សហរដ្ឋអាមេរិក ៖ អតីតប្រធានាធិបតីអាមេរិក លោក ដូណាល់ ត្រាំ បានបង្ហាញខ្លួននៅក្រុង East Palestine រដ្ឋអូហៃអូ សហរដ្ឋអាមេរិក នៅថ្ងៃទី២២ ខែកុម្ភៈ ព្រមទាំងនិយាយវាយប្រហាររដ្ឋាភិបាលបច្ចុប្បន្ន ដែលព្រងើយកន្តើយចំពោះហេតុការណ៍រថភ្លើងផ្ទុកសារជាតិគីមីជួបគ្រោះថ្នាក់ធ្លាក់ពីផ្លូវ កាលពីថ្ងៃទី៣ ខែកុម្ភៈ កន្លងមក ហើយបណ្តាលឱ្យសារធាតុគីមីទាំងនេះហូរទៅកាន់ប្រភពទឹកធម្មជាតិ ។

លោក ដូណាល់ ត្រាំ អះអាងថា ការបង្ហាញខ្លួនរបស់លោកនៅពេលនេះ នឹងជួយធ្វើឱ្យរដ្ឋាភិបាលក្រោមការដឹកនាំរបស់លោកប្រធានាធិបតី ចូ បៃដិន ងាកមកផ្តល់ភាពសំខាន់ក្នុងការដោះស្រាយបញ្ហាដែលកើតឡើង ។

មុននេះ ពលរដ្ឋអាមេរិកដែលរស់នៅជិតទីកន្លែងកើតហេតុ ក៏បានចេញមកអំពាវនាវឱ្យរដ្ឋាភិបាលអាមេរិកបញ្ជាក់ឱ្យច្បាស់ដល់ពួកគេ អំពីវិធានការផ្តល់ប្រាក់សំណង និងដោះស្រាយបញ្ហាសារធាតុគីមីគ្រោះថ្នាក់នេះហូរចូលទៅកាន់ប្រភពទឹកនានា រួមទាំងសាយភាយទៅលើអាកាស ដែលធ្វើឱ្យប៉ះពាល់ដល់ការរស់នៅរបស់ពួកគេដោយផ្ទាល់ ។

Mark George អ្នកគ្រប់គ្រងហិរញ្ញវត្ថុនៃក្រុមហ៊ុន Norfolk Southern Corporation និងអ្នកផ្តល់សេវាកម្មលើរថភ្លើងដែលជួបគ្រោះថ្នាក់នេះ ក៏បានប្រកាសពីការទទួលខុសត្រូវលើការចាយវាយក្នុងការសម្អាត និងដោះស្រាយរឿងសារធាតុគីមីគ្រោះថ្នាក់ហូរទៅកាន់ប្រភពទឹក ព្រមទាំងផ្តល់ទឹកប្រាក់ចំនួន១.១០០លានដុល្លារអាមេរិកសម្រាប់ដោះស្រាយបញ្ហា ។

ជាមួយគ្នានេះ មានសេចក្តីរាយការណ៍ថា កាលពីថ្ងៃទី២៣ ខែកុម្ភៈ រដ្ឋមន្ត្រីក្រសួងគមនាគមន៍អាមេរិក Pete Buttijage ក៏គ្រោងធ្វើដំណើរមកចូលរួមស្តាប់លទ្ធផលការស៊ើបអង្កេតរឿងរថភ្លើងធ្លាក់ផ្លូវនៅរដ្ឋអូហៃអូផងដែរ ។ លើសពីនេះ ក៏មានមន្ត្រីមកពីសហភាពផ្លូវដែកសហព័ន្ធអាមេរិក និងការិយាល័យត្រួតពិនិត្យសារធាតុគ្រោះថ្នាក់ ៕ ប្រភព ៖ TNN World

ប្រទេសរុស្ស៊ី ៖ កាលពីថ្ងៃទី២២ ខែកុម្ភៈ មន្ត្រីការទូតជាន់ខ្ពស់របស់ចិន លោក Wang Yi បានពិភាក្សាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅក្រុងមូស្គូ ដោយបានបង្ហាញពីទំនាក់ទំនងជិតស្និទ្ធទ្វេភាគី ខណៈឈានដល់គម្រប់ខួប១ឆ្នាំដែលរុស្ស៊ីចូលឈ្លានពានអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ ។

លោក Wang Yi ប្រធានការិយាល័យគណៈកម្មការកិច្ចការបរទេសនៃគណៈកម្មាធិការមជ្ឈិមបក្សកុម្មុយនិស្តចិន បានថ្លែងក្នុងអំឡុងពេលពិភាក្សាជាមួយប្រធានាធិបតីរុស្ស៊ី លោក ពូទីន នៅក្រុងមូស្គូថា ចិន និងរុស្ស៊ី ត្រៀមខ្លួនជាស្រេចដើម្បីពង្រឹងកិច្ចសហប្រតិបត្តិការជាយុទ្ធសាស្ត្រ ហើយវិបត្តិអាចផ្លាស់ប្តូរជាឱកាសបានជានិច្ច ។ លើសពីនេះ សម្ព័ន្ធភាពរវាងចិន និងរុស្ស៊ី មិនធ្លាប់ត្រូវជនទី៣ ចូលជ្រៀតជ្រែកឡើយ ហើយចិននឹងបន្តប្រកាន់ជំហរត្រឹមត្រូវ មានគោលដៅ រួមទាំងបង្ហាញការដោះស្រាយវិបត្តិតាមមធ្យោបាយនយោបាយ ។

ចំណែកលោក ពូទីន ថ្លែងថា សម្ព័ន្ធភាពរវាងរុស្ស៊ី និងចិន កំពុងតែដំណើរការតាមផែនការគ្រោងទុក និងបានពិភាក្សាពីចំណុចសំខាន់ថ្មីជាច្រើនផ្នែក ជាពិសេស ពាណិជ្ជកម្មទ្វេភាគីរវាងចិន និងរុស្ស៊ីបានលូតលាស់លើសពីការរំពឹងទុក និងអាចមានតម្លៃខ្ពស់រហូតដល់២០ម៉ឺនលានដុល្លារអាមេរិកក្នុង១ឆ្នាំ គឺកើនលើសពីតួលេខចាស់ចំនួន១៨ម៉ឺន៥ពាន់លានដុល្លារអាមេរិក ។

លោកពូទីន បន្ថែមថា ប្រទេសទាំងពីរមានកិច្ចសហប្រតិបត្តិការជាបន្តបន្ទាប់ក្នុងកិច្ចការអន្តរជាតិ ហើយលោកកំពុងរង់ចាំលោកប្រធានាធិបតីចិន ស៊ី ជិនពីង មកកាន់ប្រទេសរុស្ស៊ីតាមការគ្រោងទុក ។ ជាមួយគ្នានេះ លោក ពូទីន បានអធិប្បាយពីស្ថានការណ៍រវាងប្រទេសផងដែរថា មានភាពស្មុគស្មាញ ហើយកិច្ចសហការរវាងរុស្ស៊ី និងចិន មានសារសំខាន់សម្រាប់រក្សាស្ថេរភាពនៃស្ថានការណ៍រវាងប្រទេស ។

ចំណែកអ្នកនាំពាក្យក្រសួងការបរទេសអាមេរិក លោក Ned Price លើកឡើងថា ការធ្វើដំណើរទៅកាន់ក្រុងមូស្គូរបស់លោក Wang Yi បង្ហាញឱ្យឃើញច្បាស់ថា ចិនមិនបានប្រកាន់ជំហរកណ្តាលទេ ប៉ុន្តែចិនជ្រើសរើសឈរនៅខាងរុស្ស៊ីយ៉ាងច្បាស់ក្រឡែត ហើយបើទោះជាអាមេរិកមិនទាន់មានសញ្ញាណាមួយថា ចិននឹងត្រៀមបញ្ជូនអាវុធឱ្យរុស្ស៊ី តែគេជឿថា រឿងនេះមិនហួសពីការពិចារណាទេ ។

ការធ្វើដំណើរមកកាន់ក្រុងមូស្គូរបស់មន្ត្រីជាន់ខ្ពស់ចិន គឺក្រោយពីអាមេរិកចោទប្រកាន់ចិនថា កំពុងពិចារណាបញ្ជូនអាវុធជួយកងទ័ពរុស្ស៊ីដើម្បីវាយលុកអ៊ុយក្រែន ។ វានឹងធ្វើឱ្យសង្គ្រាមត្រូវប្រឈមមុខគ្នារវាងកងទ័ពរុស្ស៊ី និងអ៊ុយក្រែន ជាមួយក្រុមសម្ព័ន្ធមិត្តសន្ធិសញ្ញាអាត្លង់ទិកខាងជើង (ណាតូ) ដែលមានអាមេរិកជាមេដឹកនាំ ៕ ប្រភព ៖ TNN World

ប្រទេសចិន ៖ Youon Technology ជាក្រុមហ៊ុនផលិតកង់មានទីតាំងនៅក្រុងឆាងចូវ ខេត្ត Jiangsu ភាគខាងកើតប្រទេសចិន បានបង្ហាញថា គំរូកង់ប្រភេទថ្មីរបស់ក្រុមហ៊ុន ដែលដើរដោយថាមពលអ៊ីដ្រូសែន និងអាចបត់បាន កំពុងតែចូលក្នុងសង្វាក់ផលិតកម្មនៅក្រុងឆាងចូវ ជាផ្លូវការហើយ ។

កង់ប្រភេទថ្មីនេះមានរូបរាងស្រដៀងគ្នានឹងកង់ទូទៅដែរ ប៉ុន្តែវាបានបំពាក់អ៊ីដ្រូសែន fuel cell និងឧបករណ៍ផ្ទុកអ៊ីដ្រូសែនមានសម្ពាធទាប ដោយវានឹងដើរតួនាទីបង្កើតថាមពលកម្លាំងសម្រាប់ជំរុញកង់ ។

បើប្រៀបធៀបជាមួយកង់អគ្គិសនីទូទៅដែលប្រើប្រាស់ថ្ម lithium គឺអ៊ីដ្រូសែន fuel cell មានគុណសម្បត្តិល្អជាង ដូចជា សុពលភាពនៃការប្រើប្រាស់មានរយៈពេលយូរជាង ហើយវាជាមិត្តជាមួយបរិយាកាសច្រើនជាង ដោយសារវាបង្កើតទឹកតែប៉ុណ្ណោះនៅពេលដំណើរការ ។

ក្រុមហ៊ុនផលិតកង់ប្រភេទថ្មីនេះបញ្ជាក់ថា កង់ប្រើប្រាស់អ៊ីដ្រូសែនជំនាន់ថ្មីនេះ ត្រូវការចំណាយថាមពលតាមកម្លាំងល្បឿនរបស់អ្នកជិះកង់ ហើយវានឹងបញ្ឈប់ការចំណាយថាមពលបន្ថែមនៅពេលកម្រិតល្បឿនស្មើ២៤គីឡូម៉ែត្រ/១ម៉ោង ។ កង់ជំនាន់ថ្មីអាចបត់បាននេះ ក្រុមហ៊ុននឹងដំណើរការផលិតនៅចុងខែមីនា ឆ្នាំ២០២៣ ហើយសង្ឃឹមថា នឹងអាចផលិតកង់បានចំនួន២០ម៉ឺនគ្រឿង/១ឆ្នាំ នៅត្រឹមឆ្នាំ២០២៥ ៕

ប្រភព ៖ beartaiBRIEF