ទោះបីជាបានទទួលមរណភាពទៅហើយក្តី ក៏ប៉ុន្តែកំពូលមេដឹកនាំនៅអាសុី៣រូបនេះ ត្រូវបានគេអប់សាកសពទុកអស់រាប់ទសវត្ស ជំនួសពីការបូជា ឬបញ្ចុះ។ ការធ្វើបែបនេះ គឺដើម្បីបង្ហាញដល់ក្មេងៗជំនាន់ក្រោយនៃប្រទេសពួកគេនីមួយៗ ថាមេដឹកនាំរបស់គេរូបនេះ ជាវីរបុរសស្នេហាជាតិ និងបានជួយកសាងជាតិ។
ខាងក្រោមនេះជាមេដឹកនាំអាសុី៣រូប ដែលត្រូវបានគេរក្សាសាកសពទុករាប់ទសវត្ស៖
+ លោក ម៉ៅ សេទុង
លោកប្រធាន ម៉ៅ បានស្លាប់នៅថ្ងៃទី៩ ខែកញ្ញា ឆ្នាំ១៩៧៦។ លោកត្រូវគេអប់សាកសពរក្សាទុក ដើម្បីដាក់តាំងបង្ហាញចាប់តាំងពីឆ្នាំ១៩៧៧មកម៉្លេះ នៅសាលអនុស្សាវរីយ៍ម៉ៅសេទុង ក្នុងទីលាន Tiananmen Square នៃទីក្រុងប៉េកាំង
+លោក គីម អ៊ីលសុង និងលោក គីម ជុងអ៊ីល
សាកសពបិតាស្ថាបនិកកូរ៉េខាងជើងគឺលោក គីម អ៊ីលសុង និងកូនប្រុសរបស់លោកគឺលោក គីម ជុងអ៊ីល ត្រូវបានអប់ទុកក្នុងមឈូសកញ្ចក់នៅវិមាន Kumsusan នៃចេតិយ Sun ស្ថិតក្នុងក្រុងព្យុងយ៉ាង។
ទីកន្លែងតាំងសពអតីតមេដឹកកូរ៉េខាងជើងនេះមានទាហានឈរចាំយាមការពារគ្រប់ជ្រុងជ្រោយ។ ភ្ញៀវបរទេស និងភ្ញៀវជាតិត្រូវបានអនុញ្ញាតឲ្យចូលទស្សនាបានគ្រប់ៗគ្នា តែត្រូវគោរពតាមបទបញ្ជាស្លៀកពាក់យ៉ាងតឹងរ៉ឹង និងត្រូវឱនក្បាលគោរពសពចំនួន៣ដង។
+លោក ហូជីមិញ
លោក ហូជីមិញ បានទទួលមរណភាពនៅថ្ងៃទី២ ខែកញ្ញា ឆ្នាំ១៩៦៩។ សពអតីតមេដឹកនាំវៀតណាមរូបនេះត្រូវដាក់តាំងបង្ហាញនៅក្នុងមឈូសកញ្ចក់ ស្ថិតនៅក្នុងចេតិយមួយហៅថា “Hồ Chí Minh Mausoleum” ក្នុងទីក្រុងហាណូយ ចាប់តាំងពីឆ្នាំ១៩៧៥មកម៉្លេះ។ កន្លែងតាំងបង្ហាញសពនេះក្នុង១ឆ្នាំៗទទួលបានភ្ញៀវទេសចរទៅទស្សនារាប់ពាន់នាក់ឯណោះ៕