ជាទូទៅមនុស្សជាច្រើន នៅពេលទិញផ្លែឈើតែងចាប់អារម្មណ៍លើសម្រស់ស្រស់ និង​ទុំប៉ុណ្ណោះ មិនសូវចាប់អារម្មណ៍លេខកូដ ដែលបានបិតនៅលើផ្លែឈើប៉ុន្មាននោះទេ។ ដោយឡែក ក៏មានអ្នកខ្លះទៀតក៏ប្រហែលធ្លាប់ចាប់អារម្មណ៍ ក៏ប៉ុន្តែមិនដឹងអត្ថន័យវាយយ៉ាងមិច។

សម្រាប់ការបិតលេខកូដនៅលើផ្លែឈើនេះ វាមានតែលើផ្លែឈើំណាដែលនាំចូលពីក្រៅស្រុកប៉ណ្ណោះ ដូច្នេះនៅ​ពេល​អ្នក​ទិញ​ផ្លែឈើ​ដែល​នាំចូល​ពី​បរទេស អ្នក​គួរ​ពិនិត្យ​មើល​លេខ​កូដ​ដែល​បាន​បិត​នៅ​លើ​វា៖

• ប្រសិន​បើ​មាន​លេខ​ចំនួន​៤ខ្ទង់ ដែល​ចាប់​ផ្ដើម​ដោយ លេខ៣ ឬ លេខ៤ មាន​ន័យ​ថា ផ្លែឈើ​នោះ​ត្រូវ​បាន​ដាំដុះ​ក្រោម​ច្បាប់​កសិកម្ម ដែល​ត្រូវ​បាន​អនុវត្ត​នៅ​ក្នុង​ប្រទេស​ជាច្រើន។ ផ្លែឈើ​ទាំងនោះ​ត្រូវ​បាន​គេ​ប្រើប្រាស់​ថ្នាំ​សម្លាប់​សត្វល្អិត និង​ជី​គីមី​សិប្បនិម្មិត
• ប្រសិន​បើ​មាន​លេខ​ចំនួន​៥ខ្ទង់ ដែល​ចាប់​ផ្ដើម​ដោយ លេខ៨ មាន​ន័យ​ថា ផ្លែឈើ​នោះ​ត្រូវ​បាន​គេ​កែប្រែ​ហ្សែន (GMO) ដូច្នេះ​អ្នក​គួរតែ​ជៀសវាង​ផ្លែឈើ​ប្រភេទ​នេះ
• ប្រសិន​បើ​មាន​លេខ​ចំនួន​៥ខ្ទង់ ដែល​ចាប់​ផ្ដើម​ដោយ លេខ៩ មាន​ន័យ​ថា ផ្លែឈើ​នោះ​គឺ​ជា​ផ្លែឈើ​ធម្មជាតិ ដែល​បាន​ដាំដុះ​ដោយ​ប្រើប្រាស់​វិធីសាស្ត្រ​តាម​បែប​ប្រពៃណី ដោយ​គ្មាន​ការ​ប្រើប្រាស់​ថ្នាំ​សម្លាប់​សត្វល្អិត ឬ​ជី​គីមី​ឡើយ។ ផ្លែឈើ​ប្រភេទ​នេះ​ហើយ​ដែល​អ្នក​គួរ​ទិញ​សម្រាប់​គ្រួសារ​របស់​អ្នក៕

ប្រភព៖ Daily Mail 

ប្រទេសអ៊ុយក្រែន ៖ នៅថ្ងៃទី២៣ ខែកុម្ភៈ ធនាគារជាតិរបស់អ៊ុយក្រែនបានបង្ហាញក្រដាសប្រាក់ថ្មីរបស់ខ្លួន ដើម្បីជាការរំលឹកខួប១ឆ្នាំ ដែលប្រទេសរុស្ស៊ីបើកប្រតិបត្តិកងទ័ពវាយលុកមកលើអ៊ុយក្រែន ។

ក្រដាសប្រាក់ថ្មីនេះមានតម្លៃ២០ Hryvnia (Hryvnia ជារូបិយប័ណ្ណអ៊ុយក្រែន ស្មើ០,៥៤ដុល្លារអាមេរិក) ដែលមានរូបទាហានអ៊ុយក្រែន៣នាក់លើកទង់ជាតិពណ៌ខៀវ និងលឿង ចំណែកផ្នែកម្ខាងទៀត គឺជារូបភាពដៃទាំងសងខាងជាប់ចំណង ដើម្បីបង្ហាញពីការបង្កឧក្រិដ្ឋកម្មសង្គ្រាមរបស់រុស្ស៊ីក្នុងដែនដីអ៊ុយក្រែន ។

ទេសាភិបាលធនាគារជាតិអ៊ុយក្រែន Andri Peachy បានថ្លែងទៅកាន់ក្រុមសារព័ត៌មានក្នុងពិធីបង្ហាញក្រដាសប្រាក់ថ្មីនេះ នៅបន្ទប់ប្រជុំកណ្តាលរបស់ធនាគារជាតិក្នុងទីក្រុងគៀវថា ដើម្បីជាការរំលឹកគម្រប់ខួបសង្គ្រាមជាមួយរុស្ស៊ី យើងបានសម្រេចចិត្តដាក់ឱ្យប្រើប្រាស់ក្រដាសប្រាក់ថ្មីនេះសម្រាប់បង្ហាញពីការឈ្លានពាន អារម្មណ៍ និងជានិមិត្តសញ្ញានៃឆ្នាំ ។ កាលពីឆ្នាំ២០២២ ធនាគារកណ្តាលបានខំប្រឹងធ្វើការយ៉ាងខ្លាំង ដើម្បីរក្សាការលូតលាស់នៃសេដ្ឋកិច្ច និងរក្សាស្ថេរភាពក្នុងប្រទេសអ៊ុយក្រែន ដែលទទួលរងការខូចខាតដោយសារសង្គ្រាម ។

ទេសាភិបាលធនាគារជាតិអ៊ុយក្រែនឱ្យដឹងថា លក្ខណៈពិសេសរបស់ក្រដាសប្រាក់ថ្មីនេះ គឺបានបង្ហាញពីសុវត្ថិភាពច្នៃប្រឌិត ហើយធនាគារបានចំណាយពេលប្រមាណ៨ខែក្នុងការរចនា និងផលិតក្រដាសប្រាក់ថ្មីឡើងមក ៕ប្រភព ៖ TNN World

ប្រទេសថៃ ៖ មន្ត្រីការិយាល័យគយតំបន់៤ និងក្រុមការងារពិសេសកងវរសេនាធំថ្មើរជើងទី៥ បានសហការគ្នាចាប់សាច់ជ្រូកក្លាស្សេចំនួន៣០តោន ស្មើទឹកប្រាក់៦លានបាត ដែលបានលួចនាំចូលមកប្រទេសថៃខុសច្បាប់តាមរយៈរថយន្តកុងតឺន័រ ឆ្លងតាមព្រំដែនស្តៅ ខេត្តសុងខ្លា ។

សាច់ជ្រូកក្លាស្សេនេះបានដាក់នៅក្នុងទូរកុងតឺន័រ ដែលមានការគ្រប់គ្រងសីតុណ្ហភាពនៅក្នុងទូរ រួចផ្ទេរទៅកាន់រថយន្តដឹកទំនិញផ្សេងទៀតនៅបរិវេណកន្លែងដឹកទំនិញ ភូមិទី២ ឃុំសាំណាក់ខាម ស្រុកស្តៅ ខេត្តសុងខ្លា ។

តាមការត្រួតពិនិត្យរបស់មន្ត្រីគយថៃឃើញថា សាច់ជ្រូកក្លាស្សេទាំងនេះបាននាំចេញពីប្រទេសប្រេស៊ីល ហើយពួកគេគ្មានលិខិតអនុញ្ញាតនាំចូល ឬឯកសារពាក់ព័ន្ធផ្សេងៗឡើយ ។

ប្រធានការិយាល័យគយតំបន់៤ បានឱ្យដឹងថា ក្រុមមន្ត្រីកំពុងតែត្រួតពិនិត្យសាច់ជ្រូកទាំងនេះថា តើពួកគេនឹងនាំយកទៅណា ដោយបានចាប់ឃុំខ្លួនអ្នកបើកបររថយន្ត និងស៊ើបសួររកអ្នកផ្សេងទៀតដែលពាក់ព័ន្ធនឹងការលួចនាំចូល និងគោលដៅដែលពួកគេប្រុងយកទៅលក់ ។

ប្រធានការិយាល័យគយតំបន់៤ បញ្ជាក់ថា ការចាប់សាច់ជ្រូកក្នុងចំនួនដ៏ច្រើននេះ គឺជាការចាប់រឹបអូសជាលើកដំបូងដែលមានការលួចនាំចូលមកតាមច្រកព្រំដែនស្តៅ ។ កាលពីពេលកន្លងមក ជនខិលខូចតែងលួចនាំសាច់សត្វចូលមកបង្កប់ជាមួយទំនិញផ្សេងៗ ហើយខាងមន្ត្រីក៏បានចាប់រឹបអូសជាច្រើនលើកផងដែរ រីឯសាច់ជ្រូកក្លាស្សេដែលចាប់បានលើកនេះ មន្ត្រីនឹងបញ្ជូនទៅនាយកដ្ឋានអភិវឌ្ឍន៍បសុសត្វ ដើម្បីយកទៅកម្ទេចចោល ៕

ប្រភព ៖ Mono News

ឯកឧត្តម វ៉ាត់ ចំរើន អគ្គលេខាធិការគណៈកម្មការរៀបចំកីឡាស៊ីហ្កេមលើកទី៣២ (CAMSOC)បានថ្លែងឱ្យដឹងថា រាជរដ្ឋាភិបាលកម្ពុជានឹងផ្តល់ប្រាក់រង្វាន់លើកទឹកចិត្តសម្រាប់អត្តពលិកដែលដណ្តើមមេដាយទាំង៣ប្រភេទពីព្រឹត្តិការណ៍ កីឡាស៊ីហ្គេមឆ្នាំ២០២៣ និងប៉ារ៉ាហ្គេមលើកទី១២។ សម្រាប់អ្នកឈ្នះមេដាយមាសនឹងទទួលបានមួយម៉ឺនដុល្លារ មេដាយប្រាក់ជាង៧ពាន់ដុល្លារ និងសំរឹទ្ធិជាង៣ពាន់ដុល្លារ។

កីឡាស៊ីហ្គេមលើកទី៣២ នឹងបើកជាផ្លូវការនាថ្ងៃទី ៥ ខែឧសភា និង បិទបញ្ចប់នាថ្ងៃ ទី ១៧ ខែឧសភា ។ប៉ុន្តែប្រភេទកីឡាខ្លះនឹងចាប់ផ្តើមពីថ្ងៃទី ២៩ ខែមេសាទៅ។ ចំណែកកីឡាអាស៊ានប៉ារ៉ាហ្គេម នឹងចាប់ផ្តើមពីថ្ងៃទី ៣ ដល់ ទី ៩ ខែ មិថុនា។ រហូតមកដល់ថ្ងៃ២៤កុម្ភៈ នេះនៅសល់តែ៧០ថ្ងៃទៀតទេ៕

ប្រទេសឥណ្ឌូណេស៊ី ៖ នៅថ្ងៃទី២៤ ខែកុម្ភៈ មានហេតុការណ៍គ្រោះរញ្ជួយដីបានកើតឡើងនៅឆ្នេរសមុទ្រឥណ្ឌូណេស៊ីចំនួន២លើក ក្នុងកម្រិត៦,៨វិកទ័រ និង៦,៣វិកទ័រ ហើយជាដំបូង នៅមិនទាន់មានសេចក្តីរាយការណ៍ពីការខូចខាត និងគ្មានរលកយក្សស៊ូណាមិទេ ។

ការិយាល័យឧតុនិយមអាកាសធាតុរបស់ឥណ្ឌូណេស៊ីរាយការណ៍ថា កាលពីវេលាម៉ោង៣ទៀបភ្លឺឈានចូលនៅថ្ងៃទី២៤ ខែកុម្ភៈ មានគ្រោះរញ្ជួយដីក្នុងកម្រិត៦,៨វិកទ័រនៅឆ្នេរសមុទ្រក្នុងខេត្តម៉ាលូគុ ដែលស្ថិតនៅភាគខាងកើតប្រទេសឥណ្ឌូណេស៊ី ។ ចំណុចកណ្តាលនៃគ្រោះរញ្ជួយដីនេះស្ថិតនៅក្នុងសមុទ្រ ដែលឆ្ងាយពីកោះ Morotai ទៅខាងភាគពាយ័ព្យក្នុងចម្ងាយ១៣៣គីឡូម៉ែត្រ ដែលមានជម្រៅ១១២គីឡូម៉ែត្រពីបាតសមុទ្រ ប៉ុន្តែមិនបណ្តាលឱ្យកើតរលកយក្សស៊ូណាមិទេ ។

ចំណែកអ្នកនាំពាក្យការិយាល័យគ្រប់គ្រង និងកាត់បន្ថយគ្រោះមហន្តរាយធម្មជាតិឥណ្ឌូណេស៊ី បានរាយការណ៍ថា គ្រោះរញ្ជួយដីនេះមិនមានអ្នករងរបួសទេ ហើយក៏មិនបណ្តាលឱ្យខូចខាតអគារ ឬផ្ទះសម្បែងដែរ ។ អ្នកនាំពាក្យរូបនេះបន្តថា មានការរំញ័រនៅលើកោះ Morotai ដែលនៅជិតចំណុចកណ្តាលនៃចំណុចរញ្ជួយដីបំផុត និងរំញ័រទៅដល់ខេត្ត Sulawesi ខាងជើងផងដែរ ។

សារព័ត៌មានរ៉យទ័រឱ្យដឹងថា មជ្ឈមណ្ឌលរញ្ជួយដីនៅអឺរ៉ុបមេឌីទែរ៉ាណេបានរាយការណ៍ពីគ្រោះរញ្ជួយដីនៅឆ្នេរសមុទ្រឥណ្ឌូណេស៊ី ក្នុងកម្រិត៦,៣វិកទ័រ នៅថ្ងៃទី២៤ ខែកុម្ភៈ ហើយចំណុចកណ្តាលរបស់វាស្ថិតក្នុងសមុទ្រក្បែរកោះ Halmahera ដែលមានជម្រៅ១០០គីឡូម៉ែត្រ និងនៅឆ្ងាយពីឆ្នេររបស់ក្រុង Tobelo ប្រមាណ១៨៥គីឡូម៉ែត្រ ៕

ប្រភព ៖ TNN World

ប្រទេសអង់គ្លេស ៖ គេសង្កេតឃើញថា នៅតាមបណ្តាផ្សារទំនើបមួយចំនួននៅប្រទេសអង់គ្លេស បានដាក់កំណត់លើការទិញបន្លែ និងផ្លែឈើខ្លះរបស់អតិថិជនដែលមកទិញទំនិញ ខណៈខាងផ្សារជួបបញ្ហាក្នុងការស្វែងរកទំនិញ ដោយសារអាកាសធាតុមិនអំណោយផលសម្រាប់ការប្រមូលទិន្នផលកសិកម្មនៅភាគខាងត្បូងតំបន់អឺរ៉ុប និងអាហ្វ្រិកខាងជើង ។

កាលពីមុន អង់គ្លេសបានប្រឈមនឹងការខ្វះខាតប៉េងប៉ោះ ប៉ុន្តែពេលនេះ អង់គ្លេសខ្វះខាតបន្លែ និងផ្លែឈើជាច្រើនមុខ ដែលធ្វើឱ្យបណ្តាអ្នកលក់រាយត្រូវកំណត់បរិមាណក្នុងការលក់ទំនិញរបស់ខ្លួន ដោយសារកសិករដាំដុះ និងឈ្មួញកណ្តាលប្រឈមនឹងអាកាសធាតុមិនអំណោយផល ដូចជា អាកាសធាតុត្រជាក់ខ្លាំង និងមានភ្លៀងធ្លាក់ខ្លាំង ហើយកាលពីពេលថ្មីៗនេះ មានគ្រោះទឹកជំនន់ផងនោះ ធ្វើឱ្យប៉ះពាល់ដល់ការប្រមូលទិន្នផលកសិកម្ម ។ ក្រៅពីនេះ អាកាសធាតុអាក្រក់ធ្វើឱ្យមានការលុបចោលនាវាដឹកជញ្ជូនទំនិញផងដែរ ដែលបង្កើតបញ្ហាកាន់តែច្រើនដល់ផ្នែកផ្គត់ផ្គង់ ។

អ្នកតំណាងមកពីសមាគមលក់រាយអង់គ្លេស Andrew Opie លើកឡើងថា អាកាសធាតុអាក្រក់ គឺជាឧបសគ្គក្នុងការដាំដុះបន្លែផ្លែឈើនៅអឺរ៉ុប និងអាហ្វ្រិកខាងជើង ហើយប៉ះពាល់ដល់ការប្រមូលទិន្នផលកសិកម្មមួយចំនួន ដូចជា ប៉េងប៉ោះ និងម្ទេសជាដើម ។

ផ្សារទំនើបលំដាប់នាំមុខនៅអង់គ្លេសបានឱ្យដឹងថា បច្ចុប្បន្ន ផ្សារទំនើបកំពុងប្រឈមនឹងការស្វែងរកបន្លែ ផ្លែឈើមួយចំនួនដែលដាំដុះក្នុងភូមិភាគនេះ ដូច្នេះ ចាំបាច់ត្រូវដាក់កំណត់ការទិញបន្លែផ្លែឈើជាបណ្តោះអាសន្នសិន ដើម្បីឱ្យអតិថិជនអាចទិញផលិតផលដែលពួកគេត្រូវការ ។ ចំណែកទំនិញដែលផ្សារបានដាក់កំណត់លើការទិញ រួមមាន ប៉េងប៉ោះ ម្ទេស តាសក់ ស្ពៃបូកគោ broccoli ស្ពៃក្តោប និងផ្លែ raspberry ។ រីឯផ្សារទំនើបខ្លះទៀតបានដាក់កំណត់លើការទិញទំនិញមិនឱ្យលើសពី២មុខសម្រាប់អតិថិជនម្នាក់ ៕

ប្រភព ៖ TNN Earth

រដ្ឋធានីប៊ែរឡាំង៖ ក្រោយពេលប្រមុខការទូតចិន បានធ្វើដំណើរទៅបំពេញទស្សនកិច្ច នៅក្នុងរដ្ឋធានីមូស្គូ ដើម្បីជួបជាមួយនឹងប្រធានាធិបតីរុស្ស៊ី លោក វ៉្លាឌីមៀ ពូទីន នោះមក មេដឹកនាំក្រុងប៊ែរឡាំង បានព្រមាន អំពីទំនាក់ទំនង រវាងប្រទេសមហាអំណាចទាំង២នេះ។

សារព័ត៌មាន CNA បានចេញផ្សាយ កាលពីព្រឹក ថ្ងៃសុក្រ ទី២៤ ខែកុម្ភៈ ឆ្នាំ២០២៣ ថា លោក អូឡាហ្វ សូលហ្ស៍ (Olaf Scholz) អធិការបតីអាល្លឺម៉ង់ កាលពីថ្ងៃព្រហស្បតិ៍ ថា មិនគួរមានការបំភាន់ លើប្រទេសចិន ដែលបាន និង កំពុងស្វែងរកតួនាទីរបស់ខ្លួន ក្លាយជាអ្នកសម្រុះសម្រួល រវាងរុស្ស៊ី និង អ៊ុយក្រែន នៅក្នុងសង្គ្រាមលុកលុយរបស់ក្រុងមូស្គូ អស់រយៈពេល១ឆ្នាំមកនេះ។

លោកអធិការបតីអាល្លឺម៉ង់ បានបញ្ជាក់ នៅក្នុងបទសម្ភាសន៍មួយ ជាមួយនឹងបណ្ដាញផ្សព្វផ្សាយសាធារណៈ ZDF ថា «យើងមិនគួរឲ្យមានការបំភាន់ អំពីប្រទេសចិន នោះឡើយ។ រហូតមកដល់ពេលនេះ ពួកគេមិនប្រកាន់ជំហរ ប្រឆាំងនឹងរុស្ស៊ី»។

សេចក្ដីថ្លែងការណ៍របស់លោកអធិការបតី បានកើតឡើង ដោយសារតែក្រុងប៉េកាំង ត្រូវបានរៀបចំ ដើម្បីផ្ដល់គម្រោងសន្ដិភាព សម្រាប់សង្គ្រាម នៅអ៊ុយក្រែន នៅសប្ដាហ៍នេះ ចំពេលខួបលើកទី១ នៃការឈ្លានពានរបស់រុស្ស៊ី នៅលើប្រទេសជិតខាង កាលពីថ្ងៃទី២៤ ខែកុម្ភៈ ឆ្នាំ២០២២។ ប្រមុខការទូតចិន លោក វ៉ាង យី (Wang Yi) កាលពីថ្ងៃពុធ បានជួបជាមួយនឹងសមភាគីរុស្ស៊ី លោក ស៊ើរហ្គេ ឡាវរ៉ូវ (Segei Lavrov) រដ្ឋមន្រ្ដី ក្រសួងការបរទេស និង លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី នៅក្នុងរដ្ឋធានីមូស្គូ។

ក្រោយពេលដំណើរទស្សនកិច្ចរបស់រដ្ឋមន្រ្ដីក្រសួងការបរទេសចិន នោះមក ក្រុងមូស្គូ បានបញ្ជាក់ ថា ក្រុងប៉េកាំង បានបង្ហាញនូវទស្សនៈរបស់ខ្លួន អំពីវិធីសាស្ត្រដោះស្រាយជម្លោះនយោបាយ រវាងប្រទេសរុស្ស៊ី និង អ៊ុយក្រែន។ ក្រុងប៉េកាំង កំពុងតែស្វែងរកតួនាទីរបស់ខ្លួន ជាភាគីអព្យាក្រឹត នៅក្នុងជម្លោះនេះ ខណៈចិននៅតែរក្សាទំនាក់ទំនងយ៉ាងជិតស្និទ្ធជាមួយនឹងសម្ពន្ធមិត្តយុទ្ធសាស្ត្ររុស្ស៊ី។

ដោយឡែក សហរដ្ឋអាមេរិក និង អង្គការណាតូ បានបញ្ចេញសំឡេងនូវការព្រួយបារម្ភ ថា ចិន អាចនឹងមានគម្រោង ផ្ដល់គ្រឿងសព្វាវុធដល់រុស្ស៊ី ដើម្បីបង្កើនកិច្ចខិតខំប្រឹងប្រែងដល់សង្គ្រាមរបស់ក្រុងមូស្គូ។ លោកអធិការបតី បានសង្កត់ធ្ងន់ ថា ដំណើរទស្សនកិច្ចចុងក្រោយរបស់គាត់ ទៅកាន់ក្រុងប៉េកាំង កាលពីខែវិច្ឆិកា ថា គាត់បានធ្វើឲ្យមេដឹកនាំចិនប្រាកដ ថា ការផ្គត់ផ្គត់គ្រឿងសព្វាវុធដល់រុស្ស៊ី នឹងមិនអាចទទួលយកបាននោះឡើយ»៕