ប្រទេសជប៉ុន ៖ លោក Kimura Takahiro ជាអ្នកបង្កើតរឿងគំនូរជីវចល Code Geass បានស្លាប់បាត់បង់ជីវិតនៅក្នុងវ័យ៥៨ឆ្នាំ កាលពីថ្ងៃទី៥ ខែមីនា ឆ្នាំ២០២៣ កន្លងមក ដោយសារលោកមានជំងឺ Amyloidosis ឬជំងឺខុសប្រក្រតីនៅក្នុងរាងកាយ ។ តាមគ្រូពេទ្យបញ្ជាក់ថា រាងកាយរបស់លោកបានបង្កើតជាតិប្រូតេអ៊ីនអាមីឡូអ៊ីតច្រើនពេក រហូតដល់វាប្រមូលផ្តុំគ្នានៅតាមអវៈយវៈ និងធ្វើឱ្យអវៈយវៈធ្វើការខុសប្រក្រតី ។

ព័ត៌មានពីការស្លាប់របស់លោក Kimura Takahiro គឺមានការបញ្ជាក់ពីក្រុមគ្រួសាររបស់លោក ហើយវែបសាយឈ្មោះ https://geass.jp/ ក៏បានចុះផ្សាយព័ត៌មានពីការស្លាប់របស់លោកជាផ្លូវការ ។ គេចាត់ទុកថា គឺជាការបាត់បង់បុគ្គលសំខាន់មួយរូបក្នុងឧស្សាហកម្មគំនូរជីវចលរបស់ប្រទេសជប៉ុន ។ ខាងក្រុមការងាររបស់ Code Geass បានបង្ហាញពីការសោកស្តាយនៃការស្លាប់របស់បុគ្គលសំខាន់មួយរូបនៅក្នុងក្រុម ដោយគ្មានថ្ងៃវិលត្រឡប់ ។

ក្រៅពីរឿង Code Geass លោក Kimura Takahiro ក៏ធ្លាប់បានបង្កើតរឿងគំនូរជីវចល (animation) សម្រាប់តុក្កតាផ្សេងទៀតជាច្រើនរឿង ដូចជារឿង samurai trooper, Grand Sword, Gundam, Naruto និងរឿង monster hunt ៕

ប្រភព ៖ sanook

រាជធានីស្ដុកខម (Stockholm)៖ ក្រោយពេលប្រមុខអង្គការណាតូ បានប្រកាស កាលពីប៉ុន្មានថ្ងៃមុន ពីការប្រើប្រាស់អាវុធរបស់អ៊ុយក្រែន ច្រើនលើពីអង្គការសម្ពន្ធមិត្តយោធាដ៏ធំមួយនេះផលិតនោះមក បណ្ដាក្រុមរដ្ឋមន្រ្ដី ក្រសួងការពារជាតិសហភាពអឺរ៉ុប បានជួបជុំគ្នា នៅក្នុងទីក្រុងស្ដុកខម ប្រទេសស៊ុយអែត ដើម្បីផ្គត់ផ្គង់គ្រឿងសព្វាវុធ និង គ្រាប់រំសេវ ជួយដល់ប្រទេសអ៊ុយក្រែន។

នៅក្នុងសង្គ្រាមរបស់ក្រុងមូស្គូ អស់រយៈពេលជាង១ឆ្នាំកន្លងកនេះ កងទ័ពការពារទឹកដីរបស់អ៊ុយក្រែន បានប្រើប្រាស់គ្រាប់កាំភ្លើងយ៉ាងច្រើន ទើបក្រុងកៀវ បានត្អូញត្អែរ អំពីការខ្វះខាតគ្រាប់រំសេវ។ ដោយឡែក សហរដ្ឋអាមេរិក បានផលិតគ្រាប់កាំភ្លើងផ្លោង ប្រភេទ ១៥៥មិល្លីម៉ែត្រ ត្រឹមតែប្រហែលជាង១៤ ០០០គ្រាប់ប៉ុណ្ណោះ នៅមុនពេលសង្គ្រាមរបស់រុស្ស៊ី បានផ្ទុះឡើង នៅលើទឹកដីរបស់អ៊ុយក្រែន។ ប៉ុន្ដែបច្ចុប្បន្ន សហរដ្ឋអាមេរិក បានបង្កើននូវការផលិតគ្រាប់រំសេវ សម្រាប់កាំភ្លើងផ្លោងប្រភេទនេះ កើនឡើង រហូតដល់ ៩០ ០០០គ្រាប់ សម្រាប់ជួយដល់ប្រទេសអ៊ុយក្រែន ផងដែរ។

ជាមួយនឹងការត្អូញត្អែររបស់អ៊ុយក្រែន នោះ ក្រុមរដ្ឋមន្ត្រី ក្រសួងការពារជាតិសហភាពអឺរ៉ុបបានយល់ព្រមបង្កើនល្បឿន ផ្ដល់គ្រាប់រំសេវ និង រៀបចំគម្រោងផលិតគ្រាប់កាំភ្លើងឱ្យបានកាន់តែច្រើនឡើងបន្ថែមទៀត សម្រាប់ជួយដលើក្រុងកៀវ។ ស្របគ្នានេះ កងទ័ពការពារទឹកដីរបស់អ៊ុយក្រែន កំពុងតែក្រាញននៀល ការពារទីក្រុងបាកមូត (Bahkmut) ឲ្យខាងតែបាន ថ្វីបើត្រូវទីក្រុងមួយនេះ ត្រូវកងកម្លាំងប្រដាប់អាវុធរបស់រុស្ស៊ី ឡោមព័ទ្ធយ៉ាងណាក្ដី។

លោក ជេនស៍ ស្តូលថែនប៊ឺគ (Jens Stoltenberg) អគ្គលេខាធិការអង្គការណាតូ បានបញ្ជាក់ ថា ទីក្រុងបាកមុតរបស់អ៊ុយក្រែន ស្ថិតនៅភាគខាងកើត ប្រទេស អាចនឹងធ្លាក់ចូលទៅក្នុងកណ្តាប់ដៃរបស់រុស្ស៊ី នៅក្នុងរយៈពេលប៉ុន្មានថ្ងៃខាងមុខនេះ ក្រោយការវាយប្រយុទ្ធគ្នាយ៉ាងស្វិតស្វាញ អស់រយៈពេលជាង៦ខែមកនេះ។ រុស្ស៊ី បាន និង កំពុងតែបញ្ជូនកងទ័ព មកកាន់ទីក្រុងបាក់មុត កាន់តែច្រើនឡើង ថ្វីបើទោះក្រុងមូស្គូ បានខូចខាតកងទ័ព នៅលើសមរភូមិមួយនេះ រាប់ម៉ឺននាក់យ៉ាងណាក្ដី។

លោកប្រមុខអង្គការណាតូ រូបនេះ បានថ្លែងទៅកាន់ក្រុមអ្នកកាសែត កាលពីថ្ងៃពុធ ទី៨ ខែមីនា ខណៈទៅចូលរួមប្រជុំក្រុមរដ្ឋមន្ត្រី ក្រសួងការពារជាតិ នៅក្នុងទីក្រុងស្ដុកខម ប្រទេសស៊ុយអែត ថា គេមិនអាចបដិសេធ ថា ទីក្រុង Bakhmut នឹងអាចធ្លាក់ទៅក្រោមការកាន់កាប់របស់រុស្ស៊ី នៅក្នុងរយៈពេលប៉ុន្មានថ្ងៃខាងមុខនេះឡើយ។ ដូច្នេះយើងត្រូវបញ្ជាក់ ថា មិនត្រូវមើលស្រាល ទៅលើកម្លាំងទាហានរុស្ស៊ីនោះទេ»។

ដោយឡែក លោក យ៉ែវហ្គេនី ព្រីហ្គោហ្ស៊ី (Yevgeny Prigozhin) ប្រធានក្រុមហ៊ុនទាហានស៊ីឈ្នួលរបស់រុស្ស៊ី Wagner Group ដែលកំពុងតែដឹកនាំការវាយលុក នៅក្នុងសមរភូមិក្ដៅ ទីក្រុងបាកមុត បានប្រកាស ថា ទាហានរបស់ខ្លួន បានដណ្ដើមផ្នែកខាងកើត ទីក្រុងឧស្សាហកម្មនេះហើយ។ ដោយឡែកអគ្គសេនាធិការកងទ័ពអ៊ុយក្រែន បានបញ្ជាក់ កាលពីថ្ងៃពុធ ទី៨ មីនា ថា «ថ្វីបើកម្លាំងសត្រូវ កំពុងតែរងនូវការខូចខាត និងបាត់បង់ច្រើនយ៉ាងណាក៏ដោយ ក៏ពួកគេនៅតែបន្ត វាយលុកសម្រុកចូលមកក្នុងទីក្រុងបាក់មុតដែរ»។

លោក វ៉ូឡូឌីមៀរ ហ្សេឡែនស្គី (volodymyr zelenskyy) ប្រធានាធិបតីអ៊ុយក្រែន បានបញ្ជាក់ ថា ប្រសិនបើទីបាកមុត ធ្លាក់ទៅក្រោមការគ្រប់គ្រងរបស់រុស្ស៊ី មែន កងទ័ពរបស់ក្រុមមូស្គូ អាចនឹងវាយទម្លុះចូលខ្សែការពាររបស់អ៊ុយក្រែន ហើយអាចវាយរុលទៅមុខបន្ដទៀត ចូលទៅកាន់ទីក្រុងនានា នៅនៅក្បែរនោះ ។ ស្របគ្នានេះ លោកប្រធានាធិបតី បានពិភាក្សាជាមួយលោកនាយអគ្គសេនាធិការ និង មេទ័ពកំពូល អំពីយុទ្ធសាស្រ្ដសង្គ្រាម កាលពីថ្ងៃចន្ទ។ ប៉ុន្ដែប្រមុខកងទ័ពទាំងនោះ បានសម្រេចមិនឲ្យមានការដកទ័ព ហើយត្រូវតែបញ្ជូនកងទ័ពបន្ថែម ទៅពង្រីងខ្សែការពាររបស់ខ្លួន។

លោក ស៊ើរហ្គេ សយហ្គូ (Sergei Shoigu) រដ្ឋមន្ត្រី ក្រសួងការពារជាតិរបស់រុស្ស៊ី បានប្រាប់ដល់ក្រុមមន្ត្រីយោធារបស់គាត់ កាលពីថ្ងៃអង្គារ ថា ការដណ្ដើមកាន់កាប់បានទីក្រុងបាកមូត នឹងជួយឲ្យកម្លាំងទាហានរបស់រុស្ស៊ី បន្ដប្រតិបត្តិការវាយលុកទៅកាន់តំបន់ផ្សេងៗទៀត នៅភាគខាងកើត ប្រទេសអ៊ុយក្រែន ។

លោក ជេនស៍ ស្តូលថែនប៊ឺគ (Jens Stoltenberg) អគ្គលេខាធិការអង្គការណាតូ បានសង្កត់ធ្ងន់ ថា បណ្ដាប្រទេសលោកខាងលិច និង សម្ពន្ធមិត្ត នឹងបន្តផ្តល់ជំនួយយោធា និង គ្រាប់រំសេវ ជួយដល់អ៊ុយក្រែន ដើម្បីធ្វើសង្គ្រាមប្រឆាំងនឹងរុស្ស៊ី។ កាលពីឆ្នាំ២០២២ បណ្ដាប្រទេសជាសម្ពន្ធមិត្ត បានផ្ដល់ជំនួយយោធា និង សេដ្ឋកិច្ច ជួយដល់អ៊ុយក្រែន មានទំហំទឹកប្រាក់ជិត១៥០ពាន់លានអឺរ៉ូ ហើយក្នុងនោះមាន៦៥ពាន់លានអឺរ៉ូ ជាជំនួយយោធា។ ករណីនេះ ជាការចាំបាច់ខ្លាំងណាស់ ដែលលោកខាងលិច និង សម្ពន្ធមិត្ត ត្រូវតែបង្កើននូវការផលិតគ្រាប់រំសេវឲ្យបានកាន់តែច្រើន សម្រាប់បំពេញឃ្លាំងស្ដុករបស់ខ្លួន ហើយអាចបន្តជួយផ្គត់ផ្គង់ដល់អ៊ុយក្រែន បន្ថែមទៀត។

ជាមួយគ្នានេះ ក្រុមរដ្ឋមន្ត្រី ក្រសួងការពារជាតិ សហភាពអឺរ៉ុប ក៏បានជួបពិភាក្សាគ្នាជាមួយនឹងរដ្ឋមន្ត្រីការពារជាតិអ៊ុយក្រែន លោក អូឡិកស៊ី រេស្នីកូវ (Oleksiy Reznikov) អំពីតម្រូវការបន្ទាន់របស់ អ៊ុយក្រែន និង គម្រោងពង្រឹងឧស្សាហកម្មការពារជាតិរបស់អឺរ៉ុប សម្រាប់រយៈពេលវែង៕

រាជធានីបាងកក៖ ចាប់តាំងពីឆ្នាំ១៩១២ រហូតមកដល់ពេលនេះ ប្រទេសថៃ ធ្លាប់ធ្វើរដ្ឋប្រហារ និង មានគម្រោងរដ្ឋប្រហារ សរុប២២លើក ប៉ុន្ដែឥឡូវ មេដឹកនាំរដ្ឋប្រហារយោធាចុងក្រោយរបស់ព្រះរាជាណាចក្រអាស៊ានមួយនេះ គឺលោក ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានប្ដេជ្ញា មិនឲ្យមានទង្វើបែបនេះ បន្ដទៀតនោះឡើយ។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃសុក្រ ទី១០ ខែមីនា ឆ្នាំ២០២៣ ថា លោកឧត្ដមសេនីយ៍ ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានប្ដេជ្ញា កាលពីថ្ងៃព្រហស្បតិ៍ ថា គាត់នឹងមិនអនុញ្ញាតឲ្យមានការធ្វើរដ្ឋប្រហារបន្ដទៀតនោះទេ។ ប៉ុន្ដែលោកឧត្ដមសេនីយ៍រូបនេះ បានហៅការផ្ដួលរំលំរដ្ឋាភិបាល ដឹកនាំដោយគណបក្សភឿថៃ នៅក្នុងអំពើរដ្ឋប្រហារ កាលពីអំឡុងឆ្នាំ២០១៤នោះ ជាការប៉ុនប៉ង កាត់បន្ថយនូវការភ័យខ្លាច ខណៈការបោះឆ្នោតជាសកលរបស់ប្រទេសថៃ កាន់តែខិតជិតចូលមកដល់។

លោកឧត្ដមសេនីយ៍ ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានឆ្លើយតបទៅនឹងសំណួរមួយចំនួន ទាក់ទងនឹងការអត្ថាធិប្បាយ បានសរសេរនៅលើបណ្ដាញសង្គមហ្វេសប៊ុក កាលពីថ្ងៃពុធ ដោយលោក ប៉្រាវីត វង់ស៊ូវ៉ាន់ (Prawit Wongsuwan) ឧបនាយករដ្ឋមន្ត្រីថៃ និង ជាមេដឹកនាំគណបក្ស Palang Pracharath (ផាឡាំង ប្រ៉ាចារ៉ាត ហៅកាត់ PPRP) ។

នៅក្នុងការបង្ហោះ នៅលើបណ្ដាញសង្គមហ្វេសប៊ុកនោះ លោកឧត្ដមសេនីយ៍ ប៉្រាវីត វង់ស៊ូវ៉ាន់ (Prawit Wongsuwan) ឧបនាយករដ្ឋមន្ត្រីថៃ ដែលជាបេក្ខជននាយករដ្ឋមន្រ្ដីរបស់គណបក្ស Palang Pracharath (ផាឡាំង ប្រ៉ាចារ៉ាត ហៅកាត់ PPRP) បានបញ្ជាក់ ថា គាត់អាចធ្វើបានល្អប្រសើរជាងអ្នកដទៃ នៅក្នុងការលើកកម្ពស់នូវការបង្រួបបង្រួមជាតិ និង ការសម្របសម្រួលនូវការអភិវឌ្ឍន៍ជាតិ រវាងក្រុមអ្នកនយោបាយ និង ឥស្សរជន។ ជាមួយគ្នានេះ គាត់មានការយល់ដឹងច្រើន អំពីរចនាសម្ព័ន្ធអំណាចរបស់ប្រទេស ដែលមានឥទ្ធិពល ទៅលើការតស៊ូអំណាច និង ការចែកចាយអំណាច នៅក្នុងប្រទេសអាស៊ានមួយនេះ។

លោកឧបនាយករដ្ឋមន្ត្រីថៃ រូបនេះ បានបញ្ជាក់ ថា រចនាសម្ព័ន្ធ មានច្រើនជាងអ្វីដែលបានលើកតម្កើង និង ផ្សព្វផ្សាយ នៅក្នុងចំណោមសាធារណជន។ ការប្រជែងគ្នា រវាងមនោគមន៍វិជ្ជាចំនួន២ មានភាពតានតឹង អស់រយៈពេលជាច្រើនឆ្នាំកន្លងមកហើយ ដោយសារពួកឥស្សរជន សម្លឹងមើលនូវភាពល្ងង់ខ្លៅរបស់អ្នកនយោបាយ និង ការមិនសូវយល់ដឹងរបស់ប្រជាជន នៅក្នុងការបោះឆ្នោតជ្រើសរើសបុគ្គលមានសមត្ថភាព សម្រាប់ការគ្រប់គ្រងប្រទេស។

លោកឧត្ដមសេនីយ៍ ប៉្រាវីត វង់ស៊ូវ៉ាន់ (Prawit Wongsuwan) ឧបនាយករដ្ឋមន្ត្រីថៃ បានសង្កត់ធ្ងន់ ថា «ខ្ញុំបានដឹង ថា អ្នកគាំទ្ររដ្ឋប្រហារ មិនដែលបញ្ឈប់ នៅក្នុងការក្ដោមអំណាចនោះទេ។ បញ្ហានេះ ខ្ញុំមើលឃើញ អំពីស្ថានភាពទាំងមូល ដោយការយល់ដឹង អំពីមូលហេតុ ដែលអ្នកមានឥទ្ធិពល និង អ្នកដឹកនាំប្រទេស គិត និង ធ្វើការរួមគ្នា។ ខ្ញុំមានគោលបំណង អញ្ជើញឥស្សរជនទាំងអស់ មកចូលរួម នៅក្នុងការអភិវឌ្ឍជាតិ ដោយមានចេតនា បញ្ចប់ជម្លោះនយោបាយ នៅក្នុងប្រទេសរបស់យើង»។

រហូតមកដល់ពេលនេះ មានសំណួរជាច្រើន បានចោទសួរ ទៅលើលោកឧត្តមសេនីយ៍ ប្រាយុទ្ធ ចាន់អូចា នាយករដ្ឋមន្រ្ដី ដែលបានដឹកនាំកងទ័ព ធ្វើរដ្ឋប្រហារ នៅថ្ងៃទី២២ ខែឧសភា ឆ្នាំ២០១៤ ដោយបានផ្ដួលរំលំរដ្ឋាភិបាល ដឹកនាំដោយគណបក្សភឿថៃ រហូតនាំឲ្យមានការតវ៉ា តាមដងផ្លូវ អស់រយៈពេលជាច្រើនខែ។ ថាតើនឹងមានជម្លោះនយោបាយកើតឡើង រហូតអាចនឹងនាំឲ្យមានរដ្ឋប្រហារយោធា ស្រដៀងគ្នាបែបនេះ នៅថ្ងៃអនាគតដែរឬយ៉ាងណា?

លោកឧត្ដមសេនីយ៍ ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានបញ្ជាក់ ថា នឹងមិនមានជម្លោះធ្ងន់ធ្ងរនោះទេ។ ប្រទេសថៃ នឹងមិនវិលទៅរកស្ថានភាពបែបនោះឡើយ។ ចំណែកប្រទេសជាតិ ត្រូវតែមានសន្ដិភាព ហើយប្រជាជន ត្រូវតែរស់នៅប្រកបដោយភាពសប្បាយរីករាយ។

នៅពេលមានសំណួរសួរ ថា តើនឹងមានរដ្ឋប្រហារណាមួយកើតឡើងបន្ដទៀតដែរឬអត់ បើគាត់មិនអាចត្រឡប់ មកធ្វើជានាយករដ្ឋមន្ត្រី ក្រោយការបោះឆ្នោតនោះ? ប៉ុន្ដែលោកឧត្តមសេនីយ៍ ប្រាយុទ្ធ បានចោទសួរទៅវិញថា តើនរណានឹងធ្វើរដ្ឋប្រហារ? ប៉ុន្ដែក្រោយពេលមានសំណួរចោទសួរម្តងទៀត ថាតើនឹងមានរដ្ឋប្រហារមួយផ្សេងទៀតឬយ៉ាងណាដែរ? លោក ប្រយុទ្ធ បានថ្លែងទៀត ថា«ខ្ញុំបាននិយាយ ជាយូរមកហើយ ថា រដ្ឋប្រហារ នៅឆ្នាំ២០១៤ ជារដ្ឋប្រហារចុងក្រោយ ហើយក៏មិនគួរមានរដ្ឋប្រហារម្តងទៀតនោះដែរ។

លោកឧត្ដមសេនីយ៍ ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានសង្កត់ធ្ងន់ ថា «បញ្ហានេះ ក៏អាស្រ័យលើអ្នកទាំងគ្នា ជួយទប់ស្កាត់វា។ ប្រសិនបើជម្លោះធ្ងន់ធ្ងរ កើតឡើងម្ដងទៀត ខ្ញុំមិនដឹង ថា ត្រូវដោះស្រាយយ៉ាងណានោះដែរ ព្រោះខ្ញុំមិនមានអ្វីពាក់ព័ន្ធនឹងបញ្ហានេះ នាពេលឥឡូវនេះទេ។

ជាមួយគ្នានេះ ក៏មានសំណួរចោទ ថា តើពាក្យចចាមអារ៉ាម អំពីរដ្ឋប្រហារ នៅមុនការបោះឆ្នោត មានគោលបំណងបំបាក់មុខគាត់ ឬយ៉ាងណានោះ? លោកឧត្តមសេនីយ៍ ប្រាយុទ្ធ ចាន់អូចា បាននិយាយថា គាត់មិនជឿដូច្នេះនោះទេ។

លោកឧត្តមសេនីយ៍ ប្រាយុទ្ធ ដែលបានចាកចេញពីគណបក្ស PPRP ទៅចូលរួមជាមួយ United Thai Nation Party (UTN) បានទទូច ថា «ខ្ញុំនៅតែមានលក្ខខណ្ឌល្អ ជាមួយលោកឧត្ដមសេនីយ៍ ប៉្រាវីត វង់ស៊ូវ៉ាន់ (Prawit Wongsuwan) ហើយគាត់នៅតែដូចជាបងប្អូនរបស់ខ្ញុំ ថ្វីបើតែបើឥឡូវ យើងនៅគណបក្សផ្សេងគ្នាយ៉ាងក៏ដោយ»។

បច្ចុប្បន្ន លោកឧត្ដមសេនីយ៍ ប្រាយុទ្ធ ចាន់អូចា ក្លាយជាប្រធានអ្នកយុទ្ធសាស្រ្តរបស់គណបក្ស UTN ហើយគាត់ត្រូវបានគេលើក ជាបេក្ខជននាយករដ្ឋមន្ត្រីរបស់គណបក្សមួយនេះ៕

ក្រុមហ៊ុន Adidas បានបង្ហាញពីអាជីវកម្មរបស់ខ្លួនប្រចាំឆ្នាំ២០២២ ថា ក្រុមហ៊ុនបានបាត់បង់ប្រាក់ចំណូលក្នុងត្រីមាសទី៤ ឆ្នាំ២០២២ ចំនួន៤៨២លានយូរ៉ូ ក្រោយពីក្រុមហ៊ុនផ្តាច់ទំនាក់ទំនងជាមួយក្រុមហ៊ុន Yeezy និង Kanye West កាលពីខែតុលា ឆ្នាំ២០២២ កន្លងមក ។

ប្រាក់ចំណូលរបស់ Adidas នៅឆ្នាំ២០២២ ដែលជាក្រុមហ៊ុនផលិតសម្ភារៈកីឡាសំខាន់ៗរបស់ប្រទេសអាល្លឺម៉ង់ ស្មើ២,២៥ម៉ឺនលានយូរ៉ូ កើនឡើងពីឆ្នាំ២០២១ ត្រឹមតែ៦% ប៉ុណ្ណោះ និងទទួលប្រាក់ចំណេញសុទ្ធតែ២៥៤លានយូរ៉ូ ដូច្នេះ វាបានធ្លាក់ចុះរហូតដល់៨៣% ពីឆ្នាំ២០២១ ។

តួលេខគួរឱ្យភ្ញាក់ផ្អើលនេះ ដោយសារមកពីកត្តាជាច្រើនយ៉ាង ជាពិសេស ការផ្តាច់ទំនាក់ទំនងជាមួយក្រុមហ៊ុន Kanye West និងបញ្ឈប់ការលក់ផលិតផល adidas Yeezy ហើយក្រុមហ៊ុនគ្មានផែនការណាមួយចំពោះផលិតផលដែលនៅសេសសល់នេះទេ ។ លើសពីនេះ ការផ្គត់ផ្គង់ផលិតកម្ម និងផលិតផលក្នុងស្តុកដែលក្រុមហ៊ុនបានផលិតលើសចំនួន ហើយមិនទាន់បានលក់ចេញ ការបិទហាងនានានៅប្រទេសរុស្ស៊ីដែលកំពុងមានសង្គ្រាមជាមួយអ៊ុយក្រែន ខណៈការលក់ផលិតផលនៅចិនមិនសូវល្អ បានធ្វើឱ្យក្រុមហ៊ុន Adidas បាត់បង់ប្រាក់ចំណូលតែម្តង ។

BjOrn Gulden ជា CEO របស់ Adidas បានបង្ហាញពីផែនការអនាគតរបស់ក្រុមហ៊ុនថា ៖ «នៅឆ្នាំ២០២៣នេះ គឺជាឆ្នាំដែលយើងត្រូវផ្លាស់ប្តូរសម្រាប់ជាមូលដ្ឋានគ្រឹះនៅឆ្នាំ២០២៤-២០២៥ ហើយយើងត្រូវកាត់បន្ថយផលិតផលក្នុងស្តុក និងបញ្ចុះតម្លៃ ដើម្បីឱ្យក្រុមហ៊ុនអាចទទួលបានប្រាក់ចំណេញនៅឆ្នាំ២០២៤ ។ Adidas មានវត្ថុធាតុដើមច្រើនដើម្បីជួយឱ្យក្រុមហ៊ុនទទួលបានជោគជ័យ ប៉ុន្តែអ្វីដែលត្រូវធ្វើ គឺងាកមករកគោលដៅរបស់យើងដូចជា ផលិតផល អតិថិជន ហាងទំនិញ និងកីឡាករ» ។

គួរបញ្ជាក់ថា Adidas គឺជាក្រុមហ៊ុនរបស់ប្រទេសអាល្លឺម៉ង់ ដែលផលិតផលិតផលកីឡាជាច្រើនប្រភេទដូចជា ស្បែកជើង សម្លៀកបំពាក់ និងឧបករណ៍ផ្សេងទៀត ។ កាលពីខែកុម្ភៈ ឆ្នាំ២០២២ ក្រុមហ៊ុន Adidas បានបង្ហាញផលិតផលថ្មីរបស់ខ្លួនឈ្មោះ adidas Sportswear ជាសម្លៀកបំពាក់កីឡាសម្រាប់ការហាត់ប្រាណផងដែរ ៕
ប្រភព ៖ The standardpop

យោងតាមគណៈកម្មការសុវត្ថិភាពផលិតផលអ្នកប្រើប្រាស់របស់ប្រទេសអាមេរិក បានឱ្យដឹងថា ក្រុមហ៊ុន Disney  បានប្រមូលមកវិញសម្រាប់សម្លៀកបំពាក់កុមារប្រមាណជា៨៧០០០ឈុត ចូលមកស្តុកវិញ ក្រោយពីអ្នកជំនាញរកឃើញថា មានកម្រិតទឹកថ្នាំលើសកម្រិតដែលអាចប៉ះពាល់ដល់សុខភាពកុមារ។

ឈុតសម្លៀកបំពាក់ទាំងនេះ ត្រូវបានដាក់លក់តាំងពីឆ្នាំ២០២១ មកម្ល៉េះ ដោយមានតម្លៃចន្លោះពី៥ដុល្លារដល់ ២៥ដុល្លារ ដែលភាគច្រើនមាននៅតាមផ្សារធំៗរបស់អាមេរិក និងថែមទាំងក្នុងវេបសាយ Amazon ផងដែរ។

ក្រោមហ៊ុន Disney បានធ្វើការចេញមុខសុំទោស ហើយថែមទាំងឱ្យអ្នកដែលបានទិញសម្លៀកបំពាក់នោះ ធ្វើការផ្ញើរត្រលប់មកវិញ ហើយពួកគេនឹងសងជំនឿចិត្ត នូវតម្លៃដែលពួគគេបានចំណាយ។ ដោយឡែកសម្រាប់អ្នកដែលទិញតាមអនឡាយ ក្រៅពីសហរដ្ឋអាមេរិក សូមធ្វើការបោះចោលជាបន្ទាន់។

សូមជម្រាបថា ករណីដែលសម្លៀកបំពាក់បានដាក់លើសកម្រិតទឹកថ្នាំ វានឹងប៉ះពាល់ដល់សុខភាពស្បែក ជាពិសេសកុមារងាយគ្រោះ៕

ប្រទេសសិង្ហបុរី ៖ តាមការវិភាគរបស់ Financial Times ពាក់ព័ន្ធនឹងតម្លៃអចលនទ្រព្យ ការធ្វើដំណើរតាមជើងហោះហើរ និងកត្តាជាច្រើនទៀតឃើញថា ហុងកុងបានបាត់បង់តំណែងជាមជ្ឈមណ្ឌលកណ្តាលរបស់អាស៊ានទៅឱ្យគូប្រជែងក្នុងតំបន់ គឺសិង្ហបុរី ។ ការបាត់បង់តំណែងនេះ ដោយសារហុងកុងបានបិទប្រទេសអស់រយៈពេលជាច្រើនឆ្នាំដើម្បីទប់ស្កាត់ជំងឺកូវីដ និងទើបបានបើកប្រទេសទទួលភ្ញៀវទេសចរឡើងវិញ ក្រោយពីជំងឺកូវីដធូរស្រាល ។

លោក John Lee នាយកប្រតិបត្តិតនៃតំបន់រដ្ឋបាលពិសេសហុងកុងបានបញ្ចុះបញ្ចូលដើម្បីឱ្យពិភពលោកជឿថា បើទោះជាមានជំងឺកូវីដរាតត្បាតនៅហុងកុង និងការបង្ក្រាបភាពចលាចលផ្នែកនយោបាយក្តី ប៉ុន្តែហុងកុងនៅតែបើកទទួលការធ្វើអាជីវកម្មរបស់វិនិយោគិន ហើយហុងកុងនៅតែជាមជ្ឈមណ្ឌលកណ្តាលផ្នែកហិរញ្ញវត្ថុនាំមុខគេក្នុងអាស៊ានផងដែរ ។

ទោះយ៉ាងណា ភាពសំខាន់ក្នុងលំដាប់តំបន់របស់ហុងកុងបានធ្លាក់ចុះពីតំណែង ដោយសារហុងកុងទើបតែបើកប្រទេសទទួលភ្ញៀវទេសចរឡើងវិញក្រោយបិទប្រទេសអស់រយៈពេល៣ឆ្នាំ ផ្ទុយមកវិញ សិង្ហបុរីបានក្លាយជាប្រទេសមួយក្នុងតំបន់អាស៊ាន ដែលបើកប្រទេសឡើងវិញក្នុងអំឡុងពេលជំងឺកូវីដរាតត្បាត ។

តាមទិន្នន័យរបស់ Sobie Aviation បញ្ជាក់ថា កាលពីឆ្នាំ២០២២ ហុងកុងបានបាត់បង់តំណែងអាកាសយានដ្ឋានអន្តរជាតិរបស់ខ្លួន ដែលធ្លាប់មានមនុស្សច្រើនបំផុតក្នុងតំបន់អាស៊ានទៅឱ្យសិង្ហបុរី ។ ជារៀងរាល់ខែ មានយន្តហោះមកចុះចតនៅអាកាសយានដ្ឋានសិង្ហបុរីច្រើនជាងហុងកុង តាំងពីខែមករា ឆ្នាំ២០២២ រហូតដល់បច្ចុប្បន្ន ហើយសិង្ហបុរីមានអ្នកធ្វើដំណើរចូលប្រទេសរហូតដល់៧០% បើធៀបនឹងរយៈពេលមុនផ្ទុះជំងឺកូវីដ ខណៈចំនួនអ្នកធ្វើដំណើរចូលហុងកុងមានត្រឹមតែជាងពាក់កណ្តាលប៉ុណ្ណោះ បើធៀបនឹងអំឡុងពេលមុនផ្ទុះកូវីដ ។

ក្រៅពីនេះ ការគ្រប់គ្រងប្រតិបត្តិការផ្នែកបច្ចេកវិទ្យារបស់មេដឹកនាំចិន បានបង្កើនការទាក់ទាញឱ្យសិង្ហបុរីក្លាយជាប្រទេសគោលដៅសម្រាប់អ្នកមានទ្រព្យសម្បត្តិច្រើន និងការវិនិយោគរបស់ពួកគេ ។ ទោះយ៉ាងណា ហុងកុងនៅតែទាក់ទាញវិនិយោគិនជាច្រើននាក់ ហើយបើក្នុងទីផ្សារភាគហ៊ុនវិញ ហុងកុងនៅតែនាំមុខសិង្ហបុរីដដែល ដោយតម្លៃការទិញ-លក់ក្នុងទីផ្សារភាគហ៊ុនរបស់ហុងកុងច្រើនជាងសិង្ហបុរីរហូតដល់៧ដង ៕ ប្រភព ៖ AEC connect