ប្រទេសថៃ ៖ សមាគមនាំចេញអង្ករថៃបានបង្ហាញថា ការនាំចេញអង្កររបស់ថៃទៅកាន់ប្រទេសហ្វីលីពីន អាចកើនឡើងទ្វេដងនៅឆ្នាំ២០២៣នេះ ដោយសារប្រទេសវៀតណាមដែលជាគូប្រជែងរបស់ថៃ កំពុងប្រឈមនឹងការប្រមូលទិន្នផលស្រូវមានដែនកំណត់ ។

កាលពីឆ្នាំ២០២២ ហ្វីលីពីនបាននាំចូលអង្ករក្នុងបរិមាណច្រើនស្មើ៣,៧លានតោន ធ្វើឱ្យហ្វីលីពីនក្លាយជាប្រទេសនាំចូលអង្ករច្រើនបំផុតស្ថិតក្នុងលំដាប់ទី២ របស់ពិភពលោក ហើយចំនួននេះនឹងមានស្ថេរភាពនៅឆ្នាំ២០២៣ ។ ក្រៅពីនេះ ហ្វីលីពីនកំពុងប្រឈមនឹងបញ្ហាអតិផរណា និងការខ្វះខាតស្បៀង ហើយហ្វីលីពីនរំពឹងថា នឹងអាចផលិតស្រូវបានប្រមាណ១២,៤លានតោន ដែលទាបជាងតម្រូវការក្នុងប្រទេស ស្មើដល់១៥,៨លានតោន ។

ការនាំចូលអង្ករប្រមាណ៩០% របស់ហ្វីលីពីនក្នុងឆ្នាំ២០២២ គឺនាំចូលពីវៀតណាម ដែលជាប្រទេសនាំចេញអង្ករច្រើនបំផុតរបស់ហ្វីលីពីនអស់ជាច្រើនទសវត្សមកហើយ ព្រោះមានតម្លៃអាចប្រកួតប្រជែងបាន ហើយវៀតណាមមានទំនាក់ទំនងពាណិជ្ជកម្មទ្វេភាគីយ៉ាងរឹងមាំជាមួយហ្វីលីពីន ។ ចំណែកការនាំចូលអង្កររបស់ហ្វីលីពីន១០%ទៀត គឺនាំចូលពីថៃ ។

ទោះយ៉ាងណា លោក ឈូកៀត អូផាសវង្ស នាយកសមាគមនាំចេញអង្ករថៃ បានថ្លែងថា នៅឆ្នាំ២០២៣ លោករំពឹងថា ហ្វីលីពីននឹងទិញអង្កររបស់ថៃកាន់តែច្រើន ដោយសារការប្រមូលទិន្នផលស្រូវរបស់វៀតណាមធ្លាក់ចុះ ។

ផ្ទៃដីសម្រាប់បង្កបង្កើនផលស្រូវរបស់វៀតណាមនៅឆ្នាំ២០២២-២០២៣ នៅសល់តែ៣%ប៉ុណ្ណោះបើធៀបនឹងរដូវមុន ដូច្នេះ មាននិន្នាការថា នឹងធ្វើឱ្យទិន្នផលស្រូវរបស់វៀតណាមធ្លាក់ចុះសល់ត្រឹម១% ស្មើ២៧លានតោន ហើយការបរិភោគស្រូវនៅវៀតណាមនឹងស្មើប្រមាណ២១,៥លានតោន មានន័យថា វៀតណាមនឹងមានអង្ករសម្រាប់នាំចេញប្រមាណតែ៦លានតោនប៉ុណ្ណោះនៅឆ្នាំ២០២៣ គឺតិចជាង៧,១លានតោននៅឆ្នាំ២០២២ ។កាលពីប៉ុន្មានឆ្នាំមុន ការផ្គត់ផ្គង់អង្កររបស់វៀតណាមមានស្ថេរភាព ដោយសារវៀតណាមបាននាំអង្ករពីកម្ពុជាប្រមាណ១លានតោន/១ឆ្នាំ ធ្វើឱ្យវៀតណាមអាចនាំចេញរហូតដល់៧-៨លានតោន ប៉ុន្តែនៅឆ្នាំ២០២៣នេះ វៀតណាមមិនបាននាំចូលអង្ករពីកម្ពុជាទេ ។

ដោយសារបញ្ហាផ្សេងៗធ្វើឱ្យវៀតណាមអាចនាំចេញអង្ករបានត្រឹមតែ៤សែនតោនប៉ុណ្ណោះនៅខែមករា ឆ្នាំ២០២៣ ធ្លាក់ចុះ២០,៩% បើធៀបនឹងរយៈពេលដូចគ្នាកាលពីឆ្នាំមុននេះ ។ ចំណែកថៃរំពឹងថា នឹងអាចប្រមូលទិន្នផលស្រូវបានច្រើននៅឆ្នាំ២០២៣ ខណៈថៃមានអាងស្តុកទឹកទូទាំងប្រទេស ដែលនាំឱ្យថៃអាចបង្កបង្កើនផលស្រូវតាមធម្មតាគ្រប់រដូវកាលទាំងអស់ ហើយថៃនឹងអាចផលិតស្រូវបានប្រមាណ២០,២លានតោន កើនឡើងពីចំនួន១៩លានតោនពីរដូវកាលមុន ក្នុងនោះនឹងបែងចែកសម្រាប់ការបរិភោគក្នុងស្រុកចំនួន១២លានតោន ចំណែកស្រូវនៅសល់ គឺសម្រាប់ការនាំចេញ ៕

ប្រភព ៖ AEC Connect

រដ្ឋធានីកៀវ៖ ពិភពលោកទាំងមូល ពិតជាមានការភ្ញាក់ផ្អើលយ៉ាងខ្លាំង ខណៈឃើញលោកប្រធានាធិបតីសហរដ្ឋអាមេរិក បានបង្ហាញខ្លួន នៅកណ្ដាលបេះដូងរដ្ឋធានីកៀវ ហើយវត្ដមានរបស់លោក ចូ បៃដិន កំពុងតែធ្វើឲ្យមនុស្សជាច្រើន កើតការងឿងឆ្ងល់ ថា បើតាមទម្លាប់របស់មេដឹកនាំសេតវិមាន តែងតែធ្វើដំណើរ តាមយន្ដហោះពិសេស Air Force One របស់កងទ័ពអាកាសរបស់សហរដ្ឋអាមេរិក ចុះបើគាត់ធ្វើដំណើរទៅកាន់ប្រទេសអ៊ុយក្រែន ដែលកំពុងតែរងគ្រោះការវាយប្រហារប្រចាំបែបនេះ តើគាត់ជិះអ្វីទៅ?

គេហទំព័ររបស់បណ្ដាញទូរទស្សន៍ចក្រភពអង់គ្លេស BBC បានផ្សាយ កាលពីព្រឹក ថ្ងៃអង្គារ ទី២១ ខែកុម្ភៈ ឆ្នាំ២០២៣ ថា លោក ចូ បៃដិន (Joe Biden) ប្រធានាធិបតី សហរដ្ឋអាមេរិក មានគម្រោងធ្វើ ដំណើរតាមយន្ដហោះ Air Force One ដោយបានចាកចេញពីសហរដ្ឋអាមេរិក ឆ្ពោះទៅកាន់រដ្ឋធានីវ៉ាសាវី ប្រទេសប៉ូឡូញ នៅល្ងាច ថ្ងៃចន្ទ នៅក្នុងដំណើរទស្សនកិច្ច រយៈពេល២ថ្ងៃ នៅតំបន់អឺរ៉ុបកណ្ដាលមួយនេះ ដែលមានព្រំដែន ជាប់ជាមួយនឹងប្រទេសអ៊ុយក្រែន។ ប៉ុន្ដែកាលវិភាគជាមុន មានចន្លោះប្រហោង គួរឱ្យសង្ស័យចំនួន២ នៅក្នុងដំណើរបំពេញទស្សនកិច្ចរបស់លោកប្រធានាធិបតី ហើយមនុស្សជាច្រើន ក៏កើតមានការងឿងឆ្ងល់ ថាតើចំណុចទាំងនោះ អាចជាពេលវេលាសមស្រប សម្រាប់គាត់ ចូលទៅក្នុងប្រទេសអ៊ុយក្រែន ឬយ៉ាងណា?

ក្រុមអ្នកកាសែត ប្រចាំនៅក្នុងសន្និសីទសារព័ត៌មានប្រចាំថ្ងៃ នៅក្នុងសេតវិមានរបស់ប្រធានាធិបតីសហរដ្ឋអាមេរិក បានសាកសួរ ជាដដែលៗ អំពីដំណើរបំពេញទស្សនកិច្ចរបស់លោក ចូ បៃដិន។ ប៉ុន្ដែក្រុមមន្រ្ដីសេតវិមាន បានបញ្ជាក់ ថា ប្រធានាធិបតីសហរដ្ឋអាមេរិក លោក ចូ បៃដិន មិនមានគម្រោង ជួបជាមួយនឹងសមភាគីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) នោះទេ ហើយក៏មិនមានគម្រោងឈប់សំចត នៅខាងក្រៅរដ្ឋធានីវ៉ាសាវី ប្រទេសប៉ូឡូញ នោះដែរ។ ប៉ុន្ដែការសម្រេចចិត្តចុងក្រោយរបស់ប្រធានាធិបតីសហរដ្ឋអាមេរិក ធ្វើដំណើរទៅកាន់រដ្ឋធានីកៀវ បានកើតឡើង នៅត្រឹមថ្ងៃសុក្រ សប្ដាហ៍មុនតែប៉ុណ្ណោះ ថ្វីបើដំណើរបំពេញទស្សនកិច្ចនេះ ត្រូវបានគ្រោងទុក អស់រយៈពេលជាច្រើនខែកន្លងមកហើយ ជាមួយនឹងជំនួយការកំពូលមួយក្រុមតូចរបស់លោកប្រធានាធិបតី យ៉ាងណាក៏ដោយ។

រហូតមកដល់ថ្ងៃអាទិត្យ ទី១៩ ខែកុម្ភៈ គម្រោងផ្លូវការរបស់សេតវិមាន នៅតែបង្ហាញ ថា លោកប្រធានាធិបតី នឹងចុះ នៅក្នុងរដ្ឋធានីវ៉ាសាវី ប្រទេសប៉ូឡូញ នាវេលាម៉ោង៧ល្ងាច ថ្ងៃចន្ទ វេលានៅក្នុងតំបន់។ ប៉ុន្ដែតាមការពិត យន្ដហោះពិសេសរបស់លោកប្រធានាធិបតី Air Force One បានចុះ នៅវេលាម៉ោង៤ និង ១៥នាទីព្រឹក ថ្ងៃចន្ទ វេលានៅក្នុងតំបន់។

នៅលើយន្ដហោះនោះ មានតែក្រុមជំនួយការដ៏ជិតស្និទ្ធរបស់លោកប្រធានាធិបតី រួមមាន ក្រុមគ្រូពេទ្យ និង កងសន្ដិសុខ ហើយមានអ្នកកាសែត ត្រឹមតែ២នាក់ប៉ុណ្ណោះ ត្រូវបានអនុញ្ញាតឲ្យរួមដំណើរជាមួយនឹងប្រធានាធិបតីសហរដ្ឋអាមេរិក។ ចំណែកអ្នករួមដំណើរ នៅលើយន្ដហោះទាំងអស់ ត្រូវស្បថ ថា នឹងរក្សាការសម្ងាត់ ហើយទូរស័ព្ទដៃរបស់ពួកគេ ត្រូវបានដកហូតចេញអស់ពីដៃរបស់ពួកគេ និង មិនអនុញ្ញាតឱ្យរាយការណ៍ អំពីដំណើរទស្សនកិច្ចនេះ រហូតដល់ ក្រោយពេលលោក ចូ បៃដិន បានទៅលើរដ្ឋធានីក្រុងកៀវ ប្រទេសអ៊ុយក្រែន។

បើតាមលោក ជេក ស៊ូលលីវ៉ាន់ (Jake Sullivan) ទីប្រឹក្សា សន្ដិសុខជាតិ សហរដ្ឋអាមេរិក បានឲ្យដឹង ថា សហរដ្ឋអាមេរិក បានជូនដំណឹង ទៅក្រុមមន្រ្ដីរុស្ស៊ី អំពីដំណើរបំពេញទស្សនកិច្ចនេះ ត្រឹមតែប៉ុន្មានម៉ោងប៉ុណ្ណោះ មុនពេលលោក បៃដិន ចាកចេញ។

លោកទីប្រឹក្សាសន្ដិសុខជាតិ សហរដ្ឋអាមេរិក រូបនេះ បានបញ្ជាក់ ថា «សហរដ្ឋអាមេរិក បានធ្វើបែបនេះ មានគោលបំណង មិនបង្កឲ្យមានជម្លោះ… ខ្ញុំនឹងមិនយល់ អំពីរបៀប ដែលរុស្ស៊ី ឆ្លើយតប ឬ មានលក្ខណៈយ៉ាងច្បាស់លាស់ សម្រាប់សាររបស់យើងនោះឡើយ ប៉ុន្តែខ្ញុំអាចបញ្ជាក់បាន ថា យើងបានផ្តល់នូវការជូនដំណឹងនោះជាមុន»។

ក្រោយមក លោក ចូ បៃដិន ប្រធានាធិបតី សហរដ្ឋអាមេរិក បានចំណាយពេល១០ម៉ោង ធ្វើដំណើរតាមរថភ្លើង ទៅដល់រដ្ឋធានីកៀវ ប្រទេសអ៊ុយក្រែន។ លោកប្រធានាធិបតី អាចធ្វើដំណើរទៅបំពេញទស្សនកិច្ច នៅតាមកន្លែងផ្សេងៗ ដែលងាយស្រួលទៅដល់ នៅក្នុងប្រទេសអ៊ុយក្រែន។ ប៉ុន្តែគាត់ចង់ធ្វើដំណើរជានិមិត្តរូប ទៅកាន់ក្រុងកៀវ ដោយខ្លួនឯងតែប៉ុណ្ណោះ។

ការធ្វើដំណើររបស់លោកប្រធានាធិបតី ចូ បៃដិន នៅក្នុងរដ្ឋធានីកៀវ ក៏ជាសារដ៏សំខាន់មួយ ផ្ញើទៅកាន់រដ្ឋាភិបាលក្រុងមូស្គូ ឲ្យដឹងកាន់តែច្បាស់ អំពីការប្តេជ្ញាចិត្តរបស់រដ្ឋាភិបាលក្រុងវ៉ាស៊ីនតោន នៅក្នុងការជួយដល់ប្រទេសអ៊ុយក្រែន។ សកម្មភាពបែបនេះ ក៏ជាការបង្ហាញ ដល់អ្នកបោះឆ្នោតរបស់សហរដ្ឋអាមេរិក ឲ្យវិលត្រឡប់ទៅកាន់ប្រទេសជាតិវិញផងដែរ។

ដោយឡែក លោក ឌីមីទ្រី ម៉េដវ៉េដេវ (Dmitry Medvedev) អតីតប្រធានាធិបតីរុស្ស៊ី ហើយបច្ចុប្បន្ន កាន់តំណែង ជាអនុប្រធាន ក្រុមប្រឹក្សាសន្ដិសុខរុស្ស៊ី បានបញ្ជាក់ ថា ដំណើរទស្សនកិច្ចរបស់ប្រធានាធិបតីសហរដ្ឋអាមេរិក លោក ចូ បៃដិន ទៅកាន់ប្រទេសអ៊ុយក្រែន បានធ្វើឡើង ដោយមាន«ការធានាសុវត្ថិភាព» ពីរុស្ស៊ី ផងដែរ។

ផ្ទុយពីការអះអាងបែបនេះ ក្រុមមន្ត្រីជាន់ខ្ពស់សហរដ្ឋអាមេរិក បានបញ្ជាក់ ថា ពួកគេបានប្រាប់ដល់ក្រុមមន្រ្ដីរុស្ស៊ី ឲ្យដឹង នៅមុនដំណើរទស្សនកិច្ចរបស់លោក ចូ បៃដិន ត្រឹមតែប៉ុន្មានម៉ោងប៉ុណ្ណោះ ដើម្បីកុំឲ្យរុស្ស៊ី ធ្វើសកម្មភាពផ្តេសផ្តាស។

សហរដ្ឋអាមេរិក បានផ្ដល់ជំនួយយោធា មានទំហំទឹកប្រាក់ ប្រហែលជាង៣០ពាន់លានដុល្លារ ជួយដល់ប្រទេសអ៊ុយក្រែន ចាប់តាំងពីរុស្ស៊ី បានលើកកងទ័ព ចូលឈ្លានពានទៅលើទឹកដីរបស់អ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ពេលនេះ។ នៅក្នុងដំណើរទស្សនកិច្ច នៅរដ្ឋធានីកៀវ កាលពីថ្ងៃចន្ទ នោះ លោកប្រធានាធិបតី ក៏បានប្រកាស អំពីជំនួយថ្មីបន្ថែមទៀត មានទំហំទឹកប្រាក់ ៥០០លានដុល្លារផងដែរ៕

ក្រោយតែពីបញ្ចេញមុខងារថ្មី ដែលតម្រូវឱ្យអ្នកប្រើប្រាស់​បង់ប្រាក់ដើម្បីទទួលបាន Blue Tick នោះ​ ពេលនេះ Meta គ្រៀងនឹងចំលងផ្លេតហ្វមរបស់តេលេក្រាមមួយថែមទៀត។

ផ្លេតហ្វម (Platform) ដែល Meta ត្រៀមចំលងនោះមានឈ្មោះថា ឆាណែល (Channel) ទៅដាក់នៅលើបណ្តាញសង្គម Instagram។

ឆាណែលថ្មីសម្រាប់ Instagram នេះ គឺ​ជាអ្នកបង្កើតមាតិកា (creator) អាច​បង្ហោះផ្សព្វផ្សាយនូវសារ រូបភាព វីដេអូ សំឡេង និង​ការបោះឆ្នោតស្ទង់មតិជាដើម ទៅកាន់​ Follower ដែលបាន Subscribe ឆាណែលខ្លួន ពោលគឺ​ស្ទើរតែដូចគ្នាបេះបិតនឹង Telegram ដែរ។

ជាមួយ​គ្នានេះ Follower អាចធ្វើការ react នូវការបង្ហោះរបស់ creator និង vote បានផងដែរ ប៉ុន្តែគ្មានសិទ្ធិបង្ហោះក្នុង​ឆាណែលរបស់ creator បានឡើយ។

មុខងារនេះ នឹងដាក់ដំណើរការសាកល្បងតែលើ Instagram តែប៉ុណ្ណោះ មុនពេលដែលសម្រេចដាក់នៅលើ Messenger និង Facebook៕

ប្រភព៖ THE VERGE

ប្រទេសកូរ៉េខាងជើង ៖ ស្ថានភាពនៅឧបទ្វីបកូរ៉េកាន់តែតានតឹងឡើង ខណៈនៅថ្ងៃទី២០ ខែកុម្ភៈ កូរ៉េខាងជើងបានបាញ់កាំជ្រួចចំនួន២គ្រាប់បន្ថែមទៀតពីឆ្នេរសមុទ្រខាងកើតនៃប្រទេស ។ មុននេះ កាលពីថ្ងៃទី១៨ ខែកុម្ភៈ កន្លងមក កូរ៉េខាងជើងក៏បានបាញ់កាំជ្រួចឆ្លងទ្វីប (ICBM) ទៅក្នុងសមុទ្រភាគខាងលិចប្រទេសជប៉ុនផងដែរ ដែលធ្វើឱ្យអាមេរិកធ្វើសមយុទ្ធផ្លូវអាកាសរួមគ្នាជាមួយកូរ៉េខាងត្បូង និងជាមួយជប៉ុនដោយឡែកពីគ្នានៅថ្ងៃទី១៩ ខែកុម្ភៈ ។

សារព័ត៌មាន KCNA បានដកស្រង់សម្តីរបស់ គីម យ៉ូជុង ប្អូនស្រីរបស់ គីម ជុងអ៊ុន មេដឹកនាំកំពូលរបស់កូរ៉េខាងជើង ដោយនាងបានដាស់តឿនដល់កងកម្លាំងអាមេរិកឱ្យបញ្ឈប់សកម្មភាពធ្វើសមយុទ្ធរួមគ្នាជាមួយកូរ៉េខាងត្បូង បើមិនបញ្ឈប់ទេ កូរ៉េខាងជើងនឹងប្រែក្លាយមហាសមុទ្រប៉ាស៊ីហ្វិកទៅជាសមុទ្រភ្លើង ព្រោះអាមេរិកបានពង្រឹងកងកម្លាំងរបស់ខ្លួនជាបន្តបន្ទាប់ ។

កូរ៉េខាងជើងបានបាញ់កាំជ្រួចឆ្លងទ្វីប ឬ ICBM «Hwasong 15» ចំនួន២គ្រាប់ទៅកាន់គោលដៅ ដោយគ្រាប់ទី១ បាញ់ចម្ងាយ៣៩៥គីឡូម៉ែត្រ និងគ្រាប់ទី២ បាញ់ចម្ងាយ៣៣៧គីឡូម៉ែត្រ ដើម្បីត្រៀមខ្លួនវាយលុកប្រឆាំងនឹងកងទ័ពសត្រូវ ។ ចំណែកក្រសួងការពារជាតិជប៉ុនបញ្ជាក់ថា កាំជ្រួចចំនួន២គ្រាប់ដែលកូរ៉េខាងជើងបាញ់លើកចុងក្រោយនេះ បានធ្លាក់នៅក្រៅតំបន់សេដ្ឋកិច្ច (EEC) របស់ប្រទេសជប៉ុន ។

គួរបញ្ជាក់ថា កាលពីថ្ងៃទី១៩ ខែកុម្ភៈ អាមេរិក និងកូរ៉េខាងត្បូង បានធ្វើសមយុទ្ធផ្លូវអាកាសរួមគ្នាចំនួន១ថ្ងៃ ក្រោយពីកូរ៉េខាងជើងបាញ់កាំជ្រួចឆ្លងទ្វីបប្រភេទ Hwangseong-15 ។ អគ្គសេនាធិការចម្រុះនៃកងទ័ពកូរ៉េខាងត្បូងលើកឡើងថា ការធ្វើសមយុទ្ធរួមគ្នានេះ កូរ៉េខាងត្បូងបានបញ្ជូនយន្តហោះប្រភេទ F-35A និង F-15K រីឯអាមេរិកបានបញ្ជូនយន្តហោះទម្លាក់គ្រាប់បែក B-1B និងមានយន្តហោះប្រដេញ F-16 អមដំណើរផងដែរ ដើម្បីបង្ហាញពីសក្តានុពលរបស់អាមេរិកក្នុងការការពារប្រទេស និងការត្រៀមខ្លួនរបស់ប្រទេសសម្ព័ន្ធមិត្ត ៕ ប្រភព ៖ tnnthailand

ប្រទេសជប៉ុន ៖ លោកនាយករដ្ឋមន្ត្រីជប៉ុនបានចេញមុខអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិកោះប្រជុំជាបន្ទាន់ ដើម្បីពិភាក្សាគ្នាអំពីករណីប្រទេសកូរ៉េខាងជើងសាកល្បងបាញ់កាំជ្រួចបន្តបន្ទាប់គ្នាចូលក្នុងសមុទ្រជប៉ុន ។

នាយករដ្ឋមន្ត្រីជប៉ុន លោក Fumio Kishida បានធ្វើសេចក្តីថ្លែងការណ៍កាលពីថ្ងៃទី២០ ខែកុម្ភៈ កន្លងមក ដើម្បីអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិ (UNSC) កោះប្រជុំបន្ទាន់មួយ ដើម្បីពិភាក្សាអំពីប្រធានបទកូរ៉េខាងជើងសាកល្បងបាញ់មីស៊ីលរបស់ខ្លួនចូលក្នុងសមុទ្ររបស់ជប៉ុន ។ អគ្គសេនាធិការចម្រុះរបស់កូរ៉េខាងត្បូងបញ្ជាក់ថា កូរ៉េខាងជើងបានសាកល្បងបាញ់កាំជ្រួចចូលក្នុងសមុទ្រខាងកើតចំនួន២ដងក្នុងរយៈពេលឃ្លាតពីគ្នាត្រឹមតែ២ថ្ងៃ ដោយកូរ៉េខាងជើងបានបាញ់កាំជ្រួចលើកដំបូងនៅថ្ងៃទី១៨ ខែកុម្ភៈ និងបាញ់កាំជ្រួចលើកចុងក្រោយបង្អស់នៅព្រឹកថ្ងៃទី២០ ខែកុម្ភៈ ។

ចំណែកប្រមុខខុទ្ទកាល័យប្រទេសជប៉ុន លោក Hirokazu Matsuno ក៏បានតវ៉ាប្រឆាំងនឹងសកម្មភាពរបស់កូរ៉េខាងជើងផងដែរ ដោយលោកថ្លែងថា រាប់តាំងពីឆ្នាំ២០២២ កូរ៉េខាងជើងបានសាកល្បងបាញ់កាំជ្រួចបន្តបន្ទាប់គ្នាជាច្រើនដង ។ ការសាកល្បងកាំជ្រួចនេះបានធ្វើឱ្យស្ថានភាពនៅឧបទ្វីបកូរ៉េ និងភូមិភាគអាស៊ីមានភាពតានតឹង ក៏ដូចជាបានគំរាមកំហែងដល់សន្តិភាព និងស្ថេរភាពរបស់ជប៉ុន រួមទាំងសហគមន៍អន្តរជាតិ ហើយគេមិនអាចទទួលយកសកម្មភាពរបស់កូរ៉េខាងជើងបានទេ ។

គួរបញ្ជាក់ថា ភាគីជាច្រើនមើលឃើញថា មូលហេតុដែលកូរ៉េខាងជើងបានបាញ់កាំជ្រួចបន្តបន្ទាប់គ្នានេះ ព្រោះចង់គំរាមកំហែងអាមេរិក ខណៈកាំជ្រួចឆ្លងទ្វីបរបស់កូរ៉េខាងជើងអាចវាយលុកអាមេរិកបានគ្រប់តំបន់ទាំងអស់ ។ ម្យ៉ាងវិញទៀត កូរ៉េខាងជើងមានបំណងរារាំងការធ្វើសមយុទ្ធរួមគ្នារវាងអាមេរិក និងកូរ៉េខាងត្បូងផងដែរ ៕ ប្រភព ៖ TNN World

ប្រទេសអាល្លឺម៉ង់ ៖ ប្រធានការិយាល័យគណៈកម្មការការបរទេសមជ្ឈិមនៃបក្សកុម្មុយនិស្តចិន លោក Wang Yi និងជាមន្ត្រីទូតជាន់ខ្ពស់របស់ចិន បានពិភាក្សាជាមួយរដ្ឋមន្ត្រីក្រសួងការបរទេសអ៊ុយក្រែន លោក Dmitro Cooleba នៅក្រៅកិច្ចប្រជុំផ្នែកសន្តិសុខនៅទីក្រុង Munich ប្រទេសអាល្លឺម៉ង់ កាលពីថ្ងៃទី១៨ ខែកុម្ភៈ កន្លងមក ក្នុងគោលបំណងស្វែងរកសន្តិភាព និងបញ្ចប់ជម្លោះរវាងប្រទេសរុស្ស៊ី និងអ៊ុយក្រែន ដែលកើតឡើងអស់រយៈពេលជិត១ឆ្នាំ ។

លោក Wang Yi លើកឡើងថា ចិននៅតែប្រកាន់ខ្ជាប់នូវមាគ៌ាសន្តិភាព និងចរចាគ្នា ដើម្បីដោះស្រាយបញ្ហាជម្លោះនៅអ៊ុយក្រែនជានិច្ច ។ លើសពីនេះ ចិនបានត្រៀមខ្លួនជាស្រេចក្នុងការសម្របសម្រួលជាមួយសហគមន៍អន្តរជាតិ ដើម្បីកុំឱ្យសង្គ្រាមនៅអ៊ុយក្រែនកាន់តែអូសបន្លាយយូរ និងធ្ងន់ធ្ងរជាងនេះ ។

ជាមួយគ្នានេះ មន្ត្រីទូតជាន់ខ្ពស់របស់ចិន លោក Wang Yi ក៏បានយកឱកាសនេះសរសើរប្រទេសអ៊ុយក្រែនផងដែរ ពីការប្រកាន់ខ្ជាប់នូវគោលនយោបាយចិនតែមួយ ហើយលោកសង្ឃឹមថា ទំនាក់ទំនងទ្វេភាគីរវាងចិន និងអ៊ុយក្រែន នឹងបន្តអភិវឌ្ឍន៍ទៅមុខជាលំដាប់ ។

ចំណែករដ្ឋមន្ត្រីក្រសួងការបរទេសអ៊ុយក្រែន លោក Dmitro Cooleba ក៏បានបញ្ជាក់ដែរថា អ៊ុយក្រែន និងចិនមានទំនាក់ទំនងគ្នារហូតមកអស់រយៈពេល១ឆ្នាំ តាំងពីអ៊ុយក្រែនកើតសង្គ្រាមជាមួយរុស្ស៊ី ហើយលោកបញ្ជាក់ថា គ្មានប្រទេសណាចង់ឈានទៅរកកិច្ចព្រមព្រៀងសន្តិភាពឆាប់រហ័សដូចអ៊ុយក្រែនទេ ។ ជាមួយគ្នានេះ អ៊ុយក្រែនក៏បានមើលឃើញពីជំហរដោះស្រាយបញ្ហានយោបាយនៅលើឆាកអន្តរជាតិរបស់ចិនផងដែរ ហើយអ៊ុយក្រែនសង្ឃឹមថា ចិននឹងបន្តដើរតួដោះស្រាយការបញ្ចប់ជម្លោះរវាងអ៊ុយក្រែន និងរុស្ស៊ី ៕

ប្រភព ៖ TNN World

ប្រទេសអ៊ុយក្រែន ៖ កាលពីថ្ងៃទី២០ ខែកុម្ភៈ ប្រធានាធិបតីអាមេរិក លោក ចូ បៃដិន បានធ្វើដំណើរទៅកាន់ទីក្រុងគៀវ ប្រទេសអ៊ុយក្រែន ដោយមិនបានជូនដំណឹងជាមុនឡើយ ។ គេចាត់ទុកថា វាជាសញ្ញាដែលអាមេរិក និងប្រទេសលោកខាងលិចនឹងនាំមុខជាអ្នកគាំទ្រអ៊ុយក្រែនបន្តទៀត ខណៈសង្គ្រាមនៅអ៊ុយក្រែនជិតដល់គម្រប់ខួប១ឆ្នាំ ។

លោក ចូ បៃដិន បានធ្វើដំណើរទៅកាន់អ៊ុយក្រែនជាលើកដំបូង ចាប់តាំងពីកងទ័ពរុស្ស៊ីវាយលុកអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ។ ការមកកាន់ទីក្រុងគៀវលើកនេះ វាជារឿងគួរឱ្យភ្ញាក់ផ្អើលណាស់ ខណៈលោកមិនបានជូនដំណឹងជាមុនពីការធ្វើដំណើរ ។ កាលពីសប្តាហ៍កន្លងមក អ្នកនាំពាក្យសន្តិសុខជាតិប្រចាំសេតវិមាន លោក John Kirby បញ្ជាក់ថា មេដឹកនាំអាមេរិកគ្មានគម្រោងធ្វើដំណើរទៅអ៊ុយក្រែនទេ បើទោះជាលោកនឹងធ្វើដំណើរទៅប្រទេសប៉ូឡូញ ដែលនៅជិតគ្នាក្តី ។

សេតវិមានបានផ្សព្វផ្សាយសេចក្តីថ្លែងការណ៍របស់លោក ចូ បៃដិន ក្នុងឱកាសលោកទៅកាន់ទីក្រុងគៀវរបស់អ៊ុយក្រែនថា លោក បៃដិន មានគម្រោងជួបលោកប្រធានាធិបតីអ៊ុយក្រែន Vodimir Zelensky នៅទីក្រុងគៀវ ដើម្បីបញ្ជាក់ពីការប្តេជ្ញាចិត្តគាំទ្រអ៊ុយក្រែនសម្រាប់ប្រជាធិបតេយ្យ និងបូរណភាពទឹកដីរបស់អ៊ុយក្រែន ។ សេចក្តីថ្លែងការណ៍បញ្ជាក់ទៀតថា នៅពេលប្រធានាធិបតីរុស្ស៊ី លោក វ្ល៉ាឌីមៀ ពូទីន បើកឆាកវាយលុកអ៊ុយក្រែនជិត១ឆ្នាំ លោក បៃដិន គិតថា អ៊ុយក្រែនទន់ខ្សោយ ហើយប្រទេសលោកខាងលិចបែកបាក់គ្នា ប៉ុន្តែលោកគិតខុស ។

លោក បៃដិន បន្ថែមថា អាមេរិកនឹងផ្តល់ជំនួយកងទ័ពជាថ្មីដល់អ៊ុយក្រែនក្នុងទឹកប្រាក់ចំនួន៥០០លានដុល្លារអាមេរិក រួមទាំងគ្រាប់កាំភ្លើងធំសម្រាប់ Haimars ប្រព័ន្ធប្រឆាំងរថពាសដែក និងរ៉ាដាស៊ើបការណ៍អាកាសផងដែរ ហើយនៅសប្តាហ៍នេះ អាមេរិកនឹងប្រកាសដាក់ទណ្ឌកម្មបន្ថែមទៀតដល់មន្ត្រីជាន់ខ្ពស់ និងក្រុមហ៊ុនដែលព្យាយាមជួយរុស្ស៊ីរឿងអាវុធ ។

ចំណែកមេដឹកនាំអ៊ុយក្រែនបានបង្ហោះសារនៅលើតេឡេក្រាមថា ៖ «អ៊ុយក្រែនរីករាយទទួលស្វាគមន៍លោក បៃដិន មកកាន់ក្រុងគៀវ ហើយការមកកាន់ទឹកដីអ៊ុយក្រែន គឺសំខាន់ណាស់ក្នុងការគាំទ្រពលរដ្ឋអ៊ុយក្រែនគ្រប់រូប» ។

ជាមួយគ្នានេះ មានសេចក្តីរាយការណ៍ថា គម្រោងធ្វើដំណើរទៅកាន់ប្រទេសប៉ូឡូញរបស់លោក បៃដិន នៅថ្ងៃទី២០ ខែកុម្ភៈ គឺមេដឹកនាំអាមេរិកនឹងផ្តោតលើការរួបរួមសម្ព័ន្ធភាព និងជួយអ៊ុយក្រែន ។

សេតវិមានរាយការណ៍ថា លោក បៃដិន នឹងផ្តោតលើការនាំមុខបន្តគាំទ្រអ៊ុយក្រែនដើម្បីរក្សាសន្តិភាព និងសណ្តាប់ធ្នាប់ក្នុងពិភពលោក ហើយនៅពេលលោកស្នាក់នៅប៉ូឡូញ រហូតដល់ថ្ងៃទី២២ ខែកុម្ភៈ លោក បៃដិន មានគម្រោងជជែកពិភាក្សាជាមួយប្រធានាធិបតីប៉ូឡូញ Undersage Duda និងមេដឹកនាំបណ្តាប្រទេសអឺរ៉ុបខាងកើត ដែលជាសមាជិកអង្គការសន្ធិសញ្ញាអាត្លង់ទិកខាងជើង (ណាតូ) ដើម្បីបញ្ជាក់ពីការឯកភាពក្នុងចំណោមសម្ព័ន្ធភាពរបស់អាមេរិក ។ គួរបញ្ជាក់ថា ការធ្វើដំណើរទៅកាន់ប៉ូឡូញ គឺស្របពេលគណបក្សសាធារណរដ្ឋចាប់ផ្តើមបញ្ជូនជំនួយកងទ័ពឱ្យអ៊ុយក្រែនកាន់តែតិច ៕ ប្រភព ៖ TNN World

រដ្ឋធានីកៀវ៖ នៅក្នុងដំណើរបំពេញទស្សនកិច្ច មិនបានប្រកាសឲ្យដឹងជាមុន ទៅកាន់ក្រុងកៀវ បង្កការភ្ញាក់ផ្អើល ដល់ពិភពលោកនោះ ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានថ្លែង ថា ពូទីន បានវាយតម្លៃ មកលើសម្ពន្ធមិត្តរបស់លោកខាងលិច ខុសទាំងស្រុង ទើបលើកទ័ព ចូលលុកលុយ ទៅលើប្រទេសជិតខាងរបស់ខ្លួន ដែលទន់ខ្សោយជាង។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃអង្គារ ទី២១ ខែកុម្ភៈ ឆ្នាំ២០២៣ ថា លោក ចូ បៃដិន (Joe Biden) ប្រធានាធិបតីសហរដ្ឋអាមេរិក មានភាពក្លាហាន ដោយបានបង្ហាញវត្ដមាន នៅក្នុងប្រទេសកំពុងតែហែកហួរ ដោយសារសង្គ្រាម ខណៈការវាយប្រហារតែងតែកើតឡើងជាប្រចាំ ហើយស្ទើរតែមិនមានប្រធានាធិបតីអាមេរិកណាម្នាក់ បង្ហាញខ្លួនបែបនេះឡើយ។

ក្រុមមន្រ្ដីសេតវិមាន បានពណ៌នា អំពីដំណើរទស្សនកិច្ច មិននឹកស្មានដល់របស់ប្រធានាធិបតីសហរដ្ឋអាមេរិក លោក ចូ បៃដិន ទៅកាន់រដ្ឋធានីកៀវ ប្រទេសអ៊ុយក្រែន ថា នៅក្នុងសម័យទំនើបនេះ មិនធ្លាប់មានប្រធានាធិបតីសហរដ្ឋអាមេរិកណាម្នាក់ ធ្វើដំណើរទៅកាន់ប្រទេស កំពុងតែរងការវាយប្រហារ ជាប្រចាំបែបនេះទេ។ សូម្បីតែដំណើរបំពេញទស្សនកិច្ចរបស់ប្រធានាធិបតីសហរដ្ឋអាមេរិកមុនៗ ទៅកាន់ប្រទេសមានសង្គ្រាម ដូចជា អ៊ីរ៉ាក់ និង អាហ្វហ្កានីស្ថាន ក៏មានការគាំទ្រ ដោយវត្ដមានរបស់ទាហានបំពាក់ដោយគ្រឿងសព្វាវុធធុនធ្ងន់យ៉ាងច្រើន នៅទីនោះផងដែរ។

លោកប្រធានាធិបតី ចូ បៃដិន បានបង្ហាញវត្ដមាន នៅកណ្ដាលរដ្ឋធានីកៀវ ដោយមានប្រធានាធិបតីអ៊ុយក្រែន នៅក្បែរនោះ បានថ្លែងសុន្ទរកថាខ្លាំងៗ ជាងអ្វីដែលគាត់ថ្លែងសន្ទរកថា នៅក្នុងប្រទេសប៉ូឡូញ ខណៈនៅពេលនោះ មានសំឡេងស៊ីរ៉ែន នៃការវាយប្រហារបន្លឺឡើង។

លោក ខេត បេឌីងហ្វែលដ៍ (Kate Bedingfield) នាយកផ្នែកទំនាក់ទំនងរបស់សេតវិមាន បានបញ្ជាក់ ថា «វាពិតជាប្រថុយប្រថានខ្លាំងណាស់ ហើយមិនគួរងឿងឆ្ងល់ នៅក្នុងចិត្តរបស់អ្នកណាម្នាក់នោះ ថា លោក ចូ បៃដិន ជាអ្នកដឹកនាំ មានការយកចិត្តទុកដាក់យ៉ាងខ្លាំងបំផុត ទៅលើសម្ពន្ធមិត្ត។

នៅក្នុងការថ្លែងទៅកាន់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី និង ប្រជាជាតិអ៊ុយក្រែន នោះ លោក ចូ បៃដិន បានសង្កត់ធ្ងន់ ថា «គោលបំណងដ៏សំខាន់របស់រុស្ស៊ី ចង់លុបបំបាត់ប្រទេសអ៊ុយក្រែន ចេញពីផែនទីរបស់ពិភពលោក។ សង្គ្រាមឈ្លានពានរបស់ប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) ត្រូវទទួលបរាជ័យ។ រីឯយោធារបស់រុស្ស៊ី បានបាត់បង់ទឹកដីពាក់កណ្ដាល ដែលពួកគេបានដណ្ដើមកាន់កាប់។ ចំណែកជនជាតិរុស្ស៊ី មានវ័យក្មេងៗ ដែលមានទេពកោសល្យល្អ បានភៀសខ្លួនរាប់ម៉ឺននាក់ ចេញពីប្រទេស ហើយក៏មិនចង់ត្រឡប់ មកកាន់ប្រទេសរុស្ស៊ីវិញ»។

លោកប្រធានាធិបតី ចូ បៃដិន បានបន្ថែម ថា «ជនជាតិរុស្ស៊ីទាំងនោះ មិនត្រឹមតែរត់ចេញពីយោធាប៉ុណ្ណោះនោះទេ គឺពួកគេ បានរត់ចេញពីប្រទេសតែម្ដង ព្រោះពួកគេមើលមិនឃើញអនាគតដ៏ល្អរបស់ពួកគេ នៅក្នុងប្រទេស។ ឥឡូវសេដ្ឋកិច្ចរបស់រុស្ស៊ី គ្មានខ្នងបង្អែក ហើយស្ថិតក្នុងភាពឯកោ ដោយរស់នៅទាំងត្រដាបត្រដួស។ ប៉ុន្ដែកាលពីមុនសង្គ្រាមផ្ទុះឡើង ពូទីន បានគិត ថា អ៊ុយក្រែន មានភាពទន់ខ្សោយ ខណៈលោកខាងលិច បានបែកបាក់គ្នា។ ដូចអ្វីដែលអ្នកបានដឹកមកហើយ ហើយខ្ញុំក៏ធ្លាប់និយាយ តាំងពីដំបូង ថា លោកពូទីន រំពឹង ថា យើងមិនសាមគ្គីគ្នា ហើយពូទីន គិតថា យើងមិនមានសមត្ថភាព នៅក្នុងការឯកភាពគ្នា»។

លោកប្រធានាធិបតី ចូ បៃដិន បានបន្ដ ថា ប្រធានាធិបតី ពូទីន គិត ថា «យើងមិនអាចនាំប្រទេសផ្សេងៗ មកគាំទ្រដល់អ៊ុយក្រែន នោះឡើយ ហើយរុស្ស៊ី នឹងអាចយកជ័យជម្នះ នៅលើសង្គ្រាមនេះ។ ប៉ុន្ដែឥឡូវ យើងសាមគ្គីគ្នាបានយ៉ាងល្អខ្លាំងណាស់ ដូច្នេះឥឡូវ ខ្ញុំគិត ថា ពូទីន នឹងមិនគិតដូច្នោះបន្ដទៀតនោះឡើយ។ សង្គ្រាម អស់រយៈពេល១ឆ្នាំមកនេះ ពូទីន បានដឹងច្បាស់ ថា គាត់គិតខុស ទើបហ៊ានលើកទ័ព ចូលឈ្លានពាន នៅលើប្រទេសអ៊ុយក្រែន»។

សង្គ្រាមរបស់រុស្ស៊ី អស់រយៈពេលស្ទើរតែ១ឆ្នាំពេញមកនេះ បាន និង កំពុងតែបង្កនូវវិនាសសកម្មយ៉ាងធ្ងន់ធ្ងរ ធ្វើឲ្យទាហានទាំងសងខាង ស្លាប់ និង រងរបួស រាប់ម៉ឺននាក់។ ដោយឡែក ប្រជាជនអ៊ុយក្រែន ប្រហែលជាង១៧លាននាក់ កំពុងតែត្រូវការជំនួយយ៉ាងខ្លាំង ខណៈហេដ្ឋារចនាសម្ព័ន្ធ នៅទូទាំងប្រទេស ត្រូវរងនូវការបំផ្លិចបំផ្លាញអស់ ដែលមានតម្លៃ រាប់រយពាន់លានដុល្លារសហរដ្ឋអាមេរិក៕