ទាំងនេះ គឺមូលដ្ឋានទ័ពអាកាស Malmstrom នៅរដ្ឋម៉ុនតាណា ដែលជាទីតាំងប្រមូលផ្តុំមីស៊ីលរបស់កងទ័ពអាមេរិក ។

អ្នកនាំពាក្យក្រសួងការពារជាតិរាយការណ៍ថា បាឡុងនេះអណ្តែតខ្ពស់ជាងផ្លូវហោះហើររបស់យន្តហោះនានាទៅទៀត ប៉ុន្តែវាមិនបង្កការគំរាមកំហែងណាមួយដល់កងទ័ព ឬពលរដ្ឋរស់នៅក្បែរនោះទេ ។ ជាដំបូង មន្ត្រីអាមេរិកបានព្យាយាមទំនាក់ទំនងសហការជាមួយមន្ត្រីចិនតាមប្រព័ន្ធផ្សេងៗ ដើម្បីជជែកគ្នាឱ្យច្បាស់លាស់និងលម្អិត ដែលអាចធ្វើឱ្យប៉ះពាល់ដល់សន្តិសុខអាមេរិក ។

ការបង្ហោះបាឡុងរបស់ចិននេះ កើតឡើងមុនពេលរដ្ឋមន្ត្រីក្រសួងការពារជាតិអាមេរិក លោក Anthony Blinken នឹងធ្វើដំណើរទៅកាន់ប្រទេសចិនជាផ្លូវការនាពេលឆាប់ៗនេះ ។ គេមិនច្បាស់ថា រឿងដែលកើតឡើងនេះនឹងធ្វើឱ្យប៉ះពាល់ដល់គម្រោងធ្វើដំណើរទៅកាន់ប្រទេសចិនឬយ៉ាងណាទេ ហើយអាចរង់ចាំតាមដានជំហររបស់ក្រសួងការបរទេសអាមេរិក ៕ ប្រភព ៖ The Standard

ពេលខ្លះការបោះបង់ចោលមិនមែនជាសញ្ញានៃភាពទន់ខ្សោយនោះទេ តែជាការស្វែងរកសេចក្ដីសុខអោយខ្លួនឯងយ៉ាងពិតប្រាកដ…
១. ទម្លាប់រអ៊ូរទាំមិនឈប់
ការមានទម្លាប់រអ៊ូរទាំពីការងារ កូនចៅ ជីវិតខ្លួនមិនសំណាងដូចគេ វាអាចជារឿងដែលអ្នកធ្លាប់បានលឺឡើងស៊ាំត្រចៀកហើយមើលទៅ។ ទម្លាប់បែបនេះមិនចំណេញនោះទេ ថែមទាំងធ្វើអោយអ្នកកាន់តែមានអារម្មណ៏ថាជាប់គាំងថែមទៀត នៅពេលដែលអ្នកមិនបានស្វែងរកមូលហេតុ ដើមចមអោយជាក់លាក់ដែលធ្វើអោយអ្នកមានអារម្មណ៏បែបនោះ។
២. ទម្លាប់គិតតែរឿងមិនល្អ
នៅក្នុងពេលណាមួយនៃជីវិត អ្នកអាចនឹងគេចមិនផុតពីដំណាក់កាលមួយនេះនោះទេ គឺជាពេលដែលអ្នកមានអារម្មណ៏ថាក្រឡេកទៅណាក៏ឃើញតែបញ្ហា។ តែអ្នកក៏ត្រូវតែទន្ទេញប្រាប់ខ្លួនឯងផងដែរថា រឿងរ៉ាវអាក្រក់ ឬ លំបាកយ៉ាងណានោះទេ តែងតែមានដំណោះស្រាយជានិច្ច។
៣. ទម្លាប់ចិត្តទន់ដាក់មនុស្សខុស
ចំនុចខ្សោយធំបំផុតរបស់មនុស្សភាគច្រើនគឺចិត្តទន់នេះតែម្ដង។ មនុស្សភាគច្រើនលះបង់ទៅលើរឿងជាច្រើន ទោះជាពិចារណាហើយថាមិនគួរធ្វើក្ដី។ ត្រូវចាំថា ការធ្វើល្អមិនមែនជារឿងមិនល្អនោះទេ តែត្រូវចាំថាមនុស្សដែលអ្នកធ្វើល្អដាក់នោះគួរតែជាមនុស្សគួរអោយចិត្តទន់ដាក់ដែរអត់។៤. ទម្លាប់ចិត្តមិនដាច់ដាក់មនុស្សដែលមិនសក្តិសមនឹងទទួលបាន
មនុស្សគ្រប់គ្នាមិនថាមាន ឬ ក្រនោះទេ សុទ្ធតែមានជីវិតតែមួយដូចគ្នា អ្នកគួរតែចំណាយពេលខ្លះ សម្រាកហើយសួរខ្លួនឯងថា មនុស្សដែលរាប់អានគ្នារាល់ថ្ងៃសុទ្ធតែជាមនុស្សគួរអោយទុកចិត្តបានពិតដូចការស្មានកន្លងមកឬអត់។

ប្រទេសរុស្ស៊ី ៖ រុស្ស៊ីបានដាស់តឿនអ៊ីស្រាអែលអំពីការបញ្ជូនជំនួយផ្នែកកងទ័ពដល់ប្រទេសអ៊ុយក្រែន ព្រមទាំងផ្តល់ហេតុផលថា អ៊ីស្រាអែលនឹងធ្វើឱ្យស្ថានការណ៍ជម្លោះរវាងប្រទេសរុស្ស៊ី និងអ៊ុយក្រែន កាន់តែតានតឹងខ្លាំងឡើង ។

លោកស្រី ម៉ារៀ ហ្សាកហារ៉ូវ៉ា (Maria Zakharova) អ្នកនាំពាក្យក្រសួងការបរទេសរុស្ស៊ី បានចេញសារព្រមានដល់រដ្ឋាភិបាលអ៊ីស្រាអែល ក្រោយពីនាយករដ្ឋមន្ត្រីអ៊ីស្រាអែល លោកបិនយ៉ាស់មីន ណិតានយ៉ាហ៊ូ (Benjamin Netanyahu) ផ្តល់បទសម្ភាសន៍ជាមួយក្រុមសារព័ត៌មានថា បច្ចុប្បន្ន អ៊ីស្រាអែលកំពុងសម្រេចចិត្តបញ្ជូនអាវុធជួយអ៊ុយក្រែន ខណៈអ៊ីស្រាអែលមានបំណងដើរតួជាអ្នកសម្រុះសម្រួលក្នុងជម្លោះផងដែរ ។

លោកស្រី ម៉ារៀ ហ្សាកហារ៉ូវ៉ា បញ្ជាក់ថា បើអ៊ីស្រាអែលបញ្ជូនជំនួយកងទ័ពឱ្យអ៊ុយក្រែន នឹងធ្វើឱ្យមានជម្លោះរវាងរុស្ស៊ី និងអ៊ុយក្រែនកាន់តែខ្លាំងឡើង ។ លោកស្រីបញ្ជាក់ដែរថា គោលជំហររបស់រុស្ស៊ី គឺអាវុធគ្រប់ប្រភេទដែលប្រទេសទាំងអស់បញ្ជូនទៅឱ្យអ៊ុយក្រែន នឹងក្លាយជាគោលដៅវាយប្រហាររបស់កងទ័ពរុស្ស៊ី ។

នេះមិនមែនជាលើកដំបូងទេ ដែលអ៊ីស្រាអែលពិចារណាបញ្ជូនអាវុធជួយអ៊ុយក្រែន កាលពីខែតុលា ឆ្នាំ២០២២ កន្លងមក អ៊ុយក្រែនក៏ធ្លាប់បានស្នើសុំជំនួយពីអ៊ីស្រាអែលផងដែរ ឱ្យគាំទ្រប្រព័ន្ធការពារកងទ័ពដូចជា ប្រព័ន្ធការពារយន្តហោះ «Ion Dome» និង «Iron Beam» ដើម្បីប្រើប្រាស់ទប់ទល់ជាមួយដ្រូន និងមីស៊ីលពីអ៊ីរ៉ង់ដែលបញ្ជូនទៅជួយរុស្ស៊ី ។

ទោះយ៉ាងណា រដ្ឋមន្ត្រីក្រសួងការពារជាតិអ៊ីស្រាអែល ក៏បានចេញមកបដិសេធការអះអាងខាងលើនេះ ក្រោយពីរុស្ស៊ីដាស់តឿនថា ការបញ្ជូនជំនួយកងទ័ពទៅឱ្យអ៊ុយក្រែន នឹងបំផ្លាញទំនាក់ទំនងដ៏ល្អរវាងប្រទេសរុស្ស៊ី និងអ៊ីស្រាអែល ៕ ប្រភព ៖ TNN World